1, 2. 1) ¿Kenijkatsa tijmatij kena uelis tijpiasej ‘tonemilis tlen yankuik’? 2) ¿Tlake kuajkuali tlamantli kiijtoua Colosenses 3:10-14 moneki kinextis se akajya katli kipia ‘inemilis tlen yankuik’?

IPAN Biblia ompa uala nopa tlajtoli “inmonemilis tlen yankuik” (Efes. 4:24; Col. 3:10). Ni kiijtosneki tonemilis ayokmo kej achtouia pampa nama nopa ‘tonemilis tlen yankuik eltok keja’ toTeotsij kineki. Tojuantij uelis timonejnemiltisej kej Jehová kineki pampa techchijchijki kej itlachialis, yeka uelis tijnextisej nopa kuajkuali tlamantli tlen ya kinextia (Gén. 1:26, 27; Efes. 5:1).

² Nochi titlajtlakolejkej uan yeka timoiljuiaj tlen amo kuali. Uan nojkia maseualmej uelis techyololinisej ma tijchiuakaj tlen amo kuali. Maske kiampa pano, uelis timonejnemiltisej kej Jehová kineki pampa ya techpaleuia. Ipan ni tlamachtili tikitasej se keski kuajkuali tlamantli tlen Pablo kiijtok kinextia se akajya katli kipia ‘inemilis tlen yankuik’, nopa techpaleuis timonejnemiltisej kej toTeotsij kineki (xijpoua Colosenses 3:10-14). Uan nojkia tikitasej  kenijkatsa uelis tijnextisej kema titlajtolmoyauaj.

3. ¿Tlake amo tijchiuasej tlaj ‘tijpiaj yankuik tonemilis’?

³ Kema Pablo kiijtok monekiyaya tijpiasej se tonemilis tlen yankuik, nojkia kiijtok tlauel ipati amo titechikoitasej. Ya kiijtok: “Axipati iixpa toTeko intla se tlakatl itstok se israelita o axtle, intla motekilijtok nopa tlaneskayotl ipan itlakayo o axtle. Axipati intla se tlakatl axtleno kimati o san kuatitlannejnemi, o intla tekiti kampa kitlaxtlauiaj uan ueli yaui kampa kineki, o intla moneki kisentekipanos iteko tlen kikojtok para iaxka. Axipati intla se tlakatl eua se kuali tlali tlen nochi kipia, o sejkoyok kampa axtleno onka”. * Yon se toikni kinamiki moiljuis san ya tlauel ipati uan sekinok amo san pampa amo euaj ipan ialtepe, pampa amo tlatominpiaj o pampa chipaktikej o amo. Amo kinamiki kiampa moiljuis pampa Cristo itokilijkauaj “nochi sanse tiitstokej” (Col. 3:11; Gál. 3:28).

4. 1) ¿Kenijkatsa moneki moitasej toTeotsij itekipanojkauaj? 2) ¿Tlake tlamantli ueliskia kichiuas amo ma tiitstokaj sansejko?

⁴ Kema tijpiaj se tonemilis tlen yankuik, nochi tikintlepanitaj uan tikinpatiitaj maske euaj ipan sekinok altepemej o maske amo tlatominpiaj (Rom. 2:11). Ipan se keski altepemej kimatij ouij kichiuasej nopa. Achtouia, tekichiuanij tlen Sudáfrica kinxelojkej se keskij maseualmej pampa amo sanse eliyayaj. Kinxelojkej katli chipaktikej, katli yayauikej uan katli amo eliyayaj yon chipaktikej yon yayauikej. Miakej Jehová itlajtoltemakauaj nojua nopaya itstokej, yeka Katli kinyakanaj Jehová itlajtoltemakauaj kinejkej ma kichiuakaj tlen kiijtoua 2 Corintios 6:13, kampa kiijtoua: “Xitechiknelikaj keja tojuantij tiinmechikneliaj”. Ipan octubre 2013, kichijkej se tlenijki tlen kinpaleuiskia kuali ma moixmatikaj. ¿Tlake kichijkej?

