1, 2. Павел ӕма Силӕбӕл Филиппти ци ’рцудӕй? (Кӕсӕ хузӕмӕ статьяй райдайӕни.)

ДӔ ЦӔСТИТӔБӔЛ рауайун кӕнӕ: ӕмбесӕхсӕвӕ, дууӕ миссионери Павел ӕма Силӕ бадунцӕ ахӕстдонӕн ӕ тӕккӕ арфдӕр ӕма талингӕдӕр хаййи, горӕт Филиппти. Сӕ къӕхтӕ син хъадамати бакодтонцӕ, ӕма сӕ бон фезмӕлун нӕй, сӕ фӕсӕнттӕ ба фуднади фӕсте неугӕ рист кӕнунцӕ (Гъуд. 16:23, 24). Куд тагъд ӕрцудӕнцӕ хабӕрттӕ! Уой размӕ сӕбӕл бонигон адӕн ӕвваст рамбурд ӕнцӕ ӕма сӕ базари фӕзӕмӕ фӕххӕр-хӕр кодтонцӕ. Уоми еци фӕдбӕл тӕрхонгӕнгутӕмӕ фӕдздзурдтонцӕ ӕма син тӕрхон рахастонцӕ. Сӕ уӕледарӕс син ӕрӕскъудтонцӕ ӕма сӕ ехсӕй фӕннадтонцӕ (Гъуд. 16:16–22). Зӕгъӕн ес, ӕма ӕнӕфудӕй ӕфхуӕрд баййафтонцӕ! Павел Роми бӕстаг адтӕй ӕма ин уотӕ тӕрхонгӕнгӕ н’ адтӕй *.

² Талингӕ ахӕстдони бадгӕй Павел, ӕвӕдзи, сагъӕс кодта, еци бон ибӕл ци хабӕрттӕ ӕрцудӕй, уобӕл, удта  Филиппти ци адӕн цардӕй, уонӕбӕл дӕр. Павел ци горӕтти адтӕй, уоми алкӕмидӕр дзиуиттӕгтӕн адтӕй синагогӕ, аци горӕтӕй уӕлдай. Уомӕ гӕсгӕ дзиуиттӕгтӕ ӕмбурд кодтонцӕ горӕти колдуари ӕндаг фарс, цӕугӕдони билӕбӕл (Гъуд. 16:13, 14). Ӕвӕдзи, гъуддаг уой медӕги адтӕй, ӕма сӕ горӕти 10 дзиуиттаг нӕлгоймаги дӕр н’ адтӕй. Уӕди рӕстӕги ба синагогӕ райгон кӕнунмӕ гъе уал нӕлгоймаги гъудӕй. Филиппти цӕрӕг адӕн хъӕбӕр сӕрустур адтӕнцӕ, Роми бӕстӕгтӕ ке адтӕнцӕ, уомӕй (Гъуд. 16:21). Ӕвӕдзи, сӕ сӕри къуми дӕр н’ адтӕй, аци дзиуиттӕгтӕ, Павел ӕма Силӕ дӕр Роми бӕстӕгтӕ ке разиндзӕнцӕ. Кудфӕнди ма уа, уӕддӕр сӕ ӕнӕфудӕй бафхуардтонцӕ.

3. Павелмӕ дессаг цӕмӕн кастайдӕ, ахӕстдонӕмӕ ке бахаудтӕй, е, фал ӕхе куд бадардта?

