SI APOSTOL Pablo giinspirar sa pagsulat bahin sa siyam ka hiyas nga resulta sa paglihok sa balaang espiritu. (Gal. 5:22, 23) Sa katibuk-an, iyang gitawag kining nindot nga mga hiyas ingong “bunga sa espiritu.” * Kini nga bunga bahin usab sa “bag-ong pagkatawo.” (Col. 3:10) Sama nga ang kahoy mamunga kon kanunayng bisbisan, mapakita sa usa ang bunga sa espiritu kon ang balaang espiritu kanunayng moagos diha sa iyang kinabuhi.​—Sal. 1:1-3.

Ang unang bahin sa bunga sa espiritu nga gisulat ni Pablo mao ang bililhong hiyas nga gugma. Unsa kini ka bililhon? Si Pablo miingon nga kon wala siyay gugma, siya “walay kapuslanan.” (1 Cor. 13:2) Apan unsa man gyoy gugma, ug unsaon nato kana pag-ugmad ug pagpakita adlaw-adlaw?

Lisod ipatin-aw kon unsa ang gugma, pero gipakita sa Bibliya ang paagi nga kana gipadayag. Pananglitan, atong mabasa nga ang gugma “hataas-ug-pailob ug maluloton.” Dugang pa, kini “magmaya uban sa kamatuoran,” ug kini “moantos sa tanang butang, motuo sa tanang butang, molaom sa tanang butang, molahutay sa tanang butang.” Ang gugma naglakip usab sa lalom nga pagmahal, sinserong paghunahuna, ug mainitong pagbati sa uban. Pero kon ang usa walay gugma, siya seloso, hambogiro, bastos, hakog, ug madumtanon o dili mapinasayloon. Dili sama nianang negatibong mga hiyas, ang gugma nga gusto natong ugmaron “dili mangita sa kaugalingong kaayohan.”​—1 Cor. 13:4-8.

“Ang Diyos gugma.” Oo, si Jehova ang personipikasyon sa gugma. (1 Juan 4:8) Ang tanan niyang gilalang ug ang iyang mga buhat nagpamatuod sa iyang gugma. Ang iyang kinadak-ang pagpasundayag ug gugma ngadto sa katawhan mao ang pagpadala kang Jesus aron mag-antos ug mamatay para nato. Si apostol Juan miingon: “Pinaagi niini ang gugma sa Diyos gipadayag sa atong kahimtang, tungod kay gipadala sa Diyos ang iyang bugtong nga Anak nganhi sa kalibotan aron kita makabaton ug kinabuhi pinaagi kaniya. Ang gugma maoy niining paagiha, dili nga kita nahigugma sa Diyos, kondili nga siya ang nahigugma kanato ug gipadala ang iyang Anak ingong usa ka halad pasig-uli alang sa atong mga sala.” (1 Juan 4:9, 10) Tungod sa gugma sa Diyos, mahimong mabatonan nato ang pasaylo, paglaom, ug kinabuhi.

Gipamatud-an ni Jesus ang iyang gugma sa katawhan pinaagi sa pagkaandam sa pagbuhat sa kabubut-on sa Diyos. Si Pablo misulat: “[Si Jesus] nag-ingon: ‘Tan-awa! Ako mianhi sa pagbuhat sa imong kabubut-on.’ . . . Pinaagi sa giingong ‘kabubut-on’ kita nabalaan pinaagi sa paghalad sa lawas ni Jesu-Kristo sa makausa alang sa tanang panahon.” (Heb. 10:9, 10) Walay tawong makapakita nianang matanga sa gugma. Si Jesus miingon: “Walay usa nga may gugmang labaw pa kay niini, nga ang usa magtugyan sa iyang kalag alang sa iyang mga higala.” (Juan 15:13) Bisag dili hingpit, masundog ba nato ang  gugma nga gipakita kanato ni Jehova ug ni Jesus? Oo! Atong konsiderahon kon sa unsang paagi mahimo nato kana.

