1, 2. Ka hasaminarubei fiú gürigia hawagu gefentiña luagu Heowá?

AÑAHEINHAÑA saragu gürigia ariñagutiña luagu buidu lan hagaburi gefentiña luagu Heowá. Kei hénpulu, ayanuhati aban abürühati gíriti Anton Gill tidan aban liliburun luagu le asuseredubei houn Gefentiña Yamani lábugiñe hagumadihan nazis. Ariñagati weiri lan meha hayereegun Gefentiña houn nazis, ani lídanbei irumu 1939 añaheinhaña meha 6,000 Gefentiña lidan fulasu le hayusurubei nazis lun hadaürüniña gürigia. Ariñagati giñe íbini lan meha súfuri hamá saragu, gayaraati meha lafiñerúniwa hawagu ani anihein meha úarani hadan, darangilu haña meha lábugiñe óuchawaguni ani úaragua hagía lun Bungiu.

² Málügili harihin fiú gürigia ha awinwandubaña Suruáfürika igaburi libe le hawagu lubúeingu Bungiu. Furumiñe, máhatiña meha gumadimatiña lun hadamuridagun Gefentiña ha ámuñegueinarügüti hakolorun lidan ligiaméme fulasu. Gama lumoun, weyu 18 lidan duusu-hati lidan irumu 2011, aba hadamuridagun hóugiñe 78,000 Gefentiña ha lídangiñetiña ámuñegueinarügü rasa, ha Suruáfürikana luma lídangiñe amu burí ageiraü le yarafabei lidan aban táhureragüle bali lidan uburugu Johannesburgo lun haganbun aban programa luáguti Lererun Bungiu. Aba lariñagun aban hádangiñe  ha arihibaña lau fulasu ligía: “Marihinñahagidina yebe saragu gürigia óusera buidu. Buiti hasansiragun súngubei. Ani harumati hígiruni fulasu. Gama lumoun, létima aweiridagüdübarun nanigi buidu lan hóuseragun hungua íbini ámuñegueinarügü lan hirasan”.

3. Ka uagu mítaran habéi wíbirigu kei ha híbiri gürigia?

³ Waganbuni dimurei burí le hámagiñe gürigia ha mama Gefentiña arufudati luagu ua lan amu óundaruni le ídanbei ñein lan saragu úarani lidan sun ubóu kei wóundarun (1 Fe. 5:9). Ka uagu mítaran wabéi kei lílana amu burí óundaruni? Ladüga lau tídehan Bíbülia luma lídehan lani Bungiu sífiri sandu, áfaaguatiwa lun wagidaruni binadu igaburi wawariua ani lun warufudun iseri igaburi (Kol. 3:9, 10).

4. Kaba wakutiha lidan arütíkulu le, ani ka uagu?

⁴ Guentoti, mosu wígiruni binadu igaburi sunsuinagubei. Lidan arütíkulu le warihibei ida luba lan wagidaruni binadu igaburi wawariua luma ka lan uagu súdini lubéi wadügüni. Warihibei giñe gayara lan hasansirun gürigia íbini adügaaña lan saragu katei wuribati. Ani wakutihabei ka lan gayaraabei hadügüni ha lǘhañabaña lidan inarüni lunya móuserun hamani binadu igaburi. Ka uagu megei wabéi lun laritaguagüdüniwa katei le woun? Híruti añahein lan fiú gürigia ha meha kristiánugu furumiñe móunigiraguntiña houngua ani ábaya hagumeserun asaminara luma óusera kei meha lubaragiñe heseriwidun lun Heowá. Ligía megei wabéi sun wagía waritaguni eweridihani le: “Le lubeiti haritaguabei luagu deregüdagua lan léibugun luma Bungiu, góunigila, ábürühadügüliñein” (1 Ko. 10:12).

5. a) Afuranguagüda huméi lau aban hénpulu ka lan uagu lunti lubéi wagidaruni binadu igaburi wawariua lau lóufudagun (ariha humóun iyawaü to lídanboun lagumeseha arütíkulu). b) Ka burí katei lánina binadu igaburi iridúbei lidan Kolosana 3:5-9?

⁵ Kaba hamuga san wadüga anhein wiye tubéi wadaüragun ani híngitu? Ma wéibaaguña hamuga aragachoun? Ítarameme, súdiniti lun gaganbadi wamá lun gumadi lun wígiruni wadügüni katei burí le iyereegubei lun Heowá. Ru lumuti Pábulu adundehani furanguti le houn kristiánugu ha lánina lidaani: “Ígira huméi sun burí katei le”. Guentó wayanuha luagu bián figóu le uágubei layanuha Pábulu: agamariduni mamarieidunga luma ladügǘn katei wíyeti (aliiha huméi Kolosana 3:5-9).

