“Maromak nia dame neʼebé aas liu ema nia hanoin hotu”
“Maromak nia dame neʼebé aas liu ema nia hanoin hotu sei proteje imi-nia laran.”—FILIPE 4:7.
KNANANUK: 39, 141
1, 2. Saida mak akontese ba Paulo no Silas iha sidade Filipe? (Haree dezeñu iha leten.)
DERREPENTE ema-lubun kaer misionáriu naʼin-rua, Paulo no Silas, no lori sira ba merkadu. Sira forma kedas grupu tesi-lia nian iha neʼebá hodi tesi-lia ba Paulo no Silas. Ema lees Paulo no Silas nia unuk no baku sira ho ai. (Apóstolu 16:16-22) Tuirmai sira hatama Paulo no Silas ba komarka. Toʼo tiha kalan boot, sira book an ladiʼak tanba ema uza ai hodi habit metin sira-nia ain, no sira-nia kotuk moras tebes tanba ema baku. (Apóstolu 16:23, 24) Buat neʼebé sira halo ba Paulo no Silas la hatudu justisa tanba nuʼudar sidadaun Roma, Paulo tenkesér hetan tesi-lia tuir lei. *
2 Iha komarka laran Paulo hanoin hela kona-ba buat neʼebé akontese iha loron neʼe no mós kona-ba sira neʼebé hela iha sidade Filipe. Sidade neʼe la hanesan ho sidade seluk neʼebé Paulo vizita ona tanba sidade neʼe la iha sinagoga. Karik iha ema judeu uitoan deʼit iha sidade Filipe tanba presiza mane judeu naʼin-10 atu harii sinagoga. Ema judeu sira halaʼo deʼit adorasaun iha portaun sidade nia liʼur besik mota ida. (Apóstolu 16:13, 14) Ema neʼebé hela iha Filipe foti-an tanba sira sai ona sidadaun Roma nian. (Apóstolu 16:21) Karik sira hanoin ema judeu hanesan Paulo ho Silas laʼós sidadaun Roma. Bíblia la esplika kona-ba razaun sira-neʼe, maibé ita haree katak sira la hatudu justisa hodi hatama Paulo no Silas ba komarka.
3. Saida mak bele halo Paulo sente konfuzaun bainhira nia iha komarka laran, maibé nia hatudu nafatin hahalok saida?
3 Karik Paulo mós hanoin kona-ba oinsá mak nia toʼo iha sidade Filipe. Fulan balu liubá, Paulo halaʼo ninia atividade iha Tasi Egeu nia sorin, iha Ásia Menór. Iha tempu neʼebá espíritu santu hanetik beibeik nia hodi la bele haklaken iha fatin balu. Nia sente hanesan espíritu santu dirije nia atu bá fali fatin seluk. (Apóstolu 16:6, 7) Maibé atu bá neʼebé? Bainhira nia iha Tróade, nia hetan mensajen ida liuhusi vizaun neʼebé hatete: “Hakat liu mai iha Masedónia.” Paulo bele haree ho klaru katak neʼe mak Jeová nia hakarak, tan neʼe nia bá kedas Masedónia. (Lee Apóstolu 16:8-10.) Maibé tuirmai saida mak akontese? Bainhira Paulo toʼo tiha iha Masedónia, lakleur ema hatama nia ba komarka! Tanbasá mak Jeová husik buat hanesan neʼe akontese ba Paulo? Nia sei hela iha komarka ba tempu hira? Maski pergunta hanesan neʼe bele mosu iha Paulo nia neon, maibé nia hatudu nafatin fiar neʼebé metin no la lakon ninia ksolok. Iha komarka laran Paulo no Silas “halo orasaun no hahiʼi Maromak ho knananuk”. (Apóstolu 16:25) Maromak nia dame fó duni kmaan ba sira-nia laran no neon.
4, 5. (a) Oinsá mak ita-nia situasaun bele hanesan ho Paulo nian? (b) Oinsá mak Paulo nia situasaun troka derrepente deʼit?
