1, 2. Momo be Iehova ena Witnes taudia dekenai dahaka idia itaia?

TAUNIMANIMA momo be Iehova ena taunimanima edia kara namodia idia herevalaia. Hegeregere, toretore tauna ta, Anton Gill, ese Nazi Germany ai idia noho tadikaka taihu ia herevalaia, ia gwau: “Iehova ena Witnes taudia edia gini siri karana dainai, Nazi taudia ese idia badu henidia. . . . Lagani 1939 ai, idia 6,000 bamona be [dibura kamepa ai idia atodia].” Ma ia gwau, ena be Witnes taudia ese dagedage bada idia davaria, to edia gaukara idia karaia namonamo, idia laloa maoromaoro, edia Dirava idia badinaia, bona idia lalotamona.

² South Africa taudia haida ese Dirava ena taunimanima huanai unai bamona kara namodia idia itaia danu. Guna, unai tano dekenai idia noho kopina kala idau Witnes taudia be idia hebamo lasi. To Sunday, December 18, 2011 ai, Johannesburg ena siti ai ia noho steidiam badana dekenai, iseda tadikaka taihu 78,000 mai kahana idia hebou, edia kopina kala be idauidau, idia be South Africa bona kahirakahira idia noho tanodia amo idia mai. Steidiam naria tauna ta, ia gwau: “Inai be nega ginigunana lau itaia taunimanima be idia kara kava lasi. Ibounai be dabua namodia idia hahedokilaia. Bona umui ese steidiam umui  hagoevaia namo herea. To lau hoalaia gauna badana be umui ibounai be bese idauidau taudia.”

3. Dahaka dainai iseda tanobada ibounai tadikaka oreana be idau?

³ Witnes lasi taudia ese unai bamona hereva idia gwauraia neganai, idia hahedinaraia iseda “tadikaka oreana tanobada hegegemadai” be idau. (1 Pet. 5:9) To, dahaka dainai inai orea be orea ma haida amo ia idau? Dirava ena Hereva bona ena lauma helaga ena heduru amo, ita be iseda “mauri gunana” ita kokia diba. Bona ena gabu ai, ‘mauri matamata dabua bamona ita hahedokilaia.’​—⁠Kol. 3:9, 10.

4. Inai stadi ai dahaka do ita herevalaia, bona dahaka dainai?

⁴ Iseda mauri gunadia ita kokia momokani be namo. Inai stadi ai, ita ese iseda mauri gunana ita kokia dalana, bona unai ita karaia ena badina do ita herevalaia. Danu, do ita itaia edena bamona ta be ena mauri ia haidaua diba, herevana ia be kara kereredia ia karaia. Bona lagani momo orea lalonai idia noho taudia ese edia kara gunadia idia dadaraia totona, do idia karaia gauna do ita herevalaia danu. Dahaka dainai inai ita herevalaia be namo? Guna Iehova idia hesiai henia taudia haida be idia gima lasi dainai, edia mauri gunana idia badinaia lou. Unai dainai inai hadibaia herevana ita laloatao be namo: “Bema tau ta ia laloa ia gini goada noho, namona be ia naria namonamo, dika ia moru.”​—⁠1 Kor. 10:12.

5. (a) Dahaka dainai mauri gunana ita kokia haraga be namo? (Laulau ginigunana herevalaia.) (b) Kolose 3:5-9 hegeregerena, edena bamona karadia be mauri gunana ena kara?

⁵ Bema emu dabua ia miro o mai ena bonana dikana, dahaka do oi karaia? Karaharaga unai miro dabuana do oi kokia. Unai hegeregerena, bema ita diba ita be Dirava ia inai henia karana ta ita karaia, gau badana be iseda kara ita haidaua. Ita ura Paulo ese ena negai idia noho Keristani taudia dekenai ia henia sisiba ita badinaia, ia gwau: “Namona be inai gaudia ibounai umui atoa siri.” Paulo ese ia herevalaia kara dikadia rua mani ita herevalaia, unai be matabodaga karadia bona kara mirodia.​—⁠Kolose 3:5-9 duahia.

