1, 2. Mahapinangay no ˈalomanay tamdaw to o masamaanay ko Misawacayay Tamdaw ni Yihofa?

TAMDAW ni Yihofa patahekalay to fangcalay pinangan, o kafanaˈan no ˈalomanay koni. Patinakoen, ci Anton Kill somowalay to Misawacayay Tamdaw ni Yihofa itini ilaeno no yofayof no Naci i Towic, sowal sa: “O ˈada hananay no Naci minengneng ko Misawacayay Tamdaw ni Yihofa. . . . Tangasa 1939 miheca, 6,000 ko mapatayniay i pitepengan a tapalitan a mirofo.” Soˈlin mipakideman miroero cangra, o Misawacayay Tamdaw ni Yihofa “o ngaˈayay, damsayay tamdaw”, ano maroero cangra “mitafoay to madimadi, makelecay cangra”, sanay.

² Itini toni ngata a pina miheca, mahapinangay no Nanfi a tamdaw ko nika ngaˈay no tamdaw no Kawas. Isaˈayaˈayaw, o cowa ka lecad a finacadan tamdaw, awaay ko pasalat a macacawmaˈ. ˈArawhan, isaka 2011 miheca, saka 12 folad 18 romiˈad to pilipayan a romiˈad, iraay ko mataˈlifay ko 7 a ˈofad 8 patek a Misawacayay Tamdaw ni Yihofa, masaˈopoay i ontociw no Yohanisepek, naitiniay i masasi romaay a finacadan ato i ngataay kitakit cangra, mitengil to mikiriwiˈay a kamok. O misimaway toni ontociw a matayalay, sanay ko sowal: “Kamo nao maˈaraway ako a safangcalay tamdaw! Sanengsengay ko caˈedong namo, misongilaˈan namo  miasik ko ontociw. Macacamolay kamo to masasi romaay a finacadan, rihaday a makakapot kamo.”

3. Misamaanay hano mikiriwiˈ ko Misawacayay Tamdaw ni Yihofa hani?

³ Ora sowal no tao ifafekang paihekalay, o masacefangay a salikaka i paro no kakarayan, soˈlinay o mikiriwiˈay. (1 Pitiro 5:9) Misamaanay hano mikiriwiˈ ko Misawacayay Tamdaw ni Yihofa hani? Samanen iraay ko sadama no Kimad ato fangcalay saocor no Kawas, misaˈicelay cangra mihelong to katelangay pinangan, micaˈedong to faelohay pinangan.​—Kolosay 3:9, 10.

4. Onini lalakaw mamilengo to manan? Misamaanay hano sasinanoten ita koni demak hani?

⁴ Mahelongto ko katelangay pinangan ikor, akato pitikor midemak to tatiihay. Onini lalakaw papadama kitanan cipinang, misamaan a mihelong to katelangay pinangan, ato misamaanay hano o macalohay a demak koni. Ano hakowaay ko nika taˈangay no raraw no tamdaw, o ngangaˈayho masalof a mafalic. O roma i, ano halafinayto micada to inoˈ a tamdaw, misamaan ngaˈ caka patatikor to iˈayaway a tatiihay demak. O sasinanoten ita koni sapatalipaˈelal no Fangcalay Cudad, samanen iraay ko mahokaˈayto i noˈadingoan a Krisciyang, misawaday a midofdof to palinian no Kawas. Mankora, paifalocoˈen ita koni sapalimoˈot: “O tanektekayto ko nika tomireng ako, yasanay ko harateng a tamdaw i, naˈonen ko demak to sakacaaw ka tefad.”​—1 Korinto 10:12.

5. (1) Misamaanay hano kakalikien mihelong ko katelangay pinangan? Sadaken ko tinakoan. (Nengnengen ko satapangan coka.) (2) Pakayni i Kolosay 3:5-9, o manan ko katelangay pinangan hananay?

⁵ Ano cikaditayto ko rikoˈ iso, alatek ˈantohayto, wa samaanen iso hani? Wa kalikien iso a mihelong. Mahecaday, ano marariday kita midemak to kaˈintehan no Kawas a demak, kalikien ita misalof a mifalic ngaˈ. Oya ihekalay a sapalimoˈot ni Pawlo to Krisciyang, o sasinanoten ita, sowal ningra, “o fafalahen” namo ko mararaway a demak, sanay. Dotoc i, o mamilengo kita to maˈodangay ato kaacekan a demak.​—ˈOsien ko Kolosay 3:5-9.

