1, 2. (a) E hinga tongana nyen so lege ayeke dä ti tene e yü fini zo? (b) Asarango ye wa ti fini zo ayeke na aColossien 3:10-14?

TËNË “fini zo” asigi fani use na yâ ti Mbeti ti Nzapa ti fini dunia (aÉph. 4:24; aCol. 3:10). A ye ti sara tënë ti fini zo so “a sara lo alingbi na ye so bê ti Nzapa aye”. E oko oko kue e lingbi ti yü fini zo. Ngbanga ti nyen la e tene tongaso? Ngbanga ti so Jéhovah aleke azo na image ti lo, tongaso e lingbi ti duti na apendere sarango ye ti lo.​—Gen. 1:26, 27; aÉph. 5:1.

² Tâ tënë, ndali ti so e wara siokpari na lege ti kozo babâ na mama ti e, na ambeni ngoi asioni nzara ayeke na bê ti e. Aye so angoro e alingbi ti sara ngangu na ndö ti e. Ye oko, na lege ti nzoni bê ti Nzapa lo lingbi ti sara si e ga zo so lo ye. Ti mû maboko na e ti leke na bê ti e ti ngbâ ti duti zo so Nzapa aye, e yeke sara tënë na ndö ti ambage nde nde ti fini zo so yingo vulu amû maboko na bazengele Paul ti sara tënë na ndö ni. (Diko aColossien 3:10-14.) E yeke bâ nga tongana nyen la na fango tënë e lingbi ti fa so e yeke na ambage nde nde ti fini zo so.

3. Mbeni mbage ti fini zo ayeke so wa?

³ Na peko ti so Paul awa e ti yü fini zo, lo fa so ti sara kangbi pëpe na popo ti azo ayeke mbeni kpengba mbage ti fini zo. Lo tene: “Grec wala Juif ayeke dä pëpe, fango ganza wala fango ganza pëpe ayeke dä pëpe, wala wande, wala zo ti Scythe, wala ngbâa, wala zo so ayeke ngbâa pëpe ayeke dä pëpe.” Na yâ ti congrégation, ngbanga ti nyen la a lingbi a zia kangbi pëpe na popo ti azo ndali ti mara ti ala, kodro ti ala wala ala yeke wayere wala zo ti mosoro? Ngbanga ti so atâ disciple ti Christ “kue ayeke zo oko”.​—aCol. 3:11; aGal. 3:28.

4. (a) A lingbi awakua ti Jéhovah asara ye na azo tongana nyen? (b) Nyen la alingbi ti sara si a yeke ngangu na aChrétien ti duti beoko?

⁴ Azo so ayü fini zo ayeke ne amba ti ala Chrétien nga na tanga ti azo kue, atâa azo ni ayeke awayere wala azo ti mosoro wala mara ti ala ayeke so wa (aRom. 2:11). Na ambeni ndo a yeke ngangu ti sara tongaso. Na tapande, na Afrique du Sud aTémoin mingi angbâ ti lango na ando so a zia ni nde ndali ti mara ti ala na tapande agbata ti azo ti mosoro, agbata ti azo vuko wala ando so amétis alango dä. Ye oko, ti wa aita ti “maï ndoye” ti ala, na octobre ti ngu 2013, Bebungbi aleke mbeni ye so ayeke nde ti mû maboko na aita ti hinga mba nzoni (2 aCor. 6:13). Ye ni so ayeke lani nyen?

5, 6. (a) Nyen la a sara lani na yâ ti mbeni kodro ti mû maboko na azo ti Nzapa ti duti beoko ahon ti kozo? (Bâ foto so ayeke na tongo nda ti article so.) (b) Ye ti peko ni ayeke nyen?

