1, 2. Ema barak bele haree saida kona-ba Testemuña ba Jeová?

EMA barak bele haree katak hahalok sira neʼebé Testemuña ba Jeová hatudu mak la hanesan duni ho ema seluk. Porezemplu, hakerek-naʼin ida naran Anton Gill gaba tebes Testemuña sira-nia hahalok iha rai-Alemaña iha tempu Nazi. Nia dehan: “Governu Nazi odi tebes Testemuña ba Jeová. . . . Toʼo tiha 1939, Testemuña naʼin–6.000 mak tama ona ba komarka.” Nia hatete katak, maski Testemuña sira hetan terus makaʼas, maibé sira hatudu nafatin hahalok laran-moos, kalma, laran-metin ba Maromak, no unidade.

² Foin daudauk iha Áfrika Súl, ema bele haree katak Testemuña ba Jeová la hanesan duni ho ema seluk. Iha tempu uluk, ema neʼebé kór la hanesan la bele halibur hamutuk iha nasaun neʼe. Maibé iha loron-domingu 18 Dezembru 2011, Testemuña naʼin–78.000 liu halibur iha estádiu boot ida iha sidade Joanezburgu atu halaʼo programa espesiál. Sira mai husi Áfrika Súl nia suku oioin no nasaun viziñu sira. Manager ida husi estádiu neʼe dehan: “Neʼe mak dala primeiru haʼu haree ema lubun neʼebé hatudu hahalok diʼak iha estádiu neʼe. Imi hotu hatais kabeer. No imi hamoos estádiu neʼe ho didiʼak. Maibé úniku liu mak imi mai husi rasa oioin.”

3. Saida mak halo ita-nia organizasaun la hanesan ho organizasaun seluk?

 ³ Sin, ema neʼebé laʼós Testemuña mós bele haree katak ita-nia organizasaun la hanesan ho organizasaun seluk. (1 Pedro 5:9) Tanbasá mak ita la hanesan ho ema seluk? Tanba ita “hasai tiha ema tuan nian” no “tau fali ema foun”. Neʼe katak ita hakaʼas an atu halo mudansa ba ita-nia hahalok neʼebé Jeová la gosta liuhusi Bíblia no espíritu santu nia ajuda.—Koloso 3:9, 10.

4. Ita sei koʼalia kona-ba saida iha lisaun neʼe, no tanbasá?

⁴ Bainhira ita hasai ona hahalok husi ema tuan nian, ita la bele tau fali hahalok sira-neʼe. Iha lisaun neʼe ita sei koʼalia kona-ba oinsá mak ita bele hasai hahalok tuan nian no tanbasá mak importante atu halo nuneʼe. Ita sei haree katak ema bele halo duni mudansa iha ninia moris maski nia halo beibeik buat neʼebé sala. Ita mós sei koʼalia kona-ba ema neʼebé kleur ona iha lia-loos bele halo saida atu la tau fali hahalok uluk nian. Tanbasá mak ita presiza koʼalia kona-ba neʼe? Tanba iha ema balu neʼebé serbí Jeová ba tempu kleur, maibé ikusmai la fó atensaun ona ba sira-nia hahalok. Sira komesa iha fali hanoin ka hatudu hahalok neʼebé uluk sira iha antes serbí Jeová. Tan neʼe, diʼak ba ita ida-idak atu hanoin kona-ba avizu neʼe: “Ema neʼebé hanoin katak nia hamriik, kuidadu bá atu nia la monu.”—1 Korinto 10:12.

5. (a ) Fó toʼok ezemplu tanbasá ita tenke hasai kedas hahalok tuan. (Haree foto iha pájina 17.) (b) Koloso 3:5-9 temi hahalok tuan saida deʼit?

⁵ Ita sei halo saida se Ita haree katak Ita-nia roupa foʼer no dois tebes? Ita sei hasai kedas loos ka lae? Hanesan neʼe mós se ita hatene katak ita halo daudauk buat neʼebé Jeová odi, ita tenke halo kedas mudansa. Kona-ba hahalok neʼebé sala, Paulo dehan: “Imi tenke soe tiha buat sira-neʼe hotu.” Mai ita koʼalia kona-ba hahalok rua neʼebé sala: sala-foʼer no hahalok la moos.—Lee Koloso 3:5-9.

6, 7. (a) Oinsá mak Paulo nia liafuan hatudu katak presiza hakaʼas atu hasai hahalok neʼebé tuan? (b) Sakura nia moris uluk nian hanesan saida, no saida mak ajuda nia hodi halo mudansa?

