1, 2. а) Кӕцӕй йӕ зонӕм, нӕ бон кӕй у нӕ уӕлӕ ног удыхъӕд скӕнын? б) Колоссӕгтӕм 3:10–14 стихтӕй цавӕр миниуджыты тыххӕй у нӕ бон базонын?

БИБЛИЙЫ цы ног удыхъӕды кой ис, уый «конд у Хуыцауы фӕндонмӕ гӕсгӕ» (Еф. 4:24; Кол. 3:10). Цымӕ нӕ бон бауыдзӕн нӕ уӕлӕ уыцы ног удыхъӕд скӕнын? О, уымӕн ӕмӕ Йегъовӕ адӕмы йӕхимӕ гӕсгӕ сфӕлдыста, ӕмӕ нӕ бон у йӕ рӕсугъд миниуджытӕ фӕзмын (Райд. 1:26, 27; Еф. 5:1).

² Нӕ туджы тӕригъӕд кӕй рахастам, уый тыххӕй нӕ алкӕмӕ дӕр хатт фӕзыны ӕвзӕр хъуыдытӕ ӕмӕ фӕндтӕ. Стӕй ма ныл тынг ӕндавы, кӕм ӕмӕ цы адӕмы ’хсӕн цӕрӕм, уый дӕр. Фӕлӕ Йегъовӕ фӕлмӕнзӕрдӕ кӕй у ӕмӕ нын кӕй ӕххуыс кӕны, уый фӕрцы уый гӕнӕн ис, цӕмӕй, Йегъовӕйы зӕрдӕмӕ цавӕр адӕймӕгтӕ цӕуы, ахӕм адӕймӕгтӕ суӕм. Ӕмӕ нӕ цӕмӕй уый ноджы тынгдӕр бафӕнда, уый тыххӕй ӕркӕсӕм, ног удыхъӕдмӕ цы миниуджытӕ хауы, уыдонӕй цалдӕрмӕ. (Бакӕс Колоссӕгтӕм 3:10–14.) Стӕй ма ӕркӕсдзыстӕм, уыцы миниуджытӕ нӕ бон уацамынды ӕвдисын куыд у, уымӕ дӕр.

3. Ног удыхъӕды миниуджытӕй иу цавӕр у?

³ Павел бамбарын кодта, адӕймаг макӕй хъулон кӕна, уый кӕй у ног удыхъӕды ахсджиагдӕр миниуджытӕй сӕ иу. Уый загъта: «Йӕ удыхъӕд кӕмӕн сног, уымӕн та уӕлдай нӕу, адӕймаг грекъаг у ӕви дзуттаг, сунӕтгонд ӕви ӕнӕсунӕт, ӕцӕгӕлон, скиф, цагъар ӕви сӕрибар». Ӕмбырды хъуамӕ йӕхи иннӕтӕй хуыздӕрыл мачи нымайа мадӕр йӕ буары хуызы тыххӕй, мадӕр йӕ адӕмыхатты тыххӕй, мадӕр, ӕхсӕнады цы бынат ахсы, уый тыххӕй. Цӕуылнӕ? Уымӕн ӕмӕ мах стӕм Чырыстийы фӕдылдзӕуджытӕ, ӕмӕ не ’ппӕт дӕр «стӕм иу» (Кол. 3:11; Гал. 3:28).

4. а) Йегъовӕйы лӕггадгӕнджытӕ иннӕтӕм цы цӕстӕй хъуамӕ кӕсой? б) Чырыстӕтты ’хсӕн иудзинад уа, уый хатт уӕлдай зын цӕй тыххӕй вӕййы?

