1, 2. ¿Tlake kiijtouaj maseualmej tlen Jehová itlajtoltemakauaj?

MIAKEJ maseualmej kiijtouaj Jehová itlajtoltemakauaj kinextiaj kuajkuali tlamantli. Ipan se amochtli, Anton Gill kiijtok ni tlen toikniuaj katli itstoyaj ipan Alemania nazi: “Nopa nazis tlauel kinkualankaitakej Jehová itlajtoltemakauaj. [...] Ipan 1939, itstoyaj 6,000 Jehová itlajtoltemakauaj kampa kinchiualtiyayaj ma tekitikaj. Maske tlauel tlaijiyouijkej, nochipa kichijkej tlen kuali uan kuali mouikayayaj, amo mokualaniyayaj uan amo kitlauelkajkej toTeotsij”.

² Namanok, se keskij maseualmej ipan Sudáfrica nojkia kiitakej kenijkatsa Jehová itekipanojkauaj kinextiaj kuajkuali tlamantli. Maske achtouia tekichiuanij amo kinkauayayaj toikniuaj sansejko ma monechikokaj, ipan domingo 18, diciembre 2011, kipano 78,000 toikniuaj katli euayayaj tlen Sudáfrica uan tlen sekinok altepemej mosentilijkej ipan se ueyi tlanechikolistli ipan se estadio ne Johannesburgo. Se katli kimokuitlauia nopa estadio kiijtok: “Amo kema nikinitstoya maseualmej kej ni katli tlauel kuali monejnemiltiaj. Nochi kuali mopatlatokej. Uan amo sokiyo kikajkej ni estadio. Uan tlauel nechpaktik pampa  nochi kuali mouikayayaj maske sekij chipaktikej uan sekinok amo”.

3. ¿Kenke amo itstokej sekinok kej Jehová itlajtoltemakauaj?

³ Tlen kiijtouaj maseualmej kinextia amo itstokej sekinok sanse kej Jehová itlajtoltemakauaj (1 Ped. 5:9). ¿Kenke amo tielij sanse kej sekinok? Pampa toTeotsij iTlajtol uan itonal techpaleuia ma tijchiuakaj kampeka ayokmo tijchiuasej tlen ‘totlajtlakolchijkatlalnamikilis’ kineki uan ma tijpiakaj se ‘tonemilis tlen yankuik’ (Col. 3:9, 10).

4. ¿Tlake tikitasej ipan ni tlamachtili, uan kenke?

⁴ Tlauel moneki ayokmo kema ma tijchiuakaj tlen totlajtlakolchijkatlalnamikilis kineki. Ipan ni tlamachtili tikitasej tlake techpaleuis ayokmo ma tijchiuakaj tlen amo kuali uan kenke tlauel moneki ayokmo tijchiuasej. Nojkia tikitasej maseualmej kena uelis kipatlasej ininnemilis maske kichiuaj tlen tlauel amo kuali. Uan tikixtomasej tlake kinpaleuis katli ya uejkajtok kitekipanojtokej toTeotsij amo sampa ma kichiuakaj tlen totlajtlakolchijkatlalnamikilis kineki. ¿Kenke moneki ma techilnamikilikaj tlake moneki tijchiuasej? Pampa miakej amo momokuitlauijkej uan sampa moiljuijkej uan kichijkej kej achtouia kichiuayayaj. Yeka, nochi moneki tikilnamikisej ni: “Tlen inmoiljuiaj inmoketsaj uan intetikej ipan toTeko, xijpiakaj cuidado para amo xiuetsikaj ipan tlajtlakoli” (1 Cor. 10:12).

5. 1) ¿Ika tlake tikixnextiskiaj moneki ayokmo tijchiuasej tlen amo kuali? (Xikita nopa achtoui tlaixkopinkayotl). 2) Kej kiijtoua Colosenses 3:5-9, ¿tlake tlamantli tlen amo kuali ayokmo kinamiki tijchiuasej?

⁵ ¿Tlake tijchiuaskiaj tlaj toyoyo mosokiuiskia o uelis amo kuali mijyotiskia? Nimantsi timokixtiliskiaj. Nojkia kiampa pano ika tlamantli tlen amo kuali, moneki nimantsi tijneltokasej tlen Jehová technauatia uan ayokmo tijchiuasej tlen kikualankaita. Tijnekij tijchiuasej tlen Pablo kiniljuik Cristo itokilijkauaj: “Ama, ayok xijchiuakaj”. Ma tikitakaj ome tlajtlakoli tlen Pablo kiijtok: “Amo xijchiuakaj tlen ueli ika tlen axinmonamik” uan “tlamantli tlen eli se pinaualistli” (xijpoua Colosenses 3:5-9).

