ОФИСЕРЕ КГБ * сәр мьн кьрә ԛарини: «Тӧ бавәки берʹәʹм и. Тә жьна хԝәйә гьран тʹәви ԛиза хԝәйә бьчʹук һиштийә. Кʹе ԝе ԝана хԝәй кә? Бьньвисә кӧ тӧ баԝәрийа хԝә дьһели у һәрʹә мал!» Мьн щаба ԝи да: «Мьн нәфәред хԝә нәһиштийә, әва ԝә мьн гьртийә! Ле сәва чь?» Офисер жи перʹа-перʹа щаба мьн да: «Һун Шәʹдед Йаһоԝа жь һәр ԛачахи хьрабтьр ьн».

Әв йәк кәледа ԛәԝьми сала 1959-да шәһәре Иркутскеда, (Урьсет). Әз дьхԝазьм ԝәрʹа гьли кьм кӧ чьрʹа әз у жьна мьн Мариа һазьр бун «бона рʹастийе» щәфе бьвиньн, у чаԝа мә сәва амьнийа хԝә гәләк кʹәрәм сьтандьн (1 Пәт. 3:13, 14).

Әз ԝәлате Украинеда һатьмә буйине сала 1933-да, гӧнде Золотникида. Сала 1937-да хатийа мьн у мере ԝе, кӧ Шәʹдед Йаһоԝа бун, жь Франсайе һатьбунә мала мә. Ԝана мәрʹа кʹьтеба «Сәрԝерти» у «Хьлазкьрьн» анибун, кʹижан кӧ Щьвака Бьрща Ԛәрәԝьлийе нәшьр кьрьбу. Чахе баве мьн әв кʹьтеб хԝәндьн, баԝәрийа ԝи һьндава Хԝәде ча бежи һʹьшйар бу. Ле йазьх, сала 1939-да баве мьн гәләк нәхԝәш кʹәт, у чахе бәр мьрьне бу әԝи дийа мьнрʹа гот: «Әԝ ә рʹасти, у зарʹа жи һин кә».

Мәһа Нисане сала 1951-да, сәрԝеред дәԝләте Шәʹдед Йаһоԝа аксор дькьрьн дьшандьнә Сибирйайе, жь USSR йа рʹоавайе (USSR әв һәйә Йәктийа Кʹомаред Совйәт йед Сосйалист). Әз, дийа мьн у бьре мьни бьчʹук Григори жь Украине аксор кьрьн. Әм 6 000 км пе трене чунә шәһәре Тулун, (Сибирйа). Ле дӧ һʹәфте шунда, бьре мьни мәзьн Богдан шандьнә кампе. Әԝ камп незики шәһәре Ангарске бу, у 25 сал данә ԝи кӧ хәбата гьран бькә ԝедәре.

Дийа мьн, әз у Григори, мә хьзмәт дькьр гӧндед дорбәре шәһәре Тулуне, ле әм гәрәке фәсал у сәрԝахт буна. Мәсәлә, мә пьрсәкә ӧса дьда мәрьва: «Ԛә кәсәк ԝьра чʹеләка дьфьрошә?» Гава мә кәсәк дьдит кӧ чʹеләка дьфьрошә, мә ԝи мәрьвирʹа дьгот кӧ чʹеләк чьԛас әʹщебмайи һатьнә әʹфьрандьне. Паше мә дәстпедькьр дәрһәԛа Әʹфьрандар хәбәр дьн. Ԝи ԝәʹдәйи, дәрһәԛа Шәʹдед Йаһоԝа рʹожнәʹмеда һатә ньвисаре кӧ әԝана йанчь чʹеләка дьгәрʹьн, ле бь рʹастийе пәза дьгәрʹьн! У рʹасти жи мә мәрьвед ӧса дитьн, йед кӧ рʹасти ԛәбул кьрьн. Һинбуна Кʹьтеба Пироз тʹәви ԝан мәрьвед дьлсах у меванһʹьз ӧса хԝәш бу. Иро Тулунеда щьватәк һәйә, кʹижанеда 100 мьзгинвана зедәтьр һәнә.

