1, 2. (a) Omolwashike tu shi kutya otatu vulu okuzala omuntu omupe? (b) Omaukwatya geni gomuntu omupe ga popiwa mAakolossa 3:10-14?

“OMUNTU omupe.” MOmbiimbeli uutumbulilo mboka owa holoka mo iikando iyali. (Ef. 4:24; Kol. 3:10) Uutumbulilo mboka otawu ulike komuntu ngoka “a shitwa a fa Kalunga.” Mbela otatu vulu ngaa okuzala omuntu omupe? Eeno. Molwaashoka Kalunga okwe tu shita oshifetha she, otatu vulu okuulika omaukwatya ge omawanawa. — Gen. 1:26, 27; Ef. 5:1.

² Odhoshili kutya ohatu ningi omapuko, molwaashono otwa thigulula okwaagwanenena kaavali yetu yotango. Otashi vulika wo twa nwethwa mo noonkondo komidhingoloko dhetu. Nonando ongawo, kekwatho lyaJehova, otatu vulu okupondola mokukala aantu yoludhi ndoka a hala. Opo tu vule okukala aantu ya tya ngawo, natu ka kundathaneni uukwatya wa yoolokathana womuntu omupe, mboka omuyapostoli Paulus a li a nwethwa mo a nyole. (Lesha Aakolossa 3:10-14.) Otatu ka kundathana wo nkene tatu vulu okuulika omaukwatya ngoka muukalele.

3. Uukwatya wumwe wuni wu li oshitopolwa shomuntu omupe?

³ Sho Paulus e tu ladhipike tu zale omuntu omupe, okwa tsikile ko ta yelitha kutya okwaanontondo oku li uukwatya wa simana womuntu omupe. Okwa ti: ‘Kape na we eyooloko pokati komupagani nOmujuda, kaangoka a fukalekwa naangoka inaa fukalekwa, omupika nomuvalwa, omukwiilongo nomudhinwa.’ * Onkee ano, kapu na omuntu megongalo e na okukala e wete e vule yakwawo, omolwomuhoko gwe, uukwashigwana nenge ondondo ye. Omolwashike mbela? Omolwaashono aalanduli yashili yaKristus ‘ayehe yamwe.’ — Kol. 3:11; Gal. 3:28.

4. (a) Aapiya yaJehova oye na okuungaunga nayalwe ngiini? (b) Onkalo yini tayi vulu okuningitha Aakriste kaaya kale ya hangana?

⁴ Aantu mboka ya zala omuntu omupe, ohaya ungaunga nooitaali ooyakwawo nonaantu yalwe nesimaneko, kashi na nduno mbudhi kutya oye li pondondo yini nenge oyomuhoko guni. (Rom. 2:11) Shika otashi vulu okukala eshongo miilongo yimwe. Pashiholelwa, moSouth Africa, epangelo olya li lya topolele aantu omahala shi ikolelela komihoko dhawo. Omahala gamwe oga li gaatiligane, gamwe ogaaluudhe nagamwe ogaantu yomihoko dha yoolokathana. Sigo okunena Oonzapo odhindji odhi li natango momahala moka. MuKotoba 2013, Olutuwiliki olwa ningi po elongekidho lyi ikalekelwa, lu kwathele aamwatate naamwameme yomihoko dha yoolokathana, ya mbwalangandje nenge ye ‘egulule omitima dhawo,’ opo ya tseyathane nawa. (2 Kor. 6:13) Mbela elongekidho ndyono olya li lya kwatela mo shike?

5, 6. (a) Omalongekidho geni ga li ga ningwa moshilongo shimwe, opo oshigwana shaKalunga shi koleke uukumwe mokati kasho? (Tala kethano lyopetameko.) (b) Omalongekidho ngono oge eta iizemo yini?

