1, 2. Filipi ai dahaka e vara dainai Paulo bona Sila na dibura ruma ai e atodia? (Rau 8 ai laulau ba itaia.)

MALOKIHI ai, Filipi hanuana ai, misinari rarua Paulo bona Sila na dibura rumana ena laloma daiutuna ai e atodia. Aedia na au matudia ai e kapu tao kunuka-kunuka, bona e dadabadia dainai dorudia na e hisihisiva. (Kara 16:23, 24) Una dina ai, hutuma ese hoihoi gabuna amo e veridia lao hahemaoro taudia vairadiai, bae hahemaoro henidia totona. Edia dabua na e dare bona au amo e dadabadia. (Kara 16:16-22) Oibe, una na hahemaoro kererena! Paulo na Roma tauna dainai, dala maorona ai bae hahemaoro henia na maoro. *

² Paulo na dibura ai e helai neganai, una dina ai e vara ḡaudia e lalo. Bona Filipi taudia e lalodia. Edia hanua ai Iuda taudia edia dubu o sinagoga na lasi, dia Paulo ese e vadivadidia hanuadia haida heḡereḡeredia. Una dainai, Iuda taudia na hanua  murimurina e laova bona sinavai badinai e hebouva. (Kara 16:13, 14) Una hanua ai sinagoga bae haginia totona, Iuda tataudia 10 bae noho na namo. To sinagoga ta do asie haginia badina be una namba be do se ḡuḡuru, a? Filipi taudia na e heaḡiva badina idia na Roma ai e nohova. (Kara 16:21) Reana una dainai e laloava Iuda taudia rarua, Paulo bona Sila, na dia Roma taudia, ani? Herevana dahaka dainai, to idia na e hahemaoro henidia kerere dainai dibura ruma ai e atodia.

3. Dahaka dainai Paulo na dibura ruma ai e noho neganai e daradara, to dahaka e kara?

³ Danu, reana Paulo na hua haida gunadia ai e vara ḡaudia e lalova. Ia na Aegean Davarana kahanai, Asia Minor ai. Unuseni ai Paulo na lauma helaḡa ese e gwaua ahu loulouva gabu haida ai basine haroro totona. Una na vaitani lauma helaḡa ese e doria gabu idauna ta bainela. (Kara 16:6, 7) To ede bainela? Troa hanuana ai e abia matahanaina ta amo una e diba. Una matahanai ai ta ese Paulo e hamaoroa: “Makedonia aoma.” E hahedinaraia una na Iehova ena ura, una dainai Paulo ese una boiboi herevana na maoromaoro e abia dae. (Kara 16:8-10 ba duahi.) To una murinai dahaka e vara? Makedonia ai e kau neganai, dibura ruma ai e atoa! Dahaka dainai Iehova ese Paulo enai e vara ḡauna na se koua? Ia be dibura ruma ai ede daudauna baine noho? Ena be Paulo na enai e vara ḡaudia dainai bema lalohekwarahi, to ena abidadama na dounu goada bona e moaleva. Ia bona Sila na “e ḡuriḡuriva bona Dirava ihanamolaina anedia e abiva.” (Kara 16:25) Dirava ena maino ese lalodia bona daradia e gima.

4, 5. (a) Edena dalai edai e varamu ḡaudia na Paulo ena heḡereḡerena? (b) Edena dalai Paulo enai e vara ḡaudia na haraḡa herea e idau?

⁴ Paulo heḡereḡerena, reana nega haida emu mauri ai o mamia oi na Dirava ena lauma helaḡa ena hahekau dalana o badinaia, to ḡau haida na dia emu ura heḡereḡerena ai e vara. Reana hekwakwanai haida o davari, eiava emu noho dalana e idau dainai emu mauri ai ḡau haida o haidau. (Koh. 9:11) Unu bo lalo loumu neganai, reana bo lalomu dahaka dainai Iehova ese unu na se kou. Bema unu o lalo tomamu, dahaka ese baine durumu diba ba haheauka bona Iehova bavabidadama henia? Haere baita diba totona, Paulo bona Sila edia sivarai mani aita laloa lou.