Жьна мьн Мариа, ԝәʹде Шәрʹе Һʹәмдьнйайе йа дӧда рʹастийе педьһʹәсә. Чахе әԝ 18 сали буйә, офисерәки КГБ дәстпедькә ԝе әʹщьз кә у дьхԝазә бенамусийе тʹәви ԝе бькә. Ле Мариа ԛәԝи сәр йа хԝә дьсәкьнә у ԛайил набә. Щарәке, чахе Мариа вәдьгәрʹә мал, дьвинә ԝәки әв мерьк сәр ньвине ԝе вәләзийайә, әԝ дәрберʹа дьрʹәвә. Әв офисер бь һерс ле дьдә тьрсандьне кӧ ԝе ле бькә кәле, чьмки әв Шәʹде Йаһоԝа йә, у ӧса жи дьбә. Сала 1952-да, Мариа сәр дәһ сала дькьнә кәле. Әԝе хԝә мина Усьв тʹәхмин кьрьбу, йе кӧ бона амьнийа хԝә кʹәтьбу кәле (Дәстп. 39:12, 20). Ажован, йе кӧ Мариайе жь диԝане бьрьбу кәле, жерʹа готьбу: «Нәтьрсә. Гәләк мәрьв йед кӧ кʹәтьнә кәле, нав-намус дәркʹәтьнә». Мариа бь ԝан гьлийа гәләк ԛәԝи бьбу.

Жь сала 1952 һʹәта сала 1956, Мариа Урьсетеда дькʹәвә кампе кӧ незики шәһәре Горски бу (ньһа Нижни Новгород те навкьрьне). Әԝ ԝедәре хәбатәкә гьран дькьр, баха кʹокева дәрдьхьст һәла һе сӧрʹ-сәрмеда жи. Сәва ве йәке, сьһʹәт-ԛәԝата ԝе хьраб бьбу, ле сала 1956-да әԝе аза дькьн у әԝ дәрбази Тулуне дьбә.

Чахе бьраки мә жь Тулуне готә мьн ԝәки хушкәкә мә те, әз пе бисиклета хԝә чумә щийе сәкьнандьна отобуса сәва рʹасти ԝе бем у али ԝе бькьм һур-муре ԝе биньм. Чахе мьн Мариа дит, һәма ве дәме дьле мьн кʹәте. Рʹаст бежьм, нәһеса бу дьле ԝе бькʹьрʹьм, ле мьн йа хԝә кьр. Сала 1957-да мә һәв станд. Саләк шунда мәрʹа ԛизәк бу, мә наве ԝе дани Ирина. Ле шабуна мә дьреж нәкʹьшанд. Сала 1959 әз һатьмә гьртьне чьмки мьн әʹдәбйәтед сәр һʹиме Кʹьтеба Пироз нәшьр дькьр. Әз нив сали отʹаха кәледа тʹәне бум. Сәва әʹдьлайи дьле мьнда ӧнда нәбә, мьн тʹьме дӧа дькьр, кʹьламед Пʹадшатийе дьстьра, у дьда бәр чʹәʹве хԝә, кӧ әме ча хьзмәт кьн чахе әз жь кәле дәрем.

Чахе әз кәледа бум, щарәке әԝе кӧ шьхӧле мьн леколин дькьр, сәр мьн кьрә ԛарʹини у гот: «Зутьрәке әме ԛьрʹа ԝә һʹәмуйа биньн, чаԝа мьшка сәр пола дьпʹәльхиньн!» Ле мьн жерʹа гот: «Иса готийә ԝәки әв мьзгинийа Пʹадшатийе ԜЕ һʹәму мьләтарʹа бе бәлакьрьне, у тʹӧ кәс нькарә әви шьхӧли бьдә сәкьнандьне». Паше әԝи дьхԝәст бь щурʹәки дьн мьн бьдә тьрсандьне у шкенандьне, чахе гот ԝәки баԝәрийа хԝә бьһельм, чаԝа мьн сәрида гьли кьр. Чахе әԝи дит ԝәки әз сәр йа хԝә мә, һʹәфт сал данә мьн кӧ кампеда хәбата гьран бькьм. Әв камп незики шәһәре Саранске бу. Рʹева әз пеһʹәсийам, ԝәки ԛиз мәрʹа бу, мә наве ԝе дани Олга. Рʹаст ә әз жь жьн-зарʹед хԝә дур бум, ле дьле мьн рʹьһʹәт бу, чьмки мьн заньбу ԝәки әз у Мариа Йаһоԝарʹа амьн дьминьн.

