你願唔願意耐心等待？
“你哋亦都要有耐心。”——雅各書5:8
1，2． （甲）有咩原因我哋會問“要到幾時呢”？（乙）點解古代忠僕嘅例子令我哋感到安心？
“要到幾時呢？”呢個係忠心嘅先知以賽亞同哈巴谷提出嘅問題。（以賽亞書6:11；哈巴谷書1:2）大衛王喺寫詩篇13篇嘅時候，都問咗四次:“要到幾時呢？”（詩篇13:1，2）我哋嘅主耶穌基督面對身邊嗰啲缺乏信心嘅人嘅時候，都問咗同樣嘅問題。（馬太福音17:17）如果我哋發覺自己都會問呢個問題，唔需要覺得出奇。
2 有咩原因會使我哋問“要到幾時呢”？可能係我哋受到某啲唔公平嘅對待。或者係，我哋年老多病，又或者我哋生活喺呢個“非常時期”感到“難以應付”。（提摩太後書3:1）仲有可能係，我哋好難忍受周圍嘅人嘅錯誤態度同行為。無論原因係乜嘢，知道耶和華嘅古代忠僕可以毫無顧慮噉提出呢個我哋關注嘅問題，而且耶和華冇責備佢哋，真係令人感到安心！
3． 喺我哋面對困難嘅時候，乜嘢可以幫助我哋？
3 當我哋面對呢啲咁困難嘅情況嗰時，乜嘢可以幫助我哋呢？門徒雅各（耶穌嘅同母異父弟弟）受聖靈啟示話俾我哋知:“所以，弟兄們，你哋要有耐心，直到主臨在嘅時候。”（雅各書5:7）冇錯，我哋每個人都需要有耐心。但係，要具備呢種屬靈特質同乜嘢有關呢？
乜嘢係耐心？
4，5． （甲）表現耐心同乜嘢有關？（乙）門徒雅各舉出乜嘢例子説明，對嗰啲需要等待嘅事要表現耐心？（請睇吓課文開頭嘅圖片）
4 按照聖經所講，耐心係聖靈果實嘅一種特質；冇上帝嘅幫助，唔完美嘅人就培養唔到足够嘅耐心。耐心係嚟自上帝嘅禮物，我哋表現耐心就可以顯示出我哋真係愛耶和華同其他人。缺乏耐性、行事急躁往往會破壞人與人之間嘅親密關係。相反，耐心嘅態度可以鞏固同其他人嘅關係。（哥林多前書13:4；加拉太書5:22）耐心牽涉到其他重要嘅基督徒特質。例如，耐心同忍耐係息息相關嘅。忍耐呢種特質可以使我哋保持積極嘅態度，就算環境艱難都可以忍受得住。（歌羅西書1:11；雅各書1:3，4）表現耐心亦都使我哋喺受到傷害嗰時唔會採取報復行動，任何情況下都堅守立場。另外，聖經鼓勵我哋，對嗰啲需要等待嘅事要願意表現耐心。雅各書5:7，8（請讀）嘅描述可以加深我哋對呢種耐心嘅理解。
5 點解我哋需要甘心等待耶和華採取行動？雅各將我哋嘅情況同農夫嘅情況做對比。農夫可以辛勤噉種植農作物，但就控制唔到天氣或者植物嘅生長，亦都冇辦法使時間過得快啲。佢知道自己需要耐心等待，先可以得到“土地寶貴嘅出産”。同樣，喺等待耶和華實現佢嘅應許呢件事上，有好多因素都係我哋控制唔到嘅。（馬可福音13:32，33；使徒行傳1:7）就好似農夫一樣，我哋都需要耐心等待。
6． 我哋可以從彌迦先知嘅榜樣學到乜嘢？
6 今日我哋面對嘅情況同彌迦先知所面對嘅好相似。佢生活喺邪惡嘅亞哈斯王統治時期，一個充滿腐敗行為嘅時代。事實上，聖經話當時嘅人“精於作惡”。（請讀彌迦書7:1-3）彌迦知道自己無辦法改變呢啲情況。噉佢可以做啲咩呢？佢話:“至於我，我要繼續仰望耶和華，耐心等候上帝我嘅救主。我嘅上帝一定會垂聽我嘅話。”（彌迦書7:7）就好似彌迦噉樣，我哋都需要有“耐心等候”嘅態度。
7． 點解我哋願意等候耶和華實現佢嘅應許？
