點樣除去同棄絶舊品格
“要除去舊品格同舊行為。”——歌羅西書3:9
1，2． 好多人對耶和華見證人有乜嘢印象？
好多人留意到耶和華嘅子民有出衆嘅品格。例如，關於我哋喺納粹德國統治之下嘅弟兄姊妹，作家安東·吉爾寫道:“耶和華見證人特别受到納粹黨敵視。……到1939年為止，有成6000個見證人被韞喺集中營。”作者補充話，呢啲見證人雖然忍受猛烈嘅迫害，但係佢哋“為人可靠，喺壓力下依然内心平靜”，繼續保持“忠義同緊密團結嘅精神”。
2 近年來，喺南非有好多人留意到上帝嘅子民表現出同樣嘅美好品格。有一段時間，南非唔同膚色嘅見證人之間唔能够自由來往。雖然係噉，2011年12月18日星期日，喺南非約翰内斯堡有一個令人驚訝嘅場面。7萬8000個唔同種族嘅見證人坐滿咗當地最大嘅體育館，佢哋嚟自南非同鄰近國家，一齊享受屬靈節目。體育館嘅一個經理評論出席大會嘅人，話:“你哋係我喺呢個體育館見過，品行最好嘅一班人。你哋個個都衣着得體，而且將體育館打掃得乾乾淨淨。最特别嘅就係，你哋的確係一個嚟自唔同種族嘅國際性團體。”
3． 乜嘢令我哋嘅弟兄團體與衆不同？
3 通過其他人嘅評論可以睇出，我哋嘅國際“弟兄團體”確實與衆不同。（彼得前書5:9）點解我哋同其他組織咁唔一樣呢？喺上帝話語同聖靈嘅幫助下，我哋努力“除去舊品格”，“穿上新品格”。（歌羅西書3:9，10）
4． 呢篇課文會討論乜嘢？點解？
4 除去舊品格係一回事，但係完全棄絶又係另一回事。喺呢篇課文，我哋會討論吓點樣先可以除去舊品格，點解噉樣做好迫切，點解即使係根深蒂固嘅惡習都能够改變得到。我哋都會分析吓，一啲喺真理裏面好多年嘅人點樣棄絶舊品格。點解我哋需要呢啲提醒？原因係，有啲曾經事奉耶和華嘅人冇保持警惕，結果又過翻以往嘅生活。所以，我哋所有人都要將呢個警告緊記於心，“自以為企得穩嘅就要小心，以免跌倒”。（哥林多前書10:12）
“治死”性不道德嘅慾望
5． （甲）請舉例説明，點解要盡快除去舊品格？（請睇吓課文開頭嘅圖片）（乙）根據歌羅西書3:5-9，乜嘢行為屬於舊品格？
5 如果你件衫整污糟咗，仲有啲臭，你會點做呢？你會即刻將件邋遢衫除落嚟。同樣，我哋要盡快採取行動，服從誡命，除去上帝憎恨嘅行為。我哋應該留意保羅向公元1世紀嘅基督徒清楚提出嘅一個勸勉。佢話:“你哋必須要將［屬肉體嘅行為］通通除去。”等我哋嚟討論吓保羅提到違反上帝標準嘅兩種行為——淫亂同不潔。（請讀歌羅西書3:5-9）
6，7． （甲）保羅嘅話點樣表明我哋要竭盡全力先可以除去舊品格？（乙）櫻子過往嘅生活係點樣嘅？佢點樣得到力量離棄呢種生活？
6 淫亂。喺聖經原文裏面，譯作“淫亂”嘅詞，其中一個意思係指婚姻以外或者同性之間嘅不道德性行為。保羅同基督徒同工講，要“治死”佢哋嘅“肢體”，即係要除去所有“淫亂”嘅慾望。保羅嘅措辭清楚表明，要竭盡全力先可以鏟除呢啲錯誤嘅慾望。不過，喺克服錯誤慾望嘅呢場鬥爭中，我哋係可以得勝嘅。