6, 7. 1) ¿Tlake kiijtok Pablo moneki tijchiuasej uan kiampa amo tijchiuasej tlen amo kuali? 2) ¿Kenijkatsa monejnemiltiyaya Sakura, uan tlake kipaleuik ma kipatla inemilis?

⁶ “Amo xijchiuakaj tlen ueli ika tlen axinmonamik”. Kema Biblia kitekiuia ni tlajtoli, kineki kiijtos kema omej maseualmej katli amo mosenkajtokej motekaj sansejko uan nojkia kema se tlakatl moteka ika seyok tlakatl o se siuatl ika seyok siuatl. Pablo kiijtok monekiyaya amo tijchiuasej tlen ueli tlamantli ika tlen axtonamik. Ni kinextia moneki tijchiuasej kampeka amo timoiljuisej tlen amo kuali. Maske uelis ouij, kena uelis tijchiuasej.

⁷ Ma tikitakaj tlen kipanok Sakura, * se ichpokatl katli eua Japón. Kema moskaltiyaya, amo kuali kiyolmatiyaya uan kimatiyaya iselti itstoya. Pampa ayokmo kinekiyaya kiampa kiyolmatis, kema kipixtoya 15 xiuitl, pejki moteka ininuaya miakej telpokamej. Pampa amo kuali monejnemiltiyaya, expa mokonetlauisok. Ya kiijtoua: “Kema nijpeualtik nimoteka ininuaya sekinok, kuali nijyolmatiyaya, ayokmo noselti niitstoya uan nijmatiyaya nechikneliyayaj. Teipa, ayokmo kiampa nijyolmatki uan nijmatiyaya tlauel noselti niitstoya”. Sakura kiampa monejnemiltik miak xiuitl, uan kema kipixtoya 23 xiuitl, pejki momachtia  Biblia ininuaya Jehová itlajtoltemakauaj. Pampa Jehová kipaleuik, pejki kuali kiyolmati uan ayokmo motlajtlakoltik uan pejki kuali monejnemiltia. Nama tlatekipanoua kej precursora regular uan ayokmo kiyolmati iselti itstok. Kiijtoua: “Tlauel niyolpaki pampa nijmati Jehová tlauel nechiknelia”.

8. ¿Tlake tlamantli kichiuaskia ma tiitstokaj kejuak tisokiyojkej iixpa Jehová?

⁸ “Tlamantli tlen eli se pinaualistli”. Ipan Biblia, amo san kiijtosneki kema momekatiaj, nojkia kiijtosneki kema se akajya kichiua se tlamantli tlen kinenpoloua itlakayo, kej kema tlachichina o nojkia kema tetlauetskiltia ika tlamantli tlen sokiyo (2 Cor. 7:1; Efes. 5:3, 4). Nojkia kiijtosneki tlamantli tlen amo kuali katli kichiua se akajya kema itstok iselti, kej kema kipoua se amochtli kampa nesi momekatiaj o kema kitlachilia pornografía. Uan ni uelis kichiuas se akajya peuas ma moijitski kampa amo kinamiki (Col. 3:5). *

9. ¿Tlake panos tlaj timoiljuisej ipan “tlamantli tlen eli se pinaualistli”?

⁹ Katli kitlachiliaj pornografía peua moiljuiaj ipan “tlamantli tlen eli se pinaualistli”, uan yeka teipa san kinejnektokej motekasej ininuaya sekinok. Sekij ixtlamatinij kiijtouaj katli nochipa kinekij motekasej ika sekinok kinpano sanse kej katli kitekiuiaj drogas o katli tlauel moiuintiaj. Yeka, katli kitlachiliaj pornografía tlauel amo kuali kiyolmatij, amo kuali kichiuaj ininteki, amo kuali itstokej ika ininchampoyouaj, kinkauaj ininsiua o ininueue uan sekij momiktiaj. Se tlakatl kiijtok ni kema ya panotoya se xiuitl ayokmo kiitstoya pornografía: “Nama nijmati kena nimotlepanita”.

10. ¿Tlake kipaleuik Ribeiro ayokmo ma kitlachili pornografía?