⁵ A leke lani ti tene acongrégation use so yanga ti kodro ti ala wala mara ti ala ayeke nde nde aduti ndo oko na ambeni samedi na dimanche. Aita ti acongrégation ni ayeke fa tënë legeoko, ala yeke gue na bungbi ndo oko nga ala yeke yamba mba na ndo ti ala. Acongrégation mingi asara ni, na filiale awara anzoni tondo na ndö ni na mbage ti aita nga na azo so ayeke aTémoin ape. Na tapande, mbeni kota zo ti nzapa atene: “Mbi yeke Témoin ape, me mbi bâ so kapa ti fango tënë so ala leke ayeke tâ pendere mingi, na ala yeke azo ti amara nde nde so ayeke beoko.” Ye so a leke so asara nyen na ndö ti aita?

⁶ Na tongo nda ni, mbeni ita-wali so ayeke tene yanga ti Xhosa, so iri ti lo ayeke Noma, aye lani pëpe ti tisa aita so ayeke amunzu so ayeke tene Anglais na da ti lo so anzoni ye ayeke na yâ ni ape. Me na peko ti so lo na aTémoin so ayeke amunzu afa tënë legeoko nga ala tisa lo na da ti ala, lo tene: “Ala yeke gï tongana e!” Tongana ngoi asi ti tene aita ti congrégation ti yanga ti Xhosa la ayamba aita ti congrégation ti Anglais, lo tö kobe na lo tisa ambeni ita ni na ndo ti lo. Na popo ti azo so lo tisa ala, mbeni ancien so ayeke munzu ayeke dä. Noma atene: “Li ti mbi akpe so lo yeda ti duti tâ na ndö ti mbeni nduru ye so asara na plastique.” Aita angbâ ti sara ni laso, na a sara si ala sara kamarade na aita so ala hinga ala kozo ape na ala leke na bê ti ala ti ngbâ ti hinga aita so dutingo ti ala ayeke nde nde.

7. Ngbanga ti nyen la e yeke lakue na bezoin ti bâ mawa ti zo?

⁷ Tongana dunia ti Satan so angbâ, e yeke ngbâ ti wara atara. A yeke si so e yeke na kua encore ape, terê ti e ason ngangu, a sara ye ti ngangu na e, e yeke na ndo so aye tongana kota pupu wala ngu so asuku amû ndo abuba aye, azo ti sioni amû aye ti e wala e wara ambeni ye ti ngangu nde. Ti tene e mû maboko na mba na yâ ti pasi wala ngangu kpale, a lingbi e bâ mawa ti mba. Tâ bango mawa ti zo ayeke pusu e ti sara nzoni na zo (aÉph. 4:32). Ambage ti fini zo so ayeke mû maboko na e ti  sara ye tongana Nzapa ti dë bê ti mba na popo ti e.​—2 aCor. 1:3, 4.

8. Tongana e bâ mawa ti azo nga e sara nzoni na azo kue na yâ ti congrégation, a lingbi ti ga na anzoni ye wa? Mû mbeni tapande.

⁸ Tongana nyen la e lingbi ti fa so e bi bê mingi na awande nga na azo so ye ti ala ayeke dä ape so ayeke na yâ ti congrégation ti e? A lingbi e sara kamarade na ala nga e mû maboko na ala ti bâ so ala nga ala yeke amembre ti congrégation (1 aCor. 12:22, 25). Bâ ye so asi na Dannykarl so lo londo na Philippines lo gue na Japon. Ndali ti so lo yeke wande, a sara ye na lo tongana ti so a yeke sara ye na tanga ti azo ti place ti kua ti lo ape. Mbeni lâ, lo gue na bungbi ti aTémoin ti Jéhovah. Dannykarl atene: “Mingi ti azo ti congrégation ni ayeke azo ti kodro ti Japon. Ye oko, ala yamba mbi nzoni mo bâ mo tene ala yeke angbene kamarade ti mbi.” Aita angbâ ti sara nzoni bê na lo na amû maboko na lo ti ga nduru na Jéhovah. Lo wara batême na laso lo yeke ancien. A nzere na amba ti lo ancien mingi so lo na wali ti lo Jennifer ayeke na yâ ti congrégation ni. Ala tene: “Ala yeke apionnier so ayeke na aye mingi ape nga ala yeke nzoni tapande ti azo so agi Royaume kozoni.”​—Luc 12:31.

