1, 2. Ko e hā ‘oku fakatokanga‘i ‘e he kakaí fekau‘aki mo e Kau Fakamo‘oni ‘a Sihová?

‘OKU fakatokanga‘i ‘e he kakai tokolahi ‘oku makehe ‘a e Kau Fakamo‘oni ‘a Sihová. Ko e fakatātaá, ko ha fa‘utohi ko Anton Gill na‘á ne fakavīkiviki‘i ‘a e ngaahi ‘ulungaanga ‘o e Kau Fakamo‘oni ‘i Siamane Nasí. Na‘á ne tohi: “Na‘e fehi‘a lahi ‘aupito ‘a e kau Nasí ‘i he Kau Fakamo‘oni ‘a Sihová. . . . ‘I he 1939 na‘e ‘i ai honau toko 6,000 ‘i he [ngaahi kemi fakamamahí].” Na‘á ne toe pehē neongo na‘e hokosia ‘e he Kau Fakamo‘oní ha faingata‘a‘ia lahi faka‘ulia, na‘e ‘iloa kinautolu ‘i he‘enau falala‘angá, nonga ‘i he tengé, mateaki ki honau ‘Otuá, mo ‘enau fā‘ūtahá.

² Ki muí ni mai, na‘e fakatokanga‘i foki ai ‘e he kakai ‘i ‘Afilika Tongá ha me‘a makehe fekau‘aki mo e Kau Fakamo‘oni ‘a Sihová. ‘I he taimi ‘e taha, na‘e ‘ikai faka‘atā ‘i he fonua ko iá ke fakatahataha fakataha ‘a e Kau Fakamo‘oni hinehina mo ‘uli‘ulí. Kae kehe, ‘i he ‘aho Sāpate 18 ‘o Tīsema, 2011, na‘e fakatahataha ai ‘a e Kau Fakamo‘oni ‘o e ngaahi matakali kehekehe laka hake he toko 78,000 mei ‘Afilika Tonga mo e ngaahi fonua ofi aí ki ha polokalama makehe ‘i he sitētiume lahi taha ‘i Johannesburg. Na‘e pehē ‘e ha taha ‘o e kau pule ‘o e sitētiumé: “Ko e fu‘u kakai ‘ulungaanga lelei taha eni kuo faifai ange peá u sio ai ‘i he sitētiume ko ení. ‘Oku teunga maau ‘a e tokotaha kotoa. Pea kuo mou fakama‘a lelei ‘aupito ‘a e sitētiumé. Ka ko e me‘a ‘oku makehe tahá, ko  hono mo‘oní ko ho‘omou ‘i ha matakali kehekehé.”

3. Ko e hā ‘okú ne ‘ai ‘etau fetokoua‘akí ke makehé?

³ Ko ia na‘a mo e kakai ‘oku ‘ikai ko e Kau Fakamo‘oní ‘oku lava ke nau ‘ilo‘i lelei ‘oku makehe ‘a ‘etau fetokoua‘aki fakavaha‘apule‘angá. (1 Pita 5:9, fakamatala ‘i lalo.) Ko e hā ‘oku tau kehe ‘aupito ai mei ha toe kautahá? Koe‘uhi ‘i he tokoni ‘a e Tohi Tapú mo e laumālie mā‘oni‘oni ‘o e ‘Otuá, ‘oku tau ngāue mālohi ai ke tau liliu ‘i ha me‘a pē ‘oku ‘ikai fakahōifua kia Sihova. ‘Oku tau “hu‘i atu ‘a e anga‘itangata motu‘á,” pea tau ‘ai ‘a e “anga‘itangata fo‘oú.”​—Kol. 3:9, 10.

