1, 2. ¿Imatataj wakin runas ninku Jehovaj testigosninmanta?

ASHKHA runas ninku Jehovaj testigosnin kʼacha runas kasqankuta. Librosta qhelqaj uj runa Anton Gill sutiyoj nerqa: “Hitler Alemaniamanta presidente kashajtin, soldadosnenqa Jehovaj testigosninta mayta chejnikoj kanku. Chayraykutaj 1939 watapi, Jehovaj testigosninta sojta waranqatapuni carcelman wisqʼaykucherqanku, sinchʼitataj trabajacherqanku. Jehovaj testigosnin ñakʼarichisqa kajtinkupis atienekunapaj jinallapuni karqanku. Chantapis ujchasqallapuni, sonqo tiyasqallapuni, Diosta kasukuspallapuni ima karqanku”, nispa.

² Ajinallatataj Sudafricamanta wakin runas Jehovaj testigosninmanta nerqanku. Ñaupaj wataspi, Sudafricamanta autoridadesqa mana saqejchu kanku, Jehovaj testigosnin waj suyusmanta yuraj runaswan tantakunankuta. Jinapis 18 de diciembre de 2011 watapi, domingo pʼunchaypi, ashkha suyusmanta Jehovaj testigosnenqa, Johannesburgo llajtapi uj estadionpi tantakorqanku, tukuyninkutaj 78.000 testigosmanta astawan karqanku. Chay jatun tantakuymantaj tukuy laya runas rerqanku. Chantá chay estadionmanta ujnin encargado jinata nerqa: “Ni jaykʼaj rikorqanichu ajina kʼacha runasta. Tukuypis sumaj vestisqas kasharqanku. May llimphutataj kay estadionta saqerqanku. Chantá tukuypis allinta apanakorqanku, mana kikin suyumanta kajtinkupis. Chaytaj mayta tʼukuchiwarqa”, nispa.

3. ¿Imaraykutaj mundontinpi ujchasqa kanchej?

 ³ Kay mundomanta runasqa, sutʼita reparanku Jehovaj testigosnin mundontinpi hermanos jina, may ujchasqa kasqanchejta (1 Ped. 5:9). Chaytaj ajina, imaraykuchus Jehová Diosqa atiyninwan, Palabranwantaj yanapawarqanchej ‘ñaupa kausayninchejta saqepunapaj’, Diospa qosqan ‘mosoj kausaywantaj pʼachallikunapaj’ (Col. 3:9, 10).

4. 1) ¿Imastataj qhepan parrafospi yachakusunchej? 2) ¿Imaraykutaj may allinpuni kanqa chaykunamanta yachakunanchej?

⁴ Ñaupa kausayninchejtaqa saqepunanchej tiyan. Qhepan parrafospi yachakusunchej imaynatachus chayta ruwanata, chantá imaraykupunichus chayta ruwananchej kasqanta. Yachakullasuntaj runas may sajra kajtinkupis cambiayta atisqankuta. Chantapis yachakullasuntaj unaytaña Diospa llajtanpi kajkuna, ñaupa kausayninkuman mana kutinankupaj imatachus ruwananku kasqanta. Chaykunamanta yachakunanchejqa may allinpuni kanqa. Imaraykuchus wakin cristianosqa, mana allinta qhawarikusqankurayku, ñaupa kausayninkupi jina yuyayta, ruwaytapis qallarerqanku. Chayrayku tukuypis apóstol Pabloj nisqanta yuyarikunanchejpuni tiyan. Pay nerqa: “Pichus sinchʼita sayashasqanta yuyakojqa, allinta qhawakuchun ama urmananpaj”, nispa (1 Cor. 10:12).

5. 1) ¿Imatataj ropanchej chʼichi kajtin ruwanchej? (15 paginapi dibujota qhawariy). 2) ¿Imatá ruwananchej tiyan Jehová chʼichipaj qhawasqan imaswan? 3) ¿Ima millay ruwaykunamantataj Colosenses 3:5-9 versículos parlan?

⁵ Ropanchej may chʼichi kajtin, asnajtintaj, ¿imatá ruwanchej? Chay ratopachacharí lluchʼukunchej. Ajinallatataj Jehová chʼichipaj qhawasqan imastapis, chay ratopacha saqepunanchej tiyan. Apóstol Pabloqa khuchichakuy juchamanta, millay imasta ruwaymantawan parlaspa ajinata nerqa: “[Chaykunata] qankunamanta wijchʼuychej”, nispa. Kunantaj chaykunamanta parlarina (Colosenses 3:5-9 leey).

