1, 2. a) ¿Xi zanda gucaa laanu guinabadiidxanu Jiobá «dede padxí pue»? b) ¿Xiñee riuʼnu gana ora ridúʼndanu ejemplu stiʼ ca xpinni Dios ni bizuubaʼ diidxaʼ dxiqué?

«¿DEDE padxí pue, Jiobá?». Sicaríʼ gunabadiidxaʼ Isaías ne Habacuc, chupa profeta ni bizuubaʼ diidxaʼ (Is. 6:11; Hab. 1:2). Zacaca gunabadiidxaʼ rey David tapa biaje lu Salmo 13 (Sal. 13:1, 2). Dede Jesús biʼniʼ ti pregunta zacagá ora biʼyaʼ qué gapa cani nuu gaxha de laa fe (Mat. 17:17). Nga runi cadi naquiiñeʼ guidxagayaanu pa chuʼ ora guinabadiidxanu zacá.

² ¿Xi zanda gucaa laanu guinabadiidxanu Jiobá «dede padxí pue»? Zándaca bíʼnicabe laanu xiixa ni cadi jneza. Zándaca cayacananu purtiʼ maʼ nagólanu o pur xiixa guendahuará. Zándaca gaca estresarnu purtiʼ nabáninu tiempu nabé «nagana» (2 Tim. 3:1). O zándaca guireʼnu gana ora guidúʼyanu actitud malu napa ca binni nuu gaxha de laanu. Intiica laani, riuʼnu gana ora gánnanu gunda guníʼ ca xpinni Dios ni bizuubaʼ diidxaʼ dxiqué xi guiráʼ runi sentircaʼ, ne qué ñuni castigar Jiobá laacaʼ pur laani.

3. ¿Xi zanda gacané laanu ora maʼ cadídinu lu ti guendanagana?

 ³ ¿Xi zanda gacané laanu ora ridídinu lu ca guendanagana casi cani bizéʼtenu ca yaʼ? Gudxi Dios discípulo Santiago, biʼchiʼ Jesús, gudii conseju riʼ: «Peru laatu, hermanu caʼ, cadi ixhacalaʼdxi tu [o lagapa paciencia] irá ni cayuni cabe laatu ca. Lacueza ganda dxi gueeda Señor» (Sant. 5:7). Zacá ni, guiranu naquiiñeʼ gápanu paciencia. Peru ¿xii nga paciencia yaʼ? Ne ¿ximodo zanda guluinu cualidad ni naquiiñeʼ gapa ca xpinni Cristu riʼ yaʼ?

4, 5. a) ¿Xii nga paciencia, ne ximodo rusihuínninu ni? b) ¿Xi bisiene Santiago de paciencia? (Biiyaʼ foto ni zeeda ra ruzulú tema riʼ).

⁴ Biblia ná paciencia ca nga ti cualidad ni rusihuínninu ora rudii Dios laanu espíritu santu stiʼ. Pa ñaca qué ñacané Dios laanu la? nagana ñaca para laanu ñápanu paciencia ni caquiiñenu, purtiʼ nácanu binni ruchee. Cualidad riʼ nácani ti regalu stiʼ Dios, ne ra gusihuínninu nápanu paciencia ca nga ti modo guluinu nadxiinu Jiobá ne xcaadxi binni. Ora qué rápanu paciencia, chaahuiʼ chaahuiʼ rirá guendarannaxhii ni napasaanu laanu (1 Cor. 13:4; Gál. 5:22). Para ganda gapa binni paciencia caquiiñeʼ gapa xcaadxi cualidad risaca ni naquiiñeʼ gapa ca xpinni Cristu. Guzéʼtenu ti ejemplu, gapa ti binni paciencia la? riníʼ ni guni huantar ne gudxiilú intiica guendanagana sin gusaana de chuʼ nayecheʼ (Col. 1:11; Sant. 1:3, 4). Laaca riníʼ ni gacananu sin guquíxenu ni gúnicabe laanu ne guzúʼbanu diidxaʼ neca guizaacanu intiica si. Ne Biblia ná naquiiñeʼ guiénenu caquiiñeʼ cuézanu. Ndiʼ nga ti cosa nabé risaca ni rizíʼdinu lu Santiago 5:7, 8 (biindaʼ ni).

