1, 2. ¿Tuku wankgo makgapitsi latamanin xlakata xtatayananin Jehová?

LHUWA latamanin lichuwinankgo pi xtatayananin Jehová lakwan tayat kgalhikgo. Akgtum liʼakxilhtit, chatum tsokgna wanikan Anton Gill lichuwinalh anta makgapitsi kxlibro tuku kaʼakgspulalh xtatayananin Jehová xalak Alemania nazi. Lichuwinalh pi nazis ni xkaʼakxilhputunkgo chu kkata 1939 xʼanan 6,000 xtatayananin Jehová anta kcampos xla concentración. Lichuwinalh pi maski lhuwa tuku nitlan xtitaxtumakgolh, makxtum tawilakgolh chu ni makgxtakgkgolh Dios.

² Nina akglhuwa kata, makgapitsi latamanin xalak Sudáfrica akxilhkgolh tayat la uma xpalakatakan xtatayananin Jehová. Pulana, mapakgsinanin xalak ama país ni xkamaxkikgo talakaskin xtatayananin Jehová tiku tanu xcolorkan lakatuma niku xtamakxtumikgolh. Pero domingo 18 xla diciembre kata 2011, liwaka 78,000 xtatayananin Jehová tiku tanu tanu tasiyakgo xalak Sudáfrica chu makgapitsi kachikinin nema lakatsu wilakgolh, matsamakgolh akgtum estadio xalak Johannesburgo xlakata nakgaxmatkgo akgtum taʼakgchuwin. Chatum tiku kuentajtlawa ama estadio wa: «Nikxni xakakxilhnit lhuwa latamanin tiku tlan  likatsikgo. Xputumkan liwana lhakganankgonit. Chu lu skulunku makgxtakgkgolh estadio. Pero tuku tlakg kaks kimalakawani wa pi ni lalaksakpaxkiyatit».

3. ¿Tuku xlakata ni tatalakxtumiyaw amakgapitsi latamanin?

³ Uma tuku wankgo makgapitsi tiku ni xtatayananin Jehová limasiya pi nitu xtachuna la xlakskujnin Jehová (1 Ped. 5:9, nota). ¿Tuku xlakata ni tatalakxtumiyaw amakgapitsi latamanin? Xlakata, xtamakgtay Biblia chu xʼespíritu santo Dios liskujaw xlakata nalakgmakganaw «xamakgan [k]intayatkan» chu nalilhakgananaw «xasasti [tayat]» (Col. 3:9, 10).

4. ¿Tuku nalichuwinanaw kʼuma artículo chu tuku xlakata?

⁴ La uku lu xlakaskinka makgtuminika nalakgmakganaw xamakgan tayat. Kʼuma artículo naʼakxilhaw la nalakgmakganaw xamakgan tayat chu tuku xlakata lu xlakaskinka chuna natlawayaw. Nachuna naʼakxilhaw pi latamanin tlan natalakgpalikgo maski xtlawakgo tuku nitlan. Chu nalichuwinanaw tuku tlan natlawakgo tiku akglhuwata kata wilakgo kxkachikin Jehová xlakata nialh nakgalhikgo xamakgan tayat. ¿Tuku xlakata talakaskin nalakapastakaw? Lu nitlan pero lhuwa tiku kstalaninanin Cristo xwankgonit, ni kuentajtlawakgolh chu tsukukgolh lakapastakkgo chuna la akxni nina kskujnanikgo Jehová. Wa xlakata, kimputumkan kililakapastakatkan uma tastakyaw: «Chuna mpi wa nti mpuwan akgstitum lama, kuintaj katlawakaj, ni naʼakgtsankgatayay» (1 Cor. 10:12).

5. 1) Kalichuwinanti akgtum liʼakxilhtit tuku xlakata talakaskin pi nalakgmakganaw xamakgan tayat (kaʼakxilhti xapulana dibujo). 2) ¿Tuku makgapitsi xamakgan tayat lichuwinan Colosenses 3:5-9?

⁵ ¿Tuku xtlawaw komo xkajwalanit kilhakgatkan chu max asta nitlan xkankalalh? ¿Ni xlikana pi max tunkun nalakgpaliyaw kilhakgatkan? Nachuna, lu xlakaskinka nakgalhakgaxmataw tastakyaw nema kinkawaniyan pi kalakgmakgaw tuku Jehová xkajni. Pablo kamaxkilh tastakyaw kstalaninanin Cristo xala ama kilhtamaku: «Kalakgmakgantatit putum». Kalichuwinaw pulaktiy talakgalhin nema lichuwinalh: talakgxtumit xalimaxana chu xalixkajni latamat (kalikgalhtawakga Colosenses 3:5-9).