⁵ Opwa li pwa ningwa omalongekidho, opo aamwatate okuza momagongalo gaali gomalaka ga yoolokathana nenge gomihoko dhi ili nodhi ili ya kale haye ya pamwe omahuliloshiwike gamwe. Momahuliloshikwe moka, aamwatate naamwameme mboka oya li hayu uvitha pamwe, haya gongala pamwe nokutyapula pamwe komagumbo gawo. Omagongalo ogendji oga li ga kutha ombinga moshinima shoka. Oshitayimbelewa osha yakula oolopota tadhi nyanyudha shi na ko nasha nelongekidho ndika, dhimwe odha za nokuli kwaamboka kaaye shi Oonzapo. Pashiholelwa, omusita gwongeleka yimwe oshe mu inyengitha a popye ta ti: “Ngame kandi shi Onzapo, ihe otandi shi popi kutya iilonga yeni yokuuvitha oyu unganekwa nawa, ne kamu na okatongo kopamihoko.” Mbela elongekidho ndino olya kwathela ngaa Oonzapo? Eeno.

⁶ Omumwameme Noma ngoka ha popi elaka lyOshixhosa, okwa li ha tila okuhiya kegumbo lye ndyoka eshona, aamwatate naamwameme yiilumbu yomegongalo lyOshiingilisa. Konima sho u uvitha pamwe nayo, e taye mu hiya komagumbo gawo, okwa ti: “Nayo aantu owala ye tu fa!” Sho ompito yegongalo lyOshiingilisa ya thiki li ka talele po egongalo lyOshixhosa, omumwameme Noma okwa teleke e ta hiya yamwe kegumbo lye. Mokati kawo omwa li omukuluntugongalo oshilumbu. Noma okwa ti: “Onda li nda kumwa, sho omumwatate ngoka a kuutumba koshikalata shomaleya.” Elongekidho ndika otali tsikile. Aamwatate naamwameme oyendji oya mona ookuume aape, noya tokola toko okutsikila neendathano ndyoka.

7. Omolwashike tu na okutsikila okuulukilathana olukeno?

⁷ Manga uuyuni waSatana inaawu hula po, otu na okwaadhika komaudhigu. Ongaashi geni? Okwaahe na iilonga, omikithi dha kwata miiti, omahepeko, iiponga yopaunshitwe, okukanitha omaliko getu omolwomiyonena nosho wo omaudhigu galwe. Opo tu kwathelathane moonkalo oondhigu, otu na okukala tu ninathane  olukeno lwashili. Okusilathana olukeno otashi ke tu inyengitha tu kale tu ninathane ohenda. (Ef. 4:32) Omaukwatya ngoka gomuntu omupe, otage ke tu kwathela tu holele Kalunga ketu, tse tu hekelekathane. — 2 Kor. 1:3, 4.

8. Ngele otatu ulukile aantu ayehe megongalo olukeno nohenda, otashi ke eta iizemo iiwanawa yini? Gandja oshiholelwa.

⁸ Ongiini tatu vulu okuulika kutya otu na ko nasha lela naakwiilongo nosho wo mboka ye li moonkalo oondhigu megongalo lyetu? Otu na okupanga uukuume nayo, noku ya kwathela ya mone kutya oye na oshilonga megongalo. (1 Kor. 12:22, 25) Tala koshiholelwa shomulumentu gwedhina Dannykarl, ngoka a tembukile koJapani okuza koFilipine. Uuna ye li piilonga, ka li ha ningilwa uuwanawa mboka hawu ningilwa aaniilonga pamwe naye yomoshilongo shoka. Esiku limwe okwa yi kokugongala kwOonzapo dhaJehova. Dannykarl okwa ti: “Ayehe mboka ya li pokugongala hoka konyala Aajapani, ihe oya taamba ndje ko nombili, ya fa aantu mboka tu shaathane nale.” Aamwatate oya kala taye mu ulukile olukeno, oshinima shoka she mu kwathele a hume komeho pambepo. Okuza mpono, okwa ninginithwa, naasho tatu popi ngeyi oku li omukuluntugongalo. Aakuluntugongalo ooyakwawo oya tala ko Dannykarl nomukadhi, Jennifer, ye li elaleko nuuyamba megongalo lyawo. Aakuluntugongalo oya popi kombinga yawo ya ti: “Oya tula po oshiholelwa oshiwanawa ye li aakokolindjila, mboka ya pititha komeho Uukwaniilwa, pehala lyokwiindumbila omaliko.” — Luk. 12:31.

