1, 2. Haida ese Iehova ena Witnes taudia be ede e herevalaidia toma?

HAIDA ese Iehova ena taunimanima edia kara namodia e itamu neganai e hanamodiamu. Heḡereḡere, toretore tauna ta, Anton Gill, ese Nazi Germany ai eda tadikaka bona taihu e herevalaidia neganai, eto: “Iehova ena Witnes taudia na Nazi taudia ese e inai henidiava. . . . Laḡani 1939 ai, idia 6,000 na [dibura kamepadia] ai e nohova.” Ia na ma e gwa, ena be Witnes taudia na daḡedaḡe bada herea e davari, to idia na e haheauka, bona ini kara e hahedinarai, “e kara momokani, asie badu haraḡa, edia Dirava e badinaia, bona e gini auka.”

² Vanegai, South Africa ai haida ese Dirava ena taunimanima bogaraḡidiai kara unuhetomadia danu e ita. Guna, una tano ai kopi korema bona kopi kuro Witnes taudia na asie hebamo heheniva. To, Sunday, December 18, 2011 ai, South Africa bona badina hanuadia amo bese idauidau tadikaka taihu 78,000 mai kahana na hebouhebou ta totona Johannesburg ena steidiam badana ai e hebou. Una steidiam biaguna ta ese una hebou e herevalaia neganai, eto: “Ina na egu nega ginigunana ina steidiam ai hutuma na itadia, edia kara na nanamo. Iboudiai na dabua namodia e hahedokilai. Bona steidiam na e haḡoevaia ḡoevaḡoeva. To bada hereana na, idia na bese idauidau amo ema.”

3. Dahaka dainai ita na orea ma haida amo na idau?

 ³ Unu murimuri taudia edia hereva ese e hahedinaraimu tanobada heḡeḡemadai eda tadikaka oreana na idau herea. (1 Pet. 5:9) To, dahaka dainai ita na orea ma haida amo na idau? Badina Dirava ena Hereva bona iena lauma helaḡa ena heduru amo, ita na ta ḡaukara goadamu ‘tau gunana baita dokia oho,’ bona ‘tau matamatana baita hahedokilaia’ totona.​—Kol. 3:9, 10.

4. Ina atikol ai dahaka baita herevalaimu, bona dahaka dainai?

⁴ Tau gunana o mauri gunana baita dokoia oho bona baita negea vaitani na namo. Ina atikol ai, ita ese tau gunana baita dokia oho dalana, bona dahaka dainai una baita karaia na mai anina bada, baita herevalaimu, danu baita itaiamu edena dalai ta ese ena mauri baine haidaua diba, ena be kara dikadia na e manadalaia. Bona hereva momokani ai e noho daudau taudia ese edia mauri gunana idadaraina totona, e kara ḡaudia baita herevalaimu. Dahaka dainai unu baita herevalai na namo? Laḡani momo Iehova e hesiai henia taudia haida na asie henahua toho dainai gabeai edia mauri gunadia ma e lou heni. Una dainai, ina sisiba baita badinaia na namo: “Lalona e tomamu e gini tutuka-tutukamu tauna ese nahuana baine tohoa, baine keto na garina.”​—1 Kor. 10:12.

5. (a) Dahaka dainai tau gunana baita kokia na mai anina bada? Haheitalai ba herevalaia. (Rau 17 ai laulau ba itaia.) (b) Kolose 3:5-9 ena hereva heḡereḡerena, tau gunana ena kara be dahaka?

⁵ Oi be dahaka bo karamu bema emu dabua na mai mirona bona mai bonana? Una dabua mirona na bo kokia haraḡamu. Una heḡereḡerena, namona na Baibul ena haheḡani baita badinaia bona Dirava ese e inai henimu karadia baita kokidia haraḡa. Paulo ese iena nega ai e nohova Kristen taudia e henidia haheḡanina baita badinaia na namo, eto: “Ini ḡau iboudiai ba nege.” Paulo ese e gwaurai kara dikadia rua, heuda-hanai bona kara dika, mani aita herevalai.​—Kolose 3:5-9 ba duahi.

