1, 2. a) ¿Tleka tikmatij ika kema uelis totlaliliskej se yenkuik nemilistli? b) ¿Tlenon kualneskayomej itech yenkuik nemilistli tikinnextiaj ipan Colosenses 3:10-14?

IPAN Biblia tiknextiaj tlajtoltin “yenkuik nemonemilis” (Efes. 4:24, TNM; Col. 3:10). Yejuin tlajtoltin tlajtouaj itech se nemilistli “tlen onochijchiuj ken kineki toTajtsin”. ¿Uelis totlaliliskej yejuin yenkuik nemilistli? Kema, pampa Jehová otexchijchiuj matikpiyakan itlachialis. Kuakon uelis tikpiyaskej ikualneskayouan (Gén. 1:26, 27; Efes. 5:1, TNM).

² Melauak ika tinochimej otikselijkej tlajtlakojli ipampa Adán niman Eva, niman ika yejon, tikileuiyaj tlen xkuajli. Noijki, tlen techyeualoua uelis kipatlas ken titlanemiliaj. San ika, uelis tinemiskej ken Jehová kiyolpaktia pampa yejua techpaleuiya ika tlasojtlalistli. Ipan yejuin tlamachtijli tikitaskej seki kualneskayomej itech yenkuik nemilistli tlen okijkuilo Pablo ipan Biblia tlen techpaleuis ijkon matinemikan (xpoua Colosenses 3:10-14). Noijki tikitaskej kenon tikinteititiskej ijkuak titenojnotsaj.

3. ¿Katlejua se kualneskayotl onka itech yenkuik nemilistli?

³ Ijkuak yotechyolchikaujka matotlalilikan yenkuik nemilistli, Pablo otlajto itech se kualneskayotl tlen melak ueyi kijtosneki, xtitechikoitas. Ipan Colosenses 3:11, Traducción del Nuevo Mundo kijtoua: “Kampa xnemi nion griego nion judío, circunciso nion incircunciso, akin oksekan ualeua, escita, akin tlakeuajli noso xtlakeuajli”. * Ipan tlanechikojli, xakaj kipiya kinemilis ika ueyixtika itech oksekimej pampa ualeua itech okse raza, kanon ualeua noso ipampa ken kitaj oksekimej. ¿Tleka? Pampa akin yemelak kichiuaj ken Cristo yejuamej “san sekan [...] nemij se iuan okse”(Gál. 3:28).

4. a) ¿Kenon kipiya ika nouikaskej imiuan oksekimej akin kitekichiuiliaj toTajtsin? b) ¿Tlenon uelis kichiuas matechtekiyomaka touikaskej kuajli iuan oksekimej tokniuan?

⁴ Ijkuak totlaliliaj yenkuik nemilistli, tikintlakaitaj nochimej maski san katlejua inraza noso ken kitaj oksekimej (Rom. 2:11). Oksekan ipan tlaltikpaktli, yejuin ouijtika. Se neskayotl, yeuejkaui tekiuajkej itech Sudáfrica okinxelojkej tlaltikpakchanejkej ipampa tlen inraza katka. Onkatka kampa chantiyaj akin katkaj raza blanca, oksekan akin raza negra niman oksekan mestizos. Miyekej Teixpantijkej ok ompa chantij. San ika, Grupo akin Tlayekana ipan nochi tlanechikoltin kinekiya kinyolchikauas tokniuan makitlakamatikan 2 Corintios 6:13, ipan Traducción del Nuevo Mundo kijtoua: “Xtlapokan nemoyojlo”. Ika yejon, ipan octubre xiuitl 2013 okichiujkej itlaj niman ijkon tokniuan kuajli manoixmatikan semej iuan oksekimej. ¿Tlenon okichiujkej?

5, 6. a) ¿Tlenon onochiuj ipan se país niman ijkon san sekan manouikakan tokniuan? (Xkita tlaixkopinajli kampa peua tlen tomachtijtokej). b) ¿Kenon yotepaleui yejuin?