9, 10. Gandja iiholelwa yomayambeko ngoka haga zi mokuulukila yalwe olukeno muukalele.

⁹ Uuna tatu uvithile yalwe etumwalaka lyUukwaniilwa, nena otu na ompito ombwanawa yokuningila “kehe gumwe uuwanawa.” (Gal. 6:10) Oonzapo dhaJehova odhindji odha kambadhala okwiilonga elaka epe, molwaashono odhi nine olukeno mboka ya tembukila miilongo yadho. (1 Kor. 9:23) Shono oshe dhi etela iizemo iiwanawa. Pashiholelwa, omumwameme Tiffany, omukokolindjila moAustralia, okwi ilongo elaka lyOshiswahili, opo a kwathele megongalo lyOshiswahili li li moshilando Brisbane. Nonando osha li oshidhigu kuTiffany, okwiilonga elaka ndyoka, okwa mona omalaleko nuuyamba monkalamwenyo ye. Okwa ti: ‘Ngele owa hala okutyapula uukalele, nena ka longe megongalo lyelaka ekwiilongo. Ohashi kala wa fa wa ya molweendo, nopwaahe na okuthiga po oshilando sheni. Oho mono lela nkene ohole yuumwayinathana womuuyuni awuhe mpoka yi thike nuukumwe mboka inoo mona nale.’

¹⁰ Tala ishewe koshiholelwa shaanegumbo yamwe moJapani. Okakadhona komegumbo ndyoka, Sakiko, oka ti: “Momumvo 1990 nasha, otwa kala hatu tsakaneke olundji aantu ya za koBrasilia muukalele. Uuna twe yu ulukile  Omanyolo ngaashi Ehololo 21:3, 4 nenge Episalomi 37:10, 11, 29 mOombiimbeli dhawo dhOshiputu, ohaya pulakene nawa, nomathimbo gamwe ohaya tameke okulila.” Aanegumbo mboka hapo owala ya hulile mpoka. Sakiko okwa ti: “Sho twa mono mpoka pu thike ondjala yawo yopambepo, atuhe megumbo otwa tameke okwiilonga Oshiputu.” Konima yethimbo, otwa kwathele mokutota po egongalo lyOshiputu. Uule womimvo odhindji, uukwanegumbo mboka owa kala nokukwathela aakwiilongo oyendji ya ninge aapiya yaJehova. Sakiko okwa gwedha ko a ti: “Osha li sha pula oonkambadhala dha mana mo tu ilonge Oshiputu, ihe omayambeko ngoka twa ka mona oge vule kokule oonkambadhala ndhoka twa ninga. Otatu pandula Jehova noonkondo.” — Lesha Iilonga 10:34, 35.

11, 12. (a) Omolwashike sha simanenena okukala tu na einyengotompelo ewanawa lyokuzala omuntu omupe? (b) Oshike tashi ke tu kwathela tu kale aaifupipiki?

¹¹ Einyengotompelo lyetu lyokuzala omuntu omupe oli na okukala lyokusimanekitha Jehova, ihe haakwiisimanekitha kaantu. Natu dhimbulukwe kutya noshishitwa shopambepo shoka sha li sha gwanenena, osha li sha kwatwa kuuntsa e tashi yono. (Yelekanitha Hesekiel 28:17.) Tu li aantu inaatu gwanenena, kashi shi nando oshipu okuyanda uuntsa. Nonando ongawo, otatu vulu okuzala eifupipiko. Oshike nduno tashi vulu oku tu kwathela tu li zale?   

