1, 2. Wanem ol samting i kamap long Filipai na ol i putim Pol na Sailas long kalabus? (Lukim piksa long kirap bilong stadi.)

EM BIKNAIT pinis. Tupela misineri, em Pol na Sailas, i stap long rum insait tru long haus kalabus long taun Filipai. Ol i pasim lek bilong tupela long hap plang, na baksait bilong ol i pen bikos ol birua i paitim tupela planti taim. (Apo. 16:23, 24) Bikpela lain manmeri i kam na pulim tupela i go long ples maket na sanapim ol long ai bilong ol hetman. Ol i brukim klos bilong tupela na paitim ol long kanda. Ol dispela samting i kamap kwiktaim tru! (Apo. 16:16-22) Ol i mekim pasin nogut tru! Pol em sitisen bilong Rom, olsem na ol i mas bihainim stretpela pasin na kotim em. *

² Pol i sindaun long rum i tudak na tingim ol samting i kamap long dispela de. Em i tingim ol manmeri long Filipai. Pol i raun long planti taun we i gat ol sinagog, tasol taun Filipai i no gat sinagog bilong ol Juda. Olsem na lain Juda i save bung ausait long taun klostu long wanpela wara na mekim lotu. (Apo. 16:13, 14) I mas i gat 10-pela man Juda long wanpela  taun bambai ol i ken sanapim sinagog. Tasol i luk olsem namba bilong ol man Juda long Filipai i no winim dispela namba. Ol manmeri long Filipai i amamas long i stap olsem sitisen bilong Rom maski ol i no gat olgeta rait long mekim ol samting. (Apo. 16:21) Ol i no luksave olsem Pol na Sailas i sitisen bilong Rom. Ating em risen na ol i mekim nogut long ol na kalabusim ol.

3. (a) Ating Pol i tingting planti long wanem ol samting? (b) Maski Pol i tingting planti, em i mekim wanem?

³ Ating Pol i tingim ol samting i kamap long ol mun i go pinis. Em i stap long hapsait bilong solwara Ijien long Esia Maina. Taim Pol i stap long dispela hap, inap planti taim holi spirit i pasim em long autim tok long ol hap em i raun long en. Holi spirit i stiaim em i go autim tok long narapela hap. (Apo. 16:6, 7) Taim em i stap long Troas, em i lukim wanpela visen. Wanpela man i tokim em: “Kam long Masedonia.” Pol i luksave long laik bilong Jehova na em i go long Masedonia. (Ritim Aposel 16:8-10.) Tasol taim em i go kamap long Masedonia, ol i kalabusim em! Bilong wanem Jehova i larim dispela samting i kamap? Em bai stap kalabus i go inap wanem taim? Ating Pol i tingting planti long ol dispela samting, tasol em i no larim dispela i daunim bilip na amamas bilong em long mekim wok bilong God. Baibel i tok: “Pol na Sailas i wok long beten na mekim ol singsing bilong litimapim nem bilong God.” (Apo. 16:25) Taim ol i mekim olsem, bel isi bilong God i mekim gut bel na tingting bilong ol.

4, 5. (a) Olsem wanem yumi inap bungim wankain hevi olsem bilong Pol? (b) Olsem wanem ol samting i painim Pol i senis kwiktaim?

⁴ Wankain olsem Pol, ating yu pilim olsem holi spirit i stiaim ol samting yu mekim, tasol bihain ol samting i no kamap olsem yu bin ting. Ating yu bungim sampela hevi, o yu mas mekim sampela bikpela senis long laip bilong yu. (Sav. 9:11) Olsem na yu laik save long risen na Jehova i larim ol dispela samting i kamap. Sapos olsem, orait wanem samting inap helpim yu long sanap strong yet na bilip long Jehova? Yumi ken skelim gen stori bilong Pol na Sailas bilong kisim bekim bilong dispela askim.