¹⁰ Miakej maseualmej nochipa kichiuaj kampeka ayokmo kitlachilisej pornografía. Maske ouij, kej kipanok Ribeiro, katli eua Brasil, kinextia kena yajatisej. Kema eliyaya telpokatl, kistej ichaj uan pejki tekiti kampa kisentiliyayaj amatl. Nopaya pejki kiita amatlajkuiloli kampa nesiyaya pornografía. Ya kiijtoua: “Teipa tlauel nijnekiyaya nikitas pornografía, uan yeka nochipa nijnekiyaya nopa siuatl katli iuaya niitstoya ma kisa kalteno uan kiampa ueliskia nijtlachilis videos kampa nesi pornografía”. Se tonali, kema tekitiyaya, kipantik nopa amochtli El secreto de la felicidad familiar, kikuik uan pejki kipoua. Tlen kipojki kiyololinik ma momachti ininuaya Jehová itlajtoltemakauaj. Tlauel uejkajki kichiua kampeka amo kiitas nopa tlamantli. ¿Tlake kipaleuik? Ya kiijtoua: “Pampa nimomaijtok, nimomachtik Biblia uan nimoyoliljuik ipan tlen nijyekok, nechpaleuik tlauel ma nijpatiita nochi kuajkuali tlamantli tlen Jehová kinextia. Nopa nechpaleuik tlauel ma nikikneli Jehová uan ayokmo ma nijneki nikitas pornografía”. Biblia uan toTeotsij itonal kipaleuik Ribeiro ma kipatla inemilis uan ayokmo ma kichiua tlen amo kuali. Teipa moatsonpoliuiltik uan nama tlatekipanoua kej ueuejtlakatl.

11. ¿Tlake moneki tijchiuasej tlaj amo tijnekij tikitasej pornografía?

¹¹ Ribeiro amo san momachtik Biblia, nojkia kuali moyoliljuik ipan tlen kipouayaya uan kikajki ma asi ipan iyolo. Nojkia kiiljuik toTeotsij ma kipaleui. Pampa momaijtok uan kuali moyoliljuik ipan tlen kipouayaya, kipaleuik nojua tlauel ma kiikneli Jehová uan ayokmo ma kitlachili pornografía. Nochi moneki tlauel tikiknelisej Jehová  uan amo tijnekisej tikitasej tlen amo kuali, kiampa amo kema tijtlachilisej pornografía (xijpoua Salmo 97:10).

12. ¿Tlake kipaleuik Stephen ayokmo ma mosisini uan ayokmo ma tetlaijiljui?

¹² Sekij maseualmej nimantsi kualanij uan kiijtouaj miak tlamantli tlen teyolkokoua. Yeka ininchampoyouaj tlauel tlaijiyouiaj. Ma tikitakaj tlen kiijtoua Stephen, katli eua Australia: “Tlauel san tlemach nikijtouayaya uan tlen ueli tlamantli nechkualankamakayaya. Nosiua uan na expa timokajkej uan tijnekiyayaj tikixpolosej totoka ipan amatl kampa nesi timosenkajtokej”. Teipa Jehová itlajtoltemakauaj pejkej kinmachtiaj ika Biblia. ¿Tlake panok pampa Stephen pejki kichiua tlen Biblia tetlajtolmaka? Ya kiijtoua: “Pejki kuali nimouika ininuaya nochampoyouaj. Achtoui nieliyaya kej se etsatl, uan nama nijmati nijpia tlaseuilistli uan tlauel kuali nijyolmati”. Ipan ni tonali Stephen tlatekipanoua kej se tlapaleuijketl uan isiua tlauel miak xiuitl tlatekipanojtok kej precursora. Ueuejtlakamej tlen itlanechikol kiijtouaj: “Stephen eli se toikni katli amo mosisinia, amo moueyimati uan tlauel chikauak tlatekipanoua”. Inijuantij kiijtouaj amo kema kiitstokej tlaj kualantok. Stephen kiijtoua kenke uelki kipatlak inemilis: “Tlauel nijselijtok miak tlateochiualistli pampa nijkajtok Jehová ma nechpaleui, uan yeka nijpatlatok nochi nonemilis”.

13. 1) ¿Kenke tlauel amo kuali tikualanisej? 2) ¿Tlake technauatia Biblia?

¹³ Biblia techiljuia amo ma timosisinikaj, amo ma titetlaijiljuikaj uan amo ma titekuatsajtsilikaj (Efes. 4:31). Kema se akajya kichiua ni, teipa kichiua tlen amo kuali. Maske sekij moiljuiaj amo kenijki, katli kichiua ni tlauel kiixpano toTeotsij. Yeka miakej Cristo itokilijkauaj ayokmo kiampa monejnemiltiaj uan nama kichiuaj tlen toTeotsij kineki (xijpoua Salmo 37:8-11).

14. ¿Uelis se akajya ayokmo mosisinis?

