1, 2. (a) Kay ano nga posible gud nga maisul-ot naton an bag-o nga personalidad? (b) Ano nga mga bahin han bag-o nga personalidad an nakarekord ha Colosas 3:10-14?

“AN BAG-O nga personalidad.” Ini nga mga pulong mababasa hin duha ka beses ha Bag-o nga Kalibotan nga Hubad han Kristiano Griego nga Kasuratan. (Efe. 4:24; Col. 3:10) Nagtutudlok ito ha personalidad nga “ginhimo uyon ha kaburut-on han Dios.” Posible gud nga maisul-ot naton inin bag-o nga personalidad. Kay ano? Kay ginlarang ni Jehova an mga tawo ha iya ladawan salit posible gud naton masubad ngan maipakita an iya mag-opay nga kalidad.—Gen. 1:26, 27; Efe. 5:1.

² Oo, tungod kay napanunod naton an pagkadiri-hingpit tikang ha aton siyahan nga mga kag-anak, nagkakaada kita sayop nga hingyap. Bangin makusog liwat an impluwensya ha aton han mga nakapalibot ha aton. Pero tungod han kalooy ngan bulig ni Jehova, mahimo kita magin an klase han tawo nga karuyag niya para ha aton. Basi maparig-on an aton determinasyon ha pagkab-ot hito nga tumong, aton hihisgotan an pipira nga bahin han bag-o nga personalidad nga iginsurat ni apostol Pablo pinaagi  han giya han baraan nga espiritu. (Basaha an Colosas 3:10-14.) Hihisgotan liwat naton kon paonan-o naton maipapakita ha aton ministeryo ini nga mga bahin han bag-o nga personalidad.

3. Ano an usa nga bahin han bag-o nga personalidad?

³ Katapos kita aghaton ni Pablo nga isul-ot an bag-o nga personalidad, iginsaysay niya nga an pagin waray pinaurog usa han maopay gud nga bahin han bag-o nga personalidad. Hiya nagsiring: “Waray Griego o Judio, waray turi o diri-turi, waray taga-iba nga nasud, Escita, uripon, o may kagawasan nga tawo.” * Kay ano nga an tagsa nga membro han kongregasyon diri sadang maghunahuna nga mas maopay hiya tungod han iya lahi, nasyonalidad, o kahimtang ha kinabuhi? Tungod kay an tinuod nga mga sumurunod han Kristo “ngatanan nagkakaurosa.”—Col. 3:11; Gal. 3:28.

4. (a) Paonan-o sadang trataron han mga surugoon ni Jehova an ira igkasi-tawo? (b) Ano an mahimo makaulang ha pagkaurosa han mga Kristiano?

⁴ Gintatratar nga may dignidad hadton nagsusul-ot han bag-o nga personalidad an ira igkasi-tumuroo ngan mga diri Saksi, anoman an ira lahi o kahimtang ha kinabuhi. (Roma 2:11) Diri gud ini masayon para ha pipira nga nasud. Tagda pananglitan ha Sur Aprika. Kadam-an han mga Saksi didto naukoy pa gihapon ha mga lugar nga eksklusibo la para ha partikular nga lahi—mga komunidad nga para la ha mga tawo nga busag, ha mga itom, o ha mga mistiso. Salit basi maaghat an kabugtoan nga ‘magpahaluag,’ han Oktubre 2013, gin-aprobaran han Nagmamando nga Lawas an usa nga espesyal nga kahikayan basi buligan an kabugtoan nga mas makilala an kada tagsa. (2 Cor. 6:13) Ano an nahiuupod hito nga kahikayan?

5, 6. (a) Basi maparig-on an pagkaurosa han katawohan han Dios ha usa nga nasud, ano nga kahikayan an ginhimo? (Kitaa an retrato ha tinikangan hini nga artikulo.) (b) Ano an resulta hito?

