“ABAN úguchili wuribati buguya —liña lariñagun súdara nun—. Aba bígirunu bisaani tuma bani weiriou to dageinaboun. Kaba anuriahaña ani kaba óunigiraña? Ígirabei bani relihión ani ábame bidin búbiñoun”. Ábati nóunabuni: “Mama au ígirubaliña niduheñu. Huguya adaürübalina. Kati nidurunbei?”. Aba lóunabunina súdara: “Úati duru wéiritimati luéi aban ban Gefenti”.

Susereti katei le lidan irumu 1959 tidan aban furisun Irkutsk, Rusia. Dandu nani weiriou kei au aranseediwa meha lun úaragua wamá lun Heowá luma lun wasufurirun “ladüga surú lan [wa]bagari” (1 Fe. 3:13, 14). Ani biní lumutiwa Bungiu. Nabahüdaguaali wabagari hun.

Lidan irumu 1933 nasirua nan lidan aban uburugu lani Ukürania gíriti Zolotniki. Gefentiña meha luagu Heowá niyauritenu, Faransu meha hawinwanda, ñǘbuintiña abisidahawa lidan irumu 1937 ani aba híchugun bián líburu woun to meha gíriboun Gobierno tuma Liberación, tadügün Sociedad Watch Tower. Ábanya lafiñerun núguchi luagu Bungiu dan laliihanbarun líburu burí to. Híruti aba lan lasandirun lidan irumu 1939. Gama lumoun, aba lariñagun tun núguchu lubaragiñe lounwen: “Anihán inarünibei. Arufudahabei houn wasaanigu”.

Lidan gádürü-hati irumu 1951, aba hagumeserun gumadimatiña abugaña Gefentiña ha meha awinwandubaña luagu oubaü le ñéingiñe lubéi lálüda weyu lidan Unión Soviética, lun Siberioun. Bugá hamutu núguchu, au luma Grigory le namulen Uküraniagiñe. Chülütiwa lidoun aban uburugu gíriti Tulun Siberia lárigiñe waweiyasuhan lóugiñe 6,000 kilómeturu (3,700 maili) tidan íngiini. Chülüti Bogdan le níbugaña bián dimaasu lárigiñe lidoun aban fulasu le ñein lubéi hafosurúa gürigia lun hawadigimaridun yarafa lun uburugu Angarsk. Siádiwaali meha lun lawadigimaridun ñein wein-seingü irumu.

Apurichihatu meha núguchu, au luma Grigory le namulen lidan fulasu burí le hárügüdübei gürigia gudemetiña lun hadügünun haban ñein, gama lumoun, mosu meha wáluahan ida luba lan wachülürün houn gürigia. Kei hénpulu, aba meha wálügüdüniña gürigia: “Subuditi san somu gürigia hun le busenbei lalugurun aban bágasu?”. Ánhawa meha adarira somu gürigia le busenbei lalugurun aban bágasu, aba meha wayanuhan lun luagu lubuidun ligaburi hadügǘniwa animaalugu ha. Murusun dan lárigiñe aba meha wayanuhan luagu le Adügübarun. Abürühatu meha aban periodiku lidan dan ligía aba lan hálügüdahan Gefentiña hawagu bágasu, ani le linarün katei, mudún meha háluahabaña. Daritiwa saragu gürigia darangilutiña ha ítarabaña kei mudún. Gúndaatiwa meha waturiahanu Bíbülia hama gürigia gíchigaditiña ani ǘnabugutiña hagía. Uguñe weyu, añahein hóugiñe san apurichihatiña ñein lidan aban damuriguaü.

Aba tasubudiruni Maria inarüni Ukürania lidan lidaani Libiaman Wuribu Wéiriti. Dan le 18 lubéi irumu tau, aba lagumeserun aban súdara éibuga tárigi ladüga busén lan meha tarounrun luma, gama lumoun, súnwandan meha tariñagun lun madügün tubéi lan. Aba weyu, dan le tagiribudunbei túbiñoun, aba tadariruni wügüri ligía roun tigabanarugu. Aba táfuridun Maria éibaagueina. Kei aba lubéi lagañidun súdara, aba lariñagun tun tadaürǘba lan ladüga gefén tan luagu Heowá. Ani ligía asuseredubei, lidan irumu 1952 siádiwatu lun terederun 10 irumu furisunrugu. Aba tasandiragun tungua kei Hosé le adaürǘbei ladüga úaragua lan meha lun Heowá (Agu. 39:12, 20). Ariñagati le anügübarun Maria ligibugiñegiñe liñun-agei lúrudu lun furisunrugun tun: “Manufudedabá, gíbeeña gürigia ebelurutiña furisunrugun ani adügatiña lun inebewa hamá”. Ruti dimurei ligía erei tun Maria.

