1, 2. ¿Keniuj sekin kinitaj itaixpantijkauan Jiova?

MIAKEJ kijtouanij ke itaixpantijkauan Jiova kinextiaj kualtsitsin kualneskayomej. Kemej neskayot, tajkuilojkej Anton Gill ika tajtoj kualneskayomej tein kinextijkej itaixpantijkauan Jiova ompa Alemania keman nazis taixyekantoyaj. Kijtoj ke nazis kinteltauelitayaj uan ke itech xiuit 1939 moajsiaj 6,000 itaixpantijkauan Jiova kampa tetsakuayaj uan tetajyouiltiayaj. No kijtoj ke maski semi tajyouijkej, katkaj takuaujtamachmej uan mosenpaleuiayaj, yolseujtoyaj maski kintajyouiltiayaj uan amo keman kikaujkej ininDios.

² Yankuixtok, seki taltikpakneminij ompa Sudáfrica kiitakej ke itekitikauan Dios kinextijkej kualneskayomej kemej nejin. Achto, tekiuanij amo kinkauayaj maj sayoj seko mosentilianij taltikpakneminij akin ixchijchipaujkej uan akin amo. Nejin no kinijtakouaya itaixpantijkauan Jiova. Sayoj ke, itech tonal domingo 18 metsti diciembre xiuit 2011, panoua 78,000 tokniuan akin tataman kemej ixtamatij kayomej Sudáfrica uan itech okseki uejueyi altepemej, mosentilijkej itech se ueyi kali itech xolal Johannesburgo porin mochiuak se ueyi nechikol. Semej akin taixyekana itech nejon ueyi kali kijtoj: “Amo keman nikinitstoya tel miakej taltikpakneminij maj tel kuali monejnemiltikan. Nochin tel kualtsin  takentokej. Uan semi tachipaujkan nankikaujkej nejin kali. Sayoj ke okachi nikmoujkaita ke amo nanmochikoitaj”.

3. ¿Keyej amo onkak okse nechikol kemej nechikol kampa tipouij?

³ Nejin tein kijtouaj taltikpakneminij akin amo itaixpantijkauan Jiova kinextia ke amo onkak okse nechikol kampa nochin moitaj kemej iknimej maski seseko kayomej (1 Ped. 5:9). ¿Keyej amo onkak okse nechikol kemej nechikol kampa tipouij? Porin Biblia uan iyektikatsin espíritu Dios techpaleuiaj maj timochikauakan timokixtiliskej ‘soltik talnamikilis’ uan maj timotalilikan “chipauak talnamikilis” (Col. 3:9, 10).

4. ¿Toni tikitaskej itech nejin tamachtilis, uan keyej?

⁴ Sayoj ke, moneki maj senkis timokixtilikan “soltik talnamikilis”. Itech nejin tamachtilis tikitaskej keniuj uelis timokixtiliskej uan keyej motelneki. No tikitaskej ke akin achto kichiuayaj miak taman tein amo kuali uelis mopataskej. Uan no ika titajtoskej tein uelis kichiuaskej akin miak xiujmejya kitekitilianij Jiova tein kinpaleuis maj amo oksepa motalilikan “soltik talnamikilis”. ¿Keyej moneki ika titajtoskej nejin? Tetayokoltij tikijtoskej ke seki tokniuan amo moyekpiakej uan peuak tanemiliaj uan kichiuaj ijkon kemej kichiuayaj achto ke kiixmatiskiaj Jiova. Yejua ika, tinochin moneki tikelnamikiskej nejin tanejmachtilis: “Naken moyolmachilia ke yejua semi se yek takuautamatkatagat ya, yejua nojon moneki ma kiyekita niyalis para ma amo uetsiti tech in tajtakol” (1 Cor. 10:12).

5. 1) Xikonmelaua ika se neskayot keyej niman moneki timokixtiliskej “soltik talnamikilis” (xikonita taixkopin ipeujyan tamachtilis). 2) ¿Toni taman tein poui itech “soltik talnamikilis” ika motajtoua itech Colosenses 3:5-9?

⁵ ¿Toni tikchiuaskiaj komo totilmaj amo chipauak uan hasta tsojyak? ¿Melauj ke niman timokixtiliskiaj? No ijkon, komo tikitaj ke tikchiujtokej tein Jiova kitauelita, motelneki maj niman timopatakan. Ne uejkauj, Pablo kiniluij tokniuan: “Xikyekauakan ya nochi nijin tajtakolme”. Maj ika titajtokan ome tajtakolmej tein yejua ika tajtoj: auilnemilis uan tachiualis tein tel pitsotik (xikonixtajtolti Colosenses 3:5-9).

