點樣穿上同保持新品格
“要穿上新品格”——歌羅西書3:10
1，2． （甲）點解我哋能够培養新品格？（乙）歌羅西書3:10-14記錄咗邊啲特質？
“新品格”呢個詞喺《聖經新世界譯本》出現過兩次。（以弗所書4:24；歌羅西書3:10）呢個品格係“按照上帝嘅旨意創造嘅”。培養呢個新品格係我哋做得到嘅。點解呢？因為耶和華按照佢嘅形象創造人類，使人可以反映佢嘅美好特質。（創世記1:26，27；以弗所書5:1）
2 我哋嘅始祖將唔完美嘅身心遺傳俾我哋，所以我哋會受到錯誤慾望影響。我哋亦都可能會深受周圍環境所影響。喺耶和華仁慈嘅幫助之下，我哋可以成為合佢心意嘅人。為咗達到呢個目標，我哋會討論吓使徒保羅喺聖靈啟示下提到嘅幾種特質。（請讀歌羅西書3:10-14）我哋亦都會睇吓喺傳道工作上，可以點樣表現呢啲特質。
“都係一體”
3． 新品格嘅其中一種特質係乜嘢？
3 喺勸勉我哋穿上新品格之後，保羅描述到新品格其中一種顯著嘅特質——唔偏心。佢話:“唔在乎係希臘人抑或猶太人，有受割禮嘅抑或冇受割禮嘅，係外國人抑或西徐亞人，係奴隸抑或自由人。” * 喺會衆裏面，弟兄姊妹之間點解唔應該因為種族、民族，或者社會地位唔同而有差别呢？因為真基督徒“都係一體”。（歌羅西書3:11；加拉太書3:28）
4． （甲）上帝嘅僕人應該以點樣嘅態度待人？（乙）乜嘢情況對基督徒嘅團結係一個挑戰？
4 無論信徒同工或者其他人嘅社會地位、種族背景係點樣嘅，穿上新品格嘅人都會尊重佢哋，顧及佢哋嘅尊嚴。（羅馬書2:11）但係，對某啲地區嘅人嚟講，呢個可能係個挑戰。就好似喺南非，地區曾經被劃分為白人區、黑人區，或者混血人居住區。而家好多見證人仲住喺呢啲按種族嚟劃分嘅地區。所以，為咗鼓勵南非嘅弟兄“開闊心胸”，中央長老團喺2013年10月批准咗一個特别嘅安排，幫助佢哋彼此認識。（哥林多後書6:13）佢哋具體點樣做呢？
5，6． （甲）上帝嘅組織喺南非做咗乜嘢安排嚟强化上帝子民之間嘅關係？（請睇吓課文開頭嘅圖片）（乙）有乜嘢成果？
5 語言或種族唔一樣嘅兩群會衆，會安排喺週末一齊活動。呢兩群會衆嘅弟兄姊妹會一齊傳道，一齊聚會，互相邀請對方到自己屋企交往。幾百個會衆參加咗呢個安排，根據分部辦事處收到嘅報告，除咗弟兄姊妹，連非見證人對呢個安排都有好好嘅評價。例如，一個傳教士受到感動，話:“我唔係見證人，但係我好想講，你哋嘅傳道工作組織得非常之好，唔同種族之間充滿團結嘅精神。”呢個安排對我哋嘅弟兄姊妹有乜嘢影響呢？
6 諾瑪係一個講科薩語嘅姊妹。一開始，佢唔係好想邀請英語會衆嘅白人弟兄姊妹去自己簡陋嘅屋企。不過，同白人弟兄姊妹一齊傳道，喺佢哋屋企交往之後，佢感歎話:“佢哋同我哋冇乜嘢唔同啊！”所以，輪到科薩語會衆邀請英語會衆嘅弟兄姊妹交往嘅時候，諾瑪準備咗一餐飯嚟招待佢哋。諾瑪提到客人當中一位白人長老，話:“令我印象深刻嘅係，佢居然唔介意坐喺咁矮嘅塑膠箱度。”通過呢個持續嘅安排，好多弟兄姊妹識到新朋友，佢哋都決心繼續喺交往方面開闊心胸。
“憐恤之情、仁慈”
7． 點解我哋要繼續以憐憫之心待人？
7 撒但嘅制度被毁滅之前，我哋會一直面對考驗，例如，失業、嚴重嘅健康問題、迫害、天災、因罪行而遭受損失等難題。喺遭遇苦難或者面對逆境嗰陣，我哋要懷住真摯嘅憐恤之情互相扶持。憐憫之心會推使我哋喺行動上表現仁慈。（以弗所書4:32）新品格嘅呢啲特質會幫助我哋效法上帝，安慰其他人。（哥林多後書1:3，4）
8． 我哋對會衆嘅所有人表現憐恤同仁慈，可以帶嚟乜嘢好結果？請舉例。
