1, 2. Antoy naiimano ed saray Tasi nen Jehova?

WALA ray makakaimano ed balibalin ugali na saray totoo nen Jehova. Singa bilang, oniay insulat na autor a si Anton Gill nipaakar ed saray agagi tayo ed Nazi Germany: “Saray Tasi nen Jehova et kabkabusol na saray Nazi. . . . Nen 1939, manga 6,000 ed sikara so walad [saray concentration camp].” Balet imbaga to met ya anggano dinmalan irad graben panamasegsegang, impanengneng na saray Tasi ya napanmatalkan ira, kakkalmado ira anggano napapairap, matoor irad Dios da, tan nankakasakey ira.

² Nen agano ni, diad South Africa, wala met iray akaimano ed balibalin ugali na saray totoo na Dios. Walay panaon ditan ya agnaabuloyan ya mantitipon iray Tasi ya nandumaan so kolor da. Balet nen Simba, Disyembre 18, 2011, makapaliket a nanengneng ya nantitipon diad sankabalegan ya istadyum ed syudad na Johannesburg so masulok ya 78,000 ya agagi tayon nandurumay lahi da ya nanlapud South Africa tan diad arum ya bansa pian panliketan so espiritual ya programa. Oniay imbaga na sakey ed saray manedyer na istadyum nipaakar ed sikara: “Aya la so sanka-disiplinadoan ya grupo na totoon anengneng ko ed sayan istadyum. Tan balibali panangawes dan amin. Nilinisan yo nin  maong so istadyum. Balet say talagan makapadinayew et nandurumay lahi yo.”

3. Akin et nikadkaduma so impanaagi tayo?

³ Ipapanengneng na saratan ya komento na saray aliwan Tasi ya talagan nikadkaduma so interon mundon impanaagi tayo. (1 Ped. 5:9) Balet akin ya nikadkaduma tayo ed arum ya organisasyon? Lapud pansasagpotan tayon ‘lakseben so daan a personalidad’ diad tulong na Salita na Dios tan say masanton espiritu to. Insan ‘isusulong tayo so balon personalidad.’​—Col. 3:9, 10.

4. Antoy aralen tayo ed sayan artikulo, tan akin?

⁴ Importante ya lakseben tayoy daan a personalidad, balet kaukolan met ya agtayo la ipawil itan. Diad sayan artikulo, aralen tayo no panon tayon lakseben so daan a personalidad, no akin ya gawaen itan a tampol, tan no akin ya posiblin manguman so sakey anggano nigalet la ed mauges ya kagagawa. Aralen tayo met no antoy nayarin gawaen na saramay abayag lad katuaan pian agda la nipawil so daan a personalidad da. Akin et kaukolan iratan ya panonot? Lapud wala ray datin manlilingkor ed si Jehova a nagmaliw ya kampante tan pinmawil irad datin kabibilay da. Kanian, nepeg tayon ipapuso iyan pasakbay: “Samay maniisip a sikatoy akaalagey et manalwar komon ya agnatumba.”​—1 Cor. 10:12.

5. (a) Iyilustra no akin ya kaukolan ya lakseben a tampol so daan a personalidad. (Nengnengen so litratod gapo na artikulo.) (b) Base ed Colosas 3:5-9, anto ran kagagawa so kabiangan na daan a personalidad?

⁵ Antoy gawaen mo no arutakan so kawes mo tan ambanget la? Seguradon lakseben mon tampol. Mipadpara, kaukolan tayoy onkiwas a tampol, ya unoren so ganggan ya ekalen iray kagagawan kabusol na Dios. Labay tayon unoren so malinew ya bilin nen Pablo ed saray Kristiano ed panaon to: “Amin iraya et nepeg yon ekalen ed inkasikayo.” Pantongtongan tayo so duara ed saray mauges ya kagagawan binitla nen Pablo​—seksual ya imoralidad tan karutakan.​—Basaen so Colosas 3:5-9.

6, 7. (a) Panon ya ipapanengneng na imbaga nen Pablo ya kaukolan tayoy impasyan milaban pian lakseben so daan a personalidad? (b) Anto so datin kabibilay nen Sakura, tan antoy amabiskeg ed sikato ya itunda itan?