⁶ Sala-foʼer. Tuir lia orijinál husi Bíblia, liafuan “sala-foʼer” mós inklui relasaun seksuál entre ema neʼebé seidauk kaben no omoseksuál. Kona-ba neʼe, Paulo hatete katak ema kristaun tenkesér “hamate” tiha sira-nia “hakarak isin nian” hanesan sala-foʼer. Neʼe dehan katak ita presiza hakaʼas an atu soe tiha hakarak neʼebé sala. Maski la fasil atu halo nuneʼe, maibé ita bele hetan susesu!

⁷ Ezemplu ida mak kona-ba irmán ida husi rai-Japaun naran Sakura. * Nuʼudar nia sai boot, dala barak nia sente mesamesak no triste. Hahú husi tinan 15, nia komesa halo relasaun seksuál atu halakon ninia sentimentu mesamesak. Nia halo relasaun seksuál ho ema oioin no halo abortu ba dala tolu. Nia dehan: “Foufoun, moris ho sala-foʼer halo haʼu sente seguru tanba haʼu sente iha folin no ema hadomi haʼu. Maibé halaʼo tiha relasaun seksuál ba dala barak, haʼu la sente seguru ona iha haʼu-nia moris.” Sakura moris iha dalan hanesan neʼe toʼo nia tinan 23. Depois nia komesa estuda Bíblia ho Testemuña ba Jeová, no nia gosta tebes kona-ba buat neʼebé nia aprende. Jeová ajuda nia troka ninia moris uluk nian neʼebé la morál no ajuda nia atu ninia laran la fó sala ba nia no mós halakon ninia sentimentu moe. Ohin loron Sakura serbí nuʼudar pioneiru regulár, no nia la sente mesamesak tan. Nia dehan: “Haʼu kontente tebes bele sente Jeová nia domin loron ba loron.”

8. Hahalok hanesan saida deʼit mak bele halo ita la moos iha Maromak nia oin?

⁸ Hahalok la moos. Tuir Bíblia, “hahalok la moos” laʼós koʼalia kona-ba sala-foʼer deʼit. Neʼe bele refere ba hahalok hanesan fuma ka konta istória foʼer. (2 Korinto 7:1; Éfeso 5:3, 4) Neʼe mós bele refere ba buat foʼer neʼebé ema halo subasubar hanesan, lee livru sira neʼebé hamosu hakarak seksuál ka haree pornografia. Buat sira-neʼe bele book ema atu halo hahalok la moos hanesan masturbasaun. (Koloso 3:5) *

9. Saida mak bele akontese ba ema neʼebé haburas “hakarak seksuál neʼebé foʼer”?

⁹ Ema neʼebé iha toman atu haree beibeik pornografia hamosu “hakarak seksuál neʼebé foʼer” no bele halo ninia an sai atan ba hahalok seksuál. Peskizadór sira hatete katak ema neʼebé toman haree pornografia mak atu hanesan ho ema neʼebé toman uza tua ka droga. Tan neʼe, ita la hakfodak katak, toman atu haree beibeik pornografia bele lori rezultadu neʼebé ladiʼak, hanesan sente la iha folin, la bele halo serbisu ho didiʼak, família la kontente, soe-malu, no bele mós oho an. Iha mane ida hatete katak, husik tiha ninia toman aat atu haree pornografia ba tinan ida mak nia foin sente iha folin fali.