Lúmagiñe irumu 1952 darí 1956 rédeitu Maria lidan fulasu le ñein lubéi hafosurúa gürigia lun hawadigimaridun yarafa lun uburugu Gorki (le gíribei guentó Nizni Nóvgorod) Rusia. Aba meha hafosurunu lun táhulahanu tídibu wewe lábugiñe lanarime lidiliga, ligía aba lubéi tasandirun. Aba hígiragüdünu lidan irumu 1956 ani aba hóunahanu Tulun.

Aba lariñagun aba íbiri nun tachülürüba lan aban íbiri Tuluoun, ligía aba lubéi nidin tidan beiki ñein lubéi tararamagua busu lun neresibirunu luma lun níderagunu tau tílagu. Hínsiñegubeitu Maria nun lúmagiñe narihinu. Lau sun hénrengu lan yebe lun tánharun nun, lárigiñe aba tánharun nun. Maríeitiwa lidan irumu 1957 ani aban irumu lárigiñe aba nasirua tan Irina to wasaani. Wéiriti meha wagundan, gama lumoun madurati ugundani ligía, ladüga aba nadaürǘn lidan irumu 1959 ladüga imprimírü nan agumeiraguagüdüni tídangiñetu Bíbülia. Sísiñein hati nau tidan aban rumu nábugua. Lun darangilu nan, sagü meha dan nafurieiduña, eremuha au uremu lun nalawahani Heowá ani ábaha nasaminarun napurichihaña lan bóugudi tuéi furisun.

Dan le meha hálügüdaguñadina lan furisunrugu, aba lagúaragun aba súdara nun: “Málühaña buregua wamá sun gefentiña luagu Heowá kei haburechawagún garadun!”. Aba nóunabuni: “Ariñagati Hesusu luagu lapurichihóuba lan uganu buiti lánina Larúeihan Bungiu lidan sun ageiraü, ani siñabei hararamuni ni aban”. Lárigiñe, aba lasansiruni ligaburi layanuhan ani busenti meha ladügün lun nígiruni nafiñen, ítara kei nabahüdahani furumiñe. Kei le madügün lubéi asiadirúni ni hariñagun nun gayaraabei lan nagiribudun núbiñoun lun nígiruni nafiñen, aba hasiadirunina lun nawadigimaridun sedü irumu lidan fulasu le ñein lubéi hafosurúa gürigia lun hawadigimaridun lidan uburugu Saransk. Dan meha nídiña lubéi lidoun fulasu ligía aba níchugun fe nasirua tan Olga to tibiaman nisaani. Íbini dise nan meha hawéi niduheñu, gúndaatina meha lau nasubudiruni úaragua nan lun Heowá tau sun nani weiriou.

Ñǘbuintu meha Maria arihana aban wéiyaasu luagu irumu, lau sun duusu lan meha weyu lidura wéiyaasu ligía tidan íngiini. Súnwandan meha tanügün aban feru sabadu iserigiru nun lun nawadigimaridun ani aba meha taramudunu Garüdia Atalaya tótima iserigiruboun turageirügü sabadu. Haritagua nágili lau ínsiñeni tiabin Maria arihana hama bián wasaanigu. Aba tañuludagun nanigi dan narihinbaliña.

Furitina lídangiñe fulasu le ñein lubéi hafosurúa gürigia lun hawadigimaridun lidan irumu 1966, ani aba náguyun hama niduheñu lidoun uburugu Armavir yarafa  lun barana Wuriti. Ñein nasirua hamá wasaanigu Yaroslav luma Pavel.