⁴ Йӕ уӕлӕ ног удыхъӕд чи скодта, уый хотӕн ӕмӕ ’фсымӕртӕн, стӕй иннӕтӕн дӕр кад кӕны, цыфӕнды буары хуыз сын ма уа ӕмӕ ӕхсӕнады цыфӕнды бынат ма ахсой, уӕддӕр (Ром. 2:11). Иуӕй-иу бӕстӕты уый уӕлдай зын вӕййы. Зӕгъӕм, кӕддӕр Хуссар-Африкаг Республикӕйы хицауад сӕ адӕмы расӕтӕм гӕсгӕ хицӕнтӕй ӕрцӕрын кодта. Ӕмӕ дзы сӕ фылдӕр ныр дӕр ма уыцы рӕтты цӕрынц, уыимӕ Йегъовӕйы Ӕвдисӕнтӕ дӕр. Разамонӕг советы фӕндыд ӕфсымӕрты баразӕнгард кӕнын, цӕмӕй сӕ «зӕрдӕтӕ уӕрӕх байгом кодтаиккой». Гъемӕ 2013 азы октябры сфӕнд кодтой иу хъуыддаг саразын, цӕмӕй урсцъар ӕмӕ сауцъар хотӕ ӕмӕ ’фсымӕртӕ кӕрӕдзи хуыздӕр базыдтаиккой (2 Кор. 6:13).

5, 6. а) Иу бӕстӕйы цы сарӕзтой, цӕмӕй Хуыцауы адӕмы ’хсӕн иудзинады тӕгтӕ сфидар уыдаиккой? (Кӕс нывмӕ статьяйы райдианы.) б) Уый фӕрцы сын цы бантыст?

⁵ Ӕфсымӕртӕ афтӕ спълан кодтой, цӕмӕй-иу кӕцыдӕр къуыриты сабат ӕмӕ хуыцаубоны, урсцъар Ӕвдисӕнтӕ кӕм уыд, ахӕм ӕмбырд, сауцъар Ӕвдисӕнтӕ кӕм уыд, ахӕм ӕмбырдимӕ рӕстӕг ӕрвыстаид. Дыууӕ ӕмбырдӕй дӕр хотӕ ӕмӕ ’фсымӕртӕ иумӕ хъусын кӕнынмӕ ӕмӕ ӕмбырдтӕм цыдысты, стӕй-иу кӕрӕдзи уазӕгуаты дӕр фӕхуыдтой. Афтӕ бацархайдтой цалдӕр сӕдӕ ӕмбырды. Уый фӕдыл филиал бирӕ хорз писмотӕ райста. Суанг ма, Йегъовӕйы Ӕвдисӕнтӕ чи нӕ уыдысты, уыдон дӕр дисы бафтыдысты. Зӕгъӕм, иу дины кусӕг загъта: «Ӕз Йегъовӕйы Ӕвдисӕн нӕ дӕн. Фӕлӕ мӕ зӕгъын фӕнды, хъусын кӕныны хъуыддагӕн уӕм цы ’гъдау ӕмӕ фӕтк ис, уый диссаг у. Стӕй уе ’хсӕн ис иудзинад, уӕ кӕрӕдзи буары хуызмӕ гӕсгӕ нӕ хъулон кӕнут». Цымӕ хотӕ ӕмӕ ’фсымӕртыл та уыцы хабар куыд фӕзынд?

⁶ Ӕвзаг косӕйыл дзурӕг хо, Номӕ, зӕгъгӕ, фыццаг рӕстӕг тынг тыхсти, англисаг ӕмбырдӕй йӕ урсцъар ӕфсымӕрты йӕ хуымӕтӕг хӕдзармӕ фӕхонын кӕй хъӕудзӕн, ууыл. Фӕлӕ семӕ хъусын кӕнынмӕ ӕмӕ сӕм уазӕгуаты цас арӕхдӕр цыд, уыйас ын семӕ ӕнцондӕр уыд. Номӕ загъта: «Уыдон дӕр мах хуызӕн адӕймӕгтӕ куы сты!» Ӕмӕ ӕвзаг косӕйыл дзурӕг ӕмбырды рад куы ’рцыд, цӕмӕй англисаг ӕмбырд сӕхимӕ суазӕг кодтаиккой, уӕд Номӕ хӕринаг ӕрцӕттӕ кодта ӕмӕ дзы кӕйдӕрты уазӕгуаты фӕхуыдта. Номӕ тынг бадис кодта, йӕ уазджытӕй иу, урсцъар хистӕр нӕлгоймаг, ӕнӕзивӕгӕй ныллӕг пластмасс асыккыл куы сбадт, уӕд. Хуссар-Африкаг Республикӕйы ӕмбырдтӕ ныр дӕр афтӕ архайынц. Уый фӕрцы бирӕ хотӕ ӕмӕ ӕфсымӕртӕ сӕхицӕн ног ӕмбӕлттӕ ссардтой ӕмӕ дарддӕр дӕр кӕрӕдзиимӕ хуыздӕр зонгӕ кӕнынц.

