1, 2. а) Кӕцӕй ӕй зонӕн, нӕ уодигъӕдӕ нӕуӕгмӕ раййевун нӕ бон ке ӕй, уой? б) Нӕуӕг уодигъӕди менеугутӕй Колоссӕгтӕмӕ 3:10–14 кӕцитӕбӕл дзурд цӕуй?

БИБЛИЙ ци нӕуӕг уодигъӕди кой цӕуй, е «конд ӕй Хуцауи фӕндонмӕ гӕсгӕ» (Еф. 4:24; Кол. 3:10). Мах бон дӕр ӕй нӕ уодигъӕдӕ нӕуӕгмӕ раййевун. Цӕмӕн ес уотӕ зӕгъӕн? Уомӕн ӕма нӕ Йеговӕ ӕхемӕ гӕсгӕ сфӕлдиста, ӕма мах бон дӕр ӕй ӕ дессаги менеугутӕ ӕвдесун (Райд. 1:26, 27; Еф. 5:1).

² Нӕ рагфиддӕлтӕй тӕрегъӕд нӕ тоги ке рахастан, уомӕ гӕсгӕ рӕстӕгӕй-рӕстӕгмӕ нӕ зӕрди фӕззиннуй лӕгъуз фӕндтӕ. Уомӕй уӕлдай ма, ци дуйней цӕрӕн, е дӕр нӕбӕл ӕнӕфӕззингӕ нӕй. Фал уӕддӕр Йегови фӕндуй, цӕмӕй хуарззӕрдӕ адӕн уӕн, ӕма е нӕ къохи бафтуйдзӕй ӕрмӕстдӕр е ’нхуси фӕрци. Ӕма цӕмӕй мах дӕр фӕндӕуа еци гъуддаги зӕрдиагӕй архайун, уой туххӕй ӕркӕсӕн нӕуӕг уодигъӕди кӕцидӕр  менеугутӕмӕ. (Бакӕсӕ Колоссӕгтӕмӕ 3:10–14.) Удта ма ӕркӕсдзиан нӕ бон куд ӕй еци менеугутӕ нӕ лӕггади дӕр ӕвдесун.

3. Нӕуӕг уодигъӕди бӕрӕггӕнӕнтӕй сӕ еу цӕхуӕн ӕй?

³ Апостол Павел балӕдӕрун кодта, цӕмӕй нӕ уодигъӕдӕ нӕуӕгмӕ раййевӕн, уой туххӕй нӕ алкӕмӕдӕр ӕмхузӕн цӕстӕй кӕсун ке гъӕуй. Е финста: «Уӕлдай нӕй, адӕймаг грекъаг ӕй ӕви дзиуиттаг, сонӕтгонд ӕви ӕнӕсонӕт, ӕцӕгӕлон, скиф, цагъар ӕви сӕребарӕ». Ӕмбурди уотӕ гъӕуама маке сагъӕс кӕна, ӕма иннетӕй хуӕздӕр ӕй, нӕдӕр ци адӕнихаттӕй ӕй, уой туххӕй, нӕдӕр ин адӕни астӕу ци бунат ес, уой туххӕй. Цӕмӕннӕ? Уомӕн ӕма Киристей фӕдбӕлдзӕугутӕ ӕгасӕйдӕр ӕнцӕ еу (Кол. 3:11; Гал. 3:28).

4. а) Йегови лӕггадгӕнгутӕ иннетӕмӕ ци цӕстӕй гъӕуама кӕсонцӕ? б) Киристон еудзийнадӕ ӕвдесун зиндӕр кӕд фӕууй?