6, 7. (a) Paulo ese edena dala ai ia hahedinaraia ita gaukara goada be namo mauri gunana ita kokia totona? (b) Sakura ena mauri dalana be edena bamona, bona edena dala ai unai mauri dalana ia rakatania?

⁶ Matabodaga karadia. Baibel lalonai, inai hereva “matabodaga karadia” ese idia headava lasi tau bona hahine idia mahuta hebou eiava tatau (o hahine) idia sihari heheni karana ia herevalaia. Paulo ese Keristani taudia ia hamaoroa edia “tauanina ena kahadia idauidau” idia “hamasea” totona, unai be “matabodaga karadia” karaia urana. Ena hereva ena anina be do ita gaukara goada ura dikadia ita kokia momokani totona. Ena be unai ita karaia be auka, to ita kwalimu diba.

⁷ Japan taihu ta ladana Sakura * dekenai ia vara gauna mani ita laloa. Ia tubu daekau lalonai, nega momo ia lalohisihisi bona ia mamia ia be sibona ia noho. Unai hemami kokia totona, ena mauri lagani be 15 neganai, ia be tatau idauidau ida ia mahuta hebou matamaia. Bona nega toi iena bogana lalonai ia noho beibi ia hamasea. Ia gwau: “Matamanai, lau mamia matabodaga karadia lau karaia dainai lau moale, bona lau laloa ma haida ese lau idia lalokau henia. To, nega momo matabodaga karadia lau karaia dainai, egu moale ia boio matamaia.” Sakura be unai mauri dalana ia badinaia ela bona  ena mauri lagani be 23. Gabeai, Witnes taudia ida Baibel ia stadilaia matamaia. Ia dibaia gaudia ia ura henia, bona Iehova ena heduru dainai hemarai bona matabodaga karadia karaia urana ia dadaraia diba. Hari Sakura be regula painia gaukara ia karaia bona sibona noho hemamina ia mamia lasi. Ia gwau: “Lau moale bada badina dina bona hanuaboi Iehova ena lalokau lau mamia.”

8. Edena kara haida dainai Dirava vairana ita miro diba?

⁸ Kara mirodia. Baibel lalonai, inai hereva “kara mirodia” be matabodaga karadia sibona ia herevalaia lasi. Unai hereva ese kuku ania karana o hevaseha dikadia ia herevalaia diba. (2 Kor. 7:1; Efe. 5:3, 4) Bona taunimanima ese hehuni ai idia karaia karadia ia herevalaia diba danu, hegeregere mahuta hebou karana idia herevalaia bukadia duahia o ponografi laulaudia itaia karana. Unai ese ta ia veria diba sibona ena kopina ia gadaralaia totona.​—⁠Kol. 3:5. *

9. “Matabodaga urana” abia karana ena dika be dahaka?

⁹ Ponografi laulaudia idia itaia momo taudia be “matabodaga urana” do idia abia matamaia, bena mahuta hebou karana do idia ura henia dikadika. Tahua gaukara idia karaia taudia idia gwau, ponografi laulaudia itaia hanaihanai karana be kekero muramura bona drag abia hanaihanai karana hegeregerena. Unai dainai ponografi laulaudia itaia hanaihanai karana be mai ena dika​—⁠unai kara dainai ta be do ia hemarai, ena moni gaukara do ia karaia namonamo lasi, ena ruma bese lalonai moale be lasi, ena headava ia hadokoa bona sibona ia hamasea diba. Tau ta be lagani ta lalonai ponografi laulaudia ia itaia lasi murinai, ia gwau: “Hari lau be sibona lau matauraia diba.”

