1, 2. Anni ira i nesimmu ta Filipos nga narresulta ta kefuku da Pablo anni Silas? (Innan i letratu ta gafu na artikulo.)

MATTANGNGA na gabi ngana. Nakafuku i dua nga misionero nga da Pablo anni Silas ta konaggan nga kuarto na ammukutan​—ta siudad na Filipos. Nepay ta sepo i takkida, anna mataka-taki paga i likugda ta nikapala-paluda. (King. 16:23, 24) Alistu laman nga nesimmu i ganna-gannug! Gavva laman nga ginugguggun ira na magaru tapenu iyarubang ta ammanunnutan. Nibaruasiadda ira, tapus nipapala-paluda tu nepallo. (King. 16:16-22) Talaga kawan na hustisia yatun! Romano si Pablo yatutta mepangngo yaya ta patas nga bista. *

² Durante nga egga ta affukutan si Pablo, nononopanna i nesimmu ira tatun nga aggaw. Mavurung yaya ta totolay ta Filipos. Awan vuluvuga tu sinagoga na Judio ta siudadda, ari tu kagitta na siudad ira nga binisita ni Pablo. Ta kakuruganna, mawag na maddayarayaw ira nga Judio nga maggarammammung ta lawan na siudad ta pipi na bannag. (King. 16:13, 14) Megafu  kari yatun ta awan paga tu mafulu na lallaki nga Judio ta siudad, i bilang nga mekiddaw nige makaforma tu sinagoga? Manawag nga iyopopog na taga-Filipos i pakka-Romanoda. (King. 16:21) Yatun kari i rason nu ngatta ariadda vuluvuga ninono nga yaw ira nga Judio, nga da Pablo anni Silas, ay makipagileli gapa ta Roma? Ariattam masiguradu, ngem i ammu tam, ari tu patas i kefukuda.

3. Ngatta maguluan si Pablo ta nikefukuna? Kunnasina minammatan yatun?

³ Awayyana nga nononopan gapa ni Pablo i nesimmu ta nappasa ira nga vulan. Egga yaya ta abbag na Bebay na Aegean, ta Asia Minor. Ta keggana tari, namippiga yaya ginamma na masanto nga espiritu ta pallayyagayya ta karuan ira nga lugar. Kagitta na itubba ira na masanto nga espiritu nga umay ta tanakuan nga lugar. (King. 16:6, 7) Ngem sitaw? Zimittal i tabbag gukaban na tadday nga sirmata ta Troas. Nekagi kani Pablo: “Umay ka bi ta Macedonia.” Megafu ta manawag ngana nu anni i uray ni Jehova, insigida nga inaksepta ni Pablo i imbitasion. (Bibbigan i Kingngua 16:8-10.) Ngem anni i tumunug nga nesimmu? Ta paddattalna ta Macedonia, nefuku yaya! Ngatta nipamavulun ni Jehova nga mesimmu yaw kani Pablo? Kunnasi yaya kabayag mefuku? Maski paga probleman ni Pablo yaw ira nga pakkiavu, magayaya anna masikan lagapa i pangurugna. “Maddasa-dasal anna makkakkansion ta imno da Pablo anni Silas tu paddaya-rayaw da ta Dios.” (King. 16:25) Binanna-bannayan na imammo na Dios i giffutuan anna ginnonopadda.

4, 5. (a) Kunnasi meyarig i situasiottam kani Pablo? (b) Kunnasi nga alistu nanguli i situasion ni Pablo?

⁴ Kagitta ni Pablo, awayyana nga egga i tiempo ta pattolem nga nakatageno ka nga tuttuttulammu i giya na masanto nga espiritu, ngem ari tu nesimmu i ekspektammu ira. Neparubakka ta ziga-riga, onu egga ka ta situasion nga kawagan nga daka-dakal i uliammu ta pattolem. (Ecl. 9:11) Nu nonopammu i nappasa, baka mattaka ka nu ngatta nipamavulun ni Jehova nga mesimmu i ganna-gannug. Nu kunnatun, anni i makoffun nikaw tapenu makapakkomfiansa tu buu kani Jehova? Tapenu malegan i tabbag, repasuattam i nesimmu kada Pablo anni Silas.

