1, 2. Mwomwo ika Paulu naShilase vavakashilile mukamenga omu vapwile muFwilipi? (Talenu muvwimbimbi wakulivanga.)

VAMISHONALI vavali, Paulu naShilase vavahakile mukamenga munganda yaFwilipi. Mahinji avo vawahakile mujikuli, oku nawa vali nakwivwa kukola mwomwo yakuvaveta. (Vili. 16:23, 24) Ukalu kana wasolokele mukukasumuna kaha. Vavanyemukilile kuliyongomena lyavatu nakuvatwala kuchilanjilo kuli vaka-kuyula. Vavapulilile uvwalo wavo nakuvaveta jimbwechi. (Vili. 16:16-22) Chuma kana chapihile chikuma! Hakuwana nge Paulu apwile kaLoma, vatelelele kumusopesa mujila yakavumbi. *

² Kuheta mukachi kaufuku, Paulu aputukile kushinganyeka havyuma vyasolokele halikumbi lize. Ashinganyekele havatu vamuFwilipi. Vatu kana kavapwile nasunangonga nganomu vapwile najo vakwavo mujinganda jeka jize atambukililengako. VaYuleya valikungulwililenga nakulemesa Kalunga kuweluka wanganda kwakamwihi nakalwiji. (Vili. 16:13, 14) Chasoloka nge kakwapwile malunga vavaYuleya 10 vaze vasakiwilenga numba vavetavise kutunga sunangongako.  Vatu vamuFwilipi valimwenenga kupwa vavalemu mwomwo yakupwa vaLoma. (Vili. 16:21) Muchima kanou wakulivwimba pamo ukiko wavalingishile vashinganyeke ngwavo Paulu naShilase kavapwile vaLomako. Kala mwosenomwo chapwile, oloze vavahakile mukamenga.

3. Mwomwo ika Paulu alikomokelele hakumukasa mukamenga, oloze muchima muka asolwele?

³ Paulu nawa pamo apwile nakushinganyeka havyuma vyasolokele hatukweji vakunyima shimbu kanda ezenga muFwilipi. Shimbu kanda ezenga muFwilipi apwile muAsia Minor musali yaKalungalwiji Angenyi. Omu Paulu apwile mungalila kana, shipilitu yajila yamukanyishilenga kwambulila muvihela vimwe. Chasolokele nge shipilitu yajila yapwile nakumulweza kuya kuchihela cheka. (Vili. 16:6, 7) Jino vatelele kwambulwila kulihi? Muchakumwenesa vamumwenesele muTolowa, Paulu vamulwezele ngwavo: “Zauka muno muMasetonya.” Hahaze vene Paulu etavilile kuya kuze vamulwezele. (Tangenu Vilinga 16:8-10.) Uno vyuma muka vyakavangijileho? Omu ahetele muMasetonya, hahaze vene vamukashile mukamenga. Mwomwo ika Yehova etavishilile ukalu kana umusolokele? Uno atelelele kutwama mukamenga hamakumbi angahi? Numba tuhu Paulu ashinganyekele havihula kana, oloze kechelelele ukalu kana uzeyese lufwelelo lwenyi nakumuhonesa kupwa wakuwahililako. Ngocho Paulu naShilase vaputukile “kulomba nakwalisa Kalunga namyaso.” (Vili. 16:25) Kaha kuunda chaKalunga chavendejekele michima navishinganyeka vyavo.

4, 5. (a) Ukalu tunahase kuhitamo unahase kulifwana ngachilihi nauze ahichilemo Paulu? (b) Vyuma ahichilemo Paulu vyalumukile ngachilihi?

⁴ Pamo nayenu mwalingaho lyehi vyuma vize mwashinganyekele ngwenu vali nakumitwaminyina kushipilitu yajila yaKalunga, ngana muze chapwile kuli Paulu. Oloze jino mwengilile muukalu waunene chipwe mwalumwineko vyuma vimwe vize kamwashinganyekeleko. (Kwambu. 9:11) Oholyapwa munahase jino kutala haukalu kana nakushinganyeka ovyo Yehova nawitavishila umisolokele. Kachi nge muli muukalu kana, vyuma muka navimikafwa mutwaleho lika kumika nakufwelela muli Yehova? Tunahase kuwana mwakulingila hakushinganyeka cheka havyuma vyasolokele kuli Paulu naShilase.