⁴ Нӕ уодигъӕдӕ нӕуӕгмӕ ку раййевӕн, уӕд адӕнӕн аргъ кӕндзиан ӕма сӕ нимайдзиан, цийфӕнди адӕнихаттӕй ма уонцӕ кенӕ син адӕни астӕу цийфӕнди бунат ма уа, уӕддӕр (Ром. 2:11). Кӕцидӕр бӕстити уотӕ архайун уӕлдай зин фӕууй. Зӕгъӕн, Хонсар Африкаг республики нур дӕр ма ес, ӕрмӕстдӕр уорсцъарӕ кенӕ ӕрмӕстдӕр сауцъарӕ адӕн кӕми цӕруй, уӕхӕн районтӕ. Сауӕнгӕ ма ӕ ниййергутӕ фӕйнӕхузи адӕнихаттӕй кӕмӕн ӕнцӕ, уонӕн дӕр хецӕн районтӕ ес. Йегови Ӕвдесӕнтӕй дӕр беретӕ уӕхӕн районти цӕрунцӕ. Уомӕ гӕсгӕ Разамонӕг совет ӕнсувӕрти баразӕнгард кодта, цӕмӕй сӕ «зӕрдитӕ уӕрӕхдӕр райгон кодтайуонцӕ». Уой туххӕй 2013 анзи октябри искодтонцӕ еу сӕрмагонд программӕ. Еци программи фӕрци, аллихузи адӕнихӕттитӕй ка адтӕй, еци хуӕртӕ ӕма ӕнсувӕртӕ гъӕуама кӕрӕдзей хуӕздӕр базудтайуонцӕ (2 Кор. 6:13).

5, 6. а) Еу бӕсти ци искодтонцӕ, цӕмӕй Хуцауи адӕн кӕрӕдзей хуӕздӕр базононцӕ? (Кӕсӕ хузӕмӕ статьяй райдайӕни.) б) Е цӕхуӕн хуарз гъуддӕгтӕмӕ ӕркодта?

⁵ Еци программӕмӕ гӕсгӕ, кӕцидӕр уолӕфӕн бӕнтти, гъӕуама сӕ рӕстӕг еумӕ ӕрвистайуонцӕ, фӕйнӕхузи ӕвзӕгтӕбӕл ка дзоруй ӕма фӕйнӕхузи адӕнихаттӕй ка ’нцӕ, дууӕ уӕхӕн ӕмбурди. Хуӕртӕ ӕма ӕнсувӕртӕ гъӕуама еумӕ игъосун кодтайуонцӕ, ӕмбурдмӕ еумӕ цудайуонцӕ ӕма кӕрӕдзей иуазӕгуати худтайуонцӕ. Еци программи архайд райстонцӕ сӕдӕгай ӕмбурдтӕ, ӕма уой фӕдбӕл бунӕттон филиалмӕ ӕрбацудӕй берӕ хуарз финстӕгутӕ, сауӕнгӕ ма Йегови Ӕвдесӕн ка нӕй, уонӕй дӕр. Зӕгъӕн, еу саугин загъта: «Ӕз Ӕвдесӕн нӕ дӕн. Фал ӕй уинун, уӕ игъосун кӕнуни гъуддаги уин берӕ ке ’нтӕсуй, удта уӕ кӕрӕдзей дӕр адӕнихӕттитӕбӕл ке нӕ дех кӕнтӕ». Цума бунӕттон хуӕртӕ ӕма ӕнсувӕртӕ ба еци программи туххӕй ци зӕгъунцӕ?

⁶ Коса ӕвзагбӕл ка дзоруй, еу уӕхӕн хуӕрӕ, Номӕ, фиццӕгти не ’ндиудта англисаг ӕмбурдӕй ӕнсувӕрти ӕ мӕгур хӕдзарӕмӕ ӕрбахонун. Фал фӕстӕдӕр еци ӕмбурдӕй еу хуӕри хӕццӕ ку балӕггадӕ кодта, ӕма имӕ иуазӕгуати ку адтӕй, уӕд загъта: «Атӕ дӕр нӕхе хузӕн адӕн ку ’нцӕ!» Гъема  се ’мбурдмӕ англисаг ӕмбурдӕй хуӕртӕ ӕма ӕнсувӕртӕ игъосун кӕнунмӕ ку ӕрбацудӕнцӕ, уӕд си Номӕ цалдӕрей сӕхемӕ рӕфтад искӕнунмӕ ӕрбахудта. Номӕмӕ дессаг фӕккастӕй, уорс цъарӕ хестӕр нӕлгоймагӕн, пластиккӕй конд ниллӕг ящикбӕл исбадун куд ӕхцӕуӕн адтӕй, е. Еци программӕ нур дӕр ма цӕуй ӕма уой фӕрци берӕ хуӕртӕ ӕма ӕнсувӕртӕ сӕхецӕн нӕуӕг ӕмбӕлттӕ иссирдтонцӕ. Ӕма сӕ идарддӕр дӕр уотӕ архайун фӕндуй.