⁵ Nagkaada kahikayan nga an duha nga kongregasyon nga magkaiba an linggwahe o lahi nga magkaurupod ha sulod hin pipira ka Sabado ngan Domingo. An kabugtoan hito nga mga kongregasyon urosa nga nagsangyaw, nagkatirok, ngan malipayon nga nag-abiabi han kada tagsa ha ira balay. Ginatos nga kongregasyon an nakigbahin hini nga kahikayan, ngan damu nga maopay nga report an nakarawat han sanga nga opisina mahitungod hini nga kahikayan, bisan ha mga diri Saksi. Pananglitan, usa nga ministro hin relihiyon an nagsiring, “Diri ako Saksi, pero masisiring ko nga organisado gud an iyo pagsangyaw nga buruhaton, ngan nagkakaurosa kamo bisan kon iba-iba an iyo lahi.” Ano an epekto hini nga kahikayan ha mga Saksi?

⁶ Ha tinikangan, an sister nga hi Noma, nga nagyayakan hin Xhosa, nag-aalang pag-imbitar ha ira simple nga balay hin busag nga kabugtoan tikang ha kongregasyon nga nagyayakan hin Ingles. Pero han nakig-upod hiya ha busag nga mga Saksi ha pagsangyaw ngan han malipayon nga gin-abiabi hiya ha ira balay, hiya nagsiring, “Ordinaryo la hira nga mga tawo pariho ha amon!” Salit han turno na han ira kongregasyon nga nagyayakan hin Xhosa ha pag-abiabi ha kabugtoan ha kongregasyon nga nagyayakan hin Ingles, nag-andam hiya hin pagkaon ngan nangimbitar. Kaupod han iya mga bisita an usa nga busag nga tigurang. Hi Noma nagsiring: “Bilib gud ako kay andam hiya lumingkod ha hamubo nga plastik nga kahon.” Sugad nga resulta hinin nagpapadayon nga kahikayan, damu nga kabugtoan an nagkaada bag-o nga kasangkayan, ngan determinado hira nga padayon nga ‘magpahaluag’ ha pakig-upod ha kabugtoan.

7. Kay ano nga kinahanglan padayon kita nga magpakita hin pagpaid?

⁷ Tubtob nga naeksister pa an kalibotan ni Satanas, padayon kita nga makakaeksperyensya hin mga pagsari, sugad han kawaray-trabaho, grabe nga sakit, pagtimaraot, kalamidad, kawad-i hin mga panag-iya tungod hin krimen, o iba pa. Basi mabuligan naton an kada tagsa nga malamposan  an mga pag-antos o problema, kinahanglan magkaada kita tinuod nga pagpaid. An pagpalangga nga may kalooy o pagpaid magpapagios ha aton nga magpakita hin pagkabuotan. (Efe. 4:32) Ini nga mga bahin han bag-o nga personalidad mabulig ha aton nga masubad an Dios ngan makahatag hin pagliaw ha iba.—2 Cor. 1:3, 4.

8. Ano an mahimo magin maopay nga resulta kon iginpapakita naton an pagpaid ngan pagkabuotan ha ngatanan dida ha kongregasyon? Paghatag hin ehemplo.

⁸ Paonan-o naton mas maipapakita an pagkabuotan ha mga estranghero o pobre ha aton kongregasyon? Kinahanglan mangalimbasog kita nga magin sangkay hira ngan buligan hira nga masabtan nga importante hira ha kongregasyon. (1 Cor. 12:22, 25) Tagda pananglitan hi Dannykarl nga taga-Pilipinas nga binalhin ha Japan. Ha iya gintatrabahoan, mas maopay an pagtratar ha lokal nga mga trabahador kay ha iya. Ha urhi, tinambong hiya hin katirok han mga Saksi ni Jehova. “Haros ngatanan han nakadto mga Hapon,” siring ni Dannykarl, “pero malipayon nga gin-abiabi nira ako nga sugad hin maiha ko na hira nga kakilala.” An pagkabuotan nga padayon nga iginpakita ha iya han kabugtoan nakabulig ha iya nga mag-uswag ha espirituwal. Nabawtismohan hiya, ngan yana usa na hiya nga tigurang. Para ha iya mga igkasi-tigurang, hi Dannykarl ngan an iya asawa nga hi Jennifer bendisyon gud ha ira kongregasyon. An mga tigurang nagsiring mahitungod ha ira, “Nagkikinabuhi hira hin simple sugad nga mga payunir ngan maopay hira nga susbaranan ha pag-una ha pagpamiling han Ginhadian.”—Luc. 12:31.

