1, 2. ¿Jehová Diosan Testigonakapat kamsapjjes yaqhepanakajja?

TESTIGONAKAJJ wali suma jaqëpjjew sasaw waljanejj sapjje. Libronak qellqeri Anton Gill chachajja, kunjamsa Testigonakarojj Alemania markan tʼaqesiyapjjäna ukanakwa mä libropan qellqäna. Jupajj akham sänwa: “Nazi partidonkirinakajj walpun Testigonakar uñisipjjäna, [...] 1939 maranjja 6.000 Testigonakaw campos de concentración ukan utjäna” sasa. Jehová Diosan Testigonakapajj walsa tʼaqesipkchïnjja, wali confiykañ jaqenakäpjjänwa, mayachtʼatäpjjarakïnwa, jan walinakan uñjasisas pacienciampiw suyapjjäna, janirakiw Diosapatsa jitheqtapkänti sasaw sarakïna.

² Sudáfrica markanjja, Jehová Diosan Testigonakapajj suma jaqet uñtʼatäpjjarakïnwa. Uka markanjja, kunayman kast jañchini jaqenak tantachasipjjañapajj autoridadanakan jarkʼatänwa. Ukampis domingo 18 de diciembre, 2011 maranjja, 78.000 Testigonakaw kunayman kast jañchini tantachasipjjäna, jupanakajj Sudáfrica markata ukhamarak uka jakʼankir yaqha markanakat jutapjjäna. Johannesburgo markan utjkäna uka estadionwa  Diosan arunakap istʼañatakejj tantachasipjjäna, ukajj wali phoqapunïnwa. Estadio uñjiri mä chachajj akham sänwa: “Janipuniw ukham suma jaqenak waljan tantachtʼat uñjirïkti. Taqeniw suma isthaptʼatäpjje, tantachasipki uka lugarsa wali qʼoma jaytawayapjje. Janiw yaqha kasta jaqëtaw sasin uñchʼukisiñanakajj utjkiti, ukaw jukʼamp musparayitu” sasa.

3. ¿Kunatsa Diosan markapajj mayni organizacionanakat sipan mayjätanjja?

³ Jehová Diosan jan Testigopäpki ukanakaw jiwasat ukham sum parlapjje, ukaw Diosan markapajj mayni organizacionanakat sipansa mayjätap uñachtʼayi (1 Ped. 5:9). ¿Kunatsa Diosan markapajj mayninakat sipan mayjätanjja? Espíritu santompi Bibliampi yanaptʼatäsajja, ‘nayrajj kunjam jaqëkayätantï’ ukanak apanukusin ‘machaq jaqëñampi isthapisiñatakiw’ chʼamachastanjja (Col. 3:9, 10).

4. ¿Kunanakatsa aka yatichäwin yatjjataskañäni, kunatsa ukanakat mayampi yatjjatañajj wakisi?

⁴ Nayrajj kunjam jaqëkayätantï ukanakjja wiñayatakiw apanukuñasa. Aka yatichäwinjja, kunjamsa uka jan walinak apanuksna, kunatsa apanukuñasa ukanakwa yatjjatañäni. Ukatsti, yaqhepajj sinti jan walinaksa lurapkchïnjja kunjamsa ukanak apanukupjjäna ukwa yatjjatarakiñäni. Ukjjarusti, Jehová Diosar walja maranak servisipki uka jilat kullakanakarojja, kunas nayra sarnaqäwinakapar jan kuttʼañatak yanaptʼaspa ukwa yatjjataskarakiñäni. ¿Kunatsa ukanakat wasitampi yatjjatañajj wakisi? Yaqhepajja janïr cristianökasajj kunanaktï amuyapjjerïkäna, lurapjjerïkäna ukanakaruw kuttʼapjje, jichhajj jitheqtjjapjjewa, ukajj wali llakkañawa. Ukatwa “khititejj suma saytʼatjam amuyaschi ukajja, wal amuyaspan, ukataraki tinkuskaspa” siski uka ewjjtʼa jan armañasäkiti (1 Cor. 10:12).

5. 1) ¿Kunatsa nayrajj kunanaktï lurkayätan ukanak jankʼaki apanukuñasa? Uk qhanañchtʼma. (Página 17 ukankir foto uñjjattʼäta) 2) ¿Kunjam jaqëñatsa Colosenses 3:5-9 textojj parli?

⁵ ¿Kunsa isisatï wali qʼañüspa, thujsarakïspa ukajj lursna? ¿Janit jankʼak apsusksna? Ukhamarakiw Diosajj uñiski uka jan wali lurañanak jankʼaki apanukuñasa. Apóstol Pablojj akham sasaw uka tiempon jakiri cristianonakar säna: “Taqpach apanukupjjam” sasa. Kuna pä juchanakattï Pablojj parlkäna uk yatjjatañäni: 1) Qʼañu jucha luraña. 2) Ajjtaskañanak luraña (Colosenses 3:5-9 liytʼañataki).