7. Иннӕты зын алкӕддӕр нӕ зӕрдӕмӕ арф цӕмӕн хъуамӕ исӕм?

⁷ Цалынмӕ Хӕйрӕджы дунейӕн кӕрон не ’рцӕуа, уӕдмӕ Йегъовӕйы адӕм зындзинӕдтыл ӕмбӕлдзысты. Уыцы зындзинӕдтӕм хауы, куыст ссарын зын кӕй у, уый, алыхуызон низтӕ, ӕрдзон бӕллӕхтӕ, къӕрныхтӕ адӕймагӕн йӕ исбон кӕй фӕхӕссынц, уый ӕмӕ ӕндӕр ахӕм хабӕрттӕ. Цӕмӕй-иу зын рӕстӕджыты  кӕрӕдзийы фарсмӕ балӕууӕм, уый тыххӕй хъуамӕ иннӕты зын нӕ зӕрдӕмӕ арф исӕм. Ӕмӕ афтӕ куы кӕнӕм, уӕд та сӕм хӕларзӕрдӕдзинад дӕр ӕвдисдзыстӕм ӕмӕ сын ӕххуыс кӕндзыстӕм (Еф. 4:32). Уыцы миниуджытӕ хауынц ног удыхъӕдмӕ. Ӕмӕ нын уыдон ӕххуыс кӕндзысты, цӕмӕй Хуыцауы фӕзмӕм ӕмӕ иннӕтӕн удӕнцойы хос уӕм (2 Кор. 1:3, 4).

8. Иннӕты зын нӕ зӕрдӕмӕ куы фӕисӕм ӕмӕ ӕмбырды алкӕмӕ дӕр хӕларзӕрдӕ куы вӕййӕм, уӕд уый цы пайда ӕрхӕссы? Ӕрхӕсс цӕвиттон.

⁸ Кӕд не ’мбырды ӕрлидзджытӕ кӕнӕ мӕгуыртӕ ис, уӕд уыдонмӕ та нӕ бон куыд у ноджы стырдӕр хӕларзӕрдӕдзинад равдисын? Семӕ-иу балымӕн уӕм ӕмӕ-иу бацархайӕм, цӕмӕй бамбарой, ӕмбырды кӕй хъӕуынц, уый (1 Кор. 12:22, 25). Ӕркӕсӕм-ма Данникарлы цӕвиттонмӕ. Уый Филиппинтӕй цӕрынмӕ ацыд Японимӕ. Фӕсарӕйнаг кӕй уыд, уый тыххӕй йӕм куысты иннӕтӕй ӕвзӕрдӕр цӕстӕй кастысты. Фӕлӕ стӕй ӕрбацыд Йегъовӕйы Ӕвдисӕнты ӕмбырдмӕ. Данникарл загъта: «Ӕмбырды сӕ фылдӕр япойнӕгтӕ уыдысты, фӕлӕ мӕ афтӕ суазӕг кодтой, раст мӕ цыма рагӕй зыдтой». Хотӕ ӕмӕ ’фсымӕртӕ ахӕм хӕларзӕрдӕ кӕй уыдысты, уый фӕрцы Йегъовӕмӕ ӕввахсдӕр кодта. Цасдӕры фӕстӕ Данникарл донаргъуыд райста ӕмӕ ныр лӕггад кӕны хистӕр нӕлгоймагӕй. Хистӕр нӕлгоймӕгтӕ тынг цин кӕнынц, Данникарл ӕмӕ йӕ бинойнаг Дженнифер се ’мбырды кӕй сты, ууыл. Афтӕ зӕгъынц: «Уыдон лӕггад кӕнынц пионертӕй ӕмӕ тынг хуымӕтӕг цард кӕнынц. Фыццаджыдӕр Хуыцауы Паддзахад кӕй агурынц, уымӕй сты фӕзминаг» (Лук. 12:31).