4 Dala ruma Ita mós sente hanesan Paulo ka lae? Karik Ita husu ona Maromak atu ajuda Ita foti desizaun no Ita sente katak Ita husik ona espíritu santu hodi dirije Ita. Maibé ikusmai Ita hasoru fali susar oioin ka Ita sente katak Ita presiza halo fali mudansa barak ba Ita-nia moris. (Eclesiastes [Pengkhotbah] 9:11) Bainhira Ita hanoin fali ba desizaun sira neʼebé Ita halo, karik Ita sente konfuzaun tanba Maromak husik buat sira-neʼe akontese ba Ita. Saida mak bele ajuda Ita atu kontinua tahan hodi tau fiar tomak ba Jeová? Atu hetan resposta, mai ita koʼalia fali kona-ba Paulo no Silas.
5 Iha tempu neʼebé Paulo no Silas kanta hela, derrepente buat sira tuirmai neʼe akontese. Primeiru, rai-nakdoko makaʼas. Kadeia nia odamatan sira nakloke kedas. Depois, korrente neʼebé kesi hela prizioneiru sira namkore mesak. Tuirmai, Paulo hanetik guarda ida atu la bele oho an, no guarda neʼe ho ninia família tomak hetan batizmu. Dadeer-saan tuirmai, ulun-naʼin husi sidade haruka guarda sira lori Paulo no Silas sai husi komarka no husu sira atu sai husi sidade neʼe ho dame. Bainhira ulun-naʼin sira hatene katak Paulo no Silas mós sidadaun Roma, sira rekoñese katak sira halo ona sala neʼebé boot no sira rasik mai atu proteje Paulo no Silas hodi sai husi neʼebá. Maibé antes sira sai, sira hakarak hatoʼo uluk adeus ba Lídia, irmán neʼebé foin hetan batizmu. Sira mós uza oportunidade neʼe hodi hametin irmaun-irmán sira iha Filipe. (Apóstolu 16:26-40) Buat hotu troka derrepente duni!
MAROMAK NIA DAME “AAS LIU EMA NIA HANOIN HOTU”
6. Ita sei koʼalia kona-ba saida iha lisaun neʼe?
6 Ita bele aprende saida husi akontesimentu sira-neʼe? Jeová bele halo buat neʼebé ita nunka hanoin, tan neʼe ita la presiza laran-taridu bainhira hasoru susar ruma. Buat neʼebé Jeová halo book tebes Paulo nia laran, tan neʼe mak iha ninia karta ba irmaun sira iha Filipe, nia fó kmaan ba sira kona-ba laran-taridu no koʼalia kona-ba Maromak nia dame. Iha lisaun neʼe ita sei koʼalia kona-ba Paulo nia liafuan sira neʼebé hakerek iha Filipe 4:6, 7. (Lee.) Depois, ita sei koʼalia kona-ba ezemplu seluk tan husi Bíblia neʼebé hatudu Jeová halo buat neʼebé ita nunka hanoin. Ikus, ita sei koʼalia kona-ba oinsá mak “Maromak nia dame” bele ajuda ita tahan hasoru susar, hodi tau fiar tomak ba Jeová.
7. Liuhusi Paulo nia karta, nia atu hanorin saida ba irmaun-irmán sira iha Filipe, no ita bele aprende saida?
7 Bainhira irmaun sira iha Filipe lee Paulo nia karta, karik sira barak sei hanoin-hetan buat neʼebé akontese ba Paulo ho Silas, no kona-ba oinsá Jeová ajuda Paulo ho Silas iha dalan neʼebé sira nunka hanoin. Maibé Paulo atu hanorin saida ba sira? Katak sira lalika hanoin barak. Halo orasaun no tuirmai sira sei hetan Maromak nia dame. Paulo hatete ba sira katak Maromak nia dame “aas liu ema nia hanoin hotu”. Neʼe katak sá? Bíblia balu uza liafuan “aas liu fali ita-nia mehi hotu” ka “diʼak liu fali ema nia planu hotu”. Tan neʼe Paulo nia liafuan hatudu katak “Maromak nia dame” furak liu fali buat hotu neʼebé ita hanoin. Dala ruma ita la hatene dalan atu rezolve problema sira, maibé Jeová hatene, no nia bele uza dalan neʼebé ita nunka hanoin.—Lee 2 Pedro 2:9.