³ Павел ма, ӕвӕдзи, сагъӕс кодта, Филипптӕмӕ куд бахаудтӕй, уобӕл дӕр. Цалдӕр мӕйи размӕ Павел адтӕй Эгейаг денгизи иннӕ фарс, Минкъий Азий. Уоми ’й Хуцауи сугъдӕг хъаурӕ цалдӕр хатти нӕ бауагъта кӕцидӕр бунӕтти игъосун кӕнун. Уотӕ имӕ кастӕй, цума ’й Хуцауи сугъдӕг хъаурӕ ӕндӕр бунатмӕ аразуй (Гъуд. 16:6, 7). Фал кумӕ? Павел Троади ку адтӕй, уӕд ин цӕстӕбӕлуайӕни загъд адтӕй: «Македонимӕ ӕрцо». Йеговӕ ин бавдиста, кумӕ цӕугӕ ’й, уой ӕма Павел дӕр рӕстӕг нӕбал ивазта. (Бакӕсӕ Гъуддӕгтӕ 16:8–10.) Уой фӕсте ба ци ӕрцудӕй? Македонимӕ куддӕр бахъӕрдтӕй, уотӕ ’й ахӕстдони исбадун кодтонцӕ! Цума Йеговӕ уӕхӕн гъуддаг цӕмӕн бауагъта? Цӕйбӕрцӕ рӕстӕг ин бадгӕ адтӕй ахӕстдони? Кӕд ӕй Павел нӕ лӕдӕрдтӕй, уӕхӕн хабар ибӕл цӕмӕн ӕрцудӕй, уой, уӕддӕр е ’ууӕндундзийнадӕ ӕрлӕмӕгъ кӕнун нӕ бауагъта, удта ӕ цийнӕдзийнадӕ дӕр нӕ фӕмминкъийдӕр ӕй. Е дӕр, удта Силӕ дӕр Хуцаумӕ ковун райдӕдтонцӕ ӕма ин кади зартӕ кодтонцӕ (Гъуд. 16:25). Ӕма син Хуцауи фарнӕ сӕ зӕрдитӕ ӕрсабур кодта, ӕма сӕ уӕззау сагъӕстӕ сӕ буни не ’скодтонцӕ.

4, 5. а) Уомӕн куд ес гӕнӕн, цӕмӕй Павели хузӕн уавӕри бахауӕн? б) Павели уавӕр ӕвваст куд раййивта?

⁴ Дӕумӕ ба ескӕд Павели хузӕн гъудитӕ адтӕй? Ка ’й зонуй дӕ багъудӕй цӕхуӕндӕр унаффӕ рахӕссун ӕма Хуцауӕй ӕнхус курдтай. Еци рӕстӕг ӕппундӕр нӕ дузӕрдуг кодтай, Хуцауи куд фӕндуй, уотӕ ке архайис. Фал фӕстӕдӕр ба цӕхуӕндӕр зиндзийнӕдтӕбӕл исӕмбалдтӕ, ӕма дӕ дӕ царди устур ӕййивддзийнӕдтӕ искӕнун багъудӕй (Еккл. 9:11). Нур уобӕл ку фӕссагъӕс кӕнис, уӕд дӕмӕ, ӕвӕдзи, дессаг фӕккӕсуй, Йеговӕ цӕмӕн бауагъта, цӕмӕй дӕбӕл уӕхӕн хабар ӕрцудайдӕ. Кӕд уотӕ ’й, уӕд дин ци банхус кӕндзӕй, идарддӕр дӕр федар лӕуун ӕма дӕ зӕрдӕ ӕгасӕйдӕр Йеговӕбӕл дарун? Цӕмӕй аци фарстабӕл дзуапп базонӕн, уой туххӕй ӕркӕсӕн, Павел ӕма Силӕбӕл идарддӕр ци хабӕрттӕ ӕрцудӕй, уомӕ.

