စရိုက်သစ် ဝတ်ဆင်ထားနိုင်ပုံ
“စရိုက်သစ်ကို ဝတ်ဆင်ကြပါ။”—ကော. ၃:၁၀။
၁၊ ၂။ (က) စရိုက်သစ်ကို ဘာကြောင့် ဝတ်ဆင်နိုင်သလဲ။ (ခ) ဘယ်စရိုက်သစ်တွေကို ကောလောသဲ ၃:၁၀-၁၄ မှာ မှတ်တမ်းတင်ထားသလဲ။
“စရိုက်သစ်။” ကမ္ဘာသစ် ဘာသာပြန်ကျမ်းမှာ ဒီအသုံးအနှုန်း နှစ်ကြိမ် တွေ့ရတယ်။ (ဧ. ၄:၂၄။ ကော. ၃:၁၀) “အလိုတော်အတိုင်း ဘုရားသခင် ဖန်ဆင်းတဲ့” စရိုက်ကို ဆိုလိုတယ်။ စရိုက်သစ်ကို ပျိုးထောင်နိုင်ပါတယ်။ ဘာကြောင့်လဲ။ ယေဟောဝါက လူသားတွေကို မိမိပုံသဏ္ဌာန်အတိုင်း ဖန်ဆင်းထားတဲ့အတွက် ဘုရားသခင့် အရည်အသွေးတွေကို တင်ပြနိုင်လို့ပါပဲ။—က. ၁:၂၆၊ ၂၇။ ဧ. ၅:၁။
၂ ကနဦး မိဘတွေဆီက အမွေရထားတဲ့ မစုံလင်မှုကြောင့် ကျွန်တော်တို့မှာ မှားယွင်းတဲ့ ဆန္ဒတွေ ကိန်းအောင်းနေတယ်။ ပတ်ဝန်းကျင်ရဲ့ ဩဇာလွှမ်းမိုးမှုလည်း ခံရတယ်။ ဒါပေမဲ့ ယေဟောဝါရဲ့ မေတ္တာပါ ကူညီမှုကြောင့် ကိုယ်တော် ဖြစ်စေချင်တဲ့ လူစားမျိုး ဖြစ်နိုင်ပါတယ်။ အဲဒီပန်းတိုင်ကို ရောက်နိုင်ဖို့ တမန်တော်ပေါလု ရေးသားခဲ့တဲ့ စရိုက်သစ်တချို့အကြောင်း ဆွေးနွေးသုံးသပ်ကြရအောင်။ (ကောလောသဲ ၃:၁၀-၁၄ ကိုဖတ်ပါ။) အမှုဆောင်လုပ်ငန်းမှာ တင်ပြနိုင်ပုံကိုလည်း ဆွေးနွေးသုံးသပ်ပါမယ်။
“တစ်စိတ်တစ်ဝမ်းတည်း”
၃။ စရိုက်သစ်ရဲ့ လက္ခဏာတစ်ခုက ဘာလဲ။
၃ စရိုက်သစ်ကို ဝတ်ဆင်ဖို့ တိုက်တွန်းပြီးနောက် ပေါလုက မျက်နှာမလိုက်ခြင်းကို စရိုက်သစ်ရဲ့ အဓိကလက္ခဏာအဖြစ် ဖော်ပြခဲ့တယ်။ ‘ဂျူးလူမျိုး၊ ဂရိလူမျိုး၊ အရေဖျား ဖြတ်ထားသူ၊ အရေဖျား မဖြတ်ထားသူ၊ တိုင်းတစ်ပါးသား၊ သကုသိလူ၊ အစေခံကျွန်၊ လွတ်လပ်သူဆိုပြီး မရှိဘူး’ လို့ ပေါလု ပြောတယ်။ * အသင်းတော်မှာ လူမျိုး၊ နိုင်ငံ၊ လူမှုအဆင့်အတန်း ခွဲခြားမှု ဘာကြောင့် မရှိသင့်သလဲ။ ခရစ်တော်ရဲ့ နောက်လိုက်စစ်အားလုံး “တစ်စိတ်တစ်ဝမ်းတည်း ဖြစ်” ကြလို့ပဲ။—ကော. ၃:၁၁။ ဂလ. ၃:၂၈။
၄။ (က) ယေဟောဝါရဲ့ ကျေးကျွန်တွေက တခြားသူတွေကို ဘယ်လို ဆက်ဆံကြသလဲ။ (ခ) ဘယ်အခြေအနေက ခရစ်ယာန် စည်းလုံးမှုကို အတားအဆီး ဖြစ်စေနိုင်သလဲ။
