1, 2. (a) Ngaa posible gid naton masuksok ang bag-o nga personalidad? (b) Ano nga mga kinaiya sang bag-o nga personalidad ang ginsambit sa Colosas 3:10-14?

“BAG-O nga personalidad.” Duha ka beses ini ginsambit sa Bag-ong Kalibutan nga Badbad sang Balaan nga Kasulatan. (Efe. 4:24; Col. 3:10) Amo ini ang personalidad nga “gintuga suno sa kabubut-on sang Dios.” Posible gid naton ini nga masuksok. Ngaa? Bangod gintuga ni Jehova ang mga tawo suno sa iya larawan, gani mapakita naton ang iya matahom nga mga kinaiya.—Gen. 1:26, 27; Efe. 5:1.

² Matuod, bangod sang napanubli naton nga pagkadihimpit sa aton una nga mga ginikanan, may malain kita nga mga handum kon kaisa. Mahimo nga naimpluwensiahan man kita sang aton palibot. Pero bangod maluluy-on si Jehova nga nagabulig sa aton, puede kita mangin ang sahi sang tawo nga ginakahamut-an niya. Para mangin determinado kita sa sini, binagbinagon naton ang pila ka kinaiya sang bag-o nga personalidad nga ginlaragway ni apostol Pablo. (Basaha ang Colosas 3:10-14.) Binagbinagon man naton kon paano naton mapakita ini nga mga kinaiya sa aton ministeryo.

3. Ano ang isa ka kinaiya sang bag-o nga personalidad?

³ Sa tapos kita ginlaygayan ni Pablo nga isuksok ang bag-o nga personalidad, ginsambit niya ang isa ka importante nga kinaiya sini, ang indi pagpasulabi. Nagsiling sia: “Wala sing Griego ukon Judiyo, natuli ukon wala matuli, dumuluong, Escita, ulipon, ukon hilway nga tawo.” * Sa kongregasyon, ngaa wala dapat sing ginapasulabi nga rasa, pungsod, ukon kahimtangan sa kabuhi? Bangod bilang matuod nga mga sumulunod sang Cristo, ang “tanan nahiusa.”—Col. 3:11; Gal. 3:28.

4. (a) Paano dapat trataron sang mga alagad ni Jehova ang iban? (b) Ano nga kahimtangan ang makaapektar sa paghiusa sang mga Cristiano?

⁴ Kon ginasuksok naton ang bag-o nga personalidad, tahuron naton kag padunggan ang aton mga kauturan kag ang mga indi Saksi, ano man ang ila ginhalinan ukon rasa. (Roma 2:11) Nabudlayan sa sini ang mga kauturan sa iban nga bahin sang kalibutan. Halimbawa, sa South Africa, nagaistar gihapon ang kalabanan nga Saksi sa mga lugar nga ginpain sang una sang gobierno depende sa rasa sang mga tawo. May lugar para sa mga puti, sa mga itom, ukon sa sarisari sing rasa. Gani para mapalig-on ang aton mga kauturan nga “magpasangkad,” gin-aprobahan sang Nagadumala nga Hubon sang Oktubre 2013 ang pinasahi nga kahimusan nga magabulig sa mga kauturan nga sarisari sing rasa nga magsuod sa isa kag isa. (2 Cor. 6:13, footnote) Paano ini ginhimo?

5, 6. (a) Ano ang ginhimo nga kahimusan para mapalig-on ang paghiusa sang katawhan sang Dios sa isa ka pungsod? (Tan-awa ang piktyur sa umpisa sini nga artikulo.) (b) Ano ang resulta sini?

⁵ Sa sini nga kahimusan, duha ka kongregasyon nga tuhay sing lenguahe ukon rasa ang magaupdanay sa pila ka Sabado kag Domingo. Magkaupod ang mga kauturan nga nagabantala, nagatambong sa mga miting, kag nagabisita sila sa mga balay sang kada isa. Ginatos ka kongregasyon ang nakigbahin sa sini nga kahimusan, kag nakabaton ang sanga talatapan sang madamo nga maayong report parte sa sini, ang iban halin sa mga indi Saksi. Halimbawa, nagsiling ang ministro sang isa ka relihion, “Indi ako Saksi, pero masiling ko nga organisado gid kamo sa inyo pagbantala, kag nahiusa kamo bisan pa sarisari ang inyo rasa.” Ano ang epekto sini nga kahimusan sa mga Saksi?