⁵ Павел ӕма Силӕ Хуцауӕн кади зартӕ ку кодтонцӕ, уӕд ӕрцудӕй, ӕнгъӕл дӕр ке н’ адтӕнцӕ, уӕхӕн хабар. Фиццаг зӕнхӕ хъӕбӕр базмалдӕй. Уой фӕсте ба ахӕстдони дуӕрттӕ фегон ӕнцӕ ӕма ахӕститӕн сӕ рӕхистӕ фӕууӕгъдӕ ’нцӕ. Ахӕстдонгӕс уой ку рауидта, уӕд ӕхе марунмӕ гъавта, фал ӕй Павел бауорӕдта. Фӕстӕдӕр еци ахӕстдонгӕс ӕма ӕ бийнонтӕ донаргъуд райстонцӕ. Иннӕ сӕумӕ горӕти  хецауадӕ, лӕггадгӕнгути рарвистонцӕ, цӕмӕй Павел ӕма Сили исуӕгъдӕ кодтайуонцӕ, ӕма сӕ горӕтӕй сабурбӕл рахудтайуонцӕ. Фал ӕй горӕти хецӕуттӕ ку базудтонцӕ, Роми бӕстӕгтӕ ке адтӕнцӕ, уой, уӕд хъӕбӕр рафӕсмон кодтонцӕ, ци бакодтонцӕ, уобӕл, ӕма сӕмӕ сӕхуӕдтӕ ӕрцудӕнцӕ, цӕмӕй сӕ горӕтӕй ракодтайуонцӕ. Фал ма Павел ӕма Силӕ бабӕрӕг кодтонцӕ, ӕрӕги донаргъуд ка райста, еци хуӕрӕ Лидий, ӕма ма еци фӕдбӕл иннӕ ӕнсувӕрти дӕр бафедар кодтонцӕ (Гъуд. 16:26–40). Цубур рӕстӕгмӕ сӕбӕл цӕйбӕрцӕ хабӕрттӕ ӕрцудӕй!

6. Аци статьяй цӕмӕ ӕркӕсдзиан?

⁶ Павели хабарӕй цӕбӕл ахур кӕнӕн? Йегови бон ӕй уавӕр феййевун, ӕнгъӕл дӕр ӕй куд нӕ уодзиан, уотӕ. Уомӕ гӕсгӕ зиндзийнӕдти рӕстӕг гъӕуама ӕгӕр ма тухсӕн. Павел уой хуарз зудта, ӕма е бӕрӕг ӕй, Филиппти ӕнсувӕртӕмӕ зиндзийнӕдтӕ ӕма Хуцауи фарни туххӕй ци ниффинста, уомӕй. Фиццаг бал ӕркӕсӕн Филиппӕгтӕмӕ 4:6, 7 ци ниффинста, уомӕ. (Ба сӕ кӕсӕ.) Уой фӕсте ба Библийӕй ӕркӕсдзиан ӕндӕр хабӕрттӕмӕ дӕр, ӕма фӕууиндзиан, Йеговӕ уавӕртӕ ӕнӕнгъӕлти куд феййевидӕ, уой. Фӕстагмӕ ба базондзиан, «Хуцауи фӕрнӕ» нин куд банхус кӕндзӕй зиндзийнӕдти рӕстӕг федар фӕллӕуун ӕма нӕ зӕрдӕ ӕгасӕйдӕр Йеговӕбӕл дарун.

7. Павел филиппӕгти цӕмӕ разӕнгард кодта ӕма си мах цӕбӕл ахур кӕнӕн?

⁷ Филиппти ӕнсувӕртӕ Павели финстӕг ку бакастӕнцӕ, уӕд цума цӕбӕл расагъӕс кодтонцӕ? Фиццагидӕр, ӕвӕдзи, сӕ зӕрди ӕрӕфтудӕй, Павел ӕма Силӕбӕл ци хабар ӕрцудӕй ӕма син Йеговӕ дессаги хузи куд банхус кодта, е. Цума сӕ Павел ӕ финстӕги цӕмӕ разӕнгард кодта? Павели фӕндадтӕй, цӕмӕй ма тухстайуонцӕ, удта Хуцаумӕ кувтайуонцӕ, «зунд кӕбӕл нӕ хъӕртуй», еци фарни туххӕй. Е цӕбӕл дзорӕг ӕй? Библий кӕцидӕр тӕлмацти дзурдбаст «зунд кӕбӕл нӕ хъӕртуй» уотӕ ратӕлмац кодтонцӕ, зӕгъгӕ, «адӕни фӕндтӕй уӕлдӕр ка ӕй» кенӕ «дӕ фуни дӕр кӕбӕл нӕ расагъӕс кодтайсӕ». Мадта Павели дзурдтӕмӕ гӕсгӕ «Хуцауи фарнӕ», мах куд ӕнгъӕл ан, уомӕй берӕ дессагдӕр ӕй. Хатгай нӕмӕ уотӕ фӕккӕсуй, ӕма нӕ уавӕри нецибал ес бакӕнӕн, фал Йеговӕ уотӕ нӕ сагъӕс кӕнуй ӕма гъуддаг ӕнгъӕл дӕр куд нӕ ан, уотӕ разелдзӕй. (Бакӕсӕ 2 Петури 2:9.)

