JEHOVA ka hakili senu ye ciden Pol lasun ka kuma jogo kɔnɔntɔn koo la. U be sɔrɔ hakili senu barika la (Gal. 5:22, 23, ABM). O jogo ɲumanw bɛɛ lajɛnnin be weele ko “Ni [wala hakili] Senu den.” * N’an be n’o jogow ye, o lo b’a yira ko an ye ‘mɔgɔya kura’ don an yɛrɛ la (Kɔlɔs. 3:10, ABM). N’u be yiri ladon ka ɲɛ, a be den. O cogo kelen na, jogo ɲumanw bena kɛ an na, n’an be ni hakili senu ye.—Zab. 1:1-3.

Ciden Pol kɔnna ka kuma kanuya lo koo la. Nafa juman b’o jogo la? Pol y’a fɔ ko ni kanuya tɛ ale la, a “tɛ foyi ye.” (1 Kor. 13:2, ABM). Kanuya ye mun lo ye? An be se ka kɛ ni kanuya ye ani k’o jogo yira cogo di loon o loon?

A ka gwɛlɛ k’a ɲɛfɔ tigitigi kanuya ye min ye. Nka, Bibulu b’a ɲɛfɔ kanuya be yira cogo min na. Ɲɛyirali fɛ, a fɔra ko kanuya be mɔgɔ min na, “o tigi be muɲuli kɛ,” a be “koɲuman kɛ” ani a “be nisɔndiya tiɲɛko le la. A be koo bɛɛ yafa, a be la bɛɛ la, a be la koo bɛɛ la, a be koo bɛɛ muɲu.” Kanuya fana b’a to tɔɔw koo be diya a tigi ye kosɔbɛ, a b’a janto u la sɔbɛ la ani a b’a masiri u la kosɔbɛ. Nka, kanuya tɛ mɔgɔ min na, o tigi ye ɲango ni kuncɛba ye. O tigi fana ye hasiri ye, a be kɛwale juguw kɛ, a be dimi mara ani a tɛ yafa. Sanni ka kɛ n’o jogo juguw ye, an b’a fɛ k’a yira mɔgɔw la ko an b’u kanu sɔbɛ la. O kanuya “t’a yɛrɛ dama nafa ɲini.”—1 Kor. 13:4-8.

“N’i ko Ala, i ko kanuya le.” O kɔrɔ ko kanuya be bɔ Jehova lo yɔrɔ (1 Zan 4:8). A ka danfɛnw n’a ka kɛwalew bɛɛ b’a ka kanuya yira. Jehova ye Yezu ci a nana tɔɔrɔ ka sa an kosɔn. O cogo la, a y’a yira cogo kabakoman na ko a b’an kanu. Ciden Zan y’a fɔ ko: “Dencɛ kelenpe min be Ala fɛ, a y’o ci diɲɛ na waasa an ka balo ale barika la. Ala y’a ka kanuya yira an na ten le. Kanuya filɛ nin ye. A ma kɛ i n’a fɔ anw ye Ala kanu! Ale lo y’an kanu k’a Dencɛ ci an ma. An ka hakɛw yafara ale ka yɛrɛ saraka barika la.” (1 Zan 4:9, 10). Ala ka kanuya barika la, an ka jurumuw be se ka yafa, an be ni jigiya ye ani an be se ka ɲɛnamaya sɔrɔ.

Yezu fana y’a yira ko a b’an kanu. A sɔnna k’a niin saraka walisa ka Ala sago dafa. Ciden Pol y’a sɛbɛ ko: “[Yezu] y’a fɔ ko: ‘Ne filɛ, ne nana janko k’i sago kɛ.’ . . . A ye Ala sago kɛ k’a yɛrɛ saraka siɲɛ kelenpe minkɛ, . . . anw saniyara o le barika la.” (Eburuw 10:9, 10). Adamaden si tɛ se ka kanuya yira cogo kabakoman na ten. Yezu ko: “K’i yɛrɛ nii di i teriw kosɔn, kanuya wɛrɛ te yen min ka fisa n’o ye.” (Zan 15:13). Jehova ni  Yezu ye kanuya min yira, yala an adamaden dafabaliw be se k’o ɲɔgɔn kɛ wa? Ɔnhɔn. An k’a filɛ an be se k’o kɛ cogo min na.