5, 6. 1) ¿Tlake kichijkej ipan se altepetl pampa kinekiyayaj toikniuaj sansejko ma itstokaj? (Xikita nopa achtoui tlaixkopinkayotl). 2) ¿Tlake panok pampa kiampa kichijkej?

⁵ Toikniuaj tlen se tlanechikoli kampa itstoyaj katli chipaktikej uan kitekiuiyayaj seyok tlajtoli monekiyaya kichiuasej se keski tlamantli ininuaya toikniuaj tlen seyok tlanechikoli, kampa itstokej katli yayauikej. Se keski tonali, sansejko tlajtolmoyauayayaj uan yauiyayaj tlanechikoli. Ipan miak tlanechikoli kichijkej nopa. Katli itstokej ipan kali Betel kimatkej kenijkatsa toikniuaj uan sekinok maseualmej tlauel kinpaktijtoya. Se tlakatl katli tlayakana ipan se religión kiijtok: “Maske na amo se tlen Jehová itlajtoltemakauaj, nikita kenijkatsa nochi inmosentikapaleuiaj uan tlauel kuali inmouikaj maske inchipaktikej uan sekinok inyayauikej”. ¿Kenijkatsa kinpaleuik toikniuaj pampa kiampa kichijkej?

⁶ Noma, se tosiuaikni katli kamanalti xhosa amo kinekiyaya kintlaneuis ichaj toikniuaj katli chipaktikej uan kamanaltij inglés pampa ya amo tlapijpia. Kema tlajtolmoyajki ininuaya uan yajki ininchaj, kiijtok: “¡Elij sanse kej tojuantij!”. Yeka, kema inijuantij kinseliskiaj ipan inintlanechikol toikniuaj katli kamanaltij inglés, tlakualchijki uan kintlanejki ichaj se keskij toikniuaj. Se ueuentsi katli eliyaya chipaktik nojkia yajki ichaj. Noma kiijtok: “Amo nimoiljuiyaya tlaj moseuiskia ipan se tlenijki tlen tlauel tlalchipa eltoya”. Ipan ni tonali, toikniuaj nojua kiampa kichiuaj. Nelia tlauel kinpaleuijtok pampa miakej toikniuaj mouampojchijtokej ininuaya sekinok uan mosentlalijtokej nojua kuali kinixmatisej toikniuaj katli kitekiuiaj seyok tlajtoli o katli amo elij sanse kej inijuantij.

7. ¿Kenke moneki nojua tijnextisej titetlasojtlaj?

⁷ Pampa tiitstokej kampa Satanás tlanauatia, nojua titlaijiyouisej pampa amo tijpiaj tekitl, timokokouaj, techtlatsakuiltiaj, se tlamantli techtlasojsoljuilia, techtlachtekiliaj uan sekinok kuesoli. Tlaj tijnekij titepaleuisej, moneki titetlasojtlasej. Tlaj titetlasojtlaj, techpaleuis ma ‘tikinchiuilikaj sekinok tlen kuali’ o ma tijnextikaj tijpiaj kuali toyolo (Efes. 4:32). Ni kuajkuali tlamantli tlen ‘yankuik tonemilis’ techpaleuis ma tijchiuakaj kej toTeotsij uan ma tikinyolchikauakaj sekinok (2 Cor. 1:3, 4, Icamanal Toteco).

8. ¿Tlake panos tlaj tijnextisej titetlasojtlaj uan tijpiaj kuali toyolo ipan tlanechikoli? Xikijto se neskayotl.

⁸ ¿Kenijkatsa uelis tijnextisej kuali toyolo ininuaya katli san asitokej ipan toaltepe uan amo kipiaj miak tomij? Tlaj itstokej ipan totlanechikol, uelis timouampojchiuasej ininuaya uan tikinnextilisej nelia tlauel tikinpatiitaj ipan tlanechikoli (1 Cor. 12:22, 25). Ma tikitakaj tlen kipanok Dannykarl, katli eua Filipinas uan yajki Japón. Ipan iteki, amo kuali kiitayayaj pampa ya amo euayaya ipan nopa altepetl. Se tonali yajki ipan se tlanechikoli. Ya kiijtoua: “Maske tlauel miakej eliyayaj japoneses, nochi nechselijkej ika miak tlaiknelili, kejuak ya uejkaj nechixmajtoyaj”. Toikniuaj kipixkej kuali ininyolo uan nopa kipaleuik ma mouampojchiua iuaya toTeotsij. Teipa moatsonpoliuiltik uan nama eli se ueuejtlakatl. Sekinok ueuejtlakamej kiijtouaj ya iuaya isiua, Jennifer, tlauel tlapaleuiaj ipan tlanechikoli. Kiijtouaj: “Ni omej precursores amo mosentlalijtokej tlapijpiasej uan kinextiaj kenijkatsa moneki tikachtiuitlalisej toTeotsij iTlanauatijkayo” (Luc. 12:31).

