1, 2. Bantu bavula bambapo amba ka pa Bakamonyi ba kwa Yehoba?

BANTU bavula bambapo pa byubilo byawama biji na bantu ba Yehoba. Muntu umo unemba mabuku aye Anton Gill, wanembele pa byapichilemo balongo ne banyenga yetu mu Germany kimye kyalaminenga kafulumende wa kipanyi kya Nazi, amba: “Bakamonyi ba kwa Yehoba bebamanyikile bingi ku kipanyi kya Nazi na mambo a byubilo byabo. . . . Byo kyafikilenga mu 1939, [mu makampu alumanamo a Nazi] mwajinga Bakamonyi ba kwa Yehoba 6,000.” Uno nnembi wanungilepo’mba nangwa kya kuba Bakamonyi bamanamine bingi, bino bamwesheshe patoka’mba ke bantu “baketekelwa, babula kubuuka bukaji inge beboba nshiji” kabiji “ba kishinka [kwi Lesa wabo], bakwatankana kabiji bekwasha.”

² Katataka papo, bantu mu kyalo kya South Africa nabo bemwenejile byubilo byawama biji na bantu ba Lesa. Myaka ya kunyuma, Bakamonyi bazungu ne bantu bafita mu kino kyalo kechi bapwanañananga ne. Pano bino, pa Mulungu pa 18 December, 2011, kyawamine bingi kumona balongo ne banyenga kukila pa 78,000, bazungu ne bantu bafita ba mu South Africa ne bafumine mu byalo bikwabo byazhokoloka kino kyalo byo bashonkenejile mu kibanza kikatampe kya mpila mu muzhi wa Johannesburg na kwiyowa kupwila kukatampe. Mukulumpe umo utala pa kino kibanza waambile’mba: “Kyo kimye kitanshi kumonapo bantu baji na byubilo byawama mu kino kibanza.  Bonse bavwala bingi bulongo. Kabiji anweba bantu mwawamisha bulongo kino kibanza. Bino kyakila pa byonse, mwakwatankana nangwa kya kuba bamo bazungu bakwabo bantu bafita.”

3. Bwanabwankazhi bwa ntanda yonse bwitulengela kupusanako byepi?

³ Byambo bya bano bantu babula Bakamonyi bimweshatu patoka’mba twi banabankazhi na balongo betu mwaya ntanda, kabiji buno bwanabwankazhi bwitupusanyako na bantu bakwabo. (1 Pe. 5:9, tubyambo twa munshi.) Ki ka kitulengela kupusanako na bantu ba mu bupopweshi bukwabo? Mambo a Lesa ne mupashi wazhila bitukwasha ‘kuvuula bumuntu bwa kala,’ ne “kuvwala bumuntu bupya.”—Kolo. 3:9, 10.

4. Ñanyi bintu byo tusakwisambapo mu uno mutwe, kabiji mambo ka?

⁴ Umvwe twavuula bumuntu bwetu bwa kala, twafwainwa kwibusha. Mu uno mutwe, tusakufunda byo twakonsha kuvuula bumuntu bwa kala ne ene mambo o kyanemena kuba bino bukiji bukiji. Tusakufunda ne ene mambo o twayukila’mba muntu nangwa byubilo byanji bitamepotu byepi, wakonsha kupimpula byubilo byanji. Kabiji tusakwisamba ne pa boba babanda mu bukine byo bakonsha kuba pa kuba’mba babule kuvwala jibiji bumuntu bwa kala. Mambo ka kwisamba pa bino o kwanemena? Kyatamakotu ke kya kuba’mba bamo baingijilanga Yehoba babwela ku bumuntu bwabo bwa kala. Onkao mambo, atweba bonse twafwainwa kumvwina lujimuno lwa kuba’mba: “Awa ulanguluka’mba waimana, ajimuke kuchina’mba wakapona.” —1 Ko. 10:12.

5. (a) Lumbululai ene mambo o twafwainwa kuvuujila bumuntu bwa kala bukiji bukiji. (Monai kipikichala kitanshi.) (b) Kwesakana na byaamba Kolose 3:5-9, ñanyi byubilo bya bumuntu bwa kala?

⁵ Mwakonsha kuba byepi inge bivwalo byenu biji na ndochi, kampe byatendeka ne kununka? Mwakonsha kwibivuula bukiji bukiji. Mu jishinda jimotu, twafwainwa kukookela mukambizho wa kuleka bukiji bukiji byubilo byatama byapusana na bikeba Lesa. Twafwainwa kukookela mukambizho Paulo ye akambizhe bena Kilishitu bajingako mu moba anji amba: “Mwafwainwa kutaya bino bintu byonse.” Twaya twisambe pa byubilo bibiji byatama byaambilepo Paulo byo twafwainwa kutaya. Abino byubilo ke bulalelale ne bubipisho.—Tangai Kolose 3:5-9.