8, 9. а) Кӕд Павел ӕфхуӕрд баййафта, уӕддӕр гъуддаг куд рауадӕй? б) Уотӕ зӕгъӕн цӕмӕн ес, ӕма Павели дзурдтӕмӕ филиппӕгтӕ лӕмбунӕг байгъустонцӕ?

⁸ Цӕмӕй филиппӕгтӕн се ’ууӕндундзийнадӕ бафедар адтайдӕ, уой туххӕй гъӕуама сагъӕс кодтайуонцӕ, фӕстаг дӕс анзей дӕргъи Йеговӕ гъуддӕгтӕ куд аразта, уобӕл. Кӕд Йеговӕ бауагъта, цӕмӕй Павел ӕма Силӕ ӕфхуӕрд баййафтайуонцӕ, уӕддӕр уой фӕрци «хуарз хабар игъосун кӕнуни гъуддаг закъонмӕ гӕсгӕ ӕрфедар ӕй» (Фил. 1:7). Нур горӕти хецӕуттӕ, нӕуӕг киристон ӕмбурди нихмӕ ести фудвӕндӕ ракӕнуни размӕ бал дзӕбӕх расагъӕс кодтайуонцӕ. Ка ’й зонуй, Павел Роми бӕстаг ке адтӕй, уой ке иской кодта, уой фӕрци Лукай бон дӕр иссӕй Филиппти байзайун, Павел ӕма Силӕ ку рандӕ ’нцӕ, уой фӕсте ӕма ӕрӕги  киристӕнттӕ ка иссӕй, еци хуӕртӕ ӕма ӕнсувӕрти бафедар кӕнун.

⁹ Филиппти ӕнсувӕртӕ Павели финстӕг ку бакастӕнцӕ, уӕд ӕй лӕдӕрдтӕнцӕ, уотид дзубандитӕ ке нӕ ’нцӕ. Павел ӕй ӕхецӕй зудта, уӕззау фӕлварӕнти бахаун ци ӕй, уой. Еци финстӕг дӕр сӕмӕ Ромӕй финста, ӕ хӕдзари ӕй ахӕстӕй ку дардтонцӕ, уӕд. Фал уӕхӕн уавӕри дӕр Павелӕн ӕ зӕрди адтӕй «Хуцауи фарнӕ» (Фил. 1:12–14; 4:7, 11, 22).

10, 11. Естӕбӕл хъӕбӕр ку фӕттухсӕн, уӕд ци гъӕуама кӕнӕн ӕма нин Йеговӕ куд банхус кӕндзӕй?

¹⁰ Ци кӕнун нӕ гъӕуй, цӕмӕй мацӕбӕл мӕтӕ кӕнӕн ӕма нӕ зӕрди «Хуцауи фарнӕ» уа? Павели финстӕгӕй бӕрӕг ӕй: лӕгъуз сагъӕстӕн сӕ хуӕздӕр хуасӕ ӕй кувд. Мадта дӕ уӕхӕн сагъӕстӕ ку тухсун кӕнонцӕ, уӕд сӕ Хуцауӕн радзорӕ. (Бакӕсӕ 1 Петури 5:6, 7.) Удта ӕппундӕр ма гурусхӕ кӕнӕ, ке дӕбӕл батухсдзӕй. Алкӕддӕр ин арфӕ кӕнӕ, ци хуарздзийнӕдтӕ дин искодта, уой туххӕй. Удта ди иронх ма уӕд, Йегови бон нин ӕй раттун, «ци си корӕн кенӕ ба ӕрмӕстдӕр гъуди цӕбӕл ракӕнӕн, уомӕй берӕ фулдӕр» (Еф. 3:20).

