1, 2. (a) Dahaka dainai ita be mauri matamata ita hahedinaraia diba? (b) Kolose 3:10-14 hegeregerena, mauri matamata ena kara namodia haida be dahaka?

BAIBEL ese ia gwauraia mauri matamata be “Dirava ena ura hegeregerena ia vara.” (Efe. 4:24; Kol. 3:10) Ita ese unai mauri matamata ita hahedinaraia diba. Dahaka dainai? Badina Iehova ese taunimanima be iena toana hegeregerena ia karaia, unai dainai iena kara namodia ita hahedinaraia diba.​—⁠Gen. 1:26, 27; Efe. 5:1.

² Momokani, iseda tama sina ginigunadia amo kara dika ita abia hanai dainai, nega haida ura kereredia ita abia. Danu, nega haida do ita ura iseda neiba taudia edia kara ita tohotohoa. To, Iehova ena heduru amo do ita kwalimu bona ia ura henia tauna ai ita lao diba. Unai ia vara totona, Paulo ese ia herevalaia mauri matamata ena kara namodia haida mani ita herevalaia. (Kolose 3:10-14 duahia.) Bona do ita itaia edena bamona unai kara namodia be iseda haroro gaukara lalonai ita hahedinaraia diba.

3. Mauri matamata ena kara ta be dahaka?

³ Paulo ia gwau mauri matamata ena kara namona ta be taunimanima edia toana ita laloa lasi. Ia gwau: “Grik o Iuda tauna be lasi, eiava kopina utua o kopina utua lasi karana be lasi, danu idau tano tauna, Sitia tauna, igui hesiai tauna, eiava ura kwalimu tauna be lasi.” * Kongrigeisen lalonai, namo lasi ta ia laloa ia be ma haida ia hereaia, badina iena bese be idau o iena dagi be bada. Dahaka dainai? Badina Keriso murinai idia raka taudia “ibounai be tamona.”​—⁠Kol. 3:11; Gal. 3:28.

4. (a) Iehova ena hesiai taudia ese ma haida be edena bamona do idia kara henia? (b) Dahaka ese Keristani lalotamona ia hadikaia diba?

⁴ Mauri matamata be dabua bamona ita hahedokilaia neganai, taunimanima ibounai be mai hemataurai ida do ita kara henia, herevana edia bese o noho dalana be idau. (Roma 2:11) To tano ma haida dekenai unai idia karaia be auka. Hegeregere, guna South Africa ai, gavamani ese gabu haida idia makaia idau bese taudia idia noho totona. Unuseni idia noho taudia momo, Witnes taudia danu, be unai gabudia dekenai idia do noho. Hakaua Oreana idia ura iseda tadikaka ese edia ‘lalokau idia habadaia.’ Unai dainai October 2013 ai, dala matamata ta idia hegaegaelaia, unai amo bese idauidau tadikaka taihu be ta ta idia dibaia diba. (2 Kor. 6:13) Edena dala idia hegaegaelaia?

5, 6. (a) Tano ta ai Dirava ena taunimanima edia lalotamona karana hagoadaia totona, tadikaka be edena dala idia hegaegaelaia? (Laulau ginigunana herevalaia.) (b) Dahaka namo ia vara?

⁵ Tadikaka ese dala idia karaia, unai amo wikeni haida ai, gado o bese idau kongrigeisen rua be idia hebamo heheni diba. Unai kongrigeisen rua idia bamoa tadikaka taihu be idia haroro hebou, kongrigeisen heboudia dekenai idia lao, bona ta ta edia ruma dekenai idia moale hebou. Kongrigeisen handred momo be unai dala idia badinaia, bona brens ofesi be ripoti namodia momo idia abia, Witnes lasi taudia amo danu. Hegeregere, dubu gunalaia tauna ta ia gwau: “Lau be Iehova ena Witnes tauna lasi, to lau gwau diba, emui haroro gaukara be umui karaia namonamo, bona herevana umui be bese idauidau amo, to mai lalotamona ida umui noho.” Unai dala matamata dainai tadikaka taihu edia hemami be edena bamona?