⁵ Omu Paulu naShilase vembile myaso yakwalisa Kalunga, kwapwile vyuma vyasolokele. Kwejile mundenda, kaha vikolo vyakamenga vyasokolokele, malenge aze vakashile vafunge akasunukile. Paulu akanyishile muka-kulama vafunge ahone kulijiha. Ngocho uze muka-kulama vafunge natanga yenyi vavambapachishile. Omu kwachele, vaka-kuyula vatumine tupasu vakafumise Paulu naShilase mukamenga. Vaze vaka-kuyula valwezele vaze vafunge vafume munganda. Jino hakutachikiza ngwavo Paulu naShilase vapwile vaLoma, vaze vaka-kuyula vamwene jino ngwavo valimbenjele chikuma hakuvasopesa mujila yayipi, ngocho vejile nakuvashinjikiza. Oloze Paulu naShilase kavetavile kuya hahaze veneko, mwomwo vasakile kusalisa ndumbwavo Luchiya uze apwile wamuhya mumuchano. Halwola kana vakolezezele vandumbwavo. (Vili. 16:26-40) Chapundu vene, vyuma vyalumukile mujila yakulipwila.

6. Vyuma muka natushimutwila?

⁶ Vyuma muka natulinangula kumujimbu waPaulu? Yehova nahase kulinga vyuma vize katwashinganyekele ngwetu mwalingako, shikaho katwatela kulizakaminako nge tuli nakuhita muukalu. Vyuma ahichilemo Paulu vyamujikijishile chikuma, kweseka navyuma asonekelele vandumbwenyi muFwilipi hakulizakamina nahakuunda chaKalunga. Chatete, tushimutwilenu hamazu aPaulu aze atwama hali Wavaka-Fwilipi 4:6, 7. (Tangenu.) Kaha chamuchivali, natuhituluka muvyakutalilaho  vyamuMbimbiliya vyakusolola omu Yehova alingile vyuma vize kavashinganyekele ngwavo mwalingako. Chamakumishilo, natushimutwila omu “kuunda chaKalunga” nachitukafwa tumike muukalu nakufwelela muli Yehova.

7. Paulu hakusonekela vandumbwenyi muFwilipi apwile nakusaka vanuke vyuma muka, kaha natulinangula ika kumazu enyi?

⁷ Chapundu vene, omu vandumbwetu muFwilipi vatangile mukanda avasonekelele Paulu, vanukile vyuma vyamusolokelele nomu Yehova amukafwile mujila yize kavashinganyekele ngwavo mwalingako. Uno Paulu apwile nakusaka valinangule vyuma muka kumazu enyi? Apwile nakuvalweza vahone kulizakamina, oloze valombe mangana vapwenga nakuunda chaKalunga. “Kuunda chaKalunga . . . chahambakana kunangakana chosena.” Uno mazu kana atalisa mulihi? Vaka-kwalumuna vamwe valumuna mazu kana ngwavo, “chahambakana vyuma vyosena tweji kushinganyekanga” chipwe “chahambakana vyuma vyosena twafwila kulinga.” Shikaho tunahase kwamba ngwetu Paulu apwile nakulumbununa ngwenyi “kuunda chaKalunga” chapwa chakulipwila chikuma. Ngocho nge tuli muukalu uze tunamono ngwetu katweshi kuhasa kuukumisako, kaha twatela kutachikiza ngwetu Yehova nahase kulinga vyuma vize katwashinganyekele ngwetu mwalingako.—Tangenu WaPetulu 2, 2:9.

8, 9. (a) Numba tuhu Paulu vamuyanjishile omu apwile muFwilipi, oloze vyuma muka vyamwaza vyafumine hakumika chenyi? (b) Mwomwo ika mazu ahanjikile Paulu akolezezele vandumbwenyi muFwilipi?

⁸ Kushinganyeka havyuma vyasolokele myaka likumi kunyima chajikijishile vandumbwetu muFwilipi. Vyuma asonekele Paulu vyapwile vyamuchano. Numba tuhu Yehova etavishile vyuma vyavipi visoloke, oloze chalingishile Paulu navandumbwenyi vahakwile “mujimbu wamwaza nakuuzamisa najishimbi.” (Fwili. 1:7) Hakumona omu Yehova akafwililemo Paulu, atela vaze vaka-kuyula kavahashile kuzungisa cheka chikungulwilo chachihya chavaka-Kulishitu chapwile muze mungandako. Kaha nawa pamo chikiko chalingishile chimbuke Luka uze atambukililenga hamwe naPaulu naShilase asale muFwilipi. Ngocho Luka atwalileho kukolezeza vaze vaka-Kulishitu vavahya munganda kana.

⁹ Shikaho omu vandumbwetu muFwilipi vatangile mukanda avasonekelele Paulu, vetavilile ngwavo mazu kana kawapwile akutaka kahako. Paulu ahichile muukalu waunene, oloze asolwele hatoma ngwenyi apwile ‘nakuunda chaKalunga.’ Nahalwola asonekele uze mukanda kuli vandumbwenyi, apwile mukamenga muLoma. Oloze asolwele ngwenyi apwile ‘nakuunda chaKalunga.’—Fwili. 1:12-14; 4:7, 11, 22.

