„ღორონთიშ მშვიდობა . . . ირნერ აზრიშე უმოს რე“ — ფილიპელები 4:7 | ოგურაფალ“
„ღორონთიშ მშვიდობა, ნამუთ ირნერ აზრიშე უმოს რე, დოთხილანს თქვან გურეფს“ (ფილ. 4:7).
ობირეშეფი: 76, 141
1, 2. მუქ აღოლეს პავლე დო სილას ქალაქ ფილიპეს? (ქოძირით სურათ თე გვერდის).
შქასერ რე. ჟირ მისიონერ, პავლე დო სილა, ქალაქ ფილიპეს ციხეს ხენა. თინეფს კუჩხეფ ბორკილ აფნა; ახალ ნალახა რენან თიშენ, დიო ხოლო აჭუნა ოჭიშის (საქ. 16:23, 24). თე ირფელქ ართ უცფას მოხვად! შურო ვა გუფრთხილებნან თეშ, პავლე დო სილა მოედანშა მიდასერგელეს დო სასამართლოს ქეწურინეს. თინეფს ბარგი ქუგასოფეს დო კეტით გოლახეს (საქ. 16:16—22). მუშმადიდა უსამართობა რდუ! მუჭოთ რომიშ მოქალაქე, პავლე ნორმალურ სასამართლოს იმსახურენდ. *
2 პავლე უკმელას ხე; თინა თი დღას მოხვალამირ ამბეფშენ დო ფილიპელ ხალხშენ ხოლო ფიქრენს. შხვა ქალაქეფიშ გინაწონს, ნამუთ პავლექ იძირუნ, ფილიპეს ვა რდუ იუდეველეფიშ სინაგოგა. ათეშგურშენ იუდეველ მორწმუნეეფ ქალაქიშ გალე, წყარპიჯის იშაყარდეს ოლოცებელო (საქ. 16:13, 14). თეშ მიზეზი თინა ხომ ვარდ, ნამდა ქალაქის ვით იუდეველ ქომოლკოჩი ხოლო ვარდ, ნამუთ საჭირო რდუ სინაგოგა ქოჸოფედკონ? ფილიპეშ მახორუ ხალხის ოამაყუდ თინა, ნამდა რომიშ მოქალაქეეფ რდეს (საქ. 16:21). მარა თინეფ ალბათ დღას ვეფიქრენდეს, ნამდა იუდეველ პავლე დო სილა ხოლო შილებედ რომიშ მოქალაქეეფ ჸოფედესკო. მუჭოდგა ვაჸოფედკონ, თინეფ ციხეს უსამართოდ ხედეს.
3. მუშენ შილებედ გეკვირუკო პავლექ მუშ ჭოფუა, მარა მუნერ დამოკიდებულება უღუდ თის?
3 შილებე პავლე წოხოლენ თუთეფს მოხვალამირ ამბეფშენ ხოლო ფიქრენდკო. თინა მციერ აზიას, ეგეოსიშ ზღვაშ მაჟია მხარეს რდუ. თექ წმინდა შურქ მუსხირენშა გაჩერ თინა დო უფლება ვემეჩ იქადაქკო ნამთინე ადგილს. თავრეშე იძირედ, ნამდა წმინდა შურს ოკოდ, თიქ შხვადო იქადაქკონ (საქ. 16:6, 7). მარა კონკრეტულო სო? პავლე ქალაქ ტროას რდუნ თეშ, ხილვა ძირ, სოდეთ ართ მაკედონელ კოჩ ოხვეწუდ: „ქუმორთ მაკედონიაშა“. პავლექ ქიმეხვად, ნამდა თენა იეჰოვაშ ნება რდუ დო გეგნოჭყვიდ თევრე ულა (წეკითხით საქმეები 16:8—10). * მარა მუქ მოხვად თეშ უკულ? მაკედონიაშა გენორთუნ, პავლექ ხეთეშე ციხეს ქუმოხვად. მუშენ დუშვუ იეჰოვაქ თენა დო მუსხი ხანს ოკო იჸუკო თიქ ციხეს? შილებე თე კითხვეფ სვანჯის ვარზენდკო პავლეს, მარა თეშ უმკუჯინუო თის რწმენა დო ხიოლ ვა უდინუაფ. პავლე დო სილა ლოცულენდეს დო განადიდენდეს ღორონც ობირეშით (საქ. 16:25). ღორონთიშ მშვიდობაქ თინეფიშ გურ დო გონება დოთხილუ.
