1, 2. Ke’ng seo batho ba se lemogilego ka Dihlatse tša Jehofa?

BATHO ba bantši ba boletše ka tsela e botse kudu yeo Dihlatse tša Jehofa di itshwarago ka yona. Ka mohlala, mongwadi wa dipuku e lego Anton Gill o ngwadile ka bana babo rena le dikgaetšedi ba mehleng ya ge go be go buša Manazi kua Jeremane gore: “Boitshwaro bja Dihlatse tša Jehofa bo ile bja dira gore di lemogwe ke Manazi ao a bego a tletše lehloyo. . . . Ka 1939 ke ge go šetše go na le Dihlatse tša Jehofa tše 6 000 [dikampeng tša tlaišo tša Manazi.]” Lega go le bjalo, gaešita le ge Dihlatse tšeo tša Jehofa di ile tša tlaišwa o šoro, mongwadi yoo o ngwadile gape gore di ile tša dula di “theošitše maswafo e bile di na le khutšo, di botega e bile di thekgana.”

² Malobanyana mo, batho bangwe mo Afrika Borwa le bona ba bone boitshwaro bjo bo swanago bjo bobotse bja Dihlatse tša Jehofa. Mengwageng e fetilego, go be go sa kgonege gore Dihlatse tša Jehofa tša merafo e sa swanego nageng ye di bokane gotee. Lega go le bjalo, ka Sontaga sa di-18 tša December, 2011, go ile gwa thabiša kudu go bona bana babo rena ba merafo e sa swanego ba Afrika Borwa le ba dinageng tša kgauswi bao ba fetago 78 000, ba tletše setediamong se segologolo sa Johannesburg gomme ba thabela go rutwa ka Modimo. Yo mongwe wa balaodi ba setediamo seo o ile a bolela ka bana babo rena  bao gore: “Setediamong se, ke thoma go bona lešaba la batho bao ba itshwerego gabotse ka tsela ye. Ka moka ga bona ba apere ka bothakga. Le gona le hlwekišitše setediamo se ka tsela e makatšago. Eupša seo se nkgahlago le go feta ke gore le swarana gabotse gaešita le ge le le merafo e sa swanego.”

3. Ke’ng seo se dirago gore Dihlatse tša Jehofa di se swane le batho ba bangwe?

³ Mantšu a bjalo ao a bolelwago ke batho bao e sego Dihlatse tša Jehofa a bontšha gabotse gore ga go na batho ba go swana le rena. Re bana ba motho lefaseng ka moka. (1 Pet. 5:9) Eupša ke’ng seo se re thušago gore re se swane le mekgatlo e mengwe? Re thušwa ke Lentšu la Modimo le moya wa gagwe o mokgethwa, le go šoma ka thata gore re “[hlobole] semelo sa kgale” gomme re “apare semelo se sefsa.”​—Bakol. 3:9, 10.

4. Re tlo bolela ka’ng sehlogong se, gona ka baka la’ng?

⁴ Go hlobola semelo sa kgale le go dula re se hlobotše ke dilo tše pedi tše di sa swanego. Sehlogong se, re tlo bolela ka dilo tšeo di ka re thušago go hlobola semelo sa kgale le lebaka leo go dira bjalo go akgofilego. Le gona re tlo kwa kamoo motho a ka hlobolago semelo sa kgale gaešita le ge a ka ba a nweletše mekgweng e mebe. E bile re tlo bona seo bao e lego kgale ba hlankela Jehofa ba ka se dirago gore ba dule ba hlobotše semelo sa kgale. Ke ka baka la’ng re hloka dikgopotšo tša mohuta wo? Lebaka ke gore ba bangwe ba bahlanka ba Jehofa ba a itebala gomme ba boela mekgweng ya bona e mebe ya kgale. Ka baka leo, ka moka ga rena re swanetše go naganišiša ka temošo ye yeo e rego: “Anke yo a naganago gore o eme a hlokomele gore a se we.”​—1 Bakor. 10:12.