⁶ Sang primero, daw nagaalang-alang si Noma, isa ka utod nga nagahambal sing Xhosa, nga imbitahon sa iya gamay nga balay ang puti nga mga kauturan sa English nga kongregasyon. Pero pagkatapos magbantala upod sa puti nga mga Saksi kag makabisita sa ila balay, nagsiling sia, “Pareho lang gali sila sa amon!” Gani sang turno na sang ila Xhosa nga kongregasyon nga imbitahon ang mga kauturan sa English nga kongregasyon, nagpreparar sia sang pagkaon kag gin-imbitar ang pila ka bisita. Nagsiling si Noma parte sa puti nga gulang nga bisita niya: “Nagdayaw gid ako kay okey lang sa iya nga magpungko sa plastik nga kaha nga daw nagalumpagi na.” Bangod sini nga kahimusan, madamo nga kauturan ang nangin mag-abyan kag padayon nga nagapakigsuod sa ila utod nga tuhay sing ginhalinan.

7. Ngaa dapat pirme ipakita ang kaawa?

⁷ Samtang ara pa ang kalibutan ni Satanas, padayon kita nga pagatilawan. Mahimo kita madulaan sing trabaho, magbalatian, hingabuton, maapektuhan sang kalamidad, madulaan sang pagkabutang bangod sang krimen, ukon makaeksperiensia sang iban pa nga kabudlayan. Dapat kita magbuligay, kag para mahimo ini, dapat naton ipakita ang matuod  nga kaawa ukon kaluoy. Kon maluluy-on kita, mapalig-on kita nga maghimo sang mainayuhon nga mga buhat. (Efe. 4:32) Magabulig ini nga mga kinaiya sang bag-o nga personalidad para mailog naton ang Dios kag malugpayan ang iban.—2 Cor. 1:3, 4.

8. Ano ang maayo nga resulta kon magpakita kita sing kaawa kag kaayo sa tanan sa kongregasyon? Maghatag sing halimbawa.

⁸ Paano pa gid kita makapakita sing konsiderasyon sa mga halin sa iban nga pungsod ukon sa mga bululigan sa aton kongregasyon? Dapat kita makig-abyan sa ila kag buligan naton sila nga mahangpan nga bahin gid sila sang kongregasyon. (1 Cor. 12:22, 25) Binagbinaga ang natabo kay Dannykarl nga nagsaylo sa Japan halin sa Pilipinas. Indi maayo ang pagtratar sa iya sa ginaubrahan niya. Sang ulihi, nakatambong sia sa miting sang mga Saksi ni Jehova. “Mga Japanese ang halos tanan nga nagtambong,” siling ni Dannykarl, “pero gin-abiabi gid nila ako nga daw dugay na kami nga kilalahay.” Padayon sia nga ginpakitaan sing kaayo kag nakabulig ini sa iya pag-uswag. Nabawtismuhan sia, kag isa na sia ka gulang subong. Nalipay gid ang mga gulang sa ila kongregasyon nga kaupod nila sia kag ang iya asawa nga si Jennifer. Nagsiling ang mga gulang, “Simple gid ang ila kabuhi bilang mga payunir kag maayo sila nga halimbawa sa pag-una sa Ginharian.”—Luc. 12:31.

9, 10. Maghatag sing mga halimbawa nga ginapakamaayo ang nagapakita sing kaluoy sa ministeryo.

⁹ Kon ginasugid naton sa iban ang mensahe sang Ginharian, may kahigayunan kita nga himuon “ang maayo sa tanan.” (Gal. 6:10) Madamo nga Saksi ang nagtuon sang bag-o nga lenguahe bangod naluoy sila sa mga imigrante. (1 Cor. 9:23) Ginpakamaayo gid sila. Halimbawa, nagtuon sing Swahili ang payunir sa Australia nga si Tiffany para magbulig sa Swahili nga kongregasyon sa siudad sang Brisbane. Bisan pa nabudlayan si Tiffany sa pagtuon sini nga lenguahe, nangin malipayon sia. Nagsiling sia: “Kon gusto mo nga mangin makalilipay ang imo ministeryo, testingi ang pag-alagad sa kongregasyon nga nagagamit sang iban nga lenguahe. Daw nakakadto ka na sa iban nga pungsod bisan ara ka lang sa inyo lugar. Mabatyagan mo ang aton bilog kalibutan nga paghiliutod kag makita gid nga nahiusa kita.”