¹² Oshinima shimwe shoka tashi vulu oku tu kwathela tu kale aaifupipiki, okulesha Oohapu dhaKalunga esiku kehe nokutedhatedha kudho. (Deut. 17:18-20) Otwa pumbwa lela okutedhatedha komalongo gaJesus nokoshiholelwa she sha dhenga mbanda shokukala omwiifupipiki. (Mat. 20:28) Jesus okwa li nokuli a yogo oompadhi dhaayapostoli ye. (Joh. 13:12-17) Otwa pumbwa wo okugalikana Jehova pandjigilile e tu kwathele ombepo ye, opo tu vule okukondjitha iikala yokukala tu uvite tu vule yalwe. — Gal. 6:3, 4; Fil. 2:3.

13. Omalaleko nuuyamba geni tatu ka mona, ngele otwa kala aaifupipiki?

¹³ Lesha Omayeletumbulo 22:4. Aalongelikalunga yashili ayehe oya tegelelwa ya kale aaifupipiki, nuukwatya mboka ohawu e ta omalaleko nuuyamba. Okukala aaifupipiki otashi ke tu kwathela tu humithe komeho ombili nuukumwe megongalo. Otashi ke tu kwathela wo tu mone esilohenda lyaKalunga. Omuyapostoli Petrus okwa ti: “Amuhe zaleni eifupipiko, opo mu vule okuyakulathana. Oshoka enyolo otali ti: ‘Kalunga oha tondo aainenepeki, ihe oha sile ohenda aaishonopeki.’” — 1 Pet. 5:5.

14. Olye e li oshiholelwa dhingi shokuulika ombili nosho wo eidhidhimiko?

¹⁴ Kunena muuyuni, aantu mboka ye na ombili neidhidhimiko, olundji ohaya talika ko yowala. Ihe uushili owo kutya aantu ya tya ngawo kaye shi yowala. Uukwatya mboka uuwanawa, owa za kuJehova ngoka e li Omunankondoadhihe meshito. Jehova Kalunga oku li oshiholelwa dhingi shokuulika ombili neidhidhimiko. (2 Pet. 3:9) Tala nkene a li a yamukula Abraham naLot, okupitila momuyengeli, sho ya li ye mu pula. (Gen. 18:22-33; 19:18-21) Natango, uule womimvo dhi vulithe 1 500, Jehova okwa li i idhidhimikile okwaavulika kwoshigwana shaIsrael. — Hes. 33:11.

15. Jesus okwe tu tulila po oshiholelwa shini shokuulika ombili nosho wo eidhidhimiko?

¹⁵ Jesus okwa li “omunambili.” (Mat. 11:29) Okwa li i idhidhimikile omaunkundi gaalongwa ye. Pethimbo lyuukalele we kombanda yevi, okwa li i idhidhimikile okwaanuuyuuki hoka a li a ningilwa kaapataneki yomalongelokalunga. Nonando ongawo, okwa li u ulike ombili nosho wo eidhidhimiko sigo omeso lye. Sho Jesus a li u uvite uuwehame uunene komuti gwomahepeko, okwa galikana kuHe, opo a dhimine po aahepeki ye, sho a ti: “Inaa tseya shoka taa ningi.”  (Luk. 23:34) Jesus ine tu tulila po tuu oshiholelwa dhingi shokuulika ombili nosho wo eidhidhimiko, nonando okwa li moonkalo oondhigu! — Lesha 1 Petrus 2:21-23.

16. Omomukalo guni tatu vulu okuulika ombili nosho wo eidhidhimiko?

¹⁶ Ongiini tatu vulu okuulika ombili nosho wo eidhidhimiko? Paulus okwa li a popi omukalo gumwe moka tatu vulu oku shi ninga, sho a nyolele ooitaali ooyakwawo a ti: “Kwathathaneni, dhiminathanii po oondjo ethimbo kehe, uuna pe na ngoka a ningathana namukwawo. Dhiminathanii po oondjo naanaa, ngashika Omuwa e mu dhimine po.” (Kol. 3:13) Osha yela kutya otashi tu pula tu kale tu na ombili nosho wo eidhidhimiko, opo tu vulike kelombwelo ndyoka. Uuna tatu dhimine po yalwe, otatu humitha komeho nokukaleka po uukumwe megongalo.

