1, 2. Dahaka dainai Paulo bona Sila be dibura ruma dekenai idia atodia? (Laulau ginigunana herevalaia.)

INAI be malokihi. Bona Filipi siti ai, misinari rua, Paulo bona Sila, be dibura ruma ena lalona momokani daiutuna lalonai idia noho. Edia aena be au metaudia rua huanai idia koudia. Edia doruna be idia do hisihisi noho, badina au amo idia dadabadia. (Kara 16:23, 24) Unai ibounai be idia vara haraga! Dagedage hutuma ese maketi gabuna dekenai idia ruaosi idia veria lao, bona kota vairanai idia gini. Edia dabua idia darea oho, bona au amo idia dadabadia. (Kara 16:16-22) Dagedage bada idia davaria! Paulo be Roma tauna dainai, iena kota idia karaia namonamo be namo. *

² Paulo be dibura ai ia helai bona unai dina ai idia vara gaudia ia laloa. Ia ese Filipi taudia ia laloa. Edia siti ai, Iuda taudia edia sinagoga ta ia noho lasi, to Paulo ese ia vadivadi henia siti  ma haida be mai edia sinagoga. Unai dainai tomadiho totona, Iuda taudia be vaia geiti murimuri ai ia noho sinavai badinai idia haboua. (Kara 16:13, 14) Anina be unai siti ai Iuda tatau 10 idia noho lasi, a? Badina bema Iuda tatau 10 idia noho, sinagoga ta do ia gini. Filipi ai idia noho taudia be idia heagi, badina idia be Roma ena sitisen. (Kara 16:21) Reana unai dainai idia laloa lasi inai Iuda tatau rua, Paulo bona Sila, be reana Roma taudia danu. Herevana ena badina be dahaka, to dibura ruma ai idia atodia.

3. Paulo be dibura ruma ai ia noho neganai, reana dahaka henanadai ia laloa, to dahaka ia karaia?

³ Reana Paulo be hua haida gunanai idia vara gaudia ia laloa danu. Unai nega ai ia be Aegean Davarana ena kahana ma ta ai ia noho, unai be Asia Minor ai. Unuseni ia noho neganai, nega momo lauma helaga ese ia koua gabu haida dekenai ia haroro lasi totona. Unai be hegeregere lauma helaga ese Paulo ia hadibaia gabu ma ta dekenai do ia lao. (Kara 16:6, 7) To edeseni do ia lao? Paulo be Troa dekenai ia noho neganai, matahanai ta lalonai inai oda ia abia: “Makedonia dekenai oi mai.” Toana be unai be Iehova ena ura, unai dainai Paulo be maoromaoro unai boiboi herevana ia abia dae. (Kara 16:8-10 duahia.) To unai murinai dahaka ia vara? Makedonia dekenai ia ginidae murinai, ia be dibura ruma ai idia atoa! Dahaka dainai Paulo dekenai ia vara gauna be Iehova ese ia koua lasi? Ia be dibura ruma ai do ia noho ela bona edena nega? Ena be Paulo be reana unai henanadai ia lalodia, to iena abidadama be ia goada bona ia moale. Ia bona Sila be “idia guriguri bona Dirava hanamoa anedia idia abia” matamaia. (Kara 16:25) Dirava ena maino ese edia kudouna bona lalona ia hagoadaia.

4, 5. (a) Edena dala ai ita be Paulo hegeregerena? (b) Paulo dekenai dahaka ia vara?

⁴ Paulo hegeregerena, reana oi mamia oi be Dirava ena lauma helaga ena hakaua dalana oi badinaia bona abia hidi ta oi karaia, to gabeai hekwakwanai haida oi davaria, o reana emu noho dalana ia idau dainai emu mauri ai gau badadia haida oi haidaua. (Had. 9:11) Oi dekenai idia vara gaudia oi laloa lou neganai, reana do oi laloa dahaka dainai Iehova ese unai gaudia ia koua lasi. Bema unai lalohadai oi abia, dahaka ese oi do ia durua Iehova oi abidadama henia noho totona? Haere abia totona, Paulo bona Sila edia sivarai mani ita laloa lou.