Сале щарәке, Мариа дьһатә Саранске сәва тʹәсәлийа мьн бькә. Әԝ рʹекә дьреж бу, 12 сьһʹәт лазьм бу ԝәки жь Тулуне пе трене бьһата ԝи шәһәри у пашда бьчуйа. Һәр сал әве мьнрʹа солед тʹәзә дьани. Һӧндӧрʹе пәʹнийа солада әве копийед «Бьрща Ԛәрәԝьлийе» вәдьшарт. Саләке, чахе Мариа һат шабунәкә мәзьн кʹәтә дьле мьн, чьмки әԝе тʹәви хԝә дӧ ԛизед мәйә бьчʹук ани. Бьдьнә бәр чʹәʹве хԝә әз чьԛас ша бум гава мьн ԝана дит.

Сала 1966 әз жь хәбата кампеда аза бум у әз нәфәред хԝәва дәрбази шәһәре Армавире бум,  кʹижан кӧ незики Бәʹра Рʹәш ә. Ль ԝедәре дӧ кӧрʹ мәрʹа һатьнә буйине, Йарослав у Павел.

Һьнә ԝәʹдә шунда, КГБ дәстпекьр мә әʹщьз кьн, чьмки мала мәда әʹдәбйәт дьгәрʹийан. Әԝана һʹәму щийа дьгәрʹийан, һәла һе афьре чʹеләкада жи. Щарәке, чахе офисер кʹәтьнә мала мә, ԝана жь гәрме худабун, у кʹьнщед ван тʹоз гьртьбу. Гӧне Мариайе ԝан һат, чьмки әԝе фәʹм дькьр кӧ фәрман данә ван офисера, әԝана жи тиньн сери. Әԝе ԝанрʹа кампот дагьрт, у чоткә, тʹаседа ав у пʹежгир да ԝан. Паше, чахе сәроке КГБ һат, әԝан офисера жерʹа гьли кьрьн кӧ әм һьндава ԝан ча ԛәнщ бун. Чахе әԝана жь мала мә дәрдькʹәтьн, әԝи сәроки бь бәшәра хԝәш дәсте хԝә мәрʹа һәжанд. Әм ша бун, чьмки мә дит кӧ чахе әм «бь ԛәнщийе» сәр хьрабийе дькʹәвьн, әм бәред чьԛас баш дьстиньн (Рʹом. 12:21).

Рʹаст ә пәй мә дькʹәтьн, ле мә бәрдәԝам дькьр Армавиреда мьзгинийе бәла дькьр. Мә ӧса жи аликʹари дьда кʹомәкә бьчʹук, кӧ незики шәһәре Курганинске бу. Әз гәләк ша мә ԝәки иро Армавиреда шәш щьват у Курганинскеда чар щьват һәнә.

Нава ԝан салада, һәбун ԝәʹдә кӧ әм рʹӧһʹанида сьст дьбун. Ле әм гәләк жь Йаһоԝа рʹази нә кӧ әԝи бь сайа бьред амьн, мә ширәт дькьр у рʹаст дькьр, у рʹӧһʹанида мә ԛәԝи дькьр (Зәб. 130:3). Бона мә ӧса жи щерʹьбандьна мәзьн бу, кӧ мә нава агентед КГБ-да хьзмәт дькьр, йед кӧ дьзива кʹәтьбунә нава щьвате. Әԝана хирәт дьһатьнә кʹьфше у хьзмәтийеда гәләк кʹар дькьрьн. Һьнәк жь ԝана тʹәшкиләтеда һәла һе щабдари жи дьстандьн. Ле ԝәʹдә дәрбаз бу, мә фәʹм кьр бь рʹастийе әԝана кʹе нә.