⁵ Taim Pol na Sailas i singim ol song bilong givim biknem long God, sampela narakain samting i kamap. Bikpela guria i kamap. Ol dua bilong haus kalabus i op, na ol sen em ol i bin pasim long ol kalabus lain i raus. Taim ol dispela samting i kamap, man i lukautim haus kalabus i laik suasaid, olsem na Pol i stopim em. Bihain, dispela man na famili bilong em i kisim baptais. Long neks de, ol majistret i salim ol gad i go bilong larim Pol na Sailas i go fri. Ol gad i tokim tupela long lusim taun na i go. Ol majistret i luksave olsem Pol na Sailas i sitisen bilong Rom, na ol i mekim bikpela popaia. Olsem na ol majistret i kisim tupela i go na lusim ol ausait long taun. Tasol Pol na Sailas i go tok gutbai long Lidia, em wanpela meri husat i kisim baptais nupela. Na tu, ol i go lukim ol brata na strongim ol. (Apo. 16:26-40) Ol dispela senis i kamap kwiktaim!

6. Yumi bai stori long wanem ol samting?

⁶ Yumi kisim wanem skul long stori bilong Pol na Sailas? Jehova inap mekim ol samting em yumi yet i no inap mekim, olsem na yumi no ken tingting planti taim hevi i painim yumi. Pol i luksave long dispela samting, olsem na em i raitim pas i  go long ol brata long Filipai na stori long pasin bilong tingting planti na bel isi bilong God. Pastaim, yumi ken stori long tok bilong Pol long Filipai 4:6, 7. (Ritim.) Bihain, yumi bai stori long sampela eksampel long Baibel we i stori long hau Jehova i bin mekim ol samting em ol man i no inap mekim. Na tu, yumi bai stori long olsem wanem “bel isi bilong God” i ken helpim yumi long sanap strong na bilip long Jehova.

7. (a) Pol i skulim ol brata long Filipai long wanem samting? (b) Yumi inap kisim wanem skul long tok bilong Pol?

⁷ Taim ol brata long Filipai i ritim pas Pol i raitim, ol i tingim ol samting i bin kamap long em na olsem wanem Jehova i bin helpim Pol. Pol i skulim ol long wanem samting? Ol i no ken tingting planti. Taim ol i beten, ol inap kisim bel isi bilong God. Wanem mining bilong dispela tok, “bel isi bilong God i winim tru tingting bilong man”? Sampela trensleta i tanim dispela hap tok olsem, “winim tru ol samting yu tingting long en” o “winim tru ol samting yu laik mekim.” Tok bilong Pol i makim olsem “bel isi bilong God” i gutpela tru winim olgeta narapela samting. Olsem na maski yumi ting olsem i no gat rot bilong stretim ol hevi, Jehova i save long olsem wanem em inap helpim yumi.—Ritim 2 Pita 2:9.

8, 9. (a) Maski ol man i mekim nogut long Pol long Filipai, wanem gutpela samting i kamap? (b) Bilong wanem ol brata long Filipai i bilipim tok bilong Pol?

⁸ Taim ol brata long Filipai i tingim tingim ol samting i kamap 10-pela yia i go pinis, dispela i strongim bilip bilong ol. Tok Pol i raitim i stret. Jehova i larim ol man i mekim nogut long Pol na Sailas, tasol dispela i opim rot long ol inap “strongim sait bilong gutnius long rot bilong kot.” (Fili. 1:7) Ol majistret i mas tingting gut paslain long ol i mekim sampela samting long nupela kongrigesen Kristen long Filipai. Pol i sanap strong long bilip, olsem na dispela i helpim Luk, em wanpela dokta, long i stap bek long Filipai taim Pol na Sailas i lusim taun. Luk i bin helpim ol Kristen long Filipai long kamap strong long bilip.