9, 10. Pag-unabi hin mag-opay nga resulta tungod ha pagpakita hin pagpaid ha mga tawo ha ministeryo.

⁹ Kon iginpapasamwak naton ha iba an mensahe han Ginhadian, nagkakaada kita higayon nga buhaton an “maopay ha ngatanan.” (Gal. 6:10) Tungod ha pagpaid ha dayo nga mga residente, damu nga Saksi an nangangalimbasog nga mag-aram hin iba nga linggwahe. (1 Cor. 9:23) Nagriresulta ini hin hura nga bendisyon. Pananglitan, an payunir nga hi Tiffany nga taga-Australia nag-aram hin Swahili basi suportaran an kongregasyon nga nagamit hin Swahili nga linggwahe ha syudad han Brisbane. Bisan kon diri masayon para kan Tiffany an pag-aram han linggwahe, nagin mas mapulsanon ngan makalilipay an iya kinabuhi. Hiya nagsiring: “Kon karuyag mo hin eksayting nga ministeryo, pag-alagad ha kongregasyon nga iba an linggwahe. Pariho ito ha pagbiyahe nga diri nabaya ha iyo syudad. Maieksperyensyahan mo an aton bug-os-kalibotan nga pagminagburugto ngan makikita mo mismo an milagroso nga pagkaurosa.”

¹⁰ Tagda liwat an ehemplo han usa nga pamilya ha Japan. An anak nga hi Sakiko nagsiring: “Han dekada han 1990, agsob kami igkaistorya hin dayo nga mga residente nga tikang ha Brazil ha amon pagsangyaw. Kon iginpapabasa namon an mga teksto sugad han Pahayag 21:3, 4 o Salmos 37:10, 11, 29 ha ira Portuguese nga Biblia, namamati hira ngan usahay nagtatangis pa ngani.” Padayon  nga iginpakita han pamilya an ira pagpaid hini nga mga indibiduwal. “Han nakita namon nga gutom hira ha espirituwal,” siring ni Sakiko, “nagtikang an amon pamilya pag-aram hin Portuguese.” Ha urhi, ini nga pamilya nakabulig ha pag-establisar hin Portuguese nga kongregasyon. Ha sulod hin mga katuigan, damu nga dayo nga residente an nabuligan hini nga pamilya nga magin surugoon ni Jehova. Hi Sakiko nagdugang: “Kinahanglan an daku nga pangalimbasog ha pag-aram hin Portuguese pero mas damu an bendisyon nga amon nakakarawat kay ha mga sakripisyo nga amon ginhihimo. Mapasalamaton gud kami kan Jehova.”—Basaha an Buhat 10:34, 35.

11, 12. (a) Kay ano nga importante gud an pagkaada husto nga motibo ha pagsul-ot han bag-o nga personalidad? (b) Ano an mabulig ha aton nga magpabilin nga mapainubsanon?

¹¹ An aton motibo ha pagsul-ot han bag-o nga personalidad amo an pagpasidungog kan Jehova, diri basi dayawon kita han mga tawo. Tigamni nga bisan an usa nga perpekto nga espiritu nga linarang nakasala kay gintugotan niya an iya kalugaringon nga magin mapahitas-on. (Itanding an Esekiel 28:17.) Salit mas makuri gud para ha diri perpekto nga mga tawo nga likyan an pagpahitaas ngan an sayop nga pagpasigarbo! Bisan pa hito, posible pa gihapon nga maisul-ot naton an pagpaubos. Ano an makakabulig ha aton ha pagbuhat hito?