⁶ Seksual ya imoralidad. Say kabaliksan na orihinal ya salitan inusar ed Biblia ya impatalos a “seksual ya imoralidad” et kaibay seksual a relasyon na duaran indibidual ya agkasal tan homoseksualidad. Imbaga nen Pablo ed saray kapara ton Kristiano ya ‘pateyen’ day “kabiangan na laman” da​—ekalen day antokaman a pilalek da “nipaakar ed seksual ya imoralidad.” Malinew ya ipapanengneng na salitan inusar nen Pablo ya kaukolan tayoy impasyan milaban pian ekalen iratan ya mauges a pilalek. Anggano mairap, sarag tayon taloen so pilalek ya manggaway kasalanan.

⁷ Nengnengen tayoy agawad si Sakura * ya taga Japan. Legan ya ombabaleg, sikatoy lanang ya maer-ermen tan pakalikna to et anggapoy kana na bilay to. Diad edad ya 15, ginapoan to lay seksual ya pirerelasyon ed nanduruman lalaki pian naekal so ermen to. Nababaingan ton inamin: “Lapud satan, amitlo ak ya nampaekal.” Imbaga to ni: “Diad gapo, makakalikna ak na seguridad kada no manggagawa ak na seksual ya imoralidad, ya pakaliknak et kailangan tan aaroen da ak. Balet no kapigan ombabayag so panggagawak na imoralidad, mas nai-insecure ak.” Ontan so kabibilay nen Sakura anggad 23 so taon to. Insan ginmapon nanaral na Biblia ed saray Tasi. Agustoan to so nanaaralan to, tan diad tulong nen Jehova  et alabanan toy graben pakakakonsiensia tan kababaingan, tan nitunda toy seksual ya imoralidad. Natan et regular payunir lay Sakura tan aliwa lan maermen. Imbaga to: “Malikeliket ak ta naliliknak so panangaro nen Jehova diad amin a panaon.”

8. Anto ray pigaran kagagawa ya nayarin magmaliw tayon marutak ed pakanengneng na Dios?

⁸ Karutakan. Say orihinal ya salitan inusar ed Biblia ya impatalos a “karutakan” et malaknab so kabaliksan to ya aglabat ontutukoy ed seksual ya imoralidad. Ontutukoy met itan ed makaderal iran kagagawa a singa say panagsigarilyo odino bastos iran panagsalita. (2 Cor. 7:1; Efe. 5:3, 4) Onaplika met itan ed marutak iran bengatla ya gagawaen na sakey no bukbukor to, singa say pambasa na libron makapaliing na liknaan ed sekso odino pambantay na pornograpiya, ya nayarin manresulta ed marutak ya kagagawan masturbasyon.​—Col. 3:5. *

9. Anto ray nayarin resulta no bayuboan na sakey so “agnakontrol a pantintindek ed sekso”?

⁹ Saramay lanang ya manbabantay na pornograpiya et babayuboan day “agnakontrol a pantintindek ed sekso,” ya nayarin manresulta ed pagmaliw dan adik ed sekso. Base ed research, saramay inmamin ya agda napigilan so sarili dan manbantay na pornograpiya et parehoy sintomas da ed saray adik ed druga tan alak. Kanian say lanang ya pambantay na pornograpiya et walaan na makaderal iran resulta​—singa say sobran kababaingan, daiset ya nagagawaan ed trabaho, agmaliket ya pamilya, diborsyo, tan pambikkel. Nen sakey taon la ya nitunda na sakey a laki so inkaadik tod pornograpiya, oniay insulat to: “Pinmawil so respetok ed sarilik ya abalang ed siak.”

