你愿唔愿意耐心等待？
“你哋亦都要有耐心。”——雅各书5:8
唱诗78，139首
1，2． （甲）有咩原因我哋会问“要到几时呢”？（乙）点解古代忠仆嘅例子令我哋感到安心？
“要到几时呢？”呢个系忠心嘅先知以赛亚同哈巴谷提出嘅问题。（以赛亚书6:11；哈巴谷书1:2）大卫王喺写诗篇13篇嘅时候，都问咗四次:“要到几时呢？”（诗篇13:1，2）我哋嘅主耶稣基督面对身边嗰啲缺乏信心嘅人嘅时候，都问咗同样嘅问题。（马太福音17:17）如果我哋发觉自己都会问呢个问题，唔需要觉得出奇。
2 有咩原因会使我哋问“要到几时呢”？可能系我哋受到某啲唔公平嘅对待。或者系，我哋年老多病，又或者我哋生活喺呢个“非常时期”感到“难以应付”。（提摩太后书3:1）仲有可能系，我哋好难忍受周围嘅人嘅错误态度同行为。无论原因系乜嘢，知道耶和华嘅古代忠仆可以毫无顾虑噉提出呢个我哋关注嘅问题，而且耶和华冇责备佢哋，真系令人感到安心！
3． 喺我哋面对困难嘅时候，乜嘢可以帮助我哋？
3 当我哋面对呢啲咁困难嘅情况嗰时，乜嘢可以帮助我哋呢？门徒雅各（耶稣嘅同母异父弟弟）受圣灵启示话俾我哋知:“所以，弟兄们，你哋要有耐心，直到主临在嘅时候。”（雅各书5:7）冇错，我哋每个人都需要有耐心。但系，要具备呢种属灵特质同乜嘢有关呢？
乜嘢系耐心？
4，5． （甲）表现耐心同乜嘢有关？（乙）门徒雅各举出乜嘢例子说明，对嗰啲需要等待嘅事要表现耐心？（请睇吓课文开头嘅图片）
4 按照圣经所讲，耐心系圣灵果实嘅一种特质；冇上帝嘅帮助，唔完美嘅人就培养唔到足够嘅耐心。耐心系嚟自上帝嘅礼物，我哋表现耐心就可以显示出我哋真系爱耶和华同其他人。缺乏耐性、行事急躁往往会破坏人与人之间嘅亲密关系。相反，耐心嘅态度可以巩固同其他人嘅关系。（哥林多前书13:4；加拉太书5:22）耐心牵涉到其他重要嘅基督徒特质。例如，耐心同忍耐系息息相关嘅。忍耐呢种特质可以使我哋保持积极嘅态度，就算环境艰难都可以忍受得住。（歌罗西书1:11；雅各书1:3，4）表现耐心亦都使我哋喺受到伤害嗰时唔会采取报复行动，任何情况下都坚守立场。另外，圣经鼓励我哋，对嗰啲需要等待嘅事要愿意表现耐心。雅各书5:7，8（请读）嘅描述可以加深我哋对呢种耐心嘅理解。
5 点解我哋需要甘心等待耶和华采取行动？雅各将我哋嘅情况同农夫嘅情况做对比。农夫可以辛勤噉种植农作物，但就控制唔到天气或者植物嘅生长，亦都冇办法使时间过得快啲。佢知道自己需要耐心等待，先可以得到“土地宝贵嘅出产”。同样，喺等待耶和华实现佢嘅应许呢件事上，有好多因素都系我哋控制唔到嘅。（马可福音13:32，33；使徒行传1:7）就好似农夫一样，我哋都需要耐心等待。
6． 我哋可以从弥迦先知嘅榜样学到乜嘢？
6 今日我哋面对嘅情况同弥迦先知所面对嘅好相似。佢生活喺邪恶嘅亚哈斯王统治时期，一个充满腐败行为嘅时代。事实上，圣经话当时嘅人“精于作恶”。（请读弥迦书7:1-3）弥迦知道自己无办法改变呢啲情况。噉佢可以做啲咩呢？佢话:“至于我，我要继续仰望耶和华，耐心等候上帝我嘅救主。我嘅上帝一定会垂听我嘅话。”（弥迦书7:7）就好似弥迦噉样，我哋都需要有“耐心等候”嘅态度。
7． 点解我哋愿意等候耶和华实现佢嘅应许？