8 喺會衆裏面，有啲弟兄姊妹嚟自國外，有啲生活艱難。我哋可以點樣對佢哋表現更多關注呢？我哋可以同佢哋做朋友，幫助佢哋睇出自己喺會衆係有價值嘅。（哥林多前書12:22，25）丹尼卡爾從菲律賓搬咗去日本，我哋嚟睇吓佢嘅經歷。佢喺工作嘅地方受到唔公平嘅對待。後來，佢參加咗耶和華見證人嘅聚會。丹尼卡爾話:“參加聚會嘅幾乎都係日本人，不過佢哋好熱情歡迎我，就好似識咗好耐嘅老朋友噉。”弟兄姊妹繼續仁慈體貼噉對待丹尼卡爾，使佢喺屬靈上不斷進步。佢最後受咗浸，而家係一個長老。會衆嘅其他長老都將丹尼卡爾同佢太太珍妮弗視為會衆嘅福分，佢哋話:“丹尼卡爾同珍妮弗過住簡單嘅先驅生活，喺先追求王國方面立下好榜樣。”（路加福音12:31）
9，10． 喺傳道工作上向人表現憐恤會得到乜嘢獎賞？請舉例。
9 我哋向其他人分享王國信息，就係“對所有人行善”。（加拉太書6:10）出於對移民嘅憐恤，好多見證人努力學習佢哋嘅語言。（哥林多前書9:23）噉樣做帶嚟好多福分。例如，喺澳大利亞一個叫蒂芬妮嘅先驅姊妹，為咗幫助布里斯班市嘅斯瓦希里語會衆而學習佢哋嘅語言。雖然對蒂芬妮嚟講，學習呢種語言要付出好大嘅努力，不過佢嘅生活變得更充實更有意義。佢話:“如果你希望自己嘅傳道工作更加豐富多彩，去外語會衆服務一定好啱你。呢種感覺就好似唔使離開自己嘅城市都可以出國旅遊噉。你可以真正體會到乜嘢係國際性嘅弟兄團體，而且親身感受到弟兄姊妹之間嘅團結有幾咁奇妙。”
乜嘢推動基督徒幫助移民？（請睇第10段）
10 我哋亦都嚟睇吓一個日本家庭嘅例子。女兒佐規子話:“喺90年代，我哋一家人傳道嗰時經常會遇到嚟自巴西嘅移民。我哋會翻開佢哋自己嘅葡萄牙語聖經，俾佢哋睇一啲經文，例如啟示錄21:3，4或者詩篇37:10，11，29。佢哋一邊睇一邊留心聽我哋講，有時仲流出眼淚。”呢家人繼續向移民表現憐恤。佐規子話:“我哋睇到佢哋真係好渴求真理，於是全家都開始學習葡萄牙語。”之後，呢個家庭幫手成立咗一個葡萄牙語會衆。多年來，好多移民得到呢個家庭嘅幫助，成為上帝嘅僕人。佐規子又話:“學習葡萄牙語的確要落好多心機，但係我哋得到嘅福分遠遠超過我哋所付出嘅努力。我哋真係好感激耶和華。”（請讀使徒行傳10:34，35）
“要穿上……謙卑”
11，12． （甲）點解懷住正確嘅動機穿上新品格咁重要？（乙）乜嘢可以幫助我哋保持謙卑？
11 我哋穿上新品格嘅動機應該係想榮耀耶和華，而唔係要得到人嘅稱讚。要緊記，如果任由驕傲嘅精神喺内心滋長，就算完美嘅天使都會犯罪。（參考以西結書28:17）有罪嘅人要避免驕傲自大就更加唔容易嘞！雖然係噉，我哋仲係能够穿上新品格，表現謙卑。乜嘢可以幫助我哋穿上謙卑呢？
12 為咗保持謙卑，我哋每日都要撥出時間沉思上帝嘅話語。（申命記17:18-20）我哋由其要認真沉思耶穌嘅教導同埋佢喺謙卑方面樹立嘅傑出榜樣。（馬太福音20:28）耶穌甚至為門徒洗腳。（約翰福音13:12-17）我哋都需要不斷禱告，求上帝賜聖靈幫助我哋避免任何自以為高人一等嘅傾向。（加拉太書6:3，4；腓立比書2:3）
13． 謙卑可以帶嚟乜嘢益處？
13 請讀箴言22:4。謙卑係每個支持正確崇拜嘅人都需要具備嘅特質，可以帶嚟好多益處。謙卑可以幫助我哋喺會衆促進和睦，維繫團結。培養同强化謙卑呢種特質亦都使我哋得享上帝所賜嘅分外恩典。使徒彼得話:“其實你哋所有人都要以謙卑相待，好似束腰服事人一樣，因為上帝同高傲嘅人為敵，但係就賜分外恩典俾謙卑嘅人。”（彼得前書5:5）
“要穿上……温和、耐心”
14． 喺表現温和同耐心方面，邊個係最完美嘅榜樣？