4. Ko e hā te tau lāulea ki ai ‘i he kupu ko ení? Ko e hā hono ‘uhingá?

⁴ ‘I he hili ‘etau hu‘i atu ‘a e anga‘itangata motu‘á, ‘oku fiema‘u ke tau si‘aki ai pē ia. ‘I he kupu ko ení, te tau ‘uluaki ako ai ki he founga ‘e lava ke tau hu‘i atu ai ‘a e anga‘itangata motu‘á mo e ‘uhinga ‘oku mātu‘aki mahu‘inga ai ení. Te tau sio ai ‘oku malava ke fai ‘e ha taha ha ngaahi liliu lahi ‘i he‘ene mo‘uí tatau ai pē pe ko e hā hono lahi ‘o ‘ene kau ‘i hono fai ‘a e ngaahi me‘a na‘e halá. Te tau toki lāulea leva ki he me‘a ‘oku lava ke fai ‘e he fa‘ahinga kuo nau ‘i he ngaahi ta‘u lahi ‘i he mo‘oní ke si‘aki ai pē ‘a e anga‘itangata motu‘á. Ko e hā ‘oku fiema‘u ai ke tau lāulea ki hení? Koe‘uhí, ko e me‘a fakamamahí, ko e ni‘ihi na‘a nau tauhi ki mu‘a kia Sihová kuo ‘ikai ke kei hokohoko atu ‘enau tokangá. Kuo kamata ke nau fakakaukau pea fai ‘a e me‘a na‘a nau fai ki mu‘a ke nau ‘ilo‘i ‘a Sihová. Ko kitautolu taki taha ‘oku fiema‘u ke tau manatu‘i ‘a e fakatokanga ko ení: “Tuku ki he tokotaha ‘okú ne fakakaukau ‘okú ne tu‘ú ke ne tokanga telia na‘á ne tō.”​—1 Kol. 10:12.

5. (a) ‘Omai ha fakatātā ‘oku fakahaa‘i ai ‘a e ‘uhinga ‘oku fiema‘u fakavavevave ai ke hu‘i atu ‘a e anga‘itangata motu‘á. (Sio ki he ‘uluaki fakatātā ‘i he kupú ni.) (e) Ko e hā ‘a e ngaahi tō‘onga ko e konga ia ‘o e anga‘itangata motu‘a ‘oku lave ki ai ‘i he Kolose 3:5-9?

⁵ Ko e hā te ke faí kapau te ke fakatokanga‘i kuo ‘uli mo namukū ho valá? Te ke vete ia ‘i he vave taha te ke malavá. ‘I ha founga meimei tatau, kapau ‘oku tau fakatokanga‘i ‘oku tau fai ha ngaahi me‘a ‘oku fehi‘a ai ‘a Sihova, ‘oku fiema‘u fakavavevave ke tau liliu. ‘I he lau ki he ngaahi tō‘onga fehālaaki peheé, na‘e pehē ‘e Paula: “Kuo pau ke mou si‘aki ‘a e ngaahi me‘á ni kotoa meiate kimoutolu.” Tau lāulea angé ki he ua ‘o kinautolu: Ko e fehokotaki fakasino ta‘etāú mo e ta‘ema‘á.​—Lau ‘a e Kolose 3:5-9.

6, 7. (a) ‘Oku anga-fēfē hono fakahaa‘i ‘i he lea ‘a Paulá ‘oku fiema‘u ‘a e feinga ke hu‘i atu ai ‘a e anga‘itangata motu‘á? (e) Ko e hā ‘a e founga mo‘ui na‘e ‘i ai ‘a Sakura? Ko e hā ‘a e me‘a na‘á ne ‘oange kiate ia ‘a e loto-to‘a ke ne liliú?

⁶ Fehokotaki fakasino ta‘etaau. ‘I he Tohi Tapú, ‘oku kau ki he “fehokotaki fakasino ta‘etāú” ‘a e vā fakaefehokotaki fakasino ‘i he vaha‘a ‘o ha fa‘ahinga kehe pē mei he husepāniti mo e uaifi kuó na mali fakalaó. Na‘e pehē ‘e Paula ko e kau Kalisitiané kuo pau ke nau “‘ai ke mate” honau “ngaahi kupu” ‘i he fekau‘aki mo e fehokotaki fakasino ta‘etāú. ‘Oku ‘uhinga ení ‘oku fiema‘u ke tau feinga mālohi ‘aupito ke to‘o ‘osi ‘a e ngaahi holi fehālaakí. ‘E lava ke faingata‘a hono fai iá, ka ‘e lava ke tau lavame‘a!