⁵ Okintlajtlanilijkej tokniuan itech ome tlanechikoltin tlen xsan noijki intlajtol noso katkaj itech okse raza ika san sekan manosentlalikan seki itlamiyan semanas. San sekan tenojnotsayaj niman san sekan yayaj ipan tlanechikoltin niman nonotsayaj manotlajpalotij inchan. Melak miyekej tlanechikoltin okichiujkej yejuin. Sucursal okiseli miyek kuajli tlajtoltin itech yejuin, hasta intech akin xTeixpantijkej. Se neskayotl, se ministro religioso okijto: “XniTeixpantijketl, san ika, nikita ika nemotekiyo melak kuajli nenkichiuaj niman xmechxeloua tla oksekimej okse inraza”. ¿Kenon okinpaleui tokniuan yejuin tlen okichiujkej?

⁶ Achtopa, se tokniuj siuatl itoka Noma akin tlajtoua xhosa, okpa kinemiliaya tla kimijlis tokniuan chipaujkej akin tlajtouaj inglés makitlajpalotij ichan maski xmiyek kipiya. San ika, sakin ijkuak otenojnots imiuan niman kuajli okiselijkej ijkuak yejua oyaj inchan, okijto: “¡Yejuamej noijki ijkon ken tejuamej!”. Ijkon tej, ijkuak oajsik tonajli ijkuak itlanechikol kinseliskia tokniuan akin tlajtouaj inglés, yejua otlakualchiuj niman okimijli sekimej mauiyan ichan. Se akin okinots katka se tlayekanketl chipauak. Tokniuj siuatl okijto: “Melak onechtlanemililti ika xtlaj okijto maski san onotlali ipan se caja tlachijchiujtli ika plástico tlen nion xuejkapan katka”. Tlen tokniuan okimijlikej makichiuakan ok nochiua hasta amanin. Ipampa yejuin, miyekej tokniuan, tlakamej niman siuamej, aman melak kuajli nouikaj niman melak kinektokej kimixmatiskej oksekimej tokniuan akin oksekan ualeuaj noso okse inraza.

7. ¿Tleka ok noneki matikteititikan teiknelilistli?

⁷ Nochi kech ok tinemiskej kampa Satanás  tlayekana, ok titlajyouijtoskej pampa xtlaj tekitl, ipampa temojtikej kokolistin, tlaueltotokalistli, itech tlen tlaixpoloua itech tlaltikpaktli, tlachtekilo niman okseki tlaueltin. Noneki melak matiteiknelikan niman matopaleuikan semej iuan oksekimej. Teiknelilistli techpaleuis matikinchiuilikan oksekimej tlen kuajli (Efes. 4:32). Yejuin kualneskayomej techpaleuiskej matikixkopinakan toTajtsin niman tikinyolseuiskej oksekimej (2 Cor. 1:3, 4).

8. ¿Tlenon panos tla titeikneliaj niman tikinchiuiliaj tlen kuajli oksekimej ipan totlanechikol? Xteneua se neskayotl.

⁸ Uelis panos ika ipan totlanechikol nemij akin ualeuaj itech okse país noso akin xkipiya miyek tomintsin. ¿Kenon uelis tikinchiuiliskej tlen melak kuajli? Matouikakan imiuan niman matikinpaleuikan makitakan ika melak tikimintlasojtlaj ipan tlanechikojli (1 Cor. 12:22, 25). Matikitakan tlenon ipan opanok Dannykarl, yejua okis Filipinas niman ochantito Japón. Kampa tekitiya xijkon kuajli kinotsayaj ken akin japoneses katkaj. San ika, se tonajli oyaj ipan se intlanechikol iteixpantijkauan Jehová. Yejua kilnamiki: “Miyekej japoneses ompa nemiyaj. Maski ijkon, onechselijkej ika tlasojtlalistli, kentla yeuejkaui toixmatstoskiaj”. Tokniuan nochipa kuajli iuan onouikakej, niman yejon okipaleui manouika iuan toTajtsin. Onoapolakti niman amanin yejua se tlayekanketl. Oksekimej tlayekankej ipan tlanechikojli kitaj ika yejua niman isiuauj, Jennifer, melak kuajli tlapaleuiyaj ipan tlanechikojli. Kijtouaj: “Yejuin tokniuan precursores xkitejtemouaj kipiyaskej miyek tlemach niman kitemakaj se kuajli neskayotl itech tiktejtemos kachtopa iTekiuajyo toTajtsin” (Luc. 12:31, TNM).