8, 9. (a) Maski Paulo hasoru situasaun la justisa iha Filipe, maibé neʼe lori rezultadu saida? (b) Tanbasá mak irmaun-irmán sira iha Filipe bele tau fiar tomak ba Paulo nia liafuan sira?
8 Ita bele fiar katak Paulo nia karta hametin irmaun-irmán sira iha Filipe bainhira sira hanoin fali ba tinan sanulu nia laran oinsá Jeová mós ajuda ona sira. Maski Jeová husik Paulo no Silas hasoru situasaun neʼebé la justisa, maibé neʼe fó oportunidade ba sira hodi “defende liafuan diʼak iha ukun-naʼin sira-nia oin”. (Filipe 1:7) Hodi nuneʼe, ulun-naʼin sira iha Filipe la brani tan atu fó terus ba kongregasaun neʼebé foin harii iha neʼebá. Karik tanba Paulo temi katak nia sidadaun Roma mak fó dalan ba Lucas hodi hela nafatin iha Filipe bainhira Paulo ho Silas sai husi sidade neʼe, no hodi Lucas bele fó tan ajuda ba ema kristaun foun sira iha Filipe.
9 Irmaun-irmán sira iha Filipe hatene katak Paulo hakerek husi ninia esperiénsia rasik tanba nia hasoru ona terus boot oioin. No mós iha tempu neʼebé nia hakerek karta neʼe, nia hetan daudauk kastigu atu la bele sai husi ninia uma iha sidade Roma. Maski nuneʼe, nia hatudu katak nia iha nafatin “Maromak nia dame”.—Filipe 1:12-14; 4:7, 11, 22.
“KETA LARAN-TARIDU KONA-BA BUAT IDA”
10, 11. Ita presiza halo saida se ita hanoin barak kona-ba problema ida, no ita bele fiar kona-ba saida?
10 Saida mak bele ajuda ita atu iha “Maromak nia dame” duké sai “laran-taridu”? Husi Paulo nia liafuan neʼebé nia hakerek ba irmaun-irmán sira iha Filipe hatudu katak, se ita mak hanoin barak kona-ba problema ida, halo orasaun bele ajuda ita. Tan neʼe bainhira ita sai laran-taridu, diʼak atu halo deʼit orasaun. (Lee 1 Pedro 5:6, 7.) Kuandu ita halo orasaun ba Jeová, ita tenke fiar metin katak nia hanoin ita. Hatoʼo beibeik agradese ba Jeová kona-ba bensaun neʼebé ita hetan. No keta haluha katak Jeová bele “halo barak liu fali buat hotu neʼebé ita husu no hanoin”.—Éfeso 3:20.
11 Dala ruma ita mós bele sente hakfodak hanesan Paulo no Silas kona-ba buat neʼebé Jeová halo atu ajuda ita. Maski buat neʼebé nia halo laʼós hanesan milagre, maibé buat sira-neʼe sempre fó ajuda ba ita. (1 Korinto 10:13) Maski nuneʼe, ida-neʼe la dehan katak ita tuur hodi hein deʼit ba Jeová atu hadiʼa situasaun ka rezolve ita-nia problema. Ita tenkesér halo tuir buat neʼebé ita husu liuhusi orasaun. (Roma 12:11) Se ita halo nuneʼe, ita hatudu katak ita hakarak Jeová nia ajuda no mós hakarak tebes nia atu fó bensaun mai ita. Ita presiza hanoin-hetan katak Jeová bele halo barak liu fali buat neʼebé ita husu ka hakarak nia atu halo ba ita. Dala ruma ita hakfodak tanba nia halo buat neʼebé ita nunka hanoin. Agora, mai ita haree toʼok ezemplu balu neʼebé bele hametin ita-nia fiar katak Jeová bele halo buat neʼebé ita nunka hanoin hodi ajuda ita.