4, 5. ა) მუჭო შილებე ქოგუდას ჩქინ მდგომარეობა პავლეშის? ბ) მუჭო დითირ პავლეშ მდგომარეობაქ შურო ველუდენ თეშ?
4 პავლეცალო, შილებე თქვა ხოლო ფიქრენდით, ნამდა მეჸუნდით ღორონთიშ შურიშ ხემძღვანელობას, მარა ირფელქ თეშ ვა მოხვად, მუჭოთ ელუდით. შილებე პრობლემეფს ქეშეხვადით ვარდა თიცალ სიტუაციას ქუმოხვადით, ნამუშ გურშენ თქვან ცხოვრებას ბრელ მუთუნქ გაჸუეს ოთირალქ (ეკლ. 9:11). მუჟამსით ულირს იშინანთინ, შილებე ფიქრენდათ, მუშენ დუშვუ იეჰოვაქ თე ირფელ. თენა თაშ ქორენ-და, მუ მიგეხვარებნა ბოლოშა მითვინათ დო მიენდათ იეჰოვას? თე კითხვაშ პასუხ მიბღათინ, მორთ კინ დუვართათ პავლე დო სილაშ მაგალითის.
5 პავლე დო სილა ღორონთიშ ოდიდებელ ობირეშეფს იბირდეს თეშ, შურო ველდესინ ფერ მუსხირენ ამბექ მოხვად. უცფას მანგარ მიწისძვრაქ ქუმოხვად დო ციხეშ კარეფქ გინჯუ. არძა პატიმარიშ ბორკილეფქ მიშკვუ. პავლექ ციხეშ უნჩაშ დუდიშ ჸვილუას გინატუ. უმოს გვიანო, თე კოჩიქ მუშ ოჯახწკუმა ართო დინათ. მაჟია დღას, სახელმწიფო მოხელეეფქ მუნეფიშ მსახურეფ ქიმიაშკვეს პავლე დო სილაშა, ნამდა ციხეშე გექთიჸონესკო. თინეფ პავლე დო სილას თხინდეს, ქალაქ მშვიდობიანო ქიდიტესკო. მარა მუჟამსით სახელმწიფო მოხელეეფქ ქიგეგეს, თინეფ რომიშ მოქალაქეეფ რდესინ, მუნეფქ ქიმერთეს ციხეშა, ნამდა გეგნაზარესკო ქალაქშე. მარა პავლე დო სილაქ მითხუეს ულაშახ ახალ ნანათა და, ლიდიას ქეშეხვადესკო დო ჯგირობუა ქუდუჩინესკო. თინეფს თიშ საშვალებაქ ხოლო ქიმიაჩეს, გამანგარესკო თექიან ჯიმალეფი (საქ. 16:26—40). მუშმამალას დითირ ირფელქ!
თინა „არძა აზრიშე უმოს რე“
6. მუს გუვარჩიენთ თე სტატიას?
6 მუს ბგურაფლენთ პავლეშ მაგალითშე? იეჰოვას შეულებ ვეველუთინ თეშ დოთირუას მდგომარეობა, ათეშგურშენ ვებჭირათ ოკო განსაცდელეფიშ დროს. მუშო ოკო რაგად, პავლეშა მანგარო იმოქმედ თე ამბექ. თენა ჯგირო იძირე თი წერილშე, ნამუთ უმოს გვიანო ფილიპელ ჯიმალეფს მეჭარ, სოდეთ წუხება დო ღორონთიშ მშვიდობაშე იჩიებ. მორთ გუვარჩუათ პავლეშ თე სიტყვეფი, ნამუთ ინოჭარ ფილიპელებიშ 4:6, 7 (წეკითხით). * თეშ უკულ ხოლო მუსხირენ ბიბლიურ მაგალითის გუვარჩიენთ, სოვრეშეთ იძირე, მუჭო თირუ იეჰოვაქ მდგომარეობა, მითინ ველუდუნ თეშ. ბოლოს თის ხოლო გუვარჩიენთ, მუჭო მიმეხვარებნა „ღორონთიშ მშვიდობა“ მიფთვინათ დო ბოლოშა ვენდათ იეჰოვას.