¹⁰ Binagbinaga man ang halimbawa sang isa ka pamilya sa Japan. Nagsiling ang ila bata nga si Sakiko: “Sang katuigan 1990, masami kami nga makabantala sa mga imigrante halin sa Brazil. Kon ipakita namon sa ila Biblia nga Portuguese ang mga teksto, pareho sang Bugna 21:3, 4 ukon Salmo 37:10, 11, 29, nagapamati gid sila kag nagahibi pa gani ang iban.” May ginhimo pa gid ini nga pamilya bangod naluoy sila sa mga tawo.  “Sang nakita namon nga ginagutom sila sa espirituwal,” siling ni Sakiko, “nagtuon kami sing Portuguese bilang pamilya.” Sang ulihi, nagbulig sila para matukod ang Portuguese nga kongregasyon. Madamo nga imigrante ang nabuligan sini nga pamilya nga mangin mga alagad ni Jehova. “Kabudlay gid magtuon sang Portuguese,” siling pa ni Sakiko, “pero nangin balewala ini nga kabudlayan bangod sang pagpakamaayo nga nabaton namon. Nagapasalamat gid kami kay Jehova.”—Basaha ang Binuhatan 10:34, 35.

11, 12. (a) Ngaa dapat husto ang aton motibo sa pagsuksok sang bag-o nga personalidad? (b) Ano ang makabulig sa aton nga mangin mapainubuson?

¹¹ Ginasuksok naton ang bag-o nga personalidad bangod gusto naton padunggan si Jehova, indi para dayawon kita sang iban. Dumduma nga nakasala kag nangin bugalon bisan ang perpekto nga anghel. (Ipaanggid ang Ezequiel 28:17.) Gani mabudlayan gid ang makasasala nga mga tawo sa pagsikway sa bugal kag pagkamatinaastaason. Pero masuksok gihapon naton ang pagkamapainubuson. Ano ang makabulig sa aton?

¹² Para mangin mapainubuson kita, dapat naton pamalandungan kada adlaw ang ginabasa naton sa Pulong sang Dios. (Deut. 17:18-20) Pamalandungan naton ilabi na ang mga gintudlo ni Jesus kag ang iya maayo gid nga halimbawa sang mapainubuson nga pag-alagad. (Mat. 20:28) Ginhinawan pa gani ni Jesus ang mga tiil sang iya mga apostoles. (Juan 13:12-17) Dapat man kita pirme mangamuyo nga buligan kita sang espiritu sang Dios nga mabatuan ang pagbatyag nga labaw kita sa iban.—Gal. 6:3, 4; Fil. 2:3.

13. Ano ang mabaton naton nga pagpakamaayo kon mapainubuson kita?

¹³ Basaha ang Hulubaton 22:4. Dapat mangin mapainubuson ang tanan nga nagasimba kay Jehova. Nagaresulta ini sa pagpakamaayo. Kon mapainubuson kita, may paghidait kag paghiusa sa kongregasyon. Mabaton man naton ang wala tupong nga kaayo sang Dios. Nagsiling si apostol Pedro: “Tanan kamo dapat mangin mapainubuson sa inyo pagpakig-angot sa isa kag isa, bangod ginapamatukan sang Dios ang mga matinaastaason, apang nagahatag sia sang wala tupong nga kaayo sa mga mapainubuson.”—1 Ped. 5:5.

14. Sin-o ang nagpakita sang pinakamaayo nga halimbawa sang kalulo kag pagkamapinasensiahon?

¹⁴ Sa kalibutan subong, masami nga ginatamod nga maluya ang mga tawo nga malulo kag mapinasensiahon. Pero indi ini matuod. Matahom ini nga mga kinaiya sang pinakagamhanan nga Persona sa uniberso. Ginpakita ni Jehova nga Dios ang pinakamaayo nga halimbawa sang kalulo kag pagkamapinasensiahon. (2 Ped. 3:9) Binagbinaga kon paano sia nagsabat paagi sa iya mga anghel sang ginpamangkot sia ni Abraham kag ni Lot. (Gen. 18:22-33; 19:18-21) Nangin mapinasensiahon man si Jehova sa indi matinumanon nga pungsod sang Israel sing sobra 1,500 ka tuig.—Ezeq. 33:11.

15. Paano ginpakita ni Jesus ang kalulo kag pagkamapinasensiahon?

¹⁵ “Malulo” si Jesus. (Mat. 11:29) Mapinasensiahon gid sia sa kaluyahon sang iya mga sumulunod. Sang nag-alagad si Jesus sa duta, ginpakalain sia sang mga nagapamatok sa iya. Pero nagpabilin sia nga malulo kag mapinasensiahon asta sa iya kamatayon. Bisan grabe na ang kasakit ni Jesus sang ginlansang sia sa usok sang pag-antos, ginpangamuyo pa niya sa iya Amay nga patawaron ang mga naglansang sa iya bangod, siling niya, “wala sila makahibalo sang ila ginahimo.” (Luc. 23:34) Maayo  gid sia nga halimbawa sang kalulo kag pagkamapinasensiahon bisan pa nagaantos sang kasakit kag mabudlay nga kahimtangan!—Basaha ang 1 Pedro 2:21-23.