6, 7. (a) Byambo bya kwa Paulo bimwesha byepi kuba’mba kikebewa kwingila na ngovu pa kuba’mba tuvuule bumuntu bwa kala? (b) Nyenga Sakura waikelenga bwikalo bwa mutundu ka, kabiji ki ka kyamukwashishe kuleka?

⁶ Bulalelale. Kyambo kine kyatuntululwa mu Baibolo amba “bulalelale” kilumbulula kwilaala kwa bantu babula kutwela mu masongola ne kwilaala kwa banabalume bonka bonka nangwa banabakazhi bonka bonka. Paulo wabuujile bakwabo bena Kilishitu ‘kwipaya’ “binungwa bya mibiji,” ko kuba’mba kuleka kulanguluka pa kuba “bulalelale.” Byambo bya kwa Paulo bimwesha’mba twafwainwa kwibikako pa kuba’mba tufumyemo milanguluko incha. Bino umvwe ketwibikeko, twakonsha kushinda.

⁷ Akilangulukai pa byajinga bwikalo bwa nyenga wa ku Japan aye Sakura. * Byo akomenenga, waumvwanga bingi mukose ne kumona nobe kafwako wamuta muchima. Byo afikizhe myaka 15, watendekele kulaala na banabalume bapusana pusana kuba’mba aleke kumvwa mukose. Waumvwine bingi bumvu kimye kyo asolwele patoka bintu byo apichilemo ne kwamba’mba: “Na mambo a bino byubilo, nafumishe memi asatu.” Kabiji walumbulwile’mba: “Patanshi namonanga’mba nazhikijilwa pa kuba bulalelale, mambo nalangulukanga’mba bantu bo nalaalanga nabo bantemwa bingi ne kunta muchima. Pano bino, kuba bulalelale na bantu bavula kwandengelanga kwakamwa.” Nyenga Sakura watwajijile kuba bulalelale kufikatu ne byo afikizhe myaka  23. Kepo atendekele kufunda Baibolo na Bakamonyi. Sakura watemwe bintu byo afunjilenga, kabiji na bukwasho bwa Yehoba, walekele kwizhachisha ne bumvu ne kuleka kuba bulalelale. Luno nyenga Sakura ke painiya wa kimye kyonse, kabiji kechi umvwa mukose ne. Wambile’mba: “Luno nji bingi na lusekelo mambo nayuka’mba Yehoba ubena kummwesha butemwe bwanji pa juba pa juba.”

8. Ñanyi byubilo bimo byakonsha kulengela Lesa kwitumona’mba tuji na bubipisho?

⁸ Bubipisho. Mu Baibolo, kino kyambo kyavwangamo byavula kechi bulalelaletu ne. Kyavwangamo byubilo byatama nabiji kupepa fwanka ne kusengula kubi. (2 Ko. 7:1; Efi. 5:3, 4) Kabiji kyavwangamo ne byubilo bikwabo byatama byuba muntu ku mbaji, nabiji kutanga mabuku aamba pa bulalelale nangwa kutamba bya mulekese byakonsha kulengela muntu kutendeka muteeto wa kwisuka.—Kolo. 3:5. *

9. Ñanyi bintu byatama bifumamo mu kwikala na “milanguluko yatama ibindankanya muchima”?

⁹ Bantu batamba bya mulekese kimye kyonse bekala na “milanguluko yatama ibindankanya muchima,” kabiji kyakonsha kwibalengela kulangulukangatu pa kuba bulalelale kimye kyonse. Bashayuka bataana kuba’mba kutamba bya mulekese kujitu pamo na muntu wanonkwa buzha ku malwa nangwa ku bizhima. Onkao mambo, mu kutamba bya mulekese mufuma bintu byatama bingi, nabiji kumvwa bumvu, kubula kwingila bulongo nkito, lusekelo kupwa mu kisemi, masongola kupwa nangwatu kwiipaya. Mwanamulume umo washinjile muteeto wa kutamba bya mulekese, kabiji byo papichile mwaka umo kufuma po alekejile uno muteeto, waambile’mba: “Nji bingi na lusekelo mambo luno naleka kwilengulula.”