7. მუ დაგურუ პავლექ მუშ წერილით ფილიპელ ჯიმალეფს დო ჩქი მუს ბგურაფლენთ თიშ სიტყვეფშე?
7 მუშო ოკო რაგად, ფილიპელ ჯიმალეფ პავლეშ წერილს წეკითხენდესინ, ქუგაშინედეს მუქ აღოლ პავლე დო სილას დო მუჭო დოთირუ იეჰოვაქ თინეფიშ სიტუაცია შურო ველუდესინ თეშ. თე წერილით პავლეს ოკოდ ოგურუკო თინეფს, ნამდა პრობლემეფიშ დროს ვეჭირესკო დო ღორონთიშ მშვიდობაშ მიოღებელო ილოცესკო, მუშენდა „ღორონთიშ მშვიდობა . . . ირნერ აზრიშე უმოს რე“. მუს ნიშნენს თენა? ნამთინე მათარგმნალ თე ფრაზას თარგმნუნს, მუჭოთ „ჩქინ ოცნებეფშე უმოს“ ვარდა „კოჩიშ ირნერ გეგმეფშე უმოს“. პავლეშ სიტყვეფი ნიშნენდ, ნამდა „ღორონთიშ მშვიდობა“ თიშე ბრელით უმოს რე, ვინემ ჩქი აზრო მუმალენა. ჩქინ გინაჯინშე, შილებე პრობლემეფშე გიშაულარ შარა ვეძირედას, მარა იეჰოვა ირფელს ორწყე დო შეულებ შურო ვეველუთინ თეშ დოთირუას მდგომარეობა (წეკითხით 2 პეტრე 2:9). *
8, 9. ა) მუ ჯგირობუაქ მაჸუნ თი უსამართობას, ნამუსით პავლექ შეხვად ფილიპეს? ბ) მუშენ შეულებდეს ფილიპელ ჯიმალეფს ენდესკო პავლეშ სიტყვეფს?
8 ფილიპელ ჯიმალეფს რწმენას გუმანგარენდ თიშე ფიქრი, მუთ იეჰოვაქ აკეთ თე ამბეფიშ უკულ ბოლო ვით წანაშ დინახალე. მუთ პავლექ მეჭარუნ, ირფელ სწორ რდუ. მართალ რე, იეჰოვაქ დოუშვუ უსამართოდ მექცისკო პავლე დო სილას, მარა თეს „სახიოლო ამბეშ დაცვებაქ დო კანონით გამანგარებაქ მაჸუნ“ (ფილ. 1:7). თეშ უკულ სახელმწიფო მოხელეეფი ალბათ ვა გაბედუდეს, მუთუნ დაუშესკო ახალ კრებას ფილიპეს. პავლე დო სილაქ ფილიპეშე მიდართესინ, მოწაფე ლუკას ხოლო შეიალებუ თექ გაჩერებაქ; თეშ მიზეზი შილებე თინა რდუკო, ნამდა პავლექ მუშ დუდ რომიშ მოქალაქეთ მიშინუ. თაშ ნამდა, ლუკას ხოლო ქიმიაჩ საშვალებაქ გურშა ელუკინკო დო გამანგარკო ახალ ნათილ ქრისტიანეფი.