14 喺今日嘅世界，表現温和同耐心往往俾人視為軟弱。呢種睇法同聖經真理有好大差别！呢啲美好嘅特質源於全宇宙力量最强大嘅嗰位——耶和華上帝。喺表現温和同耐心方面，佢係最完美嘅榜樣。（彼得後書3:9）我哋可以諗吓，當亞伯拉罕同羅得向上帝提出問題嘅時候，通過天使耶和華點樣回答佢哋。（創世記18:22-33；19:18-21）仲有，面對以色列嘅反叛，耶和華點樣喺超過1500年嘅時間裏面一直保持忍耐。（以西結書33:11）
15． 喺表現温和同耐心方面，耶穌樹立咗乜嘢榜樣？
15 耶穌“性情温和”。（馬太福音11:29）佢好有耐心噉包容門徒嘅弱點。喺地上傳道期間，耶穌要忍受宗教領袖嘅無理指責。甚至遭受唔公正嘅審判而被處死嗰陣，佢仲係表現出温和同耐心。當耶穌喺苦刑柱上忍受折磨嗰時，佢向天父禱告，求天父寬恕嗰啲處決自己嘅人，話:“因為佢哋唔知道自己喺度做緊啲乜嘢”。（路加福音23:34）喺痛苦同壓力之下，耶穌仍然表現温和同耐心，的確係傑出嘅好榜樣！（請讀彼得前書2:21-23）
16． 我哋可以用乜嘢實際嘅方法表現温和同耐心？
16 我哋可以點樣表現温和同耐心？喺寫俾信徒同工嘅信入面，保羅提到其中一個方法:“無論邊個有理由對人不滿，都要繼續彼此包容，彼此甘心寬恕。耶和華點樣甘心寬恕咗你哋，你哋亦都要點樣甘心寬恕人。”（歌羅西書3:13）當然，我哋服從呢個勸告係需要表現温和同耐心嘅。我哋樂於寬恕弟兄姊妹，就可以喺會衆促進和睦，維繫團結。
17． 點解温和同耐心咁重要？
17 身為基督徒，我哋一定要穿上温和同耐心，因為呢個係我哋得救嘅必要條件。（馬太福音5:5；雅各書1:21）更重要嘅係，通過表現呢啲特質，我哋可以榮耀耶和華，仲可以幫助其他人聽從聖經嘅勸告。（加拉太書6:1；提摩太後書2:24，25）
“要穿上愛”
18． 愛同唔偏心有乜嘢關係？
18 以上考慮過嘅所有特質都同愛有密切嘅關係。例如，門徒雅各因為佢嘅弟兄欺貧愛富，所以俾勸告佢哋。佢指出噉樣嘅行為違反咗“要愛人如己”呢條至尊嘅律法。然後佢補充話:“你哋如果仲係偏心，就係犯罪嘞”。（雅各書2:8，9）相反，愛會推動我哋，唔會因為學歷、種族，或者社會地位而對人有任何偏見。冇錯，我哋唔應該只係表面上對人唔偏心，而係要使呢種特質成為我哋内在為人嘅一部分。
19． 點解穿上愛咁重要？
19 愛亦都係“有耐心、和藹仁慈”同埋“唔自大”嘅。（哥林多前書13:4）要持續不斷噉同其他人分享王國信息，就真係需要有耐心、仁慈，同埋謙卑先至得。（馬太福音28:19）同樣，具備呢啲特質可以幫助我哋同會衆嘅所有弟兄姊妹更容易相處。表現呢種愛可以帶嚟乜嘢獎賞呢？我哋表現呢種愛，可以使會衆更加團結，榮耀耶和華，亦都吸引對真理感興趣嘅人。所以，經文對新品格嘅描述，作咗一個有力嘅總結:“除咗呢一切之外，仲要穿上愛，因為愛能够完美噉維繫團結。”（歌羅西書3:14）
“要繼續更新你哋思想背後嘅動力”
20． （甲）我哋應該問吓自己乜嘢問題？點解？（乙）我哋期待點樣嘅未來？
20 我哋每一個人都應該問吓自己，“為咗除去同棄絶舊品格，我仲需要做啲乜嘢？”我哋要熱切禱告求上帝幫助，努力改變任何使我哋失去承受上帝王國資格嘅行為態度。（加拉太書5:19-21）我哋亦都要問:“我可以點樣繼續更新自己思想背後嘅動力呢？”（以弗所書4:23，24）對所有基督徒嚟講，穿上同保持新品格係一個持續不斷嘅過程，直到我哋身心完美。試諗吓，當身邊所有人都喺新世界恢復完美，穿上新品格，到時生活會幾咁美好！
^ 3段 喺聖經時代，西徐亞人被視為未開化嘅野蠻人。
