1, 2. Yisinke va uyunga ko vantu kuhamena Nombangi daJehova?

VANTU kwa pandadeka vantu vaJehova konkareso zawo zongwa. Pasihonena, Anton Gill kwa tjenge kuhamena vanavazinyetu ava va kere monokamba dounkwate mepangero lyaNazi lyoVandovesi asi: “Epangero lyaNazi kwa nyengere Nombangi daJehova. . . . Momvhura 1939 Nombangi daJehova dokusika po-6 000 kwa di tulire monokamba.” Nampili ngomu va pitire momahepeko gomanene, mutjangi ogo kwa tanta asi Nombangi “kwa kere vantu wovawa wokulitura ava va kere mouumwe ntani wokulimburukwa kwaKarunga.”

² Nomvhura da ka pita, vantu womoAfrika Mbindakano kwa dimbwilire nkareso zongwa zovantu vaKarunga. Pwanare, mosirongo oso Nombangi daJehova domarudi gokulisiga-siga kapi ngava vhuru kuponga kumwe. Nye moSondaha momazuva 18 Sindimba 2011, ayo kwa tetukisire kumona vanavazinyetu wokupitakana po-78 000 wokomarudi gokulisiga-siga womosirongo oso ntani wokoyirongo yapeke va pongere kumwe nokuhafera sigongi mosira sosinene sombara moJohannesburg. Gumwe govagendesi wosira oso kwa tente kuhamena ava va pongerere  mo asi: “Konombunga nadinye da pongera mosira esi, ezi yizo zelike mbunga za kara nononkedi donongwa. Navenye kuna dwara nawa. Ntani muna zeresa nawa mosira. Nye unene po, one kwato mpongo.”

3. Yisinke ayi ninkisa mbunga zetu zi lisige nonombunga dapeke?

³ Eyi va uyunga vantu kuhamena Nombangi daJehova kulikida asi mbunga zetu kwa likarera. (1 Pet. 5:9) Yisinke ayi tu ninkisa tu lisige nonombunga dapeke? Ose kukondja unene tu ‘huture muntu gomukuru-kuru’ ‘nokudwara muntu gomupe’ kupitira mevatero lyoBibeli nompepo zokupongoka.—Koros. 3:9, 10.

4. Yisinke natu ka zogera mosirongwa esi ntani morwasinke?

⁴ Apa atu hutura muntu gomukuru-kuru, ya wapa hena kusiga yikara yendi. Mosirongwa esi tatu ka zogera omu natu hutura muntu gomukuru-kuru neyi ya karera hepero tu yi rugane. Natu ka zogera hena asi muntu kuvhura yi mu tompoke kutura po marunduruko yi kare asi nkareso musinke zondona ga kara nazo. Ntani tatu ka konakona hena eyi nava rugana ava va karera Jehova siruwo sosire mokuhutura muntu gomukuru-kuru noyikara yendi. Morwasinke twa hepera mapukururo gangoso? Ehudi, vakareli vamwe Jehova kwa lisigilira yiyo va tengwira konkareso zawo zondona. Yipo nye, natuvenye twa hepa kugazadara ko kerondoro eli asi: “Ogu ana kugazara asi age kuna sikama nawa-nawa, a takamese ga ha liganda.”—1 Kol. 10:12.

5. (a) Fanekesa eyi ya karera nomulyo mokuhutura muntu gomukuru-kuru usimbu. (Tara efano pepenuno 17.) (b) Kuliza noVakorosi 3:5-9, nonkareso musinke da hamena komuntu gomukuru-kuru?

⁵ Yisinke ngo rugana nsene sikoverero soge sina nyata ntani kuna kunuka edumba lyedona? Ove ngo si hutura ko usimbu. Mokulifana, nose twa hepa kurugana ko yuma usimbu tu kwame mpango zokuhutura ndi zokuhageka nonkareso edi ga nyenga Karunga. Nose tu kwameni epukururo eli ga tjangerere Paurusa Vakriste womomazuva gendi asi: “None zumbeni nayinye eyi.” Tu konakoneni nonkareso donondona edi ga tumbwire Paurusa, ruhonda nonyata.—Resa Vakorosi 3:5-9.