Si Pablo nagtambag: “Mahimong mga tigsundog sa Diyos, ingon nga hinigugmang mga anak, ug magpadayon sa paglakaw diha sa gugma, ingon nga si Kristo nahigugma usab kaninyo ug nagtugyan sa iyang kaugalingon alang kaninyo.” (Efe. 5:1, 2) Kita ‘nagpadayon sa paglakaw diha sa gugma’ kon ipakita nato kini nga hiyas sa tanang bahin sa atong kinabuhi. Ipakita nato kini nga gugma diha sa atong binuhatan, dili lang sa pulong. Si Juan misulat: “Minahal nga mga anak, maghigugmaay kita, dili pinaagi sa pulong ni sa dila, kondili sa buhat ug sa kamatuoran.” (1 Juan 3:18) Pananglitan, kon kita naglakaw diha sa gugma sa Diyos ug sa silingan, mapalihok ta sa pagsangyaw sa “maayong balita sa gingharian.” (Mat. 24:14; Luc. 10:27) Kita naglakaw usab diha sa gugma kon kita mapailobon, maluloton, ug mapinasayloon. Busa, ang Bibliya nagtambag: “Ingon nga si Jehova kinabubut-on nga nagpasaylo kaninyo, buhata usab ninyo ang ingon.”​—Col. 3:13.

Apan, ang tinuod nga gugma wala magpasabot nga konsentihon ang sayop nga binuhatan. Pananglitan, aron pahilomon ang naghilak nga bata, patumanan tingali sa ginikanan ang iyang anak. Pero ang ginikanan nga tinuod nga nahigugma sa iyang anak modisiplina kon gikinahanglan. Sa susama, ang Diyos gugma, apan “ang gihigugma ni Jehova iyang ginadisiplina.” (Heb. 12:6) Kon kita maglakaw sa gugma, mohatag usab kitag nahiangayng disiplina kon gikinahanglan. (Prov. 3:11, 12) Siyempre, sa pagbuhat nato niana, angay natong hinumdoman nga kita makasasala usab ug posibleng dili makapakitag gugma. Busa, kitang tanan may pauswagonon maylabot sa pagpakitag gugma. Sa unsang paagi mahimo nato kini? Atong konsiderahon ang tulo ka paagi.

Una, pangayo sa Diyos ug balaang espiritu, nga nagapatunghag gugma. Si Jesus miingon nga si Jehova mohatag ug “balaang espiritu niadtong nagapangayo kaniya.” (Luc. 11:13) Kon kita moampo alang sa balaang espiritu ug maningkamot sa “paglakaw pinaagi sa espiritu,” mahimo tang mas mahigugmaon. (Gal. 5:16) Pananglitan, kon ikaw ansiyano, makapangayo kag balaang espiritu aron matabangan ka sa paghatag ug Kasulatanhong tambag sa mahigugmaong paagi. O kon ginikanan ka, makahangyo ka nga tabangan ka sa balaang espiritu sa Diyos sa pagdisiplina sa imong mga anak, dili sa kasuko, kondili diha sa gugma.

Ikaduha, hunahunaa kon sa unsang paagi gipakita ni Jesus ang gugma bisag gipasipalahan siya. (1 Ped. 2:21, 23) Angay natong hunahunaon ang ehemplo ni Jesus ilabina dihang kita gibuhatag dili maayo o nakasinatig inhustisya. Nianang panahona, maayong pangutan-on ang kaugalingon, ‘Unsa kahay buhaton ni Jesus?’ Ang sister nga si Leigh nakaamgo nga ang paghunahuna niana nakatabang niya sa pagpamalandong sa wala pa siya molihok. Siya miingon: “Kas-a, usa sa akong kauban sa trabaho ang nagpadalag e-mail sa akong kaubanan nga naghisgot ug negatibong komento bahin nako ug sa akong trabaho. Nasakitan kaayo ko. Pero nakapangutana ko sa kaugalingon, ‘Unsaon nako pagsundog si Jesus sa akong pagpakiglabot niining bayhana?’ Human mapalandong kon unsa kahay buhaton ni Jesus niining situwasyona, nakadesisyon kong palabyon na lang kini ug dili padak-on. Sa ulahi, nahibal-an nako nga duna diay siyay seryosong sakit ug na-stress pag-ayo. Nakaingon ko nga lagmit wala niya tuyoa ang iyang giingon sa e-mail. Ang paghunahuna sa ehemplo ni Jesus nakatabang nako sa pagpakita usab ug gugma ngadto sa akong katrabaho.” Oo, kon atong sundogon si Jesus, kanunay tang magpakitag gugma.

