JEHOVÁ ohaika apóstol Páblope 9 kualida oúva espíritu sántogui (Gál. 5:22, 23). La Biblia ohenói koʼã kualidápe “umi mbaʼe porã oúva Ñandejára espíritugui” * (elee pe nóta). Entéro kristiáno oreko vaʼerã koʼã kualida ikatu hag̃uáicha oñemonde pe teko pyahúgui (Col. 3:10). Peteĩ yvyramáta ningo hiʼa itiempoitépe oñeñangarekóramo hese. Upéicha avei peteĩ persóna ohechaukáta umi kualida porã ohejáramo Jehová espíritu sánto oipytyvõ chupe (Sal. 1:1-3).

Pe primera kualida Pablo omensiona vaʼekue haʼe hína mborayhu. ¿Mbaʼérepa iñimportanteterei ko kualida? Pablo heʼi kuri haʼe ndoporohayhúiramo ndahaʼeiha “mbaʼevete” (1 Cor. 13:2). Péro, ¿mbaʼépa heʼise pe mborayhu? ¿Mbaʼépa jajapo vaʼerã japorohayhuve hag̃ua ha mbaʼéichapa ikatu jahechauka upéva káda día?

Hasyeterei ningo jaexplika hag̃ua mbaʼépa heʼise pe mborayhu, péro la Biblia heʼi mbaʼéichapa peteĩ persóna ikatu ohechauka oporohayhuha. Por ehémplo, peteĩ persóna oporohayhukuaáva “ipasiénsia ha imbaʼeporã” ha ovyʼa pe añeteguáre. Avei “ogueropuʼaka opa mbaʼe, oguerovia opa mbaʼe, ohaʼarõ opa mbaʼe ha oaguanta opa mbaʼe”. Pe persóna oapresia hapichápe ipyʼaite guive, ojepyʼapy hese, ha notraisionái iñamígope. Péro umi ndoporohayhúiva katu iñenvidióso, ijorgullóso, ojapo umi mbaʼe hekopeʼỹva, ijegoísta, ipyʼaro ha noporoperdonaséi. Kristianokuéra oreko rangue koʼã sentimiénto vai, ohechauka ohayhuha hapichápe ha “nopensái ijehénte” (1 Cor. 13:4-8).

“Ñandejára haʼe [...] mborayhu” (1 Juan 4:8). Entéro mbaʼe haʼe ojapóva ohechauka siertoha upéva. Ñandejára ñanderayhuetereígui ombou itaʼýrape ko yvy ape ári ohasa asy ha omano hag̃ua ñanderehehápe. Apóstol Juan oskrivi vaʼekue: “Péicha ojehechauka Ñandejára mborayhu ñande kásope: Ñandejára ombou Itaʼýra peteĩete ko múndope, ikatu hag̃uáicha haʼe rupive jahupyty pe jeikove. Pe mborayhu ndeʼiséi ñande jahayhu hague Ñandejárape, síno haʼe la ñanderayhu vaʼekue ha ombou Itaʼýrape oñemeʼẽ hag̃ua sakrifísioramo, ikatu hag̃uáicha ojeheja rei ñande pekádo ha jaiko porã jey hendive” (1 Juan 4:9, 10). Ñandejára ñanderayhueterei rupi ñaneperdona, omeʼẽ ñandéve esperánsa ha ikatúta jaikove opa árare.

Jesús oĩ kuri dispuésto omeʼẽvo hekove ojapo hag̃ua Ñandejára rembipota, ha péicha ohechauka ohayhuha entéro yvypórape. Pablo heʼi vaʼekue: “Ñandejára ‘oipotágui’, ñande ñañemomarangatu kuri Jesucristo osakrifika rupi hete una ves ha opa ára g̃uarã” (Heb. 10:9, 10). Ndaipóri ótra persóna ohechauka vaʼekue peichagua mborayhu. Jesús heʼi vaʼekue: “Ndaipóri mborayhu tuichavéva kóvagui: ñameʼẽ ñande rekove ñane amigokuéra rehehápe” (Juan 15:13). Upéicharõ, ¿ikatúpa ñande yvypóra imperfékto, jasegi Jehová ha Jesús ehémplo ha jahechauka japorohayhuha? Si ikatu. Jahechamína mbaʼéichapa jajapokuaa upéva.