⁶ Matamanai, Xhosa gado ia gaukaralaia taihu ta ladana, Noma, ia daradara bema ena ruma dekenai English kongrigeisen tadikaka taihu ia boiria diba. To, kopina kurokuro Witnes taudia ida ia haroro bona edia ruma ai idia moale hebou murinai, ia gwau: “Idia danu be ita bamona!” Unai dainai English kongrigeisen tadikaka taihu be Xhosa kongrigeisen ida idia haroro neganai, Noma ese idia haida ia boiria ena ruma ai idia aniani hebou totona. Ia boiridia tadikaka ta be kopi kurokuro elda tauna. Ia gwau: “Lau hoa badina lau itaia tadikaka be mai moale ida foloa dekenai ia noho plastik maua latanai ia helai.” Unai dala matamatana dainai, tadikaka taihu momo be tura matamatadia idia davaria, bona idau bese taudia dekenai edia lalokau idia do habadaia noho.

7. Dahaka dainai hebogahisi ita hahedinaraia noho be namo?

⁷ Satani ena tanobada be kahirakahira do ia ore dainai, hahetoho do ita davaria noho. Hegeregere, moni gaukara ita davaria be auka, gorere badana ita abia, dagedage, disasta, henaohenao o hekwakwanai ma haida dainai iseda kohu ita haboioa. Hahetoho negadiai ma ta ita durua totona, namona be hebogahisi korikorina ita hahedinaraia. Hebogahisi mai lalokauna ese ita do ia doria  hariharibada karana ita hahedinaraia totona. (Efe. 4:32) Unai be mauri matamata ena kara namodia. Idia ese ita do idia durua Dirava ita tohotohoa bona ma haida do ita hagoadaia.​—⁠2 Kor. 1:3, 4.

8. Kongrigeisen lalonai hebogahisi ita hahedinaraia neganai, dahaka namo ia vara diba? Haheitalai gwauraia.

⁸ Edena dala ai iseda kongrigeisen dekenai idia noho idau tano taudia eiava dabu taudia dekenai hebogahisi ita hahedinaraia diba? Namona be unai bamona taudia ita tura henia, durua bona abidia dae. (1 Kor. 12:22, 25) Dannykarl mani ita laloa, ia be Philippines amo Japan dekenai ia lao. Ia be idau tano tauna dainai, gaukara gabunai ia idia kara namo henia lasi. Gabeai, Iehova ena Witnes taudia edia hebou ta dekenai ia lao. Dannykarl ia gwau: “Hebou idia mai taudia momo be Japan taudia, to idia ese lau idia welkam henia, hegeregere idia be lau idia diba vadaeni.” Tadikaka edia hebogahisi karadia dainai, ia be Iehova kahirakahira ia lao matamaia. Gabeai bapatiso ia abia, bona hari ia be elda ta. Elda ma haida be idia moale, badina Dannykarl bona ena adavana, Jennifer, be edia kongrigeisen idia bamoa. Idia gwau: “Idia be painia taudia dainai, gau momo idia tahua lasi, bona Basileia tahua guna karana dekenai idia be haheitalai namona.”​—⁠Luka 12:31.

9, 10. Haroro gaukara ai hebogahisi ita hahedinaraia neganai, dahaka namo ia vara? Haheitalai gwauraia.

⁹ Basileia ena sivarai namona be ma haida dekenai ita herevalaia neganai, unai be nega namona “ibounai dekenai kara namo” ita hahedinaraia totona. (Gal. 6:10) Witnes taudia momo be idau tano taudia idia hebogahisi henia dainai, idia hekwarahi edia gado idia dibaia totona. (1 Kor. 9:23) Unai idia karaia dainai, hahenamo momo idia davaria. Hegeregere, Australia ai, painia taihu ta ladana, Tiffany, be Swahili gado ia dibaia, unai amo Brisbane dekenai ia noho Swahili gado kongrigeisen ia durua diba. Ena be unai gado dibaia karana be mai ena hekwarahi, to ia moale. Ia gwau: “Bema oi ura emu haroro gaukara oi habadaia, idau gado kongrigeisen dekenai oi lao. Unai be hegeregere tano ma ta dekenai oi lao, to momokani oi be emu siti oi rakatania lasi. Iseda tanobada ibounai tadikaka oreana oi itaia bona edia lalotamona karana oi mamia.”