7 我哋嚟睇吓日本嘅櫻子 *嘅經歷。喺成長嘅過程中，佢一直都覺得孤獨同空虚。為咗擺脱呢啲感覺，從15歲開始，佢就同唔同嘅人發生性關係。佢内疚噉承認:“結果，我墮咗三次胎。”佢解釋自己嘅感覺話:“一開始嗰陣，同人發生性行為俾到我安全嘅感覺，令我覺得有人需要我，愛我。但同越多人發生性關係，我就越冇安全感。”直到23歲，櫻子都一直過住噉樣嘅生活，後來佢開始同耶和華見證人學習聖經。櫻子好鍾意自己學到嘅知識，喺耶和華嘅幫助下，佢除去不道德嘅性行為，唔再深受罪疚感困擾。櫻子而家係一個正規先驅，佢唔再感到孤獨，佢話:“我真係好開心日日都感受耶和華温暖嘅愛。”
克服不潔嘅行為
8． 乜嘢事會令我哋俾上帝視為不潔？
8 不潔。喺聖經原文裏面，翻譯成“不潔”嘅詞含義廣泛，除咗性不道德之外，仲可以指食煙、講下流笑話等有害行為。（哥林多後書7:1；以弗所書5:3，4）呢個詞亦可以指私下嘅不潔行為，例如閲讀挑起性慾嘅書刊或者睇色情資訊。呢啲行為都可能導致手淫呢種不潔嘅惡習。（歌羅西書3:5） *
9． 養成“唔受控制嘅性慾”可以導致乜嘢結果？
9 嗰啲慣常睇色情資訊嘅人會養成“唔受控制嘅性慾”，令自己沉迷其中，不能自拔。研究表明，對色情資訊上癮嘅人，同嗰啲對酒精、毒品上癮嘅人所表現出嚟嘅症狀係一樣嘅。習慣睇色情資訊會帶嚟有害嘅後果，例如覺得好内疚，工作效率低，家庭生活唔幸福，離婚，自殺。一個男子以前有睇色情資訊嘅習慣，佢戒除呢個惡習一年之後寫道:“我終於有翻以前失去咗嘅尊嚴。”
10． 里貝羅點樣擺脱色情資訊嘅束縛？
10 對好多人嚟講，擺脱色情資訊係一場持續不斷嘅戰鬥。巴西嘅里貝羅嘅經歷可以講明，呢場戰鬥係可以得勝嘅。里貝羅十幾歲嗰時就離開咗屋企，之後喺一個廢紙回收站揾到份工。喺工作嘅地方，佢開始接觸到色情資訊。佢話:“慢慢，我就上咗癮。情況越來越差，有時我甚至恨不得同居嘅女朋友快啲離開間屋，噉我就可以自己一個人睇色情片。”有一日工作嗰時，里貝羅喺一堆要回收嘅書當中留意到有本叫做《家庭幸福的秘訣》，就攞起嚟讀。呢本書打動咗佢嘅心，於是佢決定同耶和華見證人學習聖經。不過，要除去自己嘅惡習，就需要一段好長嘅時間。最終乜嘢幫到佢呢？佢解釋話:“通過禱告、學習聖經，同埋沉思自己所學到嘅，我越來越欣賞耶和華嘅特質，噉樣做使我對耶和華嘅愛不斷加深。最終，呢種愛勝過我對色情資訊嘅慾望。”喺上帝嘅話語同聖靈幫助下，里貝羅除去舊品格，受咗浸，而家係會衆嘅長老。
11． 棄絶色情資訊嘅最好方法係乜嘢？
11 值得留意嘅係，為咗喺呢場戰鬥得勝，里貝羅唔只係學習聖經嘅知識，佢仲花時間使上帝嘅話語打動自己嘅内心。通過禱告同沉思，佢對耶和華嘅愛戰勝咗對色情資訊嘅慾望。棄絶色情資訊最好嘅方法就係，培養對耶和華深摯嘅愛，亦都要憎恨惡事。（請讀詩篇97:10）
除去怒氣、大話同詆毁傷人嘅言語
12． 乜嘢幫助史提芬除去怒氣同傷人嘅言語？
12 脾氣暴躁嘅人經常通過鬧人嚟發泄佢哋嘅怒氣。好明顯，噉樣做只會破壞家庭幸福。嚟自澳大利亞嘅史提芬係一個爸爸，佢話:“以前我一日到黑都講粗口，為咗啲雞毛蒜皮嘅事就發晒脾氣。我同太太分咗三次居，仲差啲連婚都離埋。”後來，耶和華見證人開始同佢哋兩夫妻學習聖經。史提芬聽從聖經勸告之後有乜嘢改變呢？佢話:“我哋一家人嘅關係有咗好大改善。之前，我係一個火爆嘅炸彈，隨時可能會因為一啲小小嘅問題就爆炸。喺耶和華嘅幫助下，而家，我内心充滿和平同安寧。”而家，史提芬係助理僕人，佢太太已經做咗幾年正規先驅。會衆嘅長老提到史提芬話:“史提芬係一個安靜、工作勤奮嘅弟兄，佢亦都有謙卑嘅態度。”喺佢哋印象中，從來都冇見過佢發火。史提芬係咪全靠自己嘅努力就做得到呢？佢話:“如果我冇接受耶和華嘅幫助徹底更新自己内在嘅為人，生活上就唔會得到任何美好嘅祝福。”