⁹ Taim ol brata long Filipai i ritim pas bilong Pol, ol i save olsem dispela tok i no bilong wanpela saveman husat i sindaun long ofis na raitim, nogat. Pol i karim planti hevi, tasol em i soim olsem “bel isi bilong God” i stap wantaim em. Pol i stap kalabus long Rom taim em i raitim dispela pas i go long ol brata. Maski i olsem, em i soim olsem “bel isi bilong God” i stap yet wantaim em.—Fili. 1:12-14; 4:7, 11, 22.

10, 11. (a) Yumi ken mekim wanem taim wanpela hevi i mekim yumi tingting planti? (b) Yumi ken bilip tru long wanem samting?

¹⁰ Wanem samting bai helpim yumi long no ken tingting planti na kisim “bel isi bilong God”? Tok bilong Pol i soim olsem beten bai helpim yumi long daunim pasin bilong tingting planti. Olsem na taim yumi tingting planti, yumi mas beten na kamapim ol hevi bilong yumi long God. (Ritim 1 Pita 5:6, 7.) Beten long Jehova na bilip tru olsem em i tingim yu. Beten long God na “tok tenkyu” long ol blesing yu kisim. Bilip bilong yumi bai kamap strong moa taim yumi tingim olsem “God inap mekim ol samting i winim tru ol samting mipela i askim o tingting long en.”—Efe. 3:20.

 ¹¹ Ol samting i kamap long Pol na Sailas long Filipai i helpim yumi long tingim ol samting Jehova i mekim bilong helpim yumi wan wan. Maski God i no wokim ol mirakel, em i save helpim yumi long sanap strong long taim bilong hevi. (1 Kor. 10:13) Tasol dispela i no makim olsem yumi stap tasol na wetim Jehova i stretim hevi bilong yumi, nogat. Yumi mas mekim ol samting i stret wantaim beten bilong yumi. (Rom 12:11) Taim yumi mekim olsem, yumi soim gutpela pasin na Jehova bai blesim yumi. Tasol tingim olsem Jehova i no inap mekim tasol ol samting yumi askim em long mekim. Sampela taim em bai mekim ol samting yumi no ting em bai mekim. Yumi ken stori long sampela eksampel bilong Baibel we inap strongim bilip bilong yumi olsem Jehova inap mekim ol narakain samting bilong helpim yumi.

12. (a) King Hesekia i mekim wanem taim King Senakerip bilong Asiria i laik daunim Jerusalem? (b) Yumi kisim wanem skul long samting Jehova i mekim bilong helpim Hesekia?

¹² Taim yumi ritim Baibel, yumi bai kisim save long ol narakain samting Jehova i mekim bilong helpim lain bilong em. King Hesekia i stap taim King Senakerip bilong Asiria i go pait long Juda na kisim ol taun bilong ol, tasol em i no bagarapim Jerusalem. (2 Kin. 18:1-3, 13) Bihain, Senakerip i laik daunim Jerusalem. King Hesekia i mekim wanem? Em i beten long Jehova na askim profet Aisaia long givim sampela edvais long em. (2 Kin. 19:5, 15-20) Na tu, Hesekia i bihainim stretpela tingting taim em i givim mani em Senakerip i askim em long givim. (2 Kin. 18:14, 15) Bihain, Hesekia i redim ol samting bilong banisim Jerusalem long lain ami bilong King Senakerip. (2 Sto. 32:2-4) God i mekim wanem bilong helpim Hesekia? Jehova i salim wanpela ensel na kilim i dai 185 tausen soldia bilong Senakerip insait long wanpela nait tasol. Hesekia i no bin ting dispela samting bai kamap!—2 Kin. 19:35.

13. (a) Yumi kisim wanem skul long stori bilong Josep? (b) God i mekim wanem bilong helpim Sara, em meri bilong Abraham?

