1, 2. 1) ¿Tuku max natlawa pi nakgalhskinaw Jehová «asta tukuya kilhtamaku»? 2) ¿Tuku xlakata kinkamakgpuwantiniyan xliʼakxilhtitkan xlakskujnin Dios xala makgasa?

«¿ASTA tukuya kilhtamaku, Jehová?». Uma takgalhskinin tlawakgolh chatiy palakachuwinanin, Isaías chu Habacuc (Is. 6:11; Hab. 1:2). Anta kSalmo 13, Mapakgsina David nachuna makgtati kgalhskininalh (Sal. 13:1, 2). Asta Jesucristo na tlawalh uma takgalhskinin akxni akxilhli pi nitu xkgalhikgo takanajla latamanin (Mat. 17:17). Wa xlakata ni kaks nalilakawanaw komo nachuna natakgalhskinaw.

² ¿Tuku max natlawa pi nakgalhskinaw Jehová «asta tukuya kilhtamaku»? Max wi tuku nitlan titaxtunitaw. Max lipatinamaw xlakata linawa kata o xlakata tatatlayaw. Max nitlan makgkatsiyaw xlakata lamaw «kxaʼawatiya kilhtamaku» (2 Tim. 3:1). Max nachuna nakinkamaxlajwaniyan nitlan xtayatkan nema kgalhikgo latamanin. Xlikana, kinkamakgpuwantiniyan akxni katsiyaw pi xlakskujnin Dios xala makgasa wankgolh tuku xmakgkatsikgo chu Jehová ni kamalakgaxokgelh.

3. ¿Tuku nakinkamakgtayayan akxni titaxtuyaw tuku tuwa?

 ³ ¿Tuku nakinkamakgtayayan akxni titaxtuyaw tuku tuwa? Dios malakpuwanilh Santiago, tiku xtutala Jesús, xlakata xmastalh uma tastakyaw: «Wacha kaliwaniyan natalanin kaj kakgalhkgalhinanti lantla xliminat nkimPuchinakan» (Sant. 5:7). Chuna, talakaskin putum nakgalhkgalhinanaw. Pero ¿tuku wamputun xakgalhkgalhinanin nawanaw chu la nalimasiyayaw uma tayat?

4, 5. 1) ¿Tuku wamputun xakgalhkgalhinanin nawanaw chu la nalimasiyayaw? 2) ¿Tuku lichuwinalh Santiago xlakata kgalhkgalhinankan? (Kaʼakxilhti xapulana dibujo).

⁴ Chuna la wan Biblia, xakgalhkgalhina nawana wa akgtum tayat nema limasiyayaw akxni Dios kinkamaxkiyan xʼespíritu santo. Komo ni wa xtamakgtay Dios, akinin lu tuwa namakgkatsiyaw xakgalhkgalhinanin nawanaw. Uma tayat akgtum xtamaskiwin Dios chu lu xlakaskinka xlakata limasiyayaw pi paxkiyaw Jehová chu kinatalankan. Komo ni xakgalhkgalhinanin nawanaw, taxlajwani tapaxkit nema lakgalhiniyaw (1 Cor. 13:4; Gál. 5:22). Xakgalhkgalhinanin nawanaw tatalakxtumi amakgapitsi tayat nema lu xlakaskinka xlikgalhit kstalanina Cristo. Akgtum liʼakxilhtit, kgalhkgalhinankan wamputun natayaniya chu natlajaya taʼakglhuwit pero ankgalhin xatapaxuwan natawilaya (Col. 1:11; Sant. 1:3, 4). Nachuna wamputun nalipatinana chu ni namakgaxokgonana chu nikxni namakgxtakgaw Dios maski lhuwa tuku natitaxtuyaw. Apulaktu, Biblia kinkawaniyan pi xlakaskinka nakatsiyaw pi talakaskin nakgalhkgalhinanaw. Wa uma tuku lu xlakaskinka katsiniyaw tuku wan Santiago 5:7, 8 (kalikgalhtawakga).

⁵ ¿Tuku xlakata talakaskin nakgalhkgalhiyaw asta akxni Jehová natlawa tuku lakpuwanit? Santiago lichuwinalh pi tatakgsaw chuna la chatum chanana. ¿Tuku xlakata? Xlakata chanana liskuja nachan talhtsi, pero nila tuku tlawa xlakata tlan natawila kilhtamaku chu nila tuku tlawa xlakata lakapala nastaka. Nachuna nila tlawa pi lakapala natitaxtu kilhtamaku. Wa xlakata talakaskin nakgalhkgalhi asta akxni katiyatni namakgala «xastlan xtawakat». Nachuna akinin, kgalhkgalhimaw pi Jehová namakgantaxti tuku malaknunit, pero lhuwa tuku nila tlawayaw (Mar. 13:32, 33; Hech. 1:7). Chuna la chanana, talakaskin nakgalhkgalhinanaw.