⁵ Durante nga makkakkansion tu paddayaw da Pablo anni Silas, natturunug i kakkadda-kaddag nga nesimmu. Gavva laman nga nallunig tu masikan. Navvuka i puerta ira na affukutan. Nari i kawag na ngamin nga presu. Ginamma ni Pablo i guardia nga mappakamatay. Nabawtisowan i guardia tuange ta familiana. Ta kommananna, naddog i ofisiales nga Romano tu pulis ira tapenu palawanan da Pablo anni Silas. Nikiddaw na ofisiales nga panawadda tu memammo i siudad. Turi ta nammuadda nga Romano da Pablo anni Silas, nalippawada nga dakal i kamalida, yatutta ira mismu i nangilawan nira. Ngem nikiddaw da Pablo anni Silas nga umay labbi ira ta bagu bawtiso nga si Lydia. Inusada paga yatun nga tiansa tapenu pasikannan i wawwaragi. (King. 16:26-40) Talaga alistu i pinanguli ira na gannug!

6. Anni i paguruvovugan anna repasuattam?

⁶ Anni i magigiammu tam ta nesimmu ira? Mawayya nga kuan ni Jehova i ari maekspekta, yatutta ariattam nakuan nga sobra nga mavurungan nu egga ira problema. Dakal i netudduna yatun kani Pablo gittana masingan ta niturana ta wawwaragi ta Filipos meyannung ta vuru-vurung anna  imammo na Dios. Paguruvovugattam labbi i nitura ni Pablo ta Filipos 4:6, 7. (Bibbigan.) Tapus, repasuattam i karuan paga nga ehemplo ta Biblia nu kunnasi nga kingngua ni Jehova i ari maekspekta. Ikonsidera tam paga nu kunnasi makoffun nittam ‘i imammo na Dios’ nga buu nga makapakkomfiansa kani Jehova.

7. Anni nga leksion i nituddu ni Pablo turi ta nattura yaya ta wawwaragi ta Filipos, anna anni i magigiammu tam ta uvovugna?

⁷ Turi ta nabibbig na wawwaragi ta Filipos i tura ni Pablo nira, siguradu nga neraddammadda nu anni i nesimmu sa anna nu kunnasi nga ariadda inekspekta i pinagguyu ni Jehova. Anni i kayà ni Pablo nga ituddu nira? Ollu ta ngamin: Ari mavurung. Makimallo, tapenu malawanu i imammo na Dios. Ngem innannu nga nekagi tatun nga iyawa na Dios nira “i imammo na nga ari malippawa na tolay.” Anni i kebalinan natun? Nitransleyt na karuan yaw nga “mas paga anne ta ambisiottam ira” onu “lampasanna i ngamin nga plano na tolay.” Kagitta na kakkagian ni Pablo nga ‘i imammo na Dios’ ay mas makapangngua anne ta ekspektattam. Yatutta maski ta pagimamma na tolay nga gittana awan tu solusion na problema tam ira, egga solusion ni Jehova anna awayyana kuan i ari maekspekta.​—Bibbigan i 2 Pedro 2:9.

8, 9. (a) Maski naka-ekspiriensa tu kawan na hustisia si Pablo ta Filipos, anni i makasta nga resulta natun ira? (b) Ngatta talaga makapakkomfiansa i wawwaragi ta Filipos ta nitura ni Pablo?

⁸ Durante nga pana-panonotan na taga-Filipos i nesimmu ira ta mafulu ragun kabalin natun, napasikan nakuan ira. Kurug i nitura ni Pablo. Maski nipamavulun ni Jehova nga mesimmu i kawan na hustisia, narresulta yaw ta ‘pangitaddag anna pamakaladda ta angngurug na tolay ta evanghelio.’ (Fil. 1:7) Magalangan i ofisiales na siudad nga persigian i bagu pataddag nga Cristiano nga kongregasion ta siudadda. Awayyana nga megafu ta pakkagi ni Pablo nga Romano yaya, i doktor nga kavuluna mabbisita nga si Lucas, ay nakapattalupaddian ta Filipos ta pappanaw da Pablo anni Silas. Makoffun si Lucas ta bagu ira nga Cristiano tatun nga siudad.

⁹ Turi ta nabibbig na wawwaragi ta Filipos i tura ni Pablo, siguradu nga ammuda nga i kinagina nira ay ari laman nga personal ira nga opinion. Naka-ekspiriensa tu nepallo nga ziga si Pablo; ngem nipasinganna nga egga sa i ‘imammo na Dios.’ Ta kakuruganna, turi ta nattura nira si Pablo, agga-fuku yaya ta mismu nga balena ta Roma. Ngem nipasinganna lagapa nga egga sa ‘i imammo na Dios.’​—Fil. 1:12-14; 4:7, 11, 22.