⁷ ‘Oku lava ke tau ‘ilo‘i eni mei he fakatātā fekau‘aki mo ha tuofefine mei Siapani ko Sakura. * (Sio ki he fakamatala ‘i lalo.) ‘I he tupu hake ‘a Sakura, na‘á ne fa‘a ongo‘i ta‘elata mo loto-mamahi. ‘I he feinga ke to‘o ‘osi ‘ene ta‘elatá, na‘e kamata ke ne fehokotaki fakasino ‘i he‘ene ta‘u 15. Na‘e fehokotaki fakasino ‘a Sakura mo e kakai kehekehe pea a‘u ‘o ne fakatōtama tu‘o tolu. Na‘á ne pehē: “‘I he ‘uluaki taimí, na‘á ku ongo‘i malu ‘i he‘eku fai ‘a e ‘ulungaanga ta‘etāú, ‘i he fakakaukau na‘e fiema‘ua mo ‘ofa‘i au. Ka ko e lahi ange ‘eku fai ‘a e fehokotaki fakasinó, ko e lahi ange ia ‘eku ongo‘i ‘ikai malú.” Ko e founga mo‘ui ko ení na‘e hokohoko atu ia ‘o a‘u ki he ta‘u 23 ‘a Sakura. Pea na‘e kamata ke ne ako Tohi Tapu mo e Kau Fakamo‘oni ‘a Sihová, pea na‘á ne sai‘ia ‘i he me‘a na‘á ne akó. Na‘e tokoni‘i ia ‘e Sihova ke si‘aki ‘ene mo‘ui ‘ulungaanga ta‘etāú pea ke ne iku‘i  ‘a e ongo‘i halaia lahi mo e maá. ‘I he ‘ahó ni, ‘oku ngāue ‘a Sakura ko ha tāimu‘a tu‘uma‘u, pea ‘oku ‘ikai te ne toe ongo‘i ta‘elata. ‘Okú ne pehē: “‘Oku ou fiefia mo‘oni ‘i he nofo ‘i he ‘ofa ‘a Sihová ‘i he taimi kotoa pē.”

8. Ko e hā ‘a e ngaahi tō‘onga ‘e ni‘ihi ‘e lava ke ne ‘ai ke vakai mai ai ‘a e ‘Otuá ‘oku tau ta‘ema‘a?

⁸ Ta‘ema‘a. ‘I he Tohi Tapú, ‘oku kau ki he ‘ta‘ema‘á” ha me‘a lahi ange ‘i he fehokotaki fakasino ta‘etāú pē. ‘Oku lava ke ‘uhinga ia ki he ngaahi me‘a hangē ko e ifi tapaká pe hua koví. (2 Kol. 7:1; ‘Ef. 5:3, 4) ‘Oku toe lava ke ‘uhinga ia ki he ngaahi me‘a kovi ‘oku fai fakapulipuli ‘e he kakaí, hangē ko hono lau ‘a e ‘ū tohi ‘oku faka‘ai‘ai ai kinautolu ki he fehokotaki fakasinó pe sio he ‘ata fakalieliá. Ko e ngaahi me‘á ni ‘e iku atu nai ki he tō‘onga ta‘ema‘a ‘o e fakalielia-toko-tahá. (Kol. 3:5) *​—Sio ki he fakamatala ‘i lalo.