Pablo heʼi porã vaʼekue: “Pehaʼangáke Ñandejárape, peẽ itaʼýra haʼe ohayhuetéva. Ha pesegíkena pejoayhu Cristo penderayhu haguéicha. Penderehehápe haʼe omeʼẽ hekove” (Efes. 5:1, 2). ¿Mbaʼépa heʼise “pesegíkena pejoayhu”? Heʼise japorohayhu vaʼerãha tódo el tiémpo, ha upéva ojekuaáta umi mbaʼe jajapóvare, ndahaʼéi jaʼévarente. Juan oskrivi vaʼekue: “Che raʼykuéra pohayhuetéva, aníke ñande jurúpente japorohayhuete guaʼu, síno jahechauka vaʼerã japorohayhu añeteha umi mbaʼe jajapóva rupive” (1 Juan 3:18). Por ehémplo, jahayhúramo Jehovápe ha ñande rapichápe japredikáta umi “marandu porã oñeʼẽva Ñandejára Rréinore” (Mat. 24:14; Luc. 10:27). Avei ñanepasiénsiata ñande rapicháre, ñanembaʼeporãta ha ñaporoperdonakuaáta. La Biblia omeʼẽ ñandéve ko konsého: “Jehová peneperdona haguéicha ipyʼaite guive, upéicha avei peẽ pejapo vaʼerã” (Col. 3:13).

Ñañemoñeʼẽ térã japorokorrehi haguére ndeʼiséi ndajaporohayhuiha. Por ehémplo, oĩ sy térã túa hasẽ jave ifamília omeʼẽntemava chupe la oipotáva. Péro tuakuéra ohayhu añetéva ifamíliape ndojapói upéva, okorrehíta guei chupe tekotevẽ jave. Upéicha avei, Jehová haʼéva mborayhu “okorrehi umi ohayhúvape” (Heb. 12:6). Jahechaháicha, japorokorrehi jave jahechauka avei japorohayhuha (Prov. 3:11, 12). Péro ani ñanderesarái ñaneimperfektoha, upévare siémpre tekotevẽta ñamehora algúna kósape ikatu hag̃uáicha jahechauka mborayhu. ¿Mbaʼépa ikatu ñanepytyvõ upearã? Jahechamína mbohapy mbaʼe ñanepytyvõtava japorohayhuve hag̃ua.

Primero. Jajerure Ñandejárape tomeʼẽ ñandéve ijespíritu sánto. Jesús heʼi vaʼekue Jehová omeʼẽtaha “espíritu sánto umi ojerurévape chupe” (Luc. 11:13).Upévare ikatu ñakonfia jajerurérõ chupe ijespíritu ha jasegírõ jaiko “pe espíritu poguýpe”, jahechauka porãvetaha pe mborayhu (Gál. 5:16). Por ehémplo, reservíramo kómo ansiáno kongregasiónpe, ikatu rejerure espíritu sánto reñemoñeʼẽ hag̃ua mborayhúpe umi ermánope la Biblia rupive. Oiméramo nde haʼe peteĩ túa, rejerurekuaa Ñandejárape ijespíritu rekorrehi hag̃ua hendaitépe ha mborayhúpe ne famíliape, ponóike rejapo upéva pochy reheve.

Segundo. Iporã jajepyʼamongeta mbaʼéichapa Jesús ohechauka vaʼekue oporohayhuha ojetrata vaíramo jepe chupe (1 Ped. 2:21, 23). Peichahágui oĩramo ojapóva algúna kósa ñanemoñeñandu vaíva, térã ñapensáramo ojejapo hague ñanderehe peteĩ inhustísia, iporã ñañeporandu: “¿Mbaʼépa ojapóne raʼe Jesús ko situasiónpe?”. Ko porandu oipytyvõiterei vaʼekue peteĩ ermána héravape Leigh, pórke omokyreʼỹ chupe opensa raẽ hag̃ua ojapo mboyve peteĩ mbaʼe. Haʼe heʼi: “Peteĩ jey, che kompañéra de traváho omondo peteĩ mensáhe umi ótro che kompañerokuérape oñeʼẽ vaihápe cherehe ha pe traváho ajapóvare. Chemoñeñanduvaieterei ningo upéva. Péro upéi añeporandu: ‘¿Mbaʼépa ojapóne raʼe Jesús oĩ rire che lugárpe?’. Apensa porã rire upévare, adesidi ambohasa reitanteha la oiko vaʼekue. Upéi añentera upe moméntope che kompañéra de traváho ojepyʼapyeterei hague oikóvo pórke oreko peteĩ mbaʼasy igráveva. Upémarõ apensa oiméne hag̃ua haʼe noñemeʼẽinte raʼe enkuénta la heʼívare. Ajepyʼamongeta mbaʼéichapa Jesús ohechauka oporohayhuha oñemaltratáramo jepe chupe. Upéva chepytyvõ atrata porã hag̃ua che kompañéra de traváhope ha ahechauka hag̃ua mborayhu”. Ñande avei jasegírõ Jesús ehémplo, akóinte jahechaukáta jahayhuha ñande rapichápe.