⁵ Paulo bona Sila be Dirava hanamoa anedia idia abia noho lalonai, hoa gaudia haida idia vara. Karaharaga tano mareremarere bada ia vara. Bona dibura ruma ena iduara ibounai idia kehoa. Dibura taudia ibounai edia seini idia makohia. Paulo ese dibura naria tauna ia koua dainai, sibona ia hamasea lasi. Dibura naria tauna bona ena ruma bese be idia bapatiso. Murina dinana ai, majistret taudia ese gadi taudia idia siaia Paulo bona Sila idia ruhaia totona. Bona idia noidia mai maino ida siti do idia rakatania. Gabeai, majistret taudia idia laloparara idia be kerere badana idia karaia, badina Paulo bona Sila be Roma ena sitisen, unai dainai idia ruaosi idia hakaudia lao. To, Paulo bona Sila be ia bapatiso taihu, Lidia, dekenai idia lao guna, ia idia bamahuta henia totona. Ma danu, unai be nega namona edia tadikaka idia hagoadaia totona. (Kara 16:26-40) Gau ibounai be idia idau haraga!

6. Inai stadi ai dahaka do ita herevalaia?

⁶ Paulo bona Sila dekenai idia vara gaudia  amo dahaka ita dibaia? Iehova be ita laloa lasi gauna ia karaia diba, unai dainai hahetoho negadiai, namo lasi ita lalohekwarahi momo. Idia vara gaudia ese Paulo ia hagoadaia momokani, unai ita diba badina ia ese Filipi tadikaka ia tore henia neganai, ia ese lalohekwarahi karana bona Dirava ena maino ia herevalaia. Paulo ena hereva Filipi 4:6, 7 dekenai mani ita herevalaia guna. (Duahia.) Unai murinai, Baibel lalonai idia noho sivarai ma haida do ita herevalaia. Bona dokonai, “Dirava ena maino” ese ita ia durua dalana do ita herevalaia, unai amo ita haheauka bona Iehova dekenai ita tabekau diba.

7. Paulo ese Filipi tadikaka ia tore henia neganai, dahaka ia hadibaia, bona unai amo dahaka ita dibaia?

⁷ Filipi tadikaka ese Paulo ena revareva idia duahia neganai, ia dekenai ia vara gauna bona Iehova ese Paulo ia durua dalana idia laloa. Unai revareva amo Paulo ia ura idia dekenai dahaka ia hadibaia? Idia ia hadibaia do idia lalohekwarahi lasi. To do idia guriguri bona Dirava ena maino do idia abia. Mani oi laloa, “Dirava ena maino” ese “laloparara ibounai ia hereaia.” To, unai ena anina be dahaka? Paulo ena hereva ena anina be “Dirava ena maino” ese gau ibounai ia hereaia momokani. Nega haida iseda hekwakwanai ita hamaoromaoroa daladia ita diba lasi, to Iehova be unai ia diba, bona ita laloa lasi gauna ia karaia diba.​—⁠2 Petero 2:9 duahia.

8, 9. (a) Ena be Paulo be Filipi ai dagedage ia davaria, to dahaka namo ia vara? (b) Dahaka dainai Filipi tadikaka ese Paulo ena revareva idia laloa bada?

⁸ Filipi tadikaka be lagani 10 gunanai idia vara gaudia idia laloa lou neganai, Paulo ena revareva amo goada idia abia. Paulo ese ia torea herevadia be momokani. Ena be ia vara kara gagevana be Iehova ese ia koua lasi, to unai ese dala ia kehoa Paulo ese ‘sivarai namona ia hamomokania bona kota vairanai ena maoro ia gwauraia hedinarai’ totona. (Fili. 1:7) Unai dainai unai majistret taudia ese Keristani kongrigeisen matamatana idia dagedage henia lasi be namo. Reana Paulo be Roma ena sitisen dainai, Paulo bona Sila idia lao neganai, hahediba tauna Luka be Filipi dekenai ia noho diba. Unai amo Luka ese Filipi Keristani taudia do ia durua.