9, 10. Fa ambeni ye ti nzoni so aga na peko ti bango mawa ti azo na fango tënë.

⁹ Na ngoi so e yeke fa tënë ti Royaume na azo, lege azi na e ti “sara ye ti nzoni na azo kue”. (aGal. 6:10). A-Témoin mingi so abâ mawa ti azo so aga gango asara ngangu ti manda mbeni fini yanga ti kodro (1 aCor. 9:23). Ye so aga na aye ti nzoni mingi. Na tapande, Tiffany, mbeni ita-wali na Australie so ayeke pionnier, amanda lani Swahili ti mû maboko na lo ti gue na congrégation ti yanga ti Swahili so ayeke na gbata ti Brisbane. Atâa so ti manda yanga ti kodro ni ayeke lani ngangu na Tiffany, lo wara aye ti nzoni mingi na pekoni. Lo tene: “Tongana mo ye ti tene fango tënë anzere na mo mingi, gue na congrégation ti mbeni yanga ti kodro nde. A yeke mo bâ mo tene mo voyagé sân ti zia gbata ti mo. Mo yeke hinga so e yeke aita so e yeke na yâ ti dunia kue nga mo yeke bâ na lê ti mo so a yeke mbeni miracle so e yeke beoko.”

¹⁰ Bâ nga tapande ti mbeni sewa ti Japon. Molenge ti ala ti wali, Sakiko, atene: “Na yâ ti angu 1990, mingi ni e yeke wara lani azo ti kodro ti Brésil na fango tënë. Tongana e fa na ala aversê na yâ ti Bible ti ala ti yanga ti Portugais, na tapande aversê tongana Apocalypse 21:3, 4 wala Psaume 37:10, 11, 29, ala yeke dengi mê nzoni ti mä e nga na ambeni ngoi ala toto même.” Me bango mawa ti azo so azo ti sewa so ayeke na ni angbâ gï ge ape.  Sakiko atene: “Tongana e bâ so ala yeke na nzara ti aye ti yingo, e to nda ti manda yanga ti Portugais na sewa.” Ambeni ngoi na pekoni, sewa ni amû maboko ti tene a sigi na congrégation ti yanga ti Portugais. Tongana angu ayeke hon, sewa ni amû maboko na azo mingi so aga gango ti ga awakua ti Jéhovah. Sakiko akiri atene: “Ti manda lani yanga ti Portugais ayeke kete kua ape, me aye ti nzoni so e wara na pekoni ahon angangu so e sara. E kiri singila mingi na Jéhovah.”​—Diko Kusala 10:34, 35.

11, 12. (a) Ngbanga ti nyen la a yeke kota ye ti tene nzoni bibe la apusu e ti yü fini zo? (b) Nyen la ayeke mû maboko na e ti ngbâ ti sara terê ti e kete?

¹¹ A lingbi ye so apusu e ti yü fini zo ayeke ti gonda Jéhovah, me pëpe ti tene azo agonda e. Girisa ape so mbeni créature ti yingo so ayeke lani mbilimbili-kue asara lani siokpari ndali ti so lo zia si baba alï lo. (Bâ Ézéchiel 28:17.) So e yeke mbilimbili-kue ape, a yeke kete ye ape ti ke baba. Me e lingbi ti yü sarango terê kete. Nyen la ayeke mû maboko na e?

¹² Ti ngbâ ti sara terê ti e kete, a lingbi e mû ngoi lâ oko oko ti diko Mbeti ti Nzapa nga ti gbu li ti e na ndö ni (Deut. 17:18-20). E yeke nga mbilimbili na bezoin ti gbu li ti e na ndö ti afango ye ti Jésus nga na pendere tapande ti lo ti sarango terê kete (Mat. 20:28). Jésus asukula même lani gere ti abazengele ti lo (Jean 13:12-17). A lingbi nga e sambela Jéhovah lakue ti mû na e yingo ti lo ti mû maboko na e ti hon ndö ti abibe kue so apusu e ti bâ terê ti e kota na ndö ti amba ti e.​—aGal. 6:3, 4; aPhil. 2:3.