Pol y’an jija ko: “Aw ka banba ka Ala ladege, bari aw y’a deenw ye minw koo ka d’a ye. Aw ka koo bɛɛ kɛ ni kanuya ye, i n’a fɔ Krista, ale min y’an kanu k’a yɛrɛ di ka kɛ saraka ye an kosɔn.” (Efɛz. 5:1, 2). Walisa ka “koo bɛɛ kɛ ni kanuya ye,” fɔɔ an ka kanuya yira an ka ɲɛnamaya faan bɛɛ la. An t’a fɔ dɔrɔn ko an be mɔgɔw kanu, nka an b’o yira an ka kɛwalew lo fɛ. Zan y’a sɛbɛ ko: “Ne deenw, an kan’a fɔ an daa la dɔrɔn ko an tɔɲɔgɔn koo ka di an ye. Nga an k’a yira tiɲɛ na n’an ka kɛwaliw ye.” (1 Zan 3:18). Ɲɛyirali fɛ, an be Masaya “kibaru diman” fɔ sabu an be Jehova n’an mɔgɔɲɔgɔnw kanu (Mat. 24:14; Luka 10:27). An b’a yira fana ko an be koow kɛ ni kanuya ye n’an be muɲu, ka ɲumanya kɛ ani ka yafa. Bibulu ko an ‘ka yafa ɲɔgɔn ma i n’a fɔ Ala fana yafara an ma cogo min na.’—Efɛz. 4:32.

N’an be ladili di mɔgɔw ma ani k’u kolo, o kɔrɔ tɛ ko an t’u kanu. Ɲɛyirali fɛ, ni bangebaga dɔw deen be kasira, deen be min fɛ, u b’o lo kɛ walisa a k’a daa je. Nka, bangebaga min b’a deen kanu tiɲɛn na, a be lɔ kelen kan n’a bɛnnin lo. O cogo kelen na, hali ni Jehova ye kanuya ye, ‘mɔgɔ min koo ka di a ye, a b’o le ladi.’ (Eburuw 12:6). N’an be koow kɛ ni kanuya ye, an bena mɔgɔw ladi n’a bɛnnin lo (Talenw 3:11, 12). Nka, an k’a to an hakili la ko an bɛɛ ye jurumutɔw ye ani ko an man teli ka koow kɛ ni kanuya ye. O kama, an k’a ɲini k’an ka kanuya yiracogo fisaya. An be se k’o kɛ cogo di? An ka cogo saba lajɛ.

Fɔlɔ, an ka hakili senu deli Ala fɛ. Hakili senu bena an dɛmɛ ka kɛ ni kanuya ye. Yezu y’a fɔ ko Jehova be hakili senu “di a daalibagaw ma.” (Luka 11:13). N’an be hakili senu deli Jehova fɛ ani n’an b’an jija ka tagama hakili senu “sago la,” an bena to ka koow kɛ ni kanuya ye kosɔbɛ (Gal. 5:16). Ɲɛyirali fɛ, diinan mɔgɔkɔrɔ dɔ be se ka hakili senu deli Jehova fɛ walisa ka basigi Bibulu kan ka ladiliw di tɔɔw ma ni kanuya ye. Bangebagaw fana be se ka hakili senu deli Ala fɛ walisa u ka se k’u deenw kolo ni kanuya ye, u kana o kɛ ni dimiya ye.

Filanan, miiri k’a filɛ Yezu ye kanuya yira cogo min na hali n’u tun b’a darabɔra (1 Piyɛri 2:21, 23). An ka miiri Krista ka ɲɛyirali koo la, sanko ni dɔ y’an hakɛ ta wala ni dɔ ye tilenbaliyako kɛ an na. O koo ɲɔgɔn na, an ka ɲi k’an yɛrɛ ɲininga ko: “Yezu tun bena mun lo kɛ do?” Balimamuso Leigh ko n’ale b’a yɛrɛ ɲininga o cogo la, o b’a dɛmɛ ka miiri ka sɔrɔ ka koow kɛ. A ko: “Loon dɔ, n’ ka baarakɛɲɔgɔn dɔ ye kuma juguw sɛbɛ ne ni n’ ka baara koo la e-mail kɔnɔ ani k’o ci n’ ka baarakɛɲɔgɔn tɔɔw ma. O digira n’ na yɛrɛ le! N’ ye n’ yɛrɛ ɲininga ko: ‘Ne be se ka Yezu ladegi cogo di?’ N’ miirila k’a filɛ Yezu tun bena min kɛ o koo ɲɔgɔn na. O kɔ, n’ y’a latigɛ ko n’ tɛna o koo jati. Kɔfɛ, n’ y’a faamu ko bana jugu dɔ tun b’o tigi la ani o tun b’a hakili ɲagamina kojugu. N’ y’a faamu fana ko n’a sɔrɔ a tun ye min sɛbɛ, ale yɛrɛ tun t’o lo miirila. Yezu tun be kanuya yira hali n’u tun b’a darabɔra. N’ miirila o la ani o ye n’ dɛmɛ k’o kanuya ɲɔgɔn yira n’ ka baarakɛɲɔgɔn na.” Tiɲɛn na, n’an be Yezu ladegi, an bena to ka koow kɛ ni kanuya ye.