⁹ Momokani, Filipi tadikaka ese Paulo ena revareva idia duahia neganai, idia diba ia torea herevadia be ia sibona ena lalohadai lasi. Paulo be hekwakwanai badadia ia davaria. Momokani, Paulo ese unai tadikaka ia tore henidia neganai, Roma ai ia be ruma ta dekenai idia guia. To ia hahedinaraia “Dirava ena maino” be ia dekenai ia do noho.​—⁠Fili. 1:12-14; 4:7, 11, 22.

10, 11. Bema hekwakwanai ta dainai ita lalohekwarahi, dahaka ita karaia diba, bona dahaka ita abia dae be namo?

¹⁰ Dahaka ese ita ia durua diba, unai amo do ita lalohekwarahi lasi bona “Dirava ena maino” do ita mamia? Paulo ese Filipi tadikakadia dekenai ia gwauraia herevadia ese idia hahedinaraia, lalohekwarahi hamaragia dalana tamona be guriguri karana. Unai dainai ita lalohekwarahi neganai, namona be ita guriguri. (1 Petero 5:6, 7 duahia.) Iehova ita guriguri henia neganai, namona be ita abia dae momokani ia be ita ia laloa bada. Bona ita abia hahenamo ibounai dainai, ia ita “tanikiu” henia be namo. Laloaboio lasi, Iehova “ese ita noia eiava lalohadailaia  gaudia sibona lasi, to unai gaudia idia hereaia gaudia ia henia diba.”​—⁠Efe. 3:20.

¹¹ Paulo bona Sila dekenai ia vara hegeregerena, Iehova ese dala idauidau ai ita ia durua diba. Reana hoa karana ta do ia karaia lasi, to ia henia heduruna ese ita ia hagoadaia diba. (1 Kor. 10:13) To, namo lasi ita laloa ita be do ita helai sibona bona Iehova ese iseda hekwakwanai do ia hamaoromaoroa. Lasi, namona be iseda guriguri hegeregerena ita kara. (Roma 12:11) Iseda kara ese do ia hahedinaraia ita be mai momokani ida ita guriguri, bona Iehova ese ita do ia hanamoa. Danu, namona be ita laloatao, Iehova be ita noia o palanilaia gaudia sibona do ia henia lasi. Nega haida ita laloa lasi karana ta ia karaia diba. Hari mani haheitalai haida ita itaia, unai amo do ita abia dae momokani Iehova be ita laloa lasi karana ta ia karaia diba.

12. (a) King Senakeriba ena hagaria herevadia dainai, King Hesekaia be dahaka ia karaia? (b) Iehova ese ia vara hekwakwanai ia hamaoromaoroa dalana amo dahaka ita dibaia?

¹² Baibel ita duahia neganai, Iehova ese ia karaia hoa karadia edia sivarai ita duahia. King Hesekaia ena nega ai, King Senakeriba ese Iuda hanua ia tuari henia bona taoni mai magu aukadia ibounai ia abia, to Ierusalema ia abia lasi. (2 Kin. 18:1-3, 13) Bena Senakeriba be Ierusalema tuari henia totona ia lao. King Hesekaia be dahaka ia karaia? Guriguri amo Iehova ena heduru ia noia bona Iehova ena peroveta tauna Isaia ena sisiba ia tahua. (2 Kin. 19:5, 15-20) Gabeai, Hesekaia be ia laloa maoromaoro bona Senakeriba ese ia gwauraia moni be ia dekenai ia henia. (2 Kin. 18:14, 15) Dokonai, Hesekaia be nega daudau lalonai do ia vara gauna totona hanua taudia ia hahegaegaea. (2 Siv. 32:2-4) To unai hekwakwanai be edena bamona idia hamaoromaoroa? Iehova ese aneru ta ia siaia bona hanuaboi tamona lalonai Senakeriba ena tuari taudia ibounai 185,000 ia alaia mase. Hesekaia be unai kara dekenai ia hoa bada!​—⁠2 Kin. 19:35.

13. (a) Iosepa dekenai ia vara gaudia amo dahaka ita dibaia? (b) Sara dekenai dahaka hoa karana ia vara?