6, 7. 1) ¿Toni kijtoj Pablo ke techpaleuis maj timokixtilikan “soltik talnamikilis”? 2) ¿Keniuj monejnemiltiaya Sakura, uan toni kipaleuij maj mopata?

⁶ Auilnemilis. Keman itech Biblia mokui tajtol auilnemilis, kijtosneki keman se takat uan se siuat akin amo namikuanij mosentekaj, uan keman ome takamej oso ome siuamej mosentekaj. Pablo kiniluij tokniuan: “Xiktajtamitiyakan ya ma miki [...] nijinkes tataman chiualisme: Ma amo xiauilnentinemikan”. Nejin kijtosneki ke moneki senkis timochikauaskej timokixtiliskej amo kuali tanejnekilis. Nejin uelis yeski ouij, sayoj ke uelis timokixtiliskej.

⁷ Maj tikitakan tein kipanok Sakura, se ichpoch kayot Japón. * Keman moskaltijtoya, momachiliaya iselti uan tayokoyaya. Kemej kinekia amo ijkon momachilis, keman kipiaya 15 xiujmej peuak auilnemi iniuan miakej takamej. Yejua ika, expa kinmayouik ikoneuan. Yejua kijtoua: “Yekinika, keman niauilnemia, nikmachiliaya ke amo teyi nechpanoskia, ke nechpatiuitayaj uan nechtasojtayaj. Sayoj ke satepan peuak tel amo kuali nimomachilia”. Sakura kisentokak auilnemik hasta keman kiajxitij 23 xiujmej. Ompa, peuak momachtia Biblia iniuan itaixpantijkauan Jiova. Kitelyolpaktiaya tein momachtiaya. Ika inepaleuil Jiova, amo auilnemikok uan uelik  amo semi motajtakoltijok tein kichiujka uan amo mopinaujmatikok. Axkan tekiti kemej precursora regular uan amo momachiliaok iselti. Yejua kijtoua: “Nechtelyolpaktia nikmachilis inetasojtalis Jiova mojmostaj”.

8. ¿Toni uelis kichiuas maj Jiova techita ke amo tichipaujkej?

⁸ Tachiualis tein tel pitsotik. Itech Biblia, nejin tajtolmej amo sayoj kijtosneki auilnemilis. Uelis kijtosnekis tachiualismej kemej tachichinalis oso keman nochipa se kamanaloua ika tajtolmej tein pitsotikej (2 Cor. 7:1; Efes. 5:3, 4). No uelis kijtosnekis tein amo kuali tein kichiuaj taltikpakneminij keman moajsij ininselti, kemej kiixtajtoltiskej amaixmej tein kichiua maj kinekikan auilnemiskej oso kiitaskej auilnemilis. Nejin uelis kichiuas maj aksa peua momajmatoka (Col. 3:5). *

9. ¿Toni uelis panos komo aksa peua kitelnejneki motekas iuan aksa?

⁹ Akin kiitaj auilnemilis okachi kinejnekij motekaskej iuan aksa uan amo ueli motsakuiliaj. Yejua ika, uelis nochipa itech tanemilijtoskej uan kitemoskej nochipa auilnemiskej. Seki motelmachtianij kiitanij ke akin kiteluelitaj kiitaskej auilnemilis tamatij kemej akin kikuij droga oso tauanaj. Yejua ika, akin kiitaj auilnemilis no kintelijtakoua. Uelis semi mopinaujmatiskej, amo kuali tekitiskej, amo yolpakiskej iniuan ininchankauan, kikauaskej ininnamik uan hasta momiktiskej. Se takat akin itech se xiuit amo kiitakok auilnemilis kijkuiloj: “Oksepa peuak nimopoujkaita”.

10. ¿Keniuj Ribeiro uelik moijkuanilij tanejnekilis tein kiuikaya maj kiita auilnemilis?