6, 7. (a) Ngapi nonkango daPaurusa adi likida asi pwa hepa elituromo mokuhutura muntu gomukuru-kuru? (b) Mparukiso musinke ga kere nazo Sakura, ntani yisinke ya mu vaterere azi hageke?

⁶ Ruhonda. Nkango “ruhonda” kwa kwatera mo vantu ava ava ligwanekere panyama va hana kulikwara paveta ntani ava ava lirara vagara novagara ndi vakadi novakadi. Paurusa kwa tanterere Vakriste vakwawo va ‘dipage madowo aga aga rugana mwawo’ kutanta asi kunyokera po madowo ngwendi “ruhonda.” Nonkango edi ga ruganesere Paurusa kulikida asi pwa hepa elituromo lyenene mokunyokera po madowo gangoso. Nampili ngomu ya kara udigu kuyirugana, kuvhura yi tu tompoke.

⁷ Tu tareni sihonena saSakura * gomoYapani. Ngomu ga kulire age nga lizuvhu mukuma noruguwo. Apa ga kere nonomvhura 15 ta tameke kuligwanekera panyama novagara wokulisiga-siga yipo a dire kulizuvha mukuma. Age kwa uyunga nomaliverero asi: “Ame kwa ligusire ezimo yikando yitatu. Apa na tamekere kuyirugana, ngani lizuvhu asi vagara kwa here nge ntani ame mulyo. Nye mwa za siruwo tani ya kara nowoma.” Age kwa twikilire kuyirugana dogoro apa ga ya kere nonomvhura 23. Konyima, ta ya tameke kulironga Bibeli noNombangi daJehova. Age kwa haferere eyi ga lirongere ntani nevatero lyaJehova ga  vhulire kunyokera po kulizuvha uzoni nonomuga ntani nokuhageka kuhondera. Ngesi Sakura kuna kara muzuvhisi gokukarerera ntani kapi a lizuvhu hena mukuma. Age kwa tanta asi: “Ame nina hafa mokukarera Jehova nkenye ezuva.”

8. Yininke musinke yimwe eyi nayi tu ninkisa tu dire kukuhuka kosipara saKarunga?

⁸ Nkareso zokunyata. Nkango ‘kunyata’ ezi va ruganesa moBibeli kwa kwatera mo yirugana yoruhonda. Azo hena kwa tamba konkareso zondona ngwendi kukoka makanya ndi kuuyunga nomuteu dokudira kuzira mo. (2 Kol. 7:1; Efe. 5:3, 4) Ntani kutamba koyirugana yokunyata eyi a rugana muntu mokahore-hore ngwendi kuresa nobuke omu va zogera yirugana yoruhonda ndi kutarera mafano goruhonda aga naga kutwaredesa o ka lidanese koyilyo yonomuga.—Koros. 3:5. *

9. Kosinke ayi twaredesa nsene o tarera mafano goruhonda?

⁹ Vantu ava ava tarere mafano goruhonda kupindura ‘madowo gomadona’ aga aga va twaredesa va kare moupika wokuligwanekera panyama. Vakonakoni kwa likida asi vantu ava ava kara upika komafano goruhonda kwa lifana nava va kara upika komarovhu nokomakanya. Yipo nye, kutarera mafano goruhonda kureta yitundwamo yoyidona. Ayo kwa kwatera mo kulizuvha nomuga nokudira kulitura mo koyirugana nokudira kukara noruhafo mepata ntani kuvhura kutwaredesa kelizumbo nokuhara kulidipaga. Mugara gumwe kwa kere moupika wokutarera mafano goruhonda. Nye konyima zokuhageka kugatarera ure womvhura, age kwa tente asi: “Ame ngesi kuna kulifumadeka nyamwange.”