⁵ ¿Xiñee naquiiñeʼ guiénenu caquiiñeʼ cuézanu dede ora guni Jiobá xiixa yaʼ? Santiago guníʼ ni rizaacanu ca zeeda gaca ni casi ni rizaaca né ti hombre ni runi dxiiñaʼ layú. ¿Xiñee yaʼ? Purtiʼ hombre riʼ runi stipa pur gudxiibaʼ biidxiʼ stiʼ, peru qué zanda guni controlarbe clima nin modo guiroobaʼ yagahuiiniʼ ca. Laaca qué zanda gúnibe xiixa para tiidiʼ tiempu ca jma nagueenda. Nga runi riénebe naquiiñeʼ cuézabe né stale paciencia gudii layú ca laabe cosecha stiʼ. Zacaca nga laanu, laaca cabézanu guni cumplir Jiobá cani maʼ bidii stiidxaʼ, peru nuu stale cosa ni qué zanda guni controlarnu (Mar. 13:32, 33; Hech. 1:7). Cásica hombre runi dxiiñaʼ layú ca, laanu laaca naquiiñeʼ cuézanu né stale paciencia.

6. ¿Xi rizíʼdinu de profeta Miqueas?

⁶ Cásica nuunu riʼ nga guyuu profeta Miqueas. Laabe bibánibe dxi bibani Acaz, ti rey nabé malu. Tiempu que bidale modo ribaʼnaʼ binni ne guizáʼ maʼ nanna ca binni que gúnicaʼ «cosa malu» (biindaʼ Miqueas 7:1-3). Cumu nánnabe qué zanda guni chaahuibe modo nabani ca binni que la? guniʼbe: «Naa la? pur Jiobá zatanaʼyaʼ. Dxandipeʼ zusihuinneʼ cabezaʼ Dios ni zulá naa. Dios stinneʼ zucaadiaga naa» (Miq. 7:7). Guleza Miqueas né paciencia, laanu laaca naquiiñeʼ cuézanu né paciencia.

7. ¿Xiñee naquiiñeʼ cuézanu né stale gana dede ora guni cumplir Jiobá cani bidii stiidxaʼ?

⁷ Pa nápanu fe casi gupa Miqueas la? zabézanu né stale gana dede ora guni Jiobá xiixa. ¿Xiñee yaʼ? Para guiénenu ni, guxuíʼlunu ti hombre deguyoo ni cabeza guedandá dxi guuticabe laa. Neca qué racaláʼdxibe guedandá dxi ca, ni zanda si gúnibe nga cuézabe. Peru laanu maʼ gadxé ni cabézanu. Cumu nánnanu zuni cumplir Jiobá ni maʼ bidii stiidxaʼ: gudii laanu guendanabani ni qué zaluxe, ne zúnibe ni órapeʼ maʼ caquiiñenu ni la? né stale guendanayecheʼ  cabézanu gúnibe ni. Zinándanu ni ná conseju riʼ: «[Laguiecheʼ] neca gueeda stale enda naná luguiá tu, ne cadi ixhacalaʼdxi tu» (Col. 1:11, 12). Zuninanu Jiobá pa cuézanu sin gana ne pa quiche ruaanu purtiʼ rábinu nabé candaabe (Col. 3:12).