¹⁴ Ma tikitakaj tlen kipanok Hans, se ueuejtlakatl katli itstok Austria. Katli kinyakana ueuejtlakamej tlen itlanechikol kiijtoua: “Eli se toikni katli nelia tlauel amo mosisinia yon se kentsi”. Hans amo kiampa eliyaya. Kema eliyaya piltelpokatsi, pejki tlauel tlai uan pejki mosisinia. Se tonali, kema tlauel iuintitoya, kimiktik nopa ichpokatl katli iuaya nemiyaya pampa tlauel kualanki. Kiiljuijkej tsaktoskia ipan cárcel 20 xiuitl. Maske kitsajkej, amo kipaleuik yon se kentsi. Teipa, inana kiiljuik se ueuejtlakatl ma kipaxaloti kampa kitsaktoyaj, uan Hans kinejki momachtis Biblia. Ya kiijtoua: “Tlauel ouij nijmatki ayokmo nijchiuas tlen achtouia nijchiuayaya. Tlauel nechpaleuik ome textos. Se eliyaya Isaías 55:7, katli kiijtoua: ‘Nochi tlajtlakolchijkatlakamej ma kikauakaj nopa fiero ojtli tlen kitokiliaj’. Uan seyok elki 1 Corintios 6:11, kampa kiijtoua kenijkatsa se keskij kikajtoyaj inintlajtlakol. Tlauel miak xiuitl Jehová kipixki iyolo nouaya uan nechpaleuik ika itonal ma nijchiua tlen ya kipaktia”. Hans moatsonpoliuiltik kema nojua tsaktoya uan kiski kema kiaxitik 17 xiuitl uan tlajko tsaktoya. Ya kiijtoua: “Tlauel nijtlaskamatilia Jehová pampa nechtlasojtlak uan nechtlapojpoljuik”.

15. ¿Tlake kichiuaj maseualmej, uan tlake kiijtoua Biblia?

¹⁵ Istlakatili eli seyok tlamantli tlen amo kinamiki tijchiuasej. Miakej maseualmej istlakatij pampa amo kinekij kiixtlauasej impuestos o pampa amo kinekij ma kintlatsakuiltikaj. Uan Jehová amo kiampa eli, pampa ya “axkema istlakati” (Rom. 3:4).  Yeka technauatia nochipa ma tikijtokaj tlen melauak uan amo ma timokajkayauakaj “se ika seyok” (Efes. 4:25; Col. 3:9). Uajka moneki tikijtosej tlen melauak maske timopinaualtisej o maske tojuantij amo techpaleuiskia (Prov. 6:16-19).

16. ¿Tlake techpaleuis ayokmo ma tijchiuakaj tlen totlajtlakolchijkatlalnamikilis kineki?

¹⁶ Toselti amo uelis tijkauasej tlen totlajtlakolchijkatlalnamikilis kineki. Sakura, Ribeiro, Stephen uan Hans, monejki kichiuasej se ueyi kampeka uan kiampa kipatlasej ininnemilis. ¿Tlake kinpaleuik? ToTeotsij iTlajtol uan itonal (Luc. 11:13; Heb. 4:12). Tojuantij nojkia ayokmo tijchiuasej tlen amo kuali tlaj mojmostla tijpouasej Biblia, tlaj timoyoliljuisej ipan tlen tijpouasej uan tlaj nochipa tikiljuisej Jehová ma techmaka tlalnamikilistli uan ma techpaleui tijchiuasej tlen iTlajtol kiijtoua (Jos. 1:8; Sal. 119:97; 1 Tes. 5:17). ToTeotsij itonal uan Biblia nojkia tlauel techpaleuis tlaj timokualchijchiuasej ika tlen timomachtisej ipan tlanechikoli uan tlaj nochipa timosentilisej (Heb. 10:24, 25). Nojkia moneki tijtekiuisej nochi tlen Jehová itlanechikol techmakatok, kej pilamochtsitsij, JW Broadcasting, JW Library uan kampa titlamachtiaj ipan Internet jw.org (Luc. 12:42).

17. ¿Tlake tikitasej ipan seyok tlamachtili?

¹⁷ Ipan ni tlamachtili tikitakej se keski tlamantli tlen nochi Cristo itokilijkauaj ayokmo kema kinamiki kichiuasej. ¿San ya nopa ayokmo moneki tijchiuasej uan kiampa toTeotsij kuali techitas? Amo, nojkia moneki tijpiasej ‘tonemilis tlen yankuik’ uan nochipa kiampa tijchijtosej. Yeka ipan nopa seyok tlamachtili tikitasej tlake techpaleuis ma tijpiakaj ‘tonemilis tlen yankuik’.