10, 11. Anni i mawag nga kuattam nu kuruga mavurung ittam ta tadday nga problema, anna anni nakuan i rasonable nga ekspektattam?

¹⁰ Anni i makoffun nittam tapenu ari kuruga mavurung ta gannug ira anna maekspiriensa ‘i imammo na Dios’? Mabibbig tam ta tura ni Pablo ta taga-Filipos nga pakimallo i pangontra ta vuru-vurung. Yatutta imbes nga mavurung, makimallo tam lallagu. (Bibbigan i 1 Pedro 5:6, 7.) Sigga-makatalo nga makimallo kani Jehova, megafu ta ammu tam nga tangngallanna ittam. Makimallo nisa nga “mavulunan ta pabbala-balo,” gukaban na pannono ta bendisiottam ira. Mas makapakkomfiansa ittam sa nu nonopattam nga “makakua [si Jehova] ta mas aru paga anne ta kiddawat-tam sa onu manono tam.”​—Efe. 3:20.

¹¹ Kagitta na situasion da Pablo anni Silas ta Filipos, makaddag tam gapa nu anni i kuan ni Jehova para nittam. Maski nu ari gapa extraordinario i kuanna para nittam,  kanayun nga yatun i kawagattam. (1 Cor. 10:13) Siempre, ari kebalinan natun nga marrelaks anna mattunggo nga basta maginnag laman nga itunung onu solusionan ni Jehova i problema. Mawag nga magguyu ittam mekunnay ta pakimallo tam. (Roma 12:11) Pakurugan na kukukuattam i sinseridad tam anna mapeggan tu rason si Jehova nga bendisionan ittam. Ariattam nakuan kattamman nga mawayya ni Jehova nga kuan i mas paga anne ta kiddawan onu ekspektattam nga kuanna. Nu mittan, surpresanna ittam gukaban na pangngua ta ariattam inekspekta. Ikonsidera tam i karuan nga rekord ta Biblia nga mamasikan ta komfiansa tam ta abilidad ni Jehova nga kuan i ariattam ekspektan.

12. (a) Anni i kingngua ni Patul Ezekias turi ta inananassing yaya ni Patul Senakerib na Asiria? (b) Anni i magigiammu tam ta passolba ni Jehova ta problema?

¹² Durante nga gigiammuattam i Katurakan, kanayun nga makaleg ittam tu angngarigan ira ta pangngua ni Jehova ta ari maekspekta. Nattolay si Patul Ezekias turi ta sinakup ni Patul Senakerib na Asiria i Juda anna i ngamin nga napaderan nga siudad, fuera ta Jerusalem. (2 Pat. 18:1-3, 13) Tapus, pinlanona nga atakeyan i Jerusalem. Anni i kuan ni Patul Ezekias taw nga duttal nga peligro? Nakimallo yaya kani Jehova anna nakitabarang ta profeta ni Jehova nga si Isaias. (2 Pat. 19:5, 15-20) Nipasingan paga ni Ezekias i kina-rasonablena gukaban na pappagana tu multa kani Senakerib. (2 Pat. 18:14, 15) Ngem, napprepara lagapa si Ezekias ta apaddu nga pangatake. (2 Cro. 32:2-4) Kunnasi nga nangultimo yatun? Naddog si Jehova tu tadday nga anghel tapenu patayan i 185,000 nga suddalu ni Senakerib ta tanga-gabi laman. Ari inekspekta ni Ezekias yatun!​—2 Pat. 19:35.

13. (a) Anni i magigiammu tam ta nesimmu kani Jose? (b) Anni i ari nga maekspekta nga nesimmu kani Sara, nga atawa ni Abraham?

¹³ Ikonsidera i kabataan nga si Jose, nga ana ni Jacob. Turi ta nefuku ta Ehipto, egga kari i ideyana nga matunno yaya ta mekadua nga katannangan nga posision ta davvun onu usan yaya ni Jehova tapenu ipaliag i familiana ta bisin? (Gen. 40:15, ftn.; 41:39-43; 50:20) Siguradu nga i kingngua ni Jehova ay mas anne paga ta inekspekta ni Jose. Nonopan gapa si Sara nga yena na lolo ni Jose. Inekspekta kari gapa na bako nga si Sara nga iddan yaya ni Jehova tu sarilina nga ana nga lalaki, ari laman tu i neyana na aripanna nga babay? Siguradu nga i nikeyana ni Isaac ay mas anne paga ta inekspekta ni Sara.​—Gen. 21:1-3, 6, 7.