Murusun dan lárigiñe, aba hagumeserun súdaragu achachihoun waban áluaha agumeiraguagüdüni tídangiñetu Bíbülia. Áluahatiña meha lidan sun fulasu íbini lidan heigin bágasu. Aban weyu, buinñu tiña meha hadaüragun súdaragu lau kaliki ani hárouga meha houn. Aba hagudemedagun tun Maria ladüga subudi tani hadügüñein lan meha le ariñawagúbei houn. Ligia aba lubéi tíchugun somu katei houn lun hatun ani aba tanügün duna lidan aban ágeidinaü tau gamisa barǘ tuguya aban tarumadahagüle ílagu. Dan lachülürünbei hábuti súdaragu aba habahüdahani lun buidu lan wóuseruniña. Dan lídinbei hábuti súdaragu aba láhayachun ani aba layouragun woun. Gúndaatiwa dan le warihini le gayaraabei lasuseredun dan le wáfaagun lun wagañeiruni “wuribani lau buiti” (Rom. 12:21).

Lau sun aba lan hasigirun achachiha, sigitiwa apurichiha Armavir. Íderagua wamuti giñe aban liraüraü sétanu hani apurichihatiña lidan uburugu yarafati le gíribei Kurgáninsk. Lau ugundani nariñagei aniheinhali lan sisi damuriguaü Armavir luma gádürü Kurgáninsk.

Lidan sun irumu burí ligía, anihein meha dan ledebilidun wafiñen. Rútiwa seremei lun Heowá lau layusuruniña íbirigu ha úaraguatiña lun hadundehaniwa luma lun hederebudagüdüni wafiñen (Sal. 130:3). Hénrenguti meha giñe weseriwidun lun Heowá úara hama súdaragu ha adügagubaña houngua keisi Gefentiña lidan damuriguaü. Apurichihatiña saragu ani genegeti meha hínsiñe lan inarüni houn. Añahein giñe meha amu resibitiña somu dasi lidan damuriguaü. Gama lumoun, lau lásügürün dan aba wíchugun fe kátaña lan.

Ábaya tadageinadun María lidan irumu 1978 dan le 45 lubéi irumu tau. Kei le sandi tubéi meha tanigi, saminatiña meha surusiagu lídanñein lan meha denchaü tibagari ani aba hayanuhan tuma lun taragachuni tisaani. Máhatu tadügüni katei ligía. Ábati desidírü hamá fiú surusiagu hasigirunu tidan sun háspitali lau agusa lun hímirunu lun tágurahan lubaragiñe dan. Aba tanurahan Maria háspitalirugugiñe lun tesefuruni wasaani.

Kei aba lubéi habugaguniwa súdaragu uburugugiñe, aba woudin lidoun aban fulasu le meha yarafabei lun uburugu Tallin, Estonia, le meha lídanbei Unión Soviética. Lau sun le meha hariñagubei surusiagu, aba tágurahan Maria aban irahü buiti látuadi, le unbei wagúara Vitaly.

Murusun dan lárigiñe aba wígiruni Estonia aba woudin Nezlobnaia luagun suru Rusia. Apurichihatiwa meha lau duari lidan fulasu le meha yarafabei woun, ani chülütiña meha saragu gürigia ñein ha sanditiña hama ha ebeluhatiña. Chülütiña meha gürigia ha lídangiñetiña sun ageiraü ñeinhin lau emenigini luagu hareidaguba lan, gama lumoun, giributiña hemenigiñu luagu hawinwanduba lan lun súnwandan.

Áfaaguatiwa lun wíderaguniña wasaanigu lun línsiñedun Heowá houn luma lun heseriwidun lun tau sun hanigi. Héchutiwa meha amisuraha Gefentiña ha íchugubaña buiti hénpulu houn wasaanigu. Seriwiti meha Grigory le namulen kei óunigiruti sirkuitu lúmagiñe irumu 1970 darí 1995 ani gachülühaditi meha ebeluha wamoun. Gúndaatiwa meha dan le lachülürün wábiñe ladüga gúndaañu liña meha súnwandan ani adügati meha lun héherahan ha híbiri. Adügatiwa meha huraraü tídangiñeti Bíbülia hamá  ha wamisurahabaña, ani ídehati meha katei ligía lúntima línsiñedun abahüdaguni tídangiñeti Bíbülia houn wasaanigu.