Сала 1978-да, чахе Мариа 45 сали бу, әԝ гьран дәркʹәт. Нәхԝәшийа ԝейә дьльк һәбу, у һʹәким дьтьрсийан кӧ әԝе бьмьрә һәрге зарʹе бинә. Ләма ԝана жерʹа тʹьме дьготьн, ԝәки әԝ әʹсә зарʹе бәр хԝә бькә. Ле Мариа ԛайил нәбу у бона ве йәке һʹәкима нәхԝәшханеда пе дәрзи һәма пәй ԝе дьгәрʹийан, сәва ԝе дәрзи кьн, ԝәки зарʹ бәр һәрʹә. Мариа жь нәхԝәшхане рʹәви сәва зарʹа хԝә хԝәй кә.

КГБ мәрʹа фәрман да ԝәки жь ԝи шәһәри дәрен. Әм дәрбази гӧнде незики Талин бун, кʹижан кӧ Естонйайеда йә. Әԝ жи дькʹәтә нава USSR. Талинеда, Мариайе кӧрʹәки сьһʹәт-ԛәԝат ани. Мә наве ԝи дани Витали. Бәле, гьлийед һʹәкима нәһатьнә сери.

Паше, әм жь Естонйайе дәрбази Незлобнайайе бун, кӧ Урьсета башуреда йә. Мә гәләк фәсал хьзмәт дькьр ԝан шәһәрада кӧ незики мә бун. Ль ԝедәре жь щурʹә-щурʹә ԝәлата мәрьв дьһатьн сәва һеса бьн у хԝә ԛәнщ кьн. Рʹаст ә әԝана һатьн сәва сьһʹәт-ԛәԝата хԝә баш кьн, ле һьнәк жь ԝан чун пе ве баԝәрийе кӧ ԝе жийина һʹәта-һʹәтайе бьстиньн!

Мә алийе хԝәда һәр тьшт дькьр сәва кӧрʹ у ԛизед мә Йаһоԝа һʹьз бькьн у бьхԝазьн жерʹа хьзмәт кьн. Мә гәләк щар хушк-бьред ӧса тʹәглифи мала хԝә дькьр, йед кӧ сәр зарʹед мә баш һʹӧкӧм дьбун. Мәсәлә, бьре мьн Григори тʹьме дьһатә щәм мә, йе кӧ жь сала 1970 һʹәта 1995 хьзмәт дькьр ча бәрпьрсийаре рʹеԝи. Малда әм гьшк ша дьбун чахе әԝ дьһатә мала мә, чьмки әԝ йәки бәшәрхԝәш у һәнәкчи бу. Чахе меванед мә дьһатьн, мә гәләк щар листькед Кʹьтеба Пирозва гьредайи дьлист, у сәва ве йәке зарʹед мә чьԛас мәзьн дьбун һаԛас зәʹф сәрһатийед Кʹьтеба Пироз һʹьз дькьрьн.

 Сала 1987-да, кӧрʹе мә Йарослав дәрбази шәһәре Ригайе (Латвйа) бу. Ль ԝедәре әԝи аза хьзмәт дькьр, чьмки пәйкʹәтьн тʹӧнә бу. Ле чахе әԝ нәчу әскәрийе, ԝи сәр сал у нивәки кьрьнә кәле, у нава ԝи ԝәʹдәйида әԝ кʹәтә нәһә кәла. Пешда мьн жерʹа гьли дькьр чаԝа әз кәледа амьн мам, у әве йәке али ԝи кьр кӧ әԝ кәледа ԛәԝи ма. Паше, әԝи дәстпекьр хьзмәт кә ча пешәнг. Сала 1990-да, кӧрʹе мә Павел кӧ 19 сали бу дьхԝәст бьбә пешәнг у хьзмәт кә гьрава Сахалинеда кӧ Жапонйайа бакʹуреда йә. Пешийе мә нәдьхԝәст әԝ һәрʹә. Тʹәмамийа гьраведа тʹәне 20 мьзгинван һәбун, у һьн жи әв гьрав 9 000 км жь мә дур бу. Ле ахьрийеда әм ԛайил бун әԝ һәрʹә, у әв сафикьрьн баш бу. Ль ԝедәре мәрьва рʹьнд гӧһ дьданә мьзгинийе. Нава чәнд салада, ль ԝедәре ида 8 щьват һәбун. Павел һʹәта сала 1995 ль ԝедәре хьзмәт дькьр. Ԝи ԝәʹдәйида кӧрʹе мәйи бьчʹук Витали малда тʹәви мә бу. Жь бьчʹуктайе әԝи һʹьз дькьр Кʹьтеба Пироз бьхунә. Чахе әԝ 14 сали бу, әԝи пешәнгти дәстпекьр, мьн жи тʹәви ԝи 2 сала хьзмәт дькьр ча пешәнг. Әԝ ԝәʹдә гәләк хԝәш бу. Чахе Витали бу 19 сали жь мал чу, чьмки пешәнгтийа мәхсус дәстпекьр.