7 如果我哋有彌迦噉嘅信心，就會願意等候耶和華。我哋同一個喺監獄等緊被處死嘅囚犯好唔一樣。囚犯嘅等待係被迫嘅，佢根本唔想行刑嗰一日到來。我哋嘅情況就完全唔同嘞！我哋願意等候耶和華，因為我哋知道佢一定會實現佢嘅旨意，喺最適當嘅時候賜俾我哋永生！所以，我哋要“凡事忍耐，懷住喜樂同耐心”。（歌羅西書1:11，12）相反，如果我哋發牢騷，埋怨耶和華冇迅速採取行動，就會令耶和華好唔高興。（歌羅西書3:12）
表現耐心嘅忠貞榜樣
8． 我哋沉思古代忠僕嘅榜樣嗰時，需要諗吓乜嘢？
8 古代嘅忠僕耐心等待耶和華實現佢嘅旨意。如果我哋記得佢哋嘅榜樣，就會願意表現耐心。（羅馬書15:4）我哋沉思呢啲榜樣嗰時，應該諗吓佢哋等咗幾耐，點解佢哋願意等待，同埋佢哋表現耐心得到乜嘢福分。
亞伯拉罕需要等好多年，先至見到佢嘅孫以掃同雅各出世。（請睇第9，10段）
9，10． 亞伯拉罕同撒拉等待耶和華嘅應許，等咗幾耐？
9 我哋嚟睇吓亞伯拉罕同撒拉嘅例子。佢哋屬於嗰啲“憑信心同忍耐得着應許嘅人”。經文話俾我哋知“亞伯拉罕耐心等待”，最終得到耶和華嘅祝福，子孫增多。（希伯來書6:12，15）點解亞伯拉罕需要表現耐心？簡單嚟講，實現呢個應許係需要時間嘅。耶和華同亞伯拉罕所立嘅約喺公元前1943年尼散月14日生效。喺嗰一日，亞伯拉罕同撒拉帶住整個家族渡過幼發拉底河，進入應許之地。之後，亞伯拉罕要等25年，到咗公元前1918年，先等到佢嘅仔以撒出世。佢仲要再等多60年，到公元前1858年，佢嘅孫以掃同雅各先至出世。（希伯來書11:9）
10 亞伯拉罕得到幾多産業呢？聖經話俾我哋知:“喺呢度，上帝冇俾佢産業，連腳掌咁細嘅地方都冇俾佢，只應許將呢塊土地賜俾佢同佢嘅後代做産業，雖然當時佢仲未有兒女。”（使徒行傳7:5）直到亞伯拉罕渡過幼發拉底河430年之後，佢嘅後代先至成為一個國族，擁有呢片土地。（出埃及記12:40-42；加拉太書3:17）
11． 點解亞伯拉罕願意等候耶和華？佢表現耐心會得到乜嘢福分？
11 亞伯拉罕願意等待，因為佢嘅耐心基於對耶和華嘅信心。（請讀希伯來書11:8-12）雖然亞伯拉罕喺有生之年都冇親眼見到耶和華嘅應許完全實現，佢仲係喜樂噉等待。想像一下，亞伯拉罕喺地上樂園復活嗰時，知道聖經記載咗好多佢嘅個人經歷同埋佢後代嘅故事，會幾咁開心，幾咁驚喜呢！ * 再想像吓，當佢第一次知道，喺同彌賽亞有關嘅應許方面，自己擔任咗重要嘅角色，會幾咁興奮！毫無疑問，佢會覺得等咗咁耐係值得嘅。
12，13． 點解約瑟需要有耐心？佢有乜嘢正確嘅態度？
12 亞伯拉罕嘅曾孫約瑟亦都表現出願意耐心等待嘅態度。佢受到極唔公平嘅對待。首先，佢喺17歲嘅時候俾佢啲哥哥賣咗去做奴隸。後來，佢俾人誣告話佢要强姦主人嘅妻子，因為噉而成為階下囚。（創世記39:11-20；詩篇105:17，18）佢緊守上帝正義嘅標準，不過睇起嚟得到嘅係懲罰而唔係祝福。13年之後，一切都改變晒。佢從監獄放翻出嚟，地位被提升，喺埃及成為一人之下萬人之上。（創世記41:14，37-43；使徒行傳7:9，10）
13 唔公平嘅對待有冇令約瑟怨天尤人呢？佢對佢嘅上帝耶和華有冇失去信心呢？冇！乜嘢幫助約瑟耐心等待？就係佢對耶和華嘅信心。佢睇出耶和華喺度控制緊事態。請留意，約瑟對佢嘅兄弟所講嘅話，點樣反映出呢一點:“唔使驚。唔通我可以取代上帝咩？以前你哋雖然對我存心行惡，不過上帝就立意行善，為咗要成就今日嘅光景，保全好多人嘅生命。”（創世記50:19，20）最終，約瑟睇出佢嘅等待係好值得嘅。