9, 10. Уацамынды иннӕты зын нӕ зӕрдӕмӕ арф куы айсӕм, уӕд уый цавӕр арфӕдзинӕдтӕ ӕрхӕссы? Ӕрхӕсс цӕвиттонтӕ.

⁹ Хуыцауы Паддзахады тыххӕй хорз хабар куы фӕхъусын кӕнӕм, уӕд нын вӕййы фадат, цӕмӕй «алкӕмӕн дӕр хорздзинад аразӕм» (Гал. 6:10). Бирӕ Ӕвдисӕнтӕ ӕрлидзджыты зын сӕ зӕрдӕмӕ арф айсынц ӕмӕ бацархайынц, цӕмӕй сын се ’взаг сахуыр кӕной (1 Кор. 9:23). Уый стыр арфӕдзинӕдтӕ ӕрхӕссы. Зӕгъӕм, иу пионер-хо Австралийӕ, Тиффани, зӕгъгӕ, сахуыр кодта ӕвзаг суахили, цӕмӕй горӕт Брисбены суахилийыл дзурӕг ӕмбырдӕн ӕххуыс кодтаид. Ӕнцон ын нӕ уыд ӕвзаг сахуыр кӕнын, фӕлӕ уый фӕрцы сси амондджындӕр. Тиффани зӕгъы: «Кӕд дӕ фӕнды, цӕмӕй дыл дӕ лӕггадӕй базыртӕ базайа, уӕд ӕндӕр ӕвзагыл дзурӕг ӕмбырдмӕ ахиз. Уый у, цыма дӕхи горӕты балцы ацыдтӕ, афтӕ. Адӕймаг йӕхи цӕстӕй фены, алы бӕстӕты нын цы хотӕ ӕмӕ ’фсымӕртӕ ис ӕмӕ не ’хсӕн цы диссаджы иудзинад ис, уый».

¹⁰ Ӕркӕсӕм-ма иу япойнаг бинонты хабармӕ дӕр. Сӕ чызг Сакико дзуры: «Уацамынды-иу арӕх амбӕлдыстӕм Бразилийӕ ӕрлидзӕг адӕмыл. Португайлаг Библийы сын-иу стихтӕ куы равдыстам, зӕгъӕм, Раргомад 21:3, 4 кӕнӕ  Псалом 37:10, 11, 29, уӕд-иу нӕм дзӕбӕх байхъуыстой, хатт ма-иу сӕ цӕссыг дӕр нӕ баурӕдтой». Уыцы бинонтӕ ӕрлидзджыты зын сӕ зӕрдӕмӕ арф айстой ӕмӕ сӕ фӕндыди, цӕмӕй сын баххуыс кодтаиккой рӕстдзинад базонынӕн. Гъемӕ ӕнӕхъӕн бинонтӕй дӕр португайлаг ӕвзаг ахуыр кӕнын райдыдтой. Фӕстӕдӕр та бирӕ сарӕзтой, цӕмӕй дзы португайлаг ӕмбырд фӕзындаид. Бирӕ азты дӕргъы уыдон иу ӕмӕ дыууӕ ӕрлидзӕгӕн нӕ баххуыс кодтой, цӕмӕй Йегъовӕйы лӕггадгӕнджытӕ суыдаиккой. Сакико зӕгъы: «Цӕмӕй португайлаг ӕвзаг сахуыр кодтаиккам, уый тыххӕй нӕ бирӕ бафыдӕбон кӕнын хъуыди, фӕлӕ нын уый цы арфӕдзинӕдтӕ ӕрхаста, уыдон уый аргъ сты. Йегъовӕйӕ тынг бузныг стӕм». (Бакӕс Хъуыддӕгтӕ 10:34, 35.)

11, 12. а) Ног удыхъӕд скӕнын нӕ цӕмӕн хъуамӕ фӕнда ӕмӕ уымӕ раст цӕстӕй цӕмӕн хъуамӕ кӕсӕм? б) Цы нын баххуыс кӕндзӕн, цӕмӕй сӕрныллӕг уӕм?