6, 7. (a) Edena dala ai Paulo ena hereva ese e hahedinaraiamu baita hekwarahi na namo ura dikadia baita dadarai totona? (b) Sakura ena mauri dalana be ede bamona, bona dahaka ese e durua una e dadaraia?

⁶ Heuda-hanai. Grik gado ai ina hereva “heuda-hanai” anina na asie headava taudia bae mahuta hebou karana, eiava tatau tatau (o hahine hahine) bae mahuta hebou karana e herevalaia. Paulo ese Kristen taudia e hamaorodia ‘tau-anidia edia ura dikadia’ bae “hamase” anina na matabodaḡa uradia iboudiai bae kokidia vaitani. Paulo ena hereva ese e hahedinaraiamu namona na baita hekwarahi unu ura dikadia baita dadaraidia vaitani totona. Ena be una na auka, to baita kwalimu diba.

⁷ Japan ai, Sakura enai e vara ḡauna mani aita laloa.  * Ia na e bada neganai, e mamiava ia na sibona e nohova bona ena mauri na asi anina. Laḡanina 15 neganai, ia na tatau idauidau ida e mahuta hebouva unu amo sibona e nohova hemamina baine hahanaia. Ia na eto, “Una kara dainai, nega toi natugu na bogagu ai na hamasedia.” Ma eto: “Matamanai, na laloava matabodaḡa karadia baina kara neganai baina moale, bona ma haida ese bae ura henigu. To nega momo unu matabodaḡa karadia na karava neganai, na lalometauva.” Sakura na una mauri dalana e badinaia ela bona laḡanina e 23. Gabeai, Witnes taudia ida Baibul e stadilaia matama. E dibava ḡaudia na e ura heniva,  bona Iehova ena heduru dainai hemarai mamina bona matabodaḡa karadia na e dadarai vaitani. Hari Sakura na regula painia ḡaukara e karaiamu bona sibona e nohomu hemamina na se abiamu. Ia na e gwa: “Na moalemu badina hanaihanai Iehova ena lalokau na mamiamu.”

8. Ededia kara haida dainai Dirava matanai baita miro diba?

⁸ Kara dika. Grik gado ai ina hereva “kara dika” na dia matabodaḡa karadia mo e herevalai, to kuku ani karana bona hevaseha mirodia igwauraidia karana danu e herevalaidia. (2 Kor. 7:1; Efe. 5:3, 4) Bona ta sibona baine noho neganai baine karadia kara mirodia danu e herevalai, heḡereḡere mahuta hebou karana e herevalaimu bukadia baine duahi eiava ponografi laulaudia baine ita, unu kara ese ta lalona baine veria diba sibona tauanina baine gadaralaia.​—Kol. 3:5. *

9. Matabodaḡa urana iabina karana ena dika be dahaka?

⁹ Ponografi laulaudia e ita momomu taudia ese “mata-dika” o matabodaḡa urana bae abia matama, bona mahuta hebou karana bae ura henia bada. Hetahu ḡaukara e karamu taudia na e gwaumu, ponografi laulaudia i’itadia loulou karana na inuinu kekero bona drag ani loulou karana heḡereḡerena, unu kara idadaraidia na auka. Una dainai ponografi laulaudia i’itadia loulou karana na mai ena dika​—heḡereḡere ta na be hemaraimu, ena moni ḡaukara basine karaia namonamomu, ruma bese maurina basine moalelaiamu, ena headava be hadokoamu, bona sibona baine hemata diba. Tau ta na laḡani ta heḡereḡerena ponografi laulaudia se ita murinai, e gwa: “Hari lau na sibogu tauanigu na matauraiamu.”