14. Ngatta makapakkomfiansa ittam kani Jehova?

¹⁴ Siguradu nga ariattam gapa ekspektan nga mammilagro si Jehova tapenu alsan i ngamin nga problema tam nige na nepromesa nga paraiso; ariattam gapa ikikkiddaw  nga egga nakuan i extraordinario ira nga mesimmu ta pattoletam. Ngem ammu tam nga inuffunan ni Jehova i matalo nga aripanna gari ta kappabbaw nga ganna-gannug. (Bibbigan i Isaias 43:10-13.) Makoffun yaw nga pakkomfiansa tapenu mangurug tam sa. Ammu tam nga kuanna i maski anni nga kawagan tapenu uffunan ittam nga ituppal tu mapia i urena. (2 Cor. 4:7-9) Anni ira nga leksion i magigiammu tam taw ira nga angngarigan ta Biblia? Kagitta na ipasingan na angngarigan da Ezekias, Jose, anna Sara, moffunan ittam ni Jehova nga malabanan i gittana imposible maffu nu kanayuttam nga mattalo Sa.

15. Anni i makoffun nittam tapenu mapattalupaddiattam i ‘imammo na Dios,’ anna kunnasi nga posible yatun?

¹⁵ Kunnasi tam arubangan i problema ira anna kanayun lagapa nga mapeggan tu ‘imammo na Dios’? Gukaban na pamattalupaddian ta makasta nga relasion ta Dios tam nga si Jehova. Posible laman yatun nga relasion “ta ketadday onu gukaban ni Jesu-Cristo,” nga nangiyawa ta inangona bilang sakrifisio nga tavvu. Yatun nga probision nga tavvu ay tadday laman ta aru nga kappabbaw ira nga kingngua na Yama tam. Usan ni Jehova i tavvu tapenu pakoman i liwi-liwa tam, nga marresulta tu marenu nga konsensia anna maddukko tam sa.​—Juan 14:6; Sant. 4:8; 1 Ped. 3:21.

16. Anni i resultana nu egga ‘i imammo na Dios’ nittam? Iyilustra.

¹⁶ Anni i resultana nu malawà i ‘imammo na [Dios] nga ari malippawa na tolay’? Kagian na Katurakan nga “yaw i manangngal ta nono anna giffutuan nu ta ketadday nu kani Cristo Jesus.” (Fil. 4:7) I orihinal nga uvovug para ta “manangngal” ay termino ta militar. Tukuyan natun i garison na suddalu ira nga neyasayn tapenu guardian i napaderan nga siudad gari. Kunnatun i siudad na Filipos. Masingngo i katrug na taga-Filipos ira nu gabi, megafu ta ammuda nga guardian na suddalu ira i trangka na siudad. Kunnatun gapa, nu egga ‘i imammo na Dios’ nittam, kanayun gapa nga kalmadu i ginnonopan anna giffutuattam. Ammu tam nga tangngallan ittam ni Jehova anna kayàna nga makasta i patuppalattam. (1 Ped. 5:10) Guardian ittam natun nga pakannammu tapenu ari malaggabbang na vuru-vurung onu pakkadismaya.

17. Anni i makoffun nittam nga arubangan i mappange nga sigga-komfiansa?

¹⁷ Aranni ngana nga meparubang i totolay ta kadakallan nga ziga nga mesimmu taw ta davvun. (Mat. 24:21, 22) Ariattam ammu ngamin i detalye nu anni i efektona yatun nittam bilang indibidual. Ngem, awan tu rason tapenu matavvunan ittam na pavvuru-vurung. Maski ariattam ammu ngamin nu anni i kuan ni Jehova, kilala tam i Dios tam. Nasingattam ta nappasa ira nga pakilallanna nga maski anni i mesimmu, kanayun nga tuppalan ni Jehova i gakkagna, anna nu mittan kuanna yatun ta ariattam inekspekta. Kada kunnatun i kuan ni Jehova, matageno tam “i imammo na nga ari malippawa na tolay.”