⁵ Paulo bona Sila na Dirava ihanamona anedia e abiva lalonai, hoa ḡaudia haida e vara. Tano na e laga dagu. Dibura ruma iduaradia na sibodia e hekeho. Bona dibura taudia edia iḡui iboudiai e heruha. Paulo ese dibura ruma igimana tauna e koua sibona basine hahemata totona. Dibura ruma igimana tauna bona ena ruma bese ibounai na e bapatiso. Daba e rere neganai, hahemaoro taudia ese edia hesiai taudia e siaidia Paulo bona Sila bae ruhadia. Bona e noidia mai mainodia ida hanua bae rakatania. Gabeai, hahemaoro taudia na e diba idia na kerere badina e kamonai Paulo bona Sila na Roma taudia, una dainai sibodia ela bona idia raruosi e hakaudia lasi. To Paulo bona Sila na e ura baela bapatiso matamata taihuna, Ludia, bae bamahuta henia. Bona una nega bae ḡaukaralaia tadikaka bae hagoadadia totona. (Kara 16:26-40) Oibe, ḡau iboudiai na haraḡa herea e idau!

6. Hari dahaka baita herevalaimu?

⁶ Paulo bona Sila ediai e vara ḡaudia amo dahaka ta dibamu? Iehova ese ḡau haida na asita lalomu dalanai baine kara diba, una  dainai hahetoho negadia ai basita lalohekwarahi na namo. Paulo na e vara ḡaudia ese e hagoadaia, badina gabeai Filipi tadikakadia e tore henidia neganai, ia ese lalohekwarahi karana bona Dirava ena maino e herevalai. Mani Paulo ena hereva Filipi 4:6, 7 ai aita herevalaia. (Ba duahi.) Bena, Baibul sivaraidia haida ai Iehova ese e kara ḡaudia haida baita herevalaimu. Bona, “Dirava ena maino” ese baine duruda baita haheauka bona Iehova baita abidadama henia dalana baita herevalaiamu.

7. Paulo ese Filipi tadikaka e tore henidia neganai dahaka e hadibadia, bona iena hereva amo dahaka ta dibamu?

⁷ Filipi tadikakadia ese Paulo ena revareva e duahia neganai, Paulo enai e vara ḡaudia bona Iehova ese e durua dalana e laloa. Paulo ese una revareva amo dahaka e hadibadia? E hadibadia basie lalohekwarahi, to bae ḡuriḡuri, bona Dirava ena maino bae abia. To mani a laloa “Dirava ena maino” ese “eda diba idoinai e hereaiamu.” Una anina be dahaka? Baibul haida ai una hereva na ini e hahanaia toma, “eda ura ḡaudia idoidiai e hereadia” eiava “taunimanima edia palani idoinai e hereaia.” Paulo ena hereva anina na, “Dirava ena maino” ese ḡau iboudiai na e hereadia. Una dainai ena be ita taunimanima eda roharoha ai eda hekwakwanai na asi ihanamona dalana, to Iehova ese baine hanamoa diba, bona asita lalomu dalanai una baine karaia.​—2 Petro 2:9 ba duahia.

8, 9. (a) Ena be Paulo na Filipi ai hisihisi e davari, to dahaka namo e vara? (b) Dahaka dainai Filipi tadikaka ese Paulo ena hereva na e laloa bada?

⁸ Filipi tadikaka ese laḡani 10 gunanai e vara ḡaudia e lalodia lou neganai, una ese e hagoadadia. Paulo ese e tore herevadia na momokani. Ena be Iehova ese e vara hahemaoro kererena na se koua, to una ese dala e kehoa Paulo ese “sivarai namo” ena maoro baine gwauraia hedinarai totona. (Fili. 1:7) Una hanua ena hahemaoro taudia ese Kristen kongrigeisen matamatana basie hahisia na namo. Reana Paulo ena hereva​—e gwa ia na Roma tauna​—dainai, Paulo bona Sila ese Filipi hanua e rakatania neganai, ia e bamoava dokta tauna, Luka na e noho. Unu amo Luka ese Kristen taudia matamatadia baine durudia.