Ikatulo, ugmara ang nagsakripisyo sa kaugalingong gugma, nga mao ang ilhanan sa matuod nga mga Kristohanon. (Juan 13:34, 35) Niining bahina, ang Kasulatan nagdasig nato sa paghupot sa samang “tinamdan sa pangisip” nga nabatonan ni Jesus. Sa pagbiya sa langit, “iyang gihaw-asan ang iyang kaugalingon” alang kanato, bisan “hangtod sa kamatayon.” (Filip. 2:5-8)  Samtang atong sundogon ang iyang nagsakripisyo sa kaugalingong gugma, ang atong panghunahuna ug pagbati mahimong sama nianang kang Kristo, ug mapalihok ta sa pag-una sa kaayohan sa uban. Unsa pay laing benepisyo sa pag-ugmad ug gugma?

Daghan ang benepisyo kon magpakita tag gugma. Konsideraha kining duha ka pananglitan:

• INTERNASYONAL NGA PANAG-IGSOONAY: Tungod sa atong gugma sa usag usa, nahibalo ta nga bisag unsang kongregasyona ang atong bisitahon sa tibuok yuta, mainiton tang abiabihon sa mga igsoon. Panalangin gayod nga higugmaon kita sa ‘tibuok kapunongan sa atong mga igsoon sa kalibotan’! (1 Ped. 5:9) Makita lang ang maong gugma diha sa katawhan sa Diyos.

• KALINAW: Kon kita “mag-inantosay sa usag usa diha sa gugma,” atong matagamtam ang “nagahiusang bugkos sa pakigdait.” (Efe. 4:2, 3) Maeksperyensiyahan nato kini nga pakigdait sa atong mga tigom, asembliya, ug kombensiyon. Mouyon gyod ka nga talagsaon ang maong kalinaw bisan pa sa nagkabahinbahin nga kalibotan karon. (Sal. 119:165; Isa. 54:13) Pinaagi sa pagpakigdait sa uban, gipakita nato ang kalalom sa atong gugma kanila, nga makapalipay sa atong langitnong Amahan.​—Sal. 133:1-3; Mat. 5:9.

Si Pablo misulat: “Ang gugma nagapalig-on.” (1 Cor. 8:1) Sa unsang paagi? Sa ika-13 nga kapitulo sa unang sulat ni Pablo sa mga taga-Corinto​—nga gitawag sa pipila ug “Salmo sa Gugma”—​gisaysay sa apostol kon sa unsang paagi nagapalig-on ang gugma. Ang usa ka rason, giuna niini ang kaayohan sa uban. (1 Cor. 10:24; 13:5) Dugang pa, kay ang gugma mahunahunaon, mabination, mapailobon, ug maluloton, kini nakapahimo sa pamilya nga mahigugmaon ug nakapahiusa sa kongregasyon.—Col. 3:14.

Ang atong gugma sa Diyos mao ang labing bililhon ug makapalig-ong gugma sa tanan. Kana nga gugma naghiusa sa mga tawo nga lainlaig kagikan, rasa, ug pinulongan diha sa malipayong pag-alagad kang Jehova “abaga sa abaga.” (Sof. 3:9) Magmadeterminado ta sa pagpakita niining bililhong bahin sa bunga sa balaang espiritu sa Diyos adlaw-adlaw.