1, 2. (a) Dahaka dainai tau matamatana na baita hahedokilaia diba? (b) Kolose 3:10-14 ai tau matamatana ena kara haida be dahaka?

“TAU matamatana.” Una hereva na nega rua Buka Helaḡa ai e hedinarai. (Efe. 4:24; Kol. 3:10) Tau matamatana baine hahedinaraia tauna na “Dirava heida-idana” eiava Dirava ena kara heḡereḡerena baine kara. Una kara na baita hahedinaraia diba. Dahaka dainai? Badina Iehova ese taunimanima na ia heida-idana ai e karadia, una dainai iena kara namodia na bae hahedinarai diba.​—Gen. 1:26, 27; Efe. 5:1.

² Momokani, tamada sinada ginigunadia edia amo kara dika ta abi dainai, ura dikadia na baita abi dibamu. Danu eda noho dalana ese eda kara baine biagua diba. To, Iehova ena heduru amo, ita na ia ese e uralaiamu tauna ai baita lao dibamu. Ia ese e uralaiamu tauna ai baitala totona, aposetolo Paulo ese lauma helaḡa ena heduru amo e herevalaia tau matamatana ena kara haida baita herevalaimu. (Kolose 3:10-14 ba duahi.) Danu eda haroro ḡaukara ai unu kara baita hahedinarai diba daladia baita herevalaimu.

3. Tau matamatana ena kara ta be dahaka?

³ Paulo ese tau matamatana o mauri matamatana baita hahedokilaia karana e herevalaia murinai, ia ese taunimanima toadia basita lalo karana na e gwauraia tau matamatana ena kara ta. E gwa: “Asi Helene tauna, asi Iuda tauna, e peritomea tauna na lasi, bona se peritomea tauna danu lasi, idau tauna ta lasi, asi Skute tauna, asi hesiai tauna, bona asi ura kwalimu tauna.” * Dahaka dainai kongrigeisen ai bese, tano, eiava dagi daidiai taunimanima na basita hapararadia? Badina Keriso murinai e rakamu taudia korikoridia na bae “tamona.”​—Kol. 3:11; Gal. 3:28.

4. (a) Iehova ena hesiai taudia ese ma haida be ede bae kara henidia toma? (b) Dahaka ese Kristen taudia edia lalotamona karana baine hadikaia diba?

⁴ Tau matamatana e hahedokilaiamu taudia ese edia Kristen tadikakadia bona murimuri taudia na e matauraidiamu, herevana edia mauri dalana eiava edia bese na idau. (Roma 2:11) Tano haida ai una na auka. Heḡereḡere, South Africa ai, Witnes taudia momo na dounu gavamani ese taḡa taudia, kopi korema taudia, bona vara-hanai taudia bae noho gabudia hetoadia e ato gabudia ai e nohomu. Una dainai, tadikaka taihu ese edia ‘lalokau bae habadaia’ totona, October 2013 ai Gavanin Bodi ese dala ta e heḡaeḡaelaia tadikaka taihu bae durudia bae hebamo namonamo totona. (2 Kor. 6:13) Idia be dahaka e kara?

5, 6. (a) Tano ta ai Dirava ena taunimanima edia lalotamona karana bae hagoadaia totona, tadikaka be dahaka e kara? (Rau 22 ai laulau ba itaia.) (b) Una dainai dahaka namo e vara?

⁵ Tadikaka ese dala e kara gado idaudia rua eiava bese idaudia rua edia kongrigeisen na wiken haida lalodiai bae ḡaukara hebou. Unu kongrigeisen tadikakadia bona taihudia na bae haroro hebou, bae hebou tamona, bona ta ta edia ruma ai heabidae karadia bae kara. Kongrigeisen momo ese una dala e badinaia, bona brens ofesi na ripoti namodia momo e abi, murimuri taudia edia amo danu. Heḡereḡere, tomadiho tauna ta na e gwa, “Lau na dia Witnes tauna ta, to baina gwa diba emui haroro ḡaukara na dala namona ai o karaiamu, bona ena be umui na bese idauidau to o lalotamonamu.” Una dala matamatana ese Witnes taudia be ede e durudia toma?

