1, 2. (a) Ngatta posible para nittam nga mapeggan tu bagu nga personalidad? (b) Anni ira nga aspeto na bagu nga kata-katolay i nerekord ta Colosas 3:10-14?

TA BIBLIA, mamiddua nga mabibbig tam i ideya nga “bagu nga kata-katolay.” (Efe. 4:24; Col. 3:10) Tukuyanna yaw i personalidad nga “naparo ta kasissinnan na Dios.” Posible nga mapeggan ittam tu kunnatun nga bagu nga personalidad onu kata-katolay. Ngatta? Megafu ta pinaro ni Jehova i totolay ta imahena, yatutta posible gafu nittam nga mepasingan i makakkasta ira nga kualidadna.​—Gen. 1:26, 27; Efe. 5:1.

² Megafu ta kina-imperfekto nga narensia tam ta ollu nga magana tam, afektadu ittam na marake nga pakkaraga. Dakal gapa i influwensia na pallevu tam. Ngem, megafu ta minangngikallo nga uffun ni Jehova, posible para nittam nga mabbalin tu klase na tolay nga kayàna nga pabbalinattam. Tapenu massikan i pakkaraga tam tatun, ikonsidera tam i karuan nga aspeto na bagu nga kata-katolay nga nitura ni Pablo. (Bibbigan i Colosas 3:10-14.)  Ikonsidera tam paga nu kunnasi mepasingan yaw ira nga aspeto ta ministerio tam.

3. Anni i tadday ta aspeto na bagu nga kata-katolay?

³ Kabalin nga pinagaram ittam ni Pablo nga ibaruasi i bagu nga kata-katolay, niyesplikana nga i ari pangireruma ay tadday ta importante nga aspeto natun. Kunna: “Yatun tu awan ngana tu nadduman na Judio anna Hentil, na aripan anna ari nga aripan, na lallaki anna babbay; ta sikamu ngamin ay tattadday gafu ta niketadday nu kani Cristo Jesus.” Ta kongregasion, awan nakuan tu maski sinni nga mannono nga mas atannang yaya megafu ta lahi, nasionalidad, onu estado na pattolay. Ngatta? Megafu ta bilang kurug nga disipulos ni Cristo, “ngamin ay tattadday.”​—Col. 3:11; Gal. 3:28.

4. (a) Kunnasi nakuan tratuan na aripan ira ni Jehova i kataggi-tadday? (b) Anni i posible nga meparubang ta Cristiano nga pattaradday?

⁴ Danuri nangibaruasi tu bagu nga personalidad ay tratuadda tu egga i dignidad na kapangngurugda kunne na gapa i tanakuan, maski anni paga i estado onu lahida. (Roma 2:11) Mariga yaw kuan ta karuan nga nasion. Angngariganna, aru ta Saksi ira ta South Africa i maddian paga laman ta lugar nga niyunnug na gobiernu depende ta lahi​—egga i lugar para ta furaw, egga ta ngisi, anna egga gapa i lugar para ta nadduruma nga lahi. Tapenu mapagaram i wawwaragi nga ‘vukkatan ta mapia i giffutuadda,’ inapruba na Manangngal nga Baggi turi Oktubre 2013 i espesial nga unnug tapenu uffunan i wawwaragi nga makiyammammu ta kataggi-tadday. (2 Cor. 6:13) Anni i nelagum taw?

5, 6. (a) Tapenu mapasikan i pattaradday na totolay na Dios ta tadday nga nasion, anni ira i neyunnug? (Innan i letratu ta gafu na artikulo.) (b) Anni i resultana ira?

⁵ Neyunnug para ta dua nga kongregasion nga madduma i lengguaheda onu lahi nga makkavulu ta karuan ira nga weekend. Navvurulu i wawwaragi ta dua nga kongregasion ta pallayyagayya, pagatende tu study, anna paddibersion ta gibbalayan na kataggi-tadday. Ginatu nga kongregasion i nakiparte, anna nakalawa i panga nga ofisina tu makakkasta ira nga report meyannung taw nga unnug, maski ta ari ira nga Saksi. Angngariganna, nakagi na tadday nga ministro na relihion, “Ari ngà Saksi, ngem makagì nga talaga organisado i pallayyagayyanu, anna egga i pattaraddenu maski nadduruma i lahinu.” Anni i efekto natun nga unnug ta Saksi ira?