10. Edena dala ai Ribeiro ese ponografi laulaudia itaia karana ia dadaraia?

¹⁰ Taunimanima momo be idia hekwarahi bada ponografi laulaudia idia dadaraia totona. To idia kwalimu diba. Brazil tauna Ribeiro mani ita laloa. Iena mauri lagani be 19 neganai, iena ruma bese ia rakatania bona pepa gunadia amo pepa matamatadia idia karaia faktori ai ia gaukara. Unuseniai ponografi magasin ia itadia matamaia. Ia gwau: “Metairametaira unai kara lau manadalaia. Ponografi laulaudia itaia urana be ia goada momokani dainai, lau ida ia noho hahinena be ruma ia rakatania neganai, maoromaoro ponografi vidio lau itadia.” Bena nega ta gaukara gabunai, Ribeiro ese buka haida ia itaia, idia huanai inai buka ladana Ruma Bese Ena Moale Havaraia Dalana ia itaia. Unai buka ia abia bona ia duahia. Ia duahia gaudia ese ena lalona idia veria dainai, Iehova ena Witnes taudia ida Baibel ia stadilaia matamaia, to ia hekwarahi bada ponografi laulaudia itaia karana ia dadaraia totona. Dahaka ese ia durua? Ia gwau: “Guriguri, Baibel stadilaia, bona lau dibaia gaudia laloa dobu karana ese lau ia durua dainai, Dirava ena kara lau ura henia bona egu lalokau ia dekenai ia goada matamaia, bena ponografi laulaudia itaia karana lau dadaraia.” Dirava ena Hereva bona ena lauma helaga ena heduru amo Ribeiro ese ena mauri gunana ia kokia, bapatiso ia abia, bona hari ia be kongrigeisen ena elda ta.

11. Ponografi laulaudia itaia karana dadaraia totona, ta be dahaka ia karaia be namo?

¹¹ Ribeiro ese ponografi laulaudia itaia karana ia dadaraia totona, ia ese Baibel ia stadilaia sibona lasi. To Baibel lalonai ia duahia herevadia ia laloa dobu bona ena kudouna ai ia atoa. Danu, heduru totona Iehova ia  guriguri henia. Unai gaudia ese Ribeiro ena lalokau Dirava dekenai ia hagoadaia bona ponografi laulaudia itaia urana ia dadaraia. Ponografi laulaudia itaia karana dadaraia totona, namona be iseda lalokau Iehova dekenai ita habadaia bona kara dika ita dadaraia.​—⁠Amosa 5:15 duahia.

12. Dahaka ese Stephen ia durua dainai, badu bona hadikaia herevadia gwauraia karana ia dadaraia?

¹² Idia badu haraga taudia be vaia hadikaia herevadia idia gaukaralaia edia badu idia hahedinaraia totona. To, unai bamona kara ese ruma bese ena moale ia hadikaia diba. Stephen be tama ta Australia amo, ia gwau: “Lau be hereva dikadia lau gwauraia momo bona gau maragidia dainai lau badu haraga. Lau bona egu adavana be nega toi ai parara bona kahirakahira ai divos.” Gabeai, idia ruaosi be Witnes taudia ida Baibel idia stadilaia matamaia. Stephen be Baibel ena sisiba ia badinaia matamaia neganai, dahaka namo ia vara? Ia gwau: “Emai ruma bese maurina ia namo. Iehova ena heduru dainai lalomaino lau abia, to guna lau be badu haragaharaga tauna.” Hari Stephen be hesiai tauna, bona ena adavana be lagani haida lalonai regula painia gaukara ia karaia vadaeni. Stephen ena kongrigeisen elda taudia idia gwau: “Stephen be hereva momo lasi tauna, ia be gaukara goadagoada tadikakana, bona ia manau.” Bona idia gwau nega ta idia itaia lasi ia badu. Iena kara ia idau dainai, Stephen be sibona ia hanamoa, a? Ia gwau: “Unai hahenamo namodia lau abia, badina Iehova ena heduru amo lau be egu kara lau haidaua diba.”

13. Dahaka dainai badu karana be dika, bona Baibel be dahaka sisiba ia henia?

¹³ Baibel ese ita ia hadibaia badu, hadikaia herevadia, bona boiboi badabada karana ita dadaraia totona. (Efe. 4:31) Unai bamona kara ese vaia dagedage ia havaraia. Hari, momo idia laloa badu mai dagedage ida be vaia taunimanima edia kara, to iseda Havaraia Tauna ese unai bamona kara ia inai henia. Unai dainai, iseda tadikaka momo be edia kara idia haidaua, bona mauri matamata idia badinaia.​—⁠Salamo 37:8-11 duahia.