9. Ko e hā ‘e lava ke hokó kapau ‘oku fakatupulekina ‘e ha taha ha ‘holi ta‘emapule‘i fakaefehokotaki fakasino’?

⁹ Ko e kakai ‘oku nau sio ma‘u pē ‘i he ‘ata fakalieliá ‘oku nau fakatupulekina ha ‘holi ta‘emapule‘i fakaefehokotaki fakasino’ pea hoko nai ai ‘o ma‘unimā kinautolu ‘e he fehokotaki fakasinó. Kuo ‘ilo‘i ‘e he kau fakatotoló ko e ma‘unimā ‘e he ‘ata fakalieliá ‘oku meimei tatau ia mo e ma‘unimā ‘e he ‘olokaholó pe ko e faito‘o kona tapú. Ko ia ‘oku ‘ikai ha ofo ‘i he ‘i ai ‘a e ngaahi ola fakatupu maumau ‘i he tō‘onga‘aki ‘a e sio ‘i he ‘ata fakalieliá. ‘Oku lava ke kau ‘i he ngaahi me‘á ni ‘a e ongo‘i mā lahi, ‘ikai toe loko lelei ‘i he ngāué, ngaahi fāmili ‘ikai ke fiefia, vete mali, pea na‘a mo e taonakita. ‘I he hili ‘a e ‘atā ‘a e tangata ‘e taha mei hono ma‘unimā ‘e he ‘ata fakalieliá ‘i ha ta‘u ‘e taha, na‘á ne pehē na‘e toki lava ai ke ne toe toka‘i ‘a ia tonu.

10. Na‘e anga-fēfē ‘a e ‘atā ‘a Ribeiro mei hono ma‘unimā ‘e he ‘ata fakalieliá?

¹⁰ Ki he kakai tokolahi, ko ha fāinga mo‘oni ‘a e feinga ke ‘atā ai pē mei he ‘ata fakalieliá. Ka ‘e lava ke ikuna ‘i he fāinga ko ení. Fakakaukau angé ki he fakatātā fekau‘aki mo Ribeiro mei Pelēsila. ‘I he‘ene ta‘u hongofulu tupú, na‘á ne mavahe mei ‘api ‘o ne ‘alu ‘o ngāue ‘i ha fale ngāue na‘e momosi ‘o liliu ai ‘a e pepá. Na‘á ne sio ai ‘i ha ngaahi makasini fakalielia. Na‘e pehē ‘e Ribeiro: “Na‘e māmālie hono ma‘unimā aú. Na‘e a‘u ‘o kovi ‘aupito he na‘e ‘ikai te u kei lava ‘o tatali ke fai mo mavahe mei he falé ‘a e fefine na‘á ku nofo mo iá kae lava ke u sio ‘i he ngaahi vitiō fakalieliá.” ‘I he ‘aho leva ‘e taha ‘i he ngāué, na‘e sio atu ai ‘a Ribeiro ki ha fokotu‘unga tohi na‘e teu ke momosi ‘o liliu peá ne fakatokanga‘i ai ha tohi Ko e Fakapulipuli ‘o e Fāmili Fiefiá. Na‘á ne to‘o hake ia ‘o ne lau. Ko e me‘a na‘á ne akó na‘e iku ai ‘o ne ako Tohi Tapu mo e Kau Fakamo‘oni ‘a Sihová. Ka na‘e kei fiema‘u pē ha taimi lōloa ke ‘atā ai ‘a Ribeiro mei hono ma‘unimā ‘e he ‘ata fakalieliá. Ko e hā na‘e tokoni kiate iá? Na‘á ne fakamatala: “Fakafou ‘i he lotu, ako ‘a e Tohi Tapú, mo e fakalaulauloto ki he me‘a na‘á ku akó, na‘e tupulaki ai ‘eku hounga‘ia ‘i he ngaahi ‘ulungaanga ‘o e ‘Otuá ‘o a‘u ai ki he hoko ‘o mālohi ange ‘a ‘eku ‘ofa kia Sihová ‘i he‘eku holi ki he ‘ata fakalieliá.” ‘I he tokoni ‘a e Tohi Tapú mo e laumālie mā‘oni‘oni ‘o e ‘Otuá, na‘e liliu ai ‘e Ribeiro ‘ene ngaahi foungá, papitaiso, pea ‘okú ne ngāue he taimí ni ko ha mātu‘a ‘i ha fakataha‘anga.

