1, 2. Go tlile bjang gore Paulo le Silase ba feleletše ba golegilwe? (Bona seswantšho se se lego ka mo godimo.)

NAGANA ka tiragalo ye. Mo e ka bago garegare ga bošego, baromiwa ba babedi, e lego Paulo le Silase ba kgolegong​—seleng ya ka garegare ya kgolego—​motseng wa Filipi. Maoto a bona a tlemeletšwe setokising, gomme ba sa kwa bohloko mekokotlong ya bona ka baka la ge ba be ba sa tšwa go itiwa. (Dit. 16:23, 24) Ruri dilo tše di diregile ka lebelo! Lona letšatšing leo, ba sa letela, lešaba leo le bego le galefile le ile la ba gogela borekišetšong gomme ba sekišetšwa gona moo. Bomaseterata ba ile ba ba gagolela diaparo, ke moka ba laela gore ba bethwe ka dikgati. (Dit. 16:16-22) Ruri seo e be e le go hloka toka ga mafelelo! Ka ge Paulo e be e le modudi wa Roma, o be a swanetše go sekišetšwa kgorong ya tsheko. *

² Ge Paulo a be a dutše kamoo kgolegong ya leswiswi, o be a naganišiša ka dilo tšeo di diregilego letšatšing leo. O be a nagana ka batho ba motseng wa Filipi. Go fapana le metse e mentši yeo a kilego a e etela, badudi ba Filipi ba be ba se na sinagoge motseng wa bona ka ge e be e se Bajuda. Ka gona, Bajuda bao ba bego ba dula Filipi , ba be  ba rapela Modimo ka ntle ga kgoro ya motse woo hleng ga noka. (Dit. 16:13, 14) Ka baka la’ng? Na ke ka baka la gore go be go se na banna ba lesome ba Bajuda motseng wo, e lego palo yeo e bego e nyakega gore go be le sinagoge? Bafilipi ba be ba ikgantšha ka go ba badudi ba Roma, gaešita le ge e be e se Baroma. (Dit. 16:21) Na se ke sona seo se ka bago se dirile gore Bafilipi ba nagane gore Bajuda ba ba babedi e lego Paulo le Silase ga se badudi ba Roma? Go sa šetšwe gore karabo ya dipotšišo tše ke efe, se se šalago ke gore Paulo le Silase ba ile ba lahlelwa kgolegong ba se na molato.

3. Ke ka baka la’ng Paulo a ka ba a ile a makatšwa ke go golegwa ga gagwe; eupša o ile a swaragana bjang le boemo bjo?

³ Mohlomongwe Paulo o be a nagana le ka ditiragalo tša dikgweding tše di fetilego tša ge a be a le ka mošola wa Lewatle la Aegean kua Asia Minor. Ge a be a le moo, moya o mokgethwa o ile wa mo thibela go nea bohlatse mafelong a mangwe. Go be go le bjalo ka ge eka moya o mokgethwa o mo šušumeletša gore a yo bolela ditaba tše dibotse lefelong le lengwe. (Dit. 16:6, 7) Lefelo leo e be e le lefe? O ile a tseba ka lefelo leo ka morago ga gore Jehofa a mmontšhe pono ge a be a le Teroa. Ponong yeo, Paulo o ile a botšwa gore: “Tshelela Matsedonia.” O ile a dira bjalo ntle le go senya nako ka ge a be a lemoga gore Jehofa o nyaka gore a ye moo. (Bala Ditiro 16:8-10.) Eupša go ile gwa direga’ng ka morago ga moo? Ka morago ga matšatši a sego kae a fihlile Matsedonia, o ile a golegwa! Ke ka baka la’ng Jehofa a ile a dumelela gore Paulo a golegwe? O be a tlo dula kgolegong nako e kaaka’ng? Gaešita le ge Paulo a ka ba a ile a ipotšiša dipotšišo tše, ga se a ka a dumelela boemo bjo gore bo fokodiše tumelo ya gagwe le go mo amoga lethabo. Yena le Silase ba ile ba thoma go “rapela gomme ba tumiša Modimo ka kopelo” gona moo kgolegong. (Dit. 16:25) Khutšo ya Modimo e ile ya dira gore ba ikwe ba imologile.