9, 10. ¿Tlenon tlateochiualistli yokiselijkej sekimej tokniuan akin teikneliaj ijkuak tenojnotsaj?

⁹ Ijkuak titenojnotsaj, techkauilia matikinchiuilikan oksekimej tlen kuajli (Gál. 6:10). Miyekej Teixpantijkej yopeujkej nomachtiaj se yenkuik tlajtojli pampa kimikneliaj akin ualeuaj okseki países (1 Cor. 9:23). Niman yejuin melak yotlapaleui. Matitlanemilikan ipan Tiffany, se precursora akin kinekiya tlapaleuis ipan se tlanechikojli itech tlajtojli suajili tlen onka ipan kalpan Brisbane. Maski melak onokojtili nomachtis yejuin tlajtojli, kimachilia ika aman miyek youel ipan inemilis. Kijtoua: “Akin kinekis ipan manochiua tlen melak teyolpakti ipan tenojnotsalistli, kuakon matlapaleui ipan se tlanechikojli itech okse tlajtojli. Yejuin kentla yeskia uejka tias maski nion xtikisas itech mokalpan. Niman melak mitsyolpaktis itech kenon san sekan touikaj iuan nochimej tokniuan”.

¹⁰ Matikitakan aman tlen ipan onochiuj se familia akin chanti Japón. Imichpoch, akin itoka Sakiko, kijtoua: “Kanaj ipan 1990, ijkuak titenojnotsayaj tikinnextiayaj melak miyekej brasileños. Niman ijkuak tikinpouiliayaj inBiblia ika portugués tlaxeloltin  ken Apocalipsis 21:3, 4 noso Salmo 37:10, 11, 29, melak kuajli techkakiyaj niman kemantika hasta chokayaj”. San ika, iteiknelilis yejuin familia okinmapeuj makichiuakan okseki. Sakiko kijtoua: “Ijkuak otikitakej ika melak kinekiyaj kixmatiskej Jehová, nochi nochanejkauan otipeujkej tomachtiaj portugués”. Sakin, otlapaleuijkej manochiua se tlanechikojli ika tlajtojli portugués. Ipan miyek xiujtin, yokinpaleuijkej miyekej akin ualeuaj oksekan manochiuakan itekipanojkauan Jehová. Sakiko kijtoua: “Ononek melak tokojtiliskej niman ijkon tiueliskej portugués, san ika, yotikinselijkej miyek tlateochiualistin. Ipampa yejuin melak tiktlasojkamachiliaj Jehová” (xpoua Hechos 10:34, 35).

11, 12. a) ¿Tlenon noneki matechmapeua matotlalilikan yenkuik nemilistli? b) ¿Tlenon techpaleuis maka matijkauakan ika tiyolyemankej?

¹¹ Tlen kipiya techmapeuas matiyolyemankej, yejua ika tiknekij tikueyichiuaskej Jehová, niman xpampa tiknekij kuajli matlajtokan totechkopa. Matikilnamikikan ika hasta se iluikaktekitketl akin xkipiaya tlajtlakojli, otlajtlako pampa onoueyimat (uelis tikitas Ezequiel 28:17). Tejuamej melak techouijmaka tikmapeuaskej ueyimatilistli pampa titlajtlakolejkej. Maski ijkon, uelis totlakentiskej ika yolyemanilistli. ¿Kenon?