7. Иннети зин алкӕддӕр цӕмӕн гъӕуама лӕдӕрӕн?

⁷ Цалинмӕ Сайтани дуйнейӕн ӕ кӕрон нӕма ӕрцудӕй, уӕдмӕ ма Хуцауи адӕн цӕхуӕндӕр зиндзийнӕдтӕбӕл ӕмбӕлунцӕ. Зӕгъӕн, кӕмӕндӕр куст иссерун зин ӕй, кенӕ уӕззау незӕй фӕссӕйгӕ ӕй, кенӕ ба ӕ дини туххӕй ӕфхуӕрд ӕййафуй. Кадӕр ни ӕрдзон бӕллӕхи бахаудтӕй, кадӕр ба фудгӕнгути фудӕй ӕ мулк фесафта ӕма уотӕ идарддӕр. Цӕмӕй уӕхӕн зиндзийнӕдти рӕстӕг федар фӕллӕууӕн, уой туххӕй гъӕуама кӕрӕдзей зин лӕдӕрӕн. Иннети зин ку лӕдӕрӕн, уӕд нӕ е разӕнгард кӕндзӕй, цӕмӕй сӕмӕ хӕларзӕрдӕ уӕн (Еф. 4:32). Аци менеугутӕ нӕуӕг уодигъӕдӕмӕ хаунцӕ ӕма нин ӕнхус кӕнунцӕ, цӕмӕй Хуцауи фӕнзӕн ӕма иннети нифс федар кӕнӕн (2 Кор. 1:3, 4).

8. Ӕмбурди алкӕмӕдӕр хӕларзӕрдӕ ку уӕн, уӕд е цӕхуӕн хуарз гъуддӕгтӕмӕ ӕркӕндзӕй? Ӕрхӕссӕ цӕветтон.

⁸ Нӕ бон куд ӕй никки хӕларзӕрдӕдӕр ун, не ’мбурди ӕндӕр бӕстӕй ка ӕй кенӕ мӕгур цард ка кӕнуй, уонӕмӕ? Гъӕуама байархайӕн, цӕмӕй син хуарз ӕмбӕлттӕ уӕн, ӕма ’й фӕууинонцӕ, ӕмбурди син устур аргъ ке кӕнунцӕ (1 Кор. 12:22, 25). Ӕркӕсӕн Данникарли хабармӕ. Данникарл Филиппинтӕй ралигъдӕй Японимӕ. Ӕндӕрбӕстаг ке адтӕй, уомӕ гӕсгӕ имӕ ӕ кусти беретӕ ӕнӕнвӕрсон цӕстӕй кастӕнцӕ. Фал еухатт ӕрбацудӕй Йегови Ӕвдесӕнти ӕмбурдмӕ. «Ӕмбурди еугурӕйдӕр япойнӕгтӕ адтӕнцӕ,– зӕгъуй Данникарл,– фал мӕбӕл уотӕ бацийнӕ ’нцӕ, цума мӕ рагӕй фӕсмардтонцӕ». Ӕнсувӕртӕ имӕ уотӕ хӕларзӕрдӕ ке адтӕнцӕ, уой фӕрци Йеговӕмӕ хӕстӕгдӕр кодта. Фӕстӕдӕр Данникарл донаргъуд райста ӕма абони хестӕр нӕлгоймагӕй лӕггадӕ кӕнуй. Иннӕ хестӕр нӕлгоймӕгтӕн хъӕбӕр ӕхцӕуӕн ӕй Данникарл ӕма ӕ бийнойнаг Дженнифер се ’мбурди ке ’нцӕ, ӕма зӕгъунцӕ: «Куд пионертӕ, уотӕ хумӕтӕг цард кӕнунцӕ, ӕма син Хуцауи Паддзахадӕ фиццаг бунати ке ӕй, уомӕй иннетӕн дӕр фӕнзуйнаг ӕнцӕ» (Лук. 12:31).