¹¹ Ног удыхъӕд скӕнын нӕ уый тыххӕй хъуамӕ ма фӕнда, цӕмӕй нӕ иннӕтӕ ’ппӕлой, фӕлӕ цӕмӕй Йегъовӕйы скадджын кӕнӕм. Дӕ зӕрдыл дар, ӕххӕст зӕд дӕр ма кӕй сси сӕрбӕрзонд ӕмӕ тӕригъӕд кӕй сарӕзта. (Абар Йезекилы 28:17.) Мах та ӕнӕххӕст стӕм, ӕмӕ нын бирӕ зындӕр у нӕхи сӕрбӕрзонддзинадӕй хизын. Фӕлӕ уӕддӕр нӕ бон у, ӕмӕ сӕрныллӕг уӕм. Цӕй фӕрцы?

¹² Алы бон дӕр Хуыцауы Ныхас куы кӕсӕм ӕмӕ йыл куы хъуыды кӕнӕм, уӕд нын уый ӕххуыс кӕндзӕн, цӕмӕй сӕрныллӕг уӕм (Дык. з. 17:18–20). Уӕлдайдӕр нӕ хъӕуы хъуыды кӕнын, Йесо Чырысти цӕуыл ахуыр кодта ӕмӕ куыд сӕрныллӕгӕй лӕггад кодта, ууыл (Матф. 20:28). Йесо ахӕм сӕрныллӕг уыд, ӕмӕ ма йӕ ахуыргӕнинӕгты къӕхтӕ дӕр ныхсадта (Иоан. 13:12–17). Уымӕй уӕлдай ма хъуамӕ Йегъовӕйӕ йӕ сыгъдӕг тых курӕм. Уый нын ӕххуыс кӕндзӕн, цӕмӕй нӕхи иннӕтӕй хуыздӕрыл ма нымайӕм (Гал. 6:3, 4; Фил. 2:3).

13. Сӕрныллӕг куы уӕм, уыд нын уый цавӕр арфӕдзинӕдтӕ ӕрхӕсдзӕн?

¹³ Бакӕс Ӕмбисӕндтӕ 22:4. Йегъовӕ куыд зӕгъы, афтӕмӕй йӕ лӕггадгӕнджытӕ иууылдӕр хъуамӕ уой сӕрныллӕг. Уый нын ӕрхӕсдзӕн бирӕ арфӕдзинӕдтӕ. Уый фӕрцы ӕмбырды уыдзӕн фарн ӕмӕ иудзинад. Уымӕй уӕлдай ма нӕ Йегъовӕ йе стыр хорзӕхӕй дӕр схайджын кӕндзӕн. Апостол Петр загъта: «Кӕрӕдзиимӕ уе ’ппӕт дӕр ут сӕрныллӕг, уымӕн ӕмӕ Хуыцау сӕрбӕрзонд адӕймӕгтӕн сӕ ныхмӕ у, сӕрныллӕгтӕн та хай кӕны йе стыр хорзӕхӕй» (1 Пет. 5:5).

14. Фӕлмӕн удыхъӕд ӕмӕ фӕразондзинад цы у, уый ӕппӕты хуыздӕр чи равдыста?

¹⁴ Ацы дунейы фӕлмӕн ӕмӕ фӕразон адӕймӕгты лӕмӕгъ адӕймӕгтыл нымайынц. Фӕлӕ уый афтӕ нӕу. Уыцы рӕсугъд миниуджытӕ фыццаджыдӕр сты Йегъовӕмӕ, Дун-дунейы ӕппӕты тыхджындӕр чи у, уымӕ. Фӕлмӕн удыхъӕд ӕмӕ фӕразондзинад цы у, уый ӕппӕты хуыздӕр Йегъовӕ равдыста (2 Пет. 3:9). Ахъуыды-ма кӕн, Авраам ӕмӕ йӕм Лот фарстатӕ куы лӕвӕрдтой, уӕд сын зӕдты уылты дзуапп куыд фӕразонӕй лӕвӕрдта, ууыл (Райд. 18:22–33; 19:18–21). Стӕй ма ноджыдӕр ахъуыды кӕн, 1 500 азӕй фылдӕр ӕгоммӕгӕс Израилы адӕммӕ фӕразондзинад куыд ӕвдыста, ууыл дӕр (Йез. 33:11).