⁶ Ta gafu, mappasiran si Noma, tadday nga sister nga maguvovug tu Xhosa ta pagimbita tu furaw nga wawwaragi nga naggafu ta English congregation ta simple nga baleda. Ngem kabalidda nallayyagayya kavulu i furaw ira nga Saksi anna binisita ira ta gibbalayadda, kunna, “Normal lagapa ira nga totolay nga gitta tam!” Yatutta turi ta iskediul ngana na kongregasion na Xhosa nga mamadulo ta English congregation, nallutu yaya anna nagimbita yaya tu bisita. Kasali ta bisitana i tadday nga furaw nga elder. Kinagi ni Noma, “Nakaddag ngà ta okay laman sa nga magitubang ta tadday nga plastik nga case.” Megafu tatun nga tulu-tuloy nga unnug, aru ta wawwaragi i nakaleg tu bagu ira nga kofun anna determinadu ira nga itulu-tuloy nga palawan i pakikkofudda.

7. Ngatta kanayun nakuan nga mangikabbi tam?

⁷ Durante nga ari paga mangultimo i mundo ni Satanas, maka-ekspiriensa tam lagapa tu ziga ira. Meparubattam ta kawan tu trabahu, grabe ira nga taki, pameppersigi, kalamidad, nawawan tu pakkukua megafu ta krimen, onu tanakuan paga nga ziga. Tapenu masuportan i kataggi-tadday ta pazziga-riga onu papproblema, mawag nga  egga i sinsero nga pangikabbi. Makoffun i panageno tu meddu nga pangikabbi tapenu makakua tu kinasippo. (Efe. 4:32) Uffunan ittam danaw nga aspeto na bagu nga personalidad tapenu maparigan i Dios anna makapabannay ta tanakuan.​—2 Cor. 1:3, 4.

8. Anni i makasta nga parresultan na pangipasingattam tu pangikabbi anna kinasippo? Mangiyawa tu angngarigan.

⁸ Kunnasi tam mas makepasingan tu konsiderasion ta dayu ira onu ta makafi ira ta kongregasiottam? Kofunattam nakuan ira anna ipatageno nga mabalor ira nga parte na kongregasion. (1 Cor. 12:22, 25) Innattam i ekspiriensa ni Dannykarl nga taga-Pilipinas nga nagali ta Japan. Ta trabahu, ari tu makasta i tratu sa na lokal ira nga katrabahuna. Tapus, nagatende yaya tu study na Saksi ira ni Jehova. “Maggi Japanese ngamin i egga tari,” kunni Dannykarl, “ngem talaga mapatu i pinangalawada niakan, alle datì ngana ira nga kakilala.” Tulu-tuloy nga naekspiriensana i kinasippo, nga nakoffun sa tapenu mapprogreso ta espiritual. Nabawtisowan yaya, anna masserbi ngana bilang elder. Imammatan na kasi-elder ni Dannykarl yaya anna i atawana, nga si Jennifer, bilang bendision ta kongregasion. Kunna elder ira nira, “Simple laman i pattoleda bilang payunir anna makakkasta i ehemploda ta pamagollu ta Pappatulan.”​—Luc. 12:31.

9, 10. Mangistoria tu bendision ira na pangipasingan tu pangikabbi ta ministerio.

⁹ Nu ilammuyag tam i mensahe na Pappatulan ta tanakuan, egga i tiansa tam nga mangngua “tu mapia ta ngamin nga ikattolay tam.” (Gal. 6:10) Megafu ta pangikabbi ta dayu ira, aru nga Saksi i nappursigi nga maggigiammu tu bagu nga lengguahe. (1 Cor. 9:23) Narresulta yaw tu aru nga bendision. Angngariganna, naggigiammu si sister Tiffany nga taga-Australia tu Swahili tapenu makoffun ta Swahili congregation ta siudad na Brisbane. Maski mariga nga gigiammuan yatun nga lengguahe, mas napeggan tu gakkag i pattolena. Kunna: “Nu kayà mu nga ma-enjoy i ministeriom, bagay niko i foreign-language nga kongregasion. Gittana pabbiahe yatun ngem ariammu kawagan nga panawan i lugar mu. Masissimammu i internasional nga pawwaragi anna masingammu mismu i kappabbaw nga pattaradday natun.”