6, 7. a) Kei lariñaguni Pábulu, ka lunbei wadügüni lun wagidaruni binadu igaburi wawariua? b) Ida liña meha tibagari Sakura, ani ida liña tasagarun erei lun tasansirun?

⁶ Agamariduni mamarieidunga. Dan le tayusuruni Bíbülia dimurei agamariduni mamarieidunga, tayanuhaña luagu sun luwuyeri agamariduni hadan bián gürigia, aban wügüri tuma aban würi ha mamarieidungiña ligibugiñe lúrudu. Ariñagati Pábulu houn kristiánugu lun hígiruni luriban hayumahan. Mini lan le mosu lan hagidaruni sun ayumahani wuribati hawariua. Gayaraati hénrengu lan katei le, gama lumoun gayaraati ladügǘniwa.

⁷ Ariha waméi le asuseredubei tun aban nibureintu hapónna gíritu Sakura. * Dan le aweirideina tubéi, sandiguatu meha tungua tábugua ani hírutu meha. Lun tasandiragun tungua buidu, dan le 15 lubéi irumu tau aba tagumeserun arounra hama ámuñegueinarügü wügüriña. Kei resultóu, ǘrüwañanu tirahüñü taragachun. Abahüdaguatu: “Furumiñe chóuruti meha nasandiragun nungua dan le narounrun hama eyeriñu, sanditina meha mégeiwa nan ani hínsiñewa nan. Gama lumoun, lau lásügürün dan, aba machourun lan nasandiragun nungua”. Sigitu Sakura lidan ibagari le darí tagunfulirun 23 irumu. Ábati tagumeserun aturiahoun Bíbülia hama Gefentiña. Hínsiñeti meha le tafurendeirubei tun. Lau lídehan Heowá, chülüti dan lun masandirun tan lanarime duru luma busiganu, ani aba tígiruni luriban ibagari ligía. Guentó teseriwiduña kei prekursora ani masandiragunharu tungua tábugua.  Ariñagatu: “Gúndaatimatina lau nasandiruni línsiñehabu Heowá sagü weyu”.

8. Ka burí katei gayaraabei ladügün lun larihiniwa Heowá kei gürigia wíyetiña?

⁸ Ladügǘn katei wíyeti. Dimurei le áfuachubei tidan furumiñetu dugumedu ani le ásügürawagüdübei tidan Bíbülia kei “katei wíyeti” gíbeti lila, mámarügüñein figóu lánina agamariduni. Gayaraati layusurún lun layanuhóun luagu luriban échuni lánina agumulahani luma labahüdawagún bulagiadi lun héherahan amu (2 Ko. 7:1; Efe. 5:3, 4). Gayaraati giñe layanuhaña lan luagu katei wíyeti le hadügübei gürigia aramudaguarügü, kéiburi taliihóun líburu to ayanuhatu luagu agamariduni o taríawagun iyawaü luma bidéu lánina agamariduni. Gayaraati lanügüniña katei le gürigia lidoun échuni wíyeti lun hamulidaagun houngua (Kol. 3:5). *

9. Ka gayaraabei lasuseredun ánhawa adüga lun laweiridagun wayumahan agamariduni?

⁹ Gürigia ha héchubaña aríagua iyawaü o bidéu lánina agamariduni ábatima laweiridagun hayumahan luagu agamariduni. Kei resultóu, aba siñá lan hawinwandun sin agamariduni. Ariñagatiña fiú akutihatiña ha lan gürigia ha héchuhañabaña aríagua iyawaü luma bidéu lánina agamariduni, ítara liña lan hasandiragun houngua kei ha gánibalin bisiu lánina átaguni luma tayusurún düroga. Maweiriduntu wanigi luagu weiri lan luriban efekütu le lánibei taríawagun iyawaü luma bidéu lánina agamariduni hawagu gürigia. Sanditiña gürigia hagía aba lanarime busiganu, magunfuliruntiña buidu lau hawadigimari, magundantiña lidan habagari hama haduheñu, ígiraguni o íbini lun háfaragun houngua. Lárigiñe lerederun aban wügüri aban irumu maríagunga iyawaü luma bidéu lánina agamariduni, ariñagati: “Lǘhabugaha masandirun nan inebesei nuougua”.

