1, 2. 1) ¿Baʼaxten k-aʼalik jeʼel u páajtal k-eʼesik jatsʼuts modoseʼ? 2) ¿Baʼax modosiloʼob ku yaʼalik Colosasiloʼob 3:10 tak 14 unaj u yantaltoʼon wa ‹k-túumbenkuntik k-kuxtal›?

LE TʼAAN «túumben kuxtaloʼ» kaʼatéen u chíikpajal ichil le Biblia Kiliʼich Tsʼíiboʼob ich Griego. U Suttʼaanil Túumben Luʼumoʼ (Efe. 4:24; Col. 3:10). Lelaʼ táan u tʼaan tiʼ «le túumben modos beetaʼan jeʼex uts tu tʼaan Dios[oʼ]». ¿Jeʼel wa túun u páajtal k-túumbenkuntik k-kuxtaleʼ? Jeʼeleʼ, tumen Jéeobaeʼ tu beetoʼon jeʼel bix letiʼeʼ. Le oʼolal jeʼel u páajtal k-eʼesik u jatsʼuts modoseʼ (Gén. 1:26, 27; Efe. 5:1).

² Tuláakloʼon j-kʼebanoʼon yoʼolal le baʼax tu beetaj Adán yéetel Evaoʼ, le oʼolal ku yantaltoʼon kʼaakʼas tsʼíibolaloʼob. Tsʼoʼoleʼ le baʼax ku beetik u maasiloʼ jeʼel u péeksikoʼon k-beet xan beyoʼ. Baʼaleʼ yoʼolal le áantaj ku tsʼáaiktoʼon Jéeobaoʼ jeʼel u páajtal k-beetik baʼax uts tu tʼaaneʼ. Utiaʼal u páajtal k-beetik lelaʼ yaan k-ilik jejeláas modos unaj u yantaltoʼon wa k-túumbenkuntik k-kuxtal jeʼex úuchik u yaʼalik Pablooʼ (xok Colosasiloʼob 3:10-14). Tsʼoʼoleʼ yaan k-ilik bix jeʼel k-eʼesik ken kʼaʼaytajnakoʼoneʼ.

3. ¿Máakalmáak junpʼéel tiʼ le modos yaan ichil le túumben kuxtaloʼ?

³ Ka tsʼoʼok u yaʼalik Pablo unaj k-túumbenkuntik k-kuxtaleʼ, tu yaʼalaj xaneʼ unaj k-bisikba yéetel tuláakal máak. Teʼ Colosasiloʼob 3:11, tu yaʼalaj: «Minaʼan griego mix judío, minaʼan x-maʼ súutkʼuptajil mix súutkʼuptajil, minaʼan j-táanxel luʼumil, mix escita, minaʼan palitsil, minaʼan máax maʼ palitsiltaʼaniʼ». * Mix máak teʼ múuchʼulil unaj u taaskuba maas maʼalob tiʼ u maasil yoʼolal u raza, tuʼux síiji mix tumen wa ayikʼal. ¿Baʼaxten? Tumen le máaxoʼob jach tu jaajil meyajtik Diosoʼ ‹juntúuliliʼob›, wa junmúuchʼ u meyajoʼob (Gal. 3:28).

4. 1) ¿Bix unaj u biskuba le máaxoʼob meyajtik Diosoʼ? 2) ¿Baʼax jeʼel u talamkúuntik u biskuba maʼalob le máaxoʼob meyajtik Diosoʼ?

⁴ Wa k-túumbenkuntik k-kuxtaleʼ yaan k-eʼesik tsiikil tiʼ tuláakal máak yéetel yaan k-tratartikoʼob maʼalob kex jeʼel tuʼuxak u taaloʼobeʼ wa kex óotsiloʼob (Rom. 2:11). Yaan tuʼuxoʼobeʼ maʼ chéen chʼaʼabil u beetaʼaliʼ. Jeʼex tu luʼumil Sudáfricaeʼ, le gobiernooʼ tu jatsaj le máakoʼob tiʼ cada junpʼéel razaoʼ. Le saktakoʼoboʼ yaanal tuʼux tu tsʼáaj, bey xan le booxoʼob yéetel le j-kolnáaloʼoboʼ. Yaʼab tiʼ le sukuʼunoʼoboʼ láayliʼ tiʼ kajaʼanoʼob teʼ tuʼux tsʼaʼaboʼob tumen le gobiernooʼ. Baʼaleʼ le Cuerpo Gobernanteoʼ tu yaʼalaj tiʼ le sukuʼunoʼob ka u ‹píiʼ jeʼekʼabt u puksiʼikʼaloʼob›, jeʼex u yaʼalik Kaʼapʼéel tiʼ Corintoiloʼob 6:13. Le oʼolal tu mesil octubre tiʼ 2013, beetaʼab junpʼéel programa especial utiaʼal u paklan kʼaj óoltikuba le sukuʼunoʼoboʼ. ¿Baʼax le beetaʼaboʼ?