8. Laga cadúʼndanu ejemplu stiʼ caadxi hombre ne gunaa ni bizuubaʼ diidxaʼ dxiqué, ¿xi naquiiñeʼ guiníʼ íquenu?

⁸ ¿Xi zacané laanu para jma chuʼnu dispuestu cuézanu? Guidúʼndanu ejemplu stiʼ caadxi hombre ne gunaa ni bizuubaʼ diidxaʼ de dxiqué, laacaʼ gulézacaʼ né stale paciencia dede ora biʼniʼ cumplir Jiobá cani bidii stiidxaʼ (Rom. 15:4). Laga cadúʼndanu cani, guiníʼ íquenu pabiáʼ tiempu gulézacabe, xiñee guyuucabe dispuestu cuézacabe ne xi ndaayaʼ gucuaacabe pur gúpacabe paciencia.

9, 10. ¿Pabiáʼ tiempu guleza Abrahán ne Sara para biʼniʼ cumplir Jiobá caadxi de cani bidii stiidxaʼ?

⁹ Guininu primeru de Abrahán ne Sara. Cumu bisihuínnicabe «runi cre cabe ne cadi caree cabe gana», gucuaacabe cani «bidii stiidxa Dios». Biblia ná despué de «uleza Abraham sin nixhacalaʼdxi», guluu Dios ndaayaʼ laa ne bitale cani zá de laa, casi maca bidii stiidxaʼ laabe (Heb. 6:12, 15). Ne zadiʼdiʼ stale iza para gaca cumplir ni bidii stiidxaʼ Dios que. Ngue runi cadi naquiiñeʼ gusaana Abrahán de gapa paciencia. Bizulú guca cumplir pactu ni biʼniné Jiobá Abrahán que 14 de nisán, beeu stiʼ ca judíu, lu iza 1943 ante gueeda Jesús. Dxi que, Abrahán, Sara ne guiráʼ cani nabeza ra lídxicaʼ gudíʼdicaʼ guiiguʼ Éufrates ne guyuucaʼ lu layú ni bidii stiidxaʼ Dios gudii laacaʼ. Peru gulézaruʼ Abrahán veinticinco iza para gule Isaac, xiiñiʼ, lu  iza 1918. Ne despué gulézarube sti sesenta iza para gule ca nietu stibe, Esaú ne Jacob, lu iza 1858 (Heb. 11:9).

¹⁰ ¿Ñee gucuaa Abrahán neca ti ndaa lu layú ni bidii stiidxaʼ Dios gudii laacabe que la? Biblia ná qué nudii Jiobá «laabe nin tindaa layú raríʼ, nin biaʼ ra nuzuhuaa ñee be. Peru bidii stiidxa laabe zudii ni laabe ne ca xiiñi be, neca caʼru gapa be xiiñi be chiqué» (Hech. 7:5). Gudiʼdiʼ si Abrahán guiiguʼ Éufrates que, gudiʼdiʼ tapa gayuaa treinta iza para beeda gaca cani zá de laabe que guidxi ni chindeza lu layú que (Éx. 12:40-42; Gál. 3:17).

11. a) ¿Xiñee guyuu Abrahán dispuestu cueza? b) ¿Xi ndaayaʼ zacaa Abrahán pur gupa paciencia?

¹¹ Qué ñuuyaʼ diʼ Abrahán ñaca cumplir guiráʼ ni bidii stiidxaʼ Dios laa biaʼ dxi bibani, peru guyuube dispuestu cuézabe né stale gana ne paciencia purtiʼ nápabe fe Jiobá (biindaʼ Hebreos 11:8, 10). ¿Ñee ruxuíʼlunu pabiáʼ ziéchebe ora guibánibe sti biaje ndaaniʼ Paraísu la? Zadxagayaabe ora gúʼyabe guiráʼ ni ruzeeteʼ Biblia de xquendanabánibe ne stiʼ cani zá de laabe. * Laaca ziéchebe ora guiénebe pabiáʼ risaca ni bíʼnibe para guca cumplir ni guníʼ Jiobá de descendencia ni nexheʼ gueeda que. Nánnanu zudiibe cuenta risaca nga gulézabe, neca bindaa ni.