13. Tongana e sara terê ti e kete afuta wa la e yeke wara?

¹³ Diko aProverbe 22:4. Jéhovah ahunda na atâ wakua ti lo kue ti sara terê ti ala kete, na a yeke ga na afuta mingi. Tongana e sara terê ti e kete ayeke maï siriri nga na beoko na yâ ti congrégation. Nga Jéhovah ayeke mû kota nzobe ti lo na e. Bazengele Pierre atene: “Ala kue, ala yü bibe ti sarango terê kete tongana ala yeke sara ye na mba na popo ti ala, ngbanga ti so Nzapa ake azo ti baba, me lo yeke mû kota nzobe ti lo na azo so asara terê ti ala kete.”​—1 Pi. 5:5.

14. Zo wa la ayeke nzoni tapande mingi ti zo so asara ye na ngangu pëpe nga akanga bê?

¹⁴ Laso na yâ ti dunia, mingi ni, a yeke bâ azo so asara ye na ngangu pëpe nga ayeke kanga bê tongana awokongo zo. Me a yeke tâ tënë oko ape. Apendere sarango ye so alondo na Jéhovah, lo so ngangu ti lo ahon angangu kue na yâ ti dunia. Jéhovah Nzapa ayeke pendere tapande mingi ti zo so asara ye na ngangu pëpe nga so akanga bê (2 Pi. 3:9). Bâ tongana nyen la lo kiri tënë na Abraham nga na Lot na lege ti mbeni ange ti lo na ngoi so ala hunda tënë na lo (Gen. 18:22-33; 19:18-21). Nga, Jéhovah akanga bê na azo ti Israël so amä yanga ti lo ape ahon ngu 1500.​—Ézéch. 33:11.

15. So Jésus asara ye na ngangu pëpe nga lo kanga bê, tapande wa la lo zia ni?

¹⁵ Jésus ‘asara ye lani na ngangu pëpe’. (Mat. 11:29). Lo kanga bê lani mingi na awokongo ti adisciple ti lo. Na ngoi so Jésus ayeke sara kua ti lo na sese, mingi ni, azo akasa lo nga abi tënë na li ti lo. Ye oko, lo sara ye na ngangu pëpe nga lo kanga bê juska na kuâ. Na ngoi so Jésus ayeke bâ pasi na ndö ti keke ti pasi, lo sambela Babâ ti lo ti pardonné azo so ayeke fâ lo. Lo tene: “Ala hinga pëpe ye so ala yeke sara so.” (Luc 23:34). So ayeke mbeni pendere tapande ti sarango ye na ngangu pëpe nga  ti kangango bê na ngoi ti aye ti vundu.​—Diko 1 Pierre 2:21-23.

16. Tongana nyen la e lingbi ti sara ye na ngangu pëpe nga ti kanga bê?

¹⁶ Tongana nyen la e lingbi ti sara ye na ngangu pëpe nga ti kanga bê? Na ngoi so Paul asû mbeti na amba ti lo aChrétien, lo fa mbeni ye so e lingbi ti sara. Lo tene: “Ala ngbâ ti kanga bê na amba ti ala na popo ti ala, na ti pardonné mba na bê ti ala kue, même tongana mbeni zo ayeke na tënë ti dema na terê ti mba ti lo. Gï tongana ti so Jéhovah apardonné ala na bê ti lo kue, ala nga ala sara tongaso.” (aCol. 3:13). Ti sara ye alingbi na commandement so, a lingbi e sara ye na ngangu pëpe nga e kanga bê. Tongana e pardonné amba ti e, e yeke maï beoko na yâ ti congrégation nga e yeke bata ni.

