1, 2. Ano an naoobserbaran han damu may kalabotan ha mga Saksi ni Jehova?

NAOOBSERBARAN han damu an mag-opay nga kalidad han katawohan ni Jehova. Pananglitan, may kalabotan ha aton kabugtoan ha panahon han Nazi nga Alemanya, an awtor nga hi Anton Gill nagsurat: “Ginkakangalasan gud han mga Nazi an mga Saksi ni Jehova. . . . Han 1939 may 6,000 na [nga Saksi an priso ha mga kampo konsentrasyon].” An awtor nagdugang nga bisan pa han duro nga pagtimaraot ha mga Saksi, iginpakita nira an “pagin masasarigan ngan pagin kalmado” pati na an ira “integridad ngan pagkaurosa.”

² Hinin bag-o la, damu liwat han mga taga-Sur Aprika an nakaobserbar hiton mag-opay nga kalidad han katawohan han Dios. Hadto, an mga Saksi hito nga nasud nga magkaiba an kolor han panit diri nakakahimo nga urosa nga magkatirok. Pero han Domingo han Disyembre 18, 2011, makalilipay makita an sobra 78,000 nga kabugtoan nga iba-iba an lahi tikang ha Sur Aprika ngan ha kahigrani nga nasud nga nagkatitirok ha pinakadaku nga estadyum ha syudad han Johannesburg basi magpahimulos hin espirituwal nga programa. May kalabotan ha mga tinambong hito nga katirok, usa han mga nanginginano han estadyum an nagsiring: “Ini an pinakabuotan nga mga tawo nga akon nakita nga gumamit hini nga estadyum. An ngatanan desente mamado.  Ngan maopay gud an iyo paglimpyo han estadyum. Pero labaw ha ngatanan, nagkakaurosa gud kamo bisan kon iba-iba an iyo lahi.”

3. Kay ano nga naiiba gud an aton pagminagburugto?

³ Ito nga mga komento tikang ha mga diri Saksi nagpapakita nga naiiba gud an aton bug-os-kalibotan nga pagminagburugto. (1 Ped. 5:9) Kay ano nga naiiba gud kita ha iba nga organisasyon? Pinaagi han bulig han Pulong han Dios ngan han iya baraan nga espiritu, nangangalimbasog kita nga ‘hukason an daan nga personalidad.’ Ngan katapos, ‘iginsusul-ot naton an bag-o nga personalidad.’—Col. 3:9, 10.

4. Ano an hihisgotan hini nga artikulo, ngan kay ano?

⁴ Magkaiba an paghukas han daan nga personalidad ngan an pagbaya hito. Hini nga artikulo, hihisgotan naton kon paonan-o naton mahuhukas an daan nga personalidad, kon kay ano nga kinahanglan ito buhaton dayon, ngan kon kay ano nga posible nga magbag-o an usa bisan kon nahiara na gud hiya ha pagbuhat hin maraot. Uusisahon liwat naton kon ano an puydi himoon han usa nga maiha na ha kamatuoran basi mabayaan an daan nga personalidad. Kay ano nga importante ini nga mga pahinumdom? Makasurubo nga may pipira nga nag-alagad hadto kan Jehova an waray magbantay salit hinay-hinay nga bumalik ha ira daan nga pagkinabuhi. Tungod hito, kinahanglan naton hinumdoman pirme ini nga pahamangno: “An naghuhunahuna nga natindog hiya magbantay nga diri hiya matumba.”—1 Cor. 10:12.

5. (a) Iilustrar kon kay ano nga kinahanglan hukason dayon an daan nga personalidad. (Kitaa an retrato ha tinikangan hini nga artikulo.) (b) Sumala ha Colosas 3:5-9, ano nga mga buhat an nahiuupod ha daan nga personalidad?

⁵ Ano an imo bubuhaton kon magkahugaw an imo bado, o magin mabaho pa ngani? Sigurado nga huhukason mo dayon ito. Ha pariho nga paagi, kinahanglan sugton dayon naton an sugo nga hukason an aton nahiaraan nga mga buhat nga ginkakangalasan han Dios. Karuyag naton sundon an matin-aw nga sagdon ni Pablo ha mga Kristiano ha iya panahon: “Kinahanglan isalikway niyo ini ngatanan.” Tagdon naton an duha han magraot nga buhat nga gin-unabi ni Pablo—an imoralidad ngan an kahugaw.—Basaha an Colosas 3:5-9.

6, 7. (a) Paonan-o iginpapatin-aw han mga pulong ni Pablo nga kinahanglan an duro nga pangalimbasog ha paghukas han daan nga personalidad? (b) Ano an pagkinabuhi hadto ni Sakura, ngan ano an nakabulig ha iya nga mabayaan ito?