9, 10. Xikijto kenijkatsa kinpaleuijtok toikniuaj katli kinextijtokej tetlasojtlaj ipan tlajtolmoyaualistli.

⁹ Kema titlajtolmoyauaj nojkia tiuelij ‘tikinchiuiliaj tlen kuali’ sekinok (Gál. 6:10). Miakej toikniuaj momachtiaj seyok tlajtoli pampa kinekij kinpaleuisej katli san asitokej ipan ininaltepe (1 Cor. 9:23). Katli kiampa kichijtokej tlauel kinpaleuijtok. Tiffany, se precursora tlen Australia, kinekiyaya tlapaleuis ipan se tlanechikoli kampa kitekiuiaj tlajtoli suajili ipan altepetl Brisbane. Maske ouij kimatki kiyekos nopa tlajtoli, ya kiijtoua tlauel kipaleuijtok: “Katli kineki tlauel yolpakis kema tlajtolmoyauas, uajka ma tlapaleui ipan se tlanechikoli kampa kitekiuiaj seyok tlajtoli. Kejuak tias ipan seyok altepetl maske nojua tiitstos ipan moaltepe. Uan tikitas kenijkatsa nochi timosentikapaleuiaj”.

¹⁰ Ma tikitakaj nojkia tlen kichijki se toikni ininuaya ichampoyouaj ipan Japón. Sakiko kiijtoua: “Ipan 1990, kema titlajtolmoyauayayaj tikinpantiyayaj miakej maseualmej katli  euayayaj Brasil. Kema tikinpouiliyayaj ipan portugués Revelación 21:3, 4 o Salmo 37:10, 11, 29, tlauel kuali kitlakakiliyayaj uan kemantika chokayayaj”. Pampa nopa toikniuaj tetlasojtlayayaj, kinyololinik ma kichiuakaj seyok tlamantli. Sakiko nojua kiijtoua: “Kema tikitakej kenijkatsa kinekiyayaj kiixmatisej Jehová, tijyekojkej portugués”. Teipa, tlapaleuijkej ma mochiua se tlanechikoli ipan nopa tlajtoli. Ipan nochi nopa xiuitl, kinpaleuijtokej miakej ma elikaj Jehová itlajtoltemakauaj. Sakiko kiijtoua: “Tlauel tijchijkej kampeka tijyekosej nopa tlajtoli, uan amo san tlapik nochi tlen tijchijkej. Tlauel tijtlaskamatiliaj Jehová” (xijpoua Hechos 10:34, 35).

11, 12. 1) ¿Kenke moneki tijnekisej tijpiasej ‘tonemilis tlen yankuik’? 2) ¿Tlake techpaleuis amo ma timoueyimatikaj?

¹¹ Tijnekij tijpiasej ‘tonemilis tlen yankuik’ pampa kiampa tijueyichiuasej Jehová uan amo pampa tijnekij tojuantij ma techuejkapantlalikaj. Ma tikilnamikikaj se iluikaejketl tlajtlakolchijki san pampa moueyimatki (xikita Ezequiel 28:17). Maske tlauel ouij tijmatij amo timoueyimatisej pampa titlajtlakolejkej, kena uelis tijnextisej nopa kuali tlamantli ipan tonemilis. ¿Tlake techpaleuis?