9, 10. Иннети зин ке лӕдӕрӕн, е цӕхуӕн хуарз гъуддӕгтӕмӕ ӕркӕнуй, уомӕн ӕрхӕссӕ цӕветтон.

⁹ Иннетӕн Хуцауи Паддзахади хабар ке фӕдздзорӕн, уой фӕрци нин ес фадуат «алкӕмӕндӕр хуарздзийнадӕ кӕнун» (Гал. 6:10). Йегови Ӕвдесӕнтӕ иннети зин ке лӕдӕрунцӕ, уомӕ гӕсгӕ ӕрцӕуӕггӕгти ӕвзаг исахур кӕнунцӕ (1 Кор. 9:23). Ӕма еци хъиамӕттӕ дзӕгъӕли нӕ фӕуунцӕ. Зӕгъӕн, Австралий еу хуӕрӕ, Тиффани, зӕгъгӕ, исахур кодта суахили ӕвзаг, цӕмӕй ӕ бон адтайдӕ, еци ӕвзагбӕл  дзорӕг ӕмбурдӕн ӕнхус кӕнун, горӕт Брисбени. Еци ӕвзаг ахур кӕнун ӕнцон н’ адтӕй, фал ин е устур пайда ӕрхаста. «Кӕд уӕ фӕндуй, цӕмӕй уин уӕ лӕггадӕ фулдӕр цийнӕдзийнадӕ хӕсса, уӕд ӕндӕр ӕвзагбӕл дзорӕг ӕмбурдмӕ рахезетӕ. Е ӕй, цума ӕндӕр бӕстӕмӕ рандӕ дӕ, уой хузӕн,– зӕгъуй Тиффани.– Уой фӕрци адӕймаг никки хуӕздӕр балӕдӕруй, ӕгас дуйнебӕл нӕ хуӕртӕ ӕма ӕнсувӕрти астӕу ци еудзийнадӕ ес, уой».

¹⁰ Японий еу бийнонтӕ уой сӕхебӕл бавзурстонцӕ. Сӕ кизгӕ Сакико зӕгъуй: «1990-аг ӕнзти игъосун кӕнгӕй арӕх исӕмбӕлианӕ Бразилийӕй ӕрледзӕг адӕнбӕл. Португайлаг Библийӕй син ку бавдесианӕ стихтӕ, зӕгъӕн, Раргомадӕ 21:3, 4 кенӕ Псалом 37:10, 11, 29, уӕд си еуӕй-еуӕтӕн сӕ цӕстисугтӕ дӕр ӕруаиуонцӕ». Фал еци бийнонтӕ айдагъ уобӕл не ’рлӕудтӕнцӕ. Сакико идарддӕр дзоруй: «Рӕстдзийнадӕ куд хъӕбӕр агорунцӕ, уой ку фӕууидтан, уӕд исфӕндӕ кодтан ӕмбурд бийнонтӕй дӕр португайлаг ӕвзаг исахур кӕнун». Фӕстӕдӕр си еци бийнонти ӕнхуси фӕрци равзурдӕй португайлаг ӕмбурд. Сакико ӕма ӕ ниййергутӕ берӕ ӕрцӕуӕггӕгтӕн банхус кодтонцӕ, Йегови лӕггадгӕнгутӕ исун. Сакико зӕгъуй: «Португайлаг ӕвзаг исахур кӕнун ӕнцон н’ адтӕй, фал ци арфӕдзийнӕдтӕй исхайгин ан, етӕ уой аргъ адтӕнцӕ. Зӕгъӕн дӕр ин нӕййес Йеговӕй куд боз ан!» (Бакӕсӕ Гъуддӕгтӕ 10:34, 35.)

11, 12. а) Нӕ уодигъӕдӕ раййевунмӕ нӕ ци гъӕуама разӕнгард кӕна? б) Цӕмӕй сӕрниллӕг уӕн, уой туххӕй ци гъӕуама кӕнӕн?