4, 5. (a) Maemo a rena a ka swana bjang le a Paulo? (b) Maemo a Paulo a ile a fetoga bjang go sa letelwa?

⁴ Go swana le Paulo, mohlomongwe le wena o kile wa ikwa o hlahlwa ke moya o mokgethwa wa Modimo, eupša dilo tša se sepele ka tsela yeo o bego o nagana ka yona. O ka ba o ile wa welwa ke mathata, goba wa ikhwetša o le maemong a mafsa ao a ilego a nyaka gore o dire diphetogo tše dikgolo. (Mmo. 9:11) Ga bjale ge o lebelela morago, mohlomongwe o sa ipotšiša gore ke ka baka la eng Jehofa a ile a dumelela dilo tšeo. Ge e ba go le bjalo, ke’ng seo se ka go thušago go kgotlelela le go dula o botile Jehofa gore o tla go thekga? E le go go thuša go hwetša karabo, a re boele tabeng yela re boletšego ka yona ya Paulo le Silase.

⁵ Ge Paulo le Silase ba dutše ba opela dikopelo tša go tumiša Modimo ka kgolegong, go ile gwa direga dilo tše di sa letelwago tšeo di latelelanago. Gateetee go ile gwa ba le tšhišinyego e kgolo ya lefase, mejako ya kgolego ya bulega gomme diketane tša bagolegwa ka moka tša tlemologa. Paulo a thibela mohlapetši wa kgolego go ipolaya. Mohlapetši yoo le ba lapa la gagwe ka moka ba kolobetšwa. Letšatšing le le latelago, bomaseterata ba setšhaba ba ile ba roma maphodisa gore a yo lokolla Paulo le Silase. Maphodisa ao a ile a kgopela Paulo le Silase gore ba tloge motseng woo wa Filipi ka khutšo. Ge bomaseterata ba lemoga gore Paulo le Silase ke badudi ba Roma le gore ba e lahlile ka go ba golega, bona ka noši ba ile ba tla go ba lokolla le go ba ntšha motseng woo. Eupša pele Paulo le Silase ba tloga motseng woo, ba ile ba yo laela kgaetšedi ya bona yeo e bego e sa tšwa go kolobetšwa, e lego Lidia. Go oketša moo, ba ile ba diriša sebaka seo go matlafatša bana babo bona. (Dit. 16:26-40) Le lekgeng le dilo di ile tša fetoga ka lebelo!

6. Ke’ng seo ga bjale re tlago go se ahlaahla le go se hlahloba?

⁶ Re ithuta’ng ditiragalong tše? Re ithuta gore  Jehofa a ka dira dilo tšeo re sa di letelago, ka gona ga se ra swanela go belaela ge re welwa ke diteko le mathata. Ga go pelaelo gore Paulo o ile a dula a gopola thuto yeo. Seo se bonagala mantšung ao ka morago a ilego a a ngwalela bana babo rena ba kua Filipi mabapi le taba ya go belaela le khutšo ya Modimo. Anke re thomeng ka go ahlaahla mantšu a Paulo ao a lego go Bafilipi 4:6, 7. (Bala.) Ka morago ga moo, re tla hlahloba Mangwalo a mangwe ao a bontšhago kamoo Jehofa a ilego a direla batho dilo tšeo ba bego ba sa di letela. Mafelelong re tla ahlaahla kamoo “khutšo ya Modimo” e ka re thušago go kgotlelela le go dula re botile gore o tla re thekga.

7. Paulo o ile a ruta bana babo rena ba Filipi thuto efe lengwalong leo a ilego a ba ngwalela lona, gona rena re ithuta’ng mantšung ao a gagwe?