15. Йесо фӕлмӕн ӕмӕ фӕразон адӕймаг кӕй уыд, уый цӕмӕй уыд бӕрӕг?

¹⁵ Йесо дӕр уыд фӕлмӕн удыхъӕды хицау (Матф. 11:29). Уый йӕ ахуыргӕнинӕгтимӕ уыд тынг фӕразон, быхста сын сӕ лӕмӕгъдзинӕдтӕн. Йесойы ныхмӕ-иу чи цыд, уыдон-иу ӕй арӕх ӕфхӕрдтой ӕмӕ-иу ӕй цавӕрдӕр хъуыддӕгты фӕаххосджын кодтой. Фӕлӕ уый суанг йӕ мӕлӕты онг дӕр уыд фӕлмӕн ӕмӕ фӕразон. Хъизӕмӕртты хъӕдыл удхар кӕнгӕйӕ, йӕ Фыдмӕ куывта, цӕмӕй, хъӕдыл ӕй чи байтыгъта, уыдонӕн ныххатыр кодтаид. Уый загъта: «Цы аразынц, уый  не ’мбарынц» (Лук. 23:34). Йесо цыфӕнды тыхст ма уыдаид ӕмӕ цыфӕнды рыст ма ’взӕрстаид, уӕддӕр уыд фӕлмӕн ӕмӕ фӕразон. (Бакӕс 1 Петры 2:21–23.)

16. Фӕлмӕн ӕмӕ фӕразон адӕймӕгтӕ кӕй стӕм, уый нӕ бон куыд у равдисын?

¹⁶ Фӕлмӕн ӕмӕ фӕразон адӕймӕгтӕ кӕй стӕм, уый нӕ бон цавӕр хъуыддӕгтӕй у равдисын? Иуы тыххӕй ныффыста Павел: «Исчи уӕ истӕмӕй куы фӕхъыг кӕна, уӕддӕр кӕрӕдзийӕн барут ӕмӕ зӕрдӕйӕ хатыр кӕнут. Йегъовӕ уын зӕрдӕйӕ куыд ныххатыр кодта, сымах дӕр хъуамӕ кӕрӕдзийӕн афтӕ хатыр кӕнат» (Кол. 3:13). Цӕмӕй нӕ бон уа иннӕтӕн хатыр кӕнын, уый тыххӕй хъуамӕ уӕм фӕлмӕн ӕмӕ фӕразон. Афтӕ куы кӕнӕм, уӕд ӕмбырды уыдзӕн иудзинад.

17. Фӕлмӕн ӕмӕ фӕразон уӕм, уый ахсджиаг цӕмӕн у?

¹⁷ Иннӕтимӕ фӕлмӕн ӕмӕ фӕразон уӕм, уый фӕндонӕй нӕу. Уый ӕнӕмӕнг у, цӕмӕй ног дунейы цӕрӕм (Матф. 5:5). Ӕппӕты ахсджиагдӕр та уый у, ӕмӕ нӕм ацы миниуджытӕ куы уой, уӕд Йегъовӕйӕн кад кӕндзыстӕм ӕмӕ иннӕты дӕр уымӕ разӕнгард кӕндзыстӕм (Гал. 6:1; 2 Тим. 2:24, 25).

18. Адӕймаг иннӕты уарза ӕмӕ макӕй хъулон кӕна, уыцы миниуджытӕ куыд баст сты?