¹⁰ Ikonsidera i ekspiriensa na tadday nga familia ta Japan. Kunna ana nga babay nga si Sakiko: “Turi dekada 1990, kanayukkami makasimmu ta ministerio tu dayu ira nga Brazilian. Nu bibbigammi nira i teksto ta Portuguese nga Biblia, gittana Nepakannammu 21:3, 4 onu Salmo 37:10, 11, 29, talaga ginnadda anna nu mittan, makatangi paga lagu ira.” Ngem, ari laman tu yatun i kingngua na familiada. “Turi ta nasingammi i  bisidda ta espiritual,” kunni Sakiko, “nigafumi i maggigiammu tu Portuguese.” Turi kua, nakoffun ira ta kepataddag na Portuguese congregation. Ta pappasa na daga-ragun, aru i noffunadda nga dayu nga mabbalin tu aripan ni Jehova. “Daka-dakal nga trabahu i paggigiammu tu Portuguese,” kunna paga ni Sakiko, “ngem mas aru i bendision anne ta sakrifisio. Mappabalo kami kani Jehova.”​—Bibbigan i Kingngua 10:34, 35.

11, 12. (a) Ngatta importante i kapeggan tu mepangngo nga motibo ta pangibaruasi tu bagu nga kata-katolay? (b) Anni i makoffun tapenu kanayun nga mapakalinno ittam?

¹¹ I motibo tam ta pangibaruasi ta bagu nga kata-katolay ay tapenu dayawan si Jehova, ari tu dayawan ittam na totolay. Daddamman nga nattagaruli maski i dati nga perfekto nga naparatu megafu ta nipamavulunna nga mappakatannang. (Ikumpara i Ezekiel 28:17.) Mas paga nga mariga ibita para nittam nga imperfekto nga totolay i ari mepangngo nga kinapakatannang anna tagga na ulu! Ngem, posible lagapa para nittam nga mangibaruasi tu kinapakalinno. Anni i makoffun nittam nga kuan yatun?

¹² Tapenu kanayun nga mapakalinno, mawag nga egga i tiempo tam ta kada aggaw nga nonopan tu mapia nu anni i nabibbig tam ta Biblia. (Deut. 17:18-20) Angngariganna, monag nga nonopan i tuttuddu ni Jesus anna i makasta nga ehemplo ta kinapakalinnona ta passerbi. (Mat. 20:28) Binaggawanna paga i takki na apostolesna. (Juan 13:12-17) Kanayun tam nakuan nga ipakimallo i espiritu na Dios tapenu malabanattam i tendensia nga makatageno nga mas malalaki ittam anne ta tanakuan.​—Gal. 6:3, 4; Fil. 2:3.

13. Anni ira i bendision na pappakalinno?

¹³ Bibbigan i Proverbio 22:4. Mekiddaw i kinapakalinno ta ngamin nga kurug nga maddayarayaw anna marresulta yatun tu aru nga bendision. Makoffun i pappakalinno tapenu mapeggan tu imammo anna pattaradday ta kongregasion. Malawa tam gapa i ari mepangngo nga allo na Dios nu mapakalinno ittam anna paladdan yatun. Kinagi ni apostol Pedro: “Mappakalinno kamu ngamin ta passerbi nu ta kataggi-tadday. Ta kagian na Masanto nga Tura, ‘Ikabatù na Dios i maparayag, ngem ikallo na i minappakalinno.’”​—1 Ped. 5:5.

14. Sinni i kapianan nga ehemplo ta pangipasingan tu kinalumamo anna pappasensia?

¹⁴ Ta maddaggun, mekonsidera nga makafi danuri malumamo anna mapasensia. Ngem ari tu kurug yatun! Naggafu yaw ira nga makakkasta nga kualidad ta pinakamakapangngua nga Persona ta uniberso. Si Jehova nga Dios i kapianan nga ehemplo na pangipasingan tu kinalumamo anna pappasensia. (2 Ped. 3:9) Ikonsidera nu kunnasi yaya simibbag gukaban na anghel turi ta nakkiavu sa da Abraham anni Lot. (Gen. 18:22-33; 19:18-21) Pinasensia gapa ni Jehova i matagga-uluna nga nasion na Israel ta maturu nga 1,500 dagun.​—Eze. 33:11.

15. Anni nga ehemplo i nipasingan ni Jesus meyannung ta kinalumamo anna pappasensia?

¹⁵ “Masippo” si Jesus. (Mat. 11:29) Nangipasingan yaya tu dakal nga pappasensia ta pakkafian ira na disipulosna. Ta interu nga ministeriona ta davvun, inattamman ni Jesus i ari patas nga pakkritika na relihioso ira nga lider. Ngem, malumamo lagapa yaya anna mapasensia maski adde ta ari patas nga kapatena. Durante nga attattammanna i taki na kepato ta estaka, nakimallo si Jesus ta Yamana nga pakoman i nanentensia sa, megafu ta kinagina, “Ariad-da nga ammu i kuad-da!” (Luc. 23:34) Anni mabba kastana nga  ehemplo na kinalumamo anna pappasensia maski ta mataki anna mariga nga situasion!​—Bibbigan i 1 Pedro 2:21-23.