EZEMPLU SIRA HUSI BÍBLIA
12. (a) Liurai Ezekias halo saida deʼit bainhira Liurai Senaquerib ameasa nia? (b) Dalan neʼebé Jeová rezolve problema iha tempu neʼebá hanorin saida mai ita?
12 Husi Bíblia, ita bele haree ezemplu barak kona-ba Jeová halo buat neʼebé ita nunka hanoin. Porezemplu, iha tempu neʼebé Ezekias ukun rai-Judá, Liurai Senaquerib husi rai-Asíria mai ataka Judá no hadau sidade hotu, só Jeruzalein deʼit mak seidauk. (2 Reis [Raja-Raja] 18:1-3, 13) Ikusmai Senaquerib mai atu ataka Jeruzalein. Liurai Ezekias halo saida? Primeiru, nia halo orasaun ba Jeová atu husu ajuda no nia bá buka matadalan husi profeta Isaías. (2 Reis [Raja-Raja] 19:5, 15-20) Tuirmai, Ezekias selu nafatin buat neʼebé Senaquerib husu hodi hatudu katak nia la ulun-toos. (2 Reis [Raja-Raja] 18:14, 15) Ikus, Ezekias halo preparasaun hodi sidade Jeruzalein bele tahan ba tempu kleur husi inimigu nia ataka. (2 Crônicas [Tawarikh] 32:2-4) Ikusmai saida mak akontese? Iha kalan ida Jeová haruka ninia anju ida oho Senaquerib nia soldadu hamutuk ema naʼin–185.000. Ezekias nunka hanoin kona-ba rezultadu neʼe!—2 Reis (Raja-Raja) 19:35.
Ita bele aprende saida husi buat neʼebé akontese ba José?—Gênesis (Kejadian) 41:42 (Haree parágrafu 13)
13. (a) Ita bele aprende saida husi buat neʼebé akontese ba José? (b) Buat saida mak akontese ba Sara?
13 Hanoin toʼok buat neʼebé akontese ba José. Bainhira iha komarka laran iha rai-Ejitu, nia nunka hanoin katak loron ida nia sei sai ema neʼebé ho pozisaun segundu iha rai-Ejitu ka Jeová sei uza nia atu salva ninia família rasik husi rai-hamlaha. (Gênesis [Kejadian] 40:15; 41:39-43; 50:20) Ita bele fiar katak José nunka hanoin buat neʼebé Jeová halo hodi ajuda nia. Hanoin mós kona-ba Sara. Ho ninia idade neʼebé boot tebes, nia espera katak Jeová sei halo nia atu bele hahoris oan-mane ida ka lae? Lae. Tuur-ahi ba Isaac mak buat neʼebé Sara nunka hanoin sei akontese.—Gênesis (Kejadian) 21:1-3, 6, 7.
14. Ita bele tau fiar ba Jeová kona-ba saida?
14 Ita la hein katak Jeová sei halo milagre atu hasai hotu ita-nia problema sira iha mundu aat neʼe. No ita mós la iha direitu atu husu Jeová halo milagre iha ita-nia moris. Maski nuneʼe, ita hatene katak Jeová halo ona buat furak oioin iha tempu uluk hodi ajuda ninia atan sira, no Jeová nunka troka. (Lee Isaías [Yesaya] 43:10-13. *) Hatene ida-neʼe halo ita tau fiar ba Jeová. Ita bele fiar katak Jeová sei fó kbiit ba ita atu halo ninia hakarak. (2 Korinto 4:7-9) Ita aprende saida husi buat neʼebé akontese ba Ezekias, José no Sara? Jeová bele ajuda ita maski iha situasaun neʼebé susar, naran katak ita laran-metin nafatin ba nia.