10. Panon ya nitunda nen Ribeiro so inkaadik to ed pornograpiya?

¹⁰ Parad dakel, kaukolan so tuloytuloy ya pilalaban pian sigpot dan nitunda so inkaadik ed pornograpiya. Balet sarag day manalo, ya singa agawad si Ribeiro ya taga Brazil. Tinmaynan si Ribeiro ed abung da nen tinedyer ni tan ag-abayag et nantrabaho ed planta parad panag-recycle na papel. Ditan et dakel so pornograpikon babasaen. Imbaga to: “Naadik ak ed satan. Diad graben inkaadik ko et ngalngali agko la naalagar ya onalis ed abung imay biin ka-live-in ko pian makapambantay ak na pornograpiya.” Insan aminsan diad trabaho, naimano nen Ribeiro so libron Say Sekreto na Liket ed Pamilya diad saray nantatapewan ya libron i-recycle la. Inala to itan tan binasa to. Lapud abasa to, impaiyaralan na Biblia ed saray Tasi nen Jehova, balet abayag antis ton nitunda so inkaadik to. Antoy akatulong ed sikato? Imbaga to: “Panamegley na pikakasi, panagaral na Biblia, tan panagdalepdep ed saray nanaaralan ko, mas naapresyak iray kualidad na Dios anggad mas binmiskeg so panangarok ed si Jehova nen say pampilalek ko ed pornograpiya.” Diad tulong na pakayari na Salita na Dios tan say masanton espiritu to, asarag nen Ribeiro ya lakseben so daan a personalidad to, abautismoan, tan natan et sakey lan elder ed kongregasyon.

11. Antoy kaukolan pian sigpot ya nitunda na sakey so pornograpiya?

¹¹ Imanoen ya aliwa labat lan panaral na Biblia so ginawa nen Ribeiro pian manalo ed pilalaban to. Kaukolan toy panaon pian onsabid puso to so mensahe na Biblia. Lapud pikakasi tan panagdalepdep, dinaeg na panangaro tod Dios so pampilalek tod pornograpiya. Say mabiskeg ya panangaro ed si Jehova tan pambusol ed mauges so sankaabigan ya paraan pian sigpot ya nitunda so pornograpiya.​—Basaen so Salmo 97:10.

12. Antoy akatulong ed si Stephen ya ekalen so pasnok tan makapasakit ya panagsalita to?

¹² Saramay mipepetang so ulo ra et mabetbet ya ipapaway day pasnok da panamegley na makapasakit ya salita. No ontan so ugali na sakey, seguradon agmaliket so pamilya to. Oniay imbaga nen Stephen, sakey ya ama a taga Australia: “Dati et maayew ak tan daiset deperensya et onsasanok ak la. Amitlo kami lan nansian nen asawak tan ilalakad mi lay pandiborsyo mi.” Insan ira inyaralan ed Biblia na saray Tasi. Antoy resulta nen ginapoan ya unoren nen Stephen so bilin na Biblia? Imbaga to: “Anguma-uman so pamilya mi. Diad tulong nen Jehova, mareen tan kalmado ak la natan, aliwan singa dati ya singa ak bomba ya biglan onsabog anggan onsyodot ak labat na daiset.” Natan et ministeryal a lingkor lay Stephen, tan pigay taon lan regular payunir so asawa to. Oniay imbaga na saray elder ed kongregasyon nen Stephen: “Mareen tan makulin brother si Stephen, tan mapaabeba.” Anggapoy nanonotan dan nampasnok si Stephen. Kasin agawaan to itan diad sarili to labat? Imbaga to: “Ag-agawa ed bilay ko irayan marakdakep ya bendisyon no agko inawat so tulong nen Jehova ya sigpot ya umanen so personalidad ko.”

13. Akin et mapeligro so ugalin mapasnok, tan antoy ipapasakbay na Biblia?

¹³ Walay maabig a rason no akin ya ibabaga na Biblia ya ekalen tayoy pasnok, makapasakit a salita, tan eyagan odino ingalan. (Efe. 4:31) Makapaermen ta say ontan ya ugali et mabetbet ya manreresulta ed bayolentin kagagawa. Nayarin isipen na maslak a totoo ya normal labat so ugalin mapasnok, balet ag-itan mamagalang ed Amalsa. Dakel so indibidual ya nilakseb da ni irayan mauges ya kagagawa antis dan nisulong so balon personalidad.​—Basaen so Salmo 37:8-11.