5, 6. 1) ¿Baʼax beetaʼab utiaʼal u yáantaʼal le sukuʼunoʼob u bisubaʼob yéetel u maasiloʼ? (Ilawil le fotoʼob yaan tu káajbal le xookaʼ.) 2) ¿Baʼax utsiloʼob tsʼoʼok u taasik?

⁵ Le Cuerpo Gobernanteoʼ tu yaʼalaj tiʼ le sukuʼunoʼob yanoʼob tiʼ kaʼapʼéel múuchʼulil yaanal u idiomaʼob wa yaanal u razaʼobeʼ unaj u muchʼkubaʼob tu jóokʼbal wa jaypʼéel semanaʼob. Le oʼolal káaj u múul kʼaʼaytajoʼob, u múul binoʼob muchʼtáambal yéetel u binoʼob xíimbal tu yotochoʼob. Lelaʼ yaʼab múuchʼulil beet beyoʼ. Yaʼab sukuʼunoʼobeʼ tu túuxtoʼob cartaʼob tu najil Betel tuʼux ku yaʼalikoʼob jach kiʼimak u yóoloʼob yoʼolal le baʼax beetaʼaboʼ, tak le máaxoʼob maʼatech u meyajtikoʼob Dios tsʼíibnajoʼoboʼ. U nojchil junpʼéel religioneʼ tu yaʼalaj: «Teneʼ maʼ u j-jaajkunajen Jéeobaiʼ, chéen baʼaleʼ jach jatsʼuts in wilik bix a múuchʼ meyajeʼex». ¿Baʼax utsil tu kʼamaj le sukuʼunoʼob yoʼolal le baʼax tu beetoʼoboʼ?

⁶ Tu káajbaleʼ juntúul kiik ku kʼaabaʼtik Noma, ku tʼanik le idioma xhosaoʼ, sajak u invitart tu yotoch le sukuʼunoʼob sak u wíinkliloʼob yanoʼob teʼ múuchʼulil tʼanik inglesoʼ. Baʼaleʼ ka tsʼoʼok u kʼaʼaytaj tu yéeteloʼob yéetel úuchik u bin u xíimbaltoʼob tu yotochoʼobeʼ, tu yaʼalaj: «¡Beyoʼob jeʼexoʼoneʼ! ¡Maʼ jelaʼanoʼobiʼ!». Le oʼolal ka bin le sukuʼunoʼob tʼanik le idioma inglés tu múuchʼuliloʼ, tu beetaj janal utiaʼal u invitartik wa jaytúul tu yotochiʼ. Juntúul tiʼ le binoʼob tu yotochoʼ anciano yéetel sak u wíinklil. Le kiikoʼ tu yaʼalaj: «Mix juntéen tin tuklaj wa jeʼel u yóotik kutal chéen tiʼ junpʼéel caja de plástico jach kabaleʼ». Le programaaʼ tak bejlaʼa yaneʼ. Yoʼolal lelaʼ yaʼab sukuʼunoʼob yéetel kiikoʼobeʼ tsʼoʼok u joʼopʼol u biskubaʼob yéetel uláakʼ sukuʼunoʼob, tsʼoʼoleʼ taak u kʼaj óoltikoʼob uláakʼ sukuʼunoʼob jejeláas tuʼux u taaloʼob.

7. ¿Baʼaxten maʼ unaj u xuʼulul k-chʼaʼik óotsililiʼ?

⁷ Teʼ tu kʼasaʼan yóokʼol kaab Satanasaʼ maʼ kun xuʼulul u pʼáatal minaʼan meyaj, yaayaj kʼojaʼaniloʼob, chʼaʼpachtajil, u yúuchul  loobiloʼob, u yoklaʼal máak yéetel uláakʼ talamiloʼob. Le oʼolal kʼaʼabéet k-chʼaʼik óotsilil utiaʼal k-paklan áantikba. Le chʼaʼ óotsililoʼ jeʼel u péeksikoʼon k-eʼes utsileʼ (Efe. 4:32). Le modosoʼobaʼ jeʼel u yáantkoʼon k-beet jeʼex Dioseʼ yéetel k-líiʼs u yóol u maasil (2 Cor. 1:3, 4).