11. Ko e hā te ne tokoni‘i ha taha ke ne ‘atā ai pē mei he ‘ata fakalieliá?

¹¹ Fakatokanga‘i ange ke ‘atā ai pē mei he ‘ata fakalieliá, na‘e pau ke fai ‘e Ribeiro ‘a e me‘a lahi ange ‘i he ako pē ‘a e Tohi Tapú. Na‘e pau ke ne fakakaukau lahi fekau‘aki mo e me‘a na‘á ne lau ‘i he Tohi Tapú pea tuku ke a‘u ia ki hono lotó. Na‘e pau ke ne lotu kia Sihova, ‘o kōlenga kiate ia ki ha tokoni. Na‘e tokoni‘i ‘e he ngaahi me‘á ni ke toe mālohi ange ai ‘a e ‘ofa ‘a Ribeiro ki he ‘Otuá, ko ia na‘e fakavaivai‘i ai ‘ene holi ki he ‘ata fakalieliá. Ke ‘atā ai pē mei he ‘ata fakalieliá, ko kitautolu foki kuo pau ke tau ‘ofa lahi kia Sihova pea fehi‘a ‘i he me‘a ‘oku koví.​—Lau ‘a e Saame 97:10.

12. Ko e hā na‘á ne tokoni‘i ‘a Stephen ke ne hu‘i atu ‘a e ‘itá mo e lea koví?

¹² Ko e kakai ‘e ni‘ihi ‘oku nau ‘ita vave ‘aupito ‘o nau lea‘aki ‘a e ngaahi me‘a ‘oku fakamamahi mo ta‘efaka‘apa‘apa ki he ni‘ihi kehé. ‘I he taimi ‘oku hoko ai ení, ‘oku faingata‘a‘ia ai honau fāmilí kotoa. Ko ha tamai mei ‘Aositelēlia ko Stephen na‘á ne anga‘aki ‘a e fa‘a kapekapé mo ‘ita lahi ‘i he fanga ki‘i me‘a īkí. ‘Okú ne pehē: “Na‘á ku māvae tu‘o tolu mo hoku uaifí pea a‘u ki ha tu‘unga na‘e teu ai ke ma vete.” Na‘e kamata leva ke na ako Tohi Tapu mo e Kau Fakamo‘oní, pea na‘e feinga ‘a Stephen ke ne ngāue‘aki ‘a e me‘a na‘á ne akó. ‘Okú ne pehē, ki mu‘a ke ne ‘ilo‘i ‘a Sihová na‘á ne fa‘a ‘ita lahi ‘i ha me‘a pē na‘e fakatupu ‘ita kiate ia, ‘o ne ongo‘i ai ‘okú ne hangē ha fo‘i pomu ‘oku teu ke pā. Ka ‘i he kamata ke muimui ‘a Stephen ‘i he ngaahi fale‘i ‘a e Tohi Tapú, na‘e lelei ange ai ‘a e tu‘ungá. ‘Okú ne pehē: “‘Oku lelei ange ‘eku mo‘ui fakafāmilí. ‘I he tokoni ‘a Sihová, ‘oku ou ongo‘i nonga mo fiemālie lahi ange ‘i he taimí ni.” ‘I he ‘ahó ni, ‘oku ngāue ‘a Stephen ko ha sevāniti fakafaifekau pea kuo tāimu‘a tu‘uma‘u hono uaifí ‘i ha ngaahi ta‘u. Na‘e pehē ‘e he kau mātu‘a ‘i he fakataha‘anga ‘a Stephen: “Ko e tokoua anga-fakalongolongo mo ngāue mālohi ‘a Stephen, pea ‘okú ne ma‘u ‘a e fakakaukau fakatōkilalo.” Na‘a nau toe pehē kuo te‘eki ai ‘aupito ke nau sio kiate ia ‘okú ne ‘ita. ‘Oku ‘ikai ke ‘ave ‘e Stephen ‘a e lāngilangí kiate ia ‘i he liliu ko eni ‘a hono anga‘itangatá. ‘Okú ne pehē: “Na‘e ‘ikai mei hoko ‘a e ngaahi ‘ulungaanga faka‘ofo‘ofa ko ení ko e konga ‘eku mo‘uí kapau na‘e ‘ikai ke u tali ‘a e tokoni ‘a Sihová ke liliu kakato hoku anga‘itangatá.”