Jeová bele ajuda ita maski iha situasaun neʼebé susar, naran katak ita laran-metin nafatin ba nia
15. Saida mak bele ajuda ita atu iha “Maromak nia dame” maski hasoru problema oioin, no saida mak loke dalan ba neʼe?
15 Oinsá mak ita bele iha “Maromak nia dame” maski hasoru daudauk problema sira? Ita presiza hametin nafatin ita-nia relasaun diʼak ho Jeová. Liuhusi Jesus Kristu nia sakrifísiu mak loke dalan ba ita atu iha relasaun neʼebé diʼak ho Jeová. Jesus nia sakrifísiu mak arranju furak ida husi Jeová. Tanba liuhusi sakrifísiu neʼe mak Jeová bele fó perdua ba ita-nia sala sira, no hodi ita bele iha konxiénsia neʼebé moos no hodi hakbesik ba nia.—João 14:6; Tiago 4:8; 1 Pedro 3:21.
MAROMAK NIA DAME SEI PROTEJE ITA-NIA LARAN NO NEON
16. Oinsá mak “Maromak nia dame” bele ajuda ita? Fó toʼok ezemplu.
16 Oinsá mak “Maromak nia dame neʼebé aas liu ema nia hanoin hotu” bele ajuda ita? Bíblia hatete katak dame neʼe sei “proteje” ita-nia laran ho neon. (Filipe 4:7) Iha lia orijinál, “proteje” mak liafuan neʼebé refere ba grupu soldadu ida neʼebé hetan knaar atu tau matan ba sidade. Ema sira neʼebé hela iha sidade Filipe mós hetan protesaun husi grupu soldadu neʼe. Tan neʼe ema bele toba ho seguru iha kalan tanba sira hatene katak sidade neʼe hetan daudauk protesaun. Hanesan neʼe mós bainhira ita iha “Maromak nia dame”, ita la presiza hanoin barak tan, ita-nia laran no neon bele sai hakmatek. Ita hatene katak Jeová hanoin ita no nia hakarak ita atu manán hasoru susar sira. (1 Pedro 5:10) Hodi hatene kona-ba neʼe bele proteje ita atu la sai laran-taridu ka laran-tun.
17. Saida mak bele ajuda ita atu tau fiar ba Jeová iha tempu terus boot?
17 Lakleur tan ema hotu sei hasoru terus neʼebé boot tebes. (Mateus 24:21, 22) Ita seidauk hatene saida mak sei akontese ba ita iha tempu neʼebá. Maibé ita la presiza hanoin barak demais kona-ba tempu neʼe. Maski ita la hatene buat hotu neʼebé Jeová sei halo, maibé ita hatene didiʼak kona-ba nia. Ita hatene saida mak nia halo ona ba ninia atan sira neʼebé laran-metin iha tempu uluk. Ita hatene katak maski buat naran deʼit neʼebé akontese, maibé la iha buat ida mak bele hanetik Jeová atu kumpre ninia hakarak. No karik nia sei halo buat ruma iha dalan neʼebé ita nunka hanoin! Tan neʼe, buat naran deʼit neʼebé Jeová halo ba ita ohin loron, ita bele sente “Maromak nia dame neʼebé aas liu ema nia hanoin hotu”.
^ par. 1 Ita bele fiar katak Silas mós sidadaun Roma ida.—Apóstolu 16:37.
^ par. 14 Isaías 43:10-13 10 Jeová dehan: “Imi mak haʼu-nia testemuña, sin, haʼu-nia atan neʼebé haʼu hili ona, atu nuneʼe imi bele hatene no tau fiar ba haʼu no komprende katak haʼu hanesan ba nafatin. La iha Maromak seluk antes haʼu, no la iha Maromak seluk depois haʼu. 11 Haʼu, haʼu mak Jeová, la iha salvadór ida seluk só haʼu deʼit.” 12 “Bainhira la iha maromak seluk iha imi-nia leet, haʼu mak fó-hatene nanis buat neʼebé atu akontese no fó salvasaun no fó sai kona-ba ida-neʼe. Entaun, imi mak haʼu-nia testemuña”, Jeová dehan, “no haʼu mak Maromak. 13 No mós, haʼu hanesan deʼit ba nafatin; No la iha ema ida mak bele hadau buat ruma husi haʼu-nia liman. Bainhira haʼu halo buat ruma, sé mak bele hanetik haʼu?”