⁶ Imoralidad. An orihinal nga pulong ha Biblia nga iginhubad nga “imoralidad” nag-uupod han seksuwal nga relasyon han mga indibiduwal nga diri legal nga mag-asawa ngan mga homoseksuwal. Ginsugo ni Pablo an iya mga igkasi-Kristiano nga ‘patayon’ an mga ‘bahin han ira lawas’—karuyag sidngon, wad-on an anoman nga hingyap—“may kalabotan ha imoralidad.” Iginpapatin-aw han mga pulong ni Pablo nga ginkikinahanglan an duro nga pangalimbasog basi wad-on iton sayop nga mga hingyap. Pero mahimo mo ito madaog.

⁷ Tagda an eksperyensya ni Sakura * nga taga-Japan. Samtang nagtutubo hiya, inabat niya nga nag-uusahan hiya ngan waray hiya pulos. Tikang han 15 anyos hiya, nagkaada hiya seksuwal nga relasyon ha iba-iba nga padis basi maibanan an iya kamingaw. “Sugad nga resulta,” naaawod nga nagsumat hiya, “tulo ka beses ako nga nagpapunit.” Hiya nagsaysay: “Ha tinikangan, naabat ako hin seguridad kon nagkakaada ako imoral nga pakigrelasyon ha iba, ginhuhunahuna ko nga kinahanglanon ngan hinigugma ako. Pero samtang nagkakaada ako iba-iba nga seksuwal nga karelasyon, mas inaabat ko nga waray ako pulos.” Nagpadayon hi Sakura hini nga pagkinabuhi tubtob han 23 anyos hiya. Ha urhi, nagtikang hiya pag-aram han Biblia kaupod han mga Saksi. Naruyagan gud ni Sakura an iya mga nahibabaroan, ngan ha bulig ni Jehova nalamposan niya an pag-abat hin duro nga kakonsensya ngan kaawod ngan nabayaan niya an pagbuhat hin imoralidad. Yana, regular payunir na  hi Sakura ngan diri na niya inaabat nga nag-uusahan hiya. Lugod, siring pa niya, “nalilipay gud ako nga inaabat ko an gugma ni Jehova ha kada adlaw.”

8. Ano an pipira nga buhat nga mahimo magresulta nga magin mahugaw kita ha atubangan han Dios?

⁸ Kahugaw. An orihinal nga pulong ha Biblia nga iginhubad nga “kahugaw” may haluag nga kahulogan nga nag-uupod diri la han mga sala nga may kalabotan ha sekso. Mahimo ito magtudlok ha nakakadaot nga buhat sugad han pagsigarilyo o pag-inistorya hin malaw-ay nga mga intremes o tiaw. (2 Cor. 7:1; Efe. 5:3, 4) Nagtutudlok liwat ito ha maghugaw nga buhat nga patago nga ginhihimo han usa nga indibiduwal, sugad han pagbasa hin maglaw-ay nga mga libro o pagkinita hin pornograpiya, nga mahimo magtugway ha mahugaw nga buhat nga masturbasyon.—Col. 3:5. *

9. Ano an mahimo magin resulta kon an usa nagkakaada makusog nga “hingyap ha pakighilawas”?

⁹ Adton pirme nagkikinita hin pornograpiya nagkakaada makusog nga “hingyap ha pakighilawas,” nga mahimo magresulta ha pagin adik ha sekso. Sumala ha mga pagsaliksik, adton mga nasiring nga diri nira napupugngan an ira hingyap nga magkita hin pornograpiya nagpapakita hin pariho nga pangirilal-an hadton mga adik ha de-alkohol nga irimnon ngan droga. Salit diri urusahon nga an pagkinita hin pornograpiya may-ada nakakadaot nga mga resulta—sugad han duro nga kaawod, pagin diri produktibo ha trabaho, diri malipayon nga pamilya, pagbulag han mag-asawa, ngan pag-unay. Ha pagselebrar han usa nga tawo han iya usa ka tuig nga pagbaya ha pagin adik ha pornograpiya, hiya nagsiring nga inabat niya nga nagkaada hiya utro pagtahod ha kalugaringon.