⁶ Xhosa-gado ai e herevamu taihuna ta ladana Noma na matamanai e daradarava ena ruma ai English kongrigeisen tadikakadia baine abidia dae. To kopi kuro Witnes taudia ida e haroro hebou bona edia heabidae karana e moalelaia neganai, ia na e gwa, “Idia danu ita heḡereḡereda!” Una dainai, Xhosa-gado kongrigeisen ese English kongrigeisen e abidia dae neganai, ia na aniani haida e heḡaeḡaelai bona vadivadi haida e boiridia. E boiridia tauna ta na kopi kuro elda ta. Noma na e gwa: “Na hoa badina ia na e ura floa ai e heato plastic crate latanai baine helai.” Una dala matamatana na dounu e badinaiamu dainai, tadikaka bona taihu momo na tura matamatadia e davari bona e uramu una lalokau karana na dounu bae habadaia.

7. Dahaka dainai hebogahisi karana baita hahedinaraia hanaihanai na namo?

⁷ Satana ena tanobada na do se ore dainai, hahetoho na dounu ta davarimu. Heḡereḡere moni ḡaukara lasi, gorere badadia, daḡedaḡe, disasta, henaohenao karadia, bona hekwakwanai ma haida. Eda hisihisi eiava metau lalodiai baita heduru heheni totona, namona na mai eda momokani ida  hebogahisi karana baita hahedinaraia. Hebogahisi karana dainai baita gado namomu. (Efe. 4:32) Unu kara ese be durudamu Dirava baita tohotohoamu bona ma haida tauhalo baita henidiamu.​—2 Kor. 1:3, 4.

8. Kongrigeisen lalonai hebogahisi bona gado namo baita hahedinarai neganai dahaka namo be varamu? Haheitalai ta ba gwauraia.

⁸ Edena dala ai eda kongrigeisen lalonai idau taudia bona ogoḡami taudia baita lalodia bada? Namona na baita hetura henidia bena bae diba kongrigeisen lalonai idia na mai anina bada. (1 Kor. 12:22, 25) Mani Philippines amo ela Japan ai e ha noho tauna, Dannykarl, enai e vara ḡauna aita laloa. Ena ḡaukara gabunai, asie kara namo heniava. Nega ta Iehova ena Witnes taudia edia hebou ta ela. Dannykarl na e gwa: “Kahirakahira hebou ela taudia iboudiai na Japan taudia, to idia ese lau na e abigu dae, vaitani idaunegai na dibadia taudia.” Tadikaka ese dounu e kara namo heniava dainai, ia na lauma dalanai e goada. E bapatiso, bona hari ia na elda ta. Bamona eldadia ese ia adavana ida na e gwauraidiamu hahenamo ta kongrigeisen ai. Elda ese idia na ini e herevalaidia toma, “Idia na painia taudia bona ḡau momo na asie tahumu, bona idia na haheitalai namona badina Basileia e atoa gunamu.”​—Luka 12:31.

9, 10. Haroro ḡaukara ai hebogahisi baita hahedinaraia karana amo bae vara hahenamona ta a gwauraia.

⁹ Basileia sivaraina ta harorolaiamu neganai, ita na “taunimanima iboudiai” ta kara namo henidiamu. (Gal. 6:10) Witnes taudia ese idau tano amo ema taudia ediai hebogahisi karana bae hahedinaraia totona, idia momo na gado matamatana ta e dibaiamu. (1 Kor. 9:23) Una ese hahenamo momo e havara. Heḡereḡere, Australia ai painia taihu ta ladana Tiffany, na Swahili gado e diba unu amo Brisbane ai Swahili gado kongrigeisen ta baine durua. Ena be ienai una gado idibana na mai hekwarahina, to ena mauri lalonai hahenamo momo e abi. Ia na e gwa: “Bema o uramu hesiai ḡaukara ba moalelaia, namona na idau-gado kongrigeisen ta baola. Oi na vaitani hanua idauna ta ola to emu hanua na so rakatania. Tanobada heḡeḡemadai tadikaka oreana edia lalotamona karana bo mamiamu.”