6, 7. 1) Apóstol Pablon arunakaparjamajja, ¿kunsa qʼañu lurañanak apanukuñatakejj lurañasa? 2) ¿Nayrajj kuna jan walinaksa Sakura kullakajj lurirïna? 3) ¿Kunas uka jan walinak apanukuñatakejj yanaptʼäna?

⁶ Qʼañu jucha luraña. Bibliajj qʼañu jucha lurañat parlasajja, jan casaratäkas ikintasisin jucha lurañanakata, chacha pura jan ukajj warmi pura ikintasiñata, yaqha ukhamanakampitwa parli. Apóstol Pablojj cuerponakamat qʼañu jucha lurañanak chhaqtayapjjam sasaw cristianonakar säna. Uka arunakarjamajja, jankʼakiw qʼañu juchanak lurañ munañjja apanukuñasa. Ukham lurañajj chʼamakïspawa, ukampis apanuksnawa.

⁷ Sakura * kullakar kunas pasäna uka toqet parltʼañäni, jupajj Japón markatawa. Tawaqetäkasajj sapakïkaspasa janis khitis munkaspa ukham amuyasïna. Jan ukham llakisjjañatakiw 15 maranirojj maynimp maynimpi ikintasiñ qalltäna. Ukatwa kims kuti abortäna. Jupajj akham siwa: “Qalltanjja, maynimpi maynimpi sarnaqasajj jan walinakat jarkʼaqatäkiristsa, walsa munasipkitaspa ukham amuyirïta. Ukampis tiempompejja, janiw ukham amuyjjayätti” sasa. Sakura kullakajj 23 marankamaw  ukham sarnaqäna. Ukhaw mä Testigompi Bibliat yatjjatañ qalltäna. Kuntï yateqkäna ukajj chuymaparuw purtʼäna. Jehová Diosan yanaptʼapampejj janiw jupa pachpa juchañchasjjänti, janirakiw nayra luratanakapatsa sinti llakisjjänti. Qʼañu lurañanaksa apanukjjarakïnwa. Jichhajj precursor regularat serviski, janiw sapakïkaspas ukham amuyasjjeti. Jupajj akham siwa: “Jehová Diosajj qhawqsa munasitu uk yatiñajj walpun kusisiyitu” sasa.

8. ¿Kunanak lurañas Jehová Diosampejj qʼañut uñjayistaspa?

⁸ Ajjtaskañanak luraña. Griego arut “ajjtaskañanak luraña” sasin tradusitäki ukajja, janiw qʼañu jucha lurañanakakïkiti. Cigarro fumañasa jan wali arunakamp sawkasiñas ajjtaskañanak lurañampi sasirakiwa (2 Cor. 7:1; Efe. 5:3, 4). Qʼañu juchanak luraskir fotonakani libronak liyiñasa, pornografía uñchʼukiñas ukham jan walirakikiwa. Ukham jan walinak uñchʼukiñajja, masturbación lurañaruw maynir apaspa (Col. 3:5). *

9. ¿Kunarus ‘warmi jan ukajj chacha añcha munañajja’, apaspa?

⁹ Pornografía uñchʼukiñar yatintatäpki ukanakajja, ‘warmi jan ukajj chacha añcha munañampiw atipayasipjjaspa’. Ukatsti, ukanak munañajj mä viciökaspas ukhamäjjaspawa. Uka toqet yaqhep yatjjatirinakajja, pornografía uñchʼukirinakajj drogaru jan ukajj alcoholar yatintatäpki ukanakjamäpjjewa sasaw sapjje. Ukhamasti, pornografía uñchʼukiñajj janipuniw walïkiti. Uk uñchʼukirinakajj wal phenqʼasipjje, janiw sumsa trabaj-jjapjjeti, familiapansa janiw suma jakasiñajj utj-jjeti. Divorciasjjapjje, jupa pachpa jiwayasjje kunawa. Mä chachajja, pornografía mä mara jan uñchʼukjjasajj akham sänwa: “Jichhajj naya pachpaw wasitampi respetasjjta” sasa.

10. ¿Kunas Ribeiro jilatarojj pornografía uñchʼukiñ apanukuñatakejj yanaptʼäna?