¹¹ Ка ’й зонуй, махмӕ дӕр, Павел ӕма Сили хузӕн дессаг фӕккӕсдзӕй, Йеговӕ нин куд банхус кодта, е. Ӕвӕдзи, еци ӕнхус дессаги хузи нӕ уодзӕй, фал е уодзӕй, еци рӕстӕг нӕ ӕнӕмӕнгӕй ка гъӕуй, уӕхӕн цидӕр (1 Кор. 10:13). Е уобӕл дзорӕг нӕй, ӕма нур гъӕуама бадӕн ӕма ӕнгъӕлмӕ кӕсӕн, Йеговӕ нин нӕ уавӕр кӕд фӕррӕуӕгдӕр кӕндзӕй, уомӕ. Цӕбӕл ковӕн, уобӕл гъӕуама архайгӕ дӕр кӕнӕн (Ром. 12:11). Уотемӕй бӕрӕг уодзӕй, нӕ кувдтитӕ зӕрдӕй ке цӕунцӕ, ӕма нин Йеговӕ райарфӕ кӕндзӕй. Гъӕуама макӕд иронх кӕнӕн: Йегови бон ӕй, ци си корӕн кенӕ цӕмӕ ӕнгъӕлмӕ кӕсӕн, уомӕй нин берӕ фулдӕр раттун. Уотӕ дӕр уодзӕй, ӕма нӕмӕ хъӕбӕр дессаг фӕккӕсдзӕй, Йеговӕ нин кӕцирдиги банхус кӕндзӕй, е. Гъӕйдӕ мадта ӕркӕсӕн, Библий ци цаутӕ финст ӕрцудӕй, уонӕмӕ. Еци цаутӕй бӕрӕг ӕй, Йегови бон ке ӕй ӕ лӕггадгӕнгутӕн цийфӕнди уавӕри дӕр банхус кӕнун, хатгай ба, ӕнгъӕл дӕр куд н’ адтӕнцӕ, уотӕ.

12. а) Йерусалимӕн ассирийаг паддзах Сеннахиримӕй тӕссаг ку адтӕй, уӕд паддзах Езеки ци бакодта? б) Йеговӕ гъуддаг куд ниллух кодта, уомӕй цӕбӕл ахур кӕнӕн?

¹² Библий берӕ хабӕрттӕ финст ес, Йеговӕ архайун куд райдайидӕ, уой туххӕй, адӕймаг ӕй ӕнгъӕл дӕр куд н’ адтӕй, уотӕ. Зӕгъӕн, Езеки Иуди паддзах ку адтӕй, уӕд Ассирий паддзах Сеннахирим Иуди федаргонд горӕттӕ, Йерусалимӕй уӕлдай, еугурейдӕр байахӕста (2 Пад. 18:1–3, 13). Фӕстӕдӕр, Сеннахирими ӕфсӕдтӕ Йерусалиммӕ дӕр се ’ргом ку раздахтонцӕ, уӕд Езеки ци бакодта? Фиццагидӕр Йеговӕмӕ искувта, цӕмӕй син банхус кодтайдӕ, удта пахампар Исаййи хӕццӕ дӕр раунаффӕ кодта (2 Пад. 19:5, 15–20). Фӕндадтӕй ӕй лӕдӕргӕй архайун ӕма Сеннахиримӕн хъалон бафиста, цӕмӕй сӕ ӕнцад ниууагътайдӕ (2 Пад. 18:14, 15). Фӕстагмӕ Езеки байархайдта, цӕмӕй цӕттӕ уонцӕ, ассирийӕгтӕ горӕтбӕл ку ӕртухсонцӕ ӕма ’й уотемӕй берӕ рӕстӕг ку даронцӕ, уомӕ (2 Анз.  32:2–4). Фал гъуддаг цӕбӕл ниллух ӕй? Йеговӕ ӕ изӕди рарвиста, ӕма еци изӕд еунӕг ӕхӕсӕвӕмӕ Сеннахирими ӕфсади рамардта 185 000 ӕфсӕддони. Езеки ӕнгъӕл дӕр н’ адтӕй, гъуддаг уотӕ ке рауайдзӕй, уой! (2 Пад. 19:35).