⁷ Ga go pelaelo gore ge bana babo rena ba kua Filipi ba be ba balelwa lengwalo la Paulo, ba ile ba gopola seo se ilego sa mo diragalela gona moo Filipi, le gore ga go le o tee wa bona yoo a ilego a nagana gore Jehofa o be a ka dira dilo ka tsela yeo a di dirilego ka yona. Gabotse Paulo o be a ba ruta thuto efe? O be a ba ruta gore ba se ke ba belaela ka selo. Go e na le moo, ba rapele, ke moka ba tla hwetša khutšo ya Modimo. Eupša hlokomela gore Paulo o re ‘khutšo ya Modimo e feta kwešišo yohle.’ Seo se ra go re’ng? Bafetoledi ba bangwe ba fetoletše polelwana ye ka gore: “[Khutšo ya Modimo] e feta dikgopolo ka moka tšeo re nago le tšona” goba “e feta kgole dilo ka moka tšeo motho a di rerago.” Ge e le gabotse, Paulo o be a era gore “khutšo ya Modimo” e feta kgole dilo ka moka tšeo re ka di naganago. Ka gona, gaešita le ge rena re ka bona eka mathata a rena a ka se rarollege, Jehofa o a tseba gore a tla rarollega, e bile a ka re direla dilo tšeo re sa di letelago.​—Bala 2 Petro 2:9.

8, 9. (a) Le ge Paulo a ile a welwa ke mathata kua Filipi, mafelelo e bile afe? (b) Ke ka baka la’ng bana babo rena ba Filipi ba ile ba kgothatšwa ke mantšu a Paulo?

⁸ Ga go pelaelo gore ge bana babo rena ba Filipi ba dutše ba naganišiša ka dilo tšeo di diragaletšego Paulo mengwageng e lesome e fetilego, ba be ba matlafala. Seo Paulo a bego a ba ngwaletše sona e be e le nnete. Le ge Jehofa a ile a dumelela gore yena le Silase ba welwe ke mathata, seo se ile sa feleletša ka gore ‘ditaba tše dibotse di thewe ka molao.’ (Bafil. 1:7) Ga bjale bomaseterata ba setšhaba ba be ba tla nagana gabedi pele ba ka hlasela phuthego ya Bokriste yeo e bego e sa tšwa go hlongwa motseng wa bona. Mohlomongwe seo Paulo a ilego a se dira motseng wo wa Filipi ke sona se thušitšego mosepedigotee le yena e lego ngaka Luka gore a šale motseng woo ka morago ga ge yena le Silase ba sepetše. Ka go re’alo, Luka o be a ka kgona go thuša bao e bego e sa tšwa go ba Bakriste motseng woo.

⁹ Ee, ge bana babo rena ba Filipi ba be ba bala lengwalo la Paulo, ba be ba tseba gore dilo tšeo a di ngwadilego ga se a no ithomela tšona. Paulo o ile a welwa ke mathata a magolo kudu; lega go le bjalo, o ile a bontšha gore o na le “khutšo ya Modimo.” Ge e le gabotse, ge a be a ngwalela bana babo rena bao lengwalo le, o be a golegilwe ka ntlong kua Roma. Eupša gaešita le maemong ao, o be a sa dutše a bontšha gore o na le “khutšo ya Modimo.”​—Bafil. 1:12-14; 4:7, 11, 22.

10, 11. Ke’ng seo re swanetšego go se dira ge re ikwa re belaela kudu ka bothata bjo itšego, gona ke’ng seo re ka se letelago?

¹⁰ Ke’ng seo se ka re thušago gore re se belaele ka selo le go ba le “khutšo ya Modimo”? Mantšu a ao Paulo a a ngwaletšego Bafilipi a bontšha gore sehlare sa go belaela ke go rapela. Ka gona go e na le gore re belaele, re swanetše go rapela. (Bala 1 Petro 5:6, 7.) Rapela Jehofa o na le tumelo e feletšego, o tseba gore o a go hlokomela. Mo rapele “le ka go leboga,” o gopola dilo tšeo a go šegofaditšego ka tšona. Re tlo mmota kudu le go feta ge re dula re gopola gore a ka “dira go feta kudu ka kua ga tšohle tšeo re di kgopelago goba re di naganago.”​—Baef. 3:20.

