1, 2. (a) Ginipai rengbe ka sarani ani sanahe nga: “Rago adú waĩ”? (b) Tipagine rengbe ani ka gbia ngarasaro ti ni ti gu kpiapai nga ga gu ruru amoyambu naadu bakuru kusayo?

“RAGO adú waĩ?” Gure nangia gu sanahe gu ruru anebi nangia Yesaya gbiati Abakuka asanaha. (Yes. 6:11; Abak. 1:2) Ho Bakindo Davide aake Atambuahe 13 ni, ko asanahe a bara biama nga: “Rago adú waĩ?” (Tam. 13:1, 2) Zavura gaani Gbia nga Yesu Kristo aima sana gu sanahe re ho ko agbiatiko ni na gu sino nga ga zanga idapase nga gu naadu ti agu aboro naadu patiko. (Mt. 17:17) Sidu, ka ngbarani zerenga ka bi gupai nga ani nasana kina gu bangisa sanahe re ti gu kura aregbo ya.

² Ginipai rengbe ka sarani ani sanahe nga: “Rago adú waĩ”? Isoke si rengbe kadu nga ani nahi iraira mangaapai. Watadu si rengbe kadu nga gbinza nandu na ani wa pai na ani nahi kaza watadu gu fudifudiapai nga ga raka rogo gi “gbegberẽ rago” duhe “nikpakarakpakaraha ka mangapai sani” re. (2 Tim. 3:1, NW) Watadu si rengbe kadu nga gu iraira bipai nga ga agu aboro du pati rani nabatasa kina omerani. Singia ginipai du rengbe ka sarani ani sana gu sanahe re, si ni pa wasa ka ino gupai nga ga Yekova ruru amoyambu bakuru kusayo aima sana gu bangisa sanahe nga gu rengbe kadu berãrani yo  re, na si aadunga nga gbegberẽpai du i amangihe ka sana gu sanahe re te!

3. Gine rengbe ka undo rani ho ani agbiatirani ni na kpakaraapai?

³ Ono gine rengbe ka undo rani ho ani agbiatirani ni na gu ngbatunga kpakaraapai re? Ga Mbori toro adu kugii gu bawiriki nangia Yakoba nga guko nangia wirina Yesu ko pe gupai furani nga: “Oni hí pai, awirina, daho Gbia ka yega ni.” (Yak. 5:7) Nirengo, ani dunduko si aida ani du na zerangbaduse. Ono ginipai si akodaha kadu na gi wene sino re?

4, 5. (a) Gine si akodaha kadu na zerangbaduse? (b) Wai du gu bawiriki nangia Yakoba amangisunge na kpiapai ka yugo papara zerangbaduse sa? (Oni bi gu sura duti tonatonaha.)

⁴ Ringbisihe kuti Ziazia Kekeapai, ziazia toro du nakusa gu sino nga ga zerangbaduse; zanga ga Mbori undo, kpakpa aboro arengbanga kadu na zerangbaduse kuho si aidaha kuhoni te. Gu sino nga ga zerangbaduse nga gamunihe be Mbori, na du na zerangbaduse nga bangua gene ka yugo gaani nyemuse fuko ngbaha. Du na zerangbaduse a nayugopa gaani nyemuse koyo du kura aboro ni. Zanga du na zerangbaduse ti aregbo dũ narungburasi gu nyemuse du dagba aboro; ono du na zerangbaduse kini nyakasihe. (1 Kor. 13:4; Gara. 5:22) Zerangbaduse nakoda gu kura nyanyakipa asino nga ga aKristano a. Ni kpiapai, si nandu sa na hipai, nga gu nasarani ani hi akpakarapai ono kidu na wene bipai. (Koro. 1:11; Yak. 1:3, 4) Zerangbaduse ima rengba ka koda gupai a nga ka gbia rungosiro zanga irobape na ka ru nyanyaki na ki kakuti ida ka kina ginipai vura ka manga vurũ. Kurigure, Ziazia Kekeapai nazungodi rani nga ani idi kadu na nyemu ka sungudo Yekova. Gi papara zerangbaduse re, i nyakasipaha rogo Yakoba 5:7, 8. (Oni gedihe.)