¹⁰ Danu, mani Japan ai ruma bese ta aita laloa. Natudia kekenina ladana, Sakiko, na ini e gwa toma: “Laḡani 1990 lalodiai, nega momo haroro ḡaukara ai Brazil amo ema taudia a davaridiava. Portuguese Baibul amo siri haida, heḡereḡere Apokalupo 21:3, 4 bona Salamo 37:10, 11, 29, a hahedinaraiva neganai, e kamonai namonamova bona nega haida na e taiva.” To una ruma bese ese edia hebogahisi karana na dounu e  hahedinaraia. Sakiko na ma e gwa: “A itaia idia na lauma dalanai e hitolova dainai, ai iboumai ai na Portuguese gado a dibaia matama.” Gabeai, una ruma bese na Portuguese-gado kongrigeisen ta e hamatamaia. Laḡani momo lalodiai, una ruma bese ese idau tano amo ema taudia momo e durudia Iehova bae hesiai henia totona. Sakiko na ma e gwa: “Ena be a hekwarahiva Portuguese gado baia diba, to abi hahenamodia ese emai hekwarahi na e hahanaia. Iehova a tenkiu heniamu.”​—Kara 10:34, 35 ba duahi.

11, 12. (a) Dahaka dainai tau matamatana ta hahedokilaiamu neganai lalohadai maorona baita abia na ḡau badana? (b) Dahaka ese baine duruda baita manau?

¹¹ Tau matamatana baita hahedokilaia badina na Iehova baita imodaia, dia taunimanima ese ita bae imodaida. Baita helalotao, guna aneru ḡoevadaena ta na e hekokoroku dainai e kara dika. (Esekiel 28:17 ba itaia.) Una dainai, ita kara dika tauda ese hekokoroku bona heaḡi karadia baita dadarai na mai hekwarahina. To, manau karana na baita hahedinaraia diba. Dahaka ese baine duruda manau karana baita hahedinaraia?

¹² Baita manau totona, namona na dina ta ta ai nega baita ato Dirava ena Hereva baita duahia bona baita laloa dobu. (Deu. 17:18-20) Ita baine duruda kahana ta na, Iesu ena hahediba herevadia bona ena manau karadia baita lalodia. (Mat. 20:28) Iesu na ena aposetolo aedia danu e huri. (Ioa. 13:12-17) Danu, namona na Dirava ena lauma helaḡa baita noia unu amo heaḡi mamina baita dadaraia diba.​—Gal. 6:3, 4; Fili. 2:3.

13. Manau karana ena hahenamo be dahaka?

¹³ Hereva Lada-isidia 22:4 ba duahia. Tomadiho momokani e badinaiamu taudia iboudiai ese manau karana bae hahedinaraia, bona una kara na mai ena hahenamo. Manau karana ese be durudamu kongrigeisen ai maino bona lalotamona baita havaraiamu. Bona manau karana baita habadaiamu bona baita hagoadaiamu neganai Dirava ena hebogahisi baita abiamu. Aposetolo Petro na e gwa: “Iboumui ai, lalo-manau ba hahedokilaia; badina be Dirava ese hekokoroku taudia e laodia ahumu, a manau taudia e harihari henidiamu.”​—1 Pet. 5:5.

14. Manada bona haheauka ihahedinaraina karana ai daika be haheitalai namona?

¹⁴ Hari ina negai, taunimanima ese manada bona haheauka karana na asie laloa badamu. Una na dia maoro! Unu kara namodia na siahu idoinai Diravana ese e havaradia karadia. Manada bona haheauka ihahedinaraina karana ai Iehova Dirava na haheitalai namona. (2 Pet. 3:9) Aneru edia amo Abraham bona Lot edia henanadai e haerelaia dalana mani a laloa. (Gen. 18:22-33; 19:18-21) Danu, laḡani 1,500 mai kahana ai, Iehova ese Israel besena edia gwau-edeede karana na e haheaukalaia.​—Ese. 33:11.

15. Iesu ese manada bona haheauka be ede e hahedinaraia toma?

¹⁵ Iesu na “manada” o manau tauna. (Mat. 11:29) Ia ese ena hahediba edia kerere na e haheaukalaidia. Tanobada ai ena hesiai ḡaukara ibounai lalonai, Iesu ese tomadiho taudia edia hegwau heni herevadia bona daḡedaḡe karadia e haheaukalai. To, ia na e haheauka bona e manau ela bona e mase. Hisihisi auna ai e hahisia bada herea neganai, Tamana e noia e hahisiava taudia edia dika baine gwautao badina idia ese e karaia “karana na asi dibadia.” (Luka 23:34) Hisihisi bona metau negadiai, Iesu ese manada bona haheauka karadia  e hahedinarai na haheitalai hereadaena!​—1 Petro 2:21-23 ba duahi.