⁹ Momokani, Filipi tadikaka ese Paulo ena revareva e duahia neganai, e diba una na dia ofesi ai e helaiva aonega tauna ta ena hereva. Paulo na hekwakwanai badadia e davari; to e hahedinaraia ia na “Dirava ena maino” e abia. Danu, Paulo na unu tadikaka e tore henidia neganai, ia na Roma ena dibura ruma ai e ḡuia. To e hahedinaraia ia na dounu “Dirava ena maino” e abia.​—Fili. 1:12-14; 4:7, 11, 22.

10, 11. Hekwakwanai ta dainai ta lalohekwarahimu neganai dahaka baita kara na namo, bona dahaka baita abia dae diba?

¹⁰ Dahaka ese baine duruda diba basita lalohekwarahi bona “Dirava ena maino” baita abia? Paulo ena hereva Filipi taudia ediai ese e hahedinaraiamu, ḡuriḡuri karana amo eda lalohekwarahi baita hamaraḡia diba. Una dainai ta lalohekwarahimu neganai, namona na baita ḡuriḡuri. (1 Petro 5:6, 7 ba duahi.) Mai emu abidadama ida Iehova ba ḡuriḡuri henia, badina Ia ese e lalomumu. Bona o abimu hahenamodia dainai, Ia ba ‘imodaia.’ Eda abidadama Dirava enai na be goadamu bema baita abia daemu Ia ese “eda noinoi bona eda lalo-hadai idoidiai” e hereadia ḡaudia na baine heni diba.​—Efe. 3:20.

 ¹¹ Filipi ai Paulo bona Sila ediai e vara heḡereḡerena, Iehova ese ita iduruda totona be karamu ḡaudia daidiai baita hoamu. Reana hoa karana ta basine karaiamu, to be durudamu dalana ese be hagoadada dibamu. (1 Kor. 10:13) To, dia namo ita na kara ta basita karaia, bona Iehova mo baita naria eda hekwakwanai baine hamaoromaoro totona. Namona na eda ḡuriḡuri heḡereḡerena baita kara. (Roma 12:11) Eda kara ese be hahedinaraiamu ita na mai momokanida ida ta ḡuriḡuri bona Iehova ese be hanamodamu. To danu, namona na baita laloparara Iehova ese ta noimu ḡaudia eiava ta palanilai ḡaudia mo basine henidamu. Nega haida asita lalomu dalanai kara ta be karaiamu. Mani Baibul sivaraidia haida aita herevalai, unu ese be hagoadadamu bena baita abia daemu Iehova ese iduruda karana ta na asita laloamu dalanai baine karaia diba.

12. (a) Asuria Pavapavana Senakerib ese Ierusalem baine tuari henia neganai Pavapava Hesekia be dahaka e kara? (b) Iehova ese una hekwakwanai e hamaoromaoroa dalana amo dahaka ta dibamu?

¹² Baibul ai, Iehova ese hoa karadia e kara sivaraidia momo baita davarimu. Heḡereḡere, Hesekia ese Iuda e lohiaia neganai, Asuria Pavapavana Senakerib ese Iuda e tuari henia bona badina hanuadia iboudiai e abidia, to Ierusalem na se abia. (2 Han. 18:1-3, 13) Bena, Senakerib na e heḡaeḡae Ierusalem baine tuari henia. Pavapava Hesekia be dahaka e kara? Iehova e ḡuriḡuri henia bona Iehova ena peroveta tauna Isaia ena heduru e tahu. (2 Han. 19:5, 15-20) Hesekia na e lalo maoromaoro bona Senakerib ese e noi ḡaudia na e heni. (2 Han. 18:14, 15) Gabeai, Hesekia na baine vara tuarina dainai e heḡaeḡae. (2 Sis. 32:2-4) To una hekwakwanai be ede e hamaoromaoroa toma? Iehova ese aneru ta e siaia bona una hanuaboi tamona lalonai Senakerib ena tuari taudia 185,000 e aladia. Momokani, Hesekia na se lalo una na baine vara!​—2 Han. 19:35.

13. (a) Iosef enai e vara ḡauna amo dahaka ta dibamu? (b) Abraham adavana, Sara, enai be dahaka e vara?