6. ¿Tuku katsiniyaw xpalakata palakachuwina Miqueas?

⁶ Tuku titaxtumaw la uku xtachuna la kxkilhtamaku palakachuwina Miqueas. Xla xlama akxni xmapakgsinama nixatlan mapakgsina Acaz. Ama kilhtamaku, xtlawakgo putum tuku nixatlan chu latamanin lu xmatlanikgoya «tuku nixatlan» (kalikgalhtawakga Miqueas 7:1-3). Komo xkatsi pi nila xlakgpali tuku xlama, lichuwinalh: «Pero kilakata, xlakata Jehová skgalalh naktawila. Xlikana nakkgalhkgalhinan xlakata kiDios kilakgmaxtuna. KiDios nakinkgaxmatni» (Miq. 7:7). Miqueas xatapaxuwan kgalhkgalhinalh chu akinin nachuna xatapaxuwan nakgalhkgalhinanaw.

7. ¿Tuku xlakata xatapaxuwan nakgalhkgalhiyaw asta akxni Jehová namakgantaxti tuku malaknunit?

⁷ Komo kintakanajlakan xtachuna la xla Miqueas, xatapaxuwan nakgalhkgalhinanaw asta akxni Jehová natlawa tuku lakpuwanit. ¿Tuku xlakata? Xlakata naʼakgatekgsaw, kalilakpuwaw tiku tanuma kpulachin chu kgalhkgalhima akxni namakgnikan. Maski ni lakaskin pi nachin ama kilhtamaku, nila tuku tlawa chu kaj xlikgalhkgalhit. Pero akinin lu tanu kimpalakatakan. Komo katsiyaw pi Jehová namakgantaxti tuku malaknunit pi nakinkamaxkiyan latamat nema ni kgalhi xlisputni, chuna natlawa kilhtamaku akxni xlilat, xatapaxuwan kgalhkgalhimaw  akxni chuna natlawa. Stalaniyaw uma tastakyaw: «Lakimpi tapaxuwan xlipaks natalayatit ntu nakamininiyan, chu napaxuwanalipinatit» (Col. 1:11, 12). Jehová nitlan katilimakgkatsilh komo ni xatapaxuwan nakgalhkgalhiyaw chu komo nitlan xlichuwinaw xlakata lu makgapalama (Col. 3:12).

8. Akxni nalichuwinanaw xliʼakxilhtitkan makgapitsi latamanin xala makgasa, ¿tuku kuenta natlawayaw?

⁸ ¿Tuku nakinkamakgtayayan tlakg xatapaxuwan nakgalhkgalhinanaw? Lichuwinankan xliʼakxilhtitkan makgapitsi latamanin xala makgasa tiku kgalhkgalhinankgolh asta akxni Jehová xmakgantaxtilh tuku xmalaknunit (Rom. 15:4). Akxni nalichuwinanaw, kuenta natlawayaw la xlimakgas kgalhkgalhikgolh, tuku xlakata xatapaxuwan kgalhkgalhinankgolh chu tuku tasikulunalin makglhtinankgolh.

9, 10. ¿La xlimakgas kgalhkgalhikgolh Abrahán chu Sara xlakata Jehová xmakgantaxtilh makgapitsi tuku xkamalaknuninit?

⁹ Pulana kalichuwinaw Abrahán chu Sara. Xlakata limasiyakgolh “takanajla chu takgalhkgalhin”, makglhtinankgolh tuku xkamalaknunikanit. Biblia wan «cha nchu [Abrahán], lantla nkgalhkgalhilh» maxkika tamalaknun xlakata sikulunatlawaka chu malhuwika xfamilia (Heb. 6:12, 15). Nachuna tuku xmalaknunikanit makgas xkilikgantaxtulh. Wa xlakata Abrahán chuntiyaku xkgalhkgalhilh. Talakkaxlan nema Jehová tatlawalh Abrahán tsukulh kgantaxtu 14 xla nisán kata 1943 akxni nina xmin Jesús. Ama kilhtamaku Abrahán, Sara chu tiku lakxtum xtalamakgolh patakutkgolh kgalhtuchokgo wanikan Éufrates chu tanukgolh  kTiyat nema xKawanikanit pi Nakamaxkikan. Pero Abrahán kgalhkgalhilh puxamakitsis kata xlakata akxni kata 1918 xlakachilh xkgawasa Isaac. Chu alistalh kgalhkgalhipa 60 kata xlakata akxni kkata 1858 xlakachinkgolh xnatanatni Esaú chu Jacob (Heb. 11:9).