13. Ko e hā ‘oku fakatu‘utāmaki ai ‘a e ‘itá? Ko e hā ‘oku fakatokanga mai kiate kitautolu ‘e he Tohi Tapú?

¹³ ‘Oku fakatokanga mai ‘a e Tohi Tapú ke tau faka‘ehi‘ehi mei he ‘itá, lea kovi ki he ni‘ihi kehé mo e kaikailá. (‘Ef. 4:31) Ko e ngaahi me‘a ko ení ‘oku iku atu ia ki ha ngaahi tō‘onga fakamālohi. ‘I he ‘ahó ni, ‘oku fakakaukau ‘a e kakai tokolahi ko e ‘itá mo e tō‘onga fakamālohí ko e me‘a anga-maheni pē ia. Ka ko e tō‘onga mo‘ui ko ení ‘oku ta‘efakahōifua mo‘oni ki hotau Tokotaha-Fakatupú. Ko e tokolahi hotau fanga tokouá na‘e pau ke liliu ‘enau tō‘ongá pea nau kofu‘aki ‘a e anga‘itangata fo‘oú.​—Lau ‘a e Saame 37:8-11.

14. ‘Oku malava ki ha tokotaha anga-fakamālohi ke ne hoko ‘o anga-vaivai?

¹⁴ Ko ha tokoua ko hono hingoá ko Hans, ‘okú ne ngāue ko ha mātu‘a ‘i ha fakataha‘anga ‘i ‘Aositulia. Na‘e pehē ‘e he sea ‘o e kau mātu‘a ‘i he fakataha‘anga ‘a Hans: “Ko e tokotaha ia ‘i he fanga tokoua anga-vaivai taha te ke faka‘amu ke ke fe‘iloaki mo iá.” Ka na‘e ‘ikai ke anga-vaivai ma‘u pē ‘a Hans. ‘I he‘ene ta‘u hongofulu tupú, na‘e kamata ke ne inu tōtu‘a ‘a e ‘olokaholó pea hoko ‘o anga-fakamālohi. ‘I he taimi ‘e taha lolotonga ‘ene konaá, na‘á ne fu‘u ‘ita lahi ‘o ne tāmate‘i ai hono kaume‘a fefiné. Na‘e ‘ave ai ‘a Hans ki pilīsone ‘i he ta‘u ‘e 20, ka ko e mo‘ui ‘i he pilīsoné na‘e ‘ikai ke liliu ai ‘a hono anga‘itangatá. Na‘e kole leva ‘e he‘ene fa‘eé ha tokotaha mātu‘a ke ‘a‘ahi kia Hans, pea na‘e kamata ke ne ako ‘a e Tohi Tapú. Na‘e pehē ‘e Hans: “Na‘á ku fāinga ke hu‘i atu hoku anga‘itangata motu‘á. Ko e konga Tohi Tapu na‘á ne fakalototo‘a‘i aú ko e ‘Aisea 55:7 ‘a ia ‘oku pehē ai: ‘Tuku ke li‘aki ‘e he tangata fulikivanú ‘a ‘ene foungá,’ mo e 1 Kolinitō 6:11, ‘oku lave ai ‘o fekau‘aki mo e fa‘ahinga na‘a nau si‘aki ‘a e ngaahi ‘alunga angahala‘iá: ‘Pea neongo ia, na‘e pehē ‘a e ni‘ihi ‘o kimoutolu.’ Na‘e tokoni‘i anga-kātaki au ‘e Sihova ‘i he ngaahi ta‘u lahi fakafou ‘i hono laumālie mā‘oni‘oní ke u kofu‘aki ‘a e anga‘itangata fo‘oú.” Na‘e papitaiso ‘a Hans lolotonga ‘ene ‘i pilīsoné, pea na‘á ne ‘atā mai hili ‘ene ‘i he pilīsoné ‘i he ta‘u ‘e 17 mo e konga. Na‘á ne pehē: “‘Oku ou hounga‘ia ‘i he hulu fau ‘a e meesi mo e fakamolemole ‘a Sihová.”