10. Ribeiro halo saida atu halakon ninia toman atu haree pornografia?

¹⁰ Ema barak sente susar tebes atu sai livre husi pornografia. Maibé bele halakon toman neʼe. Haree toʼok ezemplu ida kona-ba Ribeiro husi rai-Brazíl. Iha tempu nia sei joven, nia muda husi uma hodi bá serbisu iha kompañia ida neʼebé harahun livru uzadu atu halo fali surat-tahan. Iha fatin neʼe nia bele hetan livru barak kona-ba pornografia. Ribeiro dehan: “Neineik-neineik haʼu sai kaan atu haree buat sira-neʼe. Haʼu-nia hakarak aat neʼe sai makaʼas tebes toʼo loron-loron haʼu la bele hein atu haʼu-nia namorada sai lalais husi uma hodi haʼu bele haree filme pornografia sira.” Maibé loron ida, Ribeiro haree livru sira neʼebé bou hamutuk atu harahun, nia haree livru ida ho títulu Halaʼo Moris neʼebé Kontente nuʼudar Família. Nia foti livru neʼe hodi lee. Informasaun sira-neʼe book nia hodi estuda Bíblia ho Testemuña ba Jeová. Maibé Ribeiro presiza tempu neʼebé naruk hodi bele halakon ninia toman atu haree pornografia. Saida mak ajuda nia? Nia dehan: “Liuhusi orasaun, estuda Bíblia, no hanoin kleʼan kona-ba buat neʼebé haʼu aprende ajuda haʼu hafolin Maromak nia hahalok toʼo haʼu-nia domin ba Jeová sai makaʼas liu fali haʼu-nia hakarak atu haree pornografia.” Sin, liuhusi Bíblia no Maromak nia espíritu santu nia ajuda, Ribeiro konsege hasai duni ninia hahalok tuan nian. Nia hetan batizmu no ohin loron serbí daudauk nuʼudar katuas kongregasaun.

11. Saida mak bele ajuda ema ida atu sai livre husi pornografia?

¹¹ Ita bele haree katak estuda Bíblia deʼit latoʼo ba Ribeiro atu sai livre husi pornografia. Nia presiza uza tempu atu hanoin kleʼan kona-ba buat neʼebé nia lee husi Bíblia, hodi informasaun neʼebé nia lee bele book ninia laran. Nia mós presiza halo orasaun ba Jeová hodi husu makaʼas Jeová nia ajuda. Halo buat sira-neʼe ajuda Ribeiro haburas ninia domin ba Maromak, no ninia domin ba Jeová sai makaʼas liu ninia hakarak atu haree pornografia. Loos duni, haburas domin neʼebé kleʼan ba Jeová no odi buat neʼebé aat mak dalan neʼebé diʼak liu hotu atu ajuda ita sai livre husi pornografia.—Lee Salmo (Mazmur) 97:10. *

12. Saida mak ajuda Stephen soe ninia hahalok hirus no koʼalia aat?

¹² Ema balu sai hirus lalais no hasai liafuan aat neʼebé hakanek ema seluk. Hahalok hanesan neʼe bele lori susar ba família tomak. Aman ida husi rai-Austrália naran Stephen, uluk nia toman atu tolok, no buat kiʼik deʼit mós bele halo nia sai hirus. Nia dehan: “Haʼu ho haʼu-nia feen haketak malu ona ba dala tolu no halaʼo hela prosesu atu soe-malu.” Maibé sira komesa estuda Bíblia ho Testemuña ba Jeová no Stephen koko atu aplika Bíblia nia matadalan sira iha ninia moris. Nia dehan katak, antes nia hatene kona-ba Jeová, nia mak hanesan bomba ida neʼebé bele rabenta iha tempu naran deʼit se buat ruma halo nia nervozu. Maibé bainhira nia halo tuir Bíblia nia konsellu sira, buat hotu troka. Nia dehan: “Ami-nia moris família nian iha mudansa boot. Liuhusi Jeová nia ajuda, agora haʼu sente hakmatek iha laran no sai kalma.” Ohin loron, Stephen serbí nuʼudar atan ba kongregasaun no ninia feen serbí nuʼudar pioneiru regulár ba tinan barak ona. Kona-ba Stephen, katuas sira iha ninia kongregasaun dehan: “Stephen mak irmaun neʼebé nonook, serbisu ho badinas, no haraik-an.” Sira mós dehan katak toʼo agora sira nunka haree Stephen sai hirus. Stephen fó glória ba sé kona-ba mudansa sira neʼebé nia halo? Nia dehan: “Haʼu sei nunka bele hetan bensaun sira-neʼe se laʼós tanba Jeová mak ajuda haʼu hodi hasai tiha hahalok tuan nian no tau fali hahalok foun.”