¹⁰ ¿Na lipaxuwalh Abrahán Tiyat nema xKawanikanit pi Nakamaxkikan? Biblia wan pi Jehová «ni wa ntimaxkilh nakgalhiy, asta ni mpala pakgtsu lantla nalikatayay xtuwan; wampi timalaknunilh mpi namaxkiy, xmakaʼananat nawan, chu wa xkilhtsukut nakgalhiy alistalh, maski ni naj ti xanan xkam» (Hech. 7:5). Akxni la Abrahán patakutli kgalhtuchokgo Éufrates, titaxtulh 430 kata asta akxni xkamanan malhuwikgolh tiku xlatamakgolh ama kkatiyatni (Éx. 12:40-42; Gál. 3:17).

11. 1) ¿Tuku xlakata xatapaxuwan kgalhkgalhinalh Abrahán? 2) ¿Tuku tasikulunalin namakglhtinan Abrahán xlakata kgalhkgalhinalh?

¹¹ Abrahán ni akxilhli putum tuku Jehová xmalaknuninit, pero xatapaxuwan kgalhkgalhilh xlakata xkgalhini takanajla Jehová (kalikgalhtawakga Hebreos 11:8-12). ¿Lilakpuwanaw tapaxuwan nema namakgkatsikgo akxni nakamalakastakwanikan kParaíso? Kaks nalilakawan akxni nakatsi tuku wan Biblia xlakata xlatamat chu xlakata xkamanan. * Nachuna, nalipaxuwa akxni nakatsi pi lu xlakaskinka litaxtulh xlakata xkgantaxtulh xtalakaskin Jehová xlakata tamalaknun. Xlikana, naʼakxilha pi maski makgas kgalhkgalhilh lu tlan kitaxtulh.

12, 13. 1) ¿Tuku xlakata talakaskilh pi José xkgalhkgalhinalh? 2) ¿Tuku tayat kgalhilh José?

¹² Chatum kxuyatanat Abrahán na limasiyalh pi xakgalhkgalhina xwanit. Xwanikan José chu nitlan tuku titaxtulh. Pulana, staka la chatum skujni akxni xkgalhi akgkutujun kata. Alistalh, liyawaka taʼakgsanin pi xlekgamanamputun xpuskat xmalana. Uma kaj taʼakgsanin pero José tamaknuka kpulachin (Gén. 39:11-20; Sal. 105:17, 18). Maski José ni xmakgxtakga Dios, xtasiya pi nitu xmakglhtinama tasikulunalin wata kaj xpatinama. Pero titaxtulh akgkututu kata putum talakgpalilh. José taxtulh kpulachin chu xlichatiy tiku tlakg xlakaskinka litaxtulh kʼEgipto (Gén. 41:14, 37-43; Hech. 7:9, 10).

¹³ ¿Li taxlajwanilh José putum tuku li patinalh? ¿Nialh lipawa xDios, Jehová? Ni. ¿Tuku xlakata lu kgalhkgalhinalh? Xlakata xkanajlani Jehová. Katsilh pi wa Jehová tiku chuna xtlawama. Wa xlakata kawanilh xnatalan: «Ni kapekuantit, ¿kwi xlakgxokgo Dios? Mimpalakatakan, wixinan xlakpuwanitantit tuku nitlan kimpalakata. Pero Dios xlakpuwanit tuku xatlan, xlakata naklakskuja chuna la ktlawama la uku, xlakata ni nanikgo lhuwa latamanin» (Gén. 50:19, 20). Alistalh, José akxilhli pi tlan kitaxtulh xlakata kgalhkgalhinalh.

14, 15. 1) ¿Tuku xlakata kaks kinkamalakawaniyan xlakata kgalhkgalhinalh David? 2) ¿Tuku makgtayalh David xlakata nakgalhkgalhinan?

¹⁴ Mapakgsina David nachuna nitlan tuku titaxtulh. Maski Jehová laksakli akxni kajku kgawasa xwanit xlakata mapakgsina xlitaxtulh anta kʼIsrael, David akgkukitsis kata kgalhkgalhilh xlakata wa xmapakgsinalh (2 Sam. 2:3, 4). Pero akxni nina xchan kilhtamaku xlitsalanit xwanit mapakgsina Saúl, tiku xmakgniputun. * Wa xlakata, David xtalakaskin pi alakatanu niku xʼalh latama o anta xtawi kʼakgtum lhuku. Alistalh, Saúl nilh kʼakgtum guerra. Maski chuna, David chuntiya akgtujun kata kgalhkgalhilh xlakata xmapakgsinalh xlikalanka Israel (2 Sam. 5:4, 5).