10. Paonan-o nabayaan ni Ribeiro an iya pagin adik ha pornograpiya?

¹⁰ Para ha damu, an pagbaya ha pornograpiya usa nga nagpapadayon nga pakig-away. Pero mahimo ito madaog. Tagda an ehemplo ni Ribeiro nga taga-Brazil. Binaya hiya ha ira balay han tin-edyer hiya ngan nagtrabaho ha pabrika nga nagri-recycle hin papel. Didto, pirme hiya nakakakita hin maglaw-ay nga retrato ha mga magasin. Hiya nagsiring: “Hinay-hinay nga naadik ako ngan nagduro gud ito. Ngani, ginhuhulat ko gud nga bumaya ha balay an babaye nga akon ka-live-in basi makagkita na ako hin maglaw-ay nga video.” Usa ka adlaw, samtang nagtatrabaho hi Ribeiro, nakakita hiya hin tinambak nga libro nga igri-recycle na, ngan nakita niya an libro nga may ulohan An Sekreto han Kalipayan ha Pamilya. Ginkuha niya ito ngan ginbasa. An iya hinbaroan nakaaghat ha iya nga mag-aram han Biblia kaupod an mga Saksi ni Jehova, pero inagi anay an maiha nga panahon antes niya mabayaan an iya maraot nga buhat. Ano an nakabulig ha iya? Hiya nagsiring: “Pinaagi han pag-ampo, pag-aram ha Biblia, ngan pagpamalandong han akon hinbaroan, mas naapresyar ko an mga kalidad han Dios tubtob nga mas nagduro an akon gugma kan Jehova kay han akon hingyap ha pagkinita hin pornograpiya.” Pinaagi han gahum han Pulong han Dios ngan han Iya baraan nga espiritu, nahukas ni Ribeiro an iya daan nga personalidad, nabawtismohan hiya, ngan tigurang na yana ha kongregasyon.

11. Ano an kinahanglan buhaton han usa basi mabayaan an pagkinita hin pornograpiya?

¹¹ Tigamni nga diri la pag-aram ha Biblia an ginhimo ni Ribeiro basi madaog an iya maraot nga buhat. Kinahanglan niya maggahin hin panahon basi matugkad an iya kasingkasing han mensahe han Biblia. Pinaagi han pag-ampo ngan pagpamalandong, naghilarom an iya gugma ha Dios; ito an nakabulig ha iya nga madaog an iya duro nga hingyap ha pagkinita hin pornograpiya. An pinakamaopay nga paagi basi mabayaan an pagkinita hin pornograpiya amo an pagpahilarom han aton gugma kan Jehova ngan an kangalas ha maraot.—Basaha an Salmos 97:10.

12. Ano an nakabulig kan Stephen nga mabayaan an kasina ngan an nakakasakit nga mga pulong?

¹² An mga tawo nga madali masina agsob nga iginpapahayag an ira kasina pinaagi hin nakakasakit nga mga pulong. Matin-aw nga an sugad nga paggawi diri nakakabulig ha pagkaada malipayon nga pamilya. Tagda an tatay nga hi Stephen nga taga-Australia. Hiya nagsiring: “Hiara na ako magbinuyayaw ngan madagmit ako masina bisan ha gudti nga butang. Tulo ka beses na kami nga nagkabulag han akon asawa ngan hapit na gud magdiborsyo.” Pero waray pag-iha, gindumarahan han mga Saksi hin pag-aram ha Biblia ini nga mag-asawa. Ano an resulta han nagtikang hi Stephen pag-aplikar han mga sagdon han Biblia? Hiya nagsiring: “Daku gud an iginbag-o han amon pamilya. Ha bulig ni Jehova, mas inaabat ko na yana an kamurayawan ngan pagin kalmado, diri pariho hadto nga baga ako hin bomba, gutiay la nga makaaringit ha akon nabuto dayon an akon kasina ngan kangalas.” Yana, hi Stephen usa na nga ministeryal nga surugoon, ngan an iya asawa pipira na ka tuig nga regular payunir. An mga tigurang ha kongregasyon ni Stephen nagsiring: “Mahilumon, maduruto, ngan mapainubsanon hi Stephen.” Waray hira nahinunumdoman nga nasina hiya. Ginkakarawat ba ni Stephen nga hiya an angay dayawon tungod hito? Hiya nagsiring: “Diri gud magigin bahin han akon kinabuhi ini nga mag-opay nga bendisyon kon waray ko karawata an bulig ni Jehova basi bug-os nga mabag-o an akon personalidad.”

13. Kay ano nga peligroso gud an kasina, ngan ano an iginpapahamangno han Biblia?

¹³ May maopay nga rason nga ginpapahamangnoan kita han Biblia nga bayaan an kasina, nakakasakit nga mga pulong, ngan pagsinggit. (Efe. 4:31) Ito nga mga buhat kasagaran na nga nagriresulta ha pagin madarahog. Bisan kon bangin ginhuhunahuna han mga tawo nga normal la an pagin masisinahon, diri ito nagpapasidungog ha aton Maglalarang. Salit damu an nangalimbasog nga hukason inin magraot nga buhat basi maisul-ot an bag-o nga personalidad.—Basaha an Salmos 37:8-11.