16. Anni i praktikal nga makua tam tapenu mepasingan i kinalumamo anna pappasensia?

¹⁶ Kunnasi tam mepasingan i kinalumamo anna pappasensia? Kunni Pablo ta kapangngurugna ira: “Makkapasa-pasensia anna makkapaka-pakoma kamu nu egga i taki na nono nu ta kataggi-tadday nikamu. Mawag tu makkapaka-pakoma kamu ta kunna nipamakoma na Yafu nikamu.” (Col. 3:13) Wan, kawagan i kinalumamo anna pappasensia ta parte tam tapenu matuttul yatun nga dob. Nu makkapaka-pakoma ittam, mapeggan anna mapattalupaddian i pattaradday na kongregasion.

17. Ngatta importante i kinalumamo anna pappasensia?

¹⁷ Ikikkiddaw ni Jehova nga baruasian na Cristiano ira i baggida tu kinalumamo anna pappasensia. Importante danatun tapenu makapattolay ittam ta napabagu nga mundona. (Mat. 5:5; Sant. 1:21) Mas importante paga, gukaban naw ira nga kualidad, medayaw tam si Jehova anna moffunan i tanakuan nga dayawadda gapa yaya.​—Gal. 6:1; 2 Tim. 2:24, 25.

18. Anni i koneksion na aya anna ari pangireruma?

¹⁸ Ngamin nga kualidad nga nikonsidera tam ay egga i koneksionna ta aya. Angngariganna, mawag tu tabarangngan na disipulo nga si Santiago i wawwaragina kontra ta paffabor ta mariku anne ta pobre. Niyesplikana nga kontra yatun ta dob na Dios: “Ayatam-mu i ikattolem ta kunna pangaya mu ta baggim.” Kunna paga: “Ngem nu mamadduma-ruma kamu, nakaliwa kamu ngana.” (Sant. 2:8, 9) Ngem, paguyuan ittam na aya nga ibita i maski anni nga pangireruma megafu ta edukasion, lahi, onu estado na pattolay. Ariattam nakuan magappappe nga ari ittam mangireruma. Kuru-kurug nakuan nga parte yatun na kata-katoletam.

19. Ngatta importante nga baruasiattam i baggi tam tu aya?

¹⁹ I aya ay “pappasensia anna pagallo” anna “ari tu . . . pappakatannang.” (1 Cor. 13:4) Talaga kawagan i pappasensia, kinasippo, anna kinapakalinno tapenu tulu-tuloy nga melayyagayya i mensahe na Pappatulan ta kasittoletam. (Mat. 28:19) Makoffun yaw ira nga kualidad tapenu makasundu tam ngamin nga wawwaragi ta kongregasion. Anni i bendision ta pangipasingan tu kunnatun nga aya? Marresulta yatun ta nattaradday nga kongregasion nga makedayaw kani Jehova anna maginteres gapa i tanakuan ta kinakurug. Yatutta, eksakto yaw nga kesumario na Biblia ta bagu nga kata-katolay: “Fuera paga taw ira nga gannug, baruasiannu i bagginu tu aya, megafu ta perfekto yatun nga mamattaradday.”​—Col. 3:14, NW.

20. (a) Anni ira i iyavu tam ta baggi tam, anna ngatta? (b) Anni nga makakkasta nga mappange i iinnaggattam?

²⁰ Iyavu nakuan na kataggi-tadday ta baggi tam: ‘Anni paga i makuà tapenu marì anna malaffu ku i dana nga personalidad?’ Mawag nga kanayuttam makimallo para ta uffun na Dios anna mappursigi nga labanan i anni laman nga ugali onu annangngua nga makefugag nittam ta pangirensia ta Pappatulan na Dios. (Gal. 5:19-21) Iyavu tam nakuan gapa, ‘Tulu-tuloy kari nga talibaguakku i appana-panono anna affutu-futù?’ (Efe. 4:23, 24) Ari magimmang i ngamin nga Cristiano ta pangibaruasi anna pamattalupaddian ta bagu nga kata-katolay adde sonu permanente ngana i pangulida. Anni ngana mabba kastana sonu ngamin nga kilala tam ay mangibaruasi tu kina-perfekto gukaban na bagu nga personalidad!