6, 7. 1) Apóstol Pablo nisqanman jina, ¿imatataj ruwananchej tiyan ñaupa kausayninchejta saqepunapaj? 2) ¿Sakuraj kausaynin allinchu karqa, chantá imataj ñaupa kausayninta saqenanpaj yanaparqa?

⁶ Khuchichakuy jucha. Bibliapeqa khuchichakuy jucha palabraqa, oqharikun tukuy laya khuchichakuymanta parlanapaj, nisunman solteropura qhariwarmi jina puñuykuymanta, qhenchachakuymanta, qharipura chayri warmipura khuchichakuymantawan. Apóstol Pablo chay sajra imasta noqanchejmanta ‘chinkachinata’ nerqa. Chaypajtaj aychaj sajra munayninta noqanchejmanta usqhayllata chinkachinanchej tiyan. Chaytataj tukuypis ruwayta atinchej, wakin kuti mana atikullajtinpis.

⁷ Uj sipasmanta parlarina, payqa Sakura, Japonpitaj tiyakun. * Payqa sipasyashajtin mana piniyoj jina sientekoj, llakikojtaj. Chay llakiyninta atipananpajtaj, 15 watasniyoj kashaspa qhariswan puñuykuyta qallarerqa. Chayraykutaj kinsa kutitapuni wawata orqhochikorqa. Sakura nin: “Qhariswan purishajtiy munasqa sientekoj kani, nitaj imatapis manchachikojchu kani. Jinapis tiemponmanqa allintachus manachus ruwashasqaymanta mancharisqa kasharqani”, nispa. Sakuraqa 23 watasninkama ajinata kausakorqa. Chaymantataj Jehovaj testigosninwan Bibliata estudiayta qallarerqa. Yachakusqanwantaj mayta miskʼirichikoj. Jehovaj yanapayninwan ñaupa kausayninta saqeporqa. Sonqontaj niña imamantapis juchachanchu. Kunantaj precursora regular jina sirvishan, manañataj sapayakunchu. Pay nin: “Sapa día Jehová mayta munakuwasqanta reparani, may kusisqataj kani”, nispa.

8. ¿Imastataj Jehová Diosninchej chʼichipaj qhawan?

⁸ Millay imas. Griego parlaypi kay palabraqa khuchichakuymanta, tukuy laya millay imasmantawan parlanapaj oqharikun. ¿Imastaj chay millay imas kanman? Chaykuna kankuman, cigarrota pitay, millay imasta parlay ima (2 Cor. 7:1; Efe. 5:3, 4). Chantapis kallanmantaj pakayllapi qʼala runasmanta fotosta chayri videosta qhaway, khuchichakuy cuentosta leey ima. Chay millay ruwaykunaqa, sajwakunapaj chayri masturbakunapaj tanqawasunman (Col. 3:5). *

9. Qʼala runasmanta fotosta chayri videosta qhaway, ¿imamantaj chayachiwasunman?

⁹ Qʼala runasmanta fotosta chayri videosta qhawaj runaqa, ‘qʼoñirisqa kaspa’ pillawanpis puñuykunanmanta wañurisqa kanman. Wakin doctores nisqankuman jina, imaynatachus drogakojkuna chayri alcoholman qokojkuna mana vicionkuta saqeyta atillankuchu, ajinallatataj qʼala runasmanta fotosta chayri videosta qhawajkunaqa mana vicionkuta saqeyta atillankuchu. Chay viciopi urmajkunaqa, pisipaj qhawakunku, mana allinta llankʼayta atillankuchu, familiankupipis mana kusisqachu kanku, wakintaj divorciakunku, wakintajrí wañuchikunku. Uj runaqa, chay viciota uj watata saqeytawan nerqa: “Kunanmá manaña pisipajchu qhawakuni”, nispa.

10. ¿Imatataj Ribeiro ruwarqa manaña qʼala warmismanta videosta qhawananpaj?