၄ စရိုက်သစ် ဝတ်ဆင်သူတွေဟာ ယုံကြည်သူချင်းတွေ၊ အပြင်လူတွေကို လူမှုရေး၊ လူမျိုးရေး နောက်ခံ ဘယ်လိုပဲရှိရှိ သိက္ခာရှိရှိ ဆက်ဆံကြတယ်။ (ရော. ၂:၁၁) အဲဒီလို ဆက်ဆံဖို့ ကမ္ဘာ့ဒေသတချို့မှာ ခက်ခဲနိုင်တယ်။ ဥပမာ၊ တောင်အာဖရိကမှာ သက်သေခံအများစုဟာ လူမျိုးစုအလိုက် ခွဲခြားထားတဲ့ ဒေသတွေမှာ နေထိုင်ကြတယ်။ ချမ်းသာတဲ့ရပ်ကွက်၊ လူမည်းမြို့၊ ရောနှောနေထိုင်တဲ့ဒေသတွေမှာပေါ့။ ဒါကြောင့် ၂၀၁၃၊ အောက်တိုဘာလမှာ အုပ်ချုပ်ရေးအဖွဲ့က “နှလုံးသားကို ကျယ်ကျယ် ဖွင့်” နိုင်အောင်၊ အချင်းချင်း သိကျွမ်းလာနိုင်အောင် ကူညီပေးမယ့် အထူးအစီအစဉ်တစ်ခုကို ခွင့်ပြုခဲ့တယ်။ (၂ ကော. ၆:၁၃၊ အောက်ခြေမှတ်ချက်) ဘာတွေ ပါဝင်သလဲ။
၅၊ ၆။ (က) နိုင်ငံတစ်ခုမှာ ဘုရားသခင့် လူမျိုးရဲ့ စည်းလုံးမှု တိုးများစေဖို့ ဘာအစီအစဉ်တွေ လုပ်ခဲ့သလဲ။ (ဆောင်းပါးအစမှာပါတဲ့ ရုပ်ပုံကို ကြည့်ပါ။) (ခ) ဘာရလဒ်တွေ ရရှိခဲ့သလဲ။
၅ ဘာသာစကား၊ လူမျိုး မတူတဲ့ အသင်းတော်နှစ်ခု စနေ၊ တနင်္ဂနွေနေ့တွေမှာ စုဆုံပေါင်းသင်းဖို့ အစီအစဉ်တွေ ပြုလုပ်ပေးတယ်။ အသင်းတော်နှစ်ခုစလုံးက ညီအစ်ကို/မတွေဟာ အတူဟောပြော၊ အတူစည်းဝေးပြီး အိမ်တွေမှာ အပြန်အလှန် ဧည့်ဝတ်ပြုကြတယ်။ အစီအစဉ်မှာ အသင်းတော် ရာပေါင်းများစွာ ပါဝင်ခဲ့တယ်။ ဌာနခွဲရုံးက အပြင်လူတွေဆီကနေတောင် မှတ်ချက်ကောင်းတွေ ရရှိခဲ့တယ်။ ဥပမာ၊ ဘာသာရေးခေါင်းဆောင်တစ်ယောက်က “ကျွန်တော် သက်သေခံ မဟုတ်ပါဘူး။ ဒါပေမဲ့ ဟောပြောခြင်းလုပ်ငန်းကို ခင်ဗျားတို့ ကောင်းကောင်း ဖွဲ့စည်းထားပြီး လူမျိုးရေးစည်းလုံးမှု ရှိတယ်လို့ ပြောရမယ်” ဆိုပြီး ပြောတယ်။ အစီအစဉ်က သက်သေခံတွေအပေါ် ဘယ်လို အကျိုးသက်ရောက်ခဲ့သလဲ။