¹² Noneki mojmostla tikxeloskej tonajli niman titlanemiliskej itech tlen tikpouaj ipan Biblia (Deut. 17:18-20). Itlaj tlen melak techpaleuis, yejua tla titlanemilia ipan itlamachtiluan Jesús niman ikuajli neskayo itech yolyemanilistli (Mat. 20:28). Yejua sajnoye yolyemanki katka, hasta okinmikxipajpak itlatitlankauan (Juan 13:12-17). Noijki noneki nochipa matiktlajtlanilikan iespíritu toTajtsin niman ijkon uelis tokixtiliskej tlanemililtin tlen kichiua matomachilikan tiuejueyimej xijkon ken oksekimej (Gál. 6:3, 4; Filip. 2:3).

13. ¿Tlenon tikseliskej tla tiyolyemankej?

¹³ (Xpoua Proverbios 22:4). * Jehová kineki ika tinochimej tiitekitkauan matiyolyemankej. Tla ijkon tikchiuaj, tikseliskej miyek tlateochiualistin. Se neskayotl, titlapaleuiskej ika san sekan matinemikan niman maonia yolseuilistli ipan tlanechikojli. Noijki, Jehová techmakas iteiknelilis. Apóstol Pablo okijto: “Xmouikakan iuan oksekimej ikan yolyemanilistli pampa on Yektlajkuilojli kijtoua: Dios xkinselia on yejuan noueyimatkej, pero yejua kimpaleuiya ikan iteiknelilis on yejuan yolyemankej” (1 Ped. 5:5).

14. ¿Akinon techmaka melak kuajli neskayotl itech yolseuilistli niman teijyouilistli?

¹⁴ Ipan yejuin tonajli, nemij akin kinemiliaj ika akin yolseujkej niman teijyouiyaj, nion xkojtikej. San ika, yejuin xmelauak. Yejuin kualtsitsintin kualneskayomej ualeuaj itech Jehová, akin melak kojtik ipan nochi tlaltikpaktli niman iluikak. Yejua akin kitemaka melak kuajli neskayotl itech yolseuilistli niman ijyouilistli (2 Ped. 3:9, TNM). Yejuin tikitaj itech kenon ika iiluikaktekitkauan okinankili Abrahán niman Lot ijkuak miyek okitlajtoltijkej (Gén. 18:22-33; 19:18-21). Noijki, kanaj itech mil quinientos xiujtin, Jehová melak okijyoui kalpan Israel akin melak xtetlakamatiya (Ezeq. 33:11).

15. ¿Tlen neskayotl otechmakak Jesús?

¹⁵ Jesús yolseujki katka (Mat. 11:29). Melak kuajli okijyoui ijkuak inomachtijkauan nopopolouayaj. Ijkuak onen ipan tlaltikpaktli, okixiko ika teopixkej kitejteneuayaj niman kitlajtlakoltiayaj itech tlen xkimelauaya. Niman onen yolseujki niman oteijyoui hasta ijkuak okimiktijkej. Ijkuak pilkatoya ipan kojtli melaktik niman melak nokokojtoya, okitlajtlanili Jehová makintlapopolui akin kimiktitoyaj. Okijto: “Xkintlapopolui, pampa  xkimatij tlen kichiuaj” (Luc. 23:34, TNM). Ken yotikitakej, Jesús oyaj yolseujki niman oteijyoui maski melak okitlajyouiltijkej. ¡Melak kuajli neskayotl otechmakak! (Xpoua 1 Pedro 2:21-23).

16. ¿Kenon uelis tikteititiskej yolseuilistli niman ijyouilistli?

¹⁶ ¿Kenon uelis tikteititiskej yolseuilistli niman ijyouilistli? Se ken uelis tikteititiskej, yejua ijkuak titetlapopoluiyaj. Pablo okimijkuilouili akin kichiuaj ken Cristo: “Nemejuamej xtenotsakan, niman xmoyolyemanilikan iuan oksekimej, niman xmotlapojpoluikan iuan oksekimej ijkon ken Dios omechtlapojpoluij itechkopa Cristo” (Efes. 4:32). Kuajli nesi ika noneki tiyolseujkej yeskej niman titeijyouiskej niman ijkon tiktlakamatiskej yejuin tlanauatijli. Ijkuak ijkon tikchiuaj, titlapaleuiyaj ika ipan totlanechikol san sekan matouikakan.