¹² Basi magpabilin nga mapainubsanon, kinahanglan maggahin kita hin panahon kada adlaw ha pagpamalandong han aton nababasa ha Pulong han Dios. (Deut. 17:18-20) Kinahanglan naton pamalandungon labi na an katutdoan ni Jesus ngan an iya maopay gud nga susbaranan ha pagin mapainubsanon. (Mat. 20:28) Ginhimsawan pa ngani niya an iya mga apostol. (Juan 13:12-17) Kinahanglan liwat kita pirme mag-ampo para han espiritu han Dios nga mabulig ha aton nga madaog an anoman nga tendensya nga umabat nga labaw kita ha iba.—Gal. 6:3, 4; Fil. 2:3.

13. Ano an mag-opay nga resulta han pagin mapainubsanon?

¹³ Basaha an Proberbios 22:4. Importante gud nga kultibaron han tinuod nga mga magsiringba an pagin mapainubsanon. An pagbuhat hito nagriresulta hin damu nga balos. An pagin mapainubsanon mabulig ha aton nga matipigan an kamurayawan ngan pagkaurosa ha kongregasyon. An pagkultibar han pagin mapainubsanon ngan pagtipig hito mabulig liwat ha aton nga makarawat an diri-matupngan nga pagkabuotan han Dios. Hi apostol Pedro nagsiring: “Igsul-ot niyo ngatanan an pagkamapainubsanon, kay an Dios nakontra ha mga mapahitas-on, pero nahatag hiya ha mga mapainubsanon hin diri-matupngan nga pagkabuotan.”—1 Ped. 5:5.

14. Hin-o an pinakamaopay nga susbaranan ha pagin malumo ngan pagin pasensyoso?

¹⁴ Ha kalibotan yana, kasagaran nga gintatagad nga maluya an mga tawo nga malumo ngan pasensyoso. Pero sayop gud ito nga panhunahuna! Inin mag-opay nga kalidad nagtitikang ha pinakagamhanan nga Persona ha uniberso. Hi Jehova nga Dios an pinakamaopay nga susbaranan ha pagin malumo ngan pagin pasensyoso. (2 Ped. 3:9) Tagda kon paonan-o hiya ginios pinaagi han iya mga anghel han ginkwestyon hiya ni Abraham ngan ni Lot. (Gen. 18:22-33; 19:18-21) Dugang pa, ha sulod hin sobra 1,500 ka tuig, nagpailob hiya ha rebelyoso nga nasud han Israel.—Esek. 33:11.

15. Paonan-o hi Jesus nagpakita hin susbaranan ha pagin malumo ngan pagin pasensyoso?

¹⁵ Hi Jesus “malumo.” (Mat. 11:29) Nagin pasensyoso gud hiya ha mga kaluyahan han iya mga sumurunod. Durante han pagministeryo ni Jesus ha tuna, nag-antos hiya hin pagtamay han mga lider han relihiyon nga nakontra ha iya. Pero nagpabilin hiya nga malumo ngan pasensyoso tubtob ha kamatayon bisan kon diri makatadunganon an ginbuhat ha iya. Samtang nag-aantos hi Jesus hin duro nga kaul-ol ha pasakitan nga kahoy, nag-ampo hiya ha iya Amay nga pasayloon an mga magpapatay  ha iya tungod kay, sugad han iya ginsiring, “diri hira maaram han ira ginbubuhat.” (Luc. 23:34) Maopay gud hiya nga susbaranan ha pagin malumo ngan pagin pasensyoso bisan pa han masakit ngan makuri nga mga kahimtang!—Basaha an 1 Pedro 2:21-23.

16. Paonan-o naton maipapakita ha praktikal nga paagi an pagin malumo ngan pagin pasensyoso?

¹⁶ Paonan-o naton maipapakita an pagin malumo ngan pagin pasensyoso? Nag-unabi hi Pablo hin usa nga paagi han nagsurat hiya ha iya mga igkasi-tumuroo: “Padayon nga mag-inantosay ngan kinasingkasing nga magpinasayloay kamo bisan kon may hinungdan an usa ha pagreklamo kontra ha iba. Sugad la nga hi Jehova kinasingkasing nga nagpasaylo ha iyo, kinahanglan ito liwat an iyo buhaton.” (Col. 3:13) Oo, ginkikinahanglan an pagin malumo ngan pagin pasensyoso basi masunod naton ini nga sugo. Pero pinaagi ha pagin mapinasayloon, nabulig kita ha pagtipig han pagkaurosa han kongregasyon.