13． 點解憤怒咁危險？聖經提出乜嘢勸告？
13 點解聖經勸告人要除去怒氣、尖叫同詆毁傷人嘅言語呢？（以弗所書4:31）因為呢啲行為往往會進一步演變成暴力。呢個世界嘅人可能將發泄怒氣睇成係家常便飯，但呢種諗法一啲都唔尊重我哋嘅創造主。好多人要除去呢啲有害嘅行為，先可以穿上新品格。（請讀詩篇37:8-11）
14． 兇狠好鬥嘅人有冇可能變得温和？
14 漢斯係奧地利一個會衆嘅長老，我哋嚟睇吓佢嘅例子。長老團協調人評價漢斯話:“佢係我哋見過嘅其中一個最温和嘅弟兄。”但漢斯其實唔係一直都咁温和嘅。喺十幾歲嗰時，佢開始濫用酒精，結果變得兇狠好鬥。有一次佢飲醉咗，一怒之下殺死咗佢嘅女朋友，因為噉被判監二十年。一開始，監獄裏面嘅生活冇改變漢斯嘅粗暴性格。過咗一段時間，佢嘅媽媽請一位長老去監獄探佢，之後漢斯就開始學習聖經。漢斯話:“對我嚟講，除去舊品格真係好唔容易。經文的確俾咗我好大嘅鼓勵，例如以賽亞書55:7話，‘惡人應當離開歧途’，哥林多前書6:11提到嗰啲已經離棄錯誤行徑嘅人話，‘你哋有啲人以前都做過噉樣嘅事’。多年以來，耶和華都耐心噉通過佢嘅聖靈幫助我穿上新品格。”服刑17年半之後，漢斯獲得釋放。當時佢已經係一個受咗浸嘅基督徒。漢斯話:“我真係非常感激耶和華用佢無與倫比嘅慈悲寬恕咗我。”
15． 一般人對邊啲行為見怪不怪？但係聖經點講？
15 除咗傷人嘅言語，舊品格亦包括講大話。例如，喺報税表上做假，或者為咗逃避責任而講大話，好多人對呢啲行為已經見怪不怪。相反，耶和華係“信守真理嘅上帝”。（詩篇31:5）佢要求佢嘅子民“各人［都］要對人講實話”，“唔好互相講大話”。（以弗所書4:25；歌羅西書3:9）所以，就算喺尷尬或者唔方便嘅情況下，我哋都一定要講真話。（箴言6:16-19）
佢哋點樣贏得勝利
16． 點樣先能够成功除去舊品格？
16 除去舊品格唔可以單靠自己嘅力量。呢篇課文提到嘅櫻子、里貝羅、史提芬同漢斯都要竭盡全力先可以除去佢哋嘅惡習。佢哋憑住上帝話語同聖靈嘅力量而獲得勝利。（路加福音11:13；希伯來書4:12）如果想得到噉樣嘅力量，我哋就要每日閲讀同沉思聖經，經常通過禱告求耶和華俾我哋智慧同力量去實踐聖經嘅原則。（約書亞記1:8；詩篇119:97；帖撒羅尼迦前書5:17）我哋為聚會做準備同參加聚會嘅時候，就可以從上帝嘅話語同聖靈得益。（希伯來書10:24，25）另外，我哋都好想善用，上帝組織通過唔同方式為世界各地嘅弟兄姊妹提供嘅屬靈食物。（路加福音12:42）
點樣先能够成功除去舊品格？（請睇第16段）
17． 下一篇課文會討論乜嘢？
17 我哋已經討論過一啲基督徒必須要除去同棄絶嘅惡習。如果我哋想得到耶和華嘅悦納，只係棄絶呢啲惡習係唔够嘅，仲一定要穿上新品格。喺下一篇文章，我哋會討論吓，點樣做就可以永遠穿上新品格呢件比喻性嘅衣服。