Tercero. Ñañehaʼãmbaite jajesakrifika ñande rapichakuéra rehehápe. Peichagua mborayhu ohechauka umi kristiáno tee (Juan 13:34, 35). La Biblia ñanemokyreʼỹ ñapensa hag̃ua “Cristo Jesús opensa haguéicha”. Haʼe ningo oiko vaʼekue yvágape ou mboyve ko yvy ape ári, péro “oheja opa mbaʼe oreko vaʼekue” ha ou omano ñanderehehápe (Filip. 2:5-8). Jasegíramo  Jesús ehémplo, ñapensáta haʼe opensaháicha, mborayhúpe jajesakrifikáta ñande rapichakuéra rehehápe ha ñamotenondéta haʼekuéra oikotevẽva. ¿Mbaʼérepa iporã jahechauka japorohayhuha?

Jahechaukáramo japorohayhuha, jahupyty hetaiterei mbaʼe porã. Jahechamína mokõi mbaʼe.

• OPÁRUPI JAJOAYHU OÑOERMÁNOICHA. Ñande ningo jajoayhu, upévare jaikuaa porã javisitáramo ñane ermanokuéra tahaʼe haʼéva kongregasionguápe, ñanderresivi porãtaha hikuái. Añetehápe ñane ermanokuéra oĩva ko yvy tuichakuére haʼe peteĩ vendisión ñandéve g̃uarã pórke enterove jajoayhu (1 Ped. 5:9). Peichagua mborayhu Jehová puévlope añoite jahecha.

• PYʼAGUAPY. Ñanepasiénsia rupi ojuehe, jaiko “pyʼaguapýpe oñondivepa” ha “peteĩ ñeʼẽme” (Efes. 4:2, 3). Upéva jahechakuaa ñaime jave rreunionhápe ha asambleahápe. Peichagua pyʼaguapy ndojehecháiva moõve ko múndope (Sal. 119:165; Is. 54:13). Ñañehaʼã jave jajogueraha porã ñande rapichakuérandi jahechauka jahayhuha chupekuéra, ha upéva ombovyʼaiterei Jehovápe (Sal. 133:1-3; Mat. 5:9).

Pablo heʼi vaʼekue: “Pe mborayhu katu ñanemombarete” (1 Cor. 8:1). Primera a los Corintios kapítulo 13-pe Pablo omyesakã mbaʼépa heʼise upéva. Ñepyrũrã heʼi pe oporohayhúva ojapoha umi mbaʼe ideprovéchotava hapichápe (1 Cor. 10:24; 13:5). Upéi heʼi avei pe oporohayhúva ipasiensiaha, imbaʼerechakuaa ha iñamávle. Koʼã mbaʼe oipytyvõ ikatu hag̃uáicha umi família ojoayhu ha oĩ hag̃ua pyʼaguapy kongregasiónpe (Col. 3:14).

Jahechaháicha jahayhu rupi Ñandejárape ikatu jahupyty heta mbaʼe iporãitereíva. Pe mborayhu ñanepytyvõ ikatu hag̃uáicha vyʼápe ñamombaʼeguasu Jehovápe oñondivepa, haʼéramo jepe de diferénte kultúra, rrása ha ñañeʼẽramo jepe diferénte idióma (Sof. 3:9). Ñañehaʼãkena káda día jahechauka ko kualida porãite oúva espíritu sántogui.