8. ¿Baʼax utsiloʼob jeʼel u taasik wa k-eʼesik utsil tiʼ tuláakal le sukuʼunoʼob teʼ múuchʼuliloʼ? Aʼal junpʼéel baʼax eʼesik.

⁸ Maʼ xaaneʼ t-múuchʼulileʼ yaan sukuʼunoʼob yaanal luʼumil u taaloʼob wa yanoʼobeʼ óotsiloʼob. ¿Bix jeʼel k-eʼesik utsil tiʼobeʼ? K-beetikba u amigoʼob yéetel k-eʼesiktiʼob jach maʼalob meyaj ku beetkoʼob teʼ múuchʼuliloʼ (1 Cor. 12:22, 25). Koʼoneʼex ilik baʼax úuch tiʼ Dannykarl, letiʼeʼ kajakbal kaʼach Filipinas, baʼaleʼ bin Japón. Teʼ tuʼux ku meyajoʼ maʼ jach maʼalob u tratartaʼal jeʼex le japoniloʼob ku meyajoʼoboʼ. Baʼaleʼ junpʼéel kʼiineʼ bin tu muchʼtáambal u j-jaajkunajoʼob Jéeoba. Letiʼeʼ ku yaʼalik: «Láaj japoniloʼob yanoʼobiʼ. Baʼaleʼ tu kʼamenoʼob yéetel yaabilaj, bey úuch in kʼaj óoltoʼobeʼ». Le sukuʼunoʼoboʼ maʼ xuʼul u yeʼeskoʼob utsil tiʼiʼ, leloʼ le áant u bisuba yéetel Dios. Okjaʼanaji, bejlaʼeʼ anciano. U maasil ancianoʼoboʼ ku yaʼalikoʼobeʼ Dannykarl yéetel Jennifer, u yataneʼ, jach nojoch áantaj ku tsʼáaikoʼobiʼ. Ku yaʼalikoʼob: «Le sukuʼun yéetel u yatanoʼ tsʼoʼok u kankoʼob kuxtal chéen yéetel junpʼíit baʼal, jach tu jaajil ku yeʼeskoʼob bix unaj u tsʼáaik máak le Reino táanil ichil u kuxtaloʼ» (Luc. 12:31).

9, 10. ¿Baʼax tsʼoʼok u beetik jujuntúul sukuʼunoʼob ikil u chʼaʼikoʼob óotsil tiʼ le máakoʼob teʼ kʼaʼaytajoʼ?

⁹ Le kʼaʼaytajoʼ ku tsʼáaik tuʼux k-beetik «baʼax maʼalob utiaʼal k-áantik tuláakal máak» (Gal. 6:10). Yaʼab sukuʼunoʼobeʼ tsʼoʼok u kankoʼob junpʼéel túumben idioma, tumen ku chʼaʼikoʼob óotsilil tiʼ le j-táanxel luʼumiloʼoboʼ (1 Cor. 9:23). Lelaʼ tsʼoʼok u taasik yaʼab utsiloʼob. Tiffany, juntúul precursora ku taal Australiaeʼ, taak u yáantaj kaʼach tiʼ junpʼéel chan múuchʼulil yaan tu kaajil Brisbane, teʼeloʼ ku tʼaʼanal le idioma suajilioʼ. Kex talam úuchik u kanikeʼ, jach kiʼimakchaj u yóol. Ku yaʼalik: «Le máax u kʼáat u kan túumben baʼaloʼob teʼ kʼaʼaytajoʼ, unaj u bin tiʼ junpʼéel múuchʼulil yaanal idioma ku tʼaʼanliʼ. Kex láayliʼ tu kaajal máak yaneʼ, bey jeʼex ka xiʼik táanxel luʼumileʼ. Lelaʼ jeʼel u yáantik u yil bix u múuchʼ meyaj le sukuʼunoʼob tiʼ tuláakal yóokʼol kaaboʼ».