10. Edena dalai Ribeiro ese ponografi laulaudia i’itadia karana e dadaraia?

¹⁰ Momo na e hekwarahimu ponografi laulaudia i’itadia karana bae dadaraia totona. To Brazil ai, Ribeiro enai e vara ḡauna ese e hahedinaraiamu una kara na bae dadaraia diba. Ribeiro na tauhaunai ruma e rakatania bona buka gunadia amo pepa e karava gabunai e ḡaukarava, unuseniai ponografi bukadia o magasin momo e ita. Ia na e gwa: “Taina ruana una kara na manadalaia. Ponografi laulaudia i’itadia urana na e bada herea dainai, lau ida a noho hebouva hahinena ruma e rakataniava neganai, haraḡa herea ponografi vidiodia na itava.” Dina ta, ḡaukara gabunai, Ribeiro na buka haida e itadia, unu buka padadiai buka ta ladana The Secret of Family Happiness e itaia. Una buka e abia bona e duahia. E duahi ḡaudia ese lalona e veria dainai, Iehova ena Witnes taudia ida Baibul e stadilaia matama, to e hekwarahiva ponografi laulaudia i’itadia karana baine dadaraia totona. Dahaka ese e durua? Ia na eto: “Ḡuriḡuri, Baibul istadilaina karana, bona na dibava ḡaudia na lalodia dobu karana ese e durugu dainai Dirava ena kara na ura henidia bada, bona egu lalokau Ienai na e goada dainai ponografi laulaudia i’itadia karana na dadaraia.” Dirava ena Hereva bona iena lauma helaḡa ena heduru amo Ribeiro ese ena mauri gunana e kokia, e bapatiso, bona hari ia na kongrigeisen elda ta.

11. Ta be dahaka baine kara na namo ponografi laulaudia i’itadia karana baine dadaraia totona?

¹¹ Ribeiro ese ponografi laulaudia i’itadia karana baine dadaraia totona, ia na dia Baibul mo e stadilaia. To nega e ato Baibul ai e duahiva ḡaudia e lalodia dobu bona kudouna ai e atodia. Danu, ḡuriḡuri bona lalo  dobu karana ese ena lalokau Dirava enai na e hagoadaia dainai, ponografi laulaudia i’itadia karana e dadaraia. Eda lalokau Iehova enai baita hagoadaia bona kara dika baita inai henia karana ese baine duruda, ponografi laulaudia i’itadia karana baita dadaraia.​—Salamo 97:10 ba duahia.

12. Dahaka ese Stephen e durua dainai badu bona hereva mirodia igwauraidia karana e dadaraia?

¹² E badu haraḡamu taudia na nega momo hereva mirodia e gwauraimu. Una kara ese ruma bese ena moale na baine hadikaia diba. Australia ai, tama ta, Stephen na eto: “Lau na hereva mirodia na gwaurai momova bona ḡau asi anidia ai na badu kavava. Adavagu ida nega toi a parara bona a urava emai headava baia hadokoa.” Gabeai, Stephen bona adavana na Witnes taudia ida Baibul e stadilaia. Stephen ese Baibul ena sisiba e badinaia neganai, dahaka e vara? Ia na eto: “Emai ruma bese maurina na e namo. Iehova ena heduru dainai na lalo mainomu bona asi na badu haraḡamu, to guna be ḡau asi anidia daidiai na badu haraḡava.” Hari, Stephen na hesiai tauna ta, bona adavana na laḡani haida lalodiai regula painia ḡaukara e karaiamu. Stephen ena kongrigeisen elda taudia na eto: “Stephen na se hereva momomu tauna, ia na e ḡaukara goadamu, bona manau tadikakana.” Nega ta do asie itaia ia na e badu. Unu hahenamo herevadia dainai Stephen ena hemami be ede bamon? Ia na eto: “Ini hahenamo iboudiai na basinama abi diba, bema Iehova ese basinema durugu, egu kara na basinama haidau diba.”

13. Dahaka dainai badu karana na mai ena dika, bona Baibul ena sisiba be dahaka?

¹³ Baibul ese e hadibadamu, badu, hereva mirodia igwauraidia, bona heloḡo-heloḡo karadia baita dadarai. (Efe. 4:31) Unu kara ese daḡedaḡe karadia e havaramu. Momo na e laloamu unu kara na asi edia dika, to unu ese Ihavarada Tauna ladana e hadikaiamu. Una dainai, momo ese unu kara dikadia na e dadarai bona mauri matamatana e badinaia.​—Salamo 37:8-11 ba duahi.