10. Ida liña ladüga Ribeiro lun lígiruni échuni lánina taríawagun iyawaü luma bidéu lánina agamariduni?

¹⁰ Gíbetiña gürigia áfaagutiña súnwandan lun hígiruni échuni lánina taríawagun iyawaü luma bidéu lánina agamariduni. Gama lumoun, gayaraati hagañeirun, kei larufuduni lani aban wügüri Brasilina gíriti Ribeiro hénpulu. Dan le meha aweirideina lan, aba lidin lúbiñegiñe ani aba lawadigimaridun lidan aban fulasu ñein lubéi taransehóua gárada lunya tayusurún. Gayaraati meha laríagun garüdia to tánina iyawaü lánina agamariduni ñein. Abahüdaguati: “Aba aweirideina lan bisiu lánina laríawagun katei lánina agamariduni nuagu darí lun busenhadina lan burí táfuridun würi to úmaboun nawinwanda múnadagiñe lun gayara lan naríagun bidéu lánina agamariduni”. Luagu aban weyu, dan le lídanñein lubéi luadigimari Ribeiro, aba larihin aban líburu gíritu El secreto de la felicidad familiar taganagua líburu to lunboun tagünrinchawagun. Aba lárügüdünu ani aba lagumeserun aliihoun. Adügati le laliihabei tidan lun lagumeserun aturiahoun Bíbülia hama gefentiña luagu Heowá. Gama lumoun, lǘti meha lubá gayara lan lígiruni bisiu ligía. Ka íderagubalin? Ariñagati: “Nafurieidun, naturiahanu Bíbülia luma nasaminarun luagun le nafurendeirubei adügati lun laganwoundun nínsiñehabu luagu ligaburi Heowá. Ítara liña aba lan wéiritima lan ínsiñeni le nasandirubei luagu Heowá sügǘ lau nayumahan naríagun iyawaü lánina agamariduni”. Lau tídehan Bíbülia luma lau lídehan lani Bungiu sífiri sandu, gidá lumuti Ribeiro binadu igaburi luáriua. Aba labadiseirun ani guentó leseriwiduña keisi wéiyaali lidan afiñeni.

11. Ka lunbei wadügüni sun wagía lun méiguadun wamá lidoun taríawagun iyawaü luma bidéu lánina agamariduni?

¹¹ Ariha waméi adüga lan Ribeiro amu katei, mama aliiharügü lumutu Bíbülia. Mosu meha giñe lasaminarun luagun le laliihabei ani ígira ligía lun lachülürün tidoun lanigi. Ani amuriahati giñe ídemuei luma Bungiu. Ídehati  lubeiti lararamagun asaminara luma lafurieidun lúntima léredun lafiñen luagu Heowá ani íderagua lumuti giñe lun lígiruni échuni lánina taríawagun iyawaü lánina agamariduni. Súngubei wagía lunti línsiñedun Heowá woun saragu ani iyereegu ligíame le wuribabei woun lun méiguadun wamá lidoun échuni wuribati le (aliiha huméi Sálumu 97:10).

12. Ka íderagubalin Stephen lun lígiruni igañi luma anabahani?

¹² Añahein gürigia fureseti hagañidun ani aba hariñagun dimurei le gáriti houn amu. Furanguti adüga lan igaburi le lun hasufurirun sun iduheñu. Ariha waméi likesin aban úguchili Australiana gíriti Stephen. Abahüdaguati: “Yúsutina meha dimurei wéinamuti ani abaha nagañidun luagu furumiñeguarügü katei. Fánreinguatina tuma nani weiriou ǘrüwa wéiyaasu ani wígiragua yebe”. Gama lumoun, aba hagumeserun aturiahoun Bíbülia hama gefentiña luagu Heowá. Ka buiti lanügübei lagumeserun Stephen afalarei eweridihani le tídanbei Bíbülia? Ariñagati aba lan labuidurun libagari hama liduheñu. Furumiñe, ítara liña meha Stephen kei aban katei le ménrengunti laduurun, ánheinti guentó sanditi aban óunwenbu darangilaü. Uguñe weyu, leseriwiduña Stephen keisi ídehati lidan damuriguaü ani barüharu lani weiriou saragu irumu eseriwida kei prekursora. Aba hariñagun wéiyaaña lidan afiñeni ha lídanbaña lani damuriguaü: “Aban íbiri darangiluti Stephen, ǘnabuguti ani benefati”. Ariñagatiña giñe marihin hamagili lan agañida. Subudi lumuti Stephen mama lan lau lubafu guánarügü ladügei asansiruni le. Ariñagati: “Ibiha naali sun abiniruni le ladüga nánharun lun ídemuei le líchugubei Heowá nun lun nasansiruni nigaburi sunsuinagubei”.

13. a) Ka uagu weiri lubéi luriban agañiduni? b) Ka gumadi ichugúbei woun tidan Bíbülia?

¹³ Rúati gumadi woun tidan Bíbülia lun wígiruni igañi, anabahani luma agúaraguni (Efe. 4:31). Libe-agei dan, barüti katei le wuribu. Gayaraati samina hamá saragu gürigia mariban lan katei le, gama lumoun, mínsiñeti lun Bungiu. Ligía gíbeeña lubéi kristiánugu mosu hígiruni igaburi le lun harufudun aban iseri igaburi (aliiha huméi Sálumu 37:8-11).