Sabanan, kanuya min b’an lasun k’an yɛrɛ saraka tɔɔw kosɔn, an k’a ɲini ka kɛ n’o kanuya ye. O lo b’a yira ko an ye kerecɛn sɔbɛw ye (Zan 13:34, 35). O lo kosɔn, Bibulu b’an jija ko “sɔɔn min tun be Yezu Krista la,” an k’a ɲini ka kɛ n’o ye. Lɔyɔrɔ min tun be Yezu fɛ sankolo la, a y’o “bɛɛ to yen” anw  kosɔn “fɔɔ ka taga se saya ma.” (Filip. 2:5-8). N’an b’a ɲini k’o kanuya ɲɔgɔn ladegi, an ka miiriyaw n’an dusukunnataw bena kɛ i ko Yezu taw. Ka fara o kan, o bena an lasun ka tɔɔw ka nafa lo ɲini fɔlɔ. Nafa wɛrɛ jumanw lo b’a la ka kɛ ni kanuya ye?

N’an be kanuya yira, o nafa ka bon kosɔbɛ. An k’u fila lajɛ:

• BALIMAYA, DUNIƝA KURU BƐƐ KƆNƆ: Komi an be ɲɔgɔn kanu, n’an tagara duniɲa yɔrɔ o yɔrɔ la kafo dɔ kɔnɔ, an balimaw bena an bisimila koɲuman. An “balima minnu bɛ diɲɛ la,” u b’an kanu. O ye duga ye dɛ! (1 Piyɛri 5:9, ABM). O kanuya ɲɔgɔn be sɔrɔ Ala sagokɛlaw dɔrɔn lo cɛ.

• HƐƐRƐ: N’an be “ɲɔgɔn dɛmɛdɛmɛ kanuya la,” o lo bena an dɛmɛ ka to “hɛrɛ” la (Efɛz. 4:2, 3). An b’o hɛɛrɛ diyabɔ an ka lajɛnw ni lajɛnbaw la. O hɛɛrɛ ɲɔgɔn tɛ yen bi duniɲa ɲagaminin nin kɔnɔ (Zab. 119:165; Ezayi 54:13). N’an b’a ɲini ka to hɛɛrɛ la ni tɔɔw ye, an b’a yira ko an b’u kanu kosɔbɛ. O lo ka di an sankolola Faa ye.—Zab. 133:1-3; Mat. 5:9.

Pol y’a sɛbɛ ko: “Kanuya bɛ dɔ fara mɔgɔ wɛrɛw barika kan.” (1 Kor. 8:1, ABM). 1 Korɛntikaw sapitiri 13 kɔnɔ, Pol y’a ɲɛfɔ kanuya b’o kɛ cogo min na. Kanuya be mɔgɔ wɛrɛw nafa lo ɲini (1 Kor. 10:24; 13:5). A b’a to fana an be miiri ka sɔrɔ ka koow kɛ, an b’an janto tɔɔw la, an be muɲu ani ka ɲumanya kɛ. O la, denbayamɔgɔw koo be diya ɲɔgɔn ye kosɔbɛ ani bɛɛn min be kafo kɔnɔ, o be sabati.—Kɔlɔs. 3:14.

An be ni kanuya min ye Ala koo la, o nafa ka bon kosɔbɛ ani o be dɔ fara mɔgɔ wɛrɛw barika kan. Mɔgɔ minw bɔyɔrɔ, u siyaw ani u ka kaan tɛ kelen ye, o kanuya b’u kaan bɛɛn k’u kɛ kelen ye. O b’a to u ninsɔndiyanin lo ka Jehova bato ni “dusu kelen ye.” (Sof. 3:9). Kanuya ye Ala ka hakili senu deen faan dɔ ye. An k’an jija k’o jogo yira loon o loon!