10, 11. Vyuma muka twatela kulinga nge tunalizakamina chikuma, kaha twatela kufwelela vyuma muka?

¹⁰ Vyuma muka navitukafwa tuhone kulizakamina hachuma numba chimwe mangana tupwenga ‘nakuunda chaKalunga’? Mazu aPaulu aze asonekelele vaka-Fwilipi asolola hatoma kulema chakulomba nge tunalizakamina. Shikaho nge tunalizakamina, twatela kulweza Yehova ukalu wetu kuhichila mukulomba. (Tangenu WaPetulu 1, 5:6, 7.) Mwatela kulomba nalufwelelo kuli Yehova, hakutachikiza ngwenu eji kumizakamanga. Lombenu ‘nakusakwilila’ hakwanuka omu namikisula. Lufwelelo lwetu muli Yehova naluzama nge natushinganyeka ngwetu “nahase kulinga vyuma vyakuhambakana chikuma havyuma tunamulombo chipwe tunashinganyeka.”—Efwe. 3:20.

¹¹ Yehova nahase kutulingila vyuma mujila yize katwashinganyekeleko, ngana muze chapwile kuli Paulu naShilase omu vapwile muFwilipi. Numba tuhu keshi kutulingila vyuma mujila yakukomwesako, oloze mwatukafwa mujila yize  nayitunganyalisa. (Koli. 1, 10:13) Echi kacheshi nakulumbununa nge twatela kutwama kaha kulu nakuvandamina Yehova atukafwe muukalu wetuko. Twatela kulingako vyuma vimwe kweseka navyuma natulomba. (Loma 12:11) Vilinga vyetu vyatela kulita navyuma vize natulomba numba Yehova atukafwe. Twatela kwijiva nawa ngwetu vishinganyeka vyaYehova vyapwa vyakulipwila. Shimbu jimwe eji kulinganga vyuma mujila yize katwashinganyekele ngwetu mwalingako. Tushimutwilenu havyakutalilaho vyamuMbimbiliya vize navitukafwa tufwelele mungolo jaYehova jakutulingila vyuma mujila yize katwashinganyekeleko.

12. (a) Vyuma muka alingile Mwangana Hezekiya omu vasakile kumulukuka kuli Senakelive Mwangana wavaAsulya? (b) Vyuma muka natulinangula hakushinganyeka omu Yehova akumishililemo ukalu kana?

¹² Omu tweji kutanganga muVisoneka, tweji kuwananga vyakutalilaho vyaYehova vyakulinga vyuma mujila yize vatu kavashinganyekeleko. Mwangana Hezekiya ayoyelele mulwola luze Senakelive Mwangana wavaAsulya anyemukilile Yuta nakufungulula jinganda josena jakujingulwisa jikembwe, kusezaho kaha Yelusalema. (Vamya. 2, 18:1-3, 13) Jino Senakelive apwile mujila yakunyemukila Yelusalema. Uno vyuma muka alingile Mwangana Hezekiya hakwivwa mujimbu kana? Alombele Yehova kaha nawa ayile kuli Isaya kapolofweto kaYehova amukafwe. (Vamya. 2, 19:5, 15-20) Hezekiya nawa alingile mwamangana hakuhana Senakelive jimbongo vamutomenenene. (Vamya. 2, 18:14, 15) Mukuhita chalwola, Hezekiya alingileko vyuma vimwe mangana ahonese vaka-kole kumulukuka. (Miji. 2, 32:2-4) Uno vaka-kole kana avahonesele ngachilihi? Yehova atumine kangelo anongese maswalale jaSenakelive 185,000 haufuku umwe kaha. Chapundu vene, naHezekiya kashinganyekele ngwenyi vyuma kana navisolokako.—Vamya. 2, 19:35.

13. (a) Vyuma muka natulinangula kuvyuma vyasolokele kuli Yosefwe? (b) Vyuma muka vyakulipwila vyasolokele kuli Sala pwevo lyaApalahama?

¹³ Talenu nawa vyuma vyasolokele kuli Yosefwe mwanaYakova. Omu apwile muwina wakamenga muEjipitu, kashinganyekele ngwenyi navakamutongola kupwa muhato wamutu wamulemu mulifuchi kanako, kaha nawa kashinganyekele ngwenyi Yehova mwamuzachisa ayovole vausoko wenyi kuzalako. (Kupu. 40:15, kwinyikila chamwishi; 41:39-43; 50:20) Vyuma alingile Yehova vyakomwesele Yosefwe. Chuma chikwavo nawa shina chize chasolokele kuli Sala, kaka yaise yaYosefwe. Sala apwile kashinakaji, kaha ashinganyekele ngwenyi mwana apwile nenyi shina uze kaha vasemene kuli ngamba yenyi. Oloze Sala alikomokelele chikuma omu asemene Isaka, mwomwo kashinganyekele ngwenyi mwapwa namwana mumyaka kanako.—Kupu. 21:1-3, 6, 7.