¹³ Iakob natuna, Iosef, mani aita laloa. Aigupto dibura rumana ai, Iosef e diba ia na lohia dagina bae henia, bona Iehova ese baine ḡaukaralaia doe negana ai ena ruma bese baine hamauridia, a? (Gen. 40:15; 41:39-43; 50:20) Momokani, Iehova ese e kara ḡaudia iboudiai daidiai Iosef na e hoa. Danu, Iosef tubuna Sara mani aita laloa. Sara na buruka dainai ia be e lalo Iehova ese be duruamu natuna ta baine havaraia, a? Reana Sara na se lalo ia na Isaak baine havaraia.​—Gen. 21:1-3, 6, 7.

14. Dahaka dainai Iehova baita abidadama henia diba?

¹⁴ Basita laloa tanobada matamatana do  se vara lalonai Iehova ese eda hekwakwanai iboudiai na hoa dalanai be haorediamu. Bona basita noia eda mauri ai hoa karana ta baine karaia totona. To, mai dibada Iehova na hoa dalanai ena hesiai taudia e durudiava. (Isaia 43:10-13 ba duahi.) Una dainai Ia baita abidadama henia diba. Ia ese goada baine henida diba Iena ura baita haḡuḡurua totona. (2 Kor. 4:7-9) Ini Baibul sivaraidia amo dahaka ta dibamu? Hesekia, Iosef, bona Sara edia sivarai ese eme hahedinaraia, bema Iehova baita abidadama henia hanaihanai, Ia ese baine duruda diba hekwakwanai badadia baita haheaukalaidia totona.

15. Dahaka ese baine duruda diba “Dirava ena maino” baita abia, bona edena dalai baita abia diba?

¹⁵ Hekwakwanai ta davarimu neganai edena dalai “Dirava ena maino” baita abia diba? Namona na eda hetura karana Iehova Dirava ida baita hagoadaia hanaihanai. “Keriso Iesu” ena mauri idavalaina boubouna dainai Dirava baita hetura henia diba. Una mauri idavalaina boubouna na Tamada ena harihari ḡauna hereadaena ta. Iehova ese una mauri davana amo eda dika e gwautao, lalomamina ḡoevana ta abia, bona Ia baita raka henia kahi diba.​—Ioa. 14:6; Iak. 4:8; 1 Pet. 3:21.

16. “Dirava ena maino” baita abiamu neganai dahaka namo be varamu? Haheitalai ba gwauraia.

¹⁶ “Dirava ena maino, eda diba idoinai e hereaiamu mainona” baita abia neganai, dahaka namo baine vara diba? Baibul na e gwaumu, ‘laloda bona darada baine gima, Keriso Iesu lalonai.’ (Fili. 4:7) Heberu gado ai ina hereva “gima” na tuari taudia ese e ḡaukaralaiava herevana ta. Una na tuari orea ta ese idaunega hanuana ta e gimaiava karana e herevalaia. Filipi na hanua unu bamona ta. Filipi taudia na hanuaboi ai asi garidia ida e mahutava, badina mai dibadia tuari taudia ese edia hanua maḡuna e gimaiava. Una heḡereḡerena, “Dirava ena maino” baita abiamu neganai, basita lalohekwarahimu. Ta dibamu Iehova ese ita na e laloda badamu bona e uramu baita moale. (1 Pet. 5:10) Una ta dibamu dainai, lalohekwarahi eiava lalomanoka ḡaudia ese basie hametaudamu.

17. Dahaka ese baine duruda, vaira negai bae vara ḡaudia daidiai Dirava baita abidadama henia?

¹⁷ Kahirakahira tanobada ai hisihisi badana be varamu. (Mat. 24:21, 22) Asi dibada ita ta ta edai be dahaka be varamu. To, una na basita lalohekwarahilaia. Ena be Iehova be karamu ḡaudia iboudiai na asi dibada, to eda Dirava na mai dibada. Guna e kara ḡaudia amo ta dibamu, herevana dahaka bae vara, to Iehova ese ena ura na be haḡuḡuruamu, bona asita laloamu dalanai una be karaiamu. Una dainai Iehova ese ita daidai e karamu ḡaudia amo “Dirava ena maino, eda diba idoinai e hereaiamu mainona” baita abia dibamu.