7 如果我哋有弥迦噉嘅信心，就会愿意等候耶和华。我哋同一个喺监狱等紧被处死嘅囚犯好唔一样。囚犯嘅等待系被迫嘅，佢根本唔想行刑嗰一日到来。我哋嘅情况就完全唔同嘞！我哋愿意等候耶和华，因为我哋知道佢一定会实现佢嘅旨意，喺最适当嘅时候赐俾我哋永生！所以，我哋要“凡事忍耐，怀住喜乐同耐心”。（歌罗西书1:11，12）相反，如果我哋发牢骚，埋怨耶和华冇迅速采取行动，就会令耶和华好唔高兴。（歌罗西书3:12）
表现耐心嘅忠贞榜样
8． 我哋沉思古代忠仆嘅榜样嗰时，需要谂吓乜嘢？
8 古代嘅忠仆耐心等待耶和华实现佢嘅旨意。如果我哋记得佢哋嘅榜样，就会愿意表现耐心。（罗马书15:4）我哋沉思呢啲榜样嗰时，应该谂吓佢哋等咗几耐，点解佢哋愿意等待，同埋佢哋表现耐心得到乜嘢福分。
亚伯拉罕需要等好多年，先至见到佢嘅孙以扫同雅各出世。（请睇第9，10段）
9，10． 亚伯拉罕同撒拉等待耶和华嘅应许，等咗几耐？
9 我哋嚟睇吓亚伯拉罕同撒拉嘅例子。佢哋属于嗰啲“凭信心同忍耐得着应许嘅人”。经文话俾我哋知“亚伯拉罕耐心等待”，最终得到耶和华嘅祝福，子孙增多。（希伯来书6:12，15）点解亚伯拉罕需要表现耐心？简单嚟讲，实现呢个应许系需要时间嘅。耶和华同亚伯拉罕所立嘅约喺公元前1943年尼散月14日生效。喺嗰一日，亚伯拉罕同撒拉带住整个家族渡过幼发拉底河，进入应许之地。之后，亚伯拉罕要等25年，到咗公元前1918年，先等到佢嘅仔以撒出世。佢仲要再等多60年，到公元前1858年，佢嘅孙以扫同雅各先至出世。（希伯来书11:9）
10 亚伯拉罕得到几多产业呢？圣经话俾我哋知:“喺呢度，上帝冇俾佢产业，连脚掌咁细嘅地方都冇俾佢，只应许将呢块土地赐俾佢同佢嘅后代做产业，虽然当时佢仲未有儿女。”（使徒行传7:5）直到亚伯拉罕渡过幼发拉底河430年之后，佢嘅后代先至成为一个国族，拥有呢片土地。（出埃及记12:40-42；加拉太书3:17）
11． 点解亚伯拉罕愿意等候耶和华？佢表现耐心会得到乜嘢福分？
11 亚伯拉罕愿意等待，因为佢嘅耐心基于对耶和华嘅信心。（请读希伯来书11:8-12）虽然亚伯拉罕喺有生之年都冇亲眼见到耶和华嘅应许完全实现，佢仲系喜乐噉等待。想象一下，亚伯拉罕喺地上乐园复活嗰时，知道圣经记载咗好多佢嘅个人经历同埋佢后代嘅故事，会几咁开心，几咁惊喜呢！ * 再想象吓，当佢第一次知道，喺同弥赛亚有关嘅应许方面，自己担任咗重要嘅角色，会几咁兴奋！毫无疑问，佢会觉得等咗咁耐系值得嘅。
12，13． 点解约瑟需要有耐心？佢有乜嘢正确嘅态度？
12 亚伯拉罕嘅曾孙约瑟亦都表现出愿意耐心等待嘅态度。佢受到极唔公平嘅对待。首先，佢喺17岁嘅时候俾佢啲哥哥卖咗去做奴隶。后来，佢俾人诬告话佢要强奸主人嘅妻子，因为噉而成为阶下囚。（创世记39:11-20；诗篇105:17，18）佢紧守上帝正义嘅标准，不过睇起嚟得到嘅系惩罚而唔系祝福。13年之后，一切都改变晒。佢从监狱放翻出嚟，地位被提升，喺埃及成为一人之下万人之上。（创世记41:14，37-43；使徒行传7:9，10）
13 唔公平嘅对待有冇令约瑟怨天尤人呢？佢对佢嘅上帝耶和华有冇失去信心呢？冇！乜嘢帮助约瑟耐心等待？就系佢对耶和华嘅信心。佢睇出耶和华喺度控制紧事态。请留意，约瑟对佢嘅兄弟所讲嘅话，点样反映出呢一点:“唔使惊。唔通我可以取代上帝咩？以前你哋虽然对我存心行恶，不过上帝就立意行善，为咗要成就今日嘅光景，保全好多人嘅生命。”（创世记50:19，20）最终，约瑟睇出佢嘅等待系好值得嘅。