16. Edena dala ai manada bona haheauka baita hahedinaraia diba?

¹⁶ Ita ese manada bona haheauka be ede baita hahedinarai toma? Paulo ese tadikakana e tore henidia neganai una baita hahedinaraia dalana ta e herevalaia: “Ba haheauka heheni. Ta ese bamona baine habadelaia negana ai, emui dika ba hegwau tao heheni; Lohiabada ese emui dika vada e gwau tao; umui danu unu ba kara toma.” (Kol. 3:13) Momokani, manada bona haheauka ese baine duruda una haheḡani baita badinaia. To dika baita gwautao karana ese kongrigeisen lalonai lalotamona baine havaraia diba.

17. Dahaka dainai manada bona haheauka karana na mai anidia bada?

¹⁷ Namona na Kristen taudia ese manada bona haheauka karana bae hahedokilaia. Unu kara na mai anidia bada hahemauri baita abia totona. (Mat. 5:5; Iak. 1:21) Unu kara baita hahedinaraimu neganai, ita ese Iehova baita hanamoamu bona ma haida baita durudiamu Baibul ena sisiba bae badinaia.​—Gal. 6:1; 2 Tim. 2:24, 25.

18. Edena dala ai lalokau baita hahedinaraiamu neganai taunimanima toadia danu basita lalomu?

¹⁸ Tame herevalai karadia iboudiai na lalokau dainai be varamu. Heḡereḡere, hahediba tauna Iakobo ese tadikakana e sisiba henidia badina taḡa taudia e lalodia bada, a ogoḡami taudia be e lalodia maraḡi. Ia ese e hahedinaraia una kara ese taravatu badana na e utuamu, e gwaumu: “Dekemu tauna ba lalokau henia, sibomu o helalokaumu heḡereḡerena. . . . A taunimanima oromadia ba lalo, vada ba kara dika.” (Iak. 2:8, 9) To, lalokau dainai taunimanima edia edukeisen, edia bese, bona edia dagi na basita lalomu. Momokani, mai kudouda ibounai ida taunimanima toadia basita lalo na ḡau badana. Namona na una na iseda kara ai bainela.

19. Dahaka dainai lalokau baita hahedokilaia na mai anina bada?

¹⁹ Danu, lalokau na “e haheauka taritarimu” bona “se hekokorokumu.” (1 Kor. 13:4) Basileia sivaraina na dekeda taudia baita harorolai henidia totona, namona na hanaihanai baita haheauka, baita kara namo, bona baita manau. (Mat. 28:19) Unu kara ese be durudamu kongrigeisen ai tadikaka taihu iboudiai ida baita hebamo namonamomu. Una lalokau baita hahedinaraiamu ena namo be dahaka? Una ese kongrigeisen ena lalotamona baine havaraia bona Iehova baita hanamoamu, danu una ese ma haida baine veridia diba hereva momokani ai bae vareai. Una dainai, Baibul ese tau matamatana baita hahedokilaia karana na ini e herevalaia toma: “Unu ḡau iboudiai latadiai, lalokau ba hahedokilaia; ia na ihatamonada ḡauna herea-daena.”​—Kol. 3:14.

20. (a) Ededia henanadai be siboda ese baita heni, bona dahaka dainai? (b) Mai moaleda ida edena nega ta nariamu?

²⁰ Namona na siboda baita henanadai, “Dahaka ma baina kara diba tau gunana baina dokia oho bona baina negea vaitani totona?’ Namona na hanaihanai Dirava ena heduru baita noia, bona baita ḡaukara goada Dirava ena Basileia iabina dalana bae kou karadia baita dadarai. (Gal. 5:19-21) Danu namona na baita henanadai, ‘Daragu o egu lalohadai baina hamatamataia loulou be namo, eiava?’ (Efe. 4:23, 24) Kristen taudia ese tau matamatana bae hahedokilaia bona basie kokia karana na bae karaia hanaihanai ela bona bae manadalaia. Mani a laloa, ita iboudai ese tau matamatana baita hahedokilaiamu neganai, mauri na be namo hereamu!