9 მუჟამსით ფილიპელ ჯიმალეფქ პავლეშ წერილ წეკითხესინ, თინეფს უჩქდეს, ნამდა თენა ვარდ მიდგარენ აკადემიკოსიშ ნაჭარა სიტყვეფ, ნამუთ ოფისის ხე. თიქ მუშ დუდშა გიმოცად თხოზინ დო ქაძირუ, ნამდა უღუდ „ღორონთიშ მშვიდობა“. მუჟამსით პავლექ თე სიტყვეფ ჯიმალეფს მეჭარუნ, თინა ჭოფილ რდუ დო ვა უღუდ მუშ ჸუდეშე გიმულაშ უფლება. თეშ უმკუჯინუო, თინა იშენით ოძირანდ, ნამდა „ღორონთიშ მშვიდობა“ უღუდ (ფილ. 1:12—14; 4:7, 11, 22).
„მუთუნშენ ვედიჭყათ ჭირება“
10, 11. მუ ოკო ვაკეთათ მუჟამსით ნაბეტანო იბჭირებუთ დო მუს ოკო ველუდათ?
10 მუ მიმეხვარებნა მუთუნშენ ვებჭირათ დო მიღდან „ღორონთიშ მშვიდობა“? ფილიპელეფშა მეჭარილ პავლეშ სიტყვეფი მოძირანა, ნამდა ლოცვა მიმეხვარებნა, მივერუათ ოჭირებელს. ათეშენ, მუჟამსით ოჭირებელ მიღნან, ქიბლოცათ დო იეჰოვას მივანდათ თინა (წეკითხით 1 პეტრე 5:6, 7). * ლოცვაშ დროს მარდულობა გეგმოხანტით თი კურთხევეფშენ, ნამუთ გიღნა დო რჯერდან, ნამდა იეჰოვა ქიმგეხვარებნა. ჩქინ ნდობა იმანგარებ, მუჟამსით ფშუნა, ნამდა იეჰოვას „შეულებ თიშე უმოს გაკეთას, ვინემ ჩქი ფთხულენთ ვარდა აზრო მუმალენა“ (ეფეს. 3:20).
11 მუჭოთ პავლე დო სილაშ მაგალითშე იძირენ, ჩქი ხოლო შილებე გუმაკვირვან თიქ, მუდგას იეჰოვა ორთ ჩქინო. შილებე თენა თოლშა მალაფარ ვარდას, მარა იეჰოვა ირიათო თის ორთ, მუთ მოსაჭირნა (1 კორ. 10:13). მუშო ოკო რაგად, თენა თის ვა ნიშნენს, კუჩხშა კუჩხი ქიმნიბდვათ, მუთუნ ვა ვაკეთათ დო უბრალოთ უჯინათ, მუჟამ გიშანწყუნს იეჰოვა სიტუაციას ვარდა მაგვარენს ჩქინ პრობლემას. ჩქინ ლოცვეფს საქმეეფ ხოლო ოკო ეკოჸუნდას (რომ. 12:11). ჩქინ გინოდგუმილ ნაბიჯეფ ოძირანს, ნამდა ალალეფ ვორეთ დო თეწკუმა ართო იეჰოვას ვარზენთ საშვალებას, აკურთხას ჩქინ მონდობა. მარა თინა ხოლო მარჩქილენა, ნამდა იეჰოვას შეულებ ბრელით მეტ გაკეთას, ვინემ ფთხულენთ ვარდა ველუთ. მინშა ღორონთ თიცალ მუდგარენს ორთუ, მუსით შურო ვეველუთ. მორთ, გუვარჩუათ მუსხირენ ბიბლიურ მაგალით, ნამუთ გამანგარენს ჩქინ ნდობას, ნამდა იეჰოვას შეულებ თიცალ მუდგარენ გაკეთას ჩქინო, მუდგას შურო ვეველუთ.
იეჰოვა ვეველუთინ ფერ საქმეეფს ორთ
12. ა) მუჭო მიქცუ მეფე ხიზკიაქ, მუჟამსით ასურეთიშ მეფე სინახერიბიქ დარცქინ? ბ) მუს ბგურაფლენთ თევრეშე, მუჭო გინოჭკირ იეჰოვაქ ხიზკიაშ პრობლემა?