¹⁰ Waljaniw pornografía jan uñchʼukjjañatakejj sapüru wal chʼamachasipjje. Ukampis uka jan wali lurañjja apanuksnawa, ukwa Brasil markankir Ribeiro chachajj luräna. Waynitüskäna ukhajja, utapat sarjjasajj papelanak reciclapki uka fabricanwa trabajiñ qalltäna. Ukanjja qʼalal jaqenakani revistanak uñirïna. Jupajj akham siwa: “Jukʼat jukʼatjja pornografiak uñchukiñ munjjayäta, pornografian videonak uñchʼukiñ munasajja, jakapkayäta uka warmin utat mistuñapakwa suyirïta” sasa. Mä urojj trabajopanjja, walja libronak taypinwa Familian sum jakasiñatakixa kunas munasi sat libro uñjäna. Uka libro liytʼasajj kuntï yateqkäna ukaw Testigonakampi Bibliat yatjjatañatak yanaptʼäna. Ukampis walja tiempotjja pornografía uñchʼukiñ jaytjjänwa. ¿Kunas yanaptʼäna? Jupajj akham siwa: “Diosar orasiña, Biblia liyiña, yateqkayäta ukanakat lupʼiñaw Jehová Diosajj kunjam Diosäkitï uk sum amuyañatak yanaptʼawayitu. Ukhamatwa pornografía uñchʼukiñ munañat sipansa Jehová Diosar jukʼamp munasjjayäta” sasa. Biblian yanaptʼapampi, espíritu santon yanaptʼapampejja, jan wali lurañanak apanukusajj bautisasjjänwa. Jichhasti Ribeiro jilatajj jilïr irpirjamaw congregacionapan yanaptʼaski.

11. ¿Kunas pornografía jan uñchʼukiñatak yanaptʼistaspa?

¹¹ Ribeiro jilatajj janiw aleqak Biblia liykänti, jan ukasti kuntï yateqkäna ukanakatwa lupʼirïna, ukhamatwa ukajj chuymapar purtʼäna. Diosaruw yanaptʼa mayisirakïna. Jilatarojj yateqkäna ukanakat lupʼiña, orasiña ukanakaw Jehová Diosar jukʼamp munasiñatakisa, pornografía uñchʼukiñ jaytañatakis  yanaptʼäna. Taqeniw Jehová Diosar taqe chuyma munasiñasa, jan walinak lurañsa uñisiñasarakiwa ukaw pornografía janipun uñchʼukiñatak yanaptʼistani (Amós 5:15 liytʼañataki).

12. ¿Kunas Stephen jilatarojj jan colerirïjjañatakisa, chuym ustʼayir jan wali arunak jan parljjañatakis yanaptʼäna?

¹² Yaqhepajj jankʼakiw kunatsa colerasipjje, chuym ustʼayir arunaksa jan wali arunaksa parlapjje. Ukham jaqejj familpacharuw jan waltʼayi. Stephen jilatat parltʼañäni, jupajj warmini wawani ukhamawa. Jilatajj akham siwa: “Nayrajj jan wali arunak parliri, kunatsa jankʼak colerasiri ukhamayätwa. Kimsa kutiw esposajamp jaljtapjjta, divorciasiñwa amtasipkayäta” sasa. Ukhaw Testigonakampi Bibliat yateqañ qalltapjjäna. ¿Kunjamsa Biblian ewjjtʼanakaparjam sarnaqañajj Stephen jilatar yanaptʼäna? Familiajampejj sumaw jakasjjapjjta siw jilatajja. Nayrajj wali colerirïsajj niya phallir bombar uñtasitänwa, jichhajj janiw ukhamäjjeti. Jilatajj congregacionan yanapiripjamaw yanaptʼaskaraki, esposapasti walja maranakaw precursorat serviskaraki. Congregacionapankir jilïr irpirinakajj akham sapjjewa: “Stephen jilatajj pacienciani, humilde, wali qʼapha ukhamawa. Janipuniw colerasir uñjapjjerïkti” sasa. ¿Kunas suma jaqëjjañatak yanaptʼawaypacha? Jilatajj akham siwa: “Nayrajj kunjam jaqëkayätti ukanakjja Jehová Diosan yanaptʼapampiw apanukta. Ukhamatwa Diosan bendicionanakap katoqawayta” sasa.

13. 1) ¿Kuna jan walirus colerasiñajj apistaspa? 2) ¿Kun lurapjjam sistus Bibliajja?

¹³ Colerasiñsa, toqesiñsa, usuchjir arunak parlañsa apanukupjjam sistuw Biblianjja (Efe. 4:31). Ukanakajj nuwasiñanakaruw apistaspa. Colerasiñasa, toqesiñasa, usuchjir arunak parlañas walikïkaspas ukham waljanejj amuyapjje, ukampis ukajj taqe kun Lurir Diosaruw jiskʼachi. Ukatwa cristianonakajj ukham jan wali lurañanak apanuktanjja, Diosajj churkistu uka machaq jaqëñampi isthapistanjja (Salmo 37:8-11 liytʼañataki).