14. Daḡedaḡe tauna be manau tauna ai bainela diba, a?

¹⁴ Austria ai, kongrigeisen ta ena elda ta ladana, Hans, mani aita laloa. Una kongrigeisen elda oreana ena kodineita na ini e gwau toma: “Hans na manau tadikakana.” To guna Hans na dia manau tauna. Ia na eregabena ai, e inu kekerova dainai daḡedaḡe tauna ai ela. Nega ta, e kekero neganai ia na e badu bona ena kekeni e alaia, una dainai dibura ruma ai e atoa laḡani 20 baine noho. Dibura ruma ai e noho neganai ena kara na se haidaua. Gabeai, sinana ese elda ta e noia baine vadivadi henia, bona Hans na Baibul e stadilaia matama. Hans na eto: “Egu mauri gunana baina kokia na mai hekwarahina. To e hagoadagu Baibul sirina na Isaia 55:7, e gwaumu: ‘Kara dika tauna ese ena dala baine rakatania,’ bona 1 Korinto 6:11 ese kara dika e dadarai taudia e herevalaidia, eto: ‘Umui haida danu gunaguna unu heto.’ Laḡani momo lalodiai, Iehova na mai ena haheauka ida ena lauma helaḡa amo e durugu, tau matamatana baina hahedokilaia totona.” Hans na dibura ruma ai e bapatiso, bena laḡani 17 mai kahana murinai e ruhaia. Ia na eto: “Lau na na moale dikadikamu badina Iehova ena hebogahisi na bada herea bona ia ese dika na e gwautaomu.”

15. Hari ina negai taunimanima momo be dahaka e karamu, to Baibul ese una kara be ede e herevalaia toma?

¹⁵ Koikoi na tau gunana o mauri gunana ena kara ta. Heḡereḡere, vaevae taunimanima na e koikoimu badina asie uramu tax bae heni eiava e koikoimu edia kerere bae  huni totona. To Iehova na “hereva momokani Diravana.” (Sal. 31:5, NWT) Una dainai, Ia na e uramu Ia e tomadiho heniamu taudia ese ‘hereva momokani mo bae gwaurai’ bona ‘basie hekoi.’ (Efe. 4:25; Kol. 3:9) Namona na hereva momokani baita gwaurai, ena be una na auka eiava mai hemaraina.​—Her. 6:16-19.

16. Edena dala ai eda mauri gunana baita kokia diba?

¹⁶ Ta na sibona ena goada amo tau gunana eiava mauri gunadia basine kokia diba. Ina atikol ai tame herevalaidia taudia​—Sakura, Ribeiro, Stephen, bona Hans​—na e ḡaukara goada edia mauri gunadia e dadarai. Idia na e kwalimu badina mai edia ura ida Dirava ena Hereva bona ena lauma helaḡa ena heduru e abia dae. (Luka 11:13; Heb. 4:12) Ita danu Dirava ena Hereva bona iena lauma helaḡa amo heduru baita abi totona, hanaihanai Baibul baita duahia, baita laloa dobu, bona Dirava baita noia aonega bona goada baine henida Baibul ena sisiba baita badinaia totona. (Ios. 1:8; Sal. 119:97; 1 Tes. 5:17) Danu, hebou ḡaudia ta heḡaeḡaelaimu bona ta laomu neganai, Dirava ena Hereva bona iena lauma helaḡa amo heduru baita abi diba. (Heb. 10:24, 25) Danu, namona na Dirava ena orea ese lauma aniani e halasimu daladia iboudiai baita abidae bona baita ḡaukaralai.​—Luka 12:42.

17. Stadi gabena ai dahaka baita herevalaimu?

¹⁷ Ina stadi ai, Kristen taudia ese bae kokidia bona bae negedia kara dikadia haida tame herevalai. To, Dirava ena lalonamo baita abia totona, una mo baita karaia be heḡereḡere, a? Lasi. Namona na tau matamatana baita hahedokilaia. Stadi gabena ai, ita ese tau matamatana ena kara haida bona eda mauri lalonai baita hahedinarai daladia baita herevalaimu.