13. а) Иосифбӕл ци ’рцудӕй, уомӕй цӕбӕл ахур кӕнӕн? б) Саррӕбӕл цӕхуӕн дессаги хабар ӕрцудӕй?

¹³ Ӕркӕсӕн, ӕригон Иосифбӕл ци хабӕрттӕ ӕрцудӕй, уонӕмӕ дӕр. Египети ахӕстдони ку бадтӕй, уӕд цума е уой ӕнгъӕл адтӕй, ӕма ’й еци бӕсти дуккаг адӕймагӕй исӕвӕрдзӕнцӕ? Кенӕ уой ӕнгъӕл адтӕй, ӕма ин Йеговӕ уотемӕй ӕ бийнонти стонг дзамани фӕййервӕзун кӕндзӕй? (Райд. 40:15; 41:39–43; 50:20). Ӕвӕдзи, нӕ! Ӕргъуди кӕнӕн Иосифӕн ӕ бабай мадӕ Сарри дӕр. Цума Саррӕ уой ӕнгъӕл адтӕй, ӕма ин еци кари ӕхе сувӕллон уодзӕй, ӕ лӕггадгӕнӕг силгоймаги сувӕллон нӕ, фал? Исаак ин ке райгурдӕй, е ин, цӕмӕ ӕнгъӕлмӕ кастӕй, уомӕй устурдӕр арфӕдзийнадӕ разиндтӕй (Райд. 21:1–3, 6, 7).

14. Йеговӕбӕл цӕхуӕн гъуддаги ӕй нӕ бон федарӕй ӕууӕндун?

¹⁴ Ке зӕгъун ӕй гъӕуй, мах Йеговӕй уой нӕ агорӕн, цӕмӕй нӕ нӕуӕг дуйней размӕ зиндзийнӕдтӕй ервӕзун кӕна ӕма нин дессӕгтӕ ӕвдеса.  Фал ӕй мах зонӕн, рагидзаманти Йеговӕ ӕ лӕггадгӕнгутӕн, ӕнгъӕл дӕр ӕй куд н’ адтӕнцӕ, уотӕ ке банхус кӕнидӕ, ӕма нур дӕр нӕ раййивта. (Бакӕсӕ Исай 43:10–13.) Е нин не ’ууӕндундзийнадӕ хъӕбӕр федар кӕнуй. Нӕ бон ӕй федарӕй ӕууӕндун, ӕ фӕндон ӕнхӕст кӕнунмӕ нин цӕйбӕрцӕ гъӕуа, уойбӕрцӕ хъаурӕ ке ратдзӕй (2 Кор. 4:7–9). Езеки, Иосиф ӕма Сарри цӕветтонтӕй цӕбӕл ахур кӕнӕн? Йеговӕбӕл еузӕрдон ку уӕн, уӕд нин цийфӕнди зин уавӕри дӕр ӕ бон ӕй банхус кӕнун.

15. Ци гъӕуама кӕнӕн, цӕмӕй уӕззау фӕлварӕнти дӕр «Хуцауи фарнӕй» хайгин уӕн ӕма уомӕн куд ес гӕнӕн?