¹¹ Нӕ уодигъӕдӕ нӕуӕгмӕ раййевун нӕ гъӕуама фӕнда, Хуцауи кадгин кӕнун нӕ ке фӕндуй, уой туххӕй, иннетӕ нӕ цӕмӕй растауонцӕ, уой туххӕй нӕ, фал. Иронх ди ма уӕд, ӕнхӕст изӕд дӕр ма сӕрбӕрзонд ке иссӕй, уой туххӕй тӕрегъӕд ке искодта. (Рабарӕ Йезекил 28:17.) Мах ба ӕнӕнхӕст ан ӕма нин никки зиндӕр ӕй нӕхе сӕрбӕрзондзийнадӕй гъӕуай кӕнун. Фал уӕддӕр нӕ бон ӕй архайун, цӕмӕй сӕрниллӕг уӕн. Цума нин еци гъуддаги ци банхус кӕндзӕй?

¹² Гъӕуама алли бон дӕр Хуцауи  Дзурд кӕсӕн ӕма ибӕл арф сагъӕс кӕнӕн (Дук. з. 17:18–20). Уӕлдай лӕмбунӕгдӕр ба гъӕуама сагъӕс кӕнӕн, Киристе цӕбӕл ахур кодта, ӕма ӕ лӕггади сӕрниллӕгдзийнадӕ куд ӕвдиста, уобӕл (Матф. 20:28). Йесо ма ӕ апостолти къӕхтӕ дӕр нихснадта (Иоан. 13:12–17). Уомӕй уӕлдай ма гъӕуама Хуцауӕй сугъдӕг хъаурӕ корӕн, цӕмӕй нӕхебӕл архайӕн ӕма нӕхемӕ иннетӕй хуӕздӕр ма кӕсӕн (Гал. 6:3, 4; Фил. 2:3).

13. Сӕрниллӕгдзийнадӕ цӕхуӕн хуарз гъуддӕгтӕмӕ ӕркӕнуй?

¹³ Бакӕсӕ Ӕмбесӕндтӕ 22:4. Йегови фӕндуй, цӕмӕй ӕ лӕггадгӕнгутӕ уонцӕ сӕрниллӕг. Еци менеуӕг берӕ хуарз гъуддӕгтӕмӕ ӕркӕнуй. Сӕрниллӕг ку уӕн, уӕд не ’мбурди уодзӕй фарнӕ ӕма еудзийнадӕ. Уомӕй уӕлдай ма нӕ Йеговӕ е ’стур хуарзӕнхӕй исхайгин кӕндзӕй. Апостол Петур загъта: «Кӕрӕдзей хӕццӕ уе ’гас дӕр уотӕ сӕрниллӕг, уомӕн ӕма Хуцау сӕрбӕрзонд адӕнӕн сӕ нихмӕ ӕй, сӕрниллӕгтӕн ба хай кӕнуй е ’стур хуарзӕнхӕй» (1 Пет. 5:5).

14. Куд фӕлмӕн ӕма куд фӕразон гъӕуама уӕн, уой нин тӕккӕ хуӕздӕр ка ӕвдесуй?

¹⁴ Аци дуйней адӕн, фӕлмӕн ӕма берӕфӕразон адӕймаги фӕннимайунцӕ сӕмпӕл адӕймагбӕл. Фал е уотӕ нӕй. Еци рӕсугъд менеугутӕ Йеговӕмӕ дӕр ӕнцӕ, Дун-дуйней тӕккӕ хъаурӕгиндӕр ка ӕй, уомӕ. Йеговӕй хуӕздӕр нин ӕй неке ӕвдесуй, куд фӕлмӕн ӕма куд фӕразон гъӕуама уӕн, уой (2 Пет. 3:9). Расагъӕс кӕнӕ, Йеговӕ Авраам ӕма Лотӕн изӕдти фӕрци сӕ фарстатӕбӕл дзуапп куд лӕвардта (Райд. 18:22–33; 19:18–21). Кенӕ ба ӕргъуди кӕнӕ, ӕгоммӕгӕс израилӕгтӕн 1 500 анзей дӕргъи куд фӕббухстӕй (Йез. 33:11).