14. Kasin posible ya magmaliw a mauyamo so misasanok a too?

¹⁴ Nengnengen tayoy alimbawa nen Hans a sakey ya elder ed kongregasyon diad Austria. “Sikatoy sakey ed saray sankauyamoan a brother ya akabat ko,” so imbaga na coordinator na ulop na mamatatken ed kongregasyon nen Hans. Balet aliwan datin mauyamo si Hans. Nen sikatoy tinedyer ni, nagmaliw ya mainum na alak, a lapud satan et nagmaliw ya misasanok. Aminsan, nen sinmanok lapud akainum, apatey toy girlfriend to, kanian asentensiaan na 20 taon ed prisoan. Diad gapo, agnauman so ugali nen Hans ya misasanok anggano akapriso la. Ag-abayag, kinerew na nanay to ed sakey ya elder ya bisitaen so anak to diad prisoan, tan ginmapon nanaral na Biblia si Hans. Oniay imbaga to: “Nairapan ak ya lakseben so daan a personalidad ko. Saray teksto ed Biblia ya amaseseg ed siak et say Isaias 55:7, ya kuan to: ‘Ibeneg komon na marelmeng a too so kagagawa to,’ tan say 1 Corinto 6:11, ya oniay ibabaga to nipaakar ed saramay tinaynan da iray mauges a kagagawa ra: ‘Ingen ta ontan so arum ed sikayo nensaman.’ Diad dakel a taon et maan-anos si Jehova a tinmulong ed siak panamegley na masanton espiritu to pian nisulong koy balon personalidad.” Kayari na 17 tan kapalduan taon ed prisoan, nibulos si Hans bilang bautismadon Kristiano. Imbaga to: “Misalsalamat ak ed si Jehova lapud balbaleg a panangasi tan panamerdona to.”

15. Anto so kagagawa na dakel a totoo, balet antoy ibabaga na Biblia nipaakar ed satan?

¹⁵ Likud ed makapasakit a salita, say panagtila et kaiba met ed daan a personalidad. Singa bilang, dakel a totoo so mantitila nipaakar ed panagbayar na buis odino mantitila ra ta agda labay so natetel ed kasalanan da.  Balet si Jehova et “Dios na katuaan.” (Sal. 31:5) Kanian igaganggan to ya “kada sakey” ya mandadayew ed sikato et “mansalita na katuaan ed kapara ton too” tan ‘agmantitila.’ (Efe. 4:25; Col. 3:9) Kanian nepeg tayon ibaga so tua anggano nayarin makapabaing odino mairap itan.​—Pro. 6:16-19.

16. Panon ya nasarag na sakey ya lakseben so daan a personalidad to?

¹⁶ Agnasarag na sakey ya lakseben so daan a personalidad to diad sarili ton biskeg. Saramay abitla ed sayan artikulo​—si Sakura, Ribeiro, Stephen, tan Hans—​et kaukolan day impasyan milaban pian naekal day mauges a kagagawa ra. Analo ira lapud inabuloyan day pakayari na Salita na Dios tan say masanton espiritu to ya mangimpluensya ed nonot tan puso ra. (Luc. 11:13; Heb. 4:12) Pian nagunggonaan tayo ed satan ya pakayari, nepeg tayon basaen ya inagew-agew so Biblia, dalepdepen itan, tan naynay a manpikasi parad karunongan tan biskeg ya niyaplika so bilin na Biblia. (Jos. 1:8; Sal. 119:97; 1 Tes. 5:17) Nagunggonaan tayo met ed Salita na Dios tan ed masanton espiritu to no manparaan tan onatendi tayo ed saray aral. (Heb. 10:24, 25) Sakey ni, labay tayon usaren so nanduruman espiritual a probisyon ya itatarya parad saray totoo na Dios diad interon mundo.​—Luc. 12:42.

17. Antoy aralen tayo ed ontumbok ya artikulo?

¹⁷ Apantongtongan tayo so pigara ed saray mauges a kagagawa ya nepeg a lakseben tan agla ipawil na saray Kristiano. Balet atan labat kasi so kaukolan pian naawat tayo so pabor na Dios? Andi. Nepeg tayo met ya isulong so balon personalidad. Diad ontumbok ya artikulo, aralen tayo so pigaran aspekto na balon personalidad ya kaukolan tayon isulong pian magmaliw a permanentin kabiangan na bilay tayo.