12, 13. a) ¿Xiñee ngue caquiiñeʼ gapa José paciencia? b) ¿Xiñee galán guca xpiaʼ José?

¹² Laaca bisihuinni ti bisnietu stiʼ Abrahán nuu dispuestu gapa paciencia. Biree labe José ne bíʼnicabe laabe caadxi cosa ni cadi jneza guizáʼ feu. Primé la? bitoocabe laabe casi ti esclavu dxi nápabe biaʼ 17 iza. Despué, guníʼcabe gucaláʼdxibe nilaxoobe xheelaʼ xpixuaanabe. Cadi dxandíʼ ni guníʼcabe que, peru bieguyoo José pur laani (Gén. 39:11-20; Sal. 105:17, 18). Neca gúcabe ti hombre ni bizuubaʼ diidxaʼ, ruluíʼ jma guca castigarbe lugar de nicaabe ndaayaʼ. Peru trece iza despué nagueenda bichaa guiráʼ ni. Biree José de ndaaniʼ cárcel que ne beeda gaca guiropa binni jma risaca de Egipto (Gén. 41:14, 37-43; Hech. 7:9, 10).

¹³ ¿Ñee bidaa José xiana pur ca cosa ni cadi jneza bíʼnicabe laa que la? ¿Ñee bisaana de gápabe confianza Jiobá, Dios stibe la? Coʼ. ¿Xiñee gunda gulézabe né stale paciencia yaʼ? Purtiʼ gúpabe fe Jiobá. Bidiibe cuenta Dios nga runiibi ca cosa ca. Ngue runi gúdxibe ca bíʼchibe: «Cadi guidxíbitu, lácaxa naa nuaaʼ lugar stiʼ Dios. Nécapeʼ laatu gucaláʼdxitu ñuninatu naa, peru Dios gudixhe gaca ni jneza ne zacá gulá xquendanabani stale binni» (Gén. 50:19, 20). Bizaaca si guiráʼ ngue la? biiyaʼ José galán ngue biʼniʼ guleza.

14, 15. a) ¿Xiñee ridxagayaanu paciencia gupa David? b) ¿Xi gucané David cueza né stale paciencia?

¹⁴ Laaca bíʼnicabe stale cosa ni cadi jneza rey David. Neca de dxi nahuiinibe gulí Jiobá laabe para gácabe rey stiʼ guidxi Israel, gupa xidé gulézabe biaʼ quince iza para gácabe rey de tribu stibe (2 Sam. 2:3, 4). Lu caadxi iza de tiempu ca, gupa xidé bixooñebe de rey Saúl, purtiʼ nuu guuti laabe. * Pur ngue nuu tiru gupa xidé yendeza David fuera de xquidxi o ndaaniʼ ca cueva ni nuu lu desiertu. Despué, guti Saúl lu ti guendaridinde. Neca zaqué, gupa xidé guleza David xcadxe iza para guca rey stiʼ guidubi guidxi Israel (2 Sam. 5:4, 5).

¹⁵ ¿Xiñee guyuu David dispuestu cueza né stale paciencia yaʼ? Laabe bicábibe ni lu  Salmo 13, ra gunabadiidxabe Jiobá tapa biaje dede padxí guiluxe ca guendanagana stibe. Guniʼbe: «Peru naa la? napaʼ confianza qué zusaanaluʼ de gannaxhiiluʼ naa; ziecheʼ ladxiduáʼ pur cani huayúniluʼ para gulaluʼ naa. Zuundaʼ para Jiobá, purtiʼ maʼ gudixe naa né stale cosa» (Sal. 13:5, 6). Gupa David confianza qué zusaana Jiobá de gannaxhii laa. Né stale guendanayecheʼ gulézabe dede ora guedandá dxi gunduuxeʼ ca guendanagana stibe. Ne laaca guníʼ íquebe ximodo gucané Jiobá laabe ante. Nannadxichi David nabé risaca ngue cueza.