14. Posible ba para ha masisinahon nga tawo nga magin buotan?

¹⁴ Tagda an ehemplo ni Hans nga tigurang ha usa nga kongregasyon ha Austria. “Usa hiya han pinakabuotan nga brother nga bangin karuyag mo gud makilala,” siring han koordinetor han lawas han mga tigurang han kongregasyon nga gintatambongan ni Hans. Pero diri sugad hito hi Hans hadto. Han tin-edyer hiya, nagin adik hiya ha de-alkohol nga irimnon, salit nagin masisinahon hiya. Makausa han nahubog hiya, nasina gud hiya nga tungod hito ginpatay niya an iya uyab, salit ginsentensyahan hiya hin 20 ka tuig nga kaprisohan. An iya kapriso waray makagbag-o han iya pagin masisinahon. Pero ha urhi, an nanay ni Hans naghangyo ha usa nga tigurang nga bisitahon hiya ha prisohan, ngan nagtikang hi Hans pag-aram han Biblia. Hiya nagsiring: “Nakurian gud ako paghukas han akon daan nga personalidad. An mga teksto nga nakaaghat ha akon amo an Isaias 55:7 nga nasiring: ‘Pabayaa an maraut han iya dalan,’ ngan an 1 Corinto 6:11 nga nag-uunabi mahitungod hadton binaya ha ira magraot nga binuhatan, nga nasiring: ‘Sugad hito an iba ha iyo hadto.’ Ha sulod hin damu ka tuig, mapailubon nga ginbuligan ako ni Jehova pinaagi han iya baraan nga espiritu nga maisul-ot an bag-o nga personalidad.” Paglabay hin 17 ngan tunga ka tuig han iya sentensya, ginpagawas hi Hans ha prisohan sugad nga bawtismado nga Kristiano. Hiya nagsiring: “Mapasalamaton gud ako ha daku hinduro nga kalooy ngan pagpasaylo ni Jehova.”

15. Ano nga buhat an komon yana, pero ano an ginsisiring han Biblia mahitungod hito?

¹⁵ Labot han nakakasakit nga mga pulong, an pagbinuwa bahin liwat han daan nga personalidad. Pananglitan, komon na ha mga tawo nga magbuwa basi malikyan an pagbayad hin husto nga buhis o malikyan an sirot han ira nabuhat nga  sala. Ha kabaliktaran, hi Jehova an “Dios han kamatuuran.” (Sal. 31:5) Tungod hito, karuyag niya nga “an tagsa” han iya mga magsiringba “magyakan hin kamatuoran ha iya igkasi-tawo” ngan ‘diri magbuwa.’ (Efe. 4:25; Col. 3:9) Salit kinahanglan kita magsumat han tinuod bisan kon bangin makaarawod o makuri ito.—Prob. 6:16-19.

16. Paonan-o maglalampos an usa ha paghukas han daan nga personalidad?

¹⁶ An paghukas han daan nga personalidad diri mahihimo ha kalugaringon la nga pangalimbasog han usa. An mga gin-unabi hini nga artikulo nga hira Sakura, Ribeiro, Stephen, ngan Hans—nangalimbasog gud basi mabayaan an ira magraot nga buhat. Naglampos hira tungod kay gintugotan nira nga makaimpluwensya ha ira hunahuna ngan kasingkasing an gahum han Pulong han Dios ngan han iya baraan nga espiritu. (Luc. 11:13; Heb. 4:12) Basi mapahimulosan ito nga gahum, kinahanglan naton basahon an Biblia kada adlaw, pamalandungon ito, ngan mag-ampo pirme para han kinaadman ngan kusog ha pag-aplikar han mga sagdon han Biblia. (Jos. 1:8; Sal. 119:97; 1 Tes. 5:17) Nagpapahimulos liwat kita han Pulong han Dios ngan han iya baraan nga espiritu kon nag-aandam kita para ha mga katirok ngan natambong hito. (Heb. 10:24, 25)  Dugang pa, karuyag naton pahimulosan an iba-iba nga paagi nga ginagamit yana ha pagtagana han espirituwal nga pagkaon ha katawohan han Dios ha bug-os nga kalibotan.—Luc. 12:42.

17. Ano an hihisgotan ha sunod nga artikulo?

¹⁷ Ginhisgotan naton an pipira han magraot nga buhat nga sadang hukason ngan bayaan han mga Kristiano. Pero ito la ba an kinahanglan buhaton basi makarawat an pag-uyon han Dios? Diri. Kinahanglan liwat naton isul-ot an bag-o nga personalidad. Ha sunod nga artikulo, hihisgotan naton an pipira nga bahin han bag-o nga personalidad nga kinahanglan magin permanente nga bahin han aton simboliko nga bado.