5. (a) Nea mohlala wo o bontšhago gore re swanetše go hlobola semelo sa kgale kapelapela. (Bona seswantšho seo se lego mathomong a sehlogo.) (b) Go ya ka Bakolose 3:5-9, ke mekgwa efe yeo e bontšhago semelo sa kgale?

⁵ O tlo dira’ng ge diaparo tša gago di ka ba le ditšhila, mohlomongwe e bile di nkga? O tlo di hlobola ka pelapela. Ka mo go swanago, re swanetše go kwa ka pelapela taelo ya gore re hlobole goba re lahle mekgwa yeo Modimo a e hloilego. Re nyaka go kwa taelo e kwagalago yeo Paulo a e neilego Bakriste ba mehleng ya gagwe yeo e rego: “Le swanetše go di lahlela ka moka kgole le lena.” Anke re ahlaahleng mehuta e mebedi ya dibe tšeo Paulo a boletšego ka tšona, e lego bootswa le go se hlweke.​—Bala Bakolose 3:5-9.

6, 7. (a) Mantšu a Paulo a bontšha bjang gore re swanetše go lwa ka matla go hlobola semelo sa kgale? (b) Sakura o be a phela bophelo bja mohuta mang, gona o thušitšwe ke’ng go fetoga?

⁶ Bootswa. Tlhaloso ya mathomong ya lentšu la ka Beibeleng leo le fetoletšwego e le “bootswa” e akaretša thobalano ya magareng ga batho ba babedi bao ba sego ba nyalana ka molao le di​-gay goba di-​lesbian. Paulo o ile a botša Bakristegotee le yena gore ba ‘bolaye ditho tša mebele ya bona,’ ke gore, ba lahle mekgwa le ge e le efe ya “bootswa.” Mantšu a a matla a Paulo a bontšha gabotse gore re swanetše go lwa ka matla gore re lahle dikganyogo tše bjalo tše di fošagetšego. Le gona go a kgonega gore motho a fenye dikganyogo tše bjalo.

⁷ Nagana ka seo se diragaletšego kgaetšedi Sakura * wa kua Japane. Sakura o gotše a lewa ke bodutu e bile a ikwa a se na mohola. O thomile go leka go itloša bodutu ka go robala le batho ba ba fapafapanego a sa na le mengwaga e 15. O ipobotše ka gore: “Ka baka la boitshwaro bjoo, ke ntšhitše mpa ka makga a mararo.” O re: “Mathomong ke be ke ikwa ke šireletšegile ge ke robala le batho bao, ke nagana gore ke wa bohlokwa le gore ke a ratwa. Eupša ge ke be ke nwelela mokgweng wo, ke ile ka lemoga gore ga se ka šireletšega.” Sakura o ile a tšwela pele a phela ka tsela ye go fihlela a na le mengwaga e 23. Ke moka o ile a thoma go ithuta Beibele le Dihlatse tša Jehofa. O ile a rata seo a bego a ithuta sona,  gomme Jehofa a mo thuša go fenya maikwelo a gagwe a fošagetšego le go se sa phela ka tsela e gobogilego. Ga bjale Sakura ke mmulamadibogo wa ka mehla e bile ga a sa lewa ke bodutu. Le gona o re: “Ruri ke thabela lerato leo Jehofa a mpontšhago lona letšatši le letšatši.”