¹³ Iakobo ena natuna, Iosepa, mani ita laloa. Ia be Aigupito ena dibura ruma ai ia noho neganai, ia laloa lasi ia be Aigupito ena siahu bada tauna iharuana ai do ia lao eiava Iehova ese ia do ia gaukaralaia hitolo bada amo iena ruma bese ia hamauria totona. (Gen. 40:15; 41:39-43; 50:20) Momokani, Iehova ese ia karaia gaudia ibounai dainai Iosepa ia hoa. Iosepa ena tubuna hahine Sara mani ita laloa danu. Sara be ia buruka vadaeni dainai, ia laloa Iehova ese do ia  durua natuna ta ia havaraia totona, a? Reana matamanai Sara ia laloa lasi ia be Isako do ia havaraia.​—⁠Gen. 21:1-3, 6, 7.

14. Iehova dekenai dahaka ita abia dae momokani?

¹⁴ Tanobada matamata ia do mai lasi neganai, namo lasi ita laloa Iehova be hoa dalanai iseda hekwakwanai ibounai do ia haorea. Bona ia ita noia lasi iseda mauri lalonai hoa karana ta ia karaia totona. To, ita diba guna Iehova ese hoa dalanai iena hesiai taudia ia durua. (Isaia 43:10-13 duahia.) Unai dainai ia ita abidadama henia diba. Ia ese ita dekenai goada do ia henia iena ura ita hagugurua totona. (2 Kor. 4:7-9) Hesekaia, Iosepa, bona Sara edia sivarai amo dahaka ita dibaia? Iehova ese ita ia durua diba hekwakwanai badadia ita haheaukalaia totona, bema ia dekenai ita tabekau.

15. Edena bamona “Dirava ena maino” ita abia noho diba? Gwauraia hedinarai.

¹⁵ Ena be hekwakwanai ita davaria, to edena bamona “Dirava ena maino” ita abia noho diba? Bema iseda hetura karana Iehova ida ita hagoadaia. Momokani, “Keriso Iesu” ena mauri davalaia boubouna dainai, ita be Iehova ita tura henia diba. Unai mauri davalaia boubouna be Iehova amo ita abia harihari gauna. Oibe, unai mauri davalaia boubouna dainai, Iehova ese iseda kara dika ia gwauatao, iseda lalomamina be ia goeva, bona ia kahirakahira ita lao diba.​—⁠Ioa. 14:6; Iam. 4:8; 1 Pet. 3:21.

16. Bema “Dirava ena maino” ita abia, dahaka namo do ia vara? Haheitalai gwauraia.

¹⁶ “Dirava ena maino, laloparara ibounai ia hereaia gauna” ita abia neganai, dahaka namo do ia vara? Baibel ia gwau, ‘iseda kudouna bona lalona do ia gimaia, Keriso Iesu amo.’ (Fili. 4:7) Inai hereva “gimaia” be nega momo ami taudia ese idia gaukaralaia. Ia be ami orea ta ese siti ta ia gimaia karana ia herevalaia. Unai bamona ami orea ta ese Filipi siti ia gimaia. Unai dainai hanuaboi ai, Filipi taudia be mai gari lasi ida idia mahuta, badina idia diba gadi taudia ese siti ena geiti idia gimaia. Unai hegeregerena, bema “Dirava ena maino” ita abia, do ita lalohekwarahi lasi. Ita diba Iehova be ita ia laloa bada bona ia ura ita moale. (1 Pet. 5:10) Unai ita diba dainai, lalohisihisi o lalomanoka gaudia ese ita do idia hametaua lasi.

17. Hisihisi badana neganai, dahaka ese ita do ia durua Iehova ita abidadama henia totona?

¹⁷ Kahirakahira taunimanima dekenai hisihisi badana do ia vara. (Mat. 24:21, 22) Ita diba lasi ita ta ta dekenai dahaka do ia vara. To, namo lasi unai ita lalohekwarahilaia. Ena be Iehova ese do ia karaia gaudia ibounai ita diba lasi, to iseda Dirava ita diba. Guna ia karaia gaudia amo ita diba, herevana dahaka ia vara, Iehova be iena ura do ia hagugurua, bona ita laloa lasi dalanai unai ia karaia diba. Unai dainai hari Iehova ese ita totona ia karaia gaudia amo “Dirava ena maino, laloparara ibounai ia hereaia gauna” ita mamia diba.