¹⁰ Koʼoneʼex ilik xan baʼax tu beetaj junpʼéel familia tu luʼumil Japón. Sakiko, u hijaʼobeʼ, ku yaʼalik: «Tu añoiloʼob 1990 tak 1999, kʼaʼaytajnajoʼon tiʼ yaʼab máakoʼob ku taaloʼob Brasil. Le ken k-xoktiʼob tu Bibliaʼob ich portugués u tekstoil Apocalipsis 21:3 yéetel 4 wa Salmo 37:10, 11 yéetel 29, jach ku yuʼubikoʼob, yaan kʼiineʼ hasta ku yokʼoloʼob». Le chʼaʼ óotsilaloʼ le péeks le familia  u beetoʼob u maasil utiaʼal u tsʼáaikoʼob áantajoʼ. Sakikoeʼ ku yaʼalik: «Le ka t-ilaj jach taak u kankoʼob u maasil tiʼ Jéeobaeʼ, t-chʼaʼtuklaj k-kanik portugués». Ka máan kʼiineʼ áantajnajoʼob utiaʼal u yantal junpʼéel múuchʼulil ichil le idioma jeʼeloʼ. Ichil tuláakal le jaʼaboʼob tsʼoʼok u máanoʼ, tsʼoʼok u yáantkoʼob yaʼab j-táanxel luʼumiloʼob u meyajtoʼob Jéeoba. Sakikoeʼ ku yaʼalik: «Maʼ chéen chʼaʼabil úuchik k-kanik le idiomaoʼ, baʼaleʼ yaʼab utsiloʼob tsʼoʼok k-kʼamik tu yoʼolal. K-tsʼáaik u graciasil tiʼ Jéeoba yoʼolal tuláakal leloʼ» (xok Baʼaxoʼob 10:34, 35).

11, 12. 1) ¿Baʼaxten kʼaʼabéet k-eʼesik kabal óolal? 2) ¿Baʼax jeʼel u yáantkoʼon k-eʼes kabal óolal mantatsʼeʼ?

¹¹ Toʼoneʼ k-ilik k-túumbenkuntik k-kuxtal utiaʼal k-tsʼáaik nojbeʼenil tiʼ Jéeoba, maʼ utiaʼal ka tsʼaʼabaktoʼon nojbeʼeniliʼ. Kʼaʼajaktoʼoneʼ tak juntúul angeleʼ kʼebanchaji, tumen kaʼanchaj u yich (ket yéetel Ezequiel 28:17). Yoʼolal le kʼebanoʼ jach talam k-ilik maʼ u kaʼantal k-ich. Kex beyoʼ jeʼel u páajtal k-eʼesik kabal óolaleʼ. ¿Bix jeʼel k-beetkeʼ?

¹² Kʼaʼabéet k-xokik sáamsamal le Bibliaoʼ yéetel k-tuukul tiʼ baʼax ku yaʼalik (Deu. 17:18-20). Junpʼéel baʼax jach jeʼel u yáantkoʼoneʼ letiʼe k-tuukul tiʼ le baʼaxoʼob tu kaʼansaj Jesusoʼ yéetel bix úuchik u yeʼesik kabal óolal (Mat. 20:28). Letiʼeʼ jach kabal u yóol kaʼachi, le oʼolal tu pʼoʼaj u yook u apostoloʼob (Juan 13:12-17). Tsʼoʼoleʼ kʼaʼabéet k-kʼáatik u kiliʼich muukʼ Dios utiaʼal ka u yáantoʼon maʼ k-uʼuyikba nojbaʼalil tiʼ u maasil (Gal. 6:3, 4; Fili. 2:3).

13. ¿Baʼax utsiloʼob ken k-kʼam wa kabal k-óol?

¹³ (Xok Proverbios 22:4.) Jéeobaeʼ u kʼáat ka u yeʼes kabal óolal tuláakal máax meyajtik. Wa kabal k-óoleʼ yaan k-kʼamik yaʼab utsiloʼob. Yaan k-múuchʼ meyaj yéetel yaan u yantal jeetsʼelil teʼ múuchʼuliloʼ. Tsʼoʼoleʼ Jéeobaeʼ yaan u yeʼesiktoʼon u nojoch utsil. Apóstol Pedroeʼ ku yaʼalik: «Búukbesabaʼex tuláakleʼex yéetel kabal óolal ta baatsileʼex, tumen Dioseʼ tiʼ yaan tu contra le máaxoʼob kaʼanal u yichoʼoboʼ, baʼaleʼ ku yeʼesik u nojoch utsil tiʼ le máaxoʼob kabal u yóoloʼoboʼ» (1 Ped. 5:5).

14. ¿Máax jach maʼalob bix u yeʼesik jeetsʼel óolal yéetel chúukaʼan óolal?