15. Киристе фӕлмӕн ӕма фӕразон ке адтӕй, е цӕмӕй бӕрӕг адтӕй?

¹⁵ Киристе дӕр «фӕлмӕн» адӕймаг адтӕй (Матф. 11:29). Уомӕй уӕлдай ма адтӕй фӕразон ӕма ӕ фӕдбӕлдзӕугутӕмӕ сӕ рӕдудтити туххӕй нӕ мӕстгун кодта. Йесо ма зӕнхӕбӕл ку адтӕй, уӕд ибӕл дини разамонгутӕ арӕх цидӕртӕ ӕримисиуонцӕ. Фал уӕддӕр фӕлмӕн ӕма фӕразон адтӕй, сауӕнгӕ ма гъезӕмӕртти гъӕдӕбӕл дӕр. Еци рист ӕвзаргӕй дӕр Йесо Хуцаумӕ кувта, маргӕ ’й ка кодта, уони туххӕй, зӕгъгӕ, «ниххатир син кӕнӕ, уомӕн ӕма, ци косунцӕ, уой нӕ лӕдӕрунцӕ» (Лук. 23:34). Уӕхӕн уӕззау уавӕри дӕр Киристе адтӕй фӕлмӕн ӕма фӕразон. (Бакӕсӕ 1 Петури 2:21–23.)

16. Нӕ бон ци ӕй кӕнун, цӕмӕй фӕлмӕн ӕма фӕразон уӕн?

¹⁶ Нӕ бон ци ӕй кӕнун, цӕмӕй фӕлмӕн ӕма фӕразон уӕн? Павел еу мадзали туххӕй финста: «Еске уин естӕмӕй уӕ зӕрдӕ ку фӕхходун кӕна, уӕддӕр кӕрӕдземӕн бухсетӕ ӕма зӕрдӕй хатир кӕнтӕ. Йеговӕ уин зӕрдӕй куд ниххатир кодта, сумах дӕр гъӕуама кӕрӕдземӕн уотӕ хатир кӕнайтӕ» (Кол. 3:13). Цӕмӕй аци фӕдзӕхстмӕ гӕсгӕ архайун нӕ бон уа, уой туххӕй гъӕуама фӕлмӕн ӕма фӕразон уӕн. Кӕрӕдземӕн ку хатир кӕнӕн, уӕд не ’мбурди уодзӕй еудзийнадӕ.

17. Фӕлмӕн ӕма фӕразон цӕмӕн гъӕуама уӕн?

 ¹⁷ Гъӕуама иннетӕмӕ фӕлмӕн ӕма фӕразон уӕн, уомӕн ӕма е Хуцауи фӕдзӕхст ӕй. Нӕ ервӕзундзийнадӕ дӕр еци менеугутӕй кӕнгӕ ’й (Матф. 5:5; Иак. 1:21). Уомӕй уӕлдай ма фӕлмӕн ӕма фӕразон ку уӕн, уӕд кадӕ хӕсдзиан Йеговӕн, удта иннети дӕр уотӕ архайунмӕ разӕнгард кӕндзиан (Гал. 6:1; 2 Тим. 2:24, 25).

18. Уарзондзийнадӕ куд баст ӕй, алкӕмӕдӕр ӕмхузӕн цӕстӕй ке гъӕуама кӕсӕн, уой хӕццӕ?