17. Kay ano nga importante an pagin malumo ngan pagin pasensyoso?

¹⁷ An pagsul-ot han mga kalidad nga pagin malumo ngan pagin pasensyoso diri opsyonal ha mga Kristiano. Ginkikinahanglan gud ito para ha aton katalwasan. (Mat. 5:5; San. 1:21) Labaw han ngatanan, pinaagi hini nga mga kalidad, napapasidunggan naton hi Jehova ngan nabubuligan naton an iba nga sundon an sagdon han Biblia.—Gal. 6:1; 2 Tim. 2:24, 25.

18. Ano an koneksyon han gugma ha pagin waray pinaurog?

¹⁸ An ngatanan nga kalidad nga aton ginhisgotan konektado gud ha gugma. Pananglitan, kinahanglan sagdonan han disipulo nga hi Santiago an kabugtoan tungod kay ginpapaurog nira an mga riko kay ha mga pobre. Iginsaysay niya nga an sugad nga paggawi diri gud uyon ha balaud han Hadi: “Higugmaa an imo igkasi-tawo sugad ha imo kalugaringon.” Katapos, hiya nagdugang: “Kon padayon nga nagpapakita kamo hin paboritismo, nakakasala kamo.” (San. 2:8, 9) Ha kabaliktaran, an gugma magpapagios ha aton nga likyan an diskriminasyon tungod han edukasyon, lahi, o kahimtang ha kinabuhi. Oo, an pagin waray pinaurog kinahanglan magin bahin gud han aton personalidad, diri kay pakunokuno la.

19. Kay ano nga importante nga isul-ot naton an gugma?

¹⁹ An gugma “nagpapasensya ngan buotan” ngan “diri nagpapahitaas.” (1 Cor. 13:4) Ginkikinahanglan gud an pagkapasensyoso, pagkabuotan, ngan pagpaubos basi padayon naton nga maisangyaw an mensahe han Ginhadian ha aton igkasi-tawo. (Mat. 28:19) Ini nga mga kalidad nabulig liwat ha aton nga magin mas masayon an pakig-upod ha ngatanan nga kabugtoan ha kongregasyon. Ano an mag-opay nga resulta han pagpakita han sugad nga gugma? Nabulig ito nga magkaada pagkaurosa ha mga kongregasyon nga tungod hito napapasidunggan hi Jehova ngan nadadani ha kamatuoran an mga interesado. Angayan gud inin pangataposan nga mga pulong sugad nga paghulagway han Biblia may kalabotan han bag-o nga personalidad: “Labot hini ngatanan, isul-ot niyo an gugma, kay ini an hingpit nga bugkos han pagkaurosa.”—Col. 3:14.

20. (a) Ano an sadang naton ipakiana ha aton kalugaringon, ngan kay ano? (b) Ano an aton ginpapamulat?

²⁰ Sadang naton pakianhan an aton kalugaringon, ‘Ano pa an puydi ko himoon basi mahukas ngan mabayaan an daan nga personalidad?’ Kinahanglan naton sinsero nga mag-ampo para han bulig han Dios ngan mangalimbasog gud nga hukason an anoman nga paggawi o buhat nga magigin hinungdan nga diri naton mapanunod an Ginhadian han Dios. (Gal. 5:19-21) Kinahanglan liwat naton pakianhan an aton kalugaringon, ‘Padayon ko ba nga ginbabag-o an paagi han akon paghunahuna?’ (Efe. 4:23, 24) An pagsul-ot han bag-o nga personalidad nagpapadayon nga proseso para ha ngatanan nga Kristiano tubtob nga bug-os na naton ito nga mahimo. Handurawa la an makalilipay nga kinabuhi nga aton maieksperyensyahan kon an ngatanan nga aton kakilala perpekto na nga nagsusul-ot han bag-o nga personalidad!