¹⁴ Bejlaʼeʼ yaʼab máakeʼ ku yaʼalikeʼ le máaxoʼob yaan jeetsʼel óolal yéetel chúukaʼan óolal tiʼoboʼ chéen ku nuchʼtal u yuʼuboʼob baʼax ku beetaʼaltiʼob. Baʼaleʼ lelaʼ maʼ jaajiʼ. Le jatsʼuts modosoʼobaʼ tiʼ Jéeoba u taal, le Máax maas nojoch u páajtaliloʼ. Letiʼeʼ jach maʼalob bix u yeʼesik jeetsʼel óolal yéetel chúukaʼan óolal (2 Ped. 3:9). Lelaʼ ku chíikpajal yoʼolal le bix úuchik u túuxtik u angeloʼob utiaʼal u núukikoʼob le baʼax tu kʼáataj Abrahán yéetel Lotoʼ (Gén. 18:22-33; 19:18-21). Tsʼoʼoleʼ bey u yeʼesik xan yoʼolal le bix tu tratartil le israelitaʼob tu yáamil le mil quinientos años kex maʼ tu yuʼuboʼob tʼaanoʼ (Eze. 33:11).

15. ¿Baʼax k-kanik tiʼ Jesús?

¹⁵ Jesús xaneʼ tu yeʼesaj ‹chúukaʼan óolal› (Mat. 11:29). Chúukpaj u yóol tiʼ u disipuloʼob kex yaʼab baʼaxoʼob maʼ maʼalobtak tu beetoʼobiʼ. Chúukpaj xan u yóol le ka aʼalaʼab baʼal tiʼ tumen u nuuktakil le judíoʼoboʼ yéetel le ka aʼalaʼab táan u tʼaan kʼaas tu contra Diosoʼ. Tu yeʼesaj jeetsʼelil yéetel chúukaʼan óolal tak ka kíimi. Le táan u muʼyaj teʼ cheʼoʼ tu kʼáataj tiʼ Jéeoba ka u perdonart le máaxoʼob kíimskoʼ. Tu yaʼalaj: «Maʼ u yojloʼob baʼax ku beetkoʼobiʼ» (Luc. 23:34). Jeʼex túun k-ilkoʼ Jesuseʼ tu yeʼesaj jeetsʼelil yéetel chúukaʼan óolal tak teʼ súutukiloʼob jach yaj baʼax ku muʼyajtikoʼ. ¿Máasaʼ maʼalob ka k-beet jeʼex tu beetiloʼ? (Xok 1 Pedro 2:21-23.)

16. ¿Bix jeʼel k-eʼesik jeetsʼel óolal yéetel chúukaʼan óolaleʼ?

 ¹⁶ ¿Bix jeʼel k-eʼesik jeetsʼelil yéetel chúukaʼan óolaleʼ? Junpʼéel bixeʼ letiʼe ka k-perdonart baʼax ku beetik u maasiloʼ. Pabloeʼ tu yaʼalaj tiʼ le sukuʼunoʼoboʼ: «Seguernak a muʼyajtikabaʼex ta baatsileʼex yéetel a perdonarkabaʼex ta baatsileʼex yéetel u jaajil a wóoleʼex kex wa yaan baʼax oʼolal u tʼaan máak tu contra uláakʼ. Jeʼel bix tu perdonartileʼex Jéeoba yéetel u jaajil u yóoleʼ, teʼexeʼ bey xan unaj a beetkeʼexoʼ» (Col. 3:13). Jeʼex túun k-ilkoʼ kʼaʼabéet jeetsʼel óolal tiʼ máak yéetel chúukaʼan óolal utiaʼal u beetik le baʼax ku yaʼalik le tekstoaʼ. Wa k-beetkeʼ yaan k-múuchʼ meyaj yéetel le sukuʼunoʼob teʼ múuchʼuliloʼ.

17. ¿Baʼaxten jach kʼaʼabéet k-eʼesik jeetsʼel óolal yéetel chúukaʼan óolal?

¹⁷ Jéeobaeʼ ku yaʼaliktoʼon ka k-eʼes jeetsʼel óolal yéetel chúukaʼan óolal. Wa k-kʼáat kuxtal teʼ túumben luʼumoʼ jach unaj k-eʼesik le jatsʼuts modosoʼobaʼ (Mat. 5:5; Sant. 1:21). U maas kʼaʼanaʼanileʼ yaan k-tsʼáaik nojbeʼenil tiʼ Jéeoba yéetel yaan k-áantik u maasil u beetoʼob le baʼax ku kaʼansik le Bibliaoʼ (Gal. 6:1; 2 Tim. 2:24, 25).