13. Tanbasá mak hahalok hirus perigu tebes no Bíblia fó avizu saida ba ita kona-ba neʼe?

¹³ Bíblia fó avizu ba ita atu la bele sai hirus, koʼalia liafuan aat ba ema, no hakilar malu. (Éfeso 4:31) Baibain, hahalok sira-neʼe bele hamosu violénsia. Ohin loron, ema barak iha mundu neʼe hanoin katak hirus no violénsia mak hahalok neʼebé baibain deʼit. Maibé, tuir loloos hahalok sira-neʼe la hatudu respeitu ba ita-nia Kriadór. Tan neʼe mak irmaun-irmán barak halo mudansa hodi tau fali hahalok neʼebé foun.—Lee Salmo (Mazmur) 37:8-11. *

14. Oinsá mak ita hatene katak ema neʼebé iha hahalok violénsia bele sai ema haraik-an?

¹⁴ Irmaun ida naran Hans serbí nuʼudar katuas kongregasaun iha rai-Áustria. Koordenadór ba grupu katuas iha Hans nia kongregasaun hatete: “Nia mak irmaun neʼebé haraik-an tebes.” Maibé uluk Hans laʼós ema hanesan neʼe. Iha tempu neʼebé nia sei joven, nia sempre hemu tua barak toʼo sai ema neʼebé halo violénsia. Loron ida, tanba lanu nia sai hirus tebes toʼo oho tiha ninia namorada. Hans hetan kastigu ba tinan 20, maibé komarka la bele troka ninia hahalok sira. Ikusmai ninia inan husu irmaun katuas ida atu vizita Hans iha komarka no nia komesa estuda Bíblia. Hans dehan: “Difisil atu hasai tiha hahalok husi ema tuan nian. Eskritura sira neʼebé fó laran-manas ba haʼu mak Isaías 55:7 neʼebé dehan: ‘Ema aat sira tenke husik sira-nia dalan’, no 1 Korinto 6:11 koʼalia nuneʼe kona-ba ema neʼebé husik ona hahalok sala nian: ‘Tuir loloos, sira balu mós uluk halo hanesan neʼe.’ Ho pasiénsia Jeová uza ninia espíritu santu ajuda ona haʼu ba tinan barak atu tau fali hahalok neʼebé foun.” Hans hetan batizmu iha komarka no kastigu tiha ba tinan 17 ho balu nia sai husi komarka. Nia dehan: “Haʼu agradese tebes ba Jeová nia laran-sadiʼa no perdua neʼebé boot.”

15. Hahalok tuan seluk tan mak kona-ba saida, no Bíblia hatete saida kona-ba hahalok neʼe?

 ¹⁵ Hahalok tuan seluk tan mak kona-ba bosok. Porezemplu, ema barak bosok atu lalika selu impostu ka atu la simu responsabilidade kona-ba sala neʼebé sira halo. Maibé Jeová mak “Maromak lia-loos nian”. (Salmo [Mazmur] 31:5) Nia hakarak ema hotu neʼebé adora nia tenkesér “koʼalia lia-loos” laʼós bosok. (Éfeso 4:25; Koloso 3:9) Tan neʼe mak ita tenke koʼalia ho loloos maski neʼe lori moe boot ka susar.—Provérbios (Amsal) 6:16-19.

16. Saida deʼit mak bele ajuda ita atu hasai tiha hahalok tuan nian?

¹⁶ Ho ita-nia forsa rasik ita la iha kbiit atu hasai tiha hahalok tuan sira. Porezemplu, Sakura, Ribeiro, Stephen, no Hans presiza luta makaʼas hodi bele troka sira-nia moris uluk nian. Buat neʼebé ajuda sira mak forsa husi Maromak nia Liafuan no espíritu santu. (Lucas 11:13; Ebreu 4:12) Atu hetan forsa neʼe, ita tenke lee Bíblia loron-loron, hanoin kleʼan kona-ba eskritura sira, no halo beibeik orasaun atu husu matenek no kbiit hodi uza matadalan neʼebé ita aprende. (Josué [Yosua] 1:8; Salmo [Mazmur] 119:97; 1 Tesalónika 5:17) Ita mós bele hetan ajuda husi Maromak nia Liafuan no espíritu santu liuhusi prepara no tuir reuniaun sira. (Ebreu 10:24, 25) Ita hakarak duni atu aproveita ajuda hotu neʼebé Jeová nia organizasaun fó mai ita hanesan ita-nia livru sira, JW Broadcasting, JW Library, no jw.org.—Lucas 12:42.

17. Ita sei koʼalia kona-ba saida iha lisaun tuirmai?

¹⁷ Ita koʼalia ona kona-ba hahalok aat balu neʼebé ema kristaun tenkesér hasai tiha no la bele tau fali hodi Jeová simu ita. Maibé iha buat balu tan neʼebé ita presiza halo. Ita presiza tau fali hahalok foun no la bele hasai fali hahalok sira-neʼe. Iha lisaun tuirmai, ita sei koʼalia kona-ba oinsá mak ita bele halo nuneʼe.