14. Ia badu momo tauna be manau tauna ai ia lao diba, a?

¹⁴ Austria ai, tadikaka ta ladana Hans be kongrigeisen ta ena elda. Unai kongrigeisen ena elda orea ena kodineita, ia gwau: “Hans be manau tadikakana momokani.” To guna Hans be manau tauna lasi. Iena mauri lagani be 19 bamona neganai, kekero muramura ia abia matamaia bona ia dagedage bada. Nega ta ia kekero neganai, ia badu bada dainai ena turana kekeni ia alaia. Unai dainai lagani 20 dibura ruma ai ia noho, to Hans be ena kara ia haidaua lasi. Gabeai, iena sinana ese elda ta ia noia dibura ruma ai iena natuna do ia vadivadi henia, bona Hans be Baibel ia stadilaia matamaia. Ia gwau: “Egu mauri gunana lau kokia be mai ena hekwarahi. To lau ia durua sirina be Isaia 55:7 ia gwau: ‘Kara dika taudia ese edia dala do idia rakatania,’ bona 1 Korinto 6:11 ese kara dika idia dadaraia taudia ia herevalaia, ia gwau: ‘Umui haida be guna unai bamona umui karaia.’ Lagani momo lalonai Iehova ese iena lauma helaga amo lau ia durua, mauri matamata lau badinaia totona.” Hans be dibura ruma ai ia do noho neganai, ia bapatiso, bona lagani 17 mai kahanai murinai, ia idia ruhaia. Ia gwau: “Iehova ena hebogahisi bona dika gwauatao karana dainai ia lau tanikiu henia bada.”

15. Taunimanima be vaia dahaka idia karaia, to Baibel be dahaka ia gwau?

¹⁵ Koikoi danu be kara gunana ta. Hegeregere, taunimanima momo idia koikoi badina  idia ura lasi takisi idia henia eiava idia karaia kererena idia hunia. To, Iehova be “kara momokani ena Dirava.” (Sal. 31:5) Unai dainai ia ura ia idia tomadiho henia taudia ibounai be “hereva momokani” idia gwauraia, bona idia “koikoi lasi.” (Efe. 4:25; Kol. 3:9) Oibe, namona be hereva momokani ita gwauraia, herevana ia be auka eiava hemarai gauna.​—⁠Aon. 6:16-19.

16. Edena dala ai ta be ena mauri gunana ia kokia diba?

¹⁶ Ta be sibona ena goada amo ena mauri gunana ia kokia diba lasi. Sakura, Ribeiro, Stephen, bona Hans be idia gaukara goada edia kara gunadia idia kokia totona. Idia ia durua gauna be Dirava ena Hereva ena siahu bona ena lauma helaga. (Luka 11:13; Heb. 4:12) Ita danu be unai gaudia rua amo heduru ita abia diba, bema dina ta ta ai Baibel ita duahia, ita laloa dobu, bona ena sisiba ita badinaia totona, aonega bona goada totona ita guriguri. (Ios. 1:8; Sal. 119:97; 1 Tes. 5:17) Danu, Dirava ena Hereva bona lauma helaga ena heduru ita abia diba, bema kongrigeisen heboudia totona ita hegaegae bona ita lao henidia. (Heb. 10:24, 25) Ma danu, ita ura Iehova ena orea ese ita dekenai ia henia gaudia ita gaukaralaia namonamo, hegeregere iseda magasin, JW Broadcasting, JW Library, bona jw.org.​—⁠Luka 12:42.

17. Vaira wiki ena stadi ai dahaka do ita herevalaia?

¹⁷ Inai stadi ai, ita ese Keristani taudia ese idia dadaraia be namo kara dikadia haida ita herevalaia. To, Dirava ena lalonamo ita abia totona, unai sibona be hegeregere, a? Lasi, namona be mauri matamata be dabua bamona ita hahedokilaia. Vaira wiki ena stadi ai unai ita karaia dalana do ita herevalaia.