 ¹⁵ ¿Tuku xlakata David xatapaxuwan kgalhkgalhinalh? Xla mastalh xtakgalhtin anta kSalmo 13, anta niku makgtati kgalhskininalh la xlimakgas namakgapala xtaʼakglhuwit. Lichuwinalh: «Pero akit klipawanan, y kkatsi xlakata kanikxniwa kilakgalhamana. Kinaku napaxawa, akxni wix nakilakgmaxtuya. Kintiku Dios, akit naktliniyan, porque lhuwa litlan kintlawaninita» (Sal. 13:5, 6, nota). David xlipawan xtapaxkit Jehová nema ni makgxtakgnan. Xatapaxuwan xkgalhkgalhima akxni Jehová xmasputulh xtaʼakglhuwit. Nachuna, xlilakpuwan la Jehová xmakgtayanit makgasa. Xlikana, David xkatsi pi tlan xkitaxtulh xlakata xkgalhkgalhinama.

16, 17. ¿La limasiyakgonit Jehová chu Jesús pi xatapaxuwan kgalhkgalhinamakgo?

¹⁶ Akxni Jehová kinkawaniyan pi kakgalhkgalhinaw, ni kgalhkgalhi pi katlawaw tuku xla ni katitlawalh. Wata xla akgtum lu tlan liʼakxilhtit xlakata xakgalhkgalhina (kalikgalhtawakga 2 Pedro 3:9). Akgtum liʼakxilhtit, akglhuwata mil kata kgalhkgalhima pi nalimasiyakan pi tuku limawakanalh Satanás kjardín xaʼEdén kaj taʼakgsanin. Jehová kgalhkgalhima ama kilhtamaku akxni natamasantujli xtukuwani. Nila lilakpuwanaw tasikulunalin nema nakalimini «putum tiku kgalhkgalhimakgolh» (Is. 30:18).

¹⁷ Jesús nachuna xatapaxuwan kgalhkgalhinama. Akxni xlama kKatiyatni ni makgxtakgli Dios asta akxni nilh. Kkata 33, makamastalh xlatamat kxlakatin xTlat anta kʼakgapun. Pero kgalhkgalhilh asta kata 1914 xlakata xtsukulh mapakgsinan (Hech. 2:33-35; Heb. 10:12, 13). Chu chuntiya nakgalhkgalhi asta akxni nasputa xTamapakgsin xaʼakgtum mil kata, xlakata nakamasputukan xtalamakgasitsin (1 Cor. 15:25). Lu namakgapala, pero katsiyaw pi lu tlan nakitaxtu.

18, 19. ¿Tuku nakinkamakgtayayan xatapaxuwan nakgalhkgalhinanaw?

¹⁸ Xlikana, kimputumkan talakaskin xatapaxuwan nakgalhkgalhinanaw. ¿Tuku nakinkamakgtayayan chuna natlawayaw? Natlawaniyaw oración Jehová xlakata nakinkamaxkiyan xʼespíritu. Kalakapastakwi pi xlakata tlan nakgalhkgalhinanaw talakaskin nakgalhiyaw espíritu santo (Efes. 3:16; 6:18; 1 Tes. 5:17-19). Wa xlakata katasaskiniw Jehová pi kakinkamakgtayan xlakata natayaniyaw.

¹⁹ Na kalilakpuwaw tuku xlakata Abrahán, José chu David tlan xatapaxuwan kgalhkgalhinankgolh asta akxni Jehová xmakgantaxtilh xtamalaknun. Xlakata xkgalhinikgo takanajla Jehová chu xlipawankgo. Ni wa xakstukan kalilakpuwanka chu nipara wa tuku tlakg xkaminini. Nalilakpuwanaw tasikulunalin nema makglhtinankgolh kinkamakgpuwantiniyan chuntiya nakgalhkgalhinanaw.

20. ¿Tuku talakaskin natlawayaw?

²⁰ Maski lu tuwa tuku natitaxtuyaw, talakaskin pi xatapaxuwan nakgalhkgalhinanaw. Xlikana, max namin kilhtamaku nakgalhskininanaw: «¿Asta tukuya kilhtamaku, Jehová?» (Is. 6:11). Pero xlakata xlitliwakga espíritu santo tlan nawanaw la tiwa Jeremías: «Naklimasiyani takgalhkgalhin kxpalakata» (Lam. 3:21, 24).