¹⁸ Нур ци менеугутӕмӕ ӕркастан, етӕ еугурӕйдӕр баст ӕнцӕ уарзондзийнади хӕццӕ. Зӕгъӕн, ахуркӕнуйнаг Иаков ӕнсувӕртӕн бауайдзӕф кодта, уомӕн ӕма гъӕздугдӕр ка адтӕй, уонӕмӕ хуӕздӕр цӕстӕй кастӕнцӕ. Ба син ӕй лӕдӕрун кодта, уотемӕй Хуцауи фӕдзӕхсти нихмӕ ке цӕунцӕ, зӕгъгӕ, «иннети уарзӕ, дӕхе куд уарзис, уотӕ». Иаков ма загъта: «Кӕд гъолон миутӕ кӕнтӕ, уӕд тӕрегъӕд кӕнтӕ» (Иак. 2:8, 9). Адӕни ку уарзӕн, уӕд нӕ кӕсдзиан, кӕми ахур кодтонцӕ, цӕхуӕн адӕнихаттӕй ӕнцӕ кенӕ син адӕни астӕу цӕхуӕн бунат ес, уомӕ. Алкӕмӕдӕр ӕмхузӕн цӕстӕй кӕсдзиан, ӕма е айдагъ нӕ гъуддӕгтӕй бӕрӕг гъӕуама ма уа, фал куд сагъӕс кӕнӕн, уомӕй дӕр.

19. Уарзондзийнадӕ нӕмӕ цӕмӕн гъӕуама уа?

¹⁹ «Уарзондзийнадӕ берӕ фӕразуй ӕма ӕй хӕларзӕрдӕ», финст ӕй Библий, удта, дан, «ӕ сӕр бӕрзӕндти нӕ хӕссуй» (1 Кор. 13:4). Мах гъӕуама фӕразон, хӕларзӕрдӕ ӕма сӕрниллӕг уӕн, цӕмӕй нӕ бон уа адӕнӕн идарддӕр дӕр хуарз хабар игъосун кӕнун (Матф. 28:19). Аци менеугути фӕрци ӕмбурди еугур хуӕртӕ ӕма ӕнсувӕрти хӕццӕ дӕр федаудзиан. Алкӕмӕдӕр ни уӕхӕн уарзондзийнадӕ ку уа, уӕд не ’мбурди уодзӕй еудзийнадӕ ӕма Йегови номӕн кадӕ хӕсдзиан. Ка ’й зонуй, иннетӕ дӕр уой уингӕй рӕстдзийнадӕмӕ сӕ гъос ӕрдардзӕнцӕ. Нӕуӕг уодигъӕдӕ цӕхуӕн гъӕуама уа, уой туххӕй Библий ци скъуддзаг ес, е уӕхӕн дзурдтӕй фӕууй: «Фал ма уӕмӕ уомӕй уӕлдай уӕд уарзондзийнадӕ, уомӕн ӕма уой хузӕн неци еу кӕнуй ӕма неци бӕттуй кӕрӕдзебӕл» (Кол. 3:14).

20. а) Нӕхемӕ цӕхуӕн фарстатӕ гъӕуама раттӕн ӕма цӕмӕн? б) Зӕрдиагӕй цӕмӕ ӕнгъӕлмӕ кӕсӕн?

²⁰ Алкедӕр ни гъӕуама ӕхе бафӕрса: «Ци ма мӕ гъӕуй бакӕнун, цӕмӕй мӕ зӕронд уодигъӕдӕ еугур уагъд никкӕнон?» Гъӕуама Йеговӕмӕ ковӕн ӕма ин лигъстӕ кӕнӕн, цӕмӕй нин банхус кӕна. Уомӕй уӕлдай ма гъӕуама тох кӕнӕн, Хуцауи Паддзахади арфӕдзийнӕдтӕй ке туххӕй фенӕхай уодзиан, еци гъудитӕ ӕма гъуддӕгти хӕццӕ (Гал. 5:19–21). Удта ма гъӕуама нӕхе бафӕрсӕн: «Мӕ сагъӕстӕ идарддӕр дӕр Йегови фӕндонмӕ гӕсгӕ ӕййевун?» (Еф. 4:23, 24). Цалинмӕ ӕнӕнхӕст ан, уӕдмӕ нӕ алли бон дӕр нӕ уодигъӕдӕбӕл архайун гъӕудзӕй. Расагъӕс кӕнӕ, куд хуарз уодзӕй, кедӕриддӕр фӕсмӕрӕн, етӕ сӕ уодигъӕдӕ нӕуӕгмӕ ку раййевонцӕ ӕма Хуцауи менеугутӕ ӕнхӕстӕй ку ӕвдесонцӕ, уӕд!