Пешда, сала 1952-да офисерәки КГБ Мариайерʹа готьбу: «Баԝәрийа хԝә бьһелә, йане на тӧйе сәр дәһ сала бькʹәви кәле. Чахе тӧ жь кәле дәркʹәви, тӧйе ида пир би у тʹәне бьмини». Ле гьлийед ԝи нәһатьнә сери. Мә тʹьме сәр хԝә тʹәхмин дькьр һʹьзкьрьна Йаһоԝа Хԝәде, зарʹед хԝә у һʹьзкьрьна әԝед кӧ мә али ԝан кьр бенә сәр рʹийа рʹаст. Мьн у Мариайе шабунәкә мәзьн дьстанд чахе мә тʹәсәлийа зарʹед хԝә дькьр кʹидәре кӧ ԝана хьзмәт дькьр. Мә ӧса жи дьдит рʹазибуна ԝан мәрьва, йед кӧ зарʹед мә али ԝан кьрьбун кӧ дәрһәԛа Йаһоԝа пебьһʹәсьн.

Сала 1991-да, Шәʹдед Йаһоԝа бь ԛануни изьн сьтандьн кӧ хьзмәт кьн. Әве сафикьрьне ԛәԝата мә вәгәрʹанд у әм хьзмәтийеда һе зедә хирәт бун. Щьвата мә һәла һе жи отобус кʹьрʹи, сәва әм һәр Шәми у Ләʹд шәһәр у гӧндед незики мәда хьзмәт кьн.

Әз бәхтәԝар ьм ԝәки Йарослав тʹәви жьна хԝә Алионайе у Павел тʹәви жьна хԝә Райайе Бәйтʹәледа хьзмәт дькьн. Витали жи тʹәви жьна хԝә Светланайе шьхӧле бәрпьрсийарида хьзмәт дькә. Ԛиза мәйә мәзьн Ирина тʹәви малбәта хԝә дьжи Алманйайеда. Мере ԝе Владимир у се кӧрʹед ԝан һʹәмушк жи рʹуспи нә. Ԛиза мә Олга Естонйайеда дьжи у тʹьме мьнрʹа тʹеле дьхә. Ле йазьх жьна мьнә дәлал Мариа сала 2014-да мьр. Әз гәләк һивийа ԝи ԝәʹдәйи мә, чахе әԝ жь мьрьне рʹабә у әз ле бьвиньм! Ньһа әз дьжим шәһәре Белгородеда у хушк-бьред ԝьра аликʹарийа мәзьн дьдьнә мьн.

Рʹаст ә амьнийе хԝәй кьн чәтьн ә, ле салед мьнә хьзмәтийа Йаһоԝада әз һин кьрьм кӧ һежа йә амьнийе хԝәй кьн, чьмки Йаһоԝа тʹьме дьлрʹьһʹәтийе дьдә, кʹижан кӧ беһʹәсаб ԛимәт ә. Мьн у Мариайе сәва амьнийа хԝә ӧса гәләк кʹәрәм стандьн, кӧ мьн пешда нә жи дьда бәр чʹәʹве хԝә. Пешийа һьлшандьна USSR кӧ сала 1991-да бу, ԝедәре тʹәне 40 000 мьзгинван һәбун. Ле иро, нава ԝан ԝәлатада кʹижан кӧ бәре нава Йәктийа Совйәтеда бун, 400 000 мьзгинвана зедәтьр һәнә. Ньһа әз 83 сали мә, у диса ча рʹуспи хьзмәт дькьм. Аликʹарийа Йаһоԝа тʹьме ԛәԝат дьда мьн кӧ сәбьр кьм у ԛәԝи бьминьм. Бәле, Йаһоԝа мьн гәләк кʹәрәм кьр (Зәб. 13:5, 6).