8. Ke dilo dife tše dingwe tšeo di ka dirago gore Modimo a bone re sa hlweka?

⁸ Go se hlweke. Lentšu la mathomong la ka Beibeleng leo le fetoletšwego e le “go se hlweke,” le na le tlhaloso e nabilego gomme ga le bolele ka dibe tša thobalano feela. Le ka bolela le ka go kgoga goba go bolela metlae e sa hlwekago. (2 Bakor. 7:1; Baef. 5:3, 4) Le gona le akaretša mekgwa e sa hlwekago yeo motho a e dirago ka sephiring, go swana le go bala dipuku tša thobalano goba go bogela diswantšho tša batho bao ba sa aparago, e lego dilo tšeo di ka dirago gore motho a wele mokgweng wa ditšhila wa go bapala ka ditho tša gagwe tša bong.​—Bakol. 3:5. *

9. Ke’ng seo se ka diregago ka motho yo a fepago “kganyogo e fošagetšego ya go robala ga monna le mosadi”?

⁹ Bao ba dulago ba bogela diswantšho tša batho bao ba sa aparago ba fepa “kganyogo e fošagetšego ya go robala ga monna le mosadi,” e lego selo seo se ka dirago gore ba feleletše ba rata thobalano ka mo go feteletšego. Dinyakišišo di bontšha gore batho bao ba dumetšego gore ba na le bothata bja go bogela diswantšho tša thobalano ba phela go swana le bao e lego makgoba a bjala le diokobatši. Ke ka baka leo bao ba tlwaetšego go bogela diswantšho tša thobalano ba feleletšago ba eba le ditlamorago tše di sa kgahlišego,e lego go lewa ke matswalo o šoro, go goga maoto mošomong, go ba le mathata ka malapeng, tlhalo le go ipolaya. Ge monna yo mongwe yo a bego a tlwaetše go bogela diswantšho tša batho bao ba sa aparago a be a iteboga gore o feditše ngwaga a sa di bogele, o itše: “Ga bjale ke bušitše seriti sa ka e bile ke a itlhompha.”

10. Ribeiro o thušitšwe ke’ng go lahla mokgwa wa go bogela diswantšho tša batho bao ba sa aparago?

¹⁰ Bathong ba bantši, go se bogele diswantšho tša batho bao ba sa aparago ke ntwa ya letšatši le letšatši. Lega go le bjalo, mohlala wa Ribeiro wa kua Brazil, o re bontšha gore re ka kgona go fenya ntwa yeo. Ribeiro o ile a tloga gae e sa le mofsa gomme a thoma go šoma femeng ya go šoma ka dipampiri le dipuku tše di lahlilwego. Gona moo, o ile a thoma go bogela dipuku tša batho bao ba sa aparago. O re: “Ganyenyane-ganyenyane, ke ile ka tlwaela go bogela dilo tšeo. Ke ile ka di tlwaela kudu moo ke bego ke fela pelo ya gore mosadi yo ke bego ke dula le yena a tšwe ka ntlong gore ke šale ke bogela dibidio tša batho bao ba sa aparago.” Ke moka ka letšatši le lengwe ge Ribeiro a le mošomong, o ile a fatafata mokgobong o mongwe wa dipuku tšeo di bego di lahlilwe gomme a bona puku ya sehlogo se se rego, Sephiri sa Lethabo la Lapa. O ile a e topa gomme a e bala. Seo a ilego a se bala ka pukung ye se ile sa mo tutueletša gore a thome go ithuta Beibele le Dihlatse tša Jehofa, eupša go ile gwa mo tšea nako e telele gore a tlogele go bogela diswantšho tša batho bao ba sa aparago. Eupša o thušitšwe ke’ng gore a feleletše a tlogetše mokgwa wo? O re: “Thapelo, go ithuta Beibele, go naganišiša ka seo ke bego ke ithuta sona le go rata dika tša Jehofa, go nthušitše gore ke mo rate kudu go feta go bogela diswantšho tša batho bao ba sa aparago.” Ka thušo ya matla a Lentšu la Modimo le moya o mokgethwa, Ribeiro o kgonne go hlobola semelo sa kgale, a kolobetšwa gomme ga bjale ke mogolo ka phuthegong.