၆ ဇိုဆာစကားပြော ညီအစ်မ နိုမာဟာ အင်္ဂလိပ်စကားပြော အသင်းတော်က လူဖြူညီအစ်ကိုတွေကို သူ့ရဲ့အိမ်လေးဆီ ဖိတ်ဖို့ အစပိုင်းမှာ ခပ်လန့်လန့်ပဲ။ ဒါပေမဲ့ လူဖြူသက်သေခံတွေနဲ့အတူ ဟောပြောခြင်းလုပ်ငန်းမှာ ပါဝင်ပြီး သူတို့အိမ်တွေမှာ လည်ပတ်ပေါင်းသင်းပြီးနောက်မှာတော့ “သူတို့လည်း ကျွန်မတို့လို သာမန်လူတွေပါပဲ” လို့ပြောတယ်။ ဒါနဲ့ အင်္ဂလိပ် စကားပြော အသင်းတော်ကို ဇိုဆာစကားပြော အသင်းတော်က ဧည့်ခံရမယ့်အလှည့် ရောက်လာတဲ့အခါ နိုမာက ဧည့်သည်တချို့ကို ထမင်းစား ဖိတ်လိုက်တယ်။ ဧည့်သည်တွေထဲမှာ လူဖြူအကြီးအကဲတစ်ယောက်လည်း ပါတယ်။ “ပလတ်စတစ်ခုံပုလေးမှာ ဝင်ထိုင်လို့ အံ့ဩမိတယ်” လို့ နိုမာ ပြောတယ်။ ဒီအစီအစဉ်ကြောင့် ညီအစ်ကို/မများစွာဟာ မိတ်ဆွေသစ်တွေ ရလာပြီး ဆက်ပေါင်းသင်းဖို့ ဆုံးဖြတ်ထားကြတယ်။
“ချစ်ခင်စာနာခြင်း၊ ကြင်နာခြင်း”
၇။ စာနာမှုရှိဖို့ ဘာကြောင့် အမြဲလိုအပ်သလဲ။
၇ စာတန့်လောက အဆုံးမတိုင်ခင်အထိ စမ်းသပ်မှုတွေ ကြုံနေရဦးမှာပါပဲ။ အလုပ်လက်မဲ့ဖြစ်မှု၊ အသည်းအသန် ဖျားနာမှု၊ နှိပ်စက်ညှဉ်းပန်းမှု၊ သဘာဝဘေး၊ တခြားအခက်အခဲတွေ ကြုံရပြီး ရာဇဝတ်မှုကြောင့် ပိုင်ဆိုင်ရာတွေ ဆုံးၡုံးကြရတယ်။ ဒုက္ခရောက်ချိန်မှာ အချင်းချင်း ထောက်မနိုင်ဖို့ စစ်မှန်တဲ့ ထောက်ထားစာနာမှု လိုတယ်။ စာနာမှုရှိရင် သနားကြင်နာမှုပါတဲ့လုပ်ရပ်တွေ ဧ. ၄:၃၂) ဒီစရိုက်သစ်တွေက ဘုရားသခင်ကို တုပဖို့၊ တခြားသူတွေကို နှစ်သိမ့်ဖို့ ကူညီပေးပါလိမ့်မယ်။—၂ ကော. ၁:၃၊ ၄။
လုပ်ဆောင်ပါလိမ့်မယ်။ (၈။ အသင်းတော်မှာ ရှိသူအားလုံးကို စာနာမှု၊ သနားကြင်နာမှု ပြခြင်းက ဘာကောင်းကျိုးတွေ ရရှိစေသလဲ။ ဥပမာပေးပါ။
၈ အသင်းတော်မှာရှိတဲ့ နိုင်ငံခြားသားတွေ၊ အခြေအနေမလှသူတွေကို ထောက်ထားစာနာမှု ဘယ်လို ပြနိုင်သလဲ။ သူတို့နဲ့ မိတ်ဖွဲ့ဖို့၊ အသင်းတော်မှာ အရေးပါတယ်လို့ ခံစားရစေဖို့ လိုတယ်။ (၁ ကော. ၁၂:၂၂၊ ၂၅) ဖိလစ်ပိုင်ကနေ ဂျပန်ကို ပြောင်းရွှေ့သွားတဲ့ ဒန်နီကားလ်အကြောင်း သုံးသပ်ကြည့်ပါ။ အလုပ်မှာ ဒေသခံအလုပ်သမားတွေလို ကောင်းကောင်း ဆက်ဆံမခံရဘူး။ နောက်ပိုင်း ယေဟောဝါသက်သေတွေရဲ့ အစည်းအဝေးကို သွားတက်တယ်။ “တက်ရောက်သူအများစုက ဂျပန်လူမျိုး