18. ¿Baʼax jeʼel u péeksikoʼon k-beet le yaabilajoʼ?

¹⁸ Tuláakal le modosoʼob tsʼoʼok k-ilik tak beoraaʼ láaj nuʼuktaʼanoʼob tumen le yaabilajoʼ. Le oʼolal disipulo Santiagoeʼ tu yáantaj le sukuʼunoʼob u kʼex u tuukuloʼoboʼ, tumen letiʼobeʼ maas maʼalob bix u tratartikoʼob le ayikʼaloʼob tiʼ le óotsiloʼoboʼ. Tu yaʼalajtiʼobeʼ ku bin tu contra le baʼax ku yaʼalik Diosaʼ: «Kʼaʼabéet a yaabiltik a wéet máakil jeʼel bix a yaabiltikabaeʼ». Tsʼoʼoleʼ tu yaʼalajtiʼob: «Wa maʼ tu xuʼulul a weʼeskeʼex utsil chéen tiʼ junjaats máakoʼobeʼ táan a kʼebantaleʼex» (Sant. 2:8, 9). Wa k-yaabiltmaj u maasileʼ maʼ ken k-taas mix baʼalil wa máax chéen yoʼolal u raza, tumen maʼ kaʼanchajaʼan u xookiʼ wa tumen óotsil. Maʼ chéen unaj k-aʼalik k-yaabiltmaj le sukuʼunoʼoboʼ, baʼaxeʼ unaj u yilaʼal yéetel baʼaxoʼob k-beetik.

19. ¿Baʼaxten jach unaj k-eʼesik yaabilaj?

¹⁹ Le yaabilajoʼ «chúukaʼan u yóol», «ku yeʼesik u yutsil» yéetel maʼatech u «kaʼantal u yich» (1 Cor. 13:4). Bey túunoʼ kʼaʼabéet k-eʼesik chúukaʼan óolal, utsil yéetel kabal óolal utiaʼal u seguer k-kʼaʼaytik u maʼalob péektsilil le Reino tiʼ le máakoʼoboʼ (Mat. 28:19). Le modosoʼobaʼ ku yáantkoʼon utiaʼal k-bisikba yéetel tuláakal le sukuʼunoʼob teʼ múuchʼuliloʼ. Wa tuláakloʼon k-eʼesik yaabilaj beyaʼ, tuláakal ken u bisuba tubeel teʼ múuchʼuliloʼ yéetel yaan u tsʼaʼabal nojbeʼenil tiʼ Jéeoba. Tsʼoʼoleʼ yaan u taaktal u natsʼkuba uláakʼ máakoʼob ichil u kaajal Jéeoba. Le oʼolal ka tsʼoʼok u tʼaan le Biblia tiʼ u kʼaʼabéetil u túumbenkuntik u kuxtal máakoʼ, ku yaʼalik: «Maʼ chéen yéetel le baʼaloʼob unaj a búukbeskabaʼexaʼ, búukbesabaʼex xan yéetel yaabilaj, tumen le yaabilajoʼ ku nupik tubeel tuláakal máak» (Col. 3:14).

20. 1) ¿Baʼax kʼáatchiʼiloʼob maʼalob ka k-beete, yéetel baʼaxten? 2) ¿Baʼaxoʼob jatsʼutstak k-páaʼtik k-ilik?

²⁰ Tuláakloʼon unaj k-tuklik: «¿Baʼax uláakʼ unaj in beetik utiaʼal in pʼatik le úuchben kuxtaloʼ?». Unaj k-sen kʼáatik tiʼ Jéeoba ka u yáantoʼon yéetel unaj k-beetik tuláakal le ku páajtal utiaʼal k-luʼsik t-tuukul yéetel k-pʼatik le baʼaloʼob kʼaastak jeʼel u beetkoʼob maʼ k-tiaʼalintik u Reinoeʼ (Gal. 5:19-21). Tsʼoʼoleʼ maʼalob xan ka k-tukle: «¿Táan wa in kʼexik bix in tuukul utiaʼal in lúubul utsil tiʼ Jéeoba?». Yoʼolal le kʼebanoʼ mantatsʼ unaj k-beetik tuláakal le ku páajtal utiaʼal k-túumbenkuntik k-kuxtaloʼ (Efe. 4:23, 24). ¡Chéen tukult bukaʼaj jatsʼutsil kun kuxtal tuláakal máak ken luʼsaʼak le kʼeban yéetel ken eʼesaʼak jatsʼuts modos tumen tuláakal máakoʼ!