¹³ Tingim stori bilong Josep, em yangpela pikinini man bilong Jekop. Taim Josep i kalabus long Isip, em i no bin ting olsem bihain em bai stap gavana bilong kantri Isip, na long rot bilong em Jehova bai helpim famili bilong em long taim bilong bikpela hangre. (Stt. 40:15; 41:39-43; 50:20) Tru tumas, Jehova i mekim ol samting em Josep i no bin ting bai kamap. Tingim tu stori bilong tumbuna mama bilong Josep, em Sara. Sara i lapun pinis, olsem na em i no bin ting olsem em bai karim wanpela pikinini man. Maski i olsem, Jehova i opim rot long em inap karim wanpela pikinini man, em  Aisak. Sara i no bin ting God bai mekim dispela samting long helpim em.—Stt. 21:1-3, 6, 7.

14. Yumi ken bilip tru olsem Jehova bai mekim wanem?

¹⁴ Yumi no holim tingting olsem Jehova bai wokim ol mirakel na pinisim olgeta hevi bilong yumi paslain long nupela taim i kamap, nogat. Tasol yumi save olsem God bilong yumi, Jehova, i bin mekim ol narakain samting bilong helpim ol wokman bilong em long bipo. (Ritim Aisaia 43:10-13.) Dispela i helpim yumi long bilip long God. Yumi save olsem em bai mekim ol samting bilong strongim yumi long inapim laik bilong em. (2 Kor. 4:7-9) Yumi kisim wanem skul long stori bilong Hesekia, Josep, na Sara? Eksampel bilong ol i soim olsem sapos yumi stap gut long Jehova, em bai mekim ol narakain samting bilong helpim yumi.

15. Wanem samting bai helpim yumi long kisim “bel isi bilong God” na karim yet ol hevi? Stori long dispela.

¹⁵ Olsem wanem yumi inap kisim “bel isi bilong God” na karim yet ol hevi? Yumi inap mekim olsem sapos yumi pas gut wantaim God bilong yumi, em Jehova. Yumi inap kamap pren bilong God “long rot bilong Krais Jisas” husat i givim laip bilong em bilong baim bek yumi. Ofa bilong Jisas em wanpela gutpela presen em Papa bilong yumi i givim. Long rot bilong dispela ofa, Jehova i lusim ol rong bilong yumi, maus bilong bel i stap klin, na yumi go klostu long em.—Jon 14:6; Jems 4:8; 1 Pita 3:21.

16. Wanem samting i kamap taim yumi kisim “bel isi bilong God”? Stori long dispela.

¹⁶ Wanem samting i kamap taim yumi kisim “bel isi bilong God i winim tru tingting bilong man”? Baibel i tok olsem bel isi bilong God ‘bai lukautim bel na tingting bilong yumi long rot bilong Krais Jisas.’ (Fili. 4:7) Long bipo, ol i save makim wanpela lain soldia long lukautim ol taun. Filipai em wanpela bilong ol dispela taun. Ol manmeri long taun Filipai i save slip gut long nait bikos ol i save olsem lain soldia i lukautim banis bilong taun. Olsem tasol, “bel isi bilong God” bai lukautim bel na tingting bilong yumi. Jehova i save tingim yumi na em i laik bai yumi stap gut. (1 Pita 5:10) Olsem na dispela i helpim yumi long daunim pasin bilong bel hevi na tingting planti.

17. Wanem samting bai helpim yumi long sanap strong na yumi no tingting planti long ol samting bai kamap bihain?

¹⁷ Klostu nau yumi bai bungim traipela hevi tru, na kain hevi olsem i no bin kamap long bipo. (Mat. 24:21, 22) Yumi no save long wanem samting bai painim yumi wan wan. Tasol yumi no ken tingting planti. Maski yumi no save long olgeta samting Jehova bai mekim long dispela taim, yumi save gut long Em. Jehova i bin helpim ol bilipman long bipo, na dispela i ken strongim bilip bilong yumi olsem oltaim em bai mekim ol samting em i tingting pinis long kamapim, na sampela taim em i mekim long rot em yumi no ting em bai mekim. Maski yumi bungim wanem ol hevi, oltaim Jehova i save strongim yumi, na long dispela rot yumi kisim “bel isi bilong God i winim tru tingting bilong man.”