ဖြစ်ပေမဲ့ ကျွန်တော့်ကို မိတ်ဟောင်းဆွေဟောင်းလို လှိုက်လှိုက်လှဲလှဲ ကြိုဆိုကြတယ်” လို့ပြောတယ်။ သူ့အပေါ် ပြသတဲ့ သနားကြင်နာမှုကြောင့် ဘုရားရေးရာဘက်မှာ တိုးတက်လာတယ်။ နှစ်ခြင်းခံပြီး အခု အကြီးအကဲအဖြစ် အမှုဆောင်နေတယ်။ လုပ်ဖော်ဆောင်ဖက် အကြီးအကဲတွေက ဒန်နီကားလ်နဲ့ ဇနီး ဂျနီဖာတို့ကို အသင်းတော်အတွက် ကောင်းချီးအဖြစ် ယူမှတ်ကြတယ်။ “ရှေ့ဆောင်တွေအဖြစ် ရိုးရိုးရှင်းရှင်း နေထိုင်ပြီး ဘုရားနိုင်ငံတော်ကို ဦးစားထားရာမှာ ပုံသက်သေကောင်း ပြကြတယ်” လို့ အကြီးအကဲတွေ ပြောတယ်။—လု. ၁၂:၃၁။
၉၊ ၁၀။ အမှုဆောင်လုပ်ငန်းမှာ စာနာမှုပြခြင်းကနေ ရရှိတဲ့ ကောင်းချီးတွေအကြောင်း ဥပမာပေးပါ။
၉ တခြားသူတွေကို နိုင်ငံတော်သတင်း ဟောပြောတဲ့အခါ “လူတိုင်းကို ကောင်းမှုပြု” ဖို့ အခွင့်အရေး ရရှိကြတယ်။ (ဂလ. ၆:၁၀) ပြောင်းရွှေ့လာသူတွေကို သနားစာနာတဲ့အတွက် သက်သေခံများစွာဟာ ဘာသာစကားအသစ် သင်ယူကြတယ်။ (၁ ကော. ၉:၂၃) ဒါကြောင့် ကောင်းချီးများစွာ ရရှိနေကြတယ်။ ဥပမာ၊ ဩစတြေးလျနိုင်ငံက ရှေ့ဆောင်ညီအစ်မ တစ်ဖနီက ဘရစ္စဘိန်းမြို့မှာရှိတဲ့ ဆွာဟီလီ အသင်းတော်ကို ကူညီပေးနိုင်ဖို့ ဆွာဟီလီ ဘာသာစကား သင်ယူခဲ့တယ်။ သင်ယူရတာ ခက်ပေမဲ့ တစ်ဖနီ ကောင်းချီးတွေ ခံစားရတယ်။ “အမှုဆောင်လုပ်ငန်းမှာ ပျော်ချင်တယ်ဆိုရင် ဘာသာခြားစကားပြော အသင်းတော်မှာ အမှုဆောင်ပါ။ ကိုယ့်နေရပ်က မခွာဘဲ ခရီးသွားနေရသလိုပဲ။ ကမ္ဘာချီညီအစ်ကို အသင်းအပင်းနဲ့ အံ့ဖွယ်စည်းလုံးမှုကို ကိုယ်တွေ့ကြုံရပါလိမ့်မယ်” လို့ပြောတယ်။
ပြောင်းရွှေ့လာသူတွေကို ကူညီပေးဖို့ ခရစ်ယာန်တွေကို ဘာက လှုံ့ဆော်ပေးသလဲ (အပိုဒ် ၁၀ ကိုကြည့်ပါ)
၁၀ ဂျပန်နိုင်ငံက မိသားစုအကြောင်းလည်း စဉ်းစားကြည့်ပါ။ သမီးဖြစ်သူ ဆာကီကို ပြောပြတယ်– “၁၉၉၀ ပြည့်လွန်နှစ်တွေတုန်းက အမှုဆောင်ထွက်တဲ့အခါ ဘရာဇီးလူမျိုး ပြောင်းရွှေ့ဝင်လာသူတွေကို တွေ့ရလေ့ရှိတယ်။ ဗျာဒိတ် ၂၁:၃၊ ၄၊ ဆာလံ ၃၇:၁၀၊ ၁၁၊ ၂၉ စတဲ့ ကျမ်းချက်တွေကို ပေါ်တူဂီကျမ်းစာကနေ ဖတ်ပြတဲ့အခါ သူတို့ အာရုံစိုက်နားထောင်ပြီး တစ်ခါတလေ မျက်ရည် ကျကြတယ်။” ဒါပေမဲ့ ဒီမိသားစုရဲ့ စာနာမှု ဒီလောက်နဲ့ပဲ ရပ်မသွားဘူး။ “ကျမ်းစာအကြောင်းအရာတွေ ဆာငတ်နေတာကို တွေ့တဲ့အခါ မိသားစုလိုက် ပေါ်တူဂီစကား သင်ယူကြတယ်” လို့ ဆာကီကို ပြောတယ်။ နောက်ပိုင်း ပေါ်တူဂီစကားပြော အသင်းတော် တည်ထောင်ဖို့ ကူညီပေးခဲ့ကြတယ်။ နှစ်တွေတစ်လျှောက် ပြောင်းရွှေ့လာသူများစွာကို ယေဟောဝါရဲ့ ကျေးကျွန်တွေ ဖြစ်လာအောင် ကူညီပေးခဲ့ကြတယ်။ “ပေါ်တူဂီစကား သင်ယူဖို့ တော်တော် ကြိုးစားရတယ်။ ဒါပေမဲ့ ပင်ပန်းတာထက် ကောင်းချီးတွေက ပိုပါတယ်။ ယေဟောဝါကို ကျေးဇူးတင်လိုက်တာ” လို့ ဆာကီကို ပြောတယ်။—တမန်တော် ၁၀:၃၄၊ ၃၅ ကိုဖတ်ပါ။
‘စိတ်နှိမ့်ချခြင်းကို ဝတ်ဆင်ပါ’
၁၁၊ ၁၂။ (က) စရိုက်သစ်ကို ဝတ်ဆင်ရာမှာ ရည်ရွယ်ချက် မှန်ဖို့ ဘာကြောင့် အရေးကြီးသလဲ။ (ခ) နှိမ့်ချနေဖို့ ဘာက ကူညီပေးမလဲ။
၁၁ စရိုက်သစ် ဝတ်ဆင်ရတဲ့ ရည်ရွယ်ချက်က လူချီးမွမ်းခံရဖို့ မဟုတ်ဘဲ ယေဟောဝါကို ဂုဏ်တင်ဖို့ ဖြစ်ရမယ်။ တစ်ချိန်က စုံလင်တဲ့ နာမ်ဝိညာဉ် သတ္တဝါဟာ မာနကြီးလာလို့ အပြစ်လုပ်ခဲ့တာ သတိရပါ။ (ယေဇကျေလ ၂၈:၁၇ နဲ့နှိုင်းယှဉ်ပါ။) အပြစ်ရှိတဲ့ လူသားတွေအနေနဲ့ မသင့်လျော်တဲ့မာနကို ရှောင်ဖို့ ပိုခက်တယ်။ ဒါပေမဲ့ နှိမ့်ချမှုကို ဝတ်ဆင်နိုင်ပါတယ်။ ဘာက ကူညီပေးမလဲ။
၁၂ နှိမ့်ချနေဖို့ဆိုရင် နေ့တိုင်း ကျမ်းစာ ဖတ်ပြီး တွေးတောဆင်ခြင်ဖို့ အချိန်ပေးရမယ်။ (တရား. ၁၇:၁၈-၂၀) အထူးသဖြင့် ယေရှုရဲ့ သွန်သင်ချက်တွေ၊ နှိမ့်ချမှုပုံသက်သေအကြောင်း တွေးတောရမယ်။ (မ. ၂၀:၂၈) ယေရှုဟာ တမန်တော်တွေရဲ့ ခြေကိုတောင် ဆေးပေးခဲ့တယ်။ (ယော. ၁၃:၁၂-၁၇) ကျွန်တော်တို့လည်း တခြားသူတွေထက် သာတယ်ဆိုတဲ့ သဘောထားကို တိုက်လှန်နိုင်အောင် ဘုရားသခင့် စွမ်းအားတော်ရဖို့ မကြာခဏ ဆုတောင်းရမယ်။—ဂလ. ၆:၃၊ ၄။ ဖိ. ၂:၃။
၁၃။ နှိမ့်ချမှုကြောင့် ဘာကောင်းကျိုးတွေ ရသလဲ။