14. Gayaraati san lasansirun aban gürigia furundeti lun darangilu lan?

¹⁴ Warihaali hénpulu lani Hans, le eseriwidubei keisi wéiyaali lidan afiñeni Austria. Ariñagati íbiri le arihibei lau hawadigimari wéiyaaña lidan afiñeni ha lídanbaña lani damuriguaü luagu: “Ligía aban hádangiñe íbirigu darangilatimatiña ha gayaraabei basubudiruniña”. Gama lumoun, mama ítaragubeiñein Hans. Gumeseti meha átagua lúmagiñe nibureingili ani fásiti meha. Aban weyu dan le bacharuañein lubéi, aba lagañidun saragu darí lun láfarunu ladari hilagubei. Aba ladaürǘn luagu wein irumu. Gama lumoun, masansirun tumuti furisun ligaburi. Lau lásügürün dan, aba tamuriahan lúguchu luma aban wéiyaali lidan afiñeni lun lidin arihei furisunrugu, ani aba lagumeserun Hans aturiahoun Bíbülia. Ariñagati: “Hénrenguti meha nun nígiruni binadu nigaburi. Íderagua lumutina bián bérusu tídangiñeti Bíbülia. Le furumiñeti Isaíasi 55:7, le ñein lubéi lariñaga: ‘Ígiralei wügüri le wuribabei lagübüri lémeri’. Le libiaman, 1 Korintuna 6:11. Ariñagati ñein añahein lan fiú gürigia ha meha adügübaña figóu wéinamuti, aba lan hígiruni dan le hadügagunbei houngua kristiánugume. Luagu saragu irumu, íderagua lumutina Heowá lau gurasu lau lani sífiri sandu lun narufudun aban iseri igaburi”. Badiseiti Hans dan le furisunrugu lubéi. Furiti lárigiñe lagunfulirun disedü irumu dimí furisunrugu. Ariñagati: “Seremei niña lun Heowá luagu lanarime lugudemehabu luma luagu feruduna lánina”.

15. Ka hadügübei saragu gürigia, ani ka tariñagubei Bíbülia luagu katei le?

¹⁵ Iyeeni ábanya katei le lánina binadu igaburi.  Kei hénpulu, eyeehatiña gürigia lun mafayeirun hamani liseinsuna gumadi o lun mafayeihan hamá luagu hachara. Ánheinti Heowá, ligía Lubungiutebei inarüni (Sal. 31:5). Ligía líchugunbei gumadi woun lun wariñaguni inarüni súnwandan, ani lun mayanuhan wamá iyeeni wámagua (Efe. 4:25; Kol. 3:9). Ligía lunti lubéi wariñaguni inarüni íbini wásügürün busiganu o íbini mabuidunbei lan woun (Ari. 6:16-19).

16. Kaba íderaguawa lun wagidaruni binadu igaburi wawariua?

¹⁶ Siñati wagidaruni binadu igaburi wawariua lau wabafu guánarügü. Dandu Sakura, Ribeiro, Stephen luma Hans mosu meha háfaagun saragu lun hígiruni binadu ligaburi hawinwandun. Ida liña san hadüga lun hígiruni? Seremei lun ubafu le tíchugubei Lererun Bungiu luma lani sífiri sandu (Luk. 11:13; Ebü. 4:12). Gayaraati giñe wibihini ubafu ligía anhoun waliiha Bíbülia sagü weyu, ráramagua wagía asaminara luagu le waliihabei ani amuriaha wagía luma Heowá súnwandan lun líchugun lichú aau woun luma erei lun gaganbadi wamá lun le tariñagubei Lererun (Hos. 1:8; Sal. 119:97; 1 Tesa. 5:17). Líchuguba giñe sífiri sandu tuma Bíbülia ubafu woun ánhawa aransera lubá adamuridaguni ani ñüdün wagía adamuridagua (Ebü. 10:24, 25). Gayaraati giñe wayusuruni katei burí le tíchugubei lóundarun Heowá woun, kéiburi garüdia, JW Broadcasting, JW Library luma páhina lidan Internet jw.org (Luk. 12:42).

17. Kaba wariha lidan leweñegua arütíkulu?

¹⁷ Arihaadiwa fiú échuni wuribati le lunbei hígiruni kristiánugu sunsuinagubei. Gama lumoun, ligíarügüñein san mégeiwa lun lagundaarun Bungiu wau? Uá, mosu giñe warufudun aban iseri igaburi ani lun wakipuruni igaburi ligía lidan sun wabagari. Lidan le aban arütíkulu warihibei ida luba lan wadügüni.