Lidan irumu 1987 aban lidin Yaroslav le wasaani eseriwida Riga, Letonia, le ñein lubéi gayara lan meha lapurichihan lau darangilaü. Kei maha lubéi meha lasudarahan aba ladaürǘn luagu aban irumu dimí. Lidan dan ligía, sügüti tídangiñe nefu furisun. Íderagua lumuti le meha nabahüdahabei lun luagu le nawinwandubei furisunrugu lun lawandun. Dan lárigiñe, aba leseriwidun kei prekursoru. Lidan irumu 1990, disi-nefu meha irumu lau Pavel ani busenti meha lidin eseriwida kei prekursoru Sajalín, aban ubouhu luagu nórute Hapón. Mabuidunti meha warihini saminaü le furumiñe. Weinrügüñanu meha apurichihatiña lidan ubouhu ligía ani lóugiñe 9.000 kilómeturu (5.500 maili) lidise ñéingiñe lubéi weredera. Lárigiñe, aba wígirun lun lidin. Aba meha katei buiti lira. Óunabatiña gürigia lun uganu lánina Larúeihan Bungiu. Lidan fiú irumu, aniheinhali meha 8 damuriguaü ñein. Apurichihati Pavel ñein darí irumu 1995. Luagu burí irumu ligia, Vitalyrügüñein, le wasaani le nibureintimagilibei, eredera wama wábiñe. Lúmagiñe liñüraü hínsiñeti meha lun laliihanu Bíbülia. Katorusu meha irumu lau dan le lagumeserunbei eseriwida kei prekursoru, ani aba giñe nadügüni úara luma luagu bián irumu. Buiti meha dan burí ligía. Dan le lagunfulirunbei Vitaly disi-nefu irumu, aba lidin múnadagiñe lun leseriwidun kei prekursoru espechaliti.

Lidan irumu 1952 aba meha lariñagun aban súdara tun Maria: “Ígirabei bafiñen, anhein madügün ban básügürüba diisi irumu furisunrugu. Danme báfuridun, wéiyaadibume ani bábuguarügübadibu”. Gama lumoun, mítaranti lasuseredun katei. Dandu Maria kei au sandí wamaali línsiñehabu Heowá, hínsiñehabu wasaanigu luma hínsiñehabu sun ha únbaña warufudahei inarüni. Buiti giñe wabisidahani sun fulasu le ídanbei heseriwida wasaanigu ladüga ariha wamuti eteingiruni le hasandirubei sun íbirigu ha únbaña harufudahei inarüni.

Lidan irumu 1991 aba lánharun lúrudu lun hawadigimari gefentiña luagu Heowá. Adügati katei ligía lun lawanserun apurichihani. Darí lun aba lan hagañeihan íbirigu aban busu lun houdin apurichiha sagü dimaasu lidan burí aüdü luma uburugu le yarafabei.

Wéiriti nugundan ladüga dandu Yaroslav tuma Alyona, to lani weiriou, kei Pavel tuma Raya, to lani weiriou, nadagimeintiña Betelirugu. Leseriwiduña giñe Vitaly tuma Svetlana, to lani weiriou, kei óunigiruti sirkuitu. Yámani teredera Irina luma Vladimir le tani weiriei hama 3 hasaanigu ha eseriwidubaña kei wéiyaaña lidan afiñeni. Estonia teredera Olga ani watu nun estodi. Híruti aba lan tounwen nani weiriou lidan irumu 2014. Nayumahaña lunya narihinu danme le táguyugun. Guentó Bielgorod neredera ani íderagua hamutina íbirigu ha lídanbaña nani damuriguaü.

Furendeihadina lidan burí sun irumu le hénrengu lan wakipurun úarani lun Heowá, gama lumoun, aban katei gebegiti ani móubati darangilaü le líchugubei Bungiu. Resibihadiwa saragu abiniruni lóugiñe le meha wagurabahabei ladüga wawanduni óuchawaguni. Lubaragiñe lafareinragun Unión Soviética lidan irumu 1991, añahein meha lóugiñe 40,000 apurichihatiña ñein. Uguñe weyu lidan burí ageiraü le meha lídanbei Unión Soviética añaheinhaña hóugiñe 400,000 apurichihatiña. Guentó 83 irumu nau ani anaheingua eseriwida kei wéiyaali lidan afiñeni. Ru lumuti Heowá erei le nemegeirubei nun lun nawandun. Furanguti rúhali lan Heowá saragu afayeiruahaü nun (Sal. 13:5, 6).