၁၃ ပညာအလိမ္မာ ၂၂:၄ ကိုဖတ်ပါ။ ခရစ်ယာန်စစ်အားလုံး နှိမ့်ချမှု ရှိရမယ်။ နှိမ့်ချမှုက ကောင်းကျိုးများစွာ ရရှိစေတယ်။ အသင်းတော်မှာ ငြိမ်သက်စည်းလုံးမှု တိုးများစေမယ်။ နှိမ့်ချမှုကို မွေးမြူခိုင်မာစေခြင်းက ဘုရားသခင့် မဟာကရုဏာ ခံစားရစေပါလိမ့်မယ်။ “ခင်ဗျားတို့အားလုံး အချင်းချင်း ဆက်ဆံတဲ့အခါ စိတ်နှိမ့်ချပါ။ ဘာလို့လဲဆိုတော့ ဘုရားသခင်က မောက်မာသူတွေကို ဆန့်ကျင်ပြီး စိတ်နှိမ့်ချသူတွေကို မဟာကရုဏာ ပေးသနားလို့ပဲ” လို့ တမန်တော် ပေတရု ပြောတယ်။—၁ ပေ. ၅:၅။
‘နူးညံ့သိမ်မွေ့ခြင်း၊ စိတ်ရှည်ခြင်းတို့ကို ဝတ်ဆင်ပါ’
၁၄။ နူးညံ့သိမ်မွေ့ခြင်း၊ စိတ်ရှည်ခြင်း တင်ပြရာမှာ ဘယ်သူက အကောင်းဆုံး ပုံသက်သေ ဖြစ်သလဲ။
၁၄ ဒီနေ့ လောကမှာ နူးညံ့သိမ်မွေ့သူ၊ စိတ်ရှည်သူကို ပျော့ညံ့သူလို့ ယူမှတ်လေ့ရှိကြတယ်။ မှားလိုက်လေခြင်း။ တကယ်တော့ ဒီအရည်အသွေးကောင်းတွေဟာ စကြဝဠာမှာ တန်ခိုးအကြီးဆုံးအရှင်ဆီကနေ အရင်းခံတယ်။ ယေဟောဝါဘုရားဟာ နူးညံ့သိမ်မွေ့၊ စိတ်ရှည်ရာမှာ အကောင်းဆုံး ပုံသက်သေဖြစ်တယ်။ (၂ ပေ. ၃:၉) အာဗြဟံနဲ့ လောတ မေးခွန်းထုတ်ချိန်မှာ ကောင်းကင်တမန်တွေအားဖြင့် ဘုရားသခင် တုံ့ပြန်ပုံကို စဉ်းစားကြည့်ပါ။ (က. ၁၈:၂၂-၃၃။ ၁၉:၁၈-၂၁) လမ်းလွဲနေတဲ့ အစ္စရေးလူမျိုးကို နှစ်ပေါင်း ၁,၅၀၀ ကျော် ယေဟောဝါ သည်းခံခဲ့တယ်။—ယေဇ. ၃၃:၁၁။
၁၅။ နူးညံ့သိမ်မွေ့ခြင်း၊ စိတ်ရှည်ခြင်း တင်ပြရာမှာ ယေရှု ဘာပုံသက်သေ ချမှတ်ခဲ့သလဲ။
၁၅ ယေရှုလည်း “နူးညံ့သိမ်မွေ့” တယ်။ (မ. ၁၁:၂၉) နောက်လိုက်တွေရဲ့ အားနည်းချက်တွေကို စိတ်ရှည်သည်းခံခဲ့တယ်။ မြေကြီးပေါ် အမှုဆောင်ချိန်တစ်လျှောက် ဘာသာရေး ဆန့်ကျင်သူတွေရဲ့ မတရားဝေဖန်မှုတွေ ခံရပ်ခဲ့တယ်။ မှားယွင်းစွာ အသတ်ခံရတဲ့အထိ နူးညံ့သိမ်မွေ့၊ စိတ်ရှည်မှု တင်ပြခဲ့တယ်။ “သူတို့ဘာလုပ်နေမှန်း သူတို့မသိကြဘူး” လို့ပြောပြီး ကွပ်မျက်သူတွေကို ခွင့်လွှတ်ပေးဖို့ သစ်တိုင်ပေါ် ဝေဒနာခံနေရချိန်မှာ ဆုတောင်းပေးခဲ့တယ်။ (လု. ၂၃:၃၄) နာကျင်ဖိစီးနေတဲ့ အခြေအနေမှာတောင် နူးညံ့သိမ်မွေ့ စိတ်ရှည်တဲ့၊ ထူးခြားတဲ့ ပုံသက်သေပါပဲ။—၁ ပေတရု ၂:၂၁-၂၃ ကိုဖတ်ပါ။