17. Omolwashike ombili neidhidhimiko ya simana?

¹⁷ Omukriste kehe okwa tegelelwa a kale e na ombili nosho wo eidhidhimiko. Okukala nomaukwatya ngoka, otashi ke tu kwathela tu ka hupithwe. (Mat. 5:5; Jak. 1:21) Shoka sha simanenena, uuna tu na omaukwatya ngoka, otatu simanekitha Jehova notatu kwathele yalwe ya tule miilonga omayele gOmbiimbeli. — Gal. 6:1; 2 Tim. 2:24, 25.

18. Ekwatathano lini li li pokati kohole nokwaanontondo?

¹⁸ Omaukwatya agehe twa zi nokukundathana oga kwatathana nohole. Pashiholelwa, omulongwa Jakob okwa li a pe aamwahe omayele, kaaya tale ko aayamba ya simana ye vule oohepele. Oku ulike kutya iikala mbyoka itayi simanekitha ompango yaKalunga, sho a ti: “Hola mukweni, ngaashi u ihole mwene.” Okwa gwedha ko a ti: “Ngele ohamu kala naantu noku ya tongola pandjelo yokombanda, nena omu na oondjo.” (Jak. 2:8, 9) Ngele otu na ohole, itatu ka ninga aantu okatongo molwelongo, omuhoko nenge ondondo yawo. Itatu ki ihumbata twa fa aantu mboka ye na okatongo. Otwa pumbwa okuulika lela kutya katu na okatongo.

19. Omolwashike sha simana okukala tu na ohole?

¹⁹ Ohole ohayi “idhidhimikile ayihe noyi na olukeno,” yo natango “ihayi tuwalala.” (1 Kor. 13:4) Odhoshili kutya otashi pula eidhidhimiko, ombili neifupipiko, opo tu tsikile okuuvithila yalwe etumwalaka lyUukwaniilwa. (Mat. 28:19) Omaukwatya ngoka ohage tu kwathele wo tu kale nekwatathano ewanawa naamwatate naamwameme ayehe megongalo. Otatu ka mona omayambeko geni, uuna tatu ulike uukwatya mboka wohole? Ohawu kwathele aantu ya kale ya hangana megongalo, naashoka ohashi simanekitha Jehova nohashi nana mboka ye na ohokwe ye ye moshili. Shi na ko nasha nomaukwatya gomuntu omupe, Ombiimbeli oya hulitha nuutumbulilo wa simana tawu ti: “Kumbika ayihe gwedhii ko ohole, oshoka ohole oyo epaya tali vulu okumangela iinima ayihe kumwe.” — Kol. 3:14.

20. (a) Omapulo geni tu na okwiipula, nomolwashike? (b) Otwa tegelela nondjuulukwe ethimbo lini?

²⁰ Kehe gumwe gwomutse ota vulu okwiipula ta ti: ‘Oshike ishewe tandi vulu okuninga, opo ndi ihule omuntu omukulu nokwiikaleka kokule naye?’ Otwa pumbwa okugalikana kuJehova twa mana mo e tu kwathele. Otwa pumbwa wo okulonga nuudhiginini tu sinde iikala kehe nenge iilonga kehe mbyoka tayi tu imbi oku ka thigulula Uukwaniilwa waKalunga. (Gal. 5:19-21) Otatu vulu wo okwiipula ngeyi: ‘Mbela otandi tsikile ngaa okushituluka nenge okuninga omalunduluko?’ (Ef. 4:23, 24) Okuzala omuntu omupe nokutsikila okukala twe mu zala, oshinima tashi tsikile kAakriste ayehe sigo omegwaneneno. Dhiladhila owala nkene onkalamwenyo tayi ka kala, sho aantu ayehe mboka taya ka kala ya zala omuntu omupe notaya ka holela thiluthilu omaukwatya gaKalunga!