¹⁰ Japan dekenai ia noho ruma bese ta be unai bamona idia karaia danu. Edia natuna kekeni, Sakiko, ia gwau: “Ai haroro neganai, nega momo Brazil taudia ai hedavari henia. Portuguese gado Baibel amo siri ai duahia neganai, hegeregere Apokalupo 21:3, 4 o Salamo 37:10, 11, 29, idia kamonai namonamo bona nega haida idia tai.” Unai  taudia idia hebogahisi henia dainai, dahaka idia karaia? Sakiko ia gwau: “Ai itaia idia be idia ura dikadika hereva momokani idia dibaia, unai dainai Portuguese gado ai dibaia matamaia.” Gabeai, Portuguese gado kongrigeisen ta idia hamatamaia. Lagani momo lalonai, idia ese idau bese taudia momo idia durua Iehova idia hesiai henia totona. Sakiko ma ia gwau: “Ai hekwarahi bada Portuguese gado ai dibaia totona, to ai abia hahenamo ese unai ia hereaia. Iehova ai tanikiu henia bada.”​—⁠Kara 10:34, 35 duahia.

11, 12. (a) Dahaka dainai mauri matamata be dabua bamona ita hahedokilaia be namo? (b) Ita manau totona dahaka ese ita ia durua diba?

¹¹ Namona be mauri matamata be dabua bamona ita hahedokilaia, badina ita ura Iehova ita hanamoa, to taunimanima ita hanamoa totona lasi. Laloatao, guna ia goevadae aneruna be ia hekokoroku dainai, kara dika ia karaia. (Esekiela 28:17 hahegeregerea.) Ita be goevadae lasi dainai, hekokoroku karana ita dadaraia be auka! To, manau karana be dabua bamona ita hahedokilaia diba. Dahaka ese ita ia durua diba unai ita karaia totona?

¹² Ita manau noho totona, namona be dina ta ta ai Dirava ena Hereva ita duahia bona ita laloa dobu. (Deu. 17:18-20) Danu, Iesu ena hahediba herevadia bona manau karana ita laloa diba. (Mat. 20:28) Iesu be ia manau dainai, iena aposetolo taudia edia aena ia huria. (Ioa. 13:12-17) Ma danu, nega ibounai Dirava ena lauma ena heduru ita noia be namo, unai amo ma haida hereaia lalohadaina ita dadaraia diba.​—⁠Gal. 6:3, 4; Fili. 2:3.

13. Bema ita manau, dahaka hahenamo do ita abia?

¹³ Aonega Herevadia 22:4 duahia. Iehova ia ura ita manau, badina manau karana ese hahenamo momo ia mailaia. Bema ita manau, kongrigeisen lalonai maino bona lalotamona do ia noho. Bona Dirava ena hebogahisi hereadaena do ita mamia. Aposetolo Petero ia gwau: “Umui ibounai ese manau karana be ta ta dekenai do umui hahedinaraia, unai kara be dabua bamona do umui hahedokilaia, badina Dirava ese hekokoroku taudia ia dadaraia, to manau taudia dekenai hebogahisi hereadaena ia henia.”​—⁠1 Pet. 5:5.

14. Lalomanau bona boga-auka karana dekenai daika be haheitalai hereadaena?

¹⁴ Hari inai negai, bema ta be ia lalomanau bona boga-auka, ma haida do idia laloa ia be ia manoka. To unai be momokani lasi. Unai kara hereadaena rua be Iehova, siahu bada Tauna, amo idia mai. Lalomanau bona boga-auka karana dekenai Ia be haheitalai hereadaena. (2 Pet. 3:9) Hegeregere, Aberahamo bona Lota be iena gwaukau anerudia dekenai henanadai momo idia henia neganai, lalomanau ida ia haere. (Gen. 18:22-33; 19:18-21) Danu, lagani 1,500 mai kahana lalonai, Iehova be Israela taudia edia kara dika ia haheaukalaia.​—⁠Ese. 33:11.

15. Edena dala ai Iesu be lalomanau bona boga-auka ia hahedinaraia?

¹⁵ Iesu danu be “manau” tauna. (Mat. 11:29) Iena hahediba taudia edia manoka karadia ia haheaukalaia. Danu, ia haroro neganai, nega momo tomadiho idia dagedage henia taudia ese idia gwauraia dika. To, ia lalomanau bona boga-auka ela bona ia mase. Hisihisi auna ai hisihisi bada ia mamia noho lalonai, iena Tamana ia noia ia idia hamasea taudia ia gwaudiatao totona, ia gwau: “Idia diba lasi dahaka idia karaia noho.” (Luka 23:34) Ena be Iesu be hisihisi bada ia  mamia, to ia lalomanau bona boga-auka!​—⁠1 Petero 2:21-23 duahia.