၁၆။ နူးညံ့သိမ်မွေ့ခြင်း၊ စိတ်ရှည်ခြင်းကို ဘယ်လက်တွေ့ကျနည်းနဲ့ တင်ပြနိုင်သလဲ။
၁၆ နူးညံ့သိမ်မွေ့ခြင်း၊ စိတ်ရှည်ခြင်းကို ကျွန်တော်တို့ ဘယ်လို တင်ပြနိုင်သလဲ။ တစ်နည်းကတော့ “အချင်းချင်း မကျေနပ်စရာ ရှိနေရင်တောင် ဆက်ပြီးသည်းခံကြပါ၊ ကြည်ကြည်ဖြူဖြူ ခွင့်လွှတ်ကြပါ။ ယေဟောဝါက ခင်ဗျားတို့ကို ကြည်ကြည်ဖြူဖြူ ခွင့်လွှတ်သလို ခင်ဗျားတို့လည်း အဲဒီလိုပဲ ခွင့်လွှတ်ကြပါ” လို့ ယုံကြည်သူချင်းတွေကို ပေါလု ပြောခဲ့တယ်။ (ကော. ၃:၁၃) အဲဒီစကားကို ကျွန်တော်တို့ နာခံဖို့ နူးညံ့သိမ်မွေ့ခြင်း၊ စိတ်ရှည်ခြင်း လိုတယ်။ ဒါပေမဲ့ ခွင့်လွှတ်ခြင်းအားဖြင့် အသင်းတော်ရဲ့ စည်းလုံးမှုကို တိုးများစေကြတယ်၊ ထိန်းသိမ်းကြတယ်။
၁၇။ နူးညံ့သိမ်မွေ့ခြင်း၊ စိတ်ရှည်ခြင်း ရှိဖို့ ဘာကြောင့် အရေးကြီးသလဲ။
၁၇ နူးညံ့သိမ်မွေ့ခြင်း၊ စိတ်ရှည်ခြင်းကို ဝတ်ဆင်ဖို့ဆိုတာ ခရစ်ယာန်တစ်ယောက် ရွေးလို့ရတဲ့ကိစ္စ မဟုတ်ဘူး။ ကယ်တင်ခြင်းအတွက် လုပ်ကိုလုပ်ရမယ့်အရာ ဖြစ်တယ်။ (မ. ၅:၅။ ယာ. ၁:၂၁) ပိုအရေးကြီးတာက ဒီအရည်အသွေးတွေကို တင်ပြခြင်းအားဖြင့် ယေဟောဝါကို ဂုဏ်တင်ကြတယ်၊ ကျမ်းစာအကြံဉာဏ်ကို လိုက်လျှောက်ဖို့ တခြားသူတွေကို ကူညီပေးကြတယ်။—ဂလ. ၆:၁။ ၂ တိ. ၂:၂၄၊ ၂၅။
‘မေတ္တာကို ဝတ်ဆင်ပါ’
၁၈။ မေတ္တာနဲ့ မျက်နှာမလိုက်ခြင်း ဘယ်လို ဆက်စပ်နေသလဲ။
၁၈ ဆွေးနွေးသုံးသပ်ခဲ့တဲ့ အရည်အသွေးအားလုံးဟာ မေတ္တာနဲ့ ဆက်စပ်နေတယ်။ ဥပမာ၊ ဆင်းရဲချမ်းသာ ခွဲခြားသူတွေကို တပည့်တော် ယာကုပ် ဆုံးမခဲ့တယ်။ ဒီလိုအမူအကျင့်က “လူလူချင်းကို ကိုယ်နဲ့ထပ်တူ ချစ်ပါ” ဆိုတဲ့ တော်ဝင်ပညတ်ကို ချိုးဖောက်နေတာ ဖြစ်တယ်။ “မျက်နှာလိုက်မြဲ လိုက်နေရင်တော့ အပြစ်ကျူးလွန်တာပဲ” လို့ ဆက်ပြောတယ်။ (ယာ. ၂:၈၊ ၉) မေတ္တာကတော့ ပညာ၊ လူမျိုး၊ လူမှုအဆင့်အတန်းပေါ် မူတည်ပြီး ခွဲခြားဆက်ဆံခြင်း မှန်သမျှကို ရှောင်ဖို့ လှုံ့ဆော်ပေးမယ်။ မျက်နှာမလိုက်ခြင်းက အပေါ်ယံပဲ မဖြစ်သင့်ဘူး။ တကယ့်စိတ်ရင်းနဲ့ ဖြစ်ရမယ်။