15. Ko e hā ‘a e konga ‘e taha ‘o e anga‘itangata motu‘á? Ko e hā ‘oku lea‘aki ‘e he Tohi Tapú ‘o fekau‘aki mo iá?

¹⁵ Ko e loí ko e konga ia ‘e taha ‘o e anga‘itangata  motu‘á. Ko e fakatātaá, ko e kakai tokolahi ‘oku nau loi koe‘uhí ke nau hao ai mei he totongi tukuhaú pe faka‘ehi‘ehi mei hono fua ha kovi ‘o ha ngaahi fehālaaki na‘a nau fai. Ka ko Sihová “ko e ‘Otua ‘o e mo‘oní.” (Saame 31:5) Ko ia ‘okú ne fiema‘u mai ‘a e kotoa ‘o ‘ene kau lotú ke nau “lea mo‘oni” pea ‘‘oua ‘e loi.’ (‘Ef. 4:25; Kol. 3:9) ‘Oku hā mahino mei ai, kuo pau ke tau tala ‘a e mo‘oní neongo kapau ‘oku fakamā pe faingata‘a.​—Pal. 6:16-19.

16. Ko e hā te ne tokoni‘i kitautolu ke tau hu‘i atu ‘a e anga‘itangata motu‘á?

¹⁶ ‘Oku ‘ikai faingofua ke tau hu‘i atu ‘a e anga‘itangata motu‘á ‘i he mālohi pē ‘o kitautolú. Ko Sakura, Ribeiro, Stephen, mo Hans na‘e pau ke nau faitau mālohi kotoa ke liliu ‘a ‘enau founga mo‘ui motu‘á. Ko e me‘a na‘á ne tokoni‘i kinautolú ko e mālohi ‘o e Folofola ‘a e ‘Otuá mo hono laumālie mā‘oni‘oní. (Luke 11:13; Hep. 4:12) Ke ma‘u ‘a e ‘aonga mei he mālohi ko iá, kuo pau ke tau lau ‘a e Tohi Tapú ‘i he ‘aho kotoa pē, fakalaulauloto ki ai, pea lotu ma‘u pē ki ha poto mo ha mālohi ke tau ngāue‘aki ‘a e me‘a ‘oku tau akó. (Sios. 1:8; Saame 119:97; 1 Tes. 5:17) ‘Oku tau toe ma‘u ‘a e ‘aonga mei he Folofola ‘a e ‘Otuá mo hono laumālie mā‘oni‘oní ‘i he taimi ‘oku tau teuteu ai mo ma‘u ‘a e ngaahi fakataha ‘a e fakataha‘angá. (Hep. 10:24, 25) Pea ‘oku fiema‘u ke tau ngāue‘aki ‘a e ngaahi tokonaki lahi kehe kuo ‘omai kiate kitautolu ‘e he kautaha ‘a Sihová, ‘o hangē ko ‘etau ngaahi makasiní, JW Broadcasting, JW Library, mo e jw.org.​—Luke 12:42.

17. Ko e hā te tau lāulea ki ai ‘i he kupu hono hokó?

¹⁷ Kuo tau lāulea ki he ngaahi tō‘onga kovi kuo pau ke hu‘i atu pea si‘aki ai pē ‘e he kau Kalisitiané koe‘uhi ke fakahōifua‘i ‘a Sihová. Ka ‘oku ‘i ai ‘a e me‘a lahi ange ‘oku fiema‘u ke tau fai. ‘Oku fiema‘u ke tau kofu‘aki ‘a e anga‘itangata fo‘oú pea ‘ai ma‘u pē ia ko e konga ‘etau mo‘uí. ‘I he kupu hono hokó, te tau lāulea ai ki he founga ‘e lava ke tau fai ai ení.