¹⁵ Ци гъӕуама кӕнӕн, цӕмӕй уӕззау фӕлварӕнти дӕр «Хуцауи фарнӕй» хайгин уӕн ӕма уомӕн куд ес гӕнӕн? Гъӕуама Йеговӕмӕ никки хӕстӕгдӕр кӕнӕн. Уомӕн ба гӕнӕн ес ӕрмӕстдӕр Киристей нивонди фӕрци. Киристей нивонд Хуцауи тӕккӕ устурдӕр лӕвӕрттӕй сӕ еу ӕй. Еци нивонди фӕрци нин хатир кӕнуй нӕ тӕрегъӕдтӕ, удта имӕ нӕ бон ӕй кӕдзос цӕсгонӕй хӕстӕг кӕнун (Иоан. 14:6; Иак. 4:8; 1 Пет. 3:21).

16. «Хуцауи фарнӕй» ку исхайгин уӕн, уӕд ци уодзӕй? Ба ’й лӕдӕрун кӕнӕ.

¹⁶ «Хуцауи фарнӕй, зунд кӕбӕл нӕ хъӕртуй, еци фарнӕй» ку исхайгин уӕн, уӕд ци уодзӕй? Библи куд зӕгъуй, уомӕ гӕсгӕ нин еци фарнӕ «багъӕуай кӕндзӕй нӕ зӕрдитӕ ӕма нӕ зунд» (Фил. 4:7). Дзурдбаст «багъӕуай кӕндзӕй» ци грекъаг дзурдӕй ратӕлмац кодтонцӕ, е ӕй ӕфсӕддон термин ӕма хаудтӕй, федаргонд горӕттӕ ка гъӕуай кодта, еци ӕфсӕддонти къуармӕ. Горӕт Филипптӕ дӕр уӕхӕн ӕфсӕддонти къуар гъӕуай кодта ӕма ӕ цӕргутӕ ӕхсӕвӕ сабур фунӕй кодтонцӕ. Уотӕ махмӕ дӕр «Хуцауи фарнӕ» ку уа, уӕд ӕгӕр нӕ мӕтӕ кӕндзиан. Мах ӕй зонӕн, Йеговӕ нӕбӕл ке тухсуй ӕма ’й фӕндуй, цӕмӕй амондгун уӕн (1 Пет. 5:10). Ӕма уой ке зонӕн, уой фӕрци ӕгӕр нӕ тухсӕн ӕма нӕ нифс нӕ сӕттуй.

17. Устур бӕллӕхи рӕстӕг нин ци банхус кӕндзӕй нӕ зӕрдӕ Йеговӕбӕл дарун?

¹⁷ Зӕнхӕбӕл ка некӕдма адтӕй, еци устур бӕллӕхмӕ берӕ рӕстӕг нӕбал байзадӕй (Матф. 24:21, 22). Еци рӕстӕг ни алкедӕр цӕхуӕн уавӕри уодзӕй, уой нӕ зонӕн. Фал уобӕл ӕгӕр тухсун дӕр нӕ гъӕуй. Кӕд ӕй бӕлвурдӕй нӕ зонӕн, Йеговӕ куд архайдзӕй, уой, уӕддӕр ӕй зонӕн, цӕхуӕн Хуцау ӕй, уой. Рагон хабӕрттӕй бӕрӕг ӕй: цийфӕнди ма ’рцӕуа, уӕддӕр Йеговӕ ӕ фӕндон алкӕддӕр исӕнхӕст кӕнуй, адӕн ӕй еуӕй-еухатт ӕнгъӕл дӕр куд нӕ фӕуунцӕ, уотӕ. Еу хаттӕй иннӕ хатмӕ еци гъуддаг нӕ царди ку фӕууинӕн, уӕд ӕй нӕуӕгӕй нӕхебӕл бавзарӕн, «Хуцауи фарнӕ, зунд кӕбӕл нӕ хъӕртуй, еци фарнӕ» ци ӕй, уой.