⁵ Tipagine si aida ani du ti ni na nyemu ka sungudo Yekova ko mangipai? Yakoba aringbisi gupai du tipa rani kuti gupai du tipa basopobino. Wa vura duhe nga basopobino namangasunge nyanyaki ka rũ ahe, ome ti ni ka ye na mai kuriihe watadu ka sa gaani ahe si sono te. Ni arengbanga ka sa regbo si oro ni ipo te. Ni naida kuti gupai nga si naida ni sungudi “wene zuzu kpotosende” na zerangbaduse. Wakina gure a, badungu apai duho adunga ani na ome kuriihe ya wa ani asungudo ga Yekova akidohe si digisitihe. (Mk. 13:32, 33; Amo. 1:7) Wakina basopobino, si naida ani naasungudo regbo na zerangbaduse.

6. Ginipai rengbe ani ka wirikaha ti gu kpiapai nga ga gu nebi nangia Mika?

⁶ Agu apai ani agbiatirani na ni areme wakina agu apai naadu ti rago gu nebi nangia Mika. Ko araki ti regbo gu gbegberẽ bakindo nangia Aza, nga gu regbo aboro aamanga ngbatunga gbegberẽ mangaapai dunduko. Nirengo, aboro aamanga agu apai naadu ni ‘gbigbita ha sirisiri.’ (Oni gedi Mika 7:1-3.) Mika aima inoho nga pai ho ka ko amangihe ka aria agu apai re te. Sidu tie, ginipai ko arengbe ka mangaha? Ko aya: “Tipa re, mi angéra koyo du Yekova ni, mi asúnguda Mbori nga gi bata; gi Mbori agía pa re.” (Mika 7:7) Si naida ani du a na gu sino nga ga ‘sungudo’ Yekova wakina Mika.

7. Tipagine si aidanga ani sungudi kina sungudo Yekova gbua tipa ko digisi gako akidohe ti ni ya?

⁷ Ka ani du na idapase wa gu naadu ti Mika, ani nika du na nyemu ka sungudo Yekova. Anga gupai du tipa rani wa ga gu zizi boro du bambukiso yo nga guni nasungudo gupai nga i imi ni te. Ni ni zizi ni tipa ka sungudo regbo, na ni angeranga kumbatayo tipa sangbana gupai ni asungudoho te. Nairiwo wai du apai kia tipa rani! Ani na nyemu ka sungudo Yekova mbiko ani ima ino gupai nga ko nika digiso gu gako kidohe adigiso kina boro ti wene regbo, nga ka fu nyenye unga furani! Sidu, ani ‘nadati zera dũ na gbanga hipai ni ngbarago.’ (Koro. 1:11, 12) Ono ka ani ta sungudo regbo kini kpakanahe nga Yekova amanganga pai ni ipo te, si sanga ngbarago tiko te.—Koro. 3:12.

8. Gini apai si aida ani tingidihe wa ani aberãkurii agu akpiapai nga ga gu ruru akumba na adee naadu bakuru kusayo?

⁸ Ani rengbe kadu na bakere nyemu ka sungudo Yekova ka ani tingidipa gu ruru akumba na adee naadu bakuru kusayo nga aguyo nasungudi ko na zerangbaduse tipa ko digisi gako akidohe. (Rom. 15:4) Wa ani kaa berãkurii gayo akpiapai, si adu ni wenepai furani ka tingida gu bagizo regbo i asungudi agu akidohe re tipaha, gu ndupai i adu ti ni na nyemu ka sungudo ho, na agu amaku i agbiaha mbiko gayo zerangbaduse.

9, 10. Si aaida Abarayama na Sara sungudi Yekova tipa bagizo regbo wai?

⁹ Oni makianga gu kpiapai nangia ga Abarayama na Sara. I du dagba ‘agu yo du ni adikumbo akidohe mbiko idapase na hipai.’ Ziazia Kekeapai nape gupai furani nga “fuo ima [Abarayama] na hipai,” ko agbia gu kidohe nga Yekova nika fu maku fuko na ki ngeesi ngbatungako. (Eb. 6:12, 15) Tipagine si aaida Abarayama du ti ni na zerangbaduse? Ka pepai ngba taata gene, si adu nga gu kidohe re nika dia regbo adia tipa ka digiso tihe. Gu mozunga Yekova amangihe na Abarayama atona ka ringbisatihe rogo Nisana 14, 1943 Mbata fu Batikayo Kristo. Gu regbo re du Abarayama na Sara gbiati gayo aborokporo asi gu di nga Ferata ni na ki rimi ku rogo Ringara Mokido. Fuani, Abarayama asungu tipa agarã 25 tipa ka vunga wiriko nangia Yisaka rogo gu garã nangia 1918 Mbata fu Batikayo Kristo, na ko asungu tipa agarã berewe nga 60 tipa gupai nga i vungu atitako nangia Esau na Yakobo rogo gu garã nangia 1858 Mbata fu Batikayo Kristo.—Eb. 11:9.