၁၉။ မေတ္တာကို ဝတ်ဆင်ဖို့ ဘာကြောင့် အရေးကြီးသလဲ။
၁၉ မေတ္တာဟာ “စိတ်ရှည်တတ်တယ်။ ကြင်နာတတ်တယ်။” “မာန်မာန မရှိဘူး။” (၁ ကော. ၁၃:၄) တခြားသူတွေကို နိုင်ငံတော်သတင်း ဆက်ဟောပြောနိုင်ဖို့ စိတ်ရှည်ခြင်း၊ ကြင်နာခြင်း၊ နှိမ့်ချခြင်း လိုအပ်တယ်။ (မ. ၂၈:၁၉) အသင်းတော်မှာရှိတဲ့ ညီအစ်ကို/မ အားလုံးနဲ့ သင့်မြတ်ဖို့ လွယ်ကူစေတယ်။ မေတ္တာပြခြင်းကြောင့် ဘာအကျိုးခံစားရသလဲ။ ယေဟောဝါကို ဘုန်းထင်ရှားစေတဲ့၊ စိတ်ဝင်စားသူ လူသစ်တွေကို ဆွဲဆောင်နိုင်တဲ့၊ စည်းလုံးတဲ့ အသင်းတော်တွေ ဖြစ်ပေါ်စေတယ်။ “အဲဒါတွေအပြင် မေတ္တာကိုလည်း ဝတ်ဆင်ကြပါ။ ဘာလို့လဲဆိုတော့ မေတ္တာဟာ စည်းလုံးခြင်းအတွက် ခိုင်မြဲတဲ့ နှောင်ကြိုးပဲ” ဆိုတဲ့ စကားနဲ့ စရိုက်သစ်အကြောင်း နိဂုံးချုပ်ထားတာ သင့်တော်လှပါတယ်။—ကော. ၃:၁၄။
‘အသစ်ဖြစ်အောင် အမြဲပြုပြင်နေပါ’
၂၀။ (က) ကိုယ့်ကိုယ်ကိုယ် ဘယ်မေးခွန်းတွေ မေးသင့်သလဲ။ ဘာကြောင့်လဲ။ (ခ) ဘယ်အချိန်ကို စောင့်မျှော်နေကြသလဲ။
၂၀ ‘စရိုက်ဟောင်းကို ချွတ်ပယ်ထားဖို့ ဘာလုပ်ရဦးမလဲ’ လို့ ယောက်တိုင်း ကိုယ့်ကိုယ်ကိုယ် မေးသင့်တယ်။ ဘုရားသခင့် အကူအညီရဖို့ မခြားမလပ် ဆုတောင်းရမယ်။ ဘုရားနိုင်ငံတော်ကို အမွေမခံရစေမယ့် သဘောထား၊ အကျင့်တွေကို အနိုင်ယူဖို့ ကြိုးစားရမယ်။ (ဂလ. ၅:၁၉-၂၁) ‘စိတ်သဘောကို အသစ်ဖြစ်အောင် ငါအမြဲပြုပြင်နေသလား’ လို့လည်း မေးရမယ်။ (ဧ. ၄:၂၃၊ ၂၄) ခရစ်ယာန်အားလုံး စရိုက်သစ်ကို အပြည့်အဝ ဝတ်ဆင်ထားနိုင်တဲ့အထိ အမြဲတစေ ကြိုးစားနေရမယ်။ ကိုယ်သိထားတဲ့သူတိုင်း စရိုက်သစ်ကို အပြည့်အဝ ဝတ်ဆင်ထားတဲ့အခါ ဘယ်လောက် ပျော်စရာကောင်းမလဲဆိုတာ မြင်ယောင်ကြည့်ပါ။
^ စာပိုဒ်၊ 3 ကျမ်းစာခေတ်မှာ သကုသိလူတွေဟာ ယဉ်ကျေးမှု မရှိတဲ့သူတွေဆိုပြီး အထင်သေးခံရတယ်။