¹⁸ Цы миниуджытыл аныхас кодтам, уыдон иууылдӕр баст сты уарзондзинадимӕ. Зӕгъӕм, Йесойы ахуыргӕнинаг Иаковы бахъуыд йе ’фсымӕртӕн уынаффӕ раттын, уымӕн ӕмӕ мӕгуыр адӕмы ницӕмӕ дардтой, хъӕздгуытӕн та хъулон митӕ кодтой. Иаков загъта, уыдон кӕй хӕлдтой Хуыцауы закъон, зӕгъгӕ, «иннӕты уарз, дӕхи куыд уарзыс, афтӕ». Стӕй ма загъта: «Кӕд хъулон митӕ кӕнут, уӕд тӕригъӕд аразут» (Иак. 2:8, 9). Адӕмы куы уарзӕм, уӕд сӕм ӕвзӕр цӕстӕй нӕ кӕсдзыстӕм нӕдӕр, ахуырад сӕм кӕй нӕй, уый тыххӕй, нӕдӕр сӕ буары хуызы тыххӕй, нӕдӕр, ӕхсӕнады цы бынат ахсынц, уый тыххӕй. Раст нӕ уыдзӕн, ӕмӕ нӕхи афтӕ ӕвдисӕм, цыма никӕй хъулон кӕнӕм. Уый хъуамӕ нӕ удыхъӕды уа.

19. Уарзондзинад нӕм цӕмӕн хъуамӕ уа?

¹⁹ Уымӕй уӕлдай ма «уарзондзинад бирӕ фӕразы ӕмӕ у хӕларзӕрдӕ», стӕй «йӕ сӕр бӕрзӕндты нӕ хӕссы» (1 Кор. 13:4). Хъуамӕ уӕм фӕразон, хӕларзӕрдӕ ӕмӕ сӕрныллӕг, цӕмӕй адӕмӕн дарддӕр дӕр хорз хабар хъусын кӕнӕм (Матф. 28:19). Ацы миниуджытӕ ма нын ӕххуыс кӕнынц, цӕмӕй не ’мбырды хотӕ ӕмӕ ’фсымӕртӕй алкӕимӕ дӕр хӕларӕй цӕрӕм. Алчидӕр нӕ ахӕм уарзондзинад куы февдисы, уӕд ӕмбырдты вӕййы иудзинад ӕмӕ Йегъовӕйӕн фӕхӕссынц кад. Иннӕтӕ дӕр уыцы иудзинад куы фенынц, уӕд сӕ бафӕнды рӕстдзинад базонын. Уымӕ гӕсгӕ Библийы ног удыхъӕды тыххӕй фӕстагмӕ фыст ис: «Уымӕй уӕлдай уӕ уӕлӕ скӕнут уарзондзинад, уымӕн ӕмӕ уый хуызӕн ницы иу кӕны ӕмӕ ницы бӕтты кӕрӕдзийыл» (Кол. 3:14, фип.).

20. а) Цавӕр фарстатыл хъуамӕ ахъуыды кӕнӕм ӕмӕ цӕмӕн? б) Цавӕр диссаджы фидӕнмӕ ӕнхъӕлмӕ кӕсӕм?

²⁰ Хъуамӕ нӕ алчидӕр ахъуыды кӕна ахӕм фарстайыл: «Цы ма мӕ хъӕуы саразын, цӕмӕй зӕронд удыхъӕд раласон ӕмӕ йӕ мӕ уӕлӕ мауал скӕнон?» Хъуамӕ Йегъовӕмӕ кувӕм ӕмӕ йын лӕгъстӕ кӕнӕм, цӕмӕй нын ӕххуыс кӕна. Хъӕуы нӕ ӕппӕт тыхтӕй архайын, цӕмӕй нӕ зондахаст фӕивӕм ӕмӕ не ’взӕр хъуыддӕгтӕ ныууадзӕм. Уӕд нӕ бон уыдзӕн «Хуыцауы паддзахад бынӕн» райсын (Гал. 5:19–21). Стӕй ма хъуамӕ ахъуыды кӕнӕм: «Дарддӕр дӕр архайын мӕ зондахаст ног кӕныныл?» (Еф. 4:23, 24). Мах стӕм ӕнӕххӕст, ӕмӕ хъуамӕ ӕдзухдӕр ӕппӕт тыхтӕй архайӕм, цӕмӕй нӕ уӕлӕ ног удыхъӕд скӕнӕм ӕмӕ йӕ мауал раласӕм. Ахъуыды-ма кӕн, цард куыд диссаг уыдзӕн, зӕххыл иууылдӕр сӕ уӕлӕ ног удыхъӕд куы скӕной ӕмӕ Йегъовӕйы рӕсугъд миниуджытӕ ӕххӕстӕй куы фӕзмой, уӕд!