6, 7. 1) Chuna la wan Pablo, ¿tuku kilitlawatkan xlakata nalakgmakganaw xamakgan kintayatkan? 2) ¿La xlin xlatamat Sakura chu tuku makgtayalh xlakata nalakgpali xlatamat?

⁶ Talakgxtumit xalimaxana. Akxni Biblia maklakaskin tachuwin talakgxtumit xalimaxana, kilhchanima putum talakgxtumit nema tlawakgo tiku ni la tatamakgaxtokgkgonit, o tiku kaj chunata latawilakgolh chu tiku lakgati xtachixku o xtapuskat. Pablo kawanilh kstalaninanin Cristo pi xmakaksakgolh xmaknikan xlakata talakgxtumit. Uma wamputun pi tunkun nalakgmakganaw nixatlan tapuwan nema nakinkamatlawiputunan talakgxtumit xalimaxana. Max tuwa namakgkatsiya, pero namatlaniya.

⁷ Kaʼakxilhwi tuku akgspulalh chatum tsumat xalak Japón wanikan Sakura. * Akxni kajku kstakma, kaj xʼakstu xmakgkatsikan. Xlakata nialh chuna namakgkatsi, akxni makgatsilh xʼakgkukitsis kata tsukulh tlawa talakgxtumit xalimaxana. Chu nitlan kitaxtunilh xlakata kgalhtutu makgalh kskgata. Xla lichuwinan: «Xapulana, akxni xaktlawa talakgxtumit xalimaxana tlan xakmakgkatsi chu xakmakgkatsi pi wi tiku xkimpaxki. Pero alh kilhtamaku nialh chuna kmakgkatsilh». Chuntiya Sakura nitlan xlin xlatamat asta akxni makgatsilh puxamatutu kata. Chu alistalh tsukulh katakgalhtawakga xtatayananin Jehová. Lu xlakgati tuku xkatsini.  Xlakata xtamakgtay Jehová, tlan tayanilh xtalipuwan chu xtamaxana chu makgxtakgli xalixkajni xlatamat. La uku precursora regular chu nialh xʼakstu makgkatsikan. Wan: «Lu klipaxuwa xlakata Jehová kimpaxki».

8. ¿Tuku natlawa pi Jehová lixkajni nakinkaʼakxilhan?

⁸ Ni xalixkajni nalinaw kilatamatkan. Tachuwin nema maklakaskin Biblia xlakata «xalixkajni linkan kilatamatkan» lhuwa tuku kilhchanima ni kaj xman wa talakgxtumit xalimaxana. Akgtum liʼakxilhtit, max kilhchanima la xkulikan, o nawana tuku xalixkajni nema makgalitsinan (2 Cor. 7:1; Efes. 5:3). Na kilhchanima tuku tsekg tlawakgo latamanin, la komo likgalhtawakgakan libro nema lichuwinan talakgxtumit o akxilhkan tiku ni lhakganankgonit. Uma max natlawa tuku xalixkajni nema max nalimakgkatsi pi wi tiku tatalakgxtumima (Col. 3:5). *

9. ¿Tuku nitlan nakitaxtu komo naʼakxilhaw tuku nakinkamatlawiputunan talakgxtumit xalimaxana?

⁹ Tiku kgalhikgo talismanin akxilhkgo tiku nitu lhakganankgonit tlawa pi lu natalakgxtumiputun. Uma natlawa pi lu nalismanikgo natlawakgo talakgxtumit xalimaxana. Makgapitsi tiku lakputsanankgo wankgo pi tiku akxilhkgo tiku ni lhakganankgonit xtachuna litaxtu la tiku wakgo droga o wakgo kuchu. Ni kaks kinkamalakawaniyan pi nitlan kitaxtu akxilhkan tiku ni lhakganankgonit. Makgapitsi uma lu limaxana kitaxtu, nialh liwana katiskujti, ni tapaxuwan katitawila kmifamilia, nalamakgxtakga o asta max miʼakstu namakgnikana. Chatum chixku tsokgli uma akxni makgatsilh akgtum kata lata ni akxilhli tiku ni lhakganankgonit: «Lu klipaxuwa xlakata amakgtum kmaxkimapa kakni kilatamat».

10. ¿La makgatlajalh Ribeiro xlakata nialh naʼakxilha tiku ni lhakganankgonit?