17. ¿Tleka melak noneki matiyolseujkej niman matiteijyouikan?

¹⁷ Jehová technauatia matotlakentikan ika yolseuilistli niman ijyouilistli. Yejuin kualneskayomej melak noneki matikinpiyakan tla tiknekij tinemiskej ipan yenkuik tlaltikpaktli (Mat. 5:5; Sant. 1:21). Niman tlen melak kuajli, tla tikinpiyaj, tikueyichiuaskej Jehová niman tikinpaleuiskej oksekimej makitlakamatikan tlen temachtia Biblia (Gál. 6:1; 2 Tim. 2:24, 25).

18. ¿Kenon san sekan nouikaj titetlasojtlas niman xtitechikoitas?

¹⁸ Nochi kualneskayomej tlen yotikimitakej ipan yejuin tlamachtijli nouikaj iuan tlasojtlalistli. Se neskayotl, Santiago, inomachtijkauj Cristo, ononek kinyektlalis imikniuan pampa san kuajli inuan nouikayaj akin kipiayaj tomin niman akin xkipiayaj ka. Okimijli ika tlen kichiuayaj kixnamikiya yejuin itlanauatil toTajtsin: “Xkintlajsojtla oksekimej ijkon ken tejua timotlajsojtla”. Noijki okijto: “Tla nenkichikoitaj se tlakatl iuan okse, nentlajtlakouaj” (Sant. 2:8, 9). Tla tikintlasojtla oksekimej, kichiuas maka matiknemilikan tlen xkuajli itech oksekimej ipampa kech onomachtijkej, inraza noso ken kimitaj oksekimej. Xtitechikoitas xuelis san ika moxayak tikteititis, yejuin kipiya ika onias ipan tonemilis tlen yenkuik.

19. ¿Tleka melak noneki matotlakentikan ika tlasojtlalistli?

¹⁹ Tlasojtlalistli noijki teijyouiya, yolkuajli niman xnoueyimati (1 Cor. 13:4). Ika yejon, noneki matikpiyakan yolseuilistli, matiktechiuilikan tlen kuajli niman matiyolyemankej, ijkon uelis tikinnojnotsaskej oksekimej itech Tekiuajyotl (Mat. 28:19, TNM). Yejuin kualneskayomej noijki techkauiliskej kuajli matouikakan iuan nochimej tokniuan ipan tlanechikojli. Tla tinochimej ijkin titetlasojtlaj, tlanechikoltin san sekan nemiskej niman kiueyichiuaskej Jehová. Noijki, oksekimej kinekiskej kixmatiskej tlen melauak. Ika yejon, ijkuak Biblia techtomilia itech yenkuik nemilistli ijkin ontlami: “Xmotlajsojtlakan iuan oksekimej, pampa on tetlajsojtlalistli kajxitia nochi in tlajtlamach” (Col. 3:14).

20. a) ¿Tlenon kipiya totlajtoltiskej, niman tleka? b) ¿Tlenon tikchiaj ika nochi toyojlo?

²⁰ Tinochimej kipiya totlajtoltiskej: “¿Tlenon okseki uelis nikchiuas niman ijkon nikpatlas nonemilis iyeka?”. Kipiya ika tiktlatlaujtiskej Jehová matechpaleui niman noijki melak matokojtilikan tikinpopoloskej tlanemililtin niman tlen uelis kichiuas maka matikalakikan ipan Tekiuajyotl (Gál. 5:19-21). Noijki noneki totlajtoltiskej: “¿Ok nikpatlatiuj kenon nitlanemilia niman ijkon nikpaktis Jehová?” (Efes. 4:23, 24, TNM). Pampa ok titlajtlakolejkej, nochipa nonekis matokojtilitokan totlalilijtoskej yenkuik nemilistli. ¡Melak kualtsin yes tonajli ijkuak nochimej tlaltikpakchanejkej xok titlajtlakolejkej yeskej niman iyeka totlalilijtoskej se yenkuik nemilistli!