16. Edena dala ai lalomanau bona boga-auka ita hahedinaraia diba?

¹⁶ Edena dala ai lalomanau bona boga-auka ita hahedinaraia diba? Paulo ese dala ta ia gwauraia, ia gwau: “Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni. Iehova ese mai kudouna ibounai ida umui ia gwauatao hegeregerena, namona be umui danu be unai bamona do umui karaia.” (Kol. 3:13) Momokani, bema ta ia ura ma ta ena dika ia gwauatao, ia lalomanau bona boga-auka be namo. Unai amo kongrigeisen lalonai lalotamona do ia noho.

17. Dahaka dainai lalomanau bona boga-auka be mai anina bada?

¹⁷ Iehova ia ura mai lalomanau bona boga-auka ida ma haida ita kara henia. Unai kara rua be mai anina bada, bema ita ura nega matamatana ai ita noho. (Mat. 5:5; Iam. 1:21) Ita lalomanau bona boga-auka neganai, Iehova ita hanamoa bona ma haida ita durua danu unai idia karaia totona.​—⁠Gal. 6:1; 2 Tim. 2:24, 25.

18. Ma ta ena toana laloa lasi karana bona lalokau be edena dala ai idia gaukara hebou?

¹⁸ Ita herevalaia kara ibounai amo lalokau be hereadae. Hegeregere, hahediba tauna Iamesi ese iena tadikaka ia sisiba henia, badina idia be taga taudia idia laloa bada to ogogami taudia idia laloa lasi. Ia gwau unai bamona kara ese Dirava ena taravatu ia makohia, ia gwau: “Namona be emu dekena tauna oi lalokau henia, oi sibona oi lalokau henia hegeregerena.” Ma ia gwau: “Bema haida sibona umui kara namo henia noho, umui be umui kara dika.” (Iam. 2:8, 9) Bema taunimanima ita lalokau henia, edia edukeisen, bese, o dagi dainai do ita lalodika henidia lasi. Momokani, namo lasi iseda kara sibona amo ita hahedinaraia ita be ma haida edia toana ita laloa lasi.

19. Dahaka dainai lalokau be dabua bamona ita hahedokilaia be mai anina bada?

¹⁹ “Lalokau be ia boga-auka bona ia hebogahisi” bona “ia hekokoroku lasi.” (1 Kor. 13:4) Namona be ita lalomanau, boga-auka, bona manau, unai amo iseda neiba taudia dekenai Basileia ena sivarai namona ita harorolaia noho diba. (Mat. 28:19) Bema unai bamona kara ita hahedinaraia, iseda tadikaka taihu ibounai ida ita hebamo diba. Unai bamona ita karaia neganai, dahaka do ia vara? Kongrigeisen lalonai lalotamona do ia noho, bona Iehova do ita hanamoa danu. Baibel ese mauri matamatana be inai bamona ia herevalaia: “Unai gaudia sibona lasi, to lalokau be dabua bamona do umui hahedokilaia danu, badina ia be taunimanima ia hatamonaia gauna hereadaena.”​—⁠Kol. 3:14.

20. (a) Sibona dekenai dahaka henanadaia do ita henia, bona dahaka dainai? (b) Dahaka totona ita naria noho?

²⁰ Sibona ita nanadaia, ‘Dahaka lau karaia noho diba, unai amo mauri gunana lau kokia momokani diba?’ Namona be hanaihanai Dirava ena heduru totona ita guriguri, bona ita gaukara goada lalohadai o kara kereredia ita haidaua totona, unai amo Dirava ena Basileia do ita abia. (Gal. 5:19-21) Danu, sibona ita nanadaia, ‘Nega ibounai sibona egu lalona lau hamatamataia, a?’ (Efe. 4:23, 24) Ita be goevadae lasi taudia dainai, namona be ita gaukara goada noho mauri matamata ita badinaia totona. Taunimanima ibounai be do idia goevadae bona mauri matamatana do idia badinaia negana mani oi laloa!