¹² Moneki mojmostla tijpouasej Biblia uan timoyoliljuisej ipan tlen kiijtoua (Deut. 17:18-20). Tlauel techpaleuis tlaj timoiljuisej ipan tlen Jesús tlamachtik uan kenijkatsa amo moueyimatki (Mat. 20:28). Amo moueyimatiyaya yon se kentsi uan yeka kinikxipajpajki iapóstoles (Juan 13:12-17). Nojkia moneki tikiljuisej toTeotsij ma techmaka itonal, nopa techpaleuis amo ma timoiljuikaj san tojuantij tlauel topati uan sekinok amo (Gál. 6:3, 4; Filip. 2:3).

13. ¿Kenijkatsa techpaleuis tlaj amo timoueyimatisej?

¹³ (Xijpoua Proverbios 22:4). Jehová kineki nochi itekipanojkauaj amo ma moueyimatikaj. Tlauel kuali tiitstosej tlaj tijchiuasej tlen kineki. Ipan tlanechikoli nochi kuali timouikasej uan amo timoxelosej. Uan nojkia Jehová kinextis ueyi iyolo touaya. Apóstol Pedro kiijtok: “Nochi inmojuantij ximoiknochiuakaj uan ximopaleuikaj se ika seyok pampa ijkuilijtok ipan itlajtol toTeko kampa kiijtoua: ‘ToTeko axkinkualita tlen moueyimatij, pero ueyi iyolo ika tlen moiknochiuaj iixtla’” (1 Ped. 5:5).

14. ¿San ajkia kuali kinextia tlake kiijtosneki tijpiasej toyolo uan tiyolyamanikej?

¹⁴ Ipan ni tonali, miakej kiijtouaj sekij maseualmej yolyamanikej uan kipiaj ininyolo san pampa tlauel majmauij o pampa amo yoltetikej. Nopa amo nelia, pampa nopa kuajkuali tlamantli techmakatok Jehová, katli kipia miak chikaualistli. San ya kuali kinextia tlake kiijtosneki tijpiasej toyolo uan tielisej tiyolyamanikej (2 Ped. 3:9). Tijmatij nopa kema tikitaj kenijkatsa kinnankilik Abraham uan Lot ika se keskij iluikaeuanij (Gén. 18:22-33; 19:18-21). Uan nojkia ipan 1,500 xiuitl, Jehová kipixki iyolo kema israeleuanij amo kineltokayayaj (Ezeq. 33:11).

15. ¿Tlake techmachtik Jesús?

¹⁵ Jesús nojkia kinextik eliyaya yolyamanik (Mat. 11:29). Kiampa kinextik kema itokilijkauaj mokuapolouayayaj. Kema itstoya ipan Tlaltipaktli, maske ikualankaitakauaj kitlaijiljuijkej uan kiteljuijkej, ya kiijiyouik nochi. Amo kualanki uan nochipa kipixki iyolo. Maske tlaijiyouiyaya ipan nopa kuauitl kampa kikuapilojtoyaj, ya kiiljuik Jehová: “Xikintlapojpoljui pampa axkimatij tlake kichiuaj” (Luc. 23:34). Maske tlauel tlaijiyouik, Jesús kinextik amo nima kualaniyaya pampa eliyaya yolyamanik uan  kipiayaya iyolo. ¡Kuali kinextik tlake moneki tijchiuasej! (Xijpoua 1 Pedro 2:21-23).

16. ¿Kenijkatsa tijnextisej tijpiaj toyolo uan tiyolyamanikej?

¹⁶ ¿Kenijkatsa uelis tijnextisej tiyolyamanikej uan tijpiaj toyolo? Pablo kiijtok kenijkatsa ueliskia tijnextisej kema kintlajkuiljuilik Cristo itokilijkauaj: “Más kuali ximochiuilikaj tlen kuali se ika seyok. Ximotlasojtlakaj uan ximotlapojpoljuikaj se ika seyok keja toTeko inmechtlapojpoljuijtok ipan Cristo” (Efes. 4:32). Tlaj tijnekij tijneltokasej tlen technauatia ni texto, uajka moneki tielisej tiyolyamanikej uan tijpiasej toyolo. Kema kiampa tijchiuaj, nochi katli tiitstokej ipan tlanechikoli kuali timouikaj uan tiitstokej sansejko.