¹⁰ Ashkha runas kallpachakushallankupuni, manaña qʼala runasmanta fotosta chayri videosta qhawanankupaj. Wakenqa chay viciota saqepuyta aterqanku, paykunamanta ujnintaj Ribeiro. Payqa Brasilmanta, jovenllaraj kashaspataj wasinmanta riporqa. Chantá uj fabricapi trabajayta qallarerqa. Chay fabricapitaj maukʼa revistasta kʼutoj kanku, waj imasta ruwanankupaj. Uj kutitaj qʼala runasmanta revistasta tarisqa. Paytaj nin: “Pisimanta pisi qʼala warmismanta fotosta qhawayman yachaykukorqani. Chayrayku tantalla tiyakusharqayku chay warmi, wasimanta llojsinanta mayta suyaj kani, ajinamanta sapallaypi qʼala warmismanta videosta qhawanaypaj”, nispa. Uj kuti Ribeiroqa trabajonpi Imaynatá familiaykipi kusisqa kawsakuwaq nisqa librota tarisqa. Chay librotaqa waj librostawan kʼutunanku karqa. Ribeirotaj chay librota apakaporqa, leeytataj qallarerqa. Chay libropi yachachikusqan mayta gustasqanrayku, Jehovaj testigosninwan Bibliata estudiayta qallarerqa. Jinapis tiemponmanraj qʼala runasmanta videosta qhawayta saqeporqa. Pay nin: “ Chay millay viciota saqepunaypajqa, sapa kuti Diosmanta mañakoj kani, Bibliata estudiaj kani, yachakusqaypitaj tʼukurej kani. Tukuy chayqa Jehovata astawan munakunaypaj yanapawarqa. Payta munakusqayraykutaj chay millay viciota saqeporqani”, nispa. Ribeiroqa Bibliaj yanapayninwan, Diospa yanapayninwantaj ñaupa kausayninta saqeporqa. Kunantaj bautizasqaña, anciano jinataj sirvishan.

11. ¿Imastataj ruwasunman qʼala runasmanta fotosta chayri videosta qhawaypi mana urmanapaj?

¹¹ Ribeiroqa chay millay vicionta saqepunanpaj mana Bibliallatachu estudiarqa. Astawanqa imatachus yachakusqanpi tʼukurerqa, chay yachakusqantataj sonqonpi waqaycharqa. Chantapis Jehovaj yanapayninta mañakorqa. Ajinamantataj Jehová Diosta astawan munakorqa. Chay millay viciotataj saqeporqa. Tukuyninchej chay millay viciopi mana urmananchejpajqa, Jehová Diosta sonqomantapacha munakunanchej tiyan, sajra kajtataj chejninanchej tiyan (Salmo 97:10 leey).

12. ¿Imataj Stephenta yanaparqa ñaupa kausayninta saqepunanpaj?

¹² Wakin runasqa imallamantapis chay rato phiñarpakunku, sonqota nanachinapaj jinataj imatapis nirpallanku. Chaytaj familiasninkuta mayta llakichin. Stephen sutiyoj runamanta parlarina. Payqa Australiamanta, familiayojtaj. Pay nin: “Imitallamantapis phiñarpakoj kani. Millaytataj qhaparqachaj kani. Chayraykutaj kinsa kutipi señoraywan separakorqayku, divorciakuytataj munarqayku”, nispa. Ajinata kausakushajtin, Jehovaj testigosninwan Bibliata estudiayta qallarerqa. Bibliaj nisqanman jinataj kausakuyta qallarerqa. Stephen nin: “Ñaupajtaqa ni ima nirina kaj kani, imata niwajtinkupis yawarniy tʼimpuriwajpacha. Kunantaj familiay ukhupi kusisqa kausakuni, sonqo tiyasqataj kani”, nispa. Stephenqa siervo ministerial jina sirvishan. Señorantaj watastaña precursora regular jina sirvishan. Congregacionninmanta ancianosqa Stephenmanta ajinata ninku: “Payqa may kʼacha, llampʼu sonqo, trabajadortaj. Stephentaqa ni jaykʼaj rikorqaykuchu sinchʼita phiñakojta”, nispa. Stephentaj nin: “Jehovaj yanapaynillanwan ñaupa kausayniyta saqeporqani, may kusisqataj kashani, Jehová Diosta sirvispa”, nispa.

13. 1) ¿Imasta wijchʼupunanchejtataj Biblia niwanchej? 2) ¿Imaraykutaj mana allinchu rabiakunanchej, phiñakunanchej ima?

¹³ Bibliaqa niwanchej rabiakuyta, qhaparqachayta, kʼajaj phiñakuytawan wijchʼupunanchejta (Efe. 4:31). Imaraykuchus rabiakuspa qhaparqachaspataj, chʼajwasllata, maqanakusllatataj tarisunman. Wakinkunaqa mana juchapajchu chaykunata qhawanku. Jehová Diostajrí chaykunata millachikun. Chayrayku ashkha runasqa, Jehovata sirvinankupaj chay jina kausayta saqeporqanku. Diospa qosqan mosoj kausaywantaj pʼachallikorqanku (Salmo 37:8-11 leey).

14. ¿Imaynamantá Hans kʼacha runaman tukorqa?