 ¹¹ Go swana le Paulo le Silase, le rena re ka makatšwa ke dilo tšeo Jehofa a di direlago yo mongwe le yo mongwe wa rena. E ka no se be dilo tše dikgolo, eupša ka mehla e tla ba dilo tšeo re di hlokago. (1 Bakor. 10:13) Ke therešo gore se ga se bolele gore re phuthe matsogo le go letela Jehofa gore a re thuše ka mohlolo. Re swanetše go dira dilo ka go dumelelana le dithapelo tša rena. (Baroma 12:11) Seo se tla bontšha Jehofa gore re ithekgile ka yena, ka ge re tseba gore kgomo go tsošwa yeo e itsošago. Eupša ka dinako tše dingwe Jehofa ga a re direle dilo feela ka gobane re di kgopetše, re di rulagantše goba re di letetše. Ka dinako tše dingwe o no re direla dilo tšona re sa letela gomme ra šala re maketše. Anke re ahlaahleng dipego tša ka Beibeleng tšeo di re kgodišago le go feta gore Jehofa o kgona go re direla dilo tšeo re sa di letelago.

12. (a) Ke’ng seo Kgoši Hesekia a ilego a se dira ge Kgoši ya Asiria e lego Sanheribe a be a nyaka go mo hlasela? (b) Re ithuta’ng tseleng yeo Jehofa a rarollotšego bothata bjo?

¹² Ge re bala Beibele, re kwa ka batho bao Jehofa a ilego a ba direla dilo tše itšego ba sa letela. Kgoši Hesekia o phetše mehleng ya ge Kgoši ya Asiria e lego Sanheribe a be a hlasela naga ya Juda gomme a thopa metse ya yona ka moka e šireleditšwego, gomme gwa šala Jerusalema feela. (2 Dikg. 18:1-3, 13) Ka morago ga moo, Sanheribe o ile a nyaka go hlasela Jerusalema. Kgoši Hesekia o ile a dira’ng ge a be a lebeletšane le bothata bjo? O ile a rapela Jehofa ke moka a kgopela keletšo go moporofeta wa Jehofa e lego Jesaya. (2 Dikg. 19:5, 15-20) Le gona Hesekia o ile a bontšha Sanheribe gore ga a lwe le yena ka go mo romela lekgetho leo a bego a le nyaka ka kgang. (2 Dikg. 18:14, 15) Ge nako e dutše e eya, Hesekia o ile a dira dithulaganyo tša gore ge Sanheribe a tlo ba hlasela, a hwetše ba šireletšegile. (2 Dikor. 32:2-4) Eupša bothata bjo bo ile bja felela kae? Jehofa o ile a romela morongwa wa gagwe gore a yo bolaya mašole a 185 000 a Sanheribe ka bošego bjo tee. Ga go na motho yo a bego a letetše gore Jehofa a ka dira mohlolo woo, gaešita le Hesekia o be a sa letela seo!​—2 Dikg. 19:35.

13. (a) Ke’ng seo re ithutago sona go seo se diragaletšego Josefa? (b) Jehofa o ile a direla mosadi wa Aborahama e lego Sara mohlolo ofe?

¹³ Nagana ka morwa wa Jakobo e lego Josefa. Ge a be a le ka moleteng wa kgolego kua Egipita, na o be a lora gore ka letšatši le lengwe o tla kgethwa gore e be wa bobedi ka maemo nageng yeo, goba gore Jehofa o tla mo diriša go phološa lapa la gabo gore le se bolawe ke tlala? Le gatee! (Gen. 40:15; 41:39-43; 50:20) Seo Jehofa a ilego a mo direla sona se ile sa mo šia a ahlame. Nagana gape le ka makgolokhukhu wa Josefa e lego Sara. Na Sara, yoo a bego a tšofetše, o be a lora gore Jehofa a ka dira gore a be le ngwana? Ga re bolele ka ngwana yo a bego a tla mmelegelwa ke mohlanka wa gagwe wa mosadi. Ruri Sara o ile a se kgolwe ka morago ga gore a belege Isaka!​—Gen. 21:1-3, 6, 7.