11. Ke’ng seo motho a swanetšego go se dira gore a se sa bogela diswantšho tša batho bao ba sa aparago?

¹¹ Hlokomela gore Ribeiro o ile a dira se se fetago go fo ithuta Beibele gore a fenye mokgwa wa gagwe. O ile a dumelela molaetša wa Beibele gore o mo kgome pelo. Thapelo le go naganišiša di ile tša mo thuša gore a rate Modimo kudu go feta go  bogela diswantšho tša thobalano. Selo feela seo se ka re thušago go phema go bogela diswantšho tša batho bao ba sa aparago le go hloya se sebe ke go lwela go rata Jehofa kudu.​—Bala Psalme 97:10.

12. Stephen o thušitšwe ke’ng go lahla pefelo le maroga?

¹² Gantši batho ba go befelwa kapela ba ntšha kgalefo ya bona ka go šomiša polelo e gobošago. Go molaleng gore boitshwaro bjo bjalo bo tla thuba lapa. Stephen, e lego tate wa kua Australia o re: “Ke be ke rogana kudu, e bile ke be ke dula ke galefišwa ke dilo tša go se re selo. Nna le mosadi wa ka re ile ra arogana ka makga a mararo gomme ra dira phetho ya gore re hlalane.” Eupša pele Stephen le mosadi wa gagwe ba ka hlalana, ba ile ba thoma go ithuta Beibele le Dihlatse tša Jehofa. Go ile gwa direga’ng ka morago ga gore Stephen a thome go diriša seo a bego a ithuta sona ka Beibeleng? O re: “Bophelo ka lapeng la rena bo ile bja kaonefala ka lebelo. Ka thušo ya Jehofa, ga bjale ke na le khutšo e bile ga ke sa galefa-galefa, eupša pele ke ithuta Beibele ke be ke swana le pomo yeo e bego e thutupišwa ke selo se senyenyane.” Lehono Stephen ke mohlanka wa bodiredi, gomme mosadi wa gagwe o na le mengwaga e mmalwa e le mmulamadibogo wa ka mehla. Bagolo ba phuthegong ya Stephen ba re: “Stephen ke ngwanabo rena wa go homola, wa go šoma ka thata le yo a ikokobeditšego.” Ba re ga ba gopole ba mmona a galefile. Na Stephen o a itheta gore o kgonne go fenya pefelo? O re: “Ke be nka se hwetše ditšhegofatšo tše ka moka ge nkabe ke ile ka gana gore Jehofa a nthuše go fetoša semelo sa ka.”

13. Ke ka baka la’ng go befelwa go le kotsi, gona Beibele e re nea temošo efe?

¹³ Ga go makatše ge Beibele e re lemoša gore re lahle pefelo, polelo e gobošago le mašata. (Baef. 4:31) Ka maswabi, boitshwaro bjo bjalo bo feleletša ka bošoro. Batho ba lefase ba ka lebelela go befelwa e se bothata, eupša Modimo o go hloile. Bana babo rena ba bantši ba ile ba swanelwa ke go lahla mekgwa e bjalo e mebe pele ba apara semelo se sefsa.​—Bala Psalme 37:8-11.