10. Yisinke ya vaterere Ribeiro a hageke kutarera mafano goruhonda?

¹⁰ Vantu wovanzi kuvadigopera mokuhageka kutarera mafano goruhonda. Nye sihonena saRibeiro gomoBrasilia kulikida asi vantu kuvhura yi va tompoke mokuhageka kutarera mafano ogo. Apa ga kere mudinkantu yipo ga tundire mo membo lyawo. Konyima ta ka gwana yirugana kokampani ezi ngazi wapukurura yimbapira eyi ngava zuguma. Oko yiko ga ka gwene nombapira edi da kere nomafano goruhonda. Age kwa tanta asi: “Mwaza siruwo naya kere mupika gomafano goruhonda. Nkenye apa ame ngani lizuvhu asi mukadona gwange a tunde usimbu membo yipo ni tarere ko mafano goruhonda.” Ezuva limwe koyirugana, Ribeiro ta mono buke Nsapi zokutwaredera koruhafo rwemepata. Makura ta zi gusa nokuziresa. Eyi ga resere ya mu tumangedere a lironge Bibeli noNombangi daJehova, nye kwa mu gusire siruwo mokuhageka nkareso zendi zondona. Yisinke ya mu vaterere? Age kwa tanta asi: “Pokukanderera nokulironga Bibeli nokuteda ko kweyi ngani lirongo ya vaterere nge ni dive yikara yaKarunga nokutumangeda nge ni mu hare unene kupitakana kukara nedowo lyokutara mafano goruhonda.” Nonkango daKarunga nompepo zendi zokupongoka kwa vaterere Ribeiro a vhure kuhutura muntu gomukuru-kuru nokugwana ekuho. Ngesi age mukuronambunga.

11. Yisinke ga hepa kurugana muntu mokunyokera po kutarera mafano goruhonda?

¹¹ Mokumutompoka Ribeiro, ga hepere kurugana ko yoyinzi kupitakana tupu kulironga Bibeli. Age ga hepere kuteda ko unene kweyi ga lirongere nokuyipulisira yi mu gume komutjima. Kukandera nokuteda ko kwa nkondopekere eharo lyendi lyokuhara Karunga kupitakana kuhara kutarera mafano goruhonda. Kutunga po eharo lyenene lyokuhara Jehova  nokunyenga udona kuna kara nkedi zongwa po mokunyokera po kutarera mafano goruhonda.—Resa Episarome 97:10.

12. Yisinke ya vaterere Stephen a hageke nkareso zendi zehandu nomatuka?

¹² Vantu vamwe nsene vana handuka kwa hara kutuka vakwawo. Nkareso zangoso kapi azi reta ruhafo mepata. Stephen guhya gumwe gomoAustralia kwa tanta asi: “Ame ngani tuku unene ntani ngani handuka usimbu nampili moyininke yoyinunu. Name namukadange kwa ligaunukire yikando yitatu ntani ose kwa here kulizumba.” Makura konyima tava ya tameke kulironga Bibeli noNombangi daJehova. Yitundwamo musinke ya kere apa Stephen ga tamekere kukwama eyi nga lirongo moBibeli? Age kwa tanta asi: “Mepata lyetu mwa ya kere mo marunduruko. Nevatero lyaJehova na ya kara muntu gombili gokulitura kupitakana apa na kere gokuhanduka usimbu nampili kaninke kokanunu vana ninki nge.” Ngesi Stephen mukwafimbunga ano mukadendi muzuvhisi gokukarerera. Vakuronambunga womombungakriste zawo kwa uyunga ko kumuhamena asi: “Age muntu gokumwena ogu a rugana unene ntani ga linunupika.” Kapi va mu mona rumwe asi ana handuka. Ngoso Stephen kulizuvhu asi kwa mu tompoka tupu pwanyamwendi? Age kwa tanta asi: “Ngano kapi na tambwire evatero lyaJehova ni rundurure nkareso zange, ame ngano kapi na gwana mauwa aga nina kuhafera ngesi.”

13. Morwasinke nkareso zehandu za karera siponga ntani yisinke azi tu rondora ko Bibeli?

¹³ Bibeli kuturondora tu nyokere po nkareso zehandu nomatuka nonomutangu. (Efe. 4:31) Nonkareso dangoso kuvhura kutwaredesa konyanya. Vantu kutara nkareso zangoso asi kwato epuko, nye azo kuswaukisa Musiti gwetu. Wovanzi kwa hepere kuhutura ndi kuhageka nonkareso odo donondona nokuyadwara muntu gomupe.—Resa Episarome 37:8-11.