10. Ba Ribeiro bashinjile byepi muteeto wa kutamba bya mulekese?

¹⁰ Bavula kibakatazha bingi pa kuba’mba baleke kutamba bya mulekese. Pano bino, byonka byo kyajinga kwi ba Ribeiro ba ku Brazil, bonsetu bakonsha kushinda uno muteeto. Ba Ribeiro bafumine pa nzubo saka bakiji banyike kabiji batendekele kwingila nkito ku kampanyi kalenga mapepala kufuma ku mapepala a kala. Ino nkito ibalengejile kutendeka kutamba bya mulekese mu mabuku. Bashimikizhe’mba: “Natendekeletu pachepache kunonkwa buzha ku bino bintu. Nebitemenwe bingi kya kuba naubanga inge mwanamukazhi ye naikalanga nanji wafumatu pa nzubo natolanga mafilimu a bantu baji mulekese ne kutendeka kutamba.” Kepo juba jimo ba Ribeiro byo bajinga ku nkito batajile pa mulumba wa mabuku ajinga pa mutanchi wa kwiapisha mu mashinyi kuba’mba balengeko mapepela akwabo, bamwene buku wajinga na mutwe wa kuba’mba Kintu Kilengela Kisemi Kwikala kya Lusekelo. Bamutolele ne kutendeka kumutanga. Byo bafunjile mu uno buku bibalengejile kutendeka kufunda Baibolo na Bakamonyi ba kwa Yehoba, bino papichile kimye kyabaya bingi pa kuba’mba baleke muteeto wa kutamba bya mulekese. Pano ñanyi kintu kibakwashishe kushinda? Balumbulwile’mba: “Kulomba, kufunda Baibolo, kulanguluka languluka pa bintu byo nafunjilenga, ne kusanchila Lesa pa byubilo byanji byawama, kwalengejile butemwe bo natemwa Yehoba kubaya bingi kukila kutamba bya mulekese.” Na mambo a bukwasho bwa bulume bwa Mambo a Lesa ne mupashi wazhila, ba Ribeiro bavuujile bumuntu bwa kala ne kubatizhiwa, kabiji luno ke bakulumpe mu kipwilo.

11. Ñanyi kintu kikebewa pa kuba’mba muntu ashinde muteeto wa kutamba bya mulekese?

¹¹ Twamona kuba’mba ba Ribeiro pa kuba’mba bashinde muteeto wa kutamba bya mulekese baubile bintu byavula kechi kufundatu Baibolo konka ne. Baikalanga na kimye kya  kulanguluka languluka pa byambo bya mu Baibolo pa kuba’mba bibafike pa muchima. Kulomba ne kulanguluka languluka pa byo bafunjilenga, butemwe bo batemenwe Lesa bwashinjile mujojo wa kukeba kutamba bya mulekese. Kutemwa Yehoba na muchima yense ne kushikwa byatama jo jishinda jawama bingi ja kukainamo kutamba bya mulekese.—Tangai Salamo 97:10.

12. Ñanyi kintu kyakwashishe ba Stephen kuleka bukaji ne mwenga?

¹² Bantu bazhingila bukiji javula bamwesha bukaji bwabo kupichila mu kwamba ñambilo ya mwenga. Byubilo bya uno mutundu kechi byakonsha kulengela kisemi kwikala kya lusekelo ne. Shetu umo wa ku Australia aye Stephen washimikizhe’mba: “Natemenwe bingi kutukana kabiji nazhingilanga bingi bukiji nangwatu pa bintu byabula ne kunema. Twaabenepo na bakazhi bami bimye bisatu kabiji twanengezhezhenga ne kwikana.” Kepo Bakamonyi batendekele kufunjisha bano ba mulume ne mukazhi Baibolo. Ki ka kyafuminemo ba Stephen byo kulondela mafunde a mu Baibolo? Baambile’mba: “Twatendekele kwikala bulongo mu kisemi. Kala naubanga inge muntu wamfichisha ku muchima, ponkapotu namwambila mwenga ne kumupaachila, nobe mvula. Pano bino, na bukwasho bwa Yehoba, luno ntekanya kabiji kechi nzhingila bukiji ne.” Lelo jino, ba Stephen ke ba nkwasho mu kipwilo, kabiji bakazhi babo baingila bupainiya pa myaka yavula. Bakulumpe mu kipwilo muji ba Stephen baambile’mba: “Mulongo Stephen kechi watemwa bya kwamba ne, wingila bingi na ngovu mingilo yo bamupa kabiji wipelula.” Kabiji kechi bavulukapo ne kimye kyo bazhingijilepo ne. Abya Mulongo Stephen wamba’mba wapimpwile byubilo na bulume bwanji mwine nyi? Waambile’mba: “Kwa kubula kuswa bukwasho bwa Yehoba, inge kechi napimpwile byubilo byami ne kusha bumuntu bwa kala ne.”

13. Mambo ka bukaji o bwatamina, kabiji Baibolo witujimunako amba ka?

¹³ Baibolo witukambizha kuchinuzhuka bukaji, kubwazanga ne mwenga. (Efi. 4:31) Kyakilamo kutama, abino byubilo bileta malwañano. Bantu mu ino ntanda bakonsha kumona bino byubilo amba bijitu bulongo, pano bino, kechi bileta munema kwi Mulenga wetu ne. Bavula bamwene kuba’mba pa kuba’mba bavwale bumuntu bupya, patanshi bafwainwa kuvuula bino byubilo byatama ne kwibitaya.—Tangai Salamo 37:8-11.