6, 7. (1) O sowal ni Pawlo samaanay pahapinang kitanan, misaˈicel wangaˈ mahelong ko katelangay pinangan? (2) Samaanay ko isaˈayaway nokaˈorip ni Sakura hani? O manan ko padamaay cingranan ciˈicel a mifalic to niyahan?

⁶ Maˈodangay. O “maˈodangay” hananay i Fangcalay Cudad, mahawpay ko nika maaˈodang ato ipotalay no raramod a tamdaw. Pasowalay ci Pawlo to Krisciyang “patayen ko . . . tatiihay a demak no tireng”, o fafalahen ko matiraay o maˈodangay a maamaan a mararaway a ˈanof no tireng. Mikitini toni sowal mahapinangay, mamisaˈicel kita milood, wangaˈ mawanik ko mararaway a ˈanof no tireng. Soˈlin cowa ko madoloay, kawra o papakalowid kita to tatiihay a ˈanof.

⁷ Haratengen ko tinakoan ni Sakura *, itiniay i Dipong. Marariday tafihaw ko falocoˈ a matoˈolen cingra. Nano 15 ko mihecaan, ˈalomanayto ko midiˈiyan a faˈinayan, toha sakacaaw ka toˈol. Maacekay cingra to niyahan, kina toloayto pasadak to poyapoy. Sanay cingra: “Satapangan, mihaen madadiˈi to tao, hato fanekfekan nanay ko falocoˈ, miharateng hato misakaretengan ato mikaolahan no tao. Kawra, halafinto i, mapiliˈay kako to matiniay a nokaˈorip.” Mahaen ci Sakura tangasaay i 23 ko mihecaan ningra. Misatapang cingra micekiw to Fangcalay Cudad ato Misawacayay Tamdaw ni Yihofa. Maolahay cingra to maasipay a kimad, pakayniay i sapadama ni Yihofa, mahawadayto ningra ko maacekay to niyahan a falocoˈ,  misawadayto maˈodang cingra. Anini, malo misakafahayto ci Sakura, cowa ito ka toˈol cingra. Sanay cingra: “To romiˈamiˈad malifetay ako ko olah ni Yihofa, mahemekayto kako!”

8. Ano midemak kita to manan, o kaacekan a tamdaw wahan no Kawas kita a minengneng?

⁸ Kaacekan a demak. Itini i Fangcalay Cudad, “kaacekan demak” hananay, kakahaday ko tatodong, cowa kono maˈodangay aca demak, mahawpay ko mitamakoay anca somowalay to kasimelangan a sowal. (2 Korinto 7:1; Ifiso 5:3, 4) “Kaacekan a demak” hananay, milingatay tono tekedan a tatiihay demak. Patinakoen, miˈosi to mikidatay to ˈanof no tireng a cudad, anca minengneng to makakalonaay a lalakaw, mikidat to sapipohpohaw to kamaysiˈan a misalama.​—Kolosay 3:5. *

9. Ano mararid minengneng to makakalonaay a lalakaw, wa paira to manan tatiihay a teloc hani?

⁹ Ano mararid ko tamdaw a minengneng to makakalonaay a lalakaw i, wa mahiyan to matiniay a demak. Ano mananam ko tamdaw a minengneng to makakalonaay a lalakaw malecaday o mawarakay no epah, mahiyanan nanay. Minengneng to makakalonaay a lalakaw tatiihay ko teloc, mangodoay nanay ko kemod no falocoˈ, awa ko salongian a matayal, caka ngaˈay ko kalalaˈed ato paro no lomaˈ, malacinowas ko raramod anca kinasoˈot. O cecay faˈinayan samihecaayto a misawad a minengneng to hatiniay a lalakaw, sanay ko sowal: “Patikorayto kako malo ciepocay a tamdaw.”