16. Paano naton mapakita ang kalulo kag pagkamapinasensiahon?

¹⁶ Paano naton mapakita ang kalulo kag pagkamapinasensiahon? Ginsambit ni Pablo ang isa ka paagi sang nagsulat sia sa iya mga kauturan: “Padayon nga batasa ninyo ang isa kag isa kag magpinatawaray kamo sing kinabubut-on bisan pa ang isa may rason nga magreklamo sa isa. Subong nga si Jehova nagpatawad sing kinabubut-on sa inyo, amo man sini ang himuon ninyo.” (Col. 3:13) Para matuman naton ini nga sugo, dapat malulo kita kag mapinasensiahon. Kon patawaron naton ang iban, nagabulig kita nga mahiusa ang kongregasyon.

17. Ngaa dapat naton ipakita ang kalulo kag pagkamapinasensiahon?

¹⁷ Dapat gid isuksok sang isa ka Cristiano ang kalulo kag pagkamapinasensiahon. Kinahanglan ini sa kaluwasan. (Mat. 5:5; Sant. 1:21) Kon ipakita naton ini nga mga kinaiya, mapadunggan naton si Jehova kag mabuligan ang iban nga sundon ang laygay sang Biblia.—Gal. 6:1; 2 Tim. 2:24, 25.

18. Ano ang kaangtanan sang gugma kag sang indi pagpasulabi?

¹⁸ Ang tanan nga kinaiya nga ginbinagbinag naton may kaangtanan sa gugma. Halimbawa, ginlaygayan ni disipulo Santiago ang iya mga kauturan bangod ginapaboran nila ang mga manggaranon sangsa mga imol. Ginpaathag niya nga supak ini sa sugo sang Dios: “Higugmaa ang imo isigkatawo subong sang imo kaugalingon.” Nagsiling sia: “Kon padayon kamo nga nagapakita sang paboritismo, nagapakasala kamo.” (Sant. 2:8, 9) Pero kon may gugma kita, indi naton pagpasulabihon ang iban bangod sang ila tinun-an, rasa, ukon kahimtangan sa kabuhi. Indi kita makapakunokuno nga daw wala kita sing ginapasulabi. Dapat bahin gid ini sang aton personalidad.

19. Ngaa dapat naton isuksok ang gugma?

¹⁹ Ang gugma “mapinasensiahon” man kag “mainayuhon” kag “wala ini nagapahambog.” (1 Cor. 13:4) Para makapadayon kita sa pagbantala sang mensahe sang Ginharian sa aton isigkatawo, dapat mapinasensiahon kita, mainayuhon, kag mapainubuson. (Mat. 28:19) Kon ipakita naton ini nga mga kinaiya, mangin maayo ang kaangtanan naton sa tanan nga kauturan sa kongregasyon. Ano ang resulta kon ipakita naton ini nga gugma? Mahiusa ang mga kongregasyon kag bangod sini, mapadunggan si Jehova kag maganyat ang mga interesado sa kamatuoran. Nagakaigo gid ang konklusion sang Biblia parte sa bag-o nga personalidad: “Dugang pa sa sining tanan, isuksok ninyo ang gugma, kay amo ini ang himpit nga higot sang paghiusa.”—Col. 3:14.

20. (a) Ano ang dapat naton ipamangkot, kag ngaa? (b) Ano ang ginapaabot naton sa ulihi?

²⁰ Dapat mamangkot ang kada isa sa aton, ‘Ano pa ang dapat ko himuon para mauba kag masikway ang daan nga personalidad?’ Dapat kita mangamuyo sa Dios nga buligan kita kag magpanikasog nga dulaon ang tanan nga malain nga panimuot kag buhat para mapanubli naton ang Ginharian sang Dios. (Gal. 5:19-21) Dapat man kita mamangkot, ‘Padayon ko bala nga ginabag-o ang akon panghunahuna para mapahamut-an si Jehova?’ (Efe. 4:23, 24) Dapat padayon nga magpanikasog ang tanan nga Cristiano nga isuksok kag ipakita ang bag-o nga personalidad. Makalilipay gid magkabuhi kon ang tanan himpit na nga nagasuksok sang bag-o nga personalidad!