¹⁴ Hans hermanomanta parlarina. Payqa Austria suyupi anciano jina sirvishan. Congregacionninmanta ujnin ancianotaj paymanta nin: “Hansqa may kʼachapuni, llampʼu sonqotaj”, nispa. Jinapis Hansqa ñaupa kausayninpi mana jinachu karqa. Payqa jovenllaraj kashaspa anchata machaj, pitapis maqayllata munaj. Uj kuti manchay machasqa kashaspa, phiñakuyninpi piwanchus rejsinakusharqa chay sipasta wañurpacherqa. Chayta ruwasqanmanta, 20 wataspaj carcelman wisqʼaykorqanku. Carcelpitajrí jinallapuni karqa. Tiemponmantaj mamanqa uj ancianota nisqa Hansta carcelpi waturikoj rinanta. Hanstaj Bibliata estudiayta qallarerqa. Paytaj nin: “Ñaupa kausayniyta mana saqeyta atillarqanichu. Bibliamanta iskay versiculostaj mayta yanapawarqa. Ujnin karqa Isaías 55:7, chaypi nin: ‘Juchasapaqa sajra kausayninta saqechun’, nispa. Ujnintaj karqa 1 Corintios 6:11. Chaypi apóstol Pabloqa, sajra runaspa kausayninkumanta parlaytawan cristianosman nerqa: ‘Qankunamanta wakenqa ajina karqankichej’, nispa. Jehová Diosqa, pacienciawan unayta yanapawarqa, Palabranman jina kausakunaypaj”, nispa. Hansqa carcelpi kashaspa bautizakorqa. Payqa carcelpi 17 watas khuskanniyojtapuni kasharqa. Pay nin: “Jehovaman mayta agradecekuni khuyakuwasqanmanta, perdonawasqanmantapis”, nispa.

15. 1) ¿Imatataj kay mundopi ashkha runas ruwanku? 2) ¿Imatataj Biblia llullakuymanta nin?

¹⁵ Wakinkunaqa niraj cristianoman tukushaspa llullakoj kanku. Kay mundopi ashkha runas llullakuyman yachasqa kanku. Wakenqa llullakunku impuestota mana paganankupaj, wakintaj pantasqankumanta mana kʼamichikunankupaj. Jehová Diostajrí cristianosta kamachiwanchej ‘sapa ujninchej runa masinchejwan cheqa kajta parlananchejta’  (Efe. 4:25; Col. 3:9). Jehovaqa “mana jaykʼaj llullakoj” Dios (Tito 1:2). Chayrayku noqanchejqa mana llullakunanchejchu tiyan. Astawanqa cheqa kajtapuni parlananchej tiyan, pʼenqaypi rikukunanchej kajtinpis (Pro. 6:16-19).

16. ¿Imastaj yanapawasunchej ñaupa kausayninchejta saqepunapaj?

¹⁶ Sapallanchejmanta ñaupa kausayninchejta mana saqepuyta atillasunmanchu. Sakura, Ribeiro, Stephen, Hans imaqa, mayta kallpachakorqanku ñaupa kausayninkuta saqepunankupaj. Jinapis Diospa Palabranta leespalla, Diospa atiyninwan yanapachikuspallataj cambiayta aterqanku (Luc. 11:13; Heb. 4:12). Noqanchejpis ñaupa kausayninchejta saqepunapaj, Bibliawan yanapachikuna. Chaypajtaj Bibliata sapa día leena, leesqanchejpitaj tʼukurina, Jehovamantataj yachayta mañakuna, Palabranman jina kausananchejpaj (Jos. 1:8; Sal. 119:97; 1 Tes. 5:17). Tantakuykunaman rinapaj wakichikuspa, mana faltakuspataj rillasunpuni chayqa, noqanchejtapis Diospa atiynin jinallataj Bibliapis kallpachawasunchej (Heb. 10:24, 25). Chantapis Jehová Dios yanapanawanchejpaj, revistasta, JW Broadcasting nisqata, JW Library nisqa programata chantá Internetpi jw.org nisqapi publicacionesta, videosta ima qowanchej (Luc. 12:42).

17. ¿Imamantá qhepan yachaqanapi yachakusunchej?

¹⁷ Kay yachaqanapi yachakorqanchej ima sajra ruwaykunatachus noqanchejmanta chinkachina kasqanta. Jinapis Jehová Dios allinpaj qhawanawanchejpaj, Paypa qosqan mosoj kausaywan pʼachawan jina pʼachallikunanchej tiyan. Qhepan yachaqanapitaj chaymanta astawan yachakusunchej.