¹⁰ Bakio rago wai Abarayama adikumboho? Ani nageda gupai nga: “Ko afu nga ũkumbo fu ko narengbe na maa kina nduko auru he te; ko  ki kido ko ya ko afú he afu fu ko ni gako, fu atitako a fuo ko ho ko avunga nga ni mbata ya.” (Amo. 7:5) Tingbafuo Abarayama si gu di nangia Ferata, si adi agarã 430 tipa gupai nga ngbatunga Abarayama da ni gu rikaaboro naandu ka diakumbo gu ringara re.—Gate 12:40-42; Gara. 3:17.

11. Tipagine Abarayama adu ti ni na nyemu ka sungudo Yekova, gini amaku ko nika gbiaha mbiko gako zerangbaduse?

¹¹ Abarayama aima du na nyemu ka sungudo Yekova, mbiko mburu gako zerangbaduse adu rii gako idapase kuti Yekova. (Oni gedi AEbere 11:8-12.) Abarayama aima du na ngbarago ka sungudo gu kidohe re, wa vura duhe nga ko aabingo ho si ki digisitihe dunduko ti ragoko te. Ono oni berẽnga pa gu ngbarago Abarayama nika du na ni ho i nika zingisa ko ni ku rogo paradizo auru kpotosende. Kina ngbako nika zera ka bi wai i ake gako apangbanga gbiati gu nga ga atitako rogo Ziazia Kekeapai. * Oni berẽnga kina pa gu ngbarago ko nika du na ni ho ko nika inopa gako nyanyakipa bangiriba ni rogo ga Mbori ringbisapai yo nibipa gu tita dee i akidopa ko! Zanga kapa, ko nika bihe abi nga si angba angba ko du na zerangbaduse.

12, 13. Tipagine si aaida Yosefa du na zerangbaduse ti ni, na gini wene sino ko adu na ni?

¹² Gu tita Abarayama nangia Yosefa ayugu gupai a nga ko adu na nyemu kadu na zerangbaduse. Aboro amangiko na kere irairaapai. Bambatapai nga, awiribako abagiko ni kanga ho garãko adu ni nga 17. Fuani, i ki pe ziree kutiko ya ko aaida ka kodaba na dia bairako ngbaome na si ki sa gupai nga i ba ko ku bambukiso yo. (Bam. P. 39:11-20; Tam. 105:17, 18) Si aangera wa ko aagbia kina mbusa tipa gako ruru mangapai kuba gupai nga ko gbia maku. Ono tingbafuo agarã 13, apai aˈariatihe ni kina boro ipo. I akusi ko bambukiso yo na ki moiko ni gu ue kikiipa boro Ezipeta yo.—Bam. P. 41:14, 37-43; Amo. 7:9, 10.

¹³ Ya mo iraira mangaapai asa Yosefa ni kere zingizingi boro? Ya mo si asa gupai nga ka ko du nga na kido berewe kuti gako Mbori nga Yekova ya? Wagusa te. Gine naundo Yosefa ko sungudi Yekova na zerangbaduse? Gako idapase kuti Yekova. Ko aima bi be Yekova rogo apai yo. Oni bingo wai duhe ni yuguyuguhe rogo gupai yo ko agumbaha fu awiribako: “Ka oni gúnde nga ya. Mi du ku ba Mbori? Ono tipa roni, oni naberẽ ka manga fere gbegberẽ; ono Mbori asa ha ni wenepai, si ki du ni bata fu badungu aboro, a wa bi oni he ni bangironi ti gi uru re.” (Bam. P. 50:19, 20) Ni yangarapai tie, Yosefa aima bihe nga si angba angba ko sungudi Yekova.

14, 15. (a) Ginipai du ni wenehe tipa wai Davide adu na zerangbaduse? (b) Gine naundo Davide ko sungu na zerangbaduse?

¹⁴ Bakindo Davide berewe nga gu boro aboro aima manga ni na badungu irairaapai. Wa vura duhe nga mbu Davide kindi tooni Yekova ambedi ko ko du ni bakindo aYisaraere kumbatayo, ko asungu tipa agarã 15 tipa kada ni bakindo kurii ngbatungako. (2 Sam. 2:3, 4) Ti agu aregbo re, gu gbegberẽ bakindo nangia Saura amerefuo Davide ka gbata ko tipa ka imoko. * Nisangbana gipai re, Davide aaraka ni batakuari, kura aregbo ko anaaraka rogo kura aringara, na kura aregbo rogo asiimbia ngbakungbo yo. Zavura ho Saura akpi ni niyangaraha ti regbo vura, si aidi Davide sungu tipa agarã wa saba tipa kada ni bakindo kurii ringara aYisaraere dunduko.—2 Sam. 5:4, 5.