¹⁰ Miakej nochipa mochikaujtokej amo kiitaskejok auilnemilis. Uan uelis moijkuaniliskej nejon tanejnekilis, kemej kinextia ineskayo Ribeiro, se takat kayot Brasil. Keman katka telpoch, kisak ichan uan peuak tekiti kampa kinkuechouayaj amamej tein oksepa kitekitiltiayaj. Ompa uelia kiitaya amaixmej kampa nesia auilnemilis. Yejua kijtoua: “Yolik, peuak niktelnejneki nikitas auilnemilis uan hasta niknekia maj siuat akin iuan ninemia yani kansaika uan ijkon ueliskia nikitas videos kampa nesi auilnemilis”. Se tonal, keman Ribeiro tekititoya, kiitak itech miak amatajkuilolmej tein yaya kikuechotij se amatajkuilol tein motokaytia Keniuj uelis yolpakiskej kalyetouanij. Kiajokuik uan peuak kiixtajtoltia. Tein kiajsikamatik kiolinij maj momachti Biblia iniuan itaixpantijkauan Jiova. Sayoj ke semi kiouijmakak amo kiitasok auilnemilis. ¿Toni kipaleuij? Yejua kijtoua: “Nikchiuas netataujtil, nimomachtis Biblia uan nitanemilis itech tein nimomachtiaya kichiuak maj okachi nikpatiuitani ikualneskayouan Jiova. Ijkon, netasojtalis tein nikpialiaya okachi mochikauak ke tanejnekilis tein nechuikaya maj nikita auilnemilis”. Ika inepaleuil Biblia uan iyektikatsin espíritu Dios, Ribeiro mokixtilij “soltik talnamikilis”. Moauij uan axkan tekiti kemej tayekankej itech nechikol.

11. ¿Toni techpaleuis tinochin maj amo tikitakan auilnemilis?

¹¹ Tikitaj ke Ribeiro amo sayoj momachtij Biblia. No monekik tanemilis itech tein kiixtajtoltiaya uan kikauas maj nejon kioliniani maj mopata. Uan no, kitajtanij Dios maj kipaleui. Nochi nejin kipaleuij maj netasojtalis tein kipialiaya Jiova okachi mochikauani uan ijkon ueliskia moijkuanilis tanejnekilis tein kiuikaya  maj kiita auilnemilis. Techpaleuis maj amo tiknekikan tikitaskej auilnemilis komo tiktasojtaj Jiova ika nochi toyolo uan tiktauelitaj tein amo kuali (xikonixtajtolti Salmo 97:10).

12. ¿Toni kipaleuij Stephen maj moijkuanili kualanyot uan maj amo tauijuikalti?

¹² Seki taltikpakneminij tel ijsiujka kualanij uan kijtouaj tajtolmej tein teyolxokoliaj. Keman panoua nejin, nochin ininchankauan tajyouiaj. Maj tikitakan tein kipanok Stephen, se tepopaj kayot Australia. Yejua kijtoua: “Nikijtouaya miak pitsotik tajtolmej uan niman nikualania ika tein yeski taman. Nonamik uan nejua expa timokakaujkej uan yaya tiktsayanatij amat ininixpan tekiuanij”. Sayoj ke itaixpantijkauan Jiova peuak kinmachtiaj ika Biblia. ¿Keniuj kipaleuij Stephen keman peuak kichiua tein Biblia tayolmajxitia? Yejua kijtoua ke okachi kuali mouikayaya iniuan ichankauan. Achto, komo teisa kikualantiaya momachiliaya kemej se bomba tein yaya toponiti, sayoj ke axkan kimachilia yolseuilis. Axkan, Stephen tekiti kemej tapaleuijkej itech nechikol uan inamik miak xiujmejya tekititok kemej precursora regular. Tayekananij itech inechikol kijtouaj: “Stephen se tokniuj yolnejmach, yolyemanik uan tekitikej”. No kijtouaj ke amo keman kiitanij maj kualani. Stephen kijtoua ke amo iselti mopatak. Yejua kijtoua: “Uelini nikpiani nejin tatiochiualismej porin nimokauani maj Jiova nechpaleui maj senkis nimopata”.

13. 1) ¿Keyej semi tamouilil tauelot? 2) ¿Toni technauatia Biblia?

¹³ Biblia technauatia maj timokixtilikan tauelot, maj amo titauijuikaltikan nion maj titetsatsajtsilikan (Efes. 4:31). Miakpa, nejin kichiua maj se tateui. Xa miakej kinemiliskej ke nejin ipa se kichiua, sayoj ke tein melauj, amo kiueyitalia toTachijchiujkauj. Miakej tokniuan mopatakej uan motalilijkej “yankuik talnamikilis” (xikonixtajtolti Salmo 37:8-11).