14. Na go a kgonega gore motho yo bogale a fetoge yo boleta?

¹⁴ Nagana ka mohlala wa Hans, yoo a hlankelago e le mogolo ka phuthegong kua Austria. Molomaganyi wa sehlopha sa bagolo ba phuthegong yeo Hans a lego go yona o re: “Hans ke motho yo boletaleta yo o ka ratago go phela le yena.” Eupša Hans o be a se bjalo mathomong. Ge e be e sa le mofsa, o ile a thoma go nwa bjala ka mo go feteletšego, gomme seo sa dira gore a be bogale. Nakong e nngwe ge a be a tagilwe e bile a galefile, o ile a bolaya kgarebe ya gagwe, gomme a ahlolelwa mengwaga e 20 kgolegong. Kgolego ga se ya ka ya fetoša semelo sa Hans. Eupša ge nako e dutše e eya, mmagwe o ile a rulaganya gore mogolo yo mongwe a kopane le Hans gona moo kgolegong gomme a ithute Beibele le yena. Hans o re: “Go be go le thata kudu gore ke hlobole semelo sa ka sa kgale. Ditemana tša Beibele tšeo di nthušitšego go fetoga ke Jesaya 55:7, yeo e rego: ‘Anke motho yo kgopo a tlogele tsela ya gagwe,’ le 1 Bakorinthe 6:11, yeo e bolelago ka bao ba tlogetšego mekgwa e mebe gore: ‘Lega go le bjalo, seo ke se ba bangwe ba lena le bego le le sona.’ Ka mengwaga e mentši, Jehofa o ile a se mphelele pelo gomme a nthuša ka moya wa gagwe o mokgethwa gore ke apare semelo se sefsa.” Ka morago ga gore Hans a dule kgolegong mengwaga e 17 le seripa, o ile a lokollwa e le Hlatse ya Jehofa e kolobeditšwego. O re: “Ke leboga Jehofa kudu ge a mpontšhitše kgaugelo le go ntebalela.”

15. Batho ba tlwaetše go dira’ng, eupša Beibele e re’ng ka mokgwa woo?

¹⁵ Go tlaleletša polelong e gobošago, go bolela maaka le gona ke karolo ya semelo sa kgale. Ka mohlala, batho ba tlwaetše go bolela maaka ditabeng tša lekgetho goba ge ba nyaka go phema kotlo. Ka go se swane le bona, Jehofa ke “Modimo  wa therešo.” (Ps. 31:5) Ka baka leo, o nyaka gore “yo mongwe le yo mongwe” wa barapedi ba gagwe “a bolele therešo le moagišani wa gagwe” le go se ‘fore’ ba bangwe. (Baef. 4:25; Bakol. 3:9) Ka gona re swanetše go bolela therešo gaešita le ge go dira bjalo go tla dira gore re lewe ke dihlong goba gwa re bea ka mušing.​—Die. 6:16-19.

16. Ke’ng seo se ka re thušago go hlobola semelo sa kgale?

¹⁶ Re ka se kgone go lahla mekgwa ya semelo sa kgale ka borena. Batho bao go boletšwego ka bona sehlogong se, e lego Sakura, Ribeiro, Stephen le Hans, ba ile ba swanelwa ke go šoma ka thata gore ba lahle mekgwa ya bona e mebe. Ba thušitšwe ke’ng go fenya? Ba ile ba dumelela matla a Lentšu la Modimo le moya wa gagwe o mokgethwa gore di fetoše menagano ya bona le dipelo tša bona. (Luka 11:13; Baheb. 4:12) E le gore le rena re holwe ke matla ao, re swanetše go bala Beibele letšatši le letšatši, re naganišiše ka seo re se balago gomme re rapele Jehofa ka mehla gore a re nee bohlale le matla a go diriša seo re ithutilego sona ka Beibeleng. (Josh. 1:8; Ps. 119:97; 1 Bathes. 5:17) Le gona re holwa ke Lentšu la Modimo le moya wa gagwe o mokgethwa ge re lokišetša diboka le go ba go tšona. (Baheb. 10:24, 25) Go oketša moo, re swanetše go diriša mekgwa e fapafapanego yeo ga bjale Jehofa a re neago dijo tša moya ka yona.​—Luka 12:42.

17. Re tlo bolela ka’ng sehlogong se se latelago?

¹⁷ Re boletše ka mekgwa e mentšinyana e mebe yeo Bakriste ba swanetšego go e hlobola le go dula ba e hlobotše. Eupša na Modimo o tla re amogela feela ka gobane re hlobotše mekgwa yeo? Aowa. Re swanetše gore gape re apare semelo se sefsa. Sehlogong se se latelago, re tlo bolela ka dika tše mmalwa tša semelo se sefsa tšeo re swanetšego go dula re di apere ka tsela ya seswantšhetšo.