14. ¿Wali nuwasir mä jaqejj suma jaqeptaspati?

¹⁴ Austria markankir Hans jilatat parltʼarakiñäni, jupajj jilïr irpiriwa. Congregacionapan jilïr irpirinakan sarayiripajj jupat akham siwa: “Hans jilatajj taqenit sipansa wali paciencianiwa” sasa. Ukampis nayrajj janiw ukhamäkänti. Waynitüskäna ukhaw alcohol umañ qalltäna, wali nuwasir jaqerakïnwa. Mä kutejja, wali umatäsajj casarasiñatak parlataparuw colerampi atipayasisajj jiwayäna. Ukatwa 20 maratak carcelar jistʼantapjjäna. Carcelansa ukham jaqëskakïnwa. Tiempompejj mamapaw mä jilïr irpiri jilatar visittʼañapatak mayïna, ukhamatwa Hans jilatajj Bibliat yatjjatañ qalltäna. Jupajj akham siwa: “Nayrajj kunjam jaqëkayättï uk apanukuñajj wali chʼamänwa. Bibliankir pä textonakaw wal yanaptʼawayitu. Mayajj Isaías 55:7 textowa, ukan akham siwa: ‘[Jan wali] jaqejj sarnaqäwipjja apanukpan’ sasa. Mayasti 1 Corintios 6:11 textorakiwa, ukanjja jan wali lurañanak apanukupkäna ukanakat parlkasajj akham siwa: ‘Jumanakat yaqhepajj ukhamäpjjayätawa’ sasa. Jehová Diosajja, walja maranakaw suma jaqëñajatak pacienciampi, espíritu santompi yanaptʼawayitu” sasa. Hans jilatajj carcelankkasaw bautisasïna. 17 mara chikatanitwa carcelat mistjjäna. Jupajj saskakiwa: “Jehová Diosarojj wali khuyaptʼayasirïtapatsa, perdonasirïtapatsa walpun yuspärta” sasa.

15. ¿Kunsa walja jaqenakajj lurapjje, ukampis Biblian kamsisa?

¹⁵ Kʼarisiñajj ukhamarakiw jan walïkiti. Jichhürunakanjja,  impuesto jan pagañatakisa, juchap imtʼañatakisa jaqejj kʼarisikiwa. Ukampis Jehová Diosajj ‘cheqapa Diosawa’ (Sal. 31:5). Ukhamasti cristianonakajj cheqwa parlañasa, janipuniw kʼarinak parlañasäkiti, ukwa Jehová Diosajj mayistu (Efe. 4:25; Col. 3:9). Cheq parlañajj chʼamäkchinisa, jan ukajj phenqʼachatas uñjaskchiñänejja, janipuniw kʼarisiñasäkiti (Pro. 6:16-19).

16. ¿Nayrajj kunjam jaqëkayätantï ukanak apanukuñatakejj kunas yanaptʼistaspa?

¹⁶ Nayrajj kunjam jaqëkayätantï ukjja, janiw chʼamasampikejj apanuksnati. Sakura, Ribeiro, Stephen, Hans jupanakajja, nayrajj kunjam jaqëpkäntï uk apanukuñatakejj wal chʼamachasipjjäna. ¿Kunas jupanakar yanaptʼawayi? Diosan Arupampi espíritu santompiw yanaptʼawayi (Luc. 11:13; Heb. 4:12). Jiwasatï Biblia sapüru liyiñäni, ukanakat lupʼiñäni, ukarjam sarnaqañatakis chʼama, yatiñanïña Jehová Diosar sapa kuti mayisiñäni ukhajja, ukhamarakiw espíritu santojj yanaptʼistani (Jos. 1:8; Sal. 119:97; 1 Tes. 5:17). Tantachäwinakatak wakichtʼasiñäni, ukarus jan faltasis sararakiñäni ukhajja, Diosan Arupasa espíritu santosa yanaptʼarakistaniwa (Heb. 10:24, 25). Diosan markapanjja revistanaka, JW Broadcasting, JW Library programa, internetankir jw.org cheqaw utjaraki, ukanakaw yanaptʼarakistaspa (Luc. 12:42).

17. ¿Kunsa jutïr yatichäwin yatjjataskañäni?

¹⁷ Kunanaktï cristianonakajj janipun lurañasäki ukanakwa mä qhawqha uñjawaytanjja. Ukampis Jehová Diosampi suma jaqet uñjatäñatakejj janiw ukanakak apanukuñasäkiti, jan ukasti, Diosajj churkistu uka machaq jaqëñampiw wiñayatak isthapisiñasa. Kunjamsa uk lursna ukwa jutïr yatichäwin yatjjataskañäni.