¹⁰ Lhuwa latamanin liskujkgo xlakata nialh naʼakxilhkgo tiku ni lhakganankgonit. Pero tlan namakgatlawajayaw, chuna limasiya xliʼakxilhtit chatum chixku xalak Brasil wanikan Ribeiro. Akxni kajku kgawasa xwanit, taxtulh kxchik chu tsukulh skuja niku xmastokgkan kapsnat. Chu anta tlan xʼakxilha revistas nema xlimin tiku ni lhakganankgonit. Xla lichuwinan: «Chuna la xakakxilhtilha tsinu tsinu tiku ni lhakganankgonit alistalh tlakg ktsukulh akxilha asta xaklakaskin pi xtaxtulh puskat tiku xaktawi xlakata tlan xakakxilhli videos nema limin tiku ni lhakganankgonit». Makgtum akxni Ribeiro xwi kxtaskujut, akxilhli maktum libro nema xlitapakuwi Tuku makgtayanan naʼanan tapaxuwan kfamilia. Tiyalh chu tsukulh likgalhtawakga. Tuku katsinilh tlawalh pi xkatakgalhtawakgalh xtatayananin Jehová. Pero xlakata namakgxtakga nixatlan xtayat lhuwa kilhtamaku limaxtulh. ¿Tuku makgtayalh? Xla lichuwinan: «Oración, takgalhtawakga xalak Biblia chu xaklilakpuwan tuku xakkatsinima, tlawalh pi tlakg xakpaxkilh tayat nema kgalhi Jehová. Chuna, tapaxkit nema xakkgalhini Jehová tlakg tliwakga wa nixawa nakakxilha tiku ni lhakganankgonit». Xtamakgtay Biblia chu xʼespíritu santo Dios tlawalh pi Ribeiro xmakgxtakgli xamakgan tayat. Tamunulh chu la uku kgolotsin xalak congregación.

11. ¿Tuku kilitlawatkan xlakata ni natsukuyaw akxilhaw tiku ni lhakganankgonit?

¹¹ Kalakapastakwi pi Ribeiro ni kaj xman wa likgalhtawakgalh Biblia. Nachuna liwana xlilakpuwan tuku xlikgalhtawakga chu xmasta talakaskin pi nachan kxnaku. Nachuna, skinilh xtamakgtay Dios. Wa xlakata lilakpuwankan tuku katsinikan chu oración tlawalh pi tapaxkit nema xkgalhini Jehová tlakg tliwakga xwa chu xmakgtayalh xlakata nialh  naʼakxilha tiku ni lhakganankgonit. Kimputumkan lu kilipaxkitkan Jehová chu naxkajniyaw tuku nitlan xlakata ni naʼakxilhaw tiku ni lhakganankgonit (kalikgalhtawakga Salmo 97:10).

12. ¿Tuku makgtayalh Stephen xlakata nalakgmakgan tasitsi chu nitlan tachuwin?

¹² Lhuwa latamanin lu lakapala sitsikgo chu wankgo tuku nitlan kamamakgkatsini amakgapitsin. Xlikana, uma tayat nitlan kamamakgkatsini familias. Kaʼakxilhwi xliʼakxilhtit chatum tlat xalak Australia wanikan Stephen. Xla lichuwinan: «Lhuwa nitlan tachuwin xakwan chu kaj lakapala tuku xaklisitsi. Makgtutu akit chu kimpuskat klamakgxtakgwi chu asta xakamaw lamakgxtakgaw kxlakatin mapakgsinanin». Pero xtatayananin Jehová tsukukgolh limakgalhtawakgekgo Biblia. ¿Tuku tlan kitaxtulh xlakata Stephen tsukulh lilatama tastakyaw xalak Biblia? Xla wan pi xfamilia tlakg tlan tawi. Xapulana, xtachuna xakwanit la akgtum bomba nema lakapala lakgpankga, pero la uku lu kmakgkatsi pi kkgalhi takaksni chu ni kkgalhi taʼakglhuwit. La uku Stephen litaxtu la siervo ministerial chu xpuskat lhuwata kata liskujma la precursora regular. Lakgkgolotsin xalak kxcongregación wankgo: «Stephen chatum tala tiku xakakswa, taktuju chu lu xaskujni». Nachuna wankgo pi nikxni akxilhkgonit komo nasitsi. Stephen katsi pi ni kaj xakstu xlitliwakga tlawanit uma talakgpalit. Wan: «Tlan klipaxuwa uma tasikulunalin xlakata kmakglhtinanit xtamakgtay Jehová, nema tlawalh pi tlan naklakgpali kintayat».

13. 1) ¿Tuku xlakata lu nitlan kitaxtu akxni sitsikan? 2) ¿Tuku kinkawaniyan Biblia pi kilitlawatkan?

¹³ Biblia kinkawaniyan pi kalakgmakgaw tasitsi, tachuwin nema nitlan kamamakgkatsini amakgapitsin chu takgaw (Efes. 4:31). Min kilhtamaku uma nitlan tayat tlawa pi nakatalatlawayaw amakgapitsin. Lhuwa latamanin lakpuwankgo pi uma kaj nitu wamputun, pero nitlan xlakata akxni chuna tlawayaw ni maxkiyaw kakni Dios. Wa xlakata lhuwa kstalaninanin Cristo makgxtakgkgonit uma tayat chu li lhakganankgonit xasasti tayat (kalikgalhtawakga Salmo 37:8-11).