10. Ci Ripiro samaanay misawad a minengneng to makakalonaay a lalakaw?

¹⁰ Pakayni to ˈalomanay tamdaw, misawad minengneng to makakalonaay lalakaw, mahecaday o halafinay a milooday. Kawra, o papakalowid a misawad to matiniay a tatiihay a nanaman. Nengnengen ko nilifetan ni Ripiro, itiniay i Praci ko aroˈ, 10 ko mihecaan miliyasayto to lomaˈ, itiniay i pitalingan to mifalahan dadokap a kitiraan a matayal. Itiraay cingra tahaˈaraw to makakalonaay a lalakaw, sanay ko sowal ni Ripiro: “Palidlid sato kako mananam minengneng. Nanay awa i lomaˈ ko sakatihi ako a fafahiyan, hongaˈ ngaˈay kako a minengneng sa kako.” Ira ko cecay romiˈad, i katayalan maˈaraway ningra ko cecay cudad, o Sakalipahak no Paro no Lomaˈ, sanay a cudad. Ala hananay ningra a miˈosi. Maolahay to lalakaw nora cudad, miharateng to sapicekiwaw ato Misawacayay Tamdaw ni Yihofa. Kawra halafinay ngaˈ masawad ningra kora tatiihay a pinangan, o manan ko padamaay cingranan a mafalic hani? Sanay cingra: “Pakayniay i pitolon, micekiw to Fangcalay Cudad ato midotim to mananamay a kimad, matongal matongal ko olah to capeling no Kawas, o olah ako ci Yihofaan, saka mapadik ko sapinengnengaw to makakalonaay a lalakaw a falocoˈ.” O Kimad no Kawas ato fangcalay saocor ko padamaay ci Ripiroan, saikor mahelongto ko katelangay a pinangan, halo micada to inoˈ, nohatini o malohemayto malitengay no kasakopang cingra.

11. Misamaan to demak ngaˈ, masawad ko sapinengnengaw to makakalonaay a lalakaw?

¹¹ Saka pakalowid ci Ripiro to tatiihay nanaman, cowa ko nika picekiw aca to Fangcalay Cudad, papitemeranho ko kimad no Kawas to falocoˈ ningra. Pakayniay i pitolon ato misimsim a midotim, o olah to Kawas milowiday to sapinengnengaw to makakalonaay a lalakaw. Mahapinangay itini, palahaden ko tanoktokay noka olah ci Yihofaan, kaˈosien ko mikaˈosian no Kawas a demak.​—ˈOsien ko Amos 5:15.

12. Misamaanay hano masawad ni Stifen ko keter, ato kaacekan a sowal hani?

¹² O patitaˈay ko pinangan a tamdaw, ano maketer i, marariday somowal to caka ngaˈay tengilen a sowal, mipalak to rihaday no paro no lomaˈ. Naitiniay i Australia ci Stifen, sanay ko sowal: “Iti:yaho marariday kako somowal to kaacekan a sowal, pakayni i mimingay a demak mangolawayto kako. Kina toloay a masasiwatik ato fafahi, mangataay malicinowas ko raramod niyam.” Ikor, micekiway to Fangcalay Cudad ato Misawacayay Tamdaw ni Yihofa ci Stifen ato fafahi ningra. Mitooran nangra ko sapalimoˈot no Fangcalay Cudad, samaanayto ko teloc hani? Sanay cingra: “Masalofayto ko paro no lomaˈ niyam. Iti:yaho matomesay to ˈinteh ato keter ko falocoˈ ako, mahecaday o mamapakohac a timra, tona iraay ko sapadama ni Yihofa, rihadayayto ko falocoˈ.” Nohatini, o padamaay sikawdan ci Stifen, halafinayto mala misakafahay ko fafahi. O malohemay malitengay no kasakopang ni Stifen, sanay ko sowal: “Malalokay damsayay ci Stifen, misapoeneray to falocoˈ cingra.” Cowa pakaˈaraw to nika keter ni Stifen cangra. Pakayni to sapahemek no tao, samaanay ko harateng ni Stifen hani? Sanay cingra: “Ano awaay ko sapadama ni Yihofa, cowa ko mamafalic kako, cowa ko mamatinako ako koni fangcalay a sapalemed.”

13. Ano mangolaw mikidatay to manan a teloc? Misadakay to manan a sapalimoˈot ko Fangcalay Cudad?

¹³ Aka mangolaw, mitongangan ato miceliˈ sanay palimoˈot ko Fangcalay Cudad, samanen marariday a mikidat to sakalatiˈilaw a misetiˈ to tamdaw. (Ifiso 4:31) Cowa ko manan koni sanay ko hekal a tamdaw, kawra o mahaenay tamdaw, cowa paˈodingar to Kawas. Pakayni to ˈalomanay tamdaw, isalakatenho a mihelong ko mararaway waywayan, ngaˈ micaˈedong to faelohay a pinangan.​—ˈOsien ko ˈOlic 37:8-11.