17. ¿Kenke tlauel moneki tijnextisej tiyolyamanikej uan tijpiaj toyolo?

¹⁷ Jehová technauatia ma tijnextikaj tiyolyamanikej uan tijpiaj toyolo. Ni ome kuajkuali tlamantli nelia tlauel moneki tijnextisej tlaj tijnekij tiitstosej ipan Xochimili (Mat. 5:5; Sant. 1:21). Uan nojkia tlauel ipati, pampa tlaj tijnextisej uelis tijueyichiuasej Jehová uan uelis tikinpaleuisej sekinok ma kichiuakaj tlen Biblia kiijtoua (Gál. 6:1; 2 Tim. 2:24, 25).

18. ¿Kenijkatsa techpaleuia tlaiknelili amo ma titechikoitakaj?

¹⁸ Kema tijnextiaj nochi nopa kuajkuali tlamantli tlen tikitstokej, nojkia tijnextiaj tlaiknelili. Santiago monejki kintlakaualtis toikniuaj katli techikoitayayaj, pampa kuali kinitayayaj san katli tlatominpiayayaj uan sekinok amo. Kiniljuik amo kineltokayayaj tlen toTeotsij tlanauatia: “Xikinikneli sekinok keja timoiknelia”. Teipa kiijtok: “Intla inkintlapejpeniaj ajkeya inkiniknelisej, intlajtlakolchiuaj” (Sant. 2:8, 9). Tlaj nelia titeikneliaj, uajka amo tikinchikoitasej sekinok san pampa amo tlatominpiaj, amo tlauel momachtijtokej o pampa amo elij sanse kej tojuantij. Yeka moneki tijpiasej ‘tonemilis tlen yankuik’, tlaj amo, uajka amo uelis tijnextisej amo titechikoitaj.

19. ¿Kenke tlauel ipati ma tijnextikaj tlaiknelili?

¹⁹ “Se tlen teiknelia kipia iyolo ininuaya sekinok uan kinchiuilia tlen kuali [...,] axmoueyimati” (1 Cor. 13:4). Tlaj tijnekij nojua titlajtolmoyajtosej, uajka moneki tijpiasej toyolo, amo timoueyimatisej uan tijpiasej kuali toyolo (Mat. 28:19, TNM). Ni eyi tlamantli nojkia techpaleuia kuali ma timouikakaj ika nochi toikniuaj. Tlaj nochi tijnextisej ni tlaiknelili, ipan tlanechikoli nochi kuali timouikasej uan tijueyichiuasej Jehová. Uan nopa kinpaleuis sekinok nojkia ma kitekipanokaj toTeotsij. Yeka, ipan nopa textos kampa kiijtoua tlen ‘tonemilis tlen yankuik’, tlami ika ni tlajtoli: “Tlen más ipati para inkichiuasej, moneki ximoiknelikaj uan keja nopa initstosej kuali, pampa tlaiknelijkayotl techilpia sansejko para ma tijpiakaj sanse toyolo” (Col. 3:14).

20. 1) ¿Tlake moneki timotlatsintokisej, uan kenke? 2) ¿Tlake tijchiaj ika miak pakilistli?

²⁰ Nochi moneki timotlatsintokisej: “¿Tlake nojua uelis nijchiuas uan kiampa ayokmo kema nijchiuas tlen notlajtlakolchijkatlalnamikilis kineki?”. Moneki tikiljuisej Jehová ma techpaleui uan tijchiuasej kampeka ayokmo timoiljuisej tlen amo kuali, pampa nopa kichiuaskia amo ma tiitstokaj ipan Xochimili (Gál. 5:19-21). Nojkia moneki timotlatsintokisej: “¿Nojua nijpatlatia tlen nimoiljuia pampa nijneki nijyolpakiltis Jehová?”. Pampa titlajtlakolejkej, moneki nochipa tijchijtosej kampeka tijpiasej ‘tonemilis tlen yankuik’ (Efes. 4:23, 24). ¡Tlauel kuali tiitstosej kema nochi ayokmo tielisej titlajtlakolejkej uan nochipa tijpixtosej ‘tonemilis tlen yankuik’!