14，15． （甲）大卫所表现嘅耐心点解咁突出？（乙）乜嘢帮助大卫耐心等待？
14 大卫王亦都受过好多唔公平嘅对待。虽然大卫喺年轻嗰时就受耶和华委任做以色列未来嘅君王，不过佢要等15年先可以成为自己部族嘅王。（撒母耳记下2:3，4）喺呢段时期，不忠嘅扫罗王追捕大卫，揾机会杀佢。 * 结果，大卫要四处逃亡，有时要住喺其他国家，有时要住喺旷野嘅山洞。虽然扫罗后来死喺战场，不过大卫仲系要再等7年先可以成为以色列国嘅君王。（撒母耳记下5:4，5）
15 点解大卫愿意耐心等待？佢喺诗篇13篇俾咗答案我哋。佢话:“至于我，我信赖你忠贞嘅爱，我嘅心要因你嘅救恩而喜乐。我要向耶和华歌唱，因为佢厚待我。”（诗篇13:5，6）大卫信赖耶和华嘅忠贞之爱。佢喜乐噉期待得到拯救，佢亦都回想耶和华点样奖赏自己。冇错，大卫觉得等待系值得嘅。
如果耶和华自己唔愿意表现耐心，佢都唔会要求我哋表现耐心。
16，17． 喺表现耐心方面，耶和华上帝同耶稣基督点样树立完美嘅榜样？
16 如果耶和华自己唔愿意表现耐心，佢都唔会要求我哋表现耐心。事实上，耶和华一直都愿意耐心等待，为我哋树立咗最好嘅榜样。（请读彼得后书3:9）为咗彻底解决喺伊甸园发生嘅争议，耶和华已经耐心噉等咗几千年。佢一直耐心“等候”佢嘅名彰显为圣嘅嗰一刻。到时，嗰啲渴望“等候佢嘅人”会得到难以想象嘅福分。（以赛亚书30:18）
17 耶稣同样愿意等待。虽然耶稣喺地上嘅时候成功渡过咗忠义嘅考验，又喺公元33年献出自己嘅生命作为赎价，佢仲系需要等到1914年先开始佢嘅统治。（使徒行传2:33-35；希伯来书10:12，13）直到耶稣千年统治结束之后，佢所有嘅敌人先至会被毁灭晒。（哥林多前书15:25）虽然呢个等待好漫长，但系我哋可以肯定耶稣嘅等待系值得嘅。
乜嘢可以帮助我哋？
18，19． 乜嘢帮助我哋愿意耐心等待？
18 所以毫无疑问，我哋每个人都需要表现耐心，甘愿等待。但乜嘢可以帮助我哋噉样做？就系向上帝祷告，求佢赐圣灵俾我哋。唔好忘记，耐心系圣灵果实嘅一种特质。（以弗所书3:16；6:18；帖撒罗尼迦前书5:17-19）要恳切祈求耶和华帮助我哋表现耐心。
19 乜嘢帮助咗亚伯拉罕、约瑟同大卫耐心等候耶和华实现佢嘅应许呢？就系佢哋对耶和华嘅信心，而且佢哋深信耶和华会一直善待佢哋。佢哋唔系只关注自己或者注重个人享受。我哋认真谂吓佢哋得到乜嘢美好嘅祝福，就会受到鼓励，耐心等待。
20． 我哋每个人都应该下定决心点样做？
20 所以，就算面对考验同患难，我哋都要决心“耐心等候”。我哋有时真系忍唔住会问:“耶和华啊，要到几时呢？”（以赛亚书6:11）但系，靠住圣灵呢股强化人嘅力量，我哋每个人都可以下定决心，讲出同耶利米一样嘅话:“耶和华系我嘅福分，所以我要耐心等候佢。”（耶利米哀歌3:21，24）
^ 11段 创世记有15章都系关于亚伯拉罕嘅记载。另外，希腊语经卷嘅执笔者提到亚伯拉罕嘅次数超过70次。
^ 14段 虽然扫罗只系统治咗短短两年就俾耶和华弃绝，不过喺之后嘅38年，耶和华容许佢继续统治以色列国，直到佢死为止。（撒母耳记上13:1；使徒行传13:21）