14. ¿Uelis aksa akin tel tateuia mochiuas yolnejmach?

¹⁴ Se tokniuj akin monotsa Hans tekiti kemej tayekankej itech se nechikol ompa Austria. Akin kinixyekana tayekananij itech inechikol kijtoua: “Yejua semej tokniuan akin okachi yolnejmach akin uelis se kiixmatis”. Sayoj ke Hans amo nochipa ijkon katka. Keman katka telpoch, peuak tel tauana uan tel tateuia. Se tonal keman tel uintitoya, tel kualanik uan kimiktij inovia. Kiixtalijkej maj tsakto veinte xiujmej. Sayoj ke nejon amo kipaleuij maj mopata. Satepan, imomaj kitajtanij se tokniuj tayekankej maj kikalpanouani, uan Hans peuak momachtia Biblia. Yejua kijtoua: “Nechtelouijmakak nimokixtilis ‘soltik talnamikilis’. Ome tajkuilolmej nechyolchikaujkej. Semej yejua Isaías 55:7, kampa kijtoua: ‘Akin amo yolkuali maj kikaua ojti tein kitojtokatok’. Okse yejua 1 Corintios 6:11. Ompa kijtoua ke sekin akin achto ueyi tajtakojkaj kikaujkaj tajtakol keman mochiujkej itatojtokakauan Cristo. Itech miak xiujmej, ika nejmachkayot Jiova nechpaleuij ika iyektikatsin espíritu maj nimotalili ‘yankuik talnamikilis’” Hans moauij keman tsaktoya. Kisak satepan ke tsaktoya diecisiete xiujmej uan tajko. Yejua kijtoua: “Niktasojkamatilia Jiova maj nechnextiliani iueyi teiknelilis uan maj nechtapojpoluiani”.

15. ¿Toni kichiuaj miakej, sayoj ke toni kijtoua Biblia?

¹⁵ Okse taman tein poui itech “soltik talnamikilis” yejua takajkayaualis. Kemej neskayot, miakpa taltikpakneminij takajkayauaj  porin amo kinekij kiixtauaskej impuestos oso porin amo kinekij maj kintatsakuiltikan. Sayoj ke, Jiova yejua “Dios akin kijtoua tein melauak” (Sal. 31:5). Yejua ika, technauatia tiitekitikauan maj nochipa tikijtokan tein melauak, maj amo titakajkayauakan (Efes. 4:25; Col. 3:9). Yejua ika moneki tikijtoskej tein melauak maski timopinaujtiskej oso amo techpaleuis (Prov. 6:16-19).

16. ¿Toni techpaleuis maj timokixtilikan “soltik talnamikilis”?

¹⁶ Amo uelis toselti timokixtiliskej “soltik talnamikilis”. Sakura, Ribeiro, Stephen uan Hans monekik motelchikauaskej. ¿Keniuj uelik mopatakej? Ika inepaleuil iTajtol Dios uan iyektikatsin espíritu (Luc. 11:13; Heb. 4:12). Tejuan no uelis tikseliskej nejon nepaleuil komo tikixtajtoltiaj Biblia mojmostaj, itech titanemiliaj uan nochipa tiktajtaniaj Jiova maj techmaka tamatilis uan chikaualis tein techpaleuis maj tiktakamatikan tein kijtoua iTajtol (Jos. 1:8; Sal. 119:97; 1 Tes. 5:17). Yektikatsin espíritu uan Biblia no techpaleuiskej komo timomachtiaj tein moitas itech nechikolmej uan amo titapolouaj (Heb. 10:24, 25). Uan no, moneki tiktekitiltiskej nochi tein techmakaj itech inechikol Jiova, kemej amaixmej, JW Broadcasting, JW Library uan jw.org (Luc. 12:42).

17. ¿Toni tikitaskej itech okse tamachtilis?

¹⁷ Tikitakej seki amo kuali tachiualismej tein tiitekitikauan Dios moneki senkis timokixtiliskej. Sayoj ke moneki tikchiuaskej okachiok komo tiknekij tikpiaskej itatiochiualis Dios. Moneki timotaliliskej “yankuik talnamikilis” uan amo timokixtiliskej. Itech okse tamachtilis tikitaskej keniuj tikchiuaskej.