14，15． （甲）大衛所表現嘅耐心點解咁突出？（乙）乜嘢幫助大衛耐心等待？
14 大衛王亦都受過好多唔公平嘅對待。雖然大衛喺年輕嗰時就受耶和華委任做以色列未來嘅君王，不過佢要等15年先可以成為自己部族嘅王。（撒母耳記下2:3，4）喺呢段時期，不忠嘅掃羅王追捕大衛，揾機會殺佢。 * 結果，大衛要四處逃亡，有時要住喺其他國家，有時要住喺曠野嘅山洞。雖然掃羅後來死喺戰場，不過大衛仲係要再等7年先可以成為以色列國嘅君王。（撒母耳記下5:4，5）
15 點解大衛願意耐心等待？佢喺詩篇13篇俾咗答案我哋。佢話:“至於我，我信賴你忠貞嘅愛，我嘅心要因你嘅救恩而喜樂。我要向耶和華歌唱，因為佢厚待我。”（詩篇13:5，6）大衛信賴耶和華嘅忠貞之愛。佢喜樂噉期待得到拯救，佢亦都回想耶和華點樣獎賞自己。冇錯，大衛覺得等待係值得嘅。
如果耶和華自己唔願意表現耐心，佢都唔會要求我哋表現耐心。
16，17． 喺表現耐心方面，耶和華上帝同耶穌基督點樣樹立完美嘅榜樣？
16 如果耶和華自己唔願意表現耐心，佢都唔會要求我哋表現耐心。事實上，耶和華一直都願意耐心等待，為我哋樹立咗最好嘅榜樣。（請讀彼得後書3:9）為咗徹底解決喺伊甸園發生嘅爭議，耶和華已經耐心噉等咗幾千年。佢一直耐心“等候”佢嘅名彰顯為聖嘅嗰一刻。到時，嗰啲渴望“等候佢嘅人”會得到難以想像嘅福分。（以賽亞書30:18）
17 耶穌同樣願意等待。雖然耶穌喺地上嘅時候成功渡過咗忠義嘅考驗，又喺公元33年獻出自己嘅生命作為贖價，佢仲係需要等到1914年先開始佢嘅統治。（使徒行傳2:33-35；希伯來書10:12，13）直到耶穌千年統治結束之後，佢所有嘅敵人先至會被毁滅晒。（哥林多前書15:25）雖然呢個等待好漫長，但係我哋可以肯定耶穌嘅等待係值得嘅。
乜嘢可以幫助我哋？
18，19． 乜嘢幫助我哋願意耐心等待？
18 所以毫無疑問，我哋每個人都需要表現耐心，甘願等待。但乜嘢可以幫助我哋噉樣做？就係向上帝禱告，求佢賜聖靈俾我哋。唔好忘記，耐心係聖靈果實嘅一種特質。（以弗所書3:16；6:18；帖撒羅尼迦前書5:17-19）要懇切祈求耶和華幫助我哋表現耐心。
19 乜嘢幫助咗亞伯拉罕、約瑟同大衛耐心等候耶和華實現佢嘅應許呢？就係佢哋對耶和華嘅信心，而且佢哋深信耶和華會一直善待佢哋。佢哋唔係只關注自己或者注重個人享受。我哋認真諗吓佢哋得到乜嘢美好嘅祝福，就會受到鼓勵，耐心等待。
20． 我哋每個人都應該下定決心點樣做？
20 所以，就算面對考驗同患難，我哋都要決心“耐心等候”。我哋有時真係忍唔住會問:“耶和華啊，要到幾時呢？”（以賽亞書6:11）但係，靠住聖靈呢股强化人嘅力量，我哋每個人都可以下定決心，講出同耶利米一樣嘅話:“耶和華係我嘅福分，所以我要耐心等候佢。”（耶利米哀歌3:21，24）
^ 11段 創世記有15章都係關於亞伯拉罕嘅記載。另外，希臘語經卷嘅執筆者提到亞伯拉罕嘅次數超過70次。
^ 14段 雖然掃羅只係統治咗短短兩年就俾耶和華棄絶，不過喺之後嘅38年，耶和華容許佢繼續統治以色列國，直到佢死為止。（撒母耳記上13:1；使徒行傳13:21）