14. O mariˈangay a tamdaw mamafalic a mala damsayay han? Sadaken ko tinakoan.

¹⁴ Nengnengen ko nilifetan ni Hans, o malohemay malitengay i Austria cingra. O sowal no misatenokay no malohemay malitengay, sanay somowal ci Hansan: “O sadamsayay a salikaka cingra, hatiraay ko noka fanaˈ no tao i cingranan.” ˈArawhan, isaˈayaw cowa ko mahaenay tamdaw ci Hans, moetepho ko mihecaan haliepahayto cingra, tada mariˈangay ko pinangan. Kina cecayay malasangay no epah, mipatayay to fafahiyan widang no niyah. Saka mapalit to 20 mihecaan ci Hans, cowa ka falic itini i pirofoan ko pinangan. Ikor, papilisoˈan no wina ko malohemay malitengay ci Hansan, misatapangto micekiw to Fangcalay Cudad ci Hans. Sanay ko sowal ningra: “Mihelong to katelangay pinangan cowa ko madoloay. Kawra paˈicelay ko sinael i takowanan, ora cecay sinael itiniay i Isaya 55:7, sanay kora sowal: ‘Kamo o tatiihay a tamdaw, liyasen ko tatiihay a pinangan namo.’ O roma, saka 1 Korinto 6:11 somowalay to namidemakay to tatiihay demak a tamdaw, ikor masawadayto ko tatiihay demak. Halafinay mihadidi ci Yihofa, pakaynian i fangcalay saocor padama takowanan, micaˈedong to faelohay pinangan.” Micadaay to inoˈ ci Hans i tapalitan, ikor no 17 a miheca matedalayto. Sanay ko sowal ningra: “Tada miakoˈiday kako to siniˈada ni Yihofa, makahi a misodod to raraw ako.”

15. O manan a waywayan anini tada matenakay? Samaanay ko kapinengneng no Fangcalay Cudad?

¹⁵ O misamangahay a demak, o katelangay pinangan. O ˈalomanay tamdaw toha sakaecaaw pasata, misamangahay a misafanaˈ. O sowal no Fangcalay Cudad, ci Yihofa “o soˈlinay a tatiˈeren a Kawas”, sanay. (ˈOlic 31:5) O saali no Kawas to midokoay Cingranan a  tamdaw “aka ka sasisamangah kamo”, sanay. (Ifiso 4:25; Kolosay 3:9) Mihaenay haw i, ano soˈlinto cowa ka dolo a tooren, anca sakangodo no niyah alatek, oha sasoˈlinen no mita ko sowal.​—Taneng 6:16-19.

16. Misamaan to demak kita, ngaˈ mahelong ko katelangay a pinangan?

¹⁶ Mihelong to katelangay a pinangan, cowa ko ˈicel no niyah. Oya nisowalan noni lalakaw, ci Sakura, ci Ripiro, Stifen aci Hans, misaˈicelay a milowid ngaˈ pakafalahay to mararaway a pinangan. Makahiyay cangra micada to sakayat no Kawas, teloc mikitiniay i Kimad no Kawas ato fangcalay saocor tahacada to ˈicel, pakalowid to katelangay a pinangan. (Luka 11:13; Hipray 4:12) Ano hasapi cadaaw kita to sapadama no Kawas, miˈosi to Fangcalay Cudad to romiˈamiˈad, midotim to maˈosiay a lalakaw, caka pisawad a mingitangit to Kawas pafeli to taneng ato haˈicel, hongaˈ pakadoedo to sapalimoˈot no Fangcalay Cudad a midemak. (Yosuwa 1:8; ˈOlic 119:97; 1 Tisalonika 5:17) Sainanengen ita misaday ko lalakaw no saˈopo, micerid mirienang to saˈopo. (Hipray 10:24, 25) Roma sai, adihayay ko misadayan no likakawa no Kawas to noˈadingoan a kakaenen, sasaka dademaken ita.​—Luka 12:42.

17. Ilaenoay a lalakaw wa milengo to manan?

¹⁷ Toni lalakaw milengoay to hahelongen no Krisciyang a tatiihay a waywayan. Kawra cowa ko mamihelong aca to katelangay a pinangan, oha cacaˈedongen ita ko faelohay pinangan, hongaˈ mahemek ko falocoˈ no Kawas. Tora ilaenoay lalakaw, sasomowal kita to sasamaanen a micaˈedong ko faelohay a pinangan, padadotoc patahekal to masakenakenaay makapahay a pinangan i nokaˈorip.