14. Ke’ng seo re ka kgodišegago ka sona?

 ¹⁴ Ke therešo gore ga se ra letela gore Jehofa a fediše mathata a rena ka moka ka mohlolo pele a tliša lefase le lefsa leo a re tshepišitšego lona; e bile ga se ra swanela go letela gore a re direle dilo tše dikgolo maphelong a rena. Eupša se re se tsebago ke gore Jehofa, yoo a ilego a thuša bahlanka ba gagwe ka ditsela tše di makatšago, le rena ke Modimo wa rena. (Bala Jesaya 43:10-13.) Go tseba seo go re thuša gore re mmote. Re a tseba gore a ka dira selo le ge e le sefe go re nea matla a go dira thato ya gagwe. (2 Bakor. 4:7-9) Re ithuta’ng dipegong tše tša ka Beibeleng? Go etša ge re bone ka Hesekia, Josefa le Sara, re ithuta gore Jehofa a ka re thuša go fenya dilo tšeo di bonagalago di sa fenyege ge feela re dula re mmotegela.

15. Ke’ng seo se tlago go re thuša go dula re na le “khutšo ya Modimo,” gona seo se kgonega bjang?

¹⁵ Ke’ng seo se ka re thušago go kgotlelela mathata re dutše re na le “khutšo ya Modimo”? Re ka thušwa ke go dula re na le tswalano e botse le Modimo wa rena, Jehofa. Tswalano e bjalo e kgonega feela “ka Kriste Jesu,” yoo a ilego a neela bophelo bja gagwe gore e be sehlabelo sa topollo. Topollo ke se sengwe sa dilo tšeo di bontšhago gore Tatago rena o re direla dilo tšeo re sa di letelago. Jehofa o diriša topollo go re lebalela dibe, ka go re’alo a dira gore re kgone go ba le letswalo le le hlwekilego le go gwerana le yena.​—Joh. 14:6; Jak. 4:8; 1 Pet. 3:21.

16. Mafelelo e ba afe ge re na le “khutšo ya Modimo”? Nea mohlala.

¹⁶ Mafelelo e ba afe ge re eba le “khutšo ya Modimo yeo e fetago kwešišo yohle”? Mangwalo a araba potšišo ye ka go re botša gore khutšo yeo ‘e tla diša dipelo tša rena le matla a rena a monagano ka Kriste Jesu.’ (Bafil. 4:7) Lentšu la mathomong leo le fetoletšwego e le “diša,” le be le dirišwa ke mašole. Le be le šupa go sehlopha sa mašole seo se bego se filwe mošomo wa go leta motseng wo o šireleditšwego mehleng ya kgale. Filipi e be e le o mongwe wa metse e bjalo. Badudi ba Filipi ba be ba robala boroko bošego, ka ge ba be ba tseba gore mašole a bona a letile motse. Ka tsela e swanago, ge re na le “khutšo ya Modimo,” dipelo tša rena le menagano ya rena di ba le khutšo. Re a tseba gore Jehofa o na le taba le rena le gore o nyaka gore dilo di re sepelele gabotse. (1 Pet. 5:10) Go tseba seo go re thuša gore re se ke ra imelwa ke dipelaelo goba go nyama.

17. Ke’ng seo se tlago go re thuša gore re se belaele ka bokamoso?

¹⁷ Go se go ye kae, re tlo welwa ke masetlapelo a magolo ao a sa kago a ba gona mo lefaseng. (Mat. 24:21, 22) Ga re tsebe ka botlalo seo se tlago go diragalela yo mongwe le yo mongwe wa rena nakong yeo. Lega go le bjalo, ga go na lebaka la gore re ikopiše hlogo ka go belaela ka dilo tša nakong e tlago. Gaešita le ge re sa tsebe selo se sengwe le se sengwe seo Jehofa a tlago go se dira, re homotšwa ke gore re a mo tseba. Re bone mehlaleng e fetilego gore gaešita le ge maemo a ka befa gakaakaang, o tla dula a phethagatša morero wa gagwe, e bile ka dinako tše dingwe o dira bjalo ka tsela yeo re sa e letelago. Nako le nako ge Jehofa a re thuša ka tsela yeo, re ka ikwa re na le “khutšo ya [Gagwe] yeo e fetago kwešišo yohle.”