14. Kuvhura muntu gonyanya a ya kare gomugomoki ndi?

¹⁴ Tu tareni sihonena saHans, mukuronambunga gomombungakriste zomoAustria. Muwapaiki govakuronambunga mombungakriste zawo kwa tanta asi: “Hans muntu gomugomoki.” Nye nare kapisi yimo ga kere ngoso. Apa ga kere mudinkantu nga nu unene marovhu, ano ya mu twaredesere a kare muntu gonyanya. Ezuva limwe apa ga nwine unene tau furu dogoro ta dipagere mo mukadona gwendi. Makura tava mu tomene nomvhura 20 modorongo. Apa ga ka kere modorongo ta ka twikira nonkareso zendi zokuhunduka usimbu. Mwaza siruwo ozina tava tantere mukuronambunga gumwe a ka mu dingure modorongo, makura Hans yipo ga ya tamekere kulironga Bibeli. Hans kwa tanta asi: “Ayo kwa digoperere nge kuhutura muntu gomukuru-kuru. Matjangwa aga ga vaterere nge kuna kara Jesaya 55:7 eli ali tanta asi: ‘Mudinikarunga a sige nonzira dendi’ ntani 1 Vakolinte 6:11 eli lya uyunga kuhamena ava va siga nonkareso donondona asi: ‘Vakweneni vamwe yimo va kere.’ Jehova kwa lididimikilire nomvhura dononzi a vatere nge ni dware muntu gomupe kupitira mompepo zokupongoka.” Hans kwa gwene ekuho apa ga kere modorongo. Ano kwa ya mu pwagesere mo konyima zokukara mo nomvhura 17 noharufa. Age kwa tanta asi: “Ame kupandura Jehova konkenda zendi zonene ntani neyi ga gusira nge po.”

15. Nkareso musinke zina lihanene movantu naina ntani yisinke za uyunga ko Bibeli?

¹⁵ Kutanta yimpempa, nazo nkareso zomuntu  gomukuru-kuru. Pasihonena, vantu kutanta yimpempa yipo va dire kufuta mutero ndi va dire kuvatengeka. Mokulisiga, Jehova age “Munasili.” (Deut. 32:4) Yipo nye, age kundindira asi “nkenye” mukareli gwendi a “uyunge namukwawo yosili,” nye kapisi “yimpempa.” (Efe. 4:25; Koros. 3:9) Twa hepa kuuyunga usili nampili yi kare udigu kwetu ndi nampili yi tu retere nomuga.—Yis. 6:16-19.

16. Yisinke natu rugana yipo yi tu tompoke kuhutura muntu gomukuru-kuru?

¹⁶ Kapi tayi tu tompoka kuhutura muntu gomukuru-kuru pwanyamwetu. Sakura naRibeiro naStephen ntani Hans ava vana tumbura mosirongwa esi va hepere kukondja unene mokusiga nkareso zawo zondona. Eyi ya va vaterere kuna kara Nonkango daKarunga ntani mpepo zendi zokupongoka. (Ruk. 11:13; Heb. 4:12) Mokuninka asi Jehova a tu vatere, twa hepa kuresa Bibeli nkenye ezuva nokuteda ko nokukanderera yipo tu gwane unongo nononkondo tu ture pasirugana mavyukiso gomoBibeli. (Jos. 1:8; Epis. 119:97; 1 Tes. 5:17) Ose hena kugwanena mo uwa moNonkango daKarunga ntani nomompepo zendi zokupongoka apa atu liwapaikire nokuwiza komapongo. (Heb. 10:24, 25) Ntani hena twa hepa kuruganesa nawa mawapaiko aga ga tura po Jehova mombunga zendi mokutupa nondya dopampepo.—Ruk. 12:42.

17. Yisinke ngatu ka zogera mosirongwa sokukwama ko?

¹⁷ Tuna lirongo nonkareso donondona edi va hepa kusiga ndi kuhutura Vakriste. Nye kapisi yiyo yelike ya hepa po mokuhafesa Karunga. Twa hepa hena kudwara muntu gomupe. Mosirongwa sokukwama ko ngatu ka zogera yikara eyi twa hepa kutunga po mokudwara muntu gomupe.