14. Nanchi muntu uji na bukaji wakonsha kupimpula ne kwikala wakooka muchima nyi?

¹⁴ Akilangulukai pa byajinga mulongo Hans, mukulumpe mu kipwilo ku Austria. Ukwatankanya mingilo ya jibumba ja bakulumpe mu kipwilo muji ba Hans waambile’mba: “Hans ke mulongo wakooka bingi muchima ye mwafwainwa kutemwa kwingila nanji.” Pano bino, kala ba Hans kechi byo byo bajinga ne. Byo bakijinga banyike, batomanga bingi maalwa, kabiji bakanamine bingi. Na mambo a kutoma bingi maalwa ne bukaji, baipayile mukambwe wabo, kabiji bebakashile myaka 20. Patanshi, bwikalo bwa mu kaleya kechi bwapimpwile byubilo bya ba Hans ne. Bino mu kuya kwa kimye bainabo baambijile mukulumpe mu kipwilo kuba’mba akaye na kwisamba na baana babo ba Hans, kabiji batendekele kufunda Baibolo. Ba Hans balumbulwile’mba: “Kyankatezhe bingi kuvuula bumuntu bwami bwa kala. Binembelo bya mu Baibolo byankwashishe ke Isaya 55:7, paamba’mba: ‘Muntu mubi aleke byubilo byanji byatama,’ ne 1 Kolinda 6:11, kyaamba pa boba balekele byubilo byatama amba: ‘Bamo mwajinga byonka bino.’ Pa myaka yavula, Yehoba wantekenyejile pa kunkwasha na mupashi wanji wazhila kuvwala bumuntu bupya.” Byo bapwishishemo myaka 17 ne kichika mu kaleya, ba Hans bebakasulwile saka baji bena Kilishitu babatizhiwa. Baambile’mba: “Nsanchila Yehoba pa kungubila lusa ne kundekelako mambo.”

15. Ñanyi muteeto uji na bantu bavula, bino Baibolo waambapo amba ka?

 ¹⁵ Bubela nabo ke kyubilo kikwabo kya bumuntu bwa kala. Bantu bavula babepa pa kuba’mba babulenga kupana misonko nangwa kuchina kwibapamo mambo pa bintu byo balubankanya. Pakuba Yehoba ke “Lesa wa bukine.” (Sala. 31:5) Onkao mambo, ukeba’mba bapopweshi banji bonse ‘beambilenga bya kine bene na bene’ kechi bya “bubela” ne. (Efi. 4:25; Kolo. 3:9) Onkao mambo, twafwainwa kwamba bya kine nangwa kya kuba kyakonsha kwitulengesha bumvu nangwa kyakatazha kuba byobyo.—Maana 6:16-19.

16. Ñanyi bintu byakonsha kukwasha muntu kuvuula bumuntu bwa kala?

¹⁶ Kuvuula bumuntu bwa kala kechi kubiwa na bulume bwa muntu mwine ne. Bantu batongolwa mu kino kibaaba, ba Sakura, ba Ribeiro, ba Stephen, ne ba Hans, bonse baingijile na ngovu kuleka byubilo byabo byatama. Bulume buji mu Mambo a Lesa ne mupashi wazhila byo bibakwashishe kushinda. (Luka 11:13; Hebe. 4:12) Pa kuba’mba twikale na buno bulume, twafwainwa kutanganga Baibolo pa juba pa juba, kulanguluka-langulukapo, ne kulomba kimye kyonse kuba’mba Lesa etupe maana ne bulume bwa kwingijisha mafunde a mu Baibolo. (Yosh. 1:8; Sala. 119:97; 1 Tesa. 5:17) Kabiji Mambo a Lesa ne mupashi wazhila bitukwasha inge ketupwile kimye kyonse saka twanengezha bulongo. (Hebe. 10:24, 25) Kabiji twafwainwa kwingijishanga byonse bibena kwitunengezhezha jibumba ja Lesa, nabiji JW Broadcasting, JW Library, ne jw.org.—Luka 12:42.

17. Tukesamba pa ka mu mutwe walondelapo?

¹⁷ Twisamba pa byubilo byatama bena Kilishitu byo bafwainwa kuvuula ne kwibisankilapo. Pano bino, kuji byavula byo twafwainwa kuba pa kuba’mba twitabilwe kwi Lesa. Twafwainwa kuvwala bumuntu bupya. Mu mutwe walondelapo tukesamba pa mbaji yapusana-pusana ya bumuntu bupya yo twafwainwa kutwajijila kwikala nayo.