14. Twatela kufwelela ngwetu Yehova nahase kulinga vyuma muka?

¹⁴ Chipwe ngocho, katwatela kufwelela ngwetu Yehova mwalinga vyuma vyakukomwesa  mangana atufumise muukalu tuli nakuhitamo shimbu kanda kaye kakahya kezengako. Kaha nawa katweshi kufwila ngwetu alinge vyuma mujila yakukomwesako. Oloze twejiva ngwetu Kalunga uze akafwile vangamba jenyi mujila yakukomwesa ikiye Yehova Kalunga ketu. (Tangenu Isaya 43:10-13.) Echi nachitukafwa tufwelele muli ikiye. Twatachikiza ngwetu mwatukafwa tuzate milimo yize nayitesamo kujina chenyi. (Koli. 2, 4:7-9) Vyuma muka tunalinangula kumijimbu kaneyi yamuMbimbiliya? Vyuma vyasolokele kuli Hezekiya, naYosefwe, naSala, vinasolola nge kufwelela muli Yehova chinahase kutukafwa tuhonese ukalu uze nausoloka nge waunene chikuma.

15. Vyuma muka navitukafwa tutwaleho kupwa ‘nakuunda chaKalunga,’ kaha chinahase kupwa ngachilihi ngocho?

¹⁵ Tunahase kutwalaho ngachilihi kupwa ‘nakuunda chaKalunga’ oku tuli nakumona ukalu? Chuma nachitukafwa shina kupwa nausoko wakukola naYehova Kalunga. Usoko kana tunahase kupwa nawo kuvanga kaha “kuhichila muli Kulishitu Yesu,” uze asuwile kuyoya chenyi kupwa wana wandando yakusokola. Ou wana kana naukiko wapwa hichuma chakukomwesa chize atulingila Setu. Yehova eji kutukonekelanga shili yetu mwomwo yawana kana, nakutukafwa tupwenga nachivezu chitoma mangana tupandame kuli ikiye.—Yowa. 14:6; Yako. 4:8; Petu. 1, 3:21.

16. Kupwa ‘nakuunda chaKalunga’ nachitunganyalisa ngachilihi? Hanenu chakutalilaho.

¹⁶ Nge natupwa ‘nakuunda chaKalunga chize chahambakana kunangakana chosena,’ kaha vyuma muka natunganyala? Visoneka vyamba ngwavyo, ‘nachikinga michima yetu navishinganyeka vyetu kuhichila muli Kulishitu Yesu.’ (Fwili. 4:7) Lizu lyachiHelase valumuna ngwavo ‘kukinga’ valizachishilenga kumaswalale. Lyatalishile kulizavu lyamaswalale vaze vakingilenga jinganda jakushikulu. NaFwilipi yapwile nganda yimwe yize vakingilenga. Vatu muFwilipi vasavalilenga mukuunda mwomwo vatachikijile ngwavo maswalale vapwile nakukinga nganda. Chochimwe nawa, nge tuli ‘nakuunda chaKalunga’ kaha michima navishinganyeka vyetu vyeji kuundanga. Twatachikiza ngwetu Yehova eji kutuzakamanga kaha asaka tufukilenga. (Petu. 1, 5:10) Kutachikiza chuma kana cheji kutukafwanga tuhone kulizakamina chipwe vene kuhomba.

17. Vyuma muka navitukafwa tuhone kulizakamina havyuma navikasoloka kulutwe?

¹⁷ Kalinwomu vatu vamone luyando lwalunene luze kanda lusolokengaho lyehi hano hamavu. (Mateu 24:21, 22) Katwejivile mashina namasongo omu vyuma navikapwa kuli yetu mutu himutuko. Oloze katwatela kulizakaminako. Numba tuhu katwejivile vyuma vyosena mwakalinga Yehovako, olozenyi Kalunga ketu twamutachikiza. Tunamono omu Yehova nakafwenga vangamba jenyi kunyima, ngocho chamokomoko navyuma navisoloka, Yehova mwatesangamo vyuma ajina, kaha shimbu jimwe eji kulinganga vyuma mujila yize katwashinganyekeleko. Kala lwola mwatukafwa Yehova, tweji kupwanga “[na]kuunda chaKalunga chize chahambakana kunangakana chosena.”