14. ¿Tlan chatum lataman tiku xasitsin alistalh xakakswa nawan?

¹⁴ Naʼakxilhaw xliʼakxilhtit Hans, tiku kgolotsin xalak Austria. Lakgkgolotsin xalak congregación lichuwinankgo: «Xla chatum tala tiku tlakg xakakswa». Pero Hans ni ankgalhin chuna xwanit. Akxni kajku kgawasaku xwanit lu xwa kuchu chu lu xasitsin xwanit. Makgtum akxni lu xkgachi, makgnilh xtaskin xlakata lu ksitsinit. Wanika pi natamaknukan akgpuxam kata kpulachin. Pero maski xtanuma kpulachin ni lakgpalilh xlatamat. Alistalh, xtse wanilh chatum kgolotsin xalak congregación pi xlakgapaxialhnalh kpulachin chu Hans tsukulh kgalhtawakga. Xla lichuwinan: «Lu tuwa kmakgkatsilh nakmakgxtakga xamakgan tayat. Akgtiy texto nema kimakgtayalh. Pulaktum wa Isaías 55:7 niku wan: “Tiku nitlan likatsi kamakgxtakgli xtiji”. Chu atanu wa 1 Corintios 6:11. Anta wan pi makgapitsi xmakgxtakgkgonit talakgalhin akxni kstalaninanin Cristo litaxtukgolh. Akglhuwa kata, Jehová xatapaxuwan kilimakgtayalh xʼespíritu santo xlakata naklilhakganan xasasti tayat». Hans tamunulh akxni xtanuma kpulachin. Taxtulh kpulachin akxni makgatsilh akgkutujun kata lata anta xtanuma. Wan: «Lu kpaxtikatsini Jehová xlakata xtalakgalhaman chu xlakata kintapatilh».

15. ¿Tuku tlawakgo lhuwa latamanin, pero tuku kinkawaniyan Biblia xlakata uma?

¹⁵ Atanu nema xamakgan tayat wa takgsanin. Akgtum liʼakxilhtit, lhuwa latamanin akgsaninankgo  xlakata ni naxokgonankgo o xlakata ni litayaputunkgo tuku nitlan tlawakgonit. Pero Jehová «wix makgantaxtiya tu malaknuya natlawaya» (Sal. 31:5). Wa xlakata akinin kstalaninanin Cristo kinkawaniyan pi ankgalhin nawanaw tuku xaxlikana, ni nalaʼakgskgawiyaw (Efes. 4:25; Col. 3:9). Wa xlakata nawanaw tuku xaxlikana maski natamamaxaniyaw o nitlan kintikakitaxtunin (Prov. 6:16-19).

16. ¿Tuku nakinkamakgtayayan namakgxtakgaw xamakgan tayat?

¹⁶ Nila katimakgxtakgwi xamakgan tayat komo kaj kiʼakstukan nakinkalipawankanan. Sakura, Ribeiro, Stephen chu Hans lhuwa liskujkgolh xlakata nalakgpalikgo xlatamatkan. ¿La makgxtakgkgolh nixatlan tayat? Wa xlakata litliwakga nema kamaxkilh Biblia chu xʼespíritu santo Dios (Luc. 11:13; Heb. 4:12). Akinin na nalitamakgtayayaw uma litliwakga komo nalikgalhtawakgayaw Biblia chali chali, nalilakpuwanaw chu naskiniyaw Jehová putum kilhtamaku pi kakinkamaxkin litliwakga chu liskgalala xlakata nakgalhakgaxmataw xTachuwin (Jos. 1:8; Sal. 119:97; 1 Tes. 5:17). Biblia chu espíritu santo na nakinkamaxkiyan litliwakga komo nalakkaxwiliyaw tuku naʼakxilhkan ktamakxtumit chu komo naʼanaw (Heb. 10:24, 25). Nachuna namaklakaskinaw tuku kinkamaxkiyan xkachikin Jehová, la komo revistas, JW Broadcasting, aplicación JW Library chu sitio jw.org (Luc. 12:42).

17. ¿Tuku naʼakxilhaw kʼatanu artículo?

¹⁷ Akxilhnitaw makgapitsi nixatlan tayat nema kstalaninanin Cristo xlilakgmakganatkan. Pero ¿kaj xman wa uma talakaskin xlakata tlan nakinkaliʼakxilhan Dios? Ni, na talakaskin nalilhakgananaw xasasti tayat chu nikxni namakgxtakgaw kkilatamatkan. Kʼatanu artículo naʼakxilhaw la natlawayaw.