17. Sarango ye na ngangu pëpe nga kangango bê ayeke kota mingi ngbanga ti nyen?

¹⁷ Chrétien ayeke soro sorongo pëpe ti yü sarango ye na ngangu pëpe nga na kangango bê. A lingbi e sara ni si e wara fini (Mat. 5:5; Jacq. 1:21). Tongana e sara ye na ngangu pëpe nga e kanga bê, e yeke gonda Jéhovah na e yeke mû maboko na amba ti e ti sara nga tongaso.​—aGal. 6:1; 2 Tim. 2:24, 25.

18. Ndoye ague oko na sarango kangbi na popo ti azo ape tongana nyen?

¹⁸ Asarango ye kue so e sara tënë na ndö ni so ague oko na ndoye. Na tapande, a lingbi lani disciple Jacques amû wango na amba ti lo aChrétien ndali ti so ala sara ye nzoni na azo ti mosoro ahon awayere. Lo fa lani so sarango ye tongaso ague nde na ndia ti gbia so atene: “Mo ndoye mba ti mo tongana mo wani.” Lo kiri lo tene: “Tongana ala ngbâ ti bâ yâ ti azo bango si ala sara ye na ala, ala yeke sara siokpari la.” (Jacq. 2:8, 9). Me ndoye ayeke pusu e ti ke azo pëpe ndali ti hingango mbeti ti ala, mara ti ala wala ndali ti so ala yeke zo ti mosoro wala wayere. Ti sara kangbi na popo ti azo ape a lingbi e sara ye ndali ti lê ti azo ape. A lingbi sarango kangbi na popo ti azo ape alondo na bê ti e.

19. Ngbanga ti nyen la a yeke kota ye ti tene e yü ndoye?

¹⁹ Ndoye ahinga nga ti “kanga bê ti ku nga lo sara nzoni na zo” na lo “zia si baba ahon ndö ti lo pëpe”. (1 aCor. 13:4). Ti ngbâ ti fa tënë ti Royaume na azo, a lingbi e kanga bê, e sara nzoni na azo nga e sara terê ti e kete (Mat. 28:19). Asarango ye so asara si a yeke ngangu na e ape ti mä terê na aita kue na yâ ti congrégation. Futa wa la e yeke wara tongana e fa mara ti ndoye so? A yeke sara si aita so ayeke na yâ ti congrégation aduti beoko na a yeke mû gonda na Jéhovah. Azo ayeke bâ ni na ala yeke ga na yâ ti tâ tënë. A yeke na lege ni so ti hunzi tënë na ndö ti fini zo, Bible atene: “Na ndö ti aye so kue, ala yü ndoye, ndali ti so ndoye ayeke kamba so abungbi ye mbilimbili.”​—aCol. 3:14.

20. (a) Ahundango ndo wa la a lingbi e hunda terê ti e na ni? Ngbanga ti nyen? (b) Ngoi wa la e yeke ku ni kungo?

²⁰ A lingbi e oko oko e hunda terê ti e: ‘Ambeni ye wa la mbi lingbi ti sara ti zi ngbene zo na ti zia ni angbâ ayo?’ A lingbi e sambela Nzapa na bê ti e kue ti mû maboko na e ti hon ndö ti abibe wala asarango ye kue so alingbi ti kanga lege na e ti ga azo ti Royaume ti Nzapa (aGal. 5:19-21). A lingbi nga e hunda terê ti e: ‘Mbi ngbâ ti sara si mbi kiri gï fini ni na yâ ti ngangu so ayeke fa lege na bibe ti mbi?’ (aÉph. 4:23, 24). Ti yü fini zo nga ti ngbâ ti bata ni ayeke mbeni ye so aChrétien angbâ ti sara ni. Tara ti bâ tongana nyen la fini ayeke duti ande na ngoi so azo kue so e hinga ala ayeke yü ande tâ na lege ni fini zo.