¹⁵ Tipagine Davide adu ti ni na nyemu ka sungo na zerangbaduse? Ko akaragapai kina rogo gu ngisa atambuahe ko asanahe bara biama  rogoho nga “Rago adú waĩ?” Gere nga gupai ko agumbaha: “Ono mi akida kuti ga weneringise; kpotore yo adu pusiapusia rogo ga bata. Mi abi bia fu Yekova, bambiko ko amangi pa re wenengai gbe.” (Tam. 13:5, 6) Davide akido kuti ga Yekova weneringise watadu bangabanga nyemuse. Ko aangera kumbatayo na ngbarago tipa gupai nga Mbori batasi ko, na ko aaberãkurii wai Yekova amangi fuko ngba wene gene. Nirengo, Davide abihe nga si angba angba ko sungudi Yekova.

16, 17. Wai du aYekova na Yesu namoi wene kpiapai nibipa du na nyemu ka sungudo regbo?

¹⁶ Nibipa du na zerangbaduse, Yekova aidanga ani mangi gupai nga gu ko adunga na nyemu ka mangaha nitiko ya te. Ko ima maa wene kpiapai kisusi nga ga du na nyemu ka sungudopai. (Oni gedi 2 Petero 3:9.) Yekova aima digo nisungu na zerangbaduse tipa akutu agarã tipa ka nyasariipa gupai nakuru ati Edene yo bara sa kindi. Ko “nasunguda” regbo na zerangbaduse na kini ‘sungudi’ gu regbo ko nika ziasi rimoko ti ni. Gipai re nika ye na bakere amaku fu agu aboro “nasunguda ko.”—Yes. 30:18.

¹⁷ Yesu aima du a na nyemu ka sungudo regbo. Wa vura duhe nga ko aima susa rogo gu asada naadu kuti gako padu ni ruruse auru kpotosende ane na ki yugu pa nyakapa gako motumo tumorii fu Yekova rogo gu garã nangia 33 Fuo Batikayo Kristo, si aidi ko sungu da ku rogo gu garã nangia 1914 tipa ka tona zogarago. (Amo. 2:33-35; Eb. 10:12, 13) I nika nyasariipa avurako dunduko kina ti digido gako Zogarago Tipa Agarã Kutu. (1 Kor. 15:25) Si nika ida ko sungudipai tipa gbanga regbo, ono ani ima rengba kadu na gu kido nga si nika du ni wenepai ka sungudo gu regbo re.

18, 19. Gine nika undo rani ani du na nyemu ka sungudo Yekova na zerangbaduse?

¹⁸ Zanga kapa tie, ani dunduko ni basasa si aida ani du na nyemu ka sungudo Yekova, kadu na gu sino nga ga sungudo regbo na zerangbaduse. Ono gine nika undo rani ani mangi gipai re? Ani kpari tipa ga Mbori toro. Oni tingidi gupai nga, zerangbaduse nga papara zuzu toro. (Ef. 3:16; 6:18; 1 Tesa. 5:17-19) Oni zungodi Yekova ko undo roni oni hipai na zerangbaduse.

¹⁹ Oni tingidi gupai a naundo Abarayama, Yosefa, na Davide tipa gupai nga i sungudi ga Yekova akidohe na zerangbaduse si digisitihe. Si angia gayo idapase kuti Yekova na gu kido i adu na ni kuti wai ko aamangapai na yo. I aamaanga berãyo kina fuo gayo ngbarago te. Wa ani kaa berãkurii wai apai aye ka ngba fuyo, si nika ngarasa rani a ani du na gu sino nga ga sungudo regbo.

20. Si naida gaani diaberã ni basasa dunduko du nga gine?

²⁰ Sidu, wa vura duhe nga ani nagbiatirani na aˈasada, ani ima diaberã ka yugo gu sino nga ga ‘sungudo’ regbo. Nirengo, kura aregbo kinaho ani naima rengba ka kpara kuari nga: “Ako Yekova, rago adú waĩ?” (Yes. 6:11) Ono mbiko gu ome nga ga ga Mbori ziazia toro, ani dunduko ni basasa ima diaberã ka gumba kina agu afugo Yeremaya agumbaha nga: “Yekova nga gi kparakpara he, si du mi amáa bangire ti ni ti ko.”—Kpe 3:21, 24.