16, 17. ¿Ximodo maʼ bisihuinni Jiobá ne Jesús nuucaʼ dispuestu cuézacaʼ?

¹⁶ Ora rinabaʼ Jiobá laanu gápanu paciencia, qué ribézabe gúninu xiixa ni cadi nuube dispuestu gúnibe. Ejemplu stibe nga ni jma galán nápanu de tuuxa ni napa paciencia. Biblia ná: «Cadi candaa diʼ Jiobá para guni ni maʼ bidii stiidxaʼ, casi riníʼ ique stale binni, laabe nápabe paciencia laatu purtiʼ qué racaláʼdxibe guinitilú guirutiʼ, sínuque pa ñanda guiráʼ ñaca arrepentir» (2 Pedro 3:9, TNM). Guzéʼtenu ti ejemplu, maʼ zinebe mil de iza cabézabe né stale paciencia guihuinni cadi dxandíʼ guiráʼ ni guníʼ Binidxabaʼ ndaaniʼ jardín guyuu Edén. «Cabeza» si Jiobá guedandá dxi guiá lá. Qué zanda guxuíʼlunu pabiáʼ stale ndaayaʼ zacaa «cani cabeza laabe» pur ni chigaca riʼ (Is. 30:18).

¹⁷ Laaca maʼ bisihuinni Jesús nuu dispuestu cueza. Dxi guyuube lu Guidxilayú, bizuubabe diidxaʼ dede dxi gútibe. Lu iza 33, biguétabe guibáʼ, guyebe nezalú Jiobá ne biluiʼbe laa pabiáʼ risaca rini ni bixhiibe pur laanu. Peru gupa xidé gulézabe dede lu iza 1914 para guzulú guni mandarbe (Hech. 2:33-35; Heb. 10:12, 13). Ne zabézarube dede ora guiluxe ti mil iza de guni mandarbe para guinitilú guiráʼ enemigu stibe (1 Cor. 15:25). Xadxí zabeza Jesús, peru nánnanu nabé risaca ni.

18, 19. ¿Xi zacané laanu chuʼnu dispuestu cuézanu né paciencia?

¹⁸ Guiranu naquiiñeʼ chuʼnu dispuestu cuézanu ne gápanu paciencia. ¿Xi zacané laanu para gúninu ni yaʼ? Guni orarnu Dios para gudii laanu espíritu stiʼ. Cadi guiaandaʼ laanu, caquiiñeʼ gápanu espíritu santu para gápanu paciencia (Efes. 3:16; 6:18; 1 Tes. 5:17-19). Nga runi naquiiñeʼ guinábanu Jiobá gacané laanu guni huantarnu né stale paciencia.

¹⁹ Laaca cadi guiaandaʼ laanu xiñee gupa Abrahán, José ne David paciencia ne gulézacaʼ dede ora biʼniʼ cumplir Jiobá cani bidii stiidxaʼ. Bíʼnicabe ni purtiʼ gúpacabe fe Jiobá ne gúpacabe confianza jneza rúnibe ca cosa que. Qué niníʼ íquecabe laasicabe nin ca cosa ni jma riuuláʼdxicabe. Pa guiníʼ íquenu ca ndaayaʼ ni gucuaacabe la? zaguu ni gana laanu gápanu paciencia.

20. ¿Xi naquiiñeʼ quixhe íquenu gúninu?

²⁰ Neca guidxaagalunu intiica guendanagana, naquiiñeʼ gusihuínninu cabézanu. Dxandíʼ, zándaca ziuu biaje guinabadiidxanu: «¿Dede padxí pue, Jiobá?» (Is. 6:11). Peru né poder ni rudii espíritu santu laanu, zanda guininu casi guníʼ Jeremías: «Zabezaʼ laabe» (Lam. 3:21, 24).