12 ბიბლიას ირიათო შეფხვადუთ თიცალ მაგალითეფს, სოვრეშეთ იძირე, ნამდა იეჰოვა ვეველუთინ ფერ საქმეეფს ორთუ. მაგალთო, მეფე ხიზკია ცხოვრენდ თი დროს, მუჟამსით ასურეთიშ მეფე სინახერიბიქ იუდას ქიგიანთხ დო იერუსალიმიშ მეტ არძა გამანგარებულ ქალაქი გეჭოფ (2 მეფ. 18:1—3, 13). თეშ უკულ თიქ იერუსალიმიშ ეჭოფუა ხოლო მინდომ. მუჭო მიქცუ მეფე ხიზკიაქ, მუჟამსით ასურეთიშ მეფე სინახერიბიქ დარცქინ? თიქ იეჰოვას მიმართ ლოცვათ დო თიშ წინასწარმეტყველ ესაიას ქელაკითხუ, მუჭო მიქცუკო (2 მეფ. 19:5, 15—20). თეშ გალე ხიზკია მზათ რდუ, გინიგუკო გინაგაფალ, ნამუთ სინახერიბიქ თის გიოდვ (2 მეფ. 18:14, 15). თეს გეძინელ, თიქ ბრელ ხანიან ალყაშო ხოლო მემზად (2 მატ. 32:2—4). მარა მუჭო გინოჭყორდ თე ამბექ? იეჰოვაქ მუშ ართ ანგელოზით ართ სერიშ დინახალე სინახერიბიშ 185 000 ჯარიშკოჩ გოჭყვიდ. მუშო ოკო რაგად, ხიზკია შურო ველუდკონ იჸიდ, ნამდა თე ამბე თაშ გეგნოჭყორდუდ (2 მეფ. 19:35).
მუს ბგურაფლენთ იოსებიშ მაგალითშე??—(დაბ. 41:42). (ქოძირით აბზაცი 13)
13. ა) მუს ბგურაფლენთ იოსებიშ მაგალითშე? ბ) მუ აკეთ იეჰოვაქ სარაშო დო მუშენ ველუდ თინა თეს?
13 დეფიფქრათ იაკობიშ სქუაშ, ახალგაზრდა იოსებიშ მაგალითშე ხოლო. მუჟამსით იოსები ეგვიპტეს ციხეს ხედუნ, ალბათ აზრო ხოლო ვამალედ, ნამდა ფარაონიშ უკულ მაჟია კოჩ იჸუაფუდ ვარდა იეჰოვა თის გეგმირინუანდ, მუშ ოჯახი შკირენაშე ირსხუკონ (დაბ. 40:15; დაბ. 41:39—43; 50:20). მუშო ოკო რაგად, იეჰოვაქ თიცალ მუდგარენ აკეთ, მუდგასით შურო ველუდ იოსებ. დეფიფქრათ იოსებიშ პეპიშ, სარაშე მაგალითშენ ხოლო. ქელუდუო ხანშა მიშულირ სარა, ნამდა იეჰოვა დუშვენდ ქაშუკო სქუაქ? დო ვარ ხვალე თიშ იმენდი უღუდ, ნამდა მუშ მოინალე გეურჩქინანდ სქუას? ისაკიშ დაბადებაქ მანგარო გაკვირვ სარა, მუშენდა თენა თიშე უმოს რდუ, ვინემ წარმოდგენილ აფუდ (დაბ. 21:1—3, 6, 7).
14. მუს ოკო ვორდათ დარწმუნებულ პრობლემეფიშ დროს?
14 ჩქი ვეველუთ, ნამდა დუნაპირებ ახალ ქიანაშახ იეჰოვა ჩქინ არძა პრობლემას მაგვარენს; ვართ თის იფთხინთ, მუდგაინ განსაკუთრებულქ ქუმოხვადას ჩქინ ცხოვრებას. მარა ბჯერა, ნამდა ღორონთი, ნამუთ მუშ მსახურეფს სასწაულო ოხვარუდუნ, ჩქინ ღორონთ რე (წეკითხით ესაია 43:10—13). * თენა მოხვარნა, დარწმუნებულ ვორდათ, იეჰოვა მუთ საჭირო რენ, ირფელს გაკეთენს თიშო, ნამდა გუმამანგარან დო შევასრულათ თიშ ნება (2 კორ. 4:7—9). მუს მოგურუანა თე ბიბლიურ მაგალითეფ? ხიზკიაშ, იოსებიშ დო სარაშ მაგალითეფ მოძირანა, ნამდა ართგურეფ ქიპჸუაფუთ-და, იეჰოვას შეულებ ქიმმეხვარან დო არძაშ უმოს რთულ სიტუაციაშე ხოლო გეგშამჸონან.
ართგურეფ ქიპუაფუთ-და, იეჰოვას შეულებ ქიმმეხვარან დო არძაშ უმოს რთულ სიტუაციებშე ხოლო გეგშამიონან.
15. მუ მიმეხვარებნა მიღდან „ღორონთიშ მშვიდობა“ დო მუჭო რე თენა შეიოლებერ?
15 მუჭო შემლებნა ვა ვოდინუათ „ღორონთიშ მშვიდობა“ პრობლემეფიშ დროს? თეს მიმეხვარებნა იეჰოვა ღორონთწკუმა ჯგირ ურთიერთობა. თეცალ ურთიერთობა ხვალე იესო ქრისტეშ ჭყოლოფუათ რე შეიოლებერ, ნამუქით მუშ სიცოცხლე დათმუ ჩქინ ცოდეფიშ გიშაჸიდირალო. გიშაჸიდირალ ართ-ართ რე თი დიდებულ საქმეეფშე, ნამუთ ჩქინ ზეციერ მუმაქ აკეთ. იეჰოვა გიშაჸიდირალით მაპატიენა ცოდეფს დო თეშ ჭყოლოფუათ ჩქი შემლებნა მიღდან სუფთა სინდის დო ღორონთწკუმა ხოლოშიან ურთიერთობა (იოან. 14:6; იაკ. 4:8; 1 პეტ. 3:21).
თინა დოთხილანს ჩქინგურს დო გონებას
16. მუ მაჸუნუ თის, მუჟამსით ქუმმაჩამუნა „ღორონთიშ მშვიდობას? (ქიმიჸონით მაგალით).
16 მუ მაჸუნუ თის, მუჟამსით ქუმმაჩამუნა „ღორონთიშ მშვიდობა, ნამუთ ირნერ აზრიშე უმოს რე“? მუჭოთ ბიბლია რაგადანსინ, თენა „დოთხილანს თქვან გურეფს დო გონებას ქრისტე იესოთ“ (ფილ. 4:7). ორიგინალ ნინაშე გინოთარგმნილ სიტყვა „თხილუა“ ჯარიშ ტერმინ რდუ. თე სიტყვა ოხუდ ჯარიშკოჩეფს, მიდგას ჯვეშ დროს გამანგარებულ ქალაქიშ თხილუა ოვალუდ. ფილიპე თეცალ ქალაქ რდუ. თექ მახორუ ხალხის გემუანო ლურდ, მუშენდა უჩქდეს, ნამდა ქალაქიშ მინაულარს ჯარიშკოჩეფ გერდეს დო თხილანდეს. თეგვარო, ჩქინ გურ დო გონება ხოლო თხილერ იჸი, მუჟამსით მიღნა „ღორონთიშ მშვიდობა“. მიჩქნა, ნამდა იეჰოვა ღორონთი ზრუნენს ჩქინო დო ოკო ცხოვრებას წიმოძინა მიღდან (1 პეტ. 5:10). თეშ რჩქინა მოხვარნა ოჭირებელქ დო გურიშგოტახუაქ ვაგმორჯგინან.
17. მუ მიმეხვარებნა ვენდათ იეჰოვას დიდ გაჭირებაშ დროს?
17 მალას ქიდიჭყაფუ დიდ გაჭირება, ნამუთ დღას ვაჸოფე დო ვა უძირ კაცობრიობას (მათ. 24:21, 22). ჩქი ზუსტას ვამჩქუნა, მუჭო შემეხებნა თე ირფელ თითოულს. მარა თეშ გურშენ ნამეტანო ოკო ვებჭირათ. მართალ რე, ზუსტას ვამჩქუნა, მუს ქიმინუნს იეჰოვა, მარა ჩქი ჯგირო იფჩინენთ ჩქინ ღორონთც. თი საქმეეფშე, ნამუთ ჯვეშო ღორონც უკეთებუნ, იძირე ნამდა მუდგაქ ვამოხვადასინ, თინა ირიათო მიოჭირინუანს მუშ მიზანს დო მინშა თეს შურო ვეველუთინ თეშ ორთუ. ირფელ მუდგას იეჰოვა ჩქინო ორთუნ, მარზენა საშვალებას, მიღდან „ღორონთიშ მშვიდობა, ნამუთ ირნერ აზრიშე უმოს რე“.
^ აბზ. 1 საეგებიოთ, სილა ხოლო რომიშ მოქალაქე რდუ (საქ. 16:37).
^ აბზ. 3 საქ. 16:8—10: 8 ათეშენ მისია მიკილეს დო ტროაშა გენორთეს. 9 სერით პავლეს ხილვა უღუდ: მიდგარენ მაკედონელ კოჩი ოხვეწუდ, ქუმორთ მაკედონიაშა დო ქიმმეხვარითია. 10 თე ხილვა ქოძირუნ, ხეთეშე მაკედონიაშა გეგნობჭყვიდით ულა, მუშენდა ქიმეფხვადით, ნამდა ღორონთიქ გიმოწურეს, თინეფშა სახიოლო ამბე გეგნომჩამდესკო.
^ აბზ. 6 ფილ. 4:6, 7: 6 მუთუნშენ ვედიჭყათ ჭირება, არძა თქვან ოთხუალ ლოცვათ, ხვეწინით დო სიმარდულით ქოუწით ღორონც 7 დო ღორონთიშ მშვიდობა, ნამუთ ირნერ აზრიშე უმოს რენ, დოთხილანს თქვან გურეფს დო გონებას ქრისტე იესოთ.
^ აბზ. 7 2 პეტ. 2:9: უჩქ იეჰოვას, მუჭო ირსხას გაჭირებაშე ღორონთიშ ართგურეფ დო უმართოეფი გეგნოჩუას სასამართლოშ დღაშო, ნამდა განადგურას თინეფ.
^ აბზ. 10 1 პეტ. 5:6, 7: 6 ათეშენ დედაბალით დუდ ღორონთიშ ძალიერ ხეშ თუდო, ნამდა მუშ დროს აგამაღალან, 7 დო არძა თქვან ოჭირებელ თის მიანდით, მუშენდა თინა ზრუნენს თქვანო.
^ აბზ. 14 ეს. 43:10—13: 10 თქვა რეთ ჩქიმ მოწმეეფი, — იჩიებ იეჰოვა, — ჩქიმ მსახურ, ნამუთ მა გიშებგორ, ნამდა გიჩქუდესკო დო რჯერდესკო ჩქიმ დო ქუგოხვადითკო, ნამდა მა კინ თინა ვორექ. ჩქიმშახ ვა ჸოფე ღორონთი დო ვართ ჩქიმ უკულ იჸუაფ. 11 მა, მა ვორექ იეჰოვა დო ჩქიმ მეტ მითინ ვა რე მარსხებელი. 12 მა ბრაგადანდ, იბრსხენდ დო ვოგებაფუანდ, მუჟამსით თქვან შქას ვა რდუ შხვა ღორონთი. თაშ ნამდა, თქვა რეთ ჩქიმ მოწმეეფი, — იჩიებ იეჰოვა, — დო მა ღორონთი ვორექ. 13 მა ირიათო კინ თინა ვორექ დო მითინს ვადარსხინე დუდი ჩქიმ ხეშე